Novas

O concello do Porriño é o segundo de Galicia no que máis medra o saldo vexetativo  e o primeiro da provincia de Pontevedra, segundo os datos difundidos este martes polo Instituto Galego de Estatística (IGE), referentes a o ano 2017.

Dacordo cos mesmos, os nacementos superaron ás defuncións no Porriño en 57 persoas, so por detrás de Ames,e moi por diante dos resto dos concellos pontevedreses, que en conxunto perden 2.485 habitantes, e dos da Área Metropolitana de Vigo, na que houbo 695 mortes máis que alumeamentos.

Tres anos consecutivos con saldo positivo pasando a ser o segundo concello galego

A alcaldesa, Eva García de la Torre, salienta que no ano 2017 rexistráronse no Porriño 206 nacementos e 149 defuncións; en 2016 o saldo  demográfico do Porriño foi de 45 nacementos máis que defuncións (por detrás dos concellos de  Ames e de Arteixo, en A Coruña); en 2015 os recen nados tamén superaron aos mortos en 57 persoas- daquela por detrás dos dos concellos coruñeses.

“O ano pasado xa superamos a Arteixo e O Porriño é o segundo concello de Galicia onde hai máis novos habitantes que mortes, un dato que sumado ao incremento da poboación, certificado polo INE, fará que a finais deste 2018 esteamos en condicións de superar, oficialmente os 20.000 habitantes”.

So 13 dos 313 municipios, un 4,3%, rexistraron o ano pasado máis nacementos que mortes e no conxunto de Galicia os mesmos foron de 18.312- un 3,9% máis- fronte a 31.676 defuncións,  o que supón que a finais do ano pasado había 13.364 galegos menos, o que encadea 25 anos consecutivos de perda de poboación.

A esta situación non son alleas as as grandes cidades galegas: en todas elas hai máis mortes que nacementos, fronte ao aumento do número de habitantes do Porriño, que a finais de 2016 xa superara en poboación total a Moaña a concello coruñés de Boiro e ao lucense de Monforte.

A alcaldesa, Eva García de la Torre, vén de amosar a súa “satisfacción e ledicia” polo feito de que, finalmente, Frigolouro regularizase a situación dos falsos autónomos de Servicarne que, dende este mércores, día 1 de agosto, pasarán a formar parte do plantel coma traballadores fixos, tal e como lle instaba a resolución da Inspección de Traballo e da Tesourería da Seguridade Social.

García de la Torre salienta que o Goberno local do Porriño, en conxunto, e ela mesma, coma alcaldesa “en representación da maioría da Corporación, sempre dimos o noso apoio total e incondicional ás traballadoras e traballadores de Servicarne que hoxe, finalmente, ven coma se recoñecen os seus dereitos lexítimos”.

A alcaldesa lembra que “en todo momento estivemos seguros de que a xustiza daría a razón a quen a ten”, como expuxera nas súas xuntanzas cos responsábeis da empresa e co conselleiro de Economía, Emprego e Industria, en agosto de 2016, ao que alertou da condicións moi precarias, duras e difíciles nas que estaban estas traballadoras e traballadores que soportaban unha situación intolerábel que, agora, “por fin queda resolta”.

A alcaldesa vén de convocar o Pleno do Concello para este martes, día 31 de xullo, ás 7 da tarde que, coma os anteriores, pode ser seguido en directo, por streaming, polas veciñas e veciños do Porriño, entrando no portal web municipal.

Membros da Policía Local do Porriño participaron este mes de xullo nos campamentos de verán do Concello- abertos a rapazas e rapaces de entre 3 e 12 anos de idade- co obxectivo de “reforzar a proximidade e a confianza cos máis pequenos”.

As actividades desenroladas pola Policía dividíronse en dúas partes: a primeira consistente na explicación das funcións dos axentes, normas de seguridade vial enfocadas ao uso da bicicleta coma vehículo e cal é o xeito de poñerse en contacto coa Policía Local en caso de necesidade, “subliñando sempre a idea de que un policía é un amigo”, indica o xefe do corpo, Daniel Rodríguez.

Doutra banda, os axentes desprazaron aos lugares nos que se celebran os campamentos distintos vehículos policiais: un furgón de atestados, coches e motos, nos que se explicaron ás rapazas e rapaces as súas particularidades, interactuando con elas e eles e respondendo as súas preguntas.

O xefe da Policía Local engade que estas actividades veñen de dar continuidade á ‘Campaña de Educación Vial’ que “realizamos cada ano en todos os centros de ensino do Porriño”.

Axentes da Policía Local do Porriño detiveron o pasado domingo, día 15, a un individuo de 38 anos de idade, que atopábase  fuxida da xustiza tentando evitar o seu ingreso en prisión e, deste xeito, forzar a prescrición da súa condena.

A orde de busca e captura para o seu traslado á prisión fora dictada polo Xulgado do Penal número 1 de Pontevedra, logo de que este home fora xulgado e atopado culpable dun Delito de Lesións.

Logo da súa detención, foi conducido, este luns, polos axentes ao Xulgado de Instrución nº 2 do Porriño, en función de garda, e dende o mesmo emitiuse a orde para o seu traslado á cárcere de A Lama.

Non é o primeiro arresto deste tipo que fai a Policía Local do Porriño este ano: o pasado mes de febreiro  fora detido un home que levaba un ano fuxido dende que o Xulgado do Penal número 3 de Vigo ordenase a súa entrada en prisión.

A Policía Local do Porriño dispón xa dun novo coche, adquirido polo sistema de ‘renting’, que vén tanto a iniciar a renovación do parque deste corpo, que conta con vehículos de máis de 15 anos de antigüidade algún deles superando os 350.000 quilómetros, coma a facer unha aposta polo coidado do medio ambiente.

O novo coche, un Citroen DS, modelo 5, que foi recibido pola concelleira de Seguridade, Lourdes Moure, e polo xefe da Policía, Daniel Rodríguez, supón que O Porriño pasa a ter un vehículo de que dispoñen moi poucos concellos e, ademais, segundo subliña o xefe da Policía, “mellora e actualiza os nosos medios, preserva a seguridade dos axentes e, o máis importante, mellora notablemente o servizo aos cidadáns”.

Os coches híbridos aportan beneficios para o medio ambiente grazas ao seus baixos consumos globais, á posibilidade de condución en modo EV (eléctrico) e as baixas emisión que emite á atmosfera.