A aprobación definitiva do contrato coa empresa “Soom Management”, nova concesionaria da Piscina Municipal do Porriño é un dos asuntos que se tratarán no pleno municipal ordinario que celebrará esta tarde a corporación local, a partir das 18 horas.
A aprobación provisoria desa adxudicación decidiuse en marzo e hoxe vai para a súa ratificación. No seu día aceptouse a proposta realizada pola mesa de contratación para adxudicar á firma “Soom Management” que foi a plica mellor valorada, cunha oferta anual de 508.000 € e o compromiso de subrogar ao persoal actual de 24 traballadores desa instalación deportiva.
Tamén os corporativos coñeceran a proposta da mesa de adxudicación da licitación do servizo de recollida de residuos sólidos urbanos e xestión do “Punto Limpo” do Concello, en favor da empresa “Valoriza Servizos Medio Ambientais”.
Ademais o temario da sesión inclúe media ducia de mocións que se especifican na orde do día que se adxunta no seguinte “pdf”.
Seis voluntarias e voluntarios que realizaran as súas prácticas de formación en atención de emerxencias, comezarán mañá mércores na Agrupación de Protección Civil do Porriño, ás ordes de Suso Gónzalez “Carrola”, responsable da unidade.
Están a realizar o curso de FP “Atención Sanitaria a múltiples vítimas e catástrofes” para obter o certificado de profesionalidade no ámbito da atención sanitaria. Os alumnos e alumnas, de idades comprendidas entre 22 e 50 anos, comezaron en febreiro a súa formación teórica que, agora, van completar con as prácticas na Agrupación de Protección Civil do Concello do Porriño.
Lourdes Moure, concelleira de Seguridade, encargouse de darlles a benvida ao Concello do Porriño onde cada un deles realizarán 120 horas de prácticas atendendo accidentes, emerxencias, servizos de orde en probas deportivas e outros eventos.
Estas prácticas realízanse ao abeiro dun convenio entre o centro de formación CIFP Manuel Antonio, de Vigo, e o Concello do Porriño.
Na presentación dos voluntarios, acompañaban á concelleira de Seguridade, o Inspector Xefe da Policía Local, Daniel Rodríguez, o responsable da Agrupación de Protección Civil, Suso Gónzalez Pexegueiro, e a titora dos alumnos, María del Carmen López, en representación do CIFP Manuel Antonio.
Eva García, alcaldesa do Porriño firmou este mediodía con Enrique Mastral, director xeral da empresa “Massilly Ibérica Iberembal”, a operación de compra venda dunha parcela municipal que a industria navarra adquire para construir unha fábrica no termo municipal.
O predio ten 13.335 metros cadrados de superficie dos que 10.668 son edificables con fins industriais. Localizase no PPI 7, na parroquia de Budiño. A firma compradora vai construir unha factoría de envases metálicos para conservas alimenticias. O director xeral da firma manifestou que “temos en marcha un importante proxecto de futuro para o seu desenvolvemento nos mercados de Galicia e Portugal”
“Masilly Ibérica IBEREMBAL” fora a única empresa que presentou plica no prazo de presentación de ofertas que o Concello do Porriño convocara e que rematou en decembro de 2020.
A operación é por un importe de 960.000 euros (máis IVE) o que suporá un ingreso moi importante para a tesorería municipal que “se destinará a diversos investimentos no concello para a mellora da calidade de vida da veciñanza”, manifestou a alcaldesa, Eva Garcia ao remate da firma.
O vindeiro pleno da corporación municipal do Porriño celebrarase o mércores 26 (18 horas) e volverá a ser público. Coa ocasión das restricións de aforamento e dado que o salón de plenos ten capacidade para 32 persoas, tan só se permitirán 10 persoas como público. As veciñas e veciños interesados en asistir deberán rexistrar a súa petición a través da aplicación “BandoMóvil O Porriño Informa”. Por estrito orde de chegada e ata esgotar a cota. No caso de non ter a aplicación, pódese descargar en “Google Play” ou na “App Store”. E tamén é posible comunicar a través do email, dende a a web https://www.bandomovil.com/porrino
A Audiencia Provincial de Pontevedra arquivou a causa xudicial emprendida por Alejandro Lorenzo, voceiro municipal do Partido Popular por suposta prevaricación administrativa contra a alcaldesa e o goberno municipal do Porriño. O feito denunciado foi a compra dos locais a “Promocións Guanabara” que realizou o Concello do Porriño para acomodar unha aula asocíada da UNED e outros servizos municipais.
A resolución da Sala II da Audiencia Provincial confirma o primeiro sobresemento e arquivo da denuncia que xa decidiu en febreiro deste ano o Xulgado de Instrucción número 2 de Porriño. E concorda tamén coa posición da Fiscalía que tamén pediu o arquivo.
Agora a sentenza da Audiencia Provincial confirma de xeito definitivo a resolución previa do xulgado de instrucción que xa concluíu que no procedemento para o alugueiro e posterior compra dos locais se axustara á normativa e aos prezos de mercado coa emisión dos informes técnicos municipais favorables. Asimesmo, o tribunal asume que “por ningures quedara constancia de que os devanditos alugueiros e compras fosen innecesarios ou estivesen orientados a beneficiar a terceiras persoas, xa que todos os locais están ben preto do Concello do Porriño e resultaban idóneos para as súas finalidades”.
E remata a resolución da Audiencia sinalando que “a circunstancia de que, se os alugueiros se iniciaron en xullo de 2017 e en marzo de 2018 os resolveron de mutuo acuerdo o Concello do Porriño e a empresa ‘Guanabara’, puidese resultar estrano que esta última, aínda así, reclamase os alugueiros daquel periodo poderá ser discutible todo o que se queira, máis, precisamente por isto e en ausencia doutros aspecto, exclúe o presunto delito de prevaricación administrativa que se pretendía”.
A sentenza da Audiencia Provincial notificada esta fin de semana, chega xusto despois de que o Partido Popular puxera en cuestión a honorabilidade da Alcaldesa Eva García por esas operacións inmobiliarias do Concello coa mercantil “Guanabara” e das acusacións verquidas polo seu voceiro no pleno extraordinario que se celebrou o pasado mércores, a instancias do grupo municipal do PP.
A alcaldesa valorou esta resolución xudicial “con gran satisfacción por que as cousas van poñendose no seu sitio” e tratase da segunda decisión xudicial nunha semana que remata con denuncias feitas polo PP baseadas en insidias e calumnias verquidas contra mín acusándome da comisión dun sinfín de delitos”.
“Agardo que cedo vexamos algunha resolución xudicial semellante no que atinxe a a causa principal (desbroces) que chegue á mesma conclusión que esta sentenza da Audiencia Provincial e a anterior do Tribunal de Contas do Reino, e polo tanto poidamos sair airosos de tantas insidias”, valorou García de la Torre.
A Feira do Libro do Porriño será a terceira que se celebra este ano na nosa comunidade e a primeira que terá lugar nun concello da provincia pontevedresa. O evento porriñés que cumprirá a súa quinta edición volverá ás rúas da nosa vila despois dun ano de parón forzoso pola pandemia.
Este mediodía celebrouse na Biblioteca Municipal a presentación en roda de prensa, coa asistencia de Cami Moreira, concelleira de Cultura; Victoria Alonso, deputada provincial delegada de Cultura e Carlos Blanco, da directiva da Federación de Libreiros de Galicia.
O representante do sector manifestou “o noso agradecemento ao Concello do Porriño, á Deputación e á Xunta de Galicia polo seu esforzo para retomar a celebración destas citas feriais que nos relanzan”.
Victoria Alonso felicitou aos organizadores “por sacar adiante estas feiras neste ano complexo” e “por darlle un contido a maiores contando coa presenza de autoras e autores nos stands e poñer en valor a importancia do sector e de seguir mercando libros”.
A deputada delegada de Cultura lembrou que “Deputación estará presente cun stand sen actividade mercantil, tan só vai ser un espazo expositivo onde teremos as publicacións nas que colaborou a institución provincial e para amosar a nosa programación cultural”.
Pola súa banda Cami Moreira reivindicou que a Feira do Libro do Porriño “contribuirá a visibilizar a esas escritoras que moitas veces están ao marxe e hai que facer porque sexan coñecidas e recoñecidas pola súa valía”.
A concelleira de Cultura expresou que “estamos moi contentos de ter nesta edición como pregoeiro a Juancho, un autor novel porriñés que ademais presentará e firmará o seu libro ‘Na procura do medo esquecido’”.
Por último, Moreira Fontán celebrou que eventos como a Feira do Libro do Porriño “fai que poidamos restablecer a nosa vida social, hábitos como o de mercar libros e polo tanto permite pasear polas rúas”, engadiu.
A Feira que se inaugurará o xoves 27, contará con cinco stands que se ubicarán na rúa peatonal fronte ao Concello e rematará o domingo 30 de maio.
A empresa que vai xestionar a futura escola infantil no Polígono Industrial A Granxa dispón de licenza municipal do Concello do Porriño para executar as obras de acondicionamento do local cedido pola Zona Franca. O espazo ten una superficie de 448 metros cadrados e o orzamento estimado das obras é de algo máis de 55.000 euros.
A documentación aportada pola mercantil que dirixe Beatriz Cabaleiro informouse favorablemente e a licenza de obra outorgouse con data de onte, 20 de maio, firmada polo concelleiro responsable de Infraestruturas, Pedro Pereira.
Zona Franca cedeu e entregou as chaves en abril de seis locais na planta baixa do Centro de Servizos en A Granxa onde a firma “Trastes” xestionará una escola infantil con 74 prazas para nenos e nenas de 0 a 3 anos, así como servizos complementarios de 3 a 8 anos.
A futura entrada en funcionamento desta gardería “atenderá unha vella demanda dos empresarios e traballadores dos polígonos industriais do Porriño. Como institucións públicas temos que favorecer e facilitar a conciliación familiar e laboral”, segundo declarou a alcaldesa, Eva García de la Torre.
O Concello do Porriño agarda iniciar en agosto as obras da rede de saneamento e pavimentación en Arrotea-Lameira, na parroquia de Pontellas, segundo as previsións que manexa Pedro Pereira, concelleiro responsable de Infraestruturas.
O proxecto actualmente atópase en fase de licitación. Aínda está aberto o prazo de presentación de ofertas que rematará o 7 de xuño.
O prazo de execución será de 3 meses e conta cun orzamento de 115.632 euros, que vai ser financiado polo “Plan Concellos 2021” da Deputación Provincial.
“A actuación vai permitir deixar rematadas as conexións coas actuais redes de subministración e saneamento do Porriño, a fin de conseguir un todo harmónico e interconectado”, segundo o concelleiro responsable.
A Oficina Municipal de Información á Xuventude xunto coa Concellería de Educación levan a cabo, ata o 31 de maio, a actividade “Mentoring para adolescentes: obradoiro sobre novas profesións, Pensando no meu Futuro”, que se imparte polos centros de ensino secundario do Porriño. Hoxe correspondíalle ao alumnado de 4º da ESO do IES Ribeira do Louro.
¿Cómo podemos tomar boas decisións sobre o noso futuro? ¿Que opcións temos? ¿Cómo podemos saber que é axeitado para nós?. Os adolescentes enfróntanse a moitas preguntas e vense na obriga de tomar decisión sobre os seus estudos case sen reflexionar ou investigar as mellores opcións para eles. Este obradoiro aborda o proceso de autocoñecemento e as novas profesións nun formato de duas horas. Neste tempo proporcionarase aos estudiantes unha visión de conxunto sobre as novas profesións que existen grazas á tecnoloxía, cales poden desenrolar en Galicia e como coinciden eses perfís profesionais coas súas habilidades e intereses naturais.
Indice de contidos:
Novas profesións relacionadas coa tecnoloxía: intelixencia artificial, automatización e robótica, etc.
Sectores productivos en Galicia e estudios relacionados.
Moocs e formación online gratuita.
Detección de fortalezas e definición de obxectivos.
Estes obradoiros (teórico-práctico de 2 horas) son impartidos dende o 13 de maio e chegarán a un total de 177 alumnos de 3º e 4º da ESO.
Este venres, ás 11,30 horas e nas instalacións da Biblioteca Municipal, terá lugar a presentación da V Feira do Libro do Porriño, un evento cultural que volve ás rúas da nosa vila despois dun ano de parón forzoso pola pandemia.
Representantes da Federación de Libreiros de Galicia; María Victoria Alonso, Deputada provincial delegada de Cultura; Cami Moreira. Concelleira de Cultura do Porriño e máis, Eva García De La Torre, Alcaldesa do Porriño serán as persoas encargadas de facer a presentación.
A Feira que contará con cinco stands que se ubicarán na rúa peatonal fronte ao Concello, comezará o vindeiro xoves día 27.
Concello do Porriño e Federación de Libreiros organizan este evento que recibe, ademais, os apoios da Xunta de Galicia e da Deputación Provincial de Pontevedra.
