Novas

O Concello expresa o seu pésame pola morte do atleta Alejandro Gómez

O Concello do Porriño expresa o seu pesar pola morte do atleta Alejandro Gómez e traslada as súas condolencias aos seus familiares e amigos. Sufría unha grave enfermidade que acabou hoxe coa súa vida, aos 53 anos.
Este atleta, alcumado como “Galgo de Zamans” acudía regularmente a Porriño e mantivo fortes lazos coa comarca da Louriña.
Alejandro Gómez foi o principal referente do atletismo na área de Vigo e un exemplo para xeracións de atletas do Porriño e doutros concellos.
Gómez foi un dos mellores atletas españois na décadas dos oitenta e dos noventa, presente en tres Xogos Olímpicos (Seúl 88, Barcelona 92 e Atlanta 96) e gañador de infinidade de probas.

 

31/01/2021 in Alcaldía, Deportes

O luns 1, corte do subministro de auga en Torneiros, por reparacións

O Concello anuncia que o vindeiro luns 1 de febreiro haberá un corte de subministro de auga en Torneiros, Trátase de traballos de mantemento da rede de abastecemento, a cargo do Consorcio de Augas do Louro.
Afectará aos edificios das fases 2, 4 e 5 do polígono de vivendas de Torneiros; tamén aos colexios “Antonio Palacios” e CPI da Ribeira; ao centro de educación especial de “Aceesca”; á escola infantil da rede “Galiña Azul” e, finalmente. ao Centro de Día, dependente do Consorcio Galego de Igualdade.
A estimación é que o corte de subministro sexa entre as 10 horas da mañá e as 12 do mediodía.

29/01/2021 in Alcaldía

O Concello renovará instalacións de alumeado exterior en núcleos do Porriño, Chenlo, Cans, Atios, Torneiros e Mosende por medio millón de euros

Eva Garcia firmou hoxe o decreto da Alcaldía de adxudicación dos contratos para a renovación das instalacións de alumeado, iluminación e sinalización exterior que se executaran en diversas zonas do termo municipal. Tanto en núcleos do Porriño como das parroquias de Chenlo, Cans, Torneiros, Atios e Mosende.

A actuación dividiuse en tres lotes de licitación. Suman en total un gasto de 519.767,91€ (429.560,25€ máis 90.207,66 € en concepto de IVE), que serán financiados con fondos FEDER para a transición enerxética e con recursos propios do Concello.

O lote 1, consistente na renovación de instalacións de iluminación exterior en núcleos do Porriño (A Gulpilleira, Carracido, A Senra, Malladoura, Carracido Amieiro, A Raposeira Urb e rúa Leandro Diz) e na parroquia de Cans (Confurco-A Buraca e A Graña), adxudicouse á UTE SANTOS HECTOR-SIMTEGAL cun orzamento de 175.450,00 (IVE incluído), cun prazo de execución de 3 meses.

O Lote 2, consistente na obra de renovación de instalacións de iluminación exterior na parroquia de Atios (A Insua, O Castro), na parroquia de Torneiros (Casal de Vello, A Relva e A Gándara) e na parroquia de Mosende (O Caeiro, Unif.Casal+Igrexa, Figueiras e A Costeira), adxudicouse á firma ELECTRICIDAD IN.M.A.C CONDADO SL, cun orzamento de
151.528,30€ (IVE incluído) e cun prazo de execución de 3 meses.

E por último, o Lote 3, para renovación de instalacións de iluminación exterior na parroquia de San Juan de Chenlo (Saramagal, A Granxa, Parada, O Penedo,Canadelo-O Toxal,As Cabreiras, A Ladeira-A Quinta e As Cales-As Abas) tamén á ELECTRICIDAD IN.M.A.C CONDADO SL, cun orzamento de 184.427,18€ (IVE incluído) e 3 meses de prazo de execución.

 

28/01/2021 in Alcaldía, Vías e obras

A Ordenanza de terrazas aprobada polo Concello regulará a ocupación de espazos públicos


O pleno da Corporación Municipal do Porriño aprobou, na sesión de onte, a Ordenanza Reguladora do Uso das Terrazas, cos votos a favor do PSOE, BNG, EU SON e UDDL. O PP abstívose.

Entrará en vigor ao día seguinte da súa publicación no Boletín Oficial da Provincia (BOPPO). A partir desa data, establecerase un prazo de regularización de tres meses.

Na exposición de motivos xustifícase que “O Concello do Porriño precisa dispor dunha Ordenanza Reguladora de ocupación de terreos de uso público con mesas e cadeiras cuxa finalidade é establecer os criterios básicos para a instalación de terrazas anexas aos establecementos de hostalería. Dita ordenanza intenta dar resposta ás novas necesidades e costumes da cidadanía, así como a novas demandas por parte do sector da hostalería. É evidente que nos últimos anos proliferou a ocupación do espazo público con terrazas vinculadas a establecementos de hostalería que non só favoreceu aos empresarios que as explotan, senón que tamén fomentan a relación social e potencian a actividade económica en xeral”.

A Ordenanza regula a ocupación de espazos públicos e non supón modificación da taxa fiscal.

A Ordenanza determina que non poderán instalarase terrazas nin en soportais nin en beirarrúas de anchura inferior a 3 metros. Entre as prohibicións que recolle a Ordenanza aprobada, non se permiten altofalantes ou calquera outro aparato difusor de son. Permítense televisores si teñen apagado o son.
Permitirase a instalación de calefactores móbiles ou aparellos análogos sen exceder o espazo autorizado para ocupar coa terraza. A súa instalación estará suxeita a licenza, que poderá solicitarse conxuntamente coa da terraza ou con posterioridade á mesma. Estes aparellos non necesitarán de ningún tipo de instalación fixa.

Sombrillas e toldos
Poderán instalarse sombrillas como elementos auxiliares da terraza: deberán ser pregables e desmontables, sen que se permita a súa suxeición ao pavimento mediante calquera clase de anclaxe. O voo das sombrillas, a altura respecto do chan e a publicidade que luzan, tamén estarán regulados nesta Ordenanza.
Permitirase a instalación de mamparas móbiles e a súa altura non poderá ser inferior a 1 metro nin superior a 1.5 metros, sendo polo menos os 50 cm superiores de material transparente. Estes elementos colocaranse sen realizar anclaxes ao pavimento e situáranse dentro do espazo autorizado a ocupar a terraza.
Tamén permitiranse a instalación de toldos, ou cubertas impermeables ao chan da vía pública sen ningunha fixación ao mesmo e sen posibilidade de pechar os laterais ou frontal do espazo cuberto.
Ademais a Ordenanza determina características do mobiliario, horarios de funcionamento e recollida, condicións de limpeza e recollida e un réxime de sancións por infraccións por ruídos ou outros motivos.

28/01/2021 in Alcaldía, Urbanismo, comercio e industria

Remata a pavimentación do camiño de Cavadas en Atios

No día de hoxe rematase de asfaltar o camiño de Cavadas, en Atios, segundo informa a Concellería de Infraestruturas.

Non obstante, o vindeiro luns continúan cos traballos de levantado de tapas de pozos e arquetas, segundo indicou Pedro Pereira, concelleiro responsable desta intervención.

A empresa “Fechi” foi a adxudicataria desta actuación que ten un orzamento de 59.436,19 €.
Este proxecto financiouse coas achegas do Plan Concellos 2020 da Deputación de Pontevedra.

28/01/2021 in Alcaldía, Urbanismo, comercio e industria, Vías e obras

O Concello suspende temporalmente o mercado ambulante, pecha parques infantís, recintos deportivos e centros culturais e anuncia unha nova liña de axudas á hostalería, comercio e autónomos

O Concello do Porriño suspenderá temporalmente o mercado ambulante durante as tres vindeiras semanas, segundo acordou hoxe a Comisión Municipal de Seguimento da Covid. Tamén durante ese período de tempo pecharanse os parques infantís e os recintos culturais, sociais e deportivos, conforme ás restricións que acordou a Xunta de Galicia e vixentes ata o 17 de febreiro.

A alcaldesa, Eva Garcia explicou que estas medidas locais de acompañamento ás restricións autonómicas “adóptanse para garantir a seguridade de todos limitando ao máximo a interacción e o contacto social”.

Por outra banda, a proposta do goberno municipal e co acordo dos participantes na Comisión Municipal de Seguimento, determinouse a celebración dun pleno municipal extraordinario para aprobar unha modificación orzamentaria para habilitar un fondo de axudas económicas directas, semellante ao que funcionou en 2020 e repartiu achegas por un importe total superior aos 80.000 €.

“A idea é axudar de xeito especial á hostalería, como sector máis damnificado polas restricións, pero tamén ao comercio e aos autónomos”, engadiu a alcaldesa.
Eva Garcia manifestou, tamén, que agarda “chegar a un consenso con todos os grupos políticos da corporación a contía desas axudas para que esta proposta saia coma unha iniciativa común de toda a corporación”.

27/01/2021 in Alcaldía, Cultura e festas, Deportes, Parques e xardíns

O Porriño presenta ao Plan Concellos un proxecto de humanización da rúa Manuel Rodriguez e tres novas redes de saneamento en Atios e Pontellas

O goberno municipal do Porriño presenta ao Plan Concellos 2021 da Deputación de Pontevedra catro proxectos que “apostan pola humanización das rúas e polo aumento da rede de saneamento nas parroquias”, segundo explicou Pedro Pereira, concelleiro de Infraestruturas.

Das catro propostas, a máis ambiciosa polo seu coste, é o proxecto de humanización da rúa Manuel Rodríguez. A actuación será no tramo desa rúa entre a confluencia coa rúa Xogo da Ola e a praza de San Sebastián.

 

As obras consistirán no levantamento do pavimento tanto na calzada coma nas beirarrúas; renovación das redes de pluviais e fecais; renovación da rede de alumeado público; renovación da rede de abastecemento; pre instalación para telecomunicacións e da rede de baixa tensión; nova pavimentación en granito e mobiliario e renovación da zona de xardíns.

O proxecto ten un orzamento de 391.322,95 € mais o IVE do 21% correspondente.

“Unha vez rematada a humanización deste tramo, a rúa Manuel Rodríguez terá un uso  totalmente peonil”, segundo avanzou o concelleiro de Infraestruturas.

O Concello tamén presentou para acollerse ás achegas da Liña 1 do Plan Concellos, tres actuacións nas parroquias “coas que seguimos avanzando no aumento da rede de saneamento no rural”, manifestou Pereira Fernández.

Son os seguintes:

Proxecto de saneamento no barrio da Portela do Souto en Atios, cun orzamento de 111.589,47 € mais IVE.

Proxecto de saneamento no Corzón en Pontellas cun orzamento de 46.388,42 € mais IVE

Saneamento de ampliación de rede no barrio da Arrotea – Lameira en Pontellas  cun orzamento de 95564,36 mais IVE.

27/01/2021 in Alcaldía, Urbanismo, comercio e industria, Vías e obras

O goberno municipal levará á Comisión de Seguimento da Covid, unha nova suspensión temporal do mercado ambulante

O goberno municipal porriñés levará mañá mércores (13 h.), á consideración da Comisión de Seguimento da Covid, varias propostas entre as que cabe subliñar unha suspensión temporal do mercado ambulante. Sería efectiva a partir do vindeiro 2 de febreiro e por espazo de tres semanas, a mesma marxe de tempo que a Xunta de Galicia establece para que teñan efecto as medidas que entran en vigor este mércores.

Tendo en conta o impacto económico desta medida e tamén do peche da hostalería decidido pola Xunta, o goberno municipal vai trasladar a proposta de crear unha partida orzamentaria para axudas económicas directas. Semellante a que se habilitou en 2020 que repartiu achegas por un importe global superior aos 80.000 € entre autónomos, pemes e microempresas locais. 

Por último, tamén o goberno municipal vai expor na Comisión de Seguimento da Covid outras medidas restritivas como o posible peche dos parques infantís e de recintos deportivos, agás aqueles onde poida desenvolverse a práctica de xeito individual como por exemplo as Pistas de Atletismo e o Velódromo.

26/01/2021 in Alcaldía