Vías e obras

O Porriño pon a punto os colexios para o inicio do curso escolar

  • O Concello executa traballos de mantemento e reparación nas instalacións de seis centros educativos

O Porriño, 19 de agosto de 2025.– Ás portas do inicio dun novo curso escolar, o Concello do Porriño ultima os preparativos de posta a punto das instalacións dos diferentes colexios públicos do municipio. Así, estanse a levar a cabo diversos traballos de mantemento e mellora dos CEIP´s Fernández López, Atios, Budiño, Antonio Palacios e Ribeira e da Escola Unitaria de Mosende.

que comprenden diversas reparacións que abranguen dende as superficies de pavillóns e ximnasios, a persianas, aseos, tellados e redes que bordean os patios. Tamén se están lavando e pintando os muros exteriores e fachadas.

O alcalde do Porriño, Alejandro Lorenzo, destacou que “o mantemento e a mellora das infraestruturas escolares é unha prioridade para este goberno, pois entendemos que un bo ambiente escolar é fundamental para o benestar dos nosos nenos e nenas, así como para a calidade educativa. Non só se trata de mellorar a estética dos colexios, senón de garantir a súa seguridade e funcionalidade”.

Todos estes labores de mellora das instalacións estarán rematadas para o inicio do comezo do curso, “así todos os centros estarán listos para antes do inicio das clases o vindeiro 8 de setembro. Queremos que os estudantes e o profesorado poidan empezar o curso nun ambiente renovado e seguro, que lles permita concentrarse no máis importante: a súa educación”, explicou o rexedor local.  Non obstante, “temos programadas algunhas intervencións a maiores a executar ao longo do curso para seguir mellorando e dar resposta ás demandas que nos van trasladando dende os propios centros, como é o caso do acondicionamento dun patio de recreo na zona de Primaria no CPI da Ribeira”, puntualiza.

As melloras realizadas nas instalacións escolares do Porriño son unha mostra do compromiso do Concello co benestar e a calidade educativa da comunidade. Ao investir na reparación e acondicionamento das infraestruturas, non só se garante un espazo seguro e agradable para o alumnado, senón que tamén se fomenta un ambiente que favoreza a aprendizaxe e a motivación

19/08/2025 in Educación e tecnoloxía, Vías e obras

O Porriño presenta un novo proxecto que transformará a mobilidade entre o casco urbano e as parroquias

  • Destínase máis dun millón de euros a humanizar preto de dous quilómetros da rúa Antonio Palacios, nos que se inclúe as inmediacións dos centros educativos, o polideportivo municipal e o acceso á A-52
  • Crearase un carril bici dende o parque Gonzalo Ordóñez ata a entrada á parroquia de Cans e ampliaranse as beirarrúas, dando prioridade aos peóns e mellorando a seguridade viaria e a accesibilidade universal

O Porriño, 16 de agosto de 2025.- Promover un cambio modal cara un tipo de transporte menos contaminante, máis saudable e seguro, dando prioridade aos peóns fronte aos vehículos a motor, e mellorando a accesibilidade universal, é o obxectivo do último dos proxectos presentado polo Concello do Porriño que transformará unha das arterias de entrada e saída ao casco urbano.

Os traballos do proxecto “Senda ciclista e pavimentación rúa Antonio Palacios no tramo rúa Cruceiro-Cans” céntranse na construción dun carril bici, ampliación de beirarrúas e redimensionado e pavimentación dos viais de circulación, mellorando así a seguridade viaria e a accesibilidade universal. A actuación conta cun orzamento de 1.066.887,26 euros, dos cales 645.024,26 euros serán financiados cunha axuda da Deputación de Pontevedra, enmarcada no programa Reacpon, unha vez concedida neste ano 2025 e modificado e ampliado o seu proxecto inicial.

A transformación afectará a un tramo cunha lonxitude de 1.625 metros e cunha superficie de 22.960 metros cadrados, que abrangue dende o parque Gonzalo Ordóñez ata a entrada da parroquia de Cans, establecéndose un prazo de execución de seis meses.

“A creación deste carril bici formará un dos futuros eixos de mobilidade sostible que dá servizo ao conxunto do Porriño facilitando o acceso ao casco urbano da vila”, explica o alcalde Alejandro Lorenzo, facendo referencia á continuidade que terá este carril ciclista pola avenida Domingo Bueno ata chegar á rotonda de A Casilla, en Atios, “para o cal xa temos tramitada outra posible subvención, o que suporía a unión destas dúas parroquias a través do centro do municipio”.

Con todo elo, esta transformación dos usos provocará un notable aumento da mobilidade ciclista e peonil nos desprazamentos cotiáns, á vez que mellorará a calidade do aire e o medio ambiente.

Ademais, este carril bici dará servizo a equipamentos municipais como son o Instituto Pino Manso, o colexio Xosé Fernández López e o polideportivo, que verán a súa contorna humanizada coa ampliación das beirarrúas en ata catro metros de ancho. De xeito paralelo, para a mellora da seguridade no tráfico rodado e nos itinerarios peonís nesta zona está proxectada  a execución dunha rotonda (prevista xa no PXOM do ano 2003) que enlazaría a rúa Antonio Palacios coa estrada que dá acceso á autovía A-52.

No proxecto “Senda ciclista e pavimentación rúa Antonio Palacios no tramo rúa Cruceiro-Cans” contémplase a reforma e reparación da capa de rodadura do vial, cun novo asfaltado e sinalización horizontal; instalación de sinalización vertical; soterramento da liña de alumeado coa recolocación dos puntos de luz e a instalación de novas columnas de tecnoloxía led; reforma dos sumidoiros; reposición da rede de abastecemento e plantación de árbores.

16/08/2025 in Infraestruturas, Medio Ambiente, Parroquias, Urbanismo, comercio e industria, Vías e obras

O Concello do Porriño impulsa un novo espazo público na contorna da rúa Pío XII cun investimento de máis de 2 millóns de euros

O Porriño, 4 de agosto de 2025.- O alcalde do Porriño, Alejandro Lorenzo, vén de asinar co presidente da Deputación de Pontevedra, Luis López, un convenio de colaboración que permitirá facer realidade un dos proxectos máis ambiciosos da actual lexislatura: a creación dun novo espazo público na contorna da rúa Pío XII e do Centro de Saúde, cun investimento que supera os 2 millóns de euros.

Este novo proxecto representa un paso decisivo na transformación do núcleo urbano do Porriño e ten como obxectivo principal mellorar a calidade de vida da veciñanza, recuperando unha zona degradada e converténdoa nun lugar de encontro, descanso e actividade. A intervención permitirá actuar sobre máis de 4.000 metros cadrados, unificando espazos residuais e antigas zonas de aparcamento nun parque integrador e accesible.

O deseño do espazo contempla zonas de descanso e reunión, gradas que funcionarán como un pequeno anfiteatro para acoller actividades culturais ao aire libre, áreas de xogo cubertas e adaptadas para nenos e nenas de distintas idades, fontes secas e canles de auga decorativas que mellorarán tanto a estética como a funcionalidade do lugar. Ademais, incluirá a plantación de especies vexetais autóctonas —combinando árbores caducifolias e arbustos— para crear sombra, mellorar o confort ambiental e fomentar a biodiversidade. O parque tamén será dotado de mobiliario urbano moderno e iluminación eficiente, apostando por un modelo sostible, accesible e respectuoso co contorno.

O novo espazo estará plenamente integrado na rede de espazos públicos do Porriño, conectando de forma fluída coas rúas Antonio Palacios, Domingo Bueno, Ramón González e Pío XII, e garantindo percorridos accesibles desde o centro social e outras zonas clave do municipio.

“Este é un proxecto transformador, tanto desde o punto de vista urbanístico como social. O Porriño necesitaba un espazo así: aberto, vivo, pensado para a convivencia e para o desfrute de todas as persoas, sen exclusión. Recuperamos unha zona en desuso e convertémola nun pulmón verde no corazón do municipio”, afirmou o alcalde Alejandro Lorenzo, quen destacou tamén “a importancia da colaboración institucional para facer realidade actuacións que deixan pegada e melloran o día a día da veciñanza”.

Esta actuación está financiada parcialmente pola Deputación de Pontevedra ao abeiro do Plan Extra, cunha achega de 1,1 millóns de euros. O Concello do Porriño pon en valor esta intervención coma un exemplo claro do modelo de vila que se quere construír: máis humana, máis verde e centrada nas necesidades reais das persoas. Un espazo pensado para o futuro, que aposta pola calidade urbana e o benestar da cidadanía.

04/08/2025 in Vías e obras

O Concello do Porriño leva a cabo obras de mellora viaria e de saneamento en Carracido, Torneiros, Mosende e Atios cun orzamento de máis de 153.000 euros

 

O Porriño, 15 de xullo de 2025.- O Concello do Porriño leva a cabo un conxunto de actuacións de mellora de infraestruturas nas parroquias de Torneiros, Mosende, Atios e no barrio de Carracido, por un importe total de 153.520,62 euros, financiado integramente pola Deputación de Pontevedra a través do Plan +Provincia 2024 e 2025. As obras inclúen a pavimentación de varios camiños municipais e a execución dunha nova rede de saneamento na Travesía de Novás.

A intervención viaria suporá a mellora de máis dun quilómetro de camiños en Coto do Muiño, A Relva, Contrasto (1 e 2) e O Regueiro, cun orzamento de 125.507,87 euros. O proxecto contempla traballos de limpeza, desbroce e perfilado de cunetas para mellorar a drenaxe, reforzo do firme con zahorra artificial e aglomerado en quente tipo AC-16, e a aplicación dunha capa de rodadura de 5 centímetros en todos os tramos. Tamén se prevé o realce de tapas de rexistro, a renovación da sinalización horizontal e a colocación de novos sinais de STOP.

Os tramos que se van renovar son os seguintes: 368 metros no camiño de Coto do Muíño, no barrio de Carracido; 318 metros en A Relva e 64 e 66 metros nos tramos 1 e 2 de Contrasto, en Torneiros; e 128 metros no camiño do Regueiro, en Mosende. As seccións das vías oscilan entre os 3 e os 5 metros de ancho, adaptándose ás características de cada camiño. Unha vez adxudicadas, as obras contarán cun prazo estimado de execución de dous meses e planificaranse con cortes puntuais de tráfico para minimizar as molestias á veciñanza.

No marco destas actuacións, tamén se leva a cabo unha obra de saneamento na Travesía de Novás, na parroquia de Atios, cun orzamento de 28.012,75 euros. A intervención permitirá dotar de rede de saneamento a catro vivendas mediante a instalación dun colector de 120 metros, tres pozos de rexistro e a repavimentación integral do camiño afectado.

O alcalde do Porriño, Alejandro Lorenzo, destacou que “estas obras son fundamentais para dar resposta ás necesidades das parroquias do noso concello e do barrio de Carracido. Actuar en Coto do Muiño, A Relva, Contrasto, O Regueiro e na Travesía de Novás significa apostar polo rural, pola cohesión territorial e pola calidade de vida da veciñanza que vive nelas ou as utiliza a diario”.

Pola súa banda, o concelleiro Antonio Barros, sinalou que “o barrio de Carracido sempre tivo necesidades que foron demandadas pola veciñanza, especialmente no que respecta ao estado das súas estradas. Agora xa se levaron a cabo varios asfaltados e obras de saneamento, e actualmente estase traballando no acondicionamento de todo o barrio”.

Con estas actuacións, o Concello do Porriño segue a traballar no seu compromiso coa mellora das infraestruturas rurais, a seguridade viaria e o benestar da veciñanza en todas as parroquias do municipio.

15/07/2025 in Parroquias, Vías e obras

Máis de 60 veciños do Cerquido estarán conectados á rede municipal de sumidoiros antes de finais de ano

 

  • O proxecto, valorado en máis de 78.000 euros e financiado pola Deputación de Pontevedra, inclúe melloras no firme dos camiños e a execución dunha cuneta de drenaxe.
  • O prazo para presentar ofertas remata o 21 de xullo.

 

O Porriño, 8 de xullo de 2025.– O Concello do Porriño vén de sacar a licitación a obra de ampliación da rede de saneamento no núcleo do Cerquido, cun orzamento que supera os 78.000 euros, financiados integramente pola Deputación de Pontevedra a través do Plan + Provincia 2025.

As empresas interesadas poderán presentar as súas ofertas ata o 21 de xullo ás 13:00 horas, a través da Plataforma de Contratos Públicos de Galicia.

“Esta actuación dá resposta a unha demanda histórica da veciñanza do Cerquido, que levaba anos solicitando melloras na conexión ao saneamento municipal. Dende o goberno local seguimos apostando por estender as infraestruturas básicas a todos os núcleos de poboación”, sinalou o alcalde, Alejandro Lorenzo.

O proxecto contempla a construción dunha nova rede de saneamento que permitirá conectar máis de 60 veciños da zona ao sistema municipal. Ademais, inclúe a mellora do firme dos camiños municipais afectados e a execución dunha cuneta de drenaxe na marxe dereita da estrada N-550, co obxectivo de facilitar a evacuación das augas pluviais e reforzar a seguridade viaria.

Unha vez iniciados os traballos, está previsto que as obras se executen nun prazo aproximado de oito semanas.

Segundo explicou o concelleiro de Vías e Obras, Ramón Porto, “non só se trata de dotar de saneamento ao Cerquido, senón de aproveitar para mellorar o estado dos camiños municipais, que presentan un notable deterioro. Esta intervención tamén mellorará a accesibilidade e a seguridade para os veciños”.

Esta obra forma parte dunha ampla estratexia que o Concello do Porriño vén desenvolvendo desde 2022 para mellorar a rede de saneamento en todo o termo municipal. Neste período, xa se mobilizaron máis de 4,2 millóns de euros en actuacións similares, grazas á colaboración entre distintas administracións como a Xunta de Galicia, a Deputación de Pontevedra e o Consorcio de Augas do Louro.

Así mesmo, esta actuación contribuirá a seguir avanzando no cumprimento dos obxectivos marcados polo Plan Director de Saneamento, que busca acadar unha cobertura total en todas as parroquias. Aínda quedan zonas pendentes, especialmente en contornos rurais, pero desde o goberno local mantense o compromiso de continuar investindo en obras que melloren a calidade de vida da veciñanza e garantan un desenvolvemento máis sostible e equilibrado para o Porriño.

08/07/2025 in Parroquias, Vías e obras

O Concello do Porriño inicia a mellora do asfaltado nos rueiros da Avenida de Galicia e da Avenida Domingo Bueno

  • Os traballos de asfaltado rematarán o martes e será preciso agardar 15 días para pintar a sinalización horizontal e as prazas de aparcadoiro

O Porriño, 4 de xullo de 2025.– O Concello de O Porriño vén de iniciar as obras de mellora do asfaltado nos rueiros da Avenida de Galicia e da Avenida Domingo Bueno, actuacións incluídas dentro do Plan + Provincia 2024 da Deputación de Pontevedra. Os traballos comenzaron hoxe na Avenida de Galicia, mentres que o vindeiro luns intervirase en Domingo Bueno.

Trátase de traballos moi demandados pola veciñanza que permitirán mellorar a seguridade viaria, a accesibilidade e o estado xeral do firme nestes tramos, que presentaban un notable deterioro.

O proxecto conta cun orzamento base de licitación de 23.441,94 euros e está financiado ao 100% pola Deputación de Pontevedra.

“Este tipo de intervencións son fundamentais para mellorar o día a día dos nosos veciños e veciñas. Son vías moi transitadas e levaban anos sen unha actuación axeitada. Agora, gracias á colaboración institucional, podemos darlles unha solución”, destacou o alcalde Alejandro Lorenzo durante a visita ás obras esta mañá.

Actuacións previstas

As obras céntranse na rehabilitación integral do firme e pequenas actuacións complementarias de drenaxe. Os traballos inclúen:

No Rueiro da Avenida de Galicia, levarase a cabo unha actuación que comprende unha lonxitude de 78 metros, incluíndo o fresado previo de 43 m² e a aplicación dunha capa de aglomerado en quente tipo AC-16 SURF S BC 50/70 cun espesor de 5 cm nunha superficie de 824 m². Ademais, realizarase o rasanteo de 4 tapas e a correspondente sinalización horizontal.

Pola súa parte, no Rueiro da Avenida Domingo Bueno, os traballos abranguen unha lonxitude de 150 metros e inclúen o fresado de 25 m², a execución da capa de rodadura sobre 353 m², o desbroce e limpeza de 160 m², así como a colocación de zahorra artificial cun espesor de 20 cm. Tamén se procederá ao recrecemento de 5 sumidoiros e dunha reixa corrida.

A previsión é que os traballos de asfaltado estean totalmente rematados o martes. Unha vez finalizados, haberá que agardar 15 días para a pintura da sinalización horizontal e das prazas de aparcadoiro, co fin de garantir a correcta adherencia da pintura sobre o novo firme.

O Alcalde, Alejandro Lorenzo, quixo agradecer “o apoio constante da Deputación de Pontevedra, que a través do Plan +Provincia permite a moitos concellos coma o noso executar melloras necesarias sen ter que asumir o custo directamente”.

Dende o Concello de O Porriño Seguimos traballando por un municipio máis accesible, funcional e pensado para as persoas.

04/07/2025 in Vías e obras

O Concello do Porriño mellora cinco camiños municipais nas parroquias de Torneiros, Pontellas e Mosende

 

  • As actuacións contan cun investimento total de 177.286,27 euros

O Porriño, 1 de xullo de 2025.- O Concello do Porriño vén de poñer en marcha un ambicioso plan de mellora da rede viaria municipal nas parroquias de Torneiros, Pontellas e Mosende, cun investimento total de 177.286,27 euros (IVE incluído). O obxectivo deste proxecto é rehabilitar o firme existente e mellorar as condicións de circulación e seguridade nestes camiños, moitos deles moi transitados polos veciños e veciñas.

Está previsto que os traballos rematen nun prazo aproximado de dúas semanas, sempre que as condicións meteorolóxicas o permitan.

As actuacións inclúen traballos de roza e limpeza, fresado de pavimento, mellora de drenaxes, pavimentación, sinalización horizontal e recrecido de arquetas mediante formigón estrutural. Tamén se contempla a creación de zonas de estacionamento e a adaptación de pasos de peóns á normativa vixente.

Camiños incluídos no proxecto:

  • Camiño 01 (Torneiros): Treito entre a estrada EP-2401 e a PO-331. Prevese o fresado do firme existente, a mellora do drenaxe e nova capa de rodadura con sinalización.
  • Camiño 02 (Torneiros): Treito sur con intersección coa EP-2401. Inclúe renovación de pavimento, mellora de beirarrúas e creación de zonas de estacionamento.
  • Camiño 03 (Torneiros): Zona do Polígono II. Mellora e ampliación das zonas de aparcadoiro existentes.
  • Camiño 04 (Torneiros): Lugar de Casal de Vello. Rehabilitación integral do firme e mellora da sinalización horizontal.
  • Camiño 05 (Mosende e Pontellas): Zona de A Louriña. Actuacións sobre cunetas, drenaxes e reposición do pavimento.

“O meu compromiso é claro: mellorar os servizos e infraestruturas das parroquias. Estes traballos son unha mostra de que seguimos avanzando nese camiño, para mellorar as infraestruturas básicas do noso municipio. As parroquias son prioridade. Estes camiños son fundamentais para a mobilidade diaria da veciñanza e queremos que todos os veciños, vivan onde vivan, teñan unhas condicións dignas e seguras”, sinalou o Alcalde do Porriño, Alejandro Lorenzo.

01/07/2025 in Vías e obras

Aviso de cortes de tráfico nas rúas Pío XII e Fontevella dende mañá

 

O Porriño, 1 de xullo de 2025.- O Concello do Porriño informa á veciñanza que, debido ás obras no pavimento da rúa Pío XII, dende mañá, mércores 2 de xullo, produciranse cortes no tráfico rodado nas rúas Pío XII e Fontevella. Os cortes manteranse ata a finalización das obras.

Co obxectivo de facilitar o acceso á zona afectada, habilítase provisionalmente a circulación en dobre sentido na rúa Fernández Areal, dende a rúa San Sebastián, coas seguintes finalidades:

  • Permitir o acceso aos garaxes da rúa Fontevella

  • Facilitar as operacións de carga e descarga comercial

O Concello pide á cidadanía que extreme a precaución ao circular pola zona e agradece a comprensión e colaboración durante o desenvolvemento destas actuacións.

 

01/07/2025 in Tráfico, Vías e obras

O Porriño presenta o Día do Porriño Orgulloso 2025 e anuncia novas actuacións en materia de saneamento nas parroquias

 

O Porriño, 24 de xuño de 2025.- O Alcalde do Porriño, Alejandro Lorenzo, mantivo esta mañá un encontro cos medios de comunicación no que presentou a nova edición do Día do Porriño Orgulloso e anunciou novas actuacións en materia de saneamento nas parroquias, cun investimento continuado e comprometido coa mellora da calidade de vida da veciñanza.

Unha vila orgullosa, diversa e comprometida

O Día do Porriño Orgulloso 2025 celebrarase o sábado 28 de xuño no Paseo do Louro, coincidindo co Día Internacional do Orgullo LGTBI+. A xornada contará cunha programación continua desde as 16:00 horas ata as 2:00 da madrugada, pensada para todos os públicos.

As actividades infantís desenvolveranse de 16:30 a 20:30 horas, con inchables de auga e de salto para os máis pequenos. Entre as 18:00 e as 20:00, haberá obradoiros de tatuaxes temporais e pintacaras. Ademais, a tarde contará coa participación especial do Mago Marco, que sorprenderá ao longo da xornada.

Durante toda a tarde e noite, o escenario do Paseo do Louro vibrará coa música en directo de varios artistas, entre os que destacan Acoustic (16:00), Law (17:00), Iker Faure’s Band (18:00), Sheila Patricia (19:00), As Drags (20:00) e Orballo Cultural (21:00). Ás 23:00 terá lugar o gran concerto de Baiuca, un dos artistas galegos con maior proxección internacional, que ofrecerá un espectáculo audiovisual impactante.

Un dos momentos máis especiais da xornada será a Gala Drag Queen do Porriño Orgulloso, conducida por Marlen Soto e Khrystal De Luxe, coa actuación estelar de Marisa Prisa, unha das figuras máis queridas do panorama drag estatal.

A festa estará acompañada de foodtrucks, postos de segunda man, presenza de protectoras de animais e actividades pensadas para toda a familia, convertendo esta cita nun espazo de encontro, inclusión e celebración para toda a veciñanza e visitantes.

“O Porriño é unha vila orgullosa, aberta, diversa e comprometida coa igualdade real e efectiva. Animamos a toda a veciñanza a sumarse e participar nesta xornada tan especial”, sinalou o Alcalde, Alejandro Lorenzo.

Saneamento: prioridade para as parroquias

O alcalde anunciou tamén a execución de novas actuacións de saneamento en diversas parroquias, sinalando que a prioridade absoluta do Concello son os núcleos rurais.

As intervencións previstas inclúen melloras en saneamento en Budiño, Eiriz, Seixo, Cerquido e Arrotea. Así mesmo, destacou que hai actuacións pendentes de autorización por parte da Confederación Hidrográfica, como as de Benunes en Budiño e a de Carbón en Atios, así como proxectos para iniciarse en Torneiros, Mosende e Chenlo.

Lorenzo fixo fincapé en que se trata dun compromiso firme coa mellora dos servizos básicos e lembrou que, desde 2022, o Concello do Porriño leva investidos máis de 4,2 millóns de euros en obras de saneamento, gracias á colaboración entre distintas administracións, como a Xunta de Galicia, a Deputación de Pontevedra e o propio Consorcio do Louro, que achegaría arredor de 850.000 euros en novas actuacións de abastecemento e saneamento en Torneiros e Budiño. 

“Non se trata só de canalizacións e infraestruturas. Falamos de garantir dignidade, salubridade e igualdade para todos os veciños, vivan onde vivan”, concluíu o rexedor.

24/06/2025 in Cultura e festas, Vías e obras

Obras de mellora no entorno do Templete obligarán ao corte parcial da Rúa Domingo Bueno durante unha semana

 

O Porriño, 18 de xuño de 2025.- O Concello do Porriño informa de que, debido á execución dunha nova fase das obras de renovación e mellora do entorno do Templete de San Luis e do acceso ao cemiterio municipal, procederase ao corte dun carril na rúa Domingo Bueno, á altura do Templete, a partir de hoxe e durante aproximadamente unha semana.

Durante este período, o tráfico será regulado por semáforos provisionais, co obxectivo de minimizar as molestias á veciñanza e garantir a seguridade de peóns e condutores mentres duren os traballos.

O Concello agradece a comprensión da cidadanía ante estas molestias temporais, que responden á necesidade de acometer unha actuación clave para mellorar a accesibilidade e o aspecto deste espazo emblemático da vila.

Resumo da actuación

As obras consisten na renovación integral da beirarrúa de acceso ao cemiterio municipal, coa substitución do pavimento actual —moi deteriorado— por pedra granítica tipo Rosa Porriño, a ampliación da beirarrúa na curva do Campo da Feira e a mellora do paso peonil elevado fronte ao Templete de San Luis. Trátase dunha intervención que busca dignificar o entorno patrimonial e mellorar a mobilidade e seguridade viaria no núcleo urbano.

18/06/2025 in Tráfico, Vías e obras