Urbanismo, comercio e industria

Comezan as obras que transformarán a praza de abastos

 
A actividade da praza desenvolverase nunha carpa instalada no exterior durante a execución das obras
Este luns darán comezo os traballos de mellora e impulso da Praza de Abastos do Porriño, unha intervención moi demandada por praceiros/as e usuarios/as que reimpulsará o que debe ser o centro neurálxico do comercio porriñés.
 
Praceiros e praceiras, xunto con persoal do Concello ultiman estes días o traslado dos seus postos para abrir a partir da semana que ven na carpa habilitada no exterior na que actividade continuará mentres se desenvolven as obras, que se estima sexa arredor dun mes e medio. Cabe destacar, que dende onte e ata novo aviso está prohibido o estacionamento nos espazos exteriores e só está permitido o acceso a residentes.
 
“Con este proxecto queremos revitalizar este espazo e convertilo no motor do comercio do Porriño, nun lugar de encontro e lecer que ofrecerá aos consumidores produtos de calidade”, apuntou a edil de Mercados, Antía Carrera.
 
A mellora, que respectará en todo momento a esencia do edificio de Xosé Bar Boo, inclúe a renovación das instalacións de fontanería e saneamento, da infraestrutura eléctrica, incorporación de iluminación led e sistemas de dixitalización, renovación de todo o pavimento e a ampliación da segunda planta para conseguir máis superficie de uso. Traballarase tamén nos exterior do edificio para subsanar os danos estruturais que presenta.
 
Nunha segunda fase, intervirase na contorna, mellorando os espazos colindantes, reordando a circulación e habilitando espazos de aparcamento.
 
“O acondicionamento das instalacións, que era unha das grandes demandas dos praceiros e praceiras dende hai moitos anos polo mal estado no que se atopa, era urxente pero non imos quedarnos aí, realizaremos unha intervención integral que sirva para revitalizar e dinamizar a nosa praza e nos permita conseguir o selo de Mercado Excelente de Galicia”, explicou o alcalde, Alejandro Lorenzo.
 
O proxecto conta cun orzamento de 231.000 euros financiados no 80% pola Xunta de Galicia a través da consellería de Economía, Industria e Innovación.
12/02/2024 in Alcaldía, Urbanismo, comercio e industria

A ruta D·Gusta Porriño 23 entrega os seus premios

O Concello Do Porriño acolleu onte o acto de entrega dos premios ás/os  gañadores/as da Ruta de pinchos e tapas `D·Gusta Porriño 2023´, organizada por Ahospor en colaboración co Concello do Porriño.

As dez tarxetas por valor de 50 euros, para gastar no comercio e hostalería local,  corresponderon a María Begoña Fernández, Mari Carmen Martínez, Uxía Relova, Ana Cristina Gómez, María Nieves Rey, Maria del Carmen Diz, Cristina Iglesias, Paula Saavedra e Xose Anxo Ferreira. O de maior valor, a tarxeta dotada de 500 euros, foi para o porriñés Iván Coto.

Eles/as foron os agraciados entre os máis de 5.000 trípticos selados que se entregaron e recibiron as súas tarxetas de mans do alcalde, Alejandro Lorenzo, o presidente de Ahospor, José Manuel Fernández, o director de Abanca no Porriño, Jorge García, e o concelleiro Marcos Martínez.

 

31/01/2024 in Alcaldía, Urbanismo, comercio e industria

O PORRIÑO PROXECTA A POSTA EN VALOR E HUMANIZACIÓN DA MALLADOURA

O Concello do Porriño avanza no deseño da súa axenda urbana, un marco de referencia para a planificación estratéxica do Porriño dos próximos anos. Esta inclúe unha diagnose da situación actual, que permitirá identificar e definir as necesidades do municipio e os principais retos a afrontar permitirá acceder de forma máis eficaz e competitiva á financiación precisa.

No marco desta folla de ruta atópase unha intervención global no barrio da Malladoura, que contempla varias intervencións de acondicionamento e humanización na contorna proxectadas para os próximos anos.

Tal e como explicou o alcalde, Alejandro Lorenzo, “o barrio da Malladoura era unha das asignatura pendentes no desenvolvemento do centro urbano e a súa mellora vén sendo demandada pola veciñanza dende hai anos polo mal estado no que se atopa”. “A humanización da Malladoura e a súa posta en valor é esencial para conéctalo co resto da vila, máis anda cando o número de habitantes se incrementou notablemente nos últimos anos”, continuou o rexedor, “Por iso proxectamos varias intervencións dirixidas a ofrecer á cidadanía unha contorna máis habitable e un espazo público urbano de calidade”.

Unha delas é a obra de peonalización e construcción de beirarrúas entre a rúa Lugo e a rúa Malladoura. Estes traballos, cuxo preceptivo proxecto técnico xa está en redacción, humanizarán un tramo de preto de 250 m dunha zona de vivendas, na que se acometerán beirarrúas de formigón a ambas marxes da calzada e se dotará da necesaria iluminación.

Proxectase tamén a humanización da rúa Navuxil, con novas beirarrúas e mellora da calzada, nun tramo de 380 m que conecta o penedo da Malladoura coa travesía Antonio Palacios C. Unha zona de moito tránsito de vehículos e peóns ao albergar un colexio. Está mellora completa o proxecto xa redactado de acondicionamento e humanización das rúas que conectan Aloques con Antonio Palacios, que inclúe as rúas Tarela e inicio de Navuxil.

O asfaltado e mellora do saneamento da rúa Lugo e o proxecto de renovación da rede de pluviais que resolvería os problemas de auga na rúa Coruña, xa en redacción, completan as intervencións desta primeira fase.

26/01/2024 in Alcaldía, Urbanismo, comercio e industria, Vías e obras

O Concello do Porriño inicia o asesoramento ás persoas interesadas nas Axudas á rehabilitación de vivendas nos polígonos residenciais Torneiros

 

O Concello de Porriño informa da publicación no Boletín Oficial da Provincia (BOP) das bases para a concesión de axudas en materia de rehabilitación e vivenda no entorno residencial de Torneiros. Ábrese agora, pois, previamente á solicitude, un período de información e asesoramento para a obtención da documentación necesaria para o cal dende o Concello poñen a disposición da veciñanza interesada un servizo de asesoramento e atención personalizada, que poderá ser de xeito presencial, con cita previa, ou por teléfono, chamando ao 986 335 000, de luns a venres, de 09.00a 14.00 horas.

Para este proxecto o Concello do Porriño recibiu un millón de euros, no marco do Programa de axudas para a rehabilitación de contornas residenciais a nivel barrio, que se distribuirán en axudas para impulsar medidas de eficiencia enerxética.

Dentro do ámbito delimitado do proxecto, que comprende 945 vivendas en 81 edificios, programouse inicialmente a rehabilitación dun número estimado de 105 vivendas que ocupan 1,38 hectáreas, repartidas en diferentes bloques. Dese millón de euros, 127.575 euros será destinado á urbanización e mellora da contorna, “que se complementa con outras actuacións que estamos levando a cabo para humanizar a zona”, puntualiza o alcalde Alejandro Lorenzo. A parte restante será para axudas a particulares e/ou comunidades de propietarios destinadas  á mellora de fachadas, mellora de cubertas, incluíndo aquí a eliminación de amianto, e a substitución de ventás e vidros exteriores, empregando carpintería de pvc e vidro eficiente termicamente, todo elo co obxectivo de conseguir un aforro enerxético.

“Deseñamos un proxecto global para a rehabilitación e posta en valor dos polígonos residenciais de Torneiros, un dos principais núcleos de poboación de Porriño”, explica o alcalde, asegurando que “esta aportación dun millón de euros é o primeiro paso que, seguindo nesta mesma liña de traballo, intentaremos se complemente cunha ampliación de fondos, para así atender ás necesidades que poidan presentar as preto de mil vivendas alí asentadas”.

O importe das subvenciones a particulares dependerá do grado de eficiencia enerxética que se alcance coas obras executadas, e pode ser do 40%, do 65% ou do 80% do orzamento, incluso do 100% cando se identifique un caso de vulnerabilidade

 

Bases Reguladoras

18/01/2024 in Urbanismo, comercio e industria

Mercar no Porriño ten premio de Reis

 

O Concello do Porriño comeza o ano cun sorteo entre os clientes do comercio local, da praza de bastas e da hostalería do municipio.

Ao longo destas festas, todos os establecementos están a repartir boletos cos tíckets de compra, os cales deben ser cubertos e depositados nas urnas instaladas para tal fin no Concello e na praza de abastos ou tamén se poden entregar no propio establecemento.

O sorteo celebrarase na véspera de Reis, o venres 5 de xaneiro, e del sairán os cinco boletos premiados con cadansúa cesta de produtos. O Concello repartiu máis de 6.000 boletos entre todos os establecementos para que os entregasen aos seus clientes trala compra.

“Trátase dunha nova iniciativa de impulso do comercio de proximidade e da hostalería local, a primeira doutras moitas que chegarán ao longo deste 2024 co fin de apoiar os establecementos porriñeses, incentivando entre a veciñanza o consumo e as compras na propia vila”, sinala o alcalde Alejandro Lorenzo.

04/01/2024 in Urbanismo, comercio e industria

Porriño inaugura o luns o seu Mercadillo de Nadal

 

  • Unha decena de postos abren, na Praza do Cristo, ata o domingo 7 de xaneiro
  • Gastronomía, xoguetes, accesorios feitos a man, roupa ou artesanía son algún dos produtos á venda

 

Logo do acendido das luces e instalación de decorado de Nadal, o inicio da música das rondallas e outras actividades propias destas datas, quedaba por inaugurar o mercadillo de Nadal no Porriño. Será o vindeiro luns cando as dez casetas de madeira instaladas na Praza do Cristo abran ao público en horario e mañá e de tarde ata o domingo 7 de xaneiro, no que se ofrezan produtos artesanais, decoración, alimentación, complementos ou agasallos, entre outros artigos, todos eles relacionados co Nadal.

Nesta primeira quenda, que se prolonga ata o 27 de decembro, os dez postos son os que seguen:

  1. Rosquillas, garrapiñadas, algodón de azucre, gominolas, mazás de caramelo.
  2. Coleccionismo de Playmóbil principalmente con temática de Nadal
  3. Complementos de tela feitos a man (bolsos, chaveiros, coleteiros, accesorios de bebé, bolas para as árbores personalizadas e detalles para regalar.
  4. Accesorios feitos a aman de resina con flores naturais encapsuladas, recollidas e prensadas a man. Pendentes colares, aneis e marcapáxinas, pendentes de madeira feitos a man, serigrafiados.
  5. Artesanía en pel, madeira, produtos de entretemento infantil.
  6. Bocadillos, empanadillas, creps, doces, etc.
  7. Mel, polen, cera, xabóns de mel, velas, etc.
  8. Roupa infantil fabricada en Galicia.
  9. Dragóns moldeados con deseños propios, marcos para decoración con pezas de resina feitas a mano, diorama de pokemon con luz e sen luz, complementos relacionados coa fantasía, ovos de dragón no seu baúl, etc.
  10. Sacos térmicos, xoiería artesanal, xoiería macramé, ambientadores, tarros de cristal.

O horario de apertura dos postos será de luns a xoves e domingos, de 12.00 a 14.00 e de 17.00 a 21.00 horas; os venres e sábados, de 12.00 a 22.00 horas; os días 24 e 31 de decembro e 5 de xaneiro abrirán só de mañá e os días 25 de decembro e 1 de xaneiro permanecerán pechados

16/12/2023 in Urbanismo, comercio e industria

Publicadas as bases do Concurso de iluminación e deseño de Nadal de escaparates e vivendas

Xa está a piques de chegar o Nadal e O Porriño prepárase para festexalo por todo o alto con múltiples actividades. Unha delas, o Concurso de iluminación e deseño dos escaparates de Nadal nos establecementos comerciais e tamén nas vivendas do Porriño.

Con este concurso dende o Concello queren promover a participación activa da veciñanza e tamén visibilizar e apoiar ao seu comercio local, conseguindo unha colaboración máis completa para infundir un ambiente navideño decorativo. Todo isto, baseado en valores como o traballo en común e a cooperación. No Porriño somos conscientes do emotivas que son estas datas, e por iso queremos valorar o traballo e o esforzo dos veciños e veciñas e dos nosos comerciantes.

As bases que rexerán o concurso xa se publicaron hoxe. Poderán participar vivendas e establecementos comerciais, hostaleiros e outros negocios empresariais que conten con establecemento físico e aberto ao público. Todos eles do Porriño.

No caso de establecementos comerciais valorarase o escaparate e/ou fachada. No caso das vivendas a decoración exterior.

A decoración deberá realizarse antes do 11 de decembro  e deberá permanecer instalada ata o 7 de xaneiro. Así mesmo, entre o 11 e o 14 de decembro todos os participantes deberán enviar fotos ou vídeos da súa montaxe á dirección de correo electrónico rexistro@oporrino.org .

Haberá dúas categorías de participación, a de establecementos comerciais e a de vivendas. A dirixida a establecementos comerciais terá tres premios un primeiro de 1000 euros, un segundo de 750 e un terceiro de 500. No caso das vivendas os primeiro premio estará dotado de 500 euros, o segundo de 350 e o terceiro 250.

Os premiados serán elexidos polo voto ponderado dun xurado e tamén da votación popular que se efectuará a través das redes sociais do Concello do Porriño

A inscripción xa está aberta e pode formalizarse por rexistro ou mediante o envío do formulario ao seguinte correo electrónico: rexistro@oporrino.org .

BASES: https://oporrino.org/wp-content/uploads/2023/12/BASES-DE-CONCURSO-DE-ILUMINACION-E-DISENO-DOS-ESCAPARATES-DE-NADAL-NOS-ESTABLECEMENTOS-COMERCIAIS-E-NAS-VIVENDAS-DO-CONCELLO-DO-PORRINO-NADAL-2023-1.pdf  

INSCRICIÓN ESTABLECEMENTOS COMERCIAIS: https://oporrino.org/documentos/folla-inscricion-establecementos-comerciais/

INSCRICIÓN VIVENDAS: https://oporrino.org/documentos/folla-inscricion-vivendas/

 

01/12/2023 in Alcaldía, Urbanismo, comercio e industria

Aberto o prazo para participar no `I Mercadiño de Nadal do Porriño´

O Concello do Porriño organiza o I Mercadiño de Nadal con produtos artesanais, decoración, alimentación, complementos ou agasallos, entre outros artigos, todos eles relacionados con estas datas tan entrañables.

O mercadiño celebrarase entre o 18 de decembro e o 7 de xaneiro na Praza do Cristo e constará de dez casetas.

A concellería de Mercados publicou hoxe as bases para participar no mesmo, todos eles deben ser persoas artesáns e comerciantes autorizados para producción ou venta de produtos. No caso de que se presenten trinta ou máis solicitudes, establécense tres quendas de participación (do 7 ao 17 de decembro, do 2 ao 18 de decembro e do 28 de decembro ao 7 de xaneiro).

Na selección dos participantes darase prioridade ás solicitudes para a exposición e venda de produtos específicos de Nadal, incluíndose tamén alimentación, decoración de Nadal e agasallos.

O prazo de solicitude está aberto .

BASES: https://oporrino.org/wp-content/uploads/2023/12/Aprobacion-Bases-Mercado-Navideno.pdf

SOLICITUDE: https://oporrino.org/documentos/folla-de-solicitude-i-mercadino-de-nadal/

01/12/2023 in Alcaldía, Urbanismo, comercio e industria

A praza de Sol converterase nun espazo máis amable e inclusivo

A mellora da calidade dos espazos públicos vai estendéndose no Porriño. Con varios proxectos de humanización en execución no centro urbano, como o do parque do Campo da Feira ou as rúas Buenos Aires e Progreso, o Concello do Porriño anunciou hoxe a mellora da impermeabilización e renovación da praza pública interior da urbanización Sol.

“Falamos dunha actuación moi necesaria e urxente coa que queremos emendar os problemas de impermeabilización desta praza que están a causar importantes filtracións aos garaxes inferiores”, explicou o alcalde, Alejandro Lorenzo.

O rexedor engadiu que ademais “acondicionarase totalmente este concorrido espazo cun novo deseño actualizado que se axuste ás necesidades que presenta, incluíndo zonas axardinadas e arboradas, mellorando as zonas de xogo infantil e renovando toda a iluminación, pavimento e mobiliario urbano. En definitiva facer desta praza un espazo máis amable e inclusivo”.

E é que estamos ante un dos parques máis concorridos do municipio ao situarse nunha das zonas máis habitadas do centro urbano. A praza, cunha superficie de máis de 3.700 m2, conecta as rúas Antonio Palacios e Pinar, polo que son moitos os peóns que atravesan a praza diariamente. As zonas de parque infantil foron reparadas recentemente e na actualidade contan con céspede artificial e xogos infantís en perfecto estado polo que o seu uso tense incrementado.

“Ao tratarse dun espazo amplo e ben situado cada día fan uso del moitos cidadáns, que gozan dos parques infantís e as terrazas dos locais de hostalería, explicou o rexedor, Queremos potenciar as características desta praza para mellorala e facela máis accesible”.

Un espazo máis aberto

Eliminaranse os parterres vexetais, que non contribúen a biodiversidade e están a delimitar excesivamente o espazo e dificulta a circulación dos usuarios. Así xerarase un espazo máis aberto con maiores posibilidades de uso. Ademais xeraranse dúas zonas cubertas que permitan distribuír as terrazas de hostalería e tamén cubrirán parcialmente as zonas de xogo infantil, protexéndoas do sol e das primeiras choivas.

Renovarase o pavimento, dispoñendo sistemas de impermeabilización, e tamén o sistema de iluminación.

09/10/2023 in Alcaldía, Urbanismo, comercio e industria

O alcalde traslada o apoio do Concello do Porriño aos traballadores de Faurecia

O alcalde do Porriño, Alejandro Lorenzo, trasladou hoxe ao Comité de empresa de Madera Fiber Technologies (antiga Faurecia Interior Systems) o respaldo da corporación local do Porriño ás súas reivindicacións ante o desmantelamento que está a sufrir a empresa. A multinacional atravesa unha situación crítica e vén de presentar un concurso de acreedores que vai deixar a máis de 100 familias sen sustento.

O rexedor ofeceulles tamén o apoio xurídico que precisen, o Concello do Porriño o poñerá á súa disposición, e ofreceuse a xestionar as xuntanzas precisas coas distintas administracións que poidan mediar neste conflicto.

“Falamos de máis dun cento de persoas que vén perigar o seu medio de vida e o das súas familias, traballadores cunha media de idade de 50 anos que de pronto se ven na rúa. Deben tomarse medidas para garantizar a viabilidade da empresa e destes postos de emprego”, concluíu Lorenzo.  

26/09/2023 in Alcaldía, Urbanismo, comercio e industria