Urbanismo, comercio e industria

Executada a mellora de camiños rurais municipais en tres lugares da parroquia de Chenlo

Remataron as obras de mellora de camiños municipais de acceso a parcelas agrícolas nos lugares de Ladeira, As Cales e Vilar, na parroquia de Chenlo, segundo informa a Concellería de Infraestruturas que dirixe Pedro Pereira.

Estas obras consistiron na mellora do firme e da drenaxe. Realizáronse cunetas novas para a recollida de augas pluviais e os camiños pavimentáronse con aglomerado quente de 5 cms de espesura.

Pereira manifestou que “estes camiños atopábanse en moi mal estado e a súa reparación propúxose pola concellería de Infraestruturas para acollerse a estas subvencións da AGADER”.

A actuación tiña un orzamento de 49.000 € e o Concello do Porriño recibiu unha subvención da AGADER (Axencia Galega de Desenvolvemento Rural), outorgada e confirmada o pasado mes de agosto.

16/09/2020 in Urbanismo, comercio e industria, Vías e obras

Fomento amosa disposición favorable a ceder ao Concello o tramo da N-120 entre Cans e O Confurco


O Concello do Porriño trasladou hoxe ao Goberno Central a petición de que o tramo da estrada Nacional 120, entre Cans e a rotonda do Confurco sexa cedido á administración municipal.

A alcaldesa Eva García e o concelleiro de Infraestruturas, Pedro Pereira expuxeron a petición a Maica Larriba, subdelegada do Goberno Central e a Pablo Alonso, representante da Demarcación de Estradas do Estado dependente do Ministerio de Fomento.


Os interlocutores da administración central amosaron “unha disposición favorable á cesión, aínda que condicionada a sexa respaldada por un acordo plenario da corporación municipal porriñesa”, explicou despois da reunión a alcaldesa. “Pola nosa banda tamén condicionamos a cesión a que sexa dotada dunha partida orzamentaria por parte do Ministerio de Fomento para acometer a urbanización dese tramo”, engadiu Eva García.

No encontro celebrado hoxe na Subdelegación do Goberno en Pontevedra, abordáronse outros asuntos entre os que cabe subliñar a petición do Concello do Porriño para que Fomento arranxe a xunta de dilatación dun viaduto na Risca que sobrevoa por riba da Autovía A-55 e que constitúe un perigo para os vehículos que transitan por esa ponte.


Por último, a delegación porriñesa reiterou unha proposta para que o Ministerio de Fomento e “Audasa” contemplen un acceso á autoestrada AP-9 en Torneiros que xa fixera o Concello do Porriño hai anos.

11/09/2020 in Alcaldía, Tráfico, Urbanismo, comercio e industria, Vías e obras

Presentada a XXIII edición de “Merca na rúa”

Sergio Casal, conselleiro de Comercio e Juana Pérez, presidenta da asociación de comerciantes “Acipor” presentaron a XXIII edición da feira de oportunidades “Merca na rúa” que terá o vindeiro fin de semana.
26 stands (seis deles dobres) reunirán na rúa peonil, a diversa oferta de productos que propón esta nova edición de “Merca na rúa” que “será diferente coa ocasión dos protocolos anti-Covid que debemos observar”, manifestou a presidenta da asociación organizadora.
“Este ano os postos de venda esarçan máis distanciados entre sí para observar os protocolos de seguridade e garantir a de todos os que desexen asistir”, manifestou o concelleiro Casal.

10/09/2020 in Alcaldía, Cultura e festas, Urbanismo, comercio e industria

Nos viais de Torneiros que se pavimentaran PROHIBICIÓN DE ESTACIONAR E CIRCULAR DENDE AS CERO HORAS DO LUNS 7 E TODO O MARTES 8


A Policía Local sinalizou e vixiará o cumprimento da prohibición de estacionar e circular polos viais do polígono de vivendas de Torneiros que van ser pavimentados.
A prohibición entra en vigor desde as cero horas do luns 7 e estará vixente tamén todo o martes 8.

Estas restriccións producense co obxecto do asfaltado dos viais de acceso aos polígonos de vivendas números II, IV e V asi como no vial principal de acceso ao Multiusos de Torneiros.

O Concello do Porriño acomete estes traballos para a mellora das comunicacións nesta parroquia, cun orzamento de aproximadamente 90.000 €.

Dende a Concellería de Infraestructuras que dirixe Pedro Pereira solicitase á veciñanza a súa colaboración.

06/09/2020 in Tráfico, Urbanismo, comercio e industria

O luns 7 comezan as obras de pavimentación de diversos viais en Torneiros

 

O vindeiro luns 7 comezarán as obras de pavimentación de diversos viais no polígono residencial de Torneiros, proxecto que acomete o Concello do Porriño para a mellora das comunicacións nesta parroquia.

O orzamento da obra é aproximadamente de 90.000 e a súa execución licitouse en data recente pola administración municipal. Os viais que serán pavimentados son da fase II, da fase IV, V e o vial principal da fase III, segundo recolle o proxecto.

Desde a Concellería de Infraestruturas e Urbanismo que dirixe Pedro Pereira, solicitase á veciñanza súa colaboración. Tendo en conta que as obras arrincarán o luns de mañá, fai se un chamamento aos usuarios destes viais, tanto residentes como tráfico de paso, para que non aparquen nas zonas valadas para así facilitar a execución das obras. A previsión é que os traballos de pavimentación sigan tamén o martes 8.

Segundo explicou Pedro Pereira “a motivación de realizar estas obras é os viais de accesos ao polígono están moi deteriorados”. O concelleiro de Infraestruturas citou, a título de exemplo, “o estado no que se atopa o vial da fase II, no acceso ao colexio Antonio Palacios”. Pereira Fernández apuntou que “aproveitaremos, unha vez rematado o asfaltado, para reordenar os aparcamentos nas inmediacións do colexio”.

04/09/2020 in Tráfico, Urbanismo, comercio e industria, Vías e obras

O goberno municipal acada respaldo do pleno para iniciar a contratación do servizo de recollida do lixo e xestión do Punto Limpo


O goberno municipal do Porriño acadou o respaldo da maioría da corporación para iniciar o expediente de contratación do servizo de recollida e transporte do lixo. O novo contrato que comeza a prepararse contempla tamén que o futuro adxudicatario se faga cargo doutros residuos domésticos e asimilables así como da xestión do ”Punto Limpo” do concello.

O acordo acadouse con cinco votos a favor (os catro concelleiros do PSOE, e Manuel Carrera da UDDL), o voto en contra de Blanca Francés, de EU SON e as abstencións do BNG e do PP. Previamente desestimouse unha enmenda do PP que pretendía deixar o asunto enriba da mesa.

No transcurso deste pleno ordinario de agosto, acordouse por unanimidade respaldar unha moción de EU SON en apoio do comercio de proximidade mediante unha campaña de cheques regalo e outras iniciativas para dinamizar o pequeno comercio. Tamén por unanimidade toda a corporación porriñesa acordou aprobar definitivamente a ordenanza reguladora do uso da lingua galega desestimando as alegacións presentadas ao anterior acordo.

26/08/2020 in Alcaldía, Cultura e festas, Limpeza, Urbanismo, comercio e industria

Concello e Deputación comprobaron as obras de reforma urbana na rúa Doantes de Sangue

A alcaldesa, Eva García e o primeiro tenente de alcalde, Pedro Pereira comprobaron hoxe, xunto cos deputados provinciais, Carlos López Font e Santos Héctor o desarrollo das obras de reforma urbana na rúa Doantes de Sangue. A actuación tradúcese nunha ampliación de beirarrúas, mellora da seguridade vial mediante resaltos para o calmado do tráfico e pasos peonís nos accesos tanto aos centros docentes alí existentes como tamén ás instalacións do Polideportivo Municipal e outros edificios oficiais e privados.

Para o orzamento da obra, que chega ao medio millón de euros, a Deputación Provincial aportou a través do Plan “Depo-Remse” o 85% do mesmo e o Concello o 15% restante. As obras que están a executarse pola empresa “COVSA”.  

“Esta actuación no Porriño é exemplar para que as persoas recuperen e ocupen os espazos públicos que antes utilizaban os vehículos”, manifestou Carlos López Font. “Neste caso concreto estamos nun entorno que definiría coma paradigmático pois temos un instituto, un colexio, polideportivo municipal, edificios oficiais como a Tesoreria da Seguridade Social, Centro de Saúde o so Xulgados, que moven xente de todas as idades que se beneficiarán deste cambio radical por unha mobilidade tranformadora e segura”, engadiu o deputado responsable de Infraestructuras.

Pola súa banda, Eva García ponderou “o traballo realizado” polo concelleiro de Infraestructuras, Pedro Pereira “pola súa capacidade para buscar e axeitar solucións constructivas conforme avanzaba a obra”, manifestou a alcaldesa.   

Para Eva García “esta obra é un primeiro paso para evidenciar que o concepto de cidade que compartimos neste goberno de coalición vaise facendo realidade para transformar O Porriño e agardo que sexa coa plena colaboración da Deputación Provincial coma acontece dende hai 5 anos”.

18/08/2020 in Alcaldía, Educación e tecnoloxía, Tráfico, Urbanismo, comercio e industria, Vías e obras

Nove comunidades de augas acadaron subvencións do Concello por un importe global de máis de 52.000 €


Nove comunidades de augas de consumo acadaron subvencións do Concello do Porriño para realizar control sanitario, mantemento de instalacións e reparacións na rede de distribución durante este ano 2020.

As nove comunidades de augas beneficiadas son: Cerquido; Rozadas-Eirís; Atios; Torneiros; San Jorge-Mosende; Chenlo; Carracido; Budiño-Cruz e Cans.

Esta semana reuniuse e coñeceuse a resolución da comisión de avaliación que presidiu o concelleiro de Infraestructuras, Pedro Pereira asistido por tres técnicos municipais. A comisión determinou os importes das subvencións que totalizan 52.162 €.

As achegas maiores serán para Cerquido, San Jorge-Mosende, Chenlo e Cans que recibirán a o importe máximo que estaba limitado nas bases da convocatoria a 8.000 euros.

As restantes recibirán: Atios, 7.647 €; Rozadas-Eiris, 5.914 €; Torneiros, 2.800 €; Carracido, 2.542 €; e Budiño-Cruz, 1.258 €.

Pedro Pereira, concelleiro responsable deste departamento anunciou que “o Concello do Porriño mvai manter nos vindeiros anos esta liña de subvencións municipais en colaboración coas comunidades de augas”.

31/07/2020 in Alcaldía, Urbanismo, comercio e industria

O Concello iniciará no mes de agosto a mellora do vial de acceso á Lágoa das Gándaras de Budiño

O Concello do Porriño, a través da Concellería de Infraestructuras que dirixe Pedro Pereira, anuncia o inicio das obras de mellora do vial de acceso á Lagoa das Gándaras de Budiño. Segundo a previsión existente, os traballos se iniciarán no vindeiro mes de agosto. Trátase dunha obra financiada polo Plan Concellos 2020, cun orzamento base de licitación de preto de 44.000 euros (IVE incluído). 

Actualmente o vial municipal de acceso ás Gándaras de Budiño atópase en mal estado, sendo necesaria a rehabilitación integral do pavimento, así como a realización de cunetas para a recollida das augas pluviais, que actualmente están a danar o firme existente. Polo tanto, as obras a realizar consisten na mellora do firme e da drenaxe.

Ademais, segundo o proxecto dirixido polo concelleiro de Infraestructuras, eliminarase a chaira de mestura  bituminosa existente no parque natural, deixando unicamente un vial de acceso de tres metros. Esta superficie aglomerada substituirase por unha capa de terra vexetal, coa intención de que esta zona poida ser reforestada.

Por último, darase continuidade á varanda de madeira existente, de maneira que se complete o peche do espazo natural. Colocarase unha porta de tres metros de anchura para o acceso ao parque.

O proxecto foi previamente presentado polo Concello do Porriño ante a Dirección Xeral do Patrimonio Natural da Consellería de Medio Ambiente da Xunta de Galicia que deu o seu visto bó e informou favorablemente.

As Gándaras de Budiño é un ecosistema situado no sur do municipio que ocupa unha superficie de máis de 700 hectáreas ao longo do río Louro, afluente do Miño. Pola súa proximidade ao Atlántico e á humidade da zona, convértese nunha zona  pantanosa de importante valor natural.  Pero o máis destacado das Gándaras de Budiño é a súa fauna e flora; a vexetación acuática e sobre todo a gran cantidade de aves migratorias que teñen un punto de cría nesta zona polo que as Gándaras son un lugar de gran interese científico.

Ademais hai asentamentos  paleolíticos que se poden visitar grazas aos percorridos de sendeirismo.

As Gandaras

29/07/2020 in Urbanismo, comercio e industria

Concello e Entidade Urbanística de A Granxa acometerán a reposición da rede contra incendios do Polígono Industrial

O Concello do Porriño e a Entidade Urbanística de A Granxa mantiveron unha primeira reunión para establecer como acometerán a reposición e reparación da rede contra incendios do polígono industrial que tén unha lonxitude de 5 quilómetros. Trátase de cambiar pezas nas acometidas ás naves, así como revisar o estado de bombas de achique, galerías de servizos e alumeado.

Neste primeiro encontro participaron representacións do goberno municipal, encabezada por Lourdes Moure, concelleira de Vías e Obras, e da Entidade Urbanística, co xerente David Sobral. “É a primeira vez en 20 anos do polígono da Granxa que un goberno municipal do Porriño afronta este problema de mantemento que afecta ás 260 empresas establecidas nese polígono”, manifestou Lourdes Moure ao termo da reunión celebrada no consistorio.

Segundo as recomendacións dos técnicos sobre qué actuacións serían prioritarias, a máis urxente sería mudar as pezas de ferro das acometidas por esgotamento da súa vida útil.

“O Concello coa colaboración da Entidade Urbanística de A Granxa, determinaremos de qué xeito pódese financiar a execución destas melloras”, manifestou a concelleira Lourdes Moure, asunto que se tratará nunha vindeira reunión.

27/07/2020 in Urbanismo, comercio e industria, Vías e obras