Tráfico

Aviso de cortes de tráfico polo paso da Volta Ciclista a Galicia

A Policía Local alerta dos cortes de tráfico que se producirán este venres, ao mediodía, cunha duración de 15 a 30 minutos, nas estradas polo paso da Volta Ciclista a Galicia.
A etapa Ponteareas-Ponteareas que comezará ás 12:00 dende a vila do Tea, entrará no Porriño por Cans, pola N-120, arredor das 12:15, dependendo da velocidade á que transite o pelotón. Ao pasar polo centro de Porriño hai unha meta volante na cafetería Platinium. A carreira discorrerá pola rúa Antonio Palacios, xirará na rotonda cara á avenida Domingo Bueno e conectará coa estrada nacional 550 en dirección a Tui. A caravana virará cara a Atios e Budiño segundo o libro de ruta da etapa que publicamos na imaxe adxunta.
A previsión é que ao redor das 12.30 conclúa o paso da etapa por Porriño.

16/09/2021 in Deportes, Tráfico

A Policía Local realizará cortes de tráfico de mañá e tarde nas rúas afectadas polo paso da Volta Ciclista a España

A Policía Local do Porriño anuncia que este sábado 4 de setembro, coa ocasión do paso da etapa da Volta Ciclista a España, realizará cortes de tráfico, en horarios de mañá e tarde, nas rúas afectadas polo paso da carreira.

Como consecuencia deste evento deportivo tamén haberá restricións de aparcadoiro nas rúas afectadas unha hora antes do paso dos ciclistas.

A folla de ruta desta etapa contempla dous pasos polo Porriño. O primeiro será ao redor das 14 horas. A caravana entrará no Porriño pola avenida de Galicia, seguirá pola rúa Domingo Bueno ata o cruzamento coa estrada de Torneiros e logo continuará pola estrada provincial EP-2402 de Torneiros a Mosende.

O segundo paso por Porriño será arredor das 17 horas. Os ciclistas entrarán no termo municipal, procedentes de Gondomar, a través de Chenlo.

Continuarán cara á Abelenda pola estrada PO-331 ata o Cristo de Belén para seguir cara a Mos.

 

03/09/2021 in Deportes, Seguridade, Tráfico

Policía Local e Protección Civil traballan nos preparativos do 54º Rallye Rías Baixas

 

A Agrupación de Voluntarios de Protección Civil de O Porriño encargarase a partir das nove da noite de hoxe de avisar aos establecementos de hostalería da rúa peonil para que recollan as súas terrazas, a fin de facilitar o valado e sinalización do recinto que acollerá mañá sábado a comitiva de participantes na 54ª edición do Rallye Rías Baixas.
Os voluntarios da agrupación que dirixe Suso Gónzalez “Carrola”, deixarán sinalizado esta noite o recinto que mañá sábado recibirá os tres reagrupamentos de vehículos participantes que están previstos en tres quendas horarias: 11,28 a 11:58; 15,40 a 16:10; e finalmente de 18:54 a 19:09.
A Policía Local, pola súa banda, restrinxirá o tráfico pola rúa Pío XII e prohibirá o estacionamento de vehículos para garantir o acceso dos participantes ao recinto dos reagrupamentos. E xunto con Protección Civil realizarán labores de vixilancia e seguridade no transcurso dos tramos cronometrados que durante a mañá e a tarde do sábado terán lugar polo termo municipal porriñés.
Finalmente Protección Civil tamén colaborará coa dotación do Parque Comarcal de Bombeiros do Porriño en previsión de calquera accidente no que fose necesaria a súa intervención.
O evento automobilístico ten ao Concello do Porriño como unha das institucións que máis anos leva colaborando coa proba, tanto de xeito económico como na loxística.

23/07/2021 in Alcaldía, Deportes, Seguridade, Tráfico

Proxectase instalar lombos e pasos de peóns sobreelevados na estrada provincial 2401, entre Porriño e Mosende

O Servizo de Infraestruturas da Deputación de Pontevedra fixo chegar ao Concello do Porriño as actuacións previstas no “III Plan Móvese” para aumentar a seguridade viaria nas estradas provinciais que, no que atinxe a este municipio, proxectan instalar “lombos” e pasos de peóns sobreelevados, na E.P. 2401. Concretamente nun treito de 5 quilómetros entre O Porriño e Mosende, proxéctanse 5 redutores físicos de velocidade (lombos) e 8 pasos de peóns sobreelevados.

Ademais estas actuacións de calmado do tráfico levarán aparelladas pequenas reformas dos tramos de beirarrúas e dos espazos de aparcadoiro ao carón dos pasos de peóns para facilitar a visibilidade neses treitos da estrada., como se pode apreciar no gráfico adxunto

As actuacións definidas polos técnicos da Deputación son produto dun proceso participativo co Concello do Porriño e despois dun traballo de campo para analizar as necesidades demandadas para deseñar as solucións técnicas en cada caso.

16/07/2021 in Alcaldía, Infraestruturas, Tráfico, Vías e obras

Rematado o acondicionamento da rotonda de Antonio Palacios, sen custe para o erario municipal

A Concellería de Infraestruturas e Mobilidade, que dirixe Pedro Pereira, comunica o remate dos traballos realizados estes días na rotonda de confluencia de Antonio Palacios coa rúa Domingo Bueno e a avenida de Galicia.

Consistiron no rebaixe dos bordillos e do adoquín perimetral. A reforma da rotonda realizouse a solicitude da empresa “Citic Censa” para facilitar o paso de camións. A configuración anterior da rotonda, cos bordes altos, impedía ou dificultaba o paso de transportes con pezas especiais de grandes dimensións. O problema radicaba en que os vehículos pesados tiñan moi complicado o radio de xiro entre as rúas Domingo Bueno e Antonio Palacios.

Precisamente ao longo do mes de xullo, “Citic Censa” ten que atender varios pedidos de pezas especiais que se teñen que trasladar ao Porto de Vigo.

As obras de reforma da rotonda, co rebaixe de bordes e adoquíns realizaronse e financiaronse pola propia empresa “Citic Censa”. Pola súa banda, o Concello aproveitará para acondicionar a zona verde da rotonda durante o mes de xullo, segundo informou o concelleiro Pedro Pereira.

29/06/2021 in Infraestruturas, Tráfico

Protección Civil do Porriño atendeu os tres accidentes de tráfico con camións ocorridos nas últimas horas

A Agrupación de Protección Civil do Porriño atendeu os tres accidentes de tráfico con catro camións e outros vehículos implicados que ocorreron nas últimas horas en tres puntos do termo municipal. Un deles foi na Autovía A-55 pola saída dun camión que impacto contra a mediana.


Outro sinistro foi a colisión entre dos vehículos pesados no Polígono da Granxa na que tamén resultaron afectados outros vehículos como consecuencia do derrubamento dun poste do alumeado público. Neste suceso tamén acudiron axentes da Policía Local do Porriño para levantar o correspondente atestado por danos.


O terceiro accidente atendido polos efectivos de Protección Civil do Porriño foi o envorco dun camión na estrada de Salceda (PO-510) que transportaba un contedor con restos de madeira.


Suso Gónzalez “Carrola”, responsable de Protección Civil Porriño, informou que, precisamente, onte foi o derradeiro día no que estaban a facer prácticas 6 voluntarios que completaron deste xeito a súa formación no curso de FP “Atención Sanitaria a múltiples vítimas e catástrofes” para obter o certificado de profesionalidade no ámbito da atención sanitaria. Os alumnos e alumnas, de idades comprendidas entre 22 e 50 anos, realizaron as prácticas dende o 26 de maio cando recibiron a benvida da concelleira de Seguridade, Lourdes Moure, no nome do Concello do Porriño.

16/06/2021 in Seguridade, Tráfico

A Policía Local avisa de cortes de tráfico e solicita a retirada de vehículos estacionados nas rúas afectadas polo paso da “Challenge Rías Baixas” de ciclismo.

A Policía Local do Porriño informa á veciñanza de que esta vindeira fin de semana, haberá cortes de tráfico e restricións para estacionamento de vehículos coa ocasión de celebrarse a “V Challenge Rías Baixas” de ciclismo que discorrerá por Porriño e outras poboacións da contorna.

Engadimos nas dúas imaxes adxuntas, os rutómetros das etapas con horarios de paso previstos e as rúas e estradas polas que circularán os ciclistas.

O sábado 8, data da segunda etapa con saída e chegada en Mos, haberá cortes de tráfico puntuais a partir das cinco da tarde cando a caravana circule en dirección Tui, e posteriormente, a partir das seis e media da tarde, cando regrese por Cans, rúa Antonio Palacios e Avenida de Galicia en dirección ao Pazo de Mos.
O domingo 9, coa ocasión da terceira e última Porriño-Porriño, haberá as maiores restricións.


A Policía Local solicita aos condutores que non estacionen os seus vehículos desde as 8.00 horas na avenida Domingo Bueno, en ambas marxes (entre a intersección con Fernández Areal ata a praza de San Sebastián). Tampouco poderá estacionarse, no mesmo horario, na rúa Parque Infantil que será cortada ao tráfico, de mesmo xeito que a rúa San Sebastián, entre a capela de San Bieito e a praza de San Sebastián.
A Policía Local prega a colaboración dos condutores e advirte que os vehículos que estean estacionados nas devanditas rúas, serán retirados polo guindastre.
A Policía Local sinalizará nas rúas afectadas e colocará follas informativas nos parabrisas dos vehículos para lembrar estas circunstancias aos condutores.



 

05/05/2021 in Alcaldía, Deportes, Tráfico

Adif comunica que debe retomar os traballos de mantemento que afectarán ao tráfico na área do paso a nivel

 

O Administrador de Infraestruturas Ferroviarias (ADIF) comunicou ao Concello do Porriño que hoxe o luns 22, debe retomar os traballos de mellora na área ferroviaria que motivará a repetir os recortes e desvíos do tráfico de vehículos na contorna.
As restricións serán entre as 23 horas desta noite e as 6 horas da mañá do martes 23.

Para executar esas tarefas manterán as barreiras baixadas para interromper tanto o tráfico ferroviario como o tráfico de vehículos a motor, polo que se habilitarán desvíos, de novo.

A Policía Local informa que serán os mesmos que lembramos:
– A rúa Peña será cortada na Rotonda da Central para os vehículos que proveñen da rúa Estación, que, polo tanto, deben circular pola rúa Ramiranes.
– Os vehículos que circulen pola rúa Cando deben ir á rotonda da Central e continuar obrigatoriamente pola rúa Ramiranes.
– E os vehículos que circulen pola Avenida Bos Aires deben continuar pola rúa Progreso.

Estes desvíos serán sinalizados e controlados pola Policía Local.

22/03/2021 in Alcaldía, Seguridade, Tráfico

As alcaldesas de Salvaterra, Salceda e Porriño despregaron unha pancarta cun lazo negro en condolencia cos familiares das vítimas do accidente no Alto da Brava

 

Marta Valcárcel, alcaldesa de Salvaterra do Miño xunto coas rexedoras de Salceda de Caselas, Loli Castiñeira e de Porriño, Eva Garcia despregaron hoxe unha pancarta cun lazo negro no viaduto de Parderrubias, na estrada PO-510, preto do Alto Da Brava onde pasou o venres pola noite, o accidente no que morreron unha muller e dous dos seus fillos.


As alcaldesas amosaron deste xeito a súa condolencia e dos concellos que representan cos familiares das vítimas.

22/03/2021 in Alcaldía, Tráfico

Adif comunica traballos de mantemento no ferrocarril que afectarán ao tráfico de vehículos na área do paso a nivel

 

A Policía Local notifica unha serie de cortes e cambios de tráfico rodado para vehículos, debido aos traballos de mantemento que ADIF realizará a partir das 23 horas deste domingo 21 e ata as 6 da mañá do luns 22, na zona do paso a nivel.

Para executar esas tarefas manterán as barreiras baixadas para interromper tanto o tráfico ferroviario como o tráfico de vehículos a motor, polo que se habilitarán desvíos.

A Policía Local informa que serán os seguintes:
– A rúa Peña será cortada na Rotonda da Central para os vehículos que proveñen da rúa Estación, que, polo tanto, deben circular pola rúa Ramiranes.
– Os vehículos que circulen pola rúa Cando deben ir á rotonda da Central e continuar obrigatoriamente pola rúa Ramiranes.
– E os vehículos que circulen pola Avenida Bos Aires deben continuar pola rúa Progreso.

Estos desvíos serán sinalizados e controlados pola Policía Local. Serán válidos ata que os traballos de mantemento que o Administrador de Infraestruturas Ferroviarias (ADIF) vai realizar.

20/03/2021 in Tráfico