Sen categoría

O Concello do Porriño, a través da concellería de Comercio que dirixe Antía Carrera, convoca o seu I Concurso de Sobremesas de Nadal.

“O obxectivo é recuperar a preparación deses postres caseiros típicos do Nadal e que os amantes da cociña e a repostaría poidan mostrar as súas mellores creacións, inspiradas nunha das épocas do ano na que as receitas doces adquiren un especial protagonismo”, explicou a concelleira.

As sobremesas que se presenten deberán estar relacionadas co Nadal, ben sexa polos ingredientes empregados ou pola súa presentación.

Os doces presentaranse xa preparados na casa e deberán ser consumibles en prato individual para un mínimo de 10 comensais. Cada concursante poderá presentar un máximo de dúas sobremesas. Terán que estar listas para degustar, en perfectas condicións de consumo e en bandexa desbotable o día 23 de decembro de 2022, ás 12 h na praza Arquitecto Antonio Palacios.

No momento da recepción da sobremesa seralle entregado un sobre á persoa participante, co que se lle asignará un número. Neste sobre deberán introducir a receita cos ingredientes utilizados e a forma de elaboración. O xurado soamente coñecerá o número e non a identidade do/a participante (que non será desvelada ata a asignación dos premios). 

“Valorarase o sabor, a elaboración, a complexidade da receita, os ingredientes utilizados, a orixinalidade e a creatividade da presentación”, apuntou Antía Carrera, “Outorgaranse tres premios (o primeiro de 250 euros, o segundo de 150 e o terceiro de 100 euros) para consumir no Porriño, xa que o certame ten tamén como fin dinamizar o consumo nos nosos locais de hostalería e comercio”.

O prazo de inscrición está aberto ata o 21 de decembro. Todas as persoas interesadas en participar poderan anotarse enviando o impreso que se colgará na páxina web municipal xunto coas bases ao seguinte correo electrónico: rexistro@oporrino.org .

BASES:  https://oporrino.org/documentos/bases-i-concurso-de-postres-de-nadal/

FOLLA DE INSCRICIÓN: https://oporrino.org/documentos/folla-de-inscricion-i-concurso-postres-de-nadal/

A xa tradicional Noite do Calacú organizada pola Asociación de Veciños de San Benito e San Sebastián chega este ano á súa XVII edición, consolidando unha celebración que se remonta aos anos 50-60. Foi no ano 2004 cando os veciños e veciñas do barrio retomaron este evento que, a día de hoxe, é cita ineludible no Porriño cada novembro.

A festa, que conta coa colaboración do Concello do Porriño, celebrarase este sábado 5 de novembro no paseo de San Benito. Os actos comezarán ás 17 h co obradoiro de calacús para os nenos e nenas que se desenvolverá ata as 19 h.

A partir das 19:30 h chega un dos momentos máis sentidos, o do nomeamento da Dama e Cabaleiro do Calacú, recoñecemento que este ano recae sobre Teresa Palacín e Telmo Pereiro. De seguido, comezará o Desfile do Gran Calacú polo percorrido de costume.

O broche final como cada ano será un gran magosto  con animación e charanga. 

Os delegados territoriais da Xunta en Vigo e Pontevedra, Marta Fernández-Tapias e Luis López, anunciaron este mediodía que o Goberno galego executará ou activará investimentos por 15,7 millóns de euros no que resta do presente ano no Concello do Porriño, segundo se analizou na primeira sesión conxunta da Comisión Provincial de ambas delegacións territoriais, celebrada na casa consistorial deste municipio da Louriña.

“O Porriño é un dos concellos máis importantes de Galicia, cun gran valor estratéxico, moito peso empresarial e unha dinámica ascendente, xa que foi o último en incorporarse ao destacado grupo dos 23 concellos galegos de máis de 20.000 habitantes. Ademais dinamiza social e economicamente a unha ampla contorna, polo que dende a Xunta apostamos de xeito global polas súas necesidades cuns fortes investimentos, que son perfectamente visibles, que proceden de todas as consellerías con moita intensidade e que amosan o absoluto compromiso do Goberno galego para colaborar co seu desenvolvemento”, manifestou Marta Fernández-Tapias.

Os delegados territoriais, acompañados polas dúas secretarias territoriais e pola ducia de xefes territoriais das distintas consellerías que conforman este órgano, foron recibidos no Concello polo alcalde do Porriño, Alejandro Lorenzo, e por outros representantes municipais e agradeceron a acollida e a cesión deste espazo para celebrar esta comisión ao abeiro do seu percorrido itinerante por toda a provincia. Cómpre sinalar que, no marco da política de descentralización e cercanía da Xunta por todo o territorio, estas xuntanzas de traballo xa se celebraron anteriormente en municipios como Covelo, Oia, O Grove, Campo Lameiro, Lalín, Marín, Pontecesures ou Rodeiro e chegan por vez primeira á bisbarra da Louriña.

Na reunión fíxose un estudo de situación das principais cuestións da Xunta de Galicia na provincia de Pontevedra, abordando a situación sanitaria da pandemia da covid-19 e a inoculación da cuarta dose da vacina, o axeitado inicio de curso en todas as etapas educativas, a parte final do Xacobeo, -ao que lle restan 82 días-, a fase final da época de alto risco de lumes forestais ou as distintas liñas de axudas para incentivar o consumo e axudar ás familias durante o outono, como o Bono Turístico 2022, o Bono Activa Comercio ou o Bono Cultura, entre moitas outras cuestións.

Así mesmo, e tal e como se fai en cada municipio que acolle a comisión, analizáronse polo miúdo os investimentos da Xunta, neste caso os 15,7 millóns de euros para o Concello do Porriño, co obxectivo de trasladar diversos aspectos ás distintas consellerías para que a súa xestión sexa o máis áxil posible.

As actuacións máis destacadas para o que resta de ano enmárcanse, principalmente, en cuestións sanitarias, educativas, empresariais e de infraestruturas, xa que figuran a ampliación, xa en marcha, do centro de saúde ata os 3.000 m2 (4,5 millóns de euros); o vindeiro Centro de Fabricación Avanzada de Automoción (4,3 millóns de euros); a rehabilitación integral do IES Pino Manso e outras melloras nos CEIP Xosé Fernández e da Ribeira, así como a implantación do Ciclo Medio de Pedra Natural no IES Ribeira do Louro, que suman 2,1 millóns de euros; ou as tres sendas para mellorar a seguridade viaria nas estradas autonómicas PO-407, PO-510 e PO-329. Deste xeito, xa están redactados os proxectos, para a súa próxima contratación, dos itinerarios peonís entre Budiño e o límite con Salceda (1 millón de euros), da vía cara ao municipio de Mos (200.000 euros) e da zona urbana da PO-329 (1,2 millóns de euros).

Tamén figuran o recentemente iniciado obradoiro de emprego, dotado con 504.000 euros, os 1,55 millóns de euros en investimentos sociais para o Servizo de Axuda no Fogar, as prazas de atención ao Alzhéimer, o Risga ou o Plan Concertado, aos que haberá que engadir o importe pola gratuidade de 396 prazas nas seis escolas infantís do municipio, as 40 prazas de atención a maiores ou a mellora de equipamentos na ducia de centros sociais do Porriño. Finalmente, a Xunta destinará máis de 310.000 á mellora de camiños rurais a través do Plan Marco é á renovación de equipamentos e infraestruturas urbanas co Fondo de Cooperación Local, o Fondo de Compensación Ambiental ou a orde de infraestruturas de uso público.

O artista madrileño Coque Malla actuará mañá venres 23 de de setembro (22 h) no exterior do pavillón municipal do Porriño para ofrecer un dos últimos concertos de ‘El viaje del astronauta gigante’. Será unha noite moi especial e a última oportunidade de ver a este artista referente do rock e o indie deste país en directo, polo menos durante un tempo, xa que anuncia un descanso indefinido nas súas xiras.

“A presenza e o impulso dun concerto como o de Coque Malla nas festas do Cristo dá á nosa  vila un plus de interese dentro da ruta do Camiño Portugués, e unha excusa perfecta para achegarse á gastronomía, ao patrimonio e, sobre todo, á cultura loca, que esa noite tamén terá presenza no escenario da man do artista local Raúl Ben”, explicou o alcalde, Alejandro Lorenzo.

Coque Malla e a súa banda regresan coa súa nova xira ‘El viaje del astronauta gigante’ na que presentará as cancións do seu último disco. Un repaso a toda a súa traxectoria, desde o seu debut adolescente cos Ronaldos con cancións como ‘No puedo vivir sin ti’, ‘Adiós papá’ ou ‘Por las noches’, desde os grandes fitos da súa carreira en solitario, o camiño percorrido entre ‘Soy un Astronauta más’ e ‘La hora de los gigantes’ con grandes hits como ‘Me dejó marchar’”, ‘Berlín’ e ‘Un lazo rojo’, ata as súas colaboracións con outros artistas e, por suposto, os temas inéditos como ‘Una sola vez’, o seu último éxito.

Despois de tres anos moi intensos, cargados de concertos, esta xira é ademais unha última oportunidade para ver en directo a Coque Malla durante un tempo. Tras ‘El viaje del astronauta gigante’ Coque anuncia un descanso indefinido nas súas xiras, un punto de inflexión nos seus trinta e cinco anos de carreira, nos que o escenario foi sempre a súa gran paixón.

Contar cunha programación musical do Xacobeo 21·22 na vila, significa tamén ofrecer unha oferta atractiva para os peregrinos que necesariamente paran no pobo, ao ser fin dunha etapa e comezo da seguinte, con todo o que isto supón.  Ofrecerlles experiencias coma esta, en forma de música de calidade, de desfrute e goce na parada intermedia, ademais da gastronomía ou o patrimonio.

O concerto está programado para as 22 h e a entrada será libre ata completar aforo. Lembramos que, a continuación, celebrarase o “Louro Valley Festival”.

A Aula CeMIT do Concello do Porriño volve a ofrecer cursos de formación presenciais desde este mes. As actividades desenvolveranse na aula, situada no Multiusos de Torneiros en horario  de mañá e tarde.

Entre a oferta formativa atópanse cursos competencias dixitais, ofimática e optimización e mantemento de equipos, en diferentes niveis.

Toda a información sobre os cursos, horarios e inscricións en  cemit.oporrino@gmail.com ou a través do 655 626 203.

A aula CeMIT está equipada coa última tecnoloxía , Internet e sistemas de videoconferencia a disposición da cidadanía, tanto para actividades formativas como para o acceso libre. Está xestionada por un axente TIC que imparte e planifica os cursos e ademais presta apoio aos usuarios e usuarias no seu achegamente ás TIC.

O alcalde do Porriño, Alejandro Lorenzo, e a concelleira de Educación, Carolina González, acompañaron hoxe ao xefe territorial de Educación, César Pérez Ares e aos directores e directoras dos centros educativos do Porriño no acto de inauguración do curso escolar no municipio.

Este ano, o acto realizouse no CEIP da Ribeira, en Torneiros, un centro que acolle a nenos e nenas das parroquias de Torneiros, Chenlo e Pontellas.

“Recuperamos a normalidade nas aulas tras dous anos marcados polas restricións da pandemia, os nenos e nenas poden verse as caras, xogar e abrazarse, con precaucións por suposto, pero poderán volver a ser nenos”, afirmou o alcalde, quen agradeceu aos profesores e profesoras “o enorme traballo que fixestes en momentos tan difíciles, tanto vós como as ANPAS”. “Gracias a vós todo foi máis sinxelo para eles e moito menos traumático”, apuntou.

O rexedor aproveitou para reiterar o apoio do Concello do Porriño aos equipos directivos. “Tedes a nosa man tendida para o que precisedes”, concluíu, “Os nosos centros precisan moitas melloras e traballaremos para todas elas se leven a cabo”. Lorenzo quixo poñer en valor o labor da concelleira de Educación, Carolina González, que compaxina a súa labor de docente coa de concelleira e “traballa moi duro para atender todas as necesidades de todos os centros do Porriño, cunha máxima sempre: os nosos nenos e nenas merecen unha educación pública de calidade”.

O Porriño mergullouse xa no seu mes das Festas do Cristo e ao seu abeiro regresan os eventos que non poden faltar, como a clásica “La Nocturna”.

A proba ciclista, organizada polo Club Master Louriña en colaboración co Concello do Porriño, é o único evento do calendario nacional que abrangue todas as categorías, dende a de promesas ata a categoría élite.

“Este ano inclúense dúas mangas moi especiais: o ciclismo adaptado e o ciclismo inclusivo, coas que ademais de engadir unha proba ao seu calendario pretendemos enviar unha mensaxe de respecto e inclusión”, explicou o presidente do Master Louriña, Juan Álvarez.

A proba disputarase mañá venres 9 de setembro e dará comezo ás 17 h, unha hora antes do habitual. O percorrido será como sempre urbano, algo que supón un gran atractivo para participantes e público.

“Hai cousas que non poden faltar nunhas Festas do Cristo e a Nocturna é unha delas”, apuntou o alcalde, Alejandro Lorenzo, “Unha vez máis, moitas grazas ao Master da Louriña e estou seguro de que será todo un éxito novamente, proba diso son os máis de 300 inscritos que temos xa”.  

Dous axentes da Policía Local do Porriño salvaron a vida dun varón de 80 anos, veciño do Porriño, que entrou en parada cardiorrespiratoria na tarde de onte.

Aconteceu na céntrica rúa Ramirás, cando o home circulaba no seu vehículo. Foi unha viandante a que alertou á Policía ao ver a unha persoa inconsciente no interior dun coche parado no medio da calzada.

A patrulla, equipada cun equipo DESA, desprazouse ao lugar e en tan só dous minutos estaban a prestar atención ao home. Ao chegar puideron comprobar que non respondía aos estímulos polo que procederon a realizar as maniobras de reanimación cardiopulmonar, utilizando o desfibrilador do coche patrulla ata que se estabilizou e foi atendido polos servizos médicos. Cabe destacar que os vehículos da Policía Local están equipados con equipos DESA de primeiros auxilios.

O alcalde do Porriño, Alejandro Lorenzo, recibiu hoxe aos axentes para agradecer o seu bo facer e o esencial labor que desempeñan. Un agradecemento que estes recibiron e quixeron facer extensivo aos/as cidadáns/as que colaboraron a atender a esta persoa.

Os nenos e nenas dos colexios do Porriño disfrutan estes días de xornadas multiaventura no marco da Semana Branca, que se celebra dun xeito diferente: con area, sol e mar.

Durante uns días, o alumnado participa nesta actividade organizada pola asociación Semana Branca en colaboración co Concello do Porriño. Celebráse na praia e os pequenos e pequenas realizan múltiples actividades deportivas como vóley praia, kayak ou surf na escola de Patos.

O alcalde do Porriño, Alejandro Lorenzo, e a concelleira de Educación, Carolina González, compartiron hoxe con eles un ratiño de aventura, xogaron ao volley cos nenos/as e profes e conversaron sobre todo o que farán hoxe. “Este tipo de actividades son moi enriquecedoras para eles e velos disfrutar xuntos/as é moi satisfactorio”, concluíu o alcalde, “despiden un curso e unha etapa, que mellor maneira de facelo que divertíndose cos seus compañeiros”.