Cultura e festas

A Concellería de Cultura e Festas ven de anunciar o programa das Festas de San Bieito que este ano terán un formato máis reducido e axeitado aos protocolos sanitarios obrigados polo “Covid-19”, no que atinxe ao tipo de espectáculos que se poden ofrecer e ao aforo restrinxido.

O programa festivo recolle sete eventos. Comezará o sábado 11 coa actuación da arpista Marta Quintana, prevista ás 21 horas na praza de San Bieito. Ese mesmo día, de noite, haberá sesión de cinema na rúa, coa proxección da película galega “O que arde”, dirixida por Óliver Laxe e que valeulle a unha das protagonistas, Benedicta Sánchez, para gañar o premio “Goya” á mellor actriz revelación. O pase da película realizarase o sábado 11 na praza de San Sebastián, a partir das 23 horas.

O domingo 12 está programada a actuación do grupo vigués “Xardín desordeado” que musicaliza poesía en galego con diferentes ritmos, dende o bolero, pasando polo “swing” e ata o “blues”. Terá lugar ás 21 horas na praza de San Bieito.

A concelleira responsable da organización, Cami Moreira subliña que a maior novidade que se contempla no programa deste ano é a visita guiada ao cultivo de vimbieiras de Julia De La Cal que terá lugar o luns 13, festivo local no Porriño. A comitiva sairá dende a praza de San Bieito, a partir das seis da tarde.

Julia e Marcelo de Faia Educación Ambiental serán os encargados de realizar esta visita coas explicacións pertinentes respecto desta materia. Require de inscrición previa a través do correo electrónico cultura@oporrino.org (hai que descargar o documento de inscrición ).

DEIXAMOS ENLACE PARA DESCARGAR

Os menores de idade deberán ir acompañados dun adulto responsable dos mesmos. A inscrición levarase a cabo por orden de remisión dos correos electrónicos, ata un máximo de 30 participantes. Para participar nesta actividade é obrigatorio o uso de máscara. É recomendable levar gorro e auga.

O mesmo luns, polo serán, a partir das 21 horas, Julia de la Cal manterá unha conversa para achegar á cestería ao público que acuda á Praza de San Sebastián onde se celebrará.
O luns, ás 20 horas haberá tamén un concerto musical a cargo do dúo “Lagoa Folk”, na praza de San Bieito. E o remate da programación será unha tirada de fogos artificiais, a partir das 23 horas.

A Concellería de Cultura e Festas anuncia o cuarto e último evento da programación “A praza non se apraza, fin do confinamento” que terá lugar este domingo día 5,  ás 22,30 horas da noite.

Será unha sesión de cinema na rúa, en Torneiros. Proxectarase na traseira da igrexa de San Rosendo. Aforo, 100 persoas.

A película elixida é “O apóstolo”, un film de animación en 3D, dirixido por Fernando Cortizo na que participan poñendo as súas voces, actores e actrices galegas tan sobranceiros como Luis Tosar, Xosé Manuel Oliveira “Pico”, Carlos Blanco, Celso Bugallo, Isabel Blanco, Manuel Manquiña e colaboran artistas non galegos coma Héctor Alterio, Gabino Diego, Terele Pavez, Jorge Sanz, Geraldine Chaplin e Paul Naschy na que foi a súa última actuación antes de morrer.   

Entre os moitos galardóns acadados por esta película, subliñar os seis premios “Mestre Máteo” que obtivo en 2013, ano no que tamén estivo nomeada para os premios Goya.

Con este ciclo “A praza non se apraza”, a Concellería que dirixe Cami Moreira quixo “amosar o agradecemento do Concello a veciñanza do Porriño que fixo máis levadío o tempo de confinamento a causa da pandemia”. 

Dende o 13 de xuño, ofrecéronse dous concertos a cargo do grupo musical “KAF” e a actuación da pianista Ana Belén Rodríguez, en diferentes enclaves urbanos da vila, sen público. 

O Concello do Porriño, a través da Concellería de Cultura informa que a partires de mañá mércores 1 e ata o 20 de xullo pódense solicitar prazas na Escola Municipal de Música do Porriño.

Segundo informa o departamento que dirixe Cami Moreira, “este ano como novidade a folla de solicitude de praza pode descargarse na páxina web do Concello (está ao pé desta nova).

Entregarase no Rexistro Xeral do consistorio, mesmo previa solicitude de cita. Para solicitar a cita previa hai varias opcións: chamar ao teléfono 986335000 e solicitar cita; ou por internet, na sede electrónica do Concello do Porriño (non é necesario ter certificado dixital, só facilitar un email.

Tamén pódese acceder á folla de solicitude de praza a través da web do departamento municipal de Cultura. Deixamos o correspodente enlace.

Para o vindeiro curso 2020/2021, a oferta da Escola Municipal do Porriño acolle a nenos e nenas dende os 4 anos en Música e Movemento, e ademais de Linguaxe Musical para nenos, mozos e adultos, ofrece as especialidades de violín, viola, violoncelo, percusión, guitarra, piano, canto, gaita, óboe, clarinete, saxofón, frauta travesera, fagot, trompa, trompeta, bombardino, trombón, tuba, percusión tradicional, e conta con agrupacións como Banda, Orquestra de Cordas, Música Tradicional e Coral Infantil así como Coral Polifónica de adultos.

A matrícula definitiva realizarase no mes de setembro unha vez que se publiquen as listas de admitidos. Intentarase respectar os horarios deste curso no próximo na medida do que sexa posible coa aplicación dos protocolos COVID-19 e as medidas de limitación de aforo que se impoñan.

http://ecultura.net/wp-content/uploads/2020/06/Solicitude-de-praza-novos-ingresos.pdf

Deixamos tamén as seguintes instrucións para os trámites de cita previa e descarga da folla de solicitude

A Concellería de Cultura e Festas anuncia o terceiro concerto musical, sen público na rúa, do ciclo “A praza non se apraza”. Será este sábado 27, ás 22 horas e, de novo, a cargo do grupo “KAF”.  

A Concellería que dirixe Cami Moreira precisa que “trátase de amosar o agradecemento do Concello á veciñanza que fixo máis levadío o tempo de confinamento”. 

Os concertos ” A praza non se apraza” comezaron o pasado 13 de xuño cunha primeira actuación do grupo “KAF” e continuaron o pasado sábado coa actuación da pianista Ana Belén Rodríguez. 

Este sábado, ás 21 horas, haberá un concerto musical a cargo do grupo KAF. Un evento convocado baixo o lema “A praza non se apraza”. Que terá lugar sen público na rúa, segundo precisa a Concellería de Cultura e Festas, polas restricións que aínda están vixentes nesta fase do Plan de Desescalada.
A concelleira Cami Moreira explicou que “trátase de amosar o agradecemento do Concello á veciñanza que fixo máis levadío este tempo de confinamento”.

Dende hoxe luns 1 de xuño, volve abrir as súas portas a Biblioteca Municipal do Porriño, despois de permanecer pechada dende que se declarou o estado de alarma.

A Biblioteca funciona de novo, só en horario matinal, de 10 a 15 horas, de luns a venres.

“Abrimos de novo e facémolo con responsabilidade, adoptando as máximas garantías de hixiene e seguridade. É dicir: uso de máscara, xel hidro-alcólico distancia de seguridade de 2 metros, acompañamento dos menores de 14 anos e só servizo de préstamo e devolución de exemplares no mostrador de atención sen que sexa necesaria cita previa”, segundo indicou Cami Moreira, concelleira de Cultura.

Engadiu que o persoal da Biblioteca recomenda que para a devolución de libros “non teñades presa, evitar aglomeracións, hai prazo ata o 11 de xuño, e ademais ata mediados de mes aplicaremos unha “amnistía” xeral”, manifestou Cami Moreira.

A concelleira agradece a comprensión e paciencia da veciñanza.

Quen desexe máis información pode consultar a páxina web da Biblioteca: https://bibliotecadoporrino.com/