A Concellería de Cultura e Normalización Lingüística anuncia que este mércores, 24 de febreiro, día de Rosalía de Castro, con motivo do 184 aniversario do seu nacemento, realizarase un vídeo mapping na praza do Concello, adicado á escritora e poeta, referencia absoluta da cultura galega.
A actividade desenvolverase a partir das 19.30 horas.
Deixamos ligazón coa web de Cultura para máis detalles.
Día de Rosalía de Castro. Video Mapping adicado á escritora e poeta galega
O Concello do Porriño súmase á celebración do Día de Rosalía, 24 de febreiro, co fin de homenaxear o nacemento da figura máis relevante da literatura galega no seu 182º aniversario.
A Oficina Municipal de Información a Xuventude (OMIX) xunto coa Concellería de Cultura do Porriño coordinaron unha acción divulgativa nos centros de educación secundaria para que se escoite a poesía de Rosalía transformada en rap.
“RAP CON ROSALÍA” é o nome do proxecto desenvolvido nos centros de ensino secundario do Concello do Porriño durante os días 22 e 23 febreiro en horario lectivo e nas que participaron as mozas/os de 1º e 2º da ESO
Ofrecéronse catro obradoiros formativos de Rap en galego, de 90 minutos por sesión, nos que se traballaron diferentes recursos didácticos para aprender a escribir e interpretar rimas en galego e con temáticas de interese para a mocidade combinadas con diferentes textos e poesías de Rosalía de Castro, adaptándoos a ritmos de 4×4 para poder “rapealos” colectivamente sobre unha base musical urbana.
O Concello do Porriño, en colaboración coa asociación “O Porriño Arte”, ofrecen esta exposición “Máscaras do Entroido Galego” na Praza de Abastos.
O Concello do Porriño anuncia a ampliación ata o 17 de febreiro do prazo de presentación da convocatoria “Decora a túa máscara hixiénica” e indica que a exposición das propostas que se seleccionen non será presencial senón en liña.
Decora a túa máscara hixiénica
O Concello do Porriño suspenderá temporalmente o mercado ambulante durante as tres vindeiras semanas, segundo acordou hoxe a Comisión Municipal de Seguimento da Covid. Tamén durante ese período de tempo pecharanse os parques infantís e os recintos culturais, sociais e deportivos, conforme ás restricións que acordou a Xunta de Galicia e vixentes ata o 17 de febreiro.
A alcaldesa, Eva Garcia explicou que estas medidas locais de acompañamento ás restricións autonómicas “adóptanse para garantir a seguridade de todos limitando ao máximo a interacción e o contacto social”.
Por outra banda, a proposta do goberno municipal e co acordo dos participantes na Comisión Municipal de Seguimento, determinouse a celebración dun pleno municipal extraordinario para aprobar unha modificación orzamentaria para habilitar un fondo de axudas económicas directas, semellante ao que funcionou en 2020 e repartiu achegas por un importe total superior aos 80.000 €.
“A idea é axudar de xeito especial á hostalería, como sector máis damnificado polas restricións, pero tamén ao comercio e aos autónomos”, engadiu a alcaldesa.
Eva Garcia manifestou, tamén, que agarda “chegar a un consenso con todos os grupos políticos da corporación a contía desas axudas para que esta proposta saia coma unha iniciativa común de toda a corporación”.
A actual situación de pandemia pola Covid e as restricións en vigor, impiden celebrar este ano o Entroido. Por este motivo A Concellería de Cultura e Festas que dirixe Cami Moreira ven de abrir hoxe mércores 20, o prazo de presentación de traballos para unha mostra fotográfica de máscaras hixiénicas decoradas.
Deixamos ligazón coa páxina web de Cultura cos detalles da convocatoria
Decora a túa máscara hixiénica
As Súas Maxestades Melchor, Gaspar e Baltasar recibirán este martes 5 de xaneiro, de xeito presencial, aos nenos e nenas do Porriño que queiran falar con eles. Os Reis Magos atenderán en dúas quendas, pola mañá entre as 12 e as 14 horas, e pola tarde de 17 a 20 horas, no auditorio exterior do Centro Cultural Municipal onde está habilitada unha zona de recepción.
A entrada é libre, sen necesidade de cita previa. Pero haberá un control de entrada e capacidade, con rexistro de datos dos participantes e aplicación de protocolos de hixiene e seguridade.
Debido ás restricións actuais derivadas da pandemia, o Concello rexeitou a celebración da tradicional Cabalgata. A Concellería de Festas, que dirixe Cami Moreira apostou por outras formas de interacción da infancia porriñesa cos Reis Magos como esta recepción que terá lugar mañá e as videochamadas realizadas por Melchor, Gaspar e Baltasar a máis de 600 familias que previamente se rexistraron para este fin.
– Este mércores, O Apalpador percorrerá a zona peonil
602 familias rexistráronse ata hoxe, último día do prazo, para que os seus fillos reciban unha videochamada dos Reis Magos, unha iniciativa do Concello do Porriño, organizada pola Concellería de Festas e Cultura, de acordo cos protocolos de seguridade que veñen obrigados pola pandemia.
“Este ano 2020, debido á alerta sanitaria motivada pola Covid-19, e sabendo que os Reis Magos tamén se modernizan, o Concello facilita que as Súas Maxestades de Oriente se poñan en contacto coa rapazada a través de vídeo chamada”, segundo explicou Cami Moreira, concelleira responsable.
Ademais, tendo en conta a posibilidade de que algunhas familias non poidan ter acceso a internet, o Concello fará chegar á vivenda indicada e no día acordado, un dispositivo electrónico para poder facer a conexión da vídeo chamada.
Visita do “Apalpador”
Por outra banda, a Concellería de Cultura lembra que este mércores 30, a partir das 19 horas, “O Apalpador” estará no Porriño. Percorrerá a zona peonil para saudar e falar cos nenos do porriñés para contarlles como é a vida na alta montaña e as súas marabillosas lendas.
A visita do Apalpador realízase coa colaboración da Deputación de Pontevedra.
No auditorio exterior do Centro Cultural Municipal e baixo carpa, tiveron lugar onte á tarde os obradoiros infantís de Nadal.
Participaron nenos e nenas do municipio, de 3 a 12 anos de idade, que previamente inscribíronse para esta actividade que tiña aforo limitado.
Os obradoiros desenvolvidos eran de decoración de chapas, de tatuaxes, de modelaxe creativa con arxila e de elaboración de adornos de Nadal.
Esta tarde, entre as 17:00 e as 20:00 h. terán lugar os obradoiros de Nadal. Desenvolveranse no auditorio exterior do Centro Cultural Municipal, baixo carpa.
Trátase dunha actividade organizada pola Concellería de Cultura e Festexos, dirixida a nenos e nenas de 3 a 12 anos, co aforo limitado.
Para participar nesta actividade era necesaria inscrición previa.
Os obradoiros a desenvolver son:
“Obradoiro de chapas, decora a túa chapa dun xeito creativo.
Tatuaxes.
Modelaxe creativa con arxila, deixa voar a túa imaxinación cun pedazo de “pasta de modelar”.
Elaboración de adornos de Nadal, elixe, pinta e decora o teu adorno de Nadal”.