O Porriño convértese nun museo ao aire libre coa mostra “Rostros” de Afundación

O Concello do Porriño reforza a súa aposta pola cultura de proximidade transformando durante o mes de abril o Parque do Cristo nunha galería de arte urbana, coa colaboración con ABANCA e Afundación

O Porriño, 1 de abril de 2026. O Parque do Cristo transfórmase este mes de abril nunha galería de arte de excepción. A exposición “Rostros”, froito da colaboración estratéxica entre o Concello do Porriño, ABANCA e Afundación, achega á rúa unha selección imprescindible de obras que percorren a historia do retrato en Galicia. Desde o realismo de Sotomayor ata a modernidade de Maruja Mallo ou Laxeiro, a mostra convida á veciñanza a redescubrir os seus espazos habituais a través da mirada dos grandes mestres, convertendo un paseo cotián nunha experiencia cultural de primeiro nivel.

Esta mostra, ao abeiro do proxecto Corrente Cultural, nace para dar a coñecer a nosa arte desde o corazón das vilas, nas rúas. Unha selección de obras de diferentes autorías, atesouradas nas coleccións de arte de ABANCA e Afundación, adáptanse a formato fotográfico para exhibiren o mellor do xénero do retrato. “É un orgullo para O Porriño converterse no escenario desta ‘Corrente Cultural’. Queremos que a arte non estea pechada entre catro paredes, senón que forme parte viva do noso día a día. Traer os rostros de artistas como Seoane ou Lamazares ao Parque do Cristo é unha aposta decidida por democratizar a cultura e poñer o noso concello no mapa das grandes exposicións de Galicia” asegura o alcalde do Porriño que convida a todos os porriñeses e porriñesas a que “se deteñan, miren a estes ollos que nos falan desde o pasado e o presente, e desfruten deste privilexio no corazón da nosa vila.”

O acto de inauguración tivo lugar este mércores 1 de abril, na Praza do Cristo do Porriño e contou coa asistencia do alcalde do Concello do Porriño, Manuel Alejandro Lorenzo; a subdirectora da oficina de ABANCA no Porriño, María Cristina Rodríguez

Real; o xestor especialista da oficina de ABANCA no Porriño, Abel Gallego Rodríguez; e a coordinadora adxunta da Área de Cultura de Afundación e Responsable de Exposicións, Paloma Vela. Vera explicou que “estas imaxes abranguen 120 anos de arte, dende o romanticismo ao naturalismo, as vangardas… para que cada un descubra cal é a linguaxe que máis lle interesa”.

Artistas

O retrato na mostra

Considérase retrato a imaxe dunha persoa reproducida en pintura, escultura, debuxo ou fotografía, que describe a aparencia e o carácter do individuo representado. Ao longo da historia da arte, o retrato foi un dos xéneros de maior prestixio, cuxo interés radica en que non só se trata dunha representación do individuo, senón que tamén nos fala das diferentes épocas históricas, os seus códigos e os seus sinais de identidade. Hoxe en día, as imaxes de rostros enchen as nosas pantallas, dende as redes sociais ata as campañas publicitarias na Internet ou na televisión ou en medios escritos, e reflexan a nosa sociedade globalizada e conectada. Os selfies da era dixital democratizan a arte do autorretrato, xogando un importante papel na construción de identidades persoais e colectivas.

Esta mostra invita a explorar as diferentes e fascinantes interpretacións que as e os artistas fixeron (e fan) deste xénero, mergullarnos nas lembranzas das xentes que evocan, nas sensacións que transmiten, e nas novas fórmulas que foron introducindo desde finais do século XIX ata os nosos días, ao compás dos movementos artísticos que se van sucedendo.

01/04/2026 in Cultura e festas, Parroquias, Patrimonio Municipal, Turismo

O Porriño celebra un abril cargado de cultura coa estrea de “Crisálidas” e actividades para todos os públicos

O Porriño, 1 de abril de 2026. O Concello do Porriño continúa a súa aposta pola cultura e a igualdade cunha intensa programación para este mes de abril. Entre as citas máis destacadas atópase a representación de “Crisálidas”, a nova proposta de Atrezo Teatro, que se enmarca tanto na axenda cultural mensual como nos actos conmemorativos do 8M (Día Internacional da Muller) e que ten a súa estrea absoluta no Concello. Pero ademáis este mes chega con moda, programación infantil e xornadas ademais de outras sorpresas.

Teatro con mensaxe: “Crisálidas”

A obra terá lugar o vindeiro venres 10 de abril ás 20:30 h no Salón de Plenos do Concello. Baixo a produción de Atrezo Teatro, “Crisálidas” preséntase como un conxunto de historias que convidan á reflexión profunda, con títulos como Voces no silencio, Camila e a súa conciencia, Uff… unha experiencia relixiosa e O abrigo de pel de martas. A entrada será libre e gratuíta ata completar a capacidade do recinto.

Un mes cheo de actividades

Ademais do teatro, abril ofrece unha gran variedade de eventos que van desde o lecer para os máis maiores, arte na rúa coa exposición rostros, a II Mostra da Camelia, a

XXXVIII Feira Apícola das Rías Baixas ou, este mes, a alianza entre o concello, co comercio local e a moda, como é a Porriño Fashion Weekend.

Segue tamén a programación en igualdade coas conferencias, con Belén Rubido de la Torre, falando de “Mulleres novas, violencia dixital e deepfakes” o 23 de abril, ou o Curso de defensa persoal feminina e aspectos xurídicos, organizado en colaboración co Ministerio de Igualdade e o Pacto de Estado contra a Violencia de Xénero.

Para os máis pequenos A Biblioteca Municipal organiza os xoves o obradoiro “Libros que latexan” e o contacontos “Contos que curan” que continúan tamén neste mes de abril.

Toda a informacion da axenda do Porriño está actualizada en https://ecultura.net/

01/04/2026 in Cultura e festas

O avance das obras do cine do Porriño permitirá que sexa unha realidade en maio

As obras, explica a arquitecta, avanzan a bo ritmo, e “a ﬁnais de abril estará rematado”
“O Porriño é o mellor lugar para vivir, diso estou convencido eu, e as persoas que siguen elixindo este lugar para vivir e empadroarse, por iso non queremos que teñan que sair de aquí nin se quera para ir ao cine”, asegura o alcalde..
O espazo ten capacidade para 170 persoas, con equipamento audiovisual en 4K e son envolvente pero ademais o proxecto levado a cabo permitirá que se converta nun espazo versatil e polivalente
Esta actuación conta cun orzamento que supera os 250.000 euros ao abeiro do Plan +Provincia

O Porriño, 31 de marzo de 2026. Despois de máis de tres décadas de espera, o cine volve ao Porriño. Cunhas obras que avanzan a bo ritmo, a arquitecta encargada do proxecto, Estefanía Grandal, asegura que “a finais de abril estará rematado”. De feito, na visita que o alcalde, Alejandro Lorenzo, realizou con medios de comunicación este martes asegurou que toda a sala está xa insonorizada, teito e paredes, e incluso se avanzou en algo que non estaba no proxecto pero que permitirá a versatilidade neste espacio: realizar un graderío para mellorar a visibilidade desde a parte posterior do cine, para que todo o mundo poida ver comodamente a pantalla pero que permitirá tamén que o cine sexa utilizado para outras actividades, como cursos, con butacas que tamén estarán adaptadas.

As obras, que comezaron en xaneiro, tiñan un prazo de execució de seis meses, pero non haberá que esgotar o prazo. Satisfeito, o alcalde puxo en valor o bo saber do equipo que está a levar a cabo estes traballos e agarda poder abrir este espazo tan pronto o concello o recepcione. “Cando estamos xa case chegando os 21.500 habitantes, que é case histórico, cando estamos crecendo como nunca, temos que por a disposición da cidadanía todos os servizos, porque O Porriño é o mellor lugar para vivir, diso estou convencido eu, e as persoas que siguen elixindo este lugar para vivir e empadroarse, por iso non queremos que teñan que sair de aquí nin se quera para ir ao cine”.

Un fito histórico: de 1916 ao século XXI

A relación do Porriño coa gran pantalla vén de lonxe; o municipio contou coas súas primeiras proxeccións de cine en 1916. Porén, tras o peche das salas na década dos 90, a veciñanza viuse obrigada a desprazarse a outras localidades para gozar das estreas. Este novo proxecto non só recupera unha tradición centenaria, senón que o fai con tecnoloxía de vangarda. “O Porriño é o mellor lugar para vivir, diso estou convencido eu, e as persoas que siguen elixindo este lugar para vivir e empadroarse, por iso non queremos que teñan que sair de aquí nin se quera para ir ao cine”.

O alcalde xa estuda de feito cales poden ser as primeira proxeccións. “Estarán as de hollywood – asegura-, estarán as estrellas, pero coa gran canteira que temos en Galicia, non poden faltar tampouco os títulos de aquí, O Corno, por exemplo, temos que poder ver no Porriño a Janeth Novás en pantalla grande”. Así, asegurou que quere poñer en valor a cultura de aquí onde hai canteira, e unha mostra é tamén o Festival de Cans.

Un proxecto de alta tecnoloxía

A reforma conta cun orzamento de 251.739,60 euros (financiado polo Plan +Provincia da Deputación de Pontevedra) e transformará por completo a planta baixa do Centro Cultural.

O proxecto inclúe a redistribución dos espazos, eliminando o escenario elevado e os camerinos traseiros; a mellora acústica e estética das paredes mediante trasdosado con illamento e acabado en madeira; a renovación das butacas para adaptar a sala a diferentes usos, desde proxeccións cinematográficas ata conferencias e charlas; e novas instalacións de iluminación e son, aproveitando a climatización existente.

Permitirá que a sala se converta nun espazo multifuncional, apto para proxeccións, conferencias e actividades culturais, dinamizando o centro cultural e o tecido económico e social do Porriño.

O equipamento audiovisual supuxo un investimento de preto de 100.000 euros subvencionado pola AGADIC da Xunta de Galicia. Esta nova sala disporá dun sistema de proxección en 4K Ultra Alta Definición, pantalla profesional de 5×3 metros con sistema de tiro directo, servidor con capacidade de 16TB e un avanzado sistema de son envolvente, que permitirá exhibir estreas de cine e ofrecer unha experiencia cinematográfica de primeiro nivel.

A duración estimada das obras é de seis meses,aínda que avanzan a bo ritmo, según explicou a dirección da obra durante a visita.

“Este pobo está cheo de vida e de cultura, e este espazo permitirá sobretodo a mocidade seguir encontrando os seus espazos” ”, conclúe Alejandro Lorenzo.

31/03/2026 in Cultura e festas, Patrimonio Municipal, Vías e obras

BASES III CONCURSO DE PINTURA RÁPIDA: PINTANDO A PALACIOS

27 de marzo de 2026, O Porriño.- O Concello do Porriño publica as bases do III Concurso de Pintura Rápida: “Pintando a Palacios”, unha cita xa consolidada que convida á veciñanza e a artistas de todas as idades a capturar a esencia do noso municipio a través da arte.

O certame celebrarase o vindeiro 13 de xuño de 2026 e desenvolverase ao aire libre, tendo como temática o centro urbano do Porriño. A iniciativa busca fomentar a creatividade, dinamizar a vida cultural local e poñer en valor o noso patrimonio e espazo público.

As persoas interesadas xa poden consultar toda a información relativa á participación, inscricións, categorías e premios nas bases que se achegan a continuación.

Animamos a toda a cidadanía a participar e a gozar dunha xornada de arte e convivencia nas rúas do Porriño.

Bases III Concurso de Pintura Rápida_Pintando a Palacios

27/03/2026 in Cultura e festas

O Porriño encara a recta final para contar por fin cun auditorio moderno e versátil

A obra do futuro auditorio municipal avanza a bo ritmo e permitirá dotar ao Porriño dun espazo escénico de referencia, adaptado ás necesidades actuais da programación cultural e do tecido asociativo local.

Porriño 18 de marzo de 2026.– A obra do futuro auditorio municipal do Porriño foi hoxe escenario da súa primeira visita institucional, na que participaron o alcalde, Alejandro Lorenzo, xunto con representantes do tecido asociativo local vinculado ao ámbito cultural e diversas academias de música e baile.

O novo auditorio permitirá dotar ao municipio dun espazo moderno, versátil e adaptado ás necesidades actuais. O proxecto contempla unha capacidade de máis de 350 butacas, así como escenario, camerinos e instalacións técnicas axeitadas para acoller múltiples actividades culturais ao longo do ano .

A actuación supón un investimento de preto de 2,8 millóns de euros, cun prazo de execución estimado de vinte meses .

Durante a visita, o alcalde puxo en valor a importancia deste proxecto, cualificándoo como un fito histórico para o Porriño, ao tratarse do primeiro auditorio destas características no municipio e unha resposta a unha demanda histórica da veciñanza.

“Hoxe é un día especialmente significativo para este Concello. Visitamos por primeira vez un auditorio que, ata o de agora, nunca existira no noso municipio”.

O rexedor tamén destacou o impacto que terá esta infraestrutura na vida cultural local, ao ofrecer un espazo estable para o desenvolvemento de actividades e iniciativas impulsadas polo tecido asociativo.

“Nun prazo breve, en menos dun ano, este auditorio estará a disposición de todos os veciños e veciñas, así como das asociacións e colectivos que atoparán aquí un espazo de encontro, cultura e convivencia”.

Lorenzo quixo ademais recoñecer o traballo técnico e profesional que está a facer posible a execución da obra, subliñando a coordinación entre os equipos implicados para garantir o seu correcto desenvolvemento.

O proxecto, segundo explicou, foi resultado dun proceso de análise no que se valoraron diferentes alternativas, tendo en conta condicionantes técnicos, urbanísticos e económicos, ata acadar unha solución que permitirá contar cunha infraestrutura moderna e plenamente integrada no entorno urbano.

O novo auditorio está chamado a converterse nun punto de encontro para asociacións, colectivos e cidadanía en xeral, favorecendo a dinamización cultural do municipio. Neste sentido, desde o Concello destacouse a importancia da implicación do tecido asociativo, que participou nesta primeira visita para coñecer de preto o avance das obras.

Ademais, sinalouse que a evolución dos traballos será especialmente visible nos próximos meses, cun avance significativo que permitirá comezar a visualizar a configuración definitiva do espazo.

Con esta actuación, o Concello do Porriño reafirma a súa aposta pola cultura como eixo fundamental de desenvolvemento, impulsando unha infraestrutura que contribuirá a mellorar a calidade de vida da veciñanza e a fortalecer a identidade cultural do municipio.

18/03/2026 in Cultura e festas, Infraestruturas, Patrimonio Municipal, Vías e obras

O Porriño acolle a presentación da biografía do empresario José Fernández López

A obra, galardoada co XXI Premio LID de Biografía Empresarial, reconstrúe a traxectoria dun empresario discreto pero decisivo, cuxa pegada segue presente décadas despois.

Porriño 13 de marzo de 2026.- A sala de Comunicacións do Concello do Porriño acolleu este venres a presentación do libro “José Fernández López. Un empresario sin miedo al riesgo”, da xornalista Marisa Gallero, unha biografía que recupera a traxectoria dun dos empresarios galegos máis influentes do século XX.

No acto participaron a propia autora; José María Fernández Sousa-Faro, fillo do biografiado; e o xornalista Bieito Rubido, director de El Debate. Ao encontro asistiron tamén representantes de empresas vinculadas á traxectoria empresarial de Fernández López, así como veciños e persoas interesadas na historia económica e empresarial de Galicia.

A obra percorre a vida dun empresario que destacou pola súa capacidade emprendedora e pola súa aposta pola innovación e polo desenvolvemento industrial. Fernández López estivo detrás de iniciativas que marcaron a evolución da industria española, participando na creación e impulso de compañías como Zeltia, Transfesa ou Pescanova, entre outras.

A obra, galardoada co XXI Premio LID de Biografía Empresarial, reconstrúe a traxectoria dun empresario discreto pero decisivo, cuxa pegada segue presente décadas despois.

Durante o acto, Bieito Rubido mantivo unha conversa coa autora na que repasaron os principais episodios da vida e da carreira empresarial de Fernández López, así como o contexto histórico no que desenvolveu os seus proxectos.

A clausura correu a cargo do alcalde do Porriño, Alejandro Lorenzo, quen destacou o papel do empresario no desenvolvemento industrial de Galicia e a súa ligazón coa vila.

“José Fernández López foi un exemplo de visión empresarial e de capacidade para asumir riscos. A súa traxectoria demostra que desde Galicia tamén se poden impulsar proxectos que transforman a economía”, sinalou.

O rexedor puxo en valor a importancia de lembrar figuras que contribuíron ao progreso económico e social e destacou que obras como esta permiten achegar ao público a historia de empresarios que deixaron unha fonda pegada no desenvolvemento industrial da nosa comunidade.

13/03/2026 in Alcaldía, Cultura e festas, Industria, Patrimonio Municipal

O Baile de Maiores chega á programación municipal do Porriño para promover o envellecemento activo

Actividade con entrada de balde pensada para promover o envellecemento activo, favorecer a socialización e impulsar hábitos de vida saudables a través da música e do movemento
As sesións celebraranse os domingos e festivos, en horario de 17:00 a 20:30 horas, desde o 8 de marzo ata o 28 de xuño

Porriño 5 de marzo de 2026.– O Concello do Porriño pon en marcha unha nova proposta dirixida ás persoas maiores do municipio coa creación do “Baile de Maiores”, unha actividade con entrada de balde pensada para promover o envellecemento activo, favorecer a socialización e impulsar hábitos de vida saudables a través da música e do movemento.

A iniciativa desenvolverase nas instalacións de Studio 57 (Rúa Muiños, 13 baixo) e combinará formación e práctica social de baile. As sesións celebraranse os domingos e festivos, en horario de 17:00 a 20:30 horas, desde o 8 de marzo ata o 28 de xuño.

Cada xornada dividirase en dúas partes: unha primeira sesión de clase de baile de entre 45 e 60 minutos, na que as persoas participantes poderán iniciarse ou perfeccionar os seus coñecementos, e unha segunda parte de baile social con animación musical a cargo dun DJ, que se prolongará durante aproximadamente dúas horas e permitirá poñer en práctica o aprendido nun ambiente lúdico e participativo.

O alcalde do Porriño, Alejandro Lorenzo, destacou a importancia de impulsar iniciativas que melloren a calidade de vida das persoas maiores: “Queremos ofrecer espazos de encontro, diversión e actividade física para os nosos maiores. O baile é unha ferramenta perfecta para manterse activo, facer novas amizades e gozar do tempo de lecer. Con iniciativas como esta seguimos traballando para que O Porriño sexa un concello que coida e valora ás persoas maiores.”

Lorenzo tamén sinalou que este tipo de propostas contribúen a reforzar a convivencia e o benestar social:

“O Baile de Maiores non é só unha actividade de ocio, senón tamén unha oportunidade para crear comunidade e combater a soidade non desexada. Queremos que os nosos maiores teñan cada vez máis alternativas para participar, divertirse e sentirse parte activa da vida do municipio.”

A actividade conta con entrada de balde e está aberta a todas as persoas maiores interesadas en aprender a bailar ou simplemente en compartir unha tarde diferente nun ambiente dinámico e agradable.

Con esta iniciativa, o Concello do Porriño reafirma o seu compromiso coa promoción de políticas de benestar, participación e envellecemento activo, apostando por actividades que fomenten a saúde física, emocional e social da veciñanza.

05/03/2026 in Benestar, Cultura e festas, Política Social

O Entroido do Porriño volve esta fin de semana con máis de 2.000 participantes

O alcalde do Porriño, Alejandro Lorenzo, anima a todas as veciñas e veciños a participar activamente en ambos eventos e subliña que, malia o cambio de datas, “serán celebracións espectaculares”.

Porriño 27 de febreiro de 2026.- O Porriño recupera esta fin de semana a celebración do Entroido tras o aprazamento das actividades programadas para o martes e mércores de Entroido debido ás condicións meteorolóxicas. A programación trasladarase finalmente ao sábado 28 de febreiro e ao domingo 1 de marzo, mantendo intacta a ilusión e o espírito festivo que caracteriza esta cita.

Máis de 2.000 participantes daranse cita nun completo programa que encherá as rúas da vila de cor, música e tradición. O sábado terá lugar o gran desfile de comparsas, acompañado por animación de rúa, charangas e batucadas, nun percorrido que culminará cunha actuación musical na Praza Arquitecto Antonio Palacios. Tódolos actos comezan as 17:00 horas.

O domingo celebrarase o tradicional Enterro da Sardiña, unha das festas máis representativas do Entroido porriñés, que tamén se inicia as 17:00 horas. A xornada inclúe o velorio no Círculo Recreativo Cultural, o acompañamento da sardiña polas rúas da vila, a lectura do testamento e o posterior traslado ao río Louro, mantendo viva unha das tradicións máis queridas pola veciñanza. Este ano terá lugar ademais a proxección de fotos de Cuquin (que durante anos foi o Rei do entroido de Porriño) e micro aberto para a lectura do testamento da sardiña, as 19:00 horas na praza Arquitecto Antonio Palacios. Despois dos actos de enterro terá lugar a actuación da charanga Louband.

O alcalde do Porriño, Alejandro Lorenzo, anima a todas as veciñas e veciños a participar activamente en ambos eventos “como sempre se fixo”, e subliña que, malia o cambio de datas, “serán celebracións espectaculares, como sempre o son no Porriño”.

O rexedor quixo tamén agradecer o “enorme traballo das comparsas, que levan semanas preparando a súa participación con esforzo e entusiasmo”, así como á veciñanza en xeral, “que vive cada Entroido como se fose único, facendo posible entre todas e todos este Porriño no que mantemos as tradicións e, ao mesmo tempo, innovamos; onde tradición e modernidade se mesturan, como non podía ser doutro xeito nunha cidade aberta ao mundo como a nosa”.

Desde o Concello destácase o compromiso por preservar e potenciar unha celebración que forma parte da identidade cultural da vila, e anímase á cidadanía e visitantes a gozar dunha fin de semana marcada pola participación, a creatividade e a alegría propias do Entroido.

27/02/2026 in Cultura e festas

O Porriño únese aos grandes eventos do Prexacobeo co nacemento do “Petra Rosa Festival”

“Estamos ante un festival que será un fito para O Porriño e tamén para Galicia”, asegura o alcalde, Alejandro Lorenzo.

Porriño, 25 de febreiro de 2026.– O Concello do Porriño acolleu hoxe a presentación de “Petra Rosa Festival”, un novo evento do ano prexacobeo que busca consolidar o municipio como un dos grandes epicentros musicais de Galicia. O festival converterá as canteiras da vila nun escenario natural único durante catro días consecutivos, do 25 ao 28 de xuño.

O cartel reunirá algúns dos nomes máis destacados da música estatal, encabezados pola festa internacional Bresh, que abrirá a programación o 25 de xuño, e completado por artistas de referencia como Pablo López (26 de xuño), Antonio Orozco (27 de xuño) e Sergio Dalma (28 de xuño). Xunto a eles, o festival contará tamén con artistas locais, unha aposta que o alcalde, Alejandro Lorenzo, destacou como “fundamental para impulsar o talento emerxente que temos no noso pobo”.

Os grandes reclamos da programación —Bresh, Pablo López, Antonio Orozco e Sergio Dalma— configuran unha das propostas máis potentes deste verán en Galicia, combinando figuras de enorme proxección con artistas da comarca da Louriña.

O espazo elixido, unha canteira de O Porriño, constitúe un dos elementos máis diferenciadores da proposta, ao integraren o símbolo máis recoñecido da localidade: o granito rosa. Neste sentido, o alcalde destacou que “somos un pobo cuxa referencia é a pedra e a industria, e un evento como este axudará a promocionar a nosa identidade”.

Lorenzo agradeceu a aposta dos organizadores e o apoio da Xunta de Galicia e da Deputación de Pontevedra para facer realidade esta primeira edición. “Estamos ante un festival que será un fito para O Porriño e tamén para Galicia”, engadiu.

Durante a presentación, o director de Turismo de Galicia, Xosé Merelles, subliñou que o festival “nace nun momento estratéxico, nun contexto no que os eventos musicais se consolidan como ferramentas clave para a dinamización económica e turística”. Ademais, destacou que “é a primeira vez que un escenario natural destas características acolle un festival no marco dos Concertos do Xacobeo”.

Pola súa parte, o promotor José Antonio Torrano explicou que o obxectivo é ofrecer “unha experiencia completa, reforzando os concertos cunha ampla oferta gastronómica e con festas pre e post concerto con artistas locais”.

Entradas

A cita apunta xa ao éxito incluso antes do seu inicio: só o concerto de Antonio Orozco leva vendidas preto de 1.000 entradas desde o anuncio da súa participación.

As entradas para o resto da programación poranse á venda este venres ás 14:00 horas a través da web oficial: www.petrarosafestival.com

As persoas empadroadas no Porriño poderán acceder a un desconto do 20% durante os dez primeiros días de venda.

O festival está organizado polas promotoras Emotional Events e Elemental Events, coa colaboración do Concello do Porriño e o apoio da Xunta de Galicia e da Deputación de Pontevedra.

26/02/2026 in Alcaldía, Cultura e festas

Do libro á escena: o Porriño impulsa un obradoiro onde as historias cobran vida

O obradoiro está aberto a toda a poboación a partir de 16 anos e celebrarase os xoves de marzo a maio
As persoas interesadas poden formalizar a súa inscrición na Biblioteca Municipal, tendo preferencia aquelas censadas no Concello do Porriño

O Porriño, 17 de febreiro de 2026.- O Concello do Porriño, a través da Biblioteca Municipal, pon en marcha o obradoiro “Libros que latexan”, unha proposta de expresión e creación que convida á veciñanza a transformar a lectura nunha experiencia viva a través das artes escénicas, especialmente o teatro e a narración oral.

A actividade desenvolverase no Centro Cultural Municipal do Porriño, concretamente na Biblioteca, consolidando este espazo como auténtica “casa dos libros”: un lugar de encontro, relación, aprendizaxe permanente e intercambio creativo que contribúe ao desenvolvemento persoal e colectivo.

O obradoiro, que constará de oito sesións, celebrarase os xoves de 18.00 a 19.30 horas nas seguintes datas: 5, 12 e 26 de marzo; 9, 16, 23 e 30 de abril; e 7 de maio de 2026. A última sesión incluirá unha mostra final aberta ao público co material traballado ao longo do proceso.

O alcalde do Porriño, Alejandro Lorenzo, destacou a importancia desta iniciativa cultural, que promove a participación e reforza o papel da biblioteca como motor social: “Queremos que a nosa Biblioteca sexa moito máis que un lugar de préstamo de libros; queremos que sexa un espazo vivo, onde a cultura se comparta, se experimente e se cree en comunidade. ‘Libros que latexan’ representa perfectamente esa filosofía: ler, sentir e transformar as historias en experiencia compartida”.

A formación será impartida por Ana Abad de Larriva, coordinadora e dinamizadora do club de lectura municipal. Ademais de ter experiencia desenvolvendo diferentes actividades de animación sociocultural e teatral, mediación e comunicación cultural; é escritora, actriz, cantautora, creadora e docente de artes escénicas, con formación superior en Arte Dramática e unha tese doutoral en Comunicación e Artes Escénicas. A súa experiencia garante un enfoque pedagóxico rigoroso, participativo e adaptado ás persoas asistentes.

O programa estrutúrase arredor de oito eixes temáticos —o latexo do espazo, das palabras, do corpo, da memoria e da voz, entre outros— que se interrelacionarán nun proceso lúdico e progresivo, combinando lectura sensorial, escritura creativa e expresión oral e corporal.

Ademais do seu valor cultural, a actividade contribúe aos Obxectivos de Desenvolvemento Sostible da Axenda 2030 impulsada pola ONU, especialmente aqueles vinculados coa saúde e o benestar, a educación de calidade, a igualdade de xénero e a redución das desigualdades.

O obradoiro está aberto a toda a poboación a partir de 16 anos, promovendo o diálogo interxeracional. As persoas interesadas poden formalizar a súa inscrición na Biblioteca Municipal, tendo preferencia aquelas censadas no Concello do Porriño.

Con esta iniciativa, o Concello reafirma o seu compromiso cunha cultura viva, participativa e transformadora, na que os libros non só se len, senón que tamén se escoitan, se senten e, sobre todo, latexan.

17/02/2026 in Cultura e festas, Educación e tecnoloxía