Alcaldía

VII Trofeo de Ciclocrós Avanza Concello do Porriño

O vindeiro sábado 12 de outubro, a pista de atletismo do Porriño converterase de novo no epicentro do ciclismo de montaña coa celebración do VII Trofeo Ciclocrós Avanza Concello do Porriño. A competición dará comezo ás 11:00 h e promete emoción asegurada para  participantes e espectadores.

Organizado pola AD Avanza en colaboración co Concello do Porriño, este trofeo é puntuable para a Copa Galicia 2025 de Ciclocrós, o que garante un alto nivel de competencia. Coa inscrición aberta ata o 10 de outubro ás 15:00 h, espérase superar os 200 participantes nesta edición, que contará cun total de 19 categorías, incluíndo infantís, cadetes, junior, Sub 23, elite e varias categorías de máster, tanto masculino como feminino.

As mangas disputaranse da seguinte maneira: ás 11:00 h Cadetes e Infantís masculino; ás 11:45 h as mulleres Élite e Sub 23, Junior, Cadete, Máster e Infantís; 12:45 h Elite, Sub 23 e Junior;  14:30 h: Máster 50/60 e Máster 30 e ás 15:30 h: Máster 30.

O alcalde do Porriño, Alejandro Lorenzo, expresou o seu entusiasmo, destacando a importancia de fomentar o deporte con eventos desta magnitude e agradecendo ao club organizador, AD Avanza, pola súa dedicación e esforzo na realización desta proba. “É unha honra para nós acoller este evento que non só promove o ciclismo, senón que tamén nos une ao redor dunha paixón compartida por moitos no Porriño, o ciclismo”, comentou o alcalde convidando a todo o mundo a participar de “unha xornada chea de compañeirismo, adrenalina e ciclismo de alto nivel”.

07/10/2024 in Alcaldía, Deportes

Comezan as obras de construción da nova senda peonil da Vaquería

O alcalde do Porriño, Alejandro Lorenzo, xunto coa delegada territorial da Xunta de Galicia en Vigo, Ana Ortiz, visitou este venres as obras de construción dunha nova senda peonil na parroquia de Budiño.

A través desta actuación, executada pola Consellería de Vivenda e Planificación de Infraestructuras cun orzamento de máis de 250.000 euros, habilitarase un itinerario peonil na estrada PO-510 para favorecer a seguridade da veciñanza nos seus desprazamentos a pé.

As intervencións, deseñadas polo departamento de Infraestruturas da Xunta no marco do Plan de sendas de Galicia, centraranse en reforzar a seguridade e a mobilidade dos peóns neste treito de estrada que ten unha densidade de tráfico moi elevada, alcanzando máis de 20.000 vehículos diarios.

En concreto, executarase unha senda, cunha lonxitude de 640 metros pola banda esquerda da estrada, de 1,80 metros de ancho con bordo e unha elevación con respecto á rasante da calzada de 10 centímetros, agás nos accesos ás vivendas ou fincas.

Nas beirarrúas, e onde así o indique a normativa de accesibilidade, colocarase pavimento táctil nos vaos peonís, para aumentar a seguridade con sinais que fomentan a inclusión. A actuación en execución tamén inclúe o acondicionamento da parada de autobuses e a substitución da marquesiña existente, para acadar maior comodidade dos usuarios do transporte público.

O alcalde explicou que hoxe tamén se publicou no DOG o acordo de aprobación definitiva do proxecto de trazado para executar outra senda na PO-407, no treito que vai ao colexio público Cruz Budiño. A intención é unir ambas sendas e facer un intinerario peonil que teña continuidade desde a Vaquería ata o barrio da Cruz, onde se atopa o colexio.

07/10/2024 in Alcaldía

O Porriño suma máis de 1000 expedientes ao seu arquivo dixital

O Concello do Porriño finaliza con éxito o traballo de dixitalización dos expedientes administrativos do Departamento de Urbanismo. Este importante proxecto, levado a cabo polo alumnado-traballador da especialidade de “Tecnoloxías da Información e Comunicación” do Obradoiro de Emprego “Porremprego Cualifica II”, permitiu dixitalizar un total de 1070 expedientes de diferentes departamentos municipais que abarcan desde o ano 2002 ata a implantación do sistema Xestiona na administración local.

Un equipo de 10 alumnos-traballadores dedicouse a este labor durante case 2000 horas, recibindo formación práctica e teórica que lles permitiu obter certificados de profesionalidade en “Gravación de Datos e Documentos I” e “Actividades Administrativas en Relación ao Cliente II”. Grazas á colaboración da Xunta de Galicia, que achegou 531.000 euros, xunto con 25.000 euros da achega municipal e 30.000 euros de fondos autonómicos para incentivos de contratación, púidose levar a cabo este programa dual de formación e emprego.

“Este gran traballo de obra realizado polo alumnado-traballador desta especialidade, permitiulles tamén adquirir unhas habilidades, competencias e coñecementos moi importantes que poden contribuír de cara ao futuro próximo a súa inserción laboral”, apuntou a concelleira de Emprego e Formación, Rosario Costas.

E é que o traballo realizado non só foi invaluable para o Concello, senón que tamén proporcionou aos alumnos os coñecementos necesarios para desempeñar funcións crave no ámbito administrativo, como o tratamento de textos, a recompilación de expedientes e a súa dixitalización. “Este avance na dixitalización facilitará enormemente a xestión municipal, facendo que os nosos servizos sexan máis accesibles e eficientes”, explicou o alcalde, Alejandro Lorenzo.

O rexedor reiterou o seu agradecemento a todos os participantes neste proxecto e reafirmou o seu compromiso “de seguir avanzando na dixitalización dos nosos arquivos, un paso fundamental cara a un futuro máis moderno e eficiente para os servizos que prestamos á cidadanía”.

07/10/2024 in Alcaldía, Emprego e formación

É Tempo de Outono no comercio local do Porriño

Desde o 1 ata o 21 de outubro o CCA Morea, en colaboración co Concello do Porriño, convida á veciñanza a participar da campaña “É tempo de Outono”. Esta é unha marabillosa oportunidade para apoiar aos nosos comerciantes e, ao mesmo tempo, levar moitos agasallos.

Por cada compra que se realice nos establecementos asociados a Acipor, recibirase un rasca que podería conter un fabuloso premio. Hai 5 tarxetas de agasallo Morea de 20 euros, 420 paraugas e 305 tote bags esperando a ser descubertos.

Os rascas premiados poderán trocarse ata o 23 de outubro nas tendas Lola, Serianper, Zafiro, Charol Shoes, Lencería Tere, Mapa Porriño, Rocío Lemos Peluquería e Conxelados Frandi, só presentando o rasca e unha copia do ticket da túa compra.

Esta campaña non só é unha forma divertida de incentivar as compras, senón que tamén resalta a importancia de contar cun tecido comercial activo e dinámico. “Apostar polo comercio local é fundamental para manter viva a vida social e económica do pobo. Cada compra conta e cada comerciante merece o noso apoio”, afirmou o alcalde, Alejandro Lorenzo, “Así que, saiamos a ver todo o que poden ofrecernos e a comprar! Xuntos, fagamos do Porriño un lugar aínda máis cheo de vida.”

07/10/2024 in Alcaldía, Urbanismo, comercio e industria

O Porriño aproba definitivamente o seu Orzamento que ascende a 21 M de euros

O pleno celebrado onte no Concello do Porriño deu luz verde definitiva á aprobación do orzamento municipal para o ano 2024. Un orzamento que se incrementa nun 9,68% respecto ao vixente alcanzando os 20.832.693,65 €.

As contas municipais foron aprobadas, co voto a favor do goberno municipal e o voto en contra dos grupos da oposición,  tras o periodo de información pública e a presentación de alegacións que foron debatidas e informadas polos técnicos municipais, concluíndo a súa desestimación por omitir o crédito necesario para as obrigas esixibles á administración local ou non cumprir cos requisitos legais de prazos u obxecto.  

O alcalde, Alejandro Lorenzo, incidiu en que este orzamento -o segundo aprobado polo executivo que preside-  basease na eficiencia da xestión dos recursos públicos. “Trátase dun documento realista, rigoroso e previsor pensado para buscar o desenvolvemento, mellora e promoción que O Porriño necesita para seguir crecendo en servizos, infraestruturas e calidade de vida”, indicou o rexedor engadindo que “xa estamos inmersos na elaboración dos orzamentos do 2025 para presentalos en tempo e forma”.

A maior partida do plan de gastos e ingresos é para servizos públicos

Tres son os piares básicos deste orzamento: reforzar os servizos municipais, o benestar social e o mantemento do centro urbano e parroquias. A estas areas destínanse o 38, 29 % dos recursos.

Así, máis de 3,1 millóns de euros resérvanse para a prestación dos servizos básicos como a iluminación pública, limpeza, cemiterios ou saneamento. Preto de 2,7 para urbanismo e vivenda e máis de 2,2 para servizos sociais e promoción social.

O orzamento non deixa de lado a aposta do executivo local polo deporte e a cultura, consignando ao redor de 2 millóns de euros a cada unha destas áreas. Un respaldo que se mostra tamén coas subvencións nominativas aos clubs deportivos, asociacións culturais e veciñais e entidades de carácter social.

Cabe destacar que se continúa coa aposta por minimizar a presión fiscal sobre a veciñanza mantendo os impostos e taxas e incluíndo bonificacións.

Desestimadas as alegacións do Concello de Vigo e PSOE do Porriño ao Orzamento Municipal

Nun feito sen precedentes, o Concello de Vigo presentou alegacións ao orzamento municipal do Porriño, reclamando o pago de 6 millóns de euros pola subministración de auga. Esta acción foi apoiada polo grupo municipal do PSOE, que se sumou á reclamación da administración viguesa.

O portavoz do goberno municipal, Carlos Martínez, aclarou que, a día de hoxe, “non existe ningún dereito recoñecido administrativamente nin resolución xudicial algunha que estableza que o Concello de Porriño debe a cantidade que o Concello de Vigo reclama de maneira unilateral”. Martínez subliñou que, aínda que Vigo menciona un pronunciamento do Tribunal Superior de Xustiza (TSX) de abril de 2024 que supostamente confirma esta débeda, esta afirmación é incorrecta. “Se realmente existise tal sentenza, o Concello de Vigo debería proceder a executala en lugar de ameazar cun novo recurso contencioso para cobrar”, explicou o edil.

Martínez tamén destacou que “hai varios procedementos xudiciais e administrativos en curso relacionados con esta cuestión”, e que “actualmente non hai ningunha resolución que indique que Porriño deba esa cantidade ao Concello de Vigo”. Ademais, salientou que Porriño “está aberto a negociar e resolver esta situación. Solicitáronse varias reunións co alcalde de Vigo, pero ata o de agora non se recibiu resposta. Así mesmo, o borrador dun convenio de colaboración enviado polo Consorcio en 2019 foi rexeitado”.

En base a todo isto e aos  informes concluíntes dos técnicos municipais, así como os de intervención e xurídicos, o goberno municipal desestimou as alegacións presentadas polo Concello de Vigo. 

Aprobación definitiva da modificación da  RPT

Na sesión plenaria aprobouse tamén con carácter definitivo a modificación da Relación de Postos de Traballo (RPT) do Concello do Porriño. Tendo en conta as actuais circunstancias da administración local creáronse varios postos de traballo.

Destaca a creación dunha nova nova unidade administrativa no departamento de Vías e Obras centrada na acometida do saneamento a `Unidade de instalacións e espazos municipais, saneamento e abastecemento´  estará dotada dun novo posto de oficial de primeira capataz e dous operarios. Ademais súmase un administrativo adscrito ao departamento de Deportes e un técnico de publicidade para administración xeral e secretaría.

Salientar tamén que, ante a demanda existente, amplíase a xornada completa o posto de Psicólogo adscrito ao CIM.  A relación de postos de traballo amortiza tamén dous postos de traballo vacantes, un técnico de Administración Xeral e un Oficial de Policía Local.

01/10/2024 in Alcaldía