Alcaldía

O Concello do Porriño considera prioritaria a mellora integral do CEIP Xosé Fernández López

O alcalde do Porriño, Alejandro Lorenzo, e a concelleira de Educación, Carolina González, visitaron o CEIP Xosé Fernández López acompañados polo director do centro, Benito Rodríguez , quen transmitiu aos representantes municipais as principais necesidades do colexio.

“A comunidade educativa insiste dende hai anos na necesidade de executar unha mellora integral das instalacións e é unha intervención prioritaria xa que falamos dun edificio que se construíu hai máis de 45 anos e precisa ser acondicionado”, explicou o rexedor, “Urxe dar solución aos problemas cos que se atopan os nenos e nenas que cada día acuden a este centro e así o transmitiremos á consellería de Educación”.

Cabe destacar que no CEIP porriñés acometéronse varias melloras respondendo ás demandas do centro, tando dende o Concello como dende a administración autonómica, a última delas a reparación da cuberta do patio. Tamén se instalou un ascensor, necesario para suprimir as barreiras arquitectónicas e garantizar a accesibilidade dos nenos e nenas, e cambiáronse as luminarias e as antigas fiestras de aluminio para aislar o centro.

“Realizáronse xa varias actuacións pero queda moito por facer. Precisa dunha intervención integral que permita que os nenos e nenas do casco urbano do Porriño acudan a clase en condicións”, concluíu o rexedor.

Unha das cuestións que se abordaron durante a visita foi a que é unha das grandes demandas da comunidade educativa do centro, a construcción dun comedor escolar. Neste sentido, os representantes municipais e o director valoraron varias opcións que permitan salvar os problemas de espacio que imposibilitan a posta en marcha deste servizo.

O rexedor reiterou o seu compromiso á dirección de trasmitir á Consellería de Educación a urxencia destas melloras, nun centro que conta con 400 alumnos e alumnas e un claustro de 35 profesores. 

 

 

01/02/2022 in Alcaldía, Educación e tecnoloxía

A Xunta destina 3M de euros á retirada e descontaminación de lindano no Contrasto

A Xunta de Galicia investirá 3 milóns de euros nos traballos de retirada e descontaminación dos residuos de lindano no viario principal do Contrasto, en Torneiros, unha obra que comezará este ano.  Así llo trasladou a conselleira de Medio Ambiente, Territorio e Vivenda, Ángeles Vázquez, ao alcalde Alejandro Lorenzo nunha reunión que mantiveron esta semana para abordar este e outros asuntos de interese para O Porriño.

A conselleira explicou ao rexedor que con cargo aos orzamentos da Xunta deste ano xa se está actualizando o proxecto para intervir na pista municipal do Contrasto polo que estima que, tan pronto como se complete este paso, poderá iniciarse a tramitación do contrato para executar as correspondentes obras.

“Sempre defendín que problema do lindano hai que abordalo con decisión, non chega con discursos baleiros nin promesas”, defendeu o rexedor, “Para iso é necesario un plan de acción, un esforzo investidor e un compromiso firme de respaldo e colaboración entre administracións, co que dende logo contamos”.

Lorenzo incidiu en que “neste proceso é esencial ir da man dos veciños e veciñas máis afectados” e valorar xunto a eles cada paso. “A descontaminación do municipio é unha responsabilidade que debemos asumir non só para coidar a saúde dos porriñeses e porriñesas de hoxe, senón para deixar un Porriño mellor para os de mañá”, concluíu o alcalde, “Pero as adminsitracións temos que informar e, sobre todo, escoitar á veciñanza durante este proceso. Trátase dun proxecto común de presente e de futuro”.

15/01/2022 in Alcaldía, Medio Ambiente

O Xeodestino Ría de Vigo e Baixo Miño levará a FITUR ás mulleres do Camiño Portugués

O Xeodestino Ría de Vigo e Baixo Miño continúa a dar pasos para dar a coñecer o seu potencial turístico. As alcaldesas e alcaldes dos 14 concellos que abrangue o Xeodestino (A Guarda, Baiona, Fornelos de Montes, Gondomar, Mos, Nigrán, O Porriño, O Rosal, Oia, Pazos de Borbén, Redondela, Soutomaior, Tomiño e Tui) celebraron unha reunión este mércores 12 no Pazo de Mos para facer balance do último ano e quentar motores para participar por terceiro ano consecutivo na Feira Internacional de Turismo de Madrid, FITUR, un dos principais encontros do sector turístico de Europa.

Nesta ocasión, o Xeodestino levará á cita ás ‘Mulleres no Camiño Portugués’, unha orixinal proposta na que varias protagonistas vinculadas profesionalmente ao mundo do turismo ofrecen unha narración coral contando a súa experiencia e a importancia que ten para os concellos do territorio o Camiño de Santiago. As propias protagonistas presentarán a iniciativa acompañadas da alcaldesa de Mos, Nidia Arévalo, o vindeiro xoves 20 de xaneiro ás 11.30 horas no stand oficial de Galicia no pavillón 9 de FITUR. Será o último evento da rexedora de Mos como representante institucional do Xeodestino, tras dous anos ao fronte tras a chegada da pandemia e a reactivación da actividade o pasado ano. Daralle o relevo como representante institucional o alcalde de Nigrán, Juan A. González.

Balance positivo

Durante o encontro, os rexedores e rexedoras fixeron un percorrido por todas as accións celebradas o pasado ano 2021, que o Xeodestino pechou cun balance moi positivo. Ademais da elaboración de material promocional, da continua visibilización do territorio a través da web e das redes sociais, tamén se ampliou o banco de imaxes, recollendo un alto número de imaxes que reflicten a experiencia de vivir e desfrutar dos concellos do xeodestino.

Pero se houbo algunha das accións que destacara máis foi a posta en contacto por primeira vez ás diferentes empresas turísticas e do sector primario do territorio no que participaron arredor de 40 entidades, xerando relacións e potenciais sinerxías entre elas. Tamén se levaron a cabo accións de promoción da enogastronomía, como a posta en marcha dunha food truck itinerante por diferentes puntos de Galicia para a degustación de produtos da terra: 5 días de xira con 8 receitas diferentes que remataron con máis de 1.000 tapas servidas.

Durante o encontro acordaron ademais a presentación da candidatura do Xeodestino á convocatoria do Plan de Sostibilidade Turística en Destino, un instrumento co que se busca dar pulo á transformación do territorio baseándose nun produto turístico sustentable.

13/01/2022 in Alcaldía, Turismo

A Xunta impulsa a creación de seis novas prazas públicas no centro de día de Aceesca

A conselleira de Política Social, Fabiola García, visitou esta mañá as instalacións da Asociación de Apoio a Persoas con Diversidade Intelectual (ACEESCA) acompañada polo alcalde, Alejandro Lorenzo e o Director Xeral de Maiores e Persoas con Discapacidade,  Fernándo González Abeijón.

Fabiola García anunciou durante a visita que a Xunta impulsou a creación de seis novas prazas públicas de atención no centro de día e con este incremento o total ascende a 36, que se suman a outras 37 prazas públicas no centro ocupacional. En total, o Goberno galego financia un total de 73 prazas nos centros de Aceesca no Porriño.

As persoas usuarias colaboran na xestión do punto limpo da localidade, coidan do seu invernadorio de plantas de temporada ou participan en labores de limpeza e xardinería. A conselleira destacou que Aceesca permite que as veciñas e vecinos do Porriño teñan a oportunidade de avanzar cara a plena inclusión.

Ademais do financiamento destas prazas, a Xunta colabora con esta asociación a través da orde de axudas con cargo ao 0,7% do IRPF para a mellora e adecuación das súas instalación. Na última convocatoria, esta entidade percibiu 52.000 euros. Deste xeito o Goberno galego destina anualmente a Aceesca 800.000 euros para facilitar a súa labor.

Pola súa banda, o rexedor Alejandro Lorenzo reiterou o seu total respaldo a Aceesca e o apoio total do Goberno Municipal á importante labor social que desenvolven. “Unha das prioridades na liñas de goberno que nos marcamos é o benestar social e neste eido o labor de Aceesca é indispensable”, salientou Lorenzo, que agradeceu tamén á titular de Política Social a súa disposición a seguir colaborando con Aceesca e co Concello para que se poida dar un apoio integral ás persoas con discapacidade e ás súas familias.

O alcalde explicou que, tal e como comprometera no día da súa investidura, xa se está xestionando un novo convenio con Aceesca que permita impulsar a súa actividade.

Novos proxectos

A directiva de Aceesca aproveitou a visita  para dar a coñecer os proxectos que teñen en marcha. Estes baséanse en dúas liñas principais: o emprego e o proxecto residencial que persigue, non só garantizar unha vida independente ás persoas con discapacidade intelectual, senón tamén promover a revitalización e recuperación da parroquia de Torneiros.

Tal e como explicou Dolores Muñíz, membro da Xunta directiva “temos unha aposta firme polo emprego, que se materializa no centro especial de emprego que se está construir no polígono industrial, centrado na formación dual e tamén pola vida independente das persoas con discapacidade”. “Temos as ideas e os proxectos pero precisamos a axuda das administracións para poder levalos a cabo”, concluíu Muñíz, “O centro residencial que proxectamos permitiría que as persoas con discapacidade intelectual puideran independizarse e vivir en comunidade cos apoios que precisan, e que, como calquera outra persoa, poidan chegar a onde queiran chegar”.

 

13/01/2022 in Alcaldía, Servizos sociais

Alejandro Lorenzo comprométese coa veciñanza de Budiño a acometer melloras na Forna

O alcalde do Porriño, Alejandro Lorenzo, continúa coa rolda de xuntanzas coas asociacións veciñais e culturais do municipio. A última delas, foi con representantes da Asociación Cultural “A Forna” de Budiño, á que asistiu acompañado polos concelleiros Bienvenido Estévez e José Carlos González.

 

As principais reclamacións da directiva da asociación pasan por unha mellora das instalacións e equipamentos do Centro Cultural de A Forna que presenta unha evidente falta de mantemento, co conseguinte perxuizo que iso supón para os usuarios e usuarias.

 

O Alcalde comprometeuse a executar con inmediatez as demandas máis urxentes, entre as que se atopan o arranxo ou substitución da cadeira salvaescaleiras, o problema de humidades que presentan varias salas do centro e material necesario para poder levar a cabo as actividades que se desenvolven no mesmo.

 

“O compromiso deste goberno e o meu persoal coas asociacións das parroquias e do centro é rotundo”, explicou Lorenzo, “Iso inclúe tamén a mellora dos espazos públicos dos que fan uso. O estado de abandono no que se atopan moitos deles, que impide que poidan desenvolver a súa actividade en condicións óptimas, require que marquemos prioridades e identifiquemos todas e cada unha das súas necesidades para poder dar resposta a todas elas”. 

 

O rexedor reiterou que se reunirá con todas e cada unha das asociacións e colectivos do Porriño. “Contamos cun amplo e rico tecido asociativo e imos escoitalas a todas e atender as súas demandas”, concluíu Lorenzo avanzando que, “Estamos traballando xa para pechar os convenios anuais e formalizalos nas próximas semanas a fin de que poidan programar e desenvolver a súa actividade e comezar os cursos que imparten”.

 

Pola súa banda, o edil de Cultura, Asociacións e Parroquias, Bienvenido Estévez manifestou a súa intención de “potenciar a actividade das asociacións e o importante labor que desenvolven coa veciñanza, promover a colaboración entre elas e co Concello para poner en valor e afianzar o asociacionismo porriñés” .

11/01/2022 in Alcaldía, Cultura e festas, Parroquias

O goberno de Alejandro Lorenzo decide prescindir de 5 coches do parque móbil municipal para aforrar gastos innecesarios

O goberno local que preside Alejandro Lorenzo anunciou hoxe que prescindirá de cinco vehículos -os de máis luxo e cilindrada- do parque municipal para aforrar “gastos innecesarios”. Son o tres SEAT Ateca, o Mini Cooper e o Renault Megane que foron adscritos á Alcaldía, concelleiros do goberno municipal e á Policía Local.

Os cinco vehículos supoñen o 20% do custo, é dicir, 56.572 € de euros de aforro, da operación de renting por un importe total de 627.602 euros que realizou en 2019 o anterior equipo de goberno para renovar o parque municipal.

O alcalde Alejandro Lorenzo insistiu que esta decisión que xa se atopa en tramitación, “inscríbese na nosa defensa do interese público que nos obriga a priorizar gastos, pagar facturas e licitar servizos básicos. Temos máis de 5 millóns de euros en facturas pendentes de pago, á espera do que conclúa a auditoría”.

O alcalde manifestou que “aínda que a situación económica fora boa, non se xustificaba a asignación dun vehículo para cada concelleiro. Coido que ningún concello de España o poida permitir. Tratábase dun luxo innecesario e inxustificable”, concluíu Lorenzo.

A maiores, o goberno municipal dispón dun informe xurídico solicitado á Deputación de Pontevedra que conclúe que a resolución deste contrato de renting sería viable “por cuestións de interese público”.

Máis vantaxes que inconvenientes

“Aínda que a devolución destes cinco vehículos podería supor unha penalización da orde de 3.300 euros por parte da adxudicataria do renting, as vantaxes son evidentes porque xeraremos a longo prazo un aforro moitísimo maior, da orde de algo máis de 53.000 euros”, explicou o primeiro tenente de alcalde Abel Estévez.

Segundo indicou, “unha vez revisada a quilometraxe e o uso do parque de vehículos de ‘renting’, detectamos un exceso manifesto de turismos, polo que é necesario devolver os coches de gama máis alta e de maior cilindrada”, engadiu Estévez, e adiantou que “este goberno seguirá revisando se é posible prescindir dalgún máis”.

 

10/01/2022 in Alcaldía

Unha patrulla da Policía Local vixiará os polígonos residenciais de Torneiros

O Goberno Local reforza a presenza policial atendendo a unha das principais demandas da parroquia

 

Unha patrulla da Policía Local do Porriño vixiará os polígonos residenciais de Torneiros. A concellería de Seguridade Cidadá, que dirixe Abel Estévez, decidiu intensificar a presenza policial naqueles puntos que poden resultar máis conflitivos ou de maior afluencia.

Atendendo á reclamación dos veciños da parroquia, os axentes patrullarán unha zona que aglutina un elevado número de poboación, varios centros escolares e o multicentro polo que, en horas de entrada e saída, presenta aglomeracións e require presenza policial.

“Trátase dunha medida que os veciños de Torneiros levaban anos reclamando”, explicou o alcalde Alejandro Lorenzo, “Para garantir a seguridade nos núcleos residenciais de Torneiros requírese unha patrulla centrada en cubrir esa zona en exclusiva”.

Pola súa banda o concelleiro, Abel Estévez, mostrou especial preocupación polos accesos aos centros educativos onde “a presenza policial é esencial para garantir a seguridade dos escolares ás horas de entrada e saída”.

08/01/2022 in Alcaldía, Seguridade

Alejandro Lorenzo convoca pleno municipal para o vindeiro mércores 12

O novo goberno municipal do Porriño afrontará o mércores día 12 o seu primeiro pleno corporativo, desde a investidura de Alejandro Lorenzo como rexedor, ocorrida o pasado 23 de decembro. Será sesión ordinaria, que comezará ás 18.00 horas e cunha orde do día composta por nove puntos.
O alcalde Alejandro Lorenzo informará do nomeamento dos tenentes de alcalde e dos membros da xunta de goberno local.
Adxuntamos documento en “pdf” coa orde do día

Decreto da convocatoria

07/01/2022 in Alcaldía

O goberno municipal iniciou por Torneiros unha ronda polas parroquias para desenvolver un plan de actuacións especiais

O alcalde Alejandro Lorenzo e o concelleiro, Bienvenido Estévez, responsable de Parroquias no goberno municipal reuníronse con integrantes da nova “Asociación de Veciños e Veciñas das parroquias e polígonos de Torneiros” para coñecer de primeira man as demandas máis urxentes da veciñanza.

Este encontro é o primeiro dunha ronda de visitas e reunións coas diferentes asociacións de veciños de todas as parroquias do concello que vai manter o goberno municipal nos vindeiros días.

Trátase de “coñecer de xeito directo a través de todas as asociacións veciñais ás demandas e necesidades de cada parroquia. Teñen que ser escoitadas e atendidas. É unha das miñas prioridades absolutas e por iso nos volcaremos en cada unha delas facendo un plan especial de actuacións de mellora”, segundo explicou o alcalde Alejandro Lorenzo.

No que atinxe ás demandas planteadas polos representantes da nova AAVV de Torneiros solicitaron a recuperación do Centro Cultural Alba; a rehabilitación de diversas infraestruturas da parroquia como parques, xardíns, rúas e beirarrúa e unha mellora do alumeado público. Tamén demandaron maior limpeza e mantemento da rede de pluviais e dos contedores de lixo. En materia de seguridade cidadá piden presenza policial as 24 horas do día pola elevada poboación da parroquia. En cuestión de tráfico, demandan mellorar a sinalización citando os casos da pista do parque Alba e a posibilidade de converter en zona amarela para aparcamento de autobuses escolares a marxe dereita da estrada PO-2401, dende as instalacións de “Aimen” ata o IES “Ribeira do Louro”.   

 

05/01/2022 in Alcaldía, Parroquias

O Porriño sumouse á campaña “Acende o Xacobeo”

 

A Casa do Concello do Porriño xa loce desde esta tarde, a frecha amarela e o logotipo do Xacobeo 2021-2022, como corresponde a un municipio referente do Camiño Portugués a Compostela.

O vicepresidente primeiro da Xunta, Alfonso Rueda xunto co alcalde porriñés, Alejandro Lorenzo participaron no acto de aceso da iluminación artística que se proxecta contra a fachada lateral do edificio obra do arquitecto Antonio Palacios. Ao acto tamén asistiron Marta Fernández-Tapias, delegada da Xunta en Vigo, e concelleiros do equipo de goberno municipal.

O vicepresidente da Xunta manifestou que “a Casa Consistorial do Porriño é un emblemático edificio de Antonio Palacios que merecía ser iluminado, xunto cos outros 50 edificios polos que pasa o Camiño igual que outros 50 en todo o mundo”. Rueda que ten entre as súas responsabilidades a carteira de Turismo, subliñou a importancia do Camiño Portugués “que aglutina case o 30% dos peregrinos que chegan a Santiago”. E lembrou que “neste Xacobeo, en tan só seis meses pasaron polo Porriño arredor de 40.000 peregrinos”.

Pola súa banda Alejandro Lorenzo salientou que “este é un dos primeiros actos que teño como alcalde deste Concello e para min é unha honra poder facelo. Hoxe para min é un día de inicios. Co acendido do Xacobeo non só iluminamos o Camiño de Santiago no Porriño, tamén o camiño que comezo ao fronte deste Concello e xunto con todos vós”

O rexedor municipal expresou que “O Porriño é un pobo con moito potencial e o Camiño de Santiago e un gran altofalante de todo o que podemos ofrecer.  Ao iluminar a fachada da nosa Casa Consistorial como enclave destacado do Camiño, iluminamos tamén O Porriño cara o resto do mundo”, rematou Alejandro Lorenzo.

 

04/01/2022 in Alcaldía, Cultura e festas, Turismo