Alcaldía

Aumenta, un ano máis, o número de peregrinos que durmiron no albergue do Porriño: 3.154 ata xullo, 464 máis que en 2016

Nos primeiros sete meses deste ano durmiron no albergue do Porriño  3.154 peregrinos, 464 máis que nos mesmos meses de 2016, o que sinala un incremento do 17,2% en relación cos 2.695 que estiveran ata xullo do ano pasado.

Xullo, con 833 persoas que pasaron a noite, abril, con 664, xuño, con 658 e maio, con 656, foron os mellores meses, ata hoxe, superando en todos os casos o número de peregrinos a Compostela que pasaran hai un ano.

Estes datos, a falla dos que  faltan ata finais de ano, adiantan que en 2017 superaranse os  5.214 camiñantes que pararon no Porriño en 2016 e que xa superaran  en 386 os de 2015, o que supuxo un incremento do 8% e un feito descoñecido ata entón: un aumento dous anos seguidos no número de persoas que durmiron na vila de camiño a Santiago.

Xa no ano 2015 houbo 1.435 persoas máis que usaran o albergue que no ano anterior, un 42% máis que en 2014, cando atoparan acomodo no albergue 3.393 camiñantes. Isto sinala que en apenas dous anos o uso do mesmo aumentou en 1.821 persoas, un 53,4% máis, unha porcentaxe que, de seguir a progresión actual, podería superar o 70% a finais deste 2017.

A maioría das persoas que chegan ao albergue son españois, fundamentalmente madrileños, andaluces, vascos e cataláns; en segundo lugar, os máis numerosos son os portugueses, seguidos dos alemáns, franceses, británicos e italianos, aínda que chegan nacionais de Xapón, Australia, Estados Unidos, Corea, China, Rusia ou Canadá.

Hai que lembrar que O Porriño ocupa un lugar sobranceiro no ‘Camiño Portugués’ xa que é o final da primeira etapa do itinerario que vai de Tui e Compostela. Por iso, a vila conta, segundo subliña o propio Goberno de Galicia, cun dos albergues máis modernos do país, no Parque do Rubio, con 52 prazas en total e “unha variada oferta de servizos para peregrinos”, entre eles “conexión a Internet, zonas verdes e calefacción, lavandería, comedor ou dereito a cociña”.

20/08/2017 in Alcaldía, Cultura e festas, Turismo

As Festas en honra de San Sebastián, os vindeiros días 25, 26 e 27 de agosto, venres, sábado e domingo

A Asociación de Veciños de San Benito e San Sebastián, coa colaboración do Concello do Porriño, organiza os días 25, venres, 26, sábado, e domingo 27 de agosto, as Festas en honra de San Sebastián.

O venres, día 25, Exposición de fotos do Porriño Antigo e, dende as 9 e media, proxección de fotos e Cine na rúa.

O sábado, 26, será o día da Gran Sardiñada-a un prezo de 2,50€ a ración, con pan e bebida- e da Festa da Espuma, a partires das 5 e media da tarde, todo amenizado polo grupo ‘Marena’.

O domingo, 27 de agosto, os actos relixiosos empezarán ao mediodía, seguirá a procesión ata a Capela do Santo, para rematar co reparto de rosca. O punto final chagará, ao son do grupo ‘Sabor’, coa tradicional Queima da Fachada e Fogos Artificiais, ás 11 e media da noite

19/08/2017 in Alcaldía, Cultura e festas, Turismo

A Corporación do Porriño convoca unha concentración ás 12 horas en contra do terrorismo e en apoio ás vítimas dos atentados de Barcelona e Cambrils

A Corporación Municipal do Porriño invita ás veciñas e veciños a participar este venres, día 18 de agosto, ás 12:00 h. nunha concentración, diante do Concello, na Praza do Arquitecto Antonio Palacios, para amosar o seu rexeitamento do terrorismo e dar o seu apoio ás vítimas dos atentados de Barcelona e Cambrils, as súas familias e a todo o pobo de Cataluña.

18/08/2017 in Alcaldía, Benestar, Igualdade

A concelleira de Benestar pecha os Campamentos de Verán do Porriño nos que participaron, dende o mes de xullo, 40 nenas e nenos cada semana

A concelleira de Benestar, Soledad Girón, pechou, coa entrega de diplomas ás cativas e cativos participantes, os Campamentos de Verán do Porriño, que o Concello organizara dende o pasado 3 de xullo, coa colaboración da Deputación de Pontevedra.

Como subliñou a concelleira, o obxectivo destes campamentos é o de “fomentar a conciliación familiar” durante os meses de lecer, impulsar a interacción e a integración entre todos os asistentes aos mesmos.

Nos campamentos, que duraron 6 semanas, e que foron totalmente de balde, participaron, cada semana, 40 nenas e nenos empadroados no Porriño e nados entre os anos 2005 e 2011.

Soledad Girón salienta que durante estas semanas, as rapazas e rapaces desenrolaron diferentes actividades que tiveron moito que ver co respecto á natureza, coa súa conservación e coidado, impulsando acción de reciclaxe.

Así mesmo, outro dos eixos destas semanas de convivencia foi unha “aposta afouta pola igualdade”: a mesma estivo presente en cada unha das propostas que se levaron adiante estes días nos diferentes escenarios polos que foron movéndose ás rapazas e rapaces participantes.

Nas vindeiras festas de Nadal, a Concellería de Benestar volverá a organizar estes campamentos, que durarán 15 días, requiriran aos cativos e cativas os mesmos requisitos que  nestas actividades de verán, e terán o mesmo obxectivo: facilitar a conciliación familiar.

16/08/2017 in Alcaldía, Benestar, Educación e tecnoloxía, Igualdade

Empeza a substitución das papeleiras no Porriño, colocaranse cinceiros e ‘pipi-cans’ e aplicarase, de xeito rigoroso, a Ordenanza de Convivencia Cidadá

A Concellería de Limpeza, que dirixe Orlando Márquez, ven de iniciar a colocación das novas papeleiras en distintas partes do casco urbano do Porriño no que é o inicio dun proceso que abranguera todas as parroquias e que seguirá nas vindeiras semanas.

As novas papeleiras, indica o concelleiro, que teñen unha capacidade de 60 litros, evitan que o interior poida ser remexido por animais, coma paxaros ou gatos, e permiten que a retirada das bolsas do lixo se faga de xeito doado e limpo, en canto as mesmas se enchan, un proceso que pode facer a calquera hora do día, de maneira que se evite que estean cheas ou que haxa cheiros.

Estes novos recipientes virán a substituír aos existentes que, na maioría dos casos, están xa moi deteriorados e xunto con eles esta prevista a colocación de cinceiros e os popularmente coñecidos coma ‘pipi-cans’, con bolsas e dispensadores que teñen coma obxectivo manter as rúas limpas, facilitando a recollida das defecacións dos cans.

Neste sentido, o concelleiro subliña que os axentes da Policía Local aplicarán, de xeito rigoroso a Ordenanza Municipal de Convivencia Cidadá, Limpeza e Recollida de Residuos, que establece: “as persoas que conduzan cans e outros animais polas vías públicas, deberán levalos amarrados, impedindo que os mesmos depositen as súas dexeccións en calquera lugar destinado ao tránsito de peóns. No caso de que as dexeccións queden depositadas nas beirarrúas, en calquera zona peonil o una calzada, a persoa que leve ao animal está obrigada a súa limpeza”.

Orlando Márquez lembra que o incumprimento da obriga de recoller os excrementos dos cans ten establecida unha multa de ata 750€.

13/08/2017 in Alcaldía, Limpeza, Tráfico, Turismo

Vías e Obras segur adiante cos traballos de conexión a Rede Municipal de Saneamento, agora no barrio de Albarín, en Atios, cun orzamento de 79.000€ con cargo ao Plan Concellos da Deputación

A Concellería de Vías e Obras está a levar a cabo os traballos de conexión á rede municipal do saneamento do núcleo de poboación de Albarín, na parroquia de Atios, de xeito que as vivendas deste barrio teñan resolta a mesma nun prazo máximo de 3 meses.

Como sinala o alcalde accidental, Manuel Carrera, as obras, orzamentadas en preto de 79.000€, con cargo ao Plan Concellos da Deputación de Pontevedra, “abranguen a reposición completa do pavimento de toda esta zona”.

Esta obra súmase a outras xa rematadas, ou en proceso, en varios lugares do Porriño, como a que está en marcha no barrio de A Pereira-Contrasto, na parroquia de Torneiros, nos que investirá 150.000€, tamén con cargo aos orzamentos correspondentes a O Porriño do ‘Plan Concellos’ da Deputación de Pontevedra,e que garantirán a conexión á rede de saneamento de 30 familias.

12/08/2017 in Alcaldía, Vías e obras

Vías e Obras inviste 150.000€ con cargo ao Plan Concellos da Deputación nos traballos de conexión ao saneamento de A Pereira-Contrasto, en Torneiros

A Concellería de Vías e Obras ven de acometer o inicio dos traballos de conexión á rede de saneamento do barrio de A Pereira-Contrasto, na parroquia de Torneiros, nos que investirá 150.000€, con cargo aos orzamentos correspondentes a O Porriño do ‘Plan Concellos’ da Deputación de Pontevedra.

Segundo indica o alcalde accidental, Manuel Carrera, as obras, que permitirá aos veciños deste lugar que as súas casas estean enlazadas abranguen en realidade tres colectores: o primeiro de 500 metros lineais, o segundo de 108 e o terceiro de 300 metros, cunha tubaxe de policloruro de vinilo (PVC) de 315 milímetros de diámetro.

Cada un destes colectores levará incluídos os seus pozos: o primeiro treito, 16 en total, o segundo, 4 e o terceiro, 8. Ademais, realizarase a reposición integral do pavimento e firme desta  parte da parroquia.

Este traballo, que levará varias semanas, forma parte do proxecto de extensión do saneamento municipal a todas e todos os veciños do Porriño, un compromiso que adquirira o Goberno municipal ao principio deste mandato, como lembra Manuel Carrera, e que levouse adiante os dous anos pasados e seguirá os dous seguintes con obras coma a actual.

O alcalde accidental lembra que, hai uns meses, se comprometerá a facer esta obra que “fora solicitada hai anos polos veciños” e que permitirá que unhas 30 vivendas estean xa unidas á rede municipal.

10/08/2017 in Alcaldía, Vías e obras