Alcaldía

Este domingo máis de 2.500 corredores tomarán a saída na 12ª Interrunning do Porriño

Máis de 2.500 corredores, dende cativas e cativos de 4 anos, ata atletas de elite tomarán a saída na 12ª edición da Interrunning do Porriño, que percorrerá as rúas do casco urbano dende as 10 da mañá deste domingo, día 18 de marzo.

Na presentación oficial da proba, Fredi Velasco, un dos seus organizadores, adiantou que a carreira romperá, de novo, co seu teito de participantes e confirmará que se trata dunha das citas máis importantes, tanto en Galicia coma no conxunto de España.

Por cuarto ano, a proba está homologada pola Federación Española de Atletismo, “o que supón que as marcas que se obteñan nela estarán rexistradas a nivel nacional e internacional”; nunha edición máis haberá un circuíto de 5 quilómetros, “aberto ao todo o público co fin de facilitar que queira poida achegarse a esta modalidade”-que este ano verá aumentado o número de corredores en máis dun 25%- e, tamén de novo, haberá unha representación de pícaros de menos de 4 anos, “200 en total”, que participarán nas modalidades de  ‘Pitufos’ e ‘Chupetes’.

Como xa é tradicional, a Interrunning colabora con SOS Porriño, hai que lembrar que o ano pasado lograra 4 toneladas de alimentos non perecedoiros e que neste 2018 pide aos participantes que leven  un quilo de produtos de alimentación, especialmente azucre, aceite, leite e cacao.

Coma novidade deste ano, a Interrunning  será transmitida en directo, por streaming –podes seguila premento aquí-e os locais do Porriño poñerán nas súas pantallas a carreira para que os seus clientes poidan seguir a mesma comodamente.

O concelleiro de Deportes, Manuel Carrera, salientou a importancia que ten a Interrunning e o feito de que o traballo que comezaron hai xa doce anos un grupo de xoves apaixonados polo exercicio físico, sexa hoxe “un exemplo para todos os que amamos  o deporte en todas as súas modalidades”.

A alcaldesa do Porriño, Eva García de la Torre, lembrou que probas como esta “poñen ao Porriño no mapa, tanto no de Galicia coma no nacional” e amosan, dunha banda, o dinamismo e forza do Porriño e,doutra, “que o deporte e os valores que transmiten son esenciais para a formación das persoas”.

Horarios

Os horarios de competición se abrirán ás 10 da mañá coa saída, dende Domingo Bueno dos “Chupetes” –nenas e nenos nados dende 2014-e cadetes –dos anos 2003 e 2004-, que percorrerán distintas distancias; os atletas das restantes categorías, dende xuvenil-nados  en 2001 e 2002-, júnior -1999 e 2000-, Promesa -1996, 1997 e 1998-, ademáis de sénior e veteráns -dende 35 anos- e superveteráns –máis de 46 anos- empezarán a súa proba, na mesma rúa Domingo Bueno, ao redor das 12 menos vinte.

Os dorsais pódense retirar en Intersport Porriño este sábado dende as 10 da mañá ás 8 da tarde, ou o mesmo domingo, día da carreira, de 9 a 11 da mañá, na saída.

17/03/2018 in Alcaldía, Deportes

A alcaldesa e o concelleiro de Industria transmiten aos membros da directiva da Comunidade de Montes de Atios que o Concello recorrerá a sentenza que declara comunais os terreos ocupados polas canteiras

O Concello recorrerá a sentenza do Xulgado de Primeira Instancia e Instrución número 3 do Porriño que declara comunais os terreos de monte en Atios ocupados polas canteiras e outras explotacións industriais.

Así transmitíronllo este mércores a alcaldesa, Eva García de la Torre, e o concelleiro de Urbanismo, Industria, Comercio e Medio Ambiente, Marcelino Coto, aos membros da xunta directiva da Comunidade de Montes de Atios, cos que mantiveron unha xuntanza no Concello.

García de la Torre subliñou nesta reunión que a súa obriga “legal” é a de “defender o patrimonio común de todas as porriñesas e porriñeses e é innegábel que o impacto económico das canteira nótase en todo O Porriño, en Chenlo, Cans, Mosende, Pontellas, Budiño, Torneiros, por suposto en Atios e no casco urbán da vila, e o meu compromiso e o do Goberno local  é o de salvagardar ese patrimonio”.

A este argumento a alcaldesa sumou un máis, o de “garantir a seguridade xurídica” considerando que noutro caso, o da Comunidade de Montes de Budiño, cos mesmos argumentos legais, as resolución xudiciais déronlle a razón ao Concello e, neste caso, “con todo o meu fondo respecto a esta sentenza, non hai un razoamento distinto que xustifique que o Concello actúe doutro xeito”.

Na mesma liña, García de la Torre engadiu que “non estou disposta, asemade, a tomar iniciativa algunha en contra dos informes dos técnicos e dos servizos xurídicos municipais: cometería prevaricación e non vou a incumprir as leis”.

Eva García de la Torre subliñou, por último, que neste caso “quen o seu dereito defende a ninguén ofende” e “non pode considerarse que tomando esta decisión o Concello agreda a ninguén…o recurso non vai contra ninguén”, e como outra proba delo o Goberno local  dará orde de que as rendas que percibe o Concello polo uso dos devanditos terreos sexan consignadas xudicialmente para non incorrer en costas e intereses mentres non haxa una resolución xudicial definitiva.

15/03/2018 in Alcaldía, Urbanismo, comercio e industria

O Concello pon autobuses ás veciñas e veciños do Porriño que quieran acudir en Vigo á manifestación en Defensa das Pensións

Ata este xoves, día 15, ás 12:00 h., as veciñas e veciñas que quieran desprazarse a Vigo para asistir á manifestación convocada o sábado dia 17, ao mediodía, en Defensa das Pensións Públicas, poden reservar praza de autobús.

O Concello falicitará o desprazamento a aquelas porriñesas e porriñeses que queiran secundar o chamamento feito  pola  Coordinadora pola Defensa do Sistema Público de Pensións e diferentes centrais sindicais, entidades e asociacións.

Lembramos que as persoas interesadas en participar na devandita manifestación, que deben ser veciñas do Porriño, poden anotarse no Concello ata este xoves, día 15, ás 12:00h.

14/03/2018 in Alcaldía

Este xoves, no Centro Cultural Municipal, organizada pola asociacción ‘Levada Libre’ e o Concello do Porriño, conferencia sobre os ‘Vigueses e Porriñeses nos campos de concentración nazis’

Organizadas pola asociación Levada Libre, coa colaboración do Concello do Porriño, este xoves, día 15 de marzo, ás 8 da tarde no Centro Cultural Municipal, rematan as xornadas da “Semana da Memoria Histórica do Baixo Miño, Condado e Louriña”.

As mesmas abrangueron actos, conferencias e coloquios en Tui, o pasado día 3, Salceda, o pasado xoves, 8, da man do historiados Xosé Álvarez,quen falou sobre la República e o seu sistema educativo, e a ‘reinaguración’ do monumento aos asasinados polo réxime de Franco na ‘Volta da Moura’.

O peche correrá a cargo de María Torres, quen falará dos ‘Vigueses e porriñeses mortos nos campos de concentración nazis’, deportados aos mesmos, situados en Europa e no Norte de África, logo de combater coma resistentes, espías, soldados na Francia libre ou no Exército Soviético.

14/03/2018 in Alcaldía, Cultura e festas

Finalmente, ‘Merca na rúa’ celebrarase o sábado 7 e domingo 8 de abril

A Concellería de Comercio, dirixida por Marcelino Coto, e a dirección da Asociación de Comerciantes e Industriais do Porriño (ACIPOR), presidida por Juana Pérez, veñen de anunciar que a XVIII edición de ‘Merca na rúa’, finalmente, se celebrará o sábado 7 e domingo 8 de abril.

Nun primeiro momento estaba previsto que esta feira de oportunidades fose os días 10 e 11 deste mes de marzo, pero a chegada da borrasca ‘Félix’ fixo que se aprazase, en principio, para o día 17 e, agora que se tomase a decisión de que o máis acaído era que se celebrase a principio de abril.

21 postos estarán abertos ao público na rúa peonil do Porriño, de 10 da mañá a 9 e media da  da noite, ininterrompidamente, o sábado, día 7, e de 11 da mañá a 8 e media da tarde, o domingo, 8, ofrecendo distintos artigos con descontos de ata un 60 e 70%.

Como en edicións anteriores, o Concello asume os custes de alumeado, limpeza, os inchábeis para os cativos e a vixianza de seguridade dos postos, para que os expositores non teñan que recoller e desmontar os mesmos pola noite, unha labor de garda na que desempeñará un papel esencial a Policía Local.

14/03/2018 in Alcaldía, Urbanismo, comercio e industria

O Porriño presenta oficialmente este mércores a 12ª edición da Interrunning

A alcaldesa do Porriño, Eva García de la Torre, o concelleiro de Deportes, Manuel Carrera, xunto con Fredy Velasco, Luis Martínez e David Ferreira, membros da organización da proba, presentan este mércores, día 14 de marzo, ás 13:30 h. no Salón de Plenos do Concello do Porriño, a 12ª edición da Interrunning, que este ano xuntará a 3.000 participantes.

A proba disputarase o vindeiro domingo, día 18, pola mañá, no casco urbano  do Porriño que fará de circuíto para os cativos e adultos e, por segundo ano, adáptase para menores e atletas populares que queiran empezar o seu camiño no atletismo correndo unha distancia de 5 quilómetros.

A proba absoluta, sobre un circuito de 10 quilómetros, homologado pola Real Federación Española de Atletismo, contará coa asistencia de atletas de elite que achegaranse ao Porriño para bater a marca da mesma e confirmar que este é o percorrido máis rápido de Galicia.

13/03/2018 in Alcaldía, Deportes

A alcaldesa cumpre co seu compromiso de manter unha xuntanza cos representantes da Comunidade de Montes de Atios e se reunira con eles este mércores

Tal e coma se comprometera logo de coñecer a sentenza do Xulgado de Primeira Instancia  número 3 do Porriño, en relación coa titularidade das canteiras de Atios, a alcaldesa, Eva García de la Torre, manterá unha xuntanza con representantes da Comunidade de Montes desta parroquia este mércores, día 14, ás 10 e media da mañá.

No seu día, García de la Torre sinalara que tiña a “obriga legal e moral e a responsabilidade de defender  os bens patrimoniais das veciñas e veciños do por Porriño”, e adiantara que, en base a este feito, o Concello recorrería a resolución xudicial, ao tempo que amosaba toda a súa consideración e respecto polas comunidades de montes e polos dereitos históricos que representan.

13/03/2018 in Alcaldía

@festivaldecans, que este ano terá a meirande achega municipal da súa historia, bate marcas de curtas inscritas

O Festival de Cans- que este ano terá a meirande achea municipal da súa historia– bate un ano máis a súa marca de curtas inscritas, pois recibiu na súa convocatoria para as seccións oficiais a concurso un total de 252 producións galegas, o que supón máis dun 7% de incremento con respecto á edición anterior, na que chegaran 235 traballos.

Cabe salientar que esta é a cifra de pezas audiovisuais que cumplen os requisitos necesarios para poder ser valoradas á hora de formar parte das categorías a concurso, xa que de ter en conta todo o material recibido, a cifra sería superior ás 300 obras. Divididas por categorías recibíronse un total de 68 curtametraxes de ficción, 43 de non ficción, 15 de animación e 105 videoclips. Ademais, recibíronse tamén 21 obras de diferentes fomatos, que nalgúns casos comporán as diversas seccións paralelas dos festival.

Estes datos constatan que estamos nun prolífico momento na creación audiovisual galega, e que edición tras edición, o festival pode acadar un paso adiante, tanto a nivel cuantitativo como cualitativo. A organización móstrase tamén gratamente sorprendida da boa acollida da súa nova categoría competitiva, Furacáns, na que se recibiron, tal e como se citou anteriormente, 43 obras de non ficción.

Con respecto ao apartado de curtametraxes de ficción, segue rexistrándose -ao igual que nos pasados anos- un gran volume de traballos de creadores e creadoras galegos que viven e desenvolven a súa actividade profesional fóra de Galicia. Así o constatan as produción recibidas dende lugares como Madrid, Barcelona, Sevilla, Bilbao, Portugal, Inglaterra, Estados Unidos, Italia ou Hungría. Obsérvase tamén como dato moi positivo a recepción do mesmo número de curtametraxes de animación que na pasada edición pese a ser unha modalidade que esixe un traballo moi complexo, o que garante a constitución desta categoría nesta edición do festival.

No tocante aos videoclips, esta foi a categoría que máis medrou con respecto ao 2017, ao recibirse foron 105 as pezas fronte ás 73 da pasada edición. As pezas recibidas nesta categoría, que abranguen estilos tan distintos coma o folk, o rock, o hip-hop, o funk, o pop ou a música electrónica, competirán na Noite Gía dos videoclips, que se celebrará na noite do xoves 24 de maio.

Dá comezo agora para a organización un exhaustivo e laborioso proceso de visionado e selección, que se prolongará durante varias semanas e a través do cal se elixirán as obras finalistas en cada categoría.

13/03/2018 in Alcaldía, Cultura e festas

O Concello porá autobuses ás veciñas e veciños do Porriño que queiran acudir o sábado, día 17, en Vigo, á manifestación en ‘Defensa das Pensións’

O Concello informa de que falicitará autobuses a aquelas veciñas e veciños do Porriño que queiran asistir á manifestción convocada o vindeiro sábado, día 17 de marzo en Vigo, en Defensa das Pensións Públicas, convocada pola  Coordinadora pola Defensa do Sistema Público de Pensións.

As persoas interesadas en participar na devandita manifestación, que deben ser veciñas do Porriño, poden anotarse no Concello ata o vindeiro xoves, día 15, ás 12:00h.

12/03/2018 in Alcaldía

Os novos orzamentos priorizan a solución dos problemas das veciñas e veciños, importantes accións nas parroquias, o fomento do emprego e o benestar social

Benestar social, fomento do emprego, actuacións nas parroquias e  humanizacións, son os eixes fundamentais do novo orzamento do Concello do Porriño, aprobado polo Pleno da Corporación logo de seis anos-dende 2012- nos que as contas municipais tiveron que ser prorrogadas, mesmo durante o mandato dun Goberno local que contaba con maioría absoluta.

En total, este ano investiranse na vila máis de 4,2 millóns de euros, que servirán, para levar o saneamento a Chenlo, Mosende, Pontellas, Cans, Atios ou Budiño e para a mellora do estado das vías públicas- máis de 1,5 millóns de euros; para a urbanización das rúas Coruña e Pontevedra, 370.000€; para a creación de emprego, un 600.000€ e para incrementar as accións no eido do Benestar e Servizos Sociais, en conxunto 1,3 millóns.

As contas reflicten, así mesmo, as inversións que se realizarán no barrio do Contrasto, en Torneiros, vía remanente de Tesourería, que superan os 350.000€ para conectar as casas á Rede Municipal de Abastecemento de Auga, tal e coma se comprometerá a alcaldesa cos veciños e se recolle no plan entregado o pasado mes de decembro á Xunta de Galicia.

Con cargo ao Plan Concellos da Deputación, se recolle a Humanización da Avenida de Galicia, cun proxecto que contempla melloras neste entorno para facilitar o seu aproveitamento e o gozo por parte dos veciños, un proxecto que achégase os 500.000€ e, tamén financiado pola Deputación, o investimento de 1 millón de euros na nova pista de atletismo.

Como subliña a alcaldesa, Eva García de la Torre, estas contas dan “resposta aos problemas do día a día que teñen as veciñas e veciños do Porriño” e son os “primeiros orzamentos consensuados coas forzas da Corporación”.

Neste sentido García de la Torre agradece a “EU SON a actitude de colaboración, aberta a aprobar as contas do Concello con propostas  que van a mellorar o funcionamento dos servizos municipais, como un Plan Integral de Actuación en Torneiros, dotado cun millón de euros, no que haberá unha intervención directa dos veciños, a creación dunha Oficina de Participación Cidadá e as súas aportacións para que haxa unha maior transparencia na xestión municipal”.

Do mesmo xeito, a alcaldesa preza a colaboración e o“traballo conxunto na mellora das condicións de vida das porriñesas e porriñeses con máis dificultades”, por parte da concelleira do grupo municipal de Non Adscritos e, aínda que non foi posible un entendemento total que permitise un voto a prol das novas contas, “maila a que o Goberno local fixo súas gran parte das súas proposicións” , a abstención do BNG, que fixo posible aprobar finalmente os orzamentos municipais.

Eva García de la Torre ve un cambio de talante no Partido Popular aínda que, ao seu entender “redactou unha carta aos Reis Magos, con propostas  non cribles, que non se axustan ás posibilidades reais de gasto o que suporía que tivésemos que desatender servizos básicos” o cal non permitiu incorporar as súas emendas e chegar, finalmente, a un entendemento.

11/03/2018 in Alcaldía