O Concello do Porriño e Tropa Verde celebran o ‘Día Mundial da Educación Ambiental’ en varios colexios

Os concelleiros de Limpeza, Orlando Márquez, e de Educación, Lourdes Moure, asistiron á celebración do ‘Día Mundial da Educación Ambiental’ da man de Tropa Verde . Esta organización e o Concello de O Porriño están deseñando xornadas de charlas nas escolas da vila nas que se subliña a importancia do coidado da natureza e dos seus recursos, “facendo fincapé en que é cousa e causa de todos”.

As charlas, sinala Orlando Márquez, tamén teñen coma  obxectivo a diminución de residuos e a necesidade de limitar o uso de embalaxes “porque o mellor residuo é o que non se produce”.

Xa son catro os centros que están a gozar destas xornadas: CEIP Plurilingüe Antonio Palacios, CEIP da Cruz-Budiño, CPR Plurilingüe Hermanos Quiroga Rodríguez e CPR Santo Tomás.

O propósito fundamental da Tropa Verde é a educación ambiental e o que pretende é lograr que tanto os individuos como as colectividades comprendan a natureza complexa do medio ambiente, coma resultante da interacción dos seus diferentes aspectos: físicos, biolóxicos, sociais, culturais ou económicos, e adquiran os coñecementos, os valores e as habilidades prácticas para participar responsable e eficazmente na prevención e solución dos problemas ambientais e na xestión da calidade do medio ambiente.

A Rondalla de Pontellas gaña o Corcurso de Rondallas da Área Metropolitana de Vigo

7.500 persoas, que encheron o aforo preparado para o acto, puideron ver este domingo no IFEVI como a rondalla de Pontellas se levaba o primeiro premio do Concurso de Rondallas da Área Metropolitana de Vigo.

A calidade das dez formacións participantes foi altísima e, ademais de composicións tradicionais, foron quen de atreverse con temas dos Beatles, unha música que non faría estraño que o propio capitán Sparrow estivese entre o público, a banda sonora de Piratas do Caribe’, ou a de ‘Star Wars’.

Finalmente foi a forza a que acompañou á rondalla porriñesa que conqueriu o maior número de votos do xurado, por diante de Santa Eulalia de Mos e a Rondalla de Vincios, que obtivo a terceira praza nunha xornada para non esquecer.

O Tribunal de Contas comunica á alcaldesa o arquivo da denuncia interposta polos concelleiros do Partido Popular por supostas irregularidades na xestión económica do Concello

O Tribunal de Contas vén de comunicar á alcaldesa do Porriño o arquivo da denuncia polas supostas  irregularidades na xestión económica financeira do Concello, remitida a este tribunal pola Fiscalía con data 24 de novembro de 2017, e que fora presentada polos concelleiros do Partido Popular na Corporación Porriñesa,  Manuel Alejandro Lorenzo, Carlos Manuel Martínez, María José Martínez, Iria Lorenzo, Ramón Porto, Ana María Martínez, José Carlos González e José Manuel Estévez.

A devandita denuncia fai referencia ás supostas irregularidades no expediente de recoñecemento extraxudicial de débeda por importe de 2.174.982,80€, incluíndo as facturas pagadas pola realización de rozados en camiños e estradas municipais e pola limpeza viaria, entre outros servizos prestados ao Concello, abranguendo aqueles feitos entre os anos 2013 e 2016, moitos deles contratados polo propio Partido Popular cando ocupaba o Goberno Municipal, e contra de cuxo pago votaron os seus concelleiros cando este expediente foi ao Pleno do Concello.

O Tribunal de Contas cando recibe a comunicación da denuncia, decide o nomeamento dun instrutor e antes de proceder ao mesmo pídelle á representación legal do Concello do Porriño que presente as súas alegacións.

As mesmas fainas, persoalmente, a propia alcaldesa, e á vista delas e da documentación aportada, o Tribunal considera que está plenamente xustificado o gasto e decide que non hai irregularidade algunha ao estar explicada perfectamente a falla de contratación destes servizos.

Finalmente, o Tribunal de Contas decide deixar sen efecto o nomeamento do instrutor e arquivar a denuncia, tal e como solicitara o Fiscal, no seu escrito de 16 de xaneiro de 2018 no que manifesta que examinadas as novas alegacións realizadas pola alcaldesa e a documentación entende “debidamente xustificadas a irregularidades sinaladas”.

Hai que lembrar que nas súas alegacións Eva García de la Torre– tal e coma fixo o pasado mércores, día 24 no Pleno extraordinario no que compareceu, a petición propia, para dar explicacións sobre hipotéticas ilegalidades na súa xestión, tamén denunciadas polos concelleiros do Grupo Municipal do Partido Popular- sinalaba que no caso da limpeza, coma na do rozado dos camiños, intentouse, en varias ocasións, a súa licitación.

A alcaldesa concluía no escrito presentado diante do Tribunal de Contas que esa era o motivo polo que “foron contratadas diferentes empresas” para que se fixeran cargo destes servizos, que “na zona rural son imprescindíbeis en canto á rozadura de camiños e beiravías, porque os mesmos fanse intransitábeis e coma medio para evitar os lumes”.

O posto da campaña ‘O que se enchufa, recíclase’ está aberto na Praza de Antonio Palacios e as persoas que se acheguen ao mesmo levarán un agasallo para casa

Coa finalidade de informar e concienciar ás veciñas e veciños do Porriño sobre a reciclaxe de residuos e aparellos electrónicos, dende o pasado martes, e durante os días 23, 24, 25, 26, 27 e 30, haberá un posto desta campaña ‘O que se enchufa, recíclase’ situado na Praza de Antonio Palacios, diante do Concello, no que se dará ás persoas que se acheguen unha breve explicación sobre qué son e onde se poden depositar estes aparellos unha vez deixen de funcionar.
O posto está aberto os días sinalados de 11 a 14 horas e de 16 a 19 h., e as veciñas e veciños que se acheguen ao mesmo poderán participar nun sinxelo xogo de ruleta grazas ao cal marcharán cun agasallo para casa.

‘Recoméndoche un libro’, impulsado por @festivaldecans, e que ten a Biblioteca Municipal do Porriño coma colaboradora, convocan o III Concurso ‘O Ollo de Vidro’

As entidades organizadoras do proxecto “Recoméndoche un libro”, entre as que figura o Festival de Cans e a Biblioteca Municipal do Porriño, coma colaboradora, convocan o III concurso “O Ollo de Vidro” para premiar os traballos audiovisuais máis valorados de entre os participantes nese proxecto.

Poderán participar no concurso, cuxas bases poden consultarse premendo aquí, todas aquelas persoas e colectivos que o desexen enviando un vídeo ao enderezo de correo electrónico: recomendocheunlibro@gmail.com.

Os traballos audiovisuais, que poderán tratar sobre calquera libro ou tema e non poderán superar os 3 minutos de duración, terán que estar en galego, e poden abranguer  críticas literarias, booktrailers, booktube ou calquera tipo de proxecto audiovisual dirixido á animación lectora.

A Fiscalía rexeita a denuncia do Grupo Municipal Popular contra a alcaldesa pola modificación orzamentaria de xuño de 2017

A Fiscalía da Área de Vigo ven de comunicar á  alcaldesa do Porriño, Eva García de la Torre, que “non iniciará actuacións de clase algunha” e solicita o arquivo da denuncia presentada polo Grupo Municipal do Partido Popular en data 23 de novembro de 2017, na que sinalaba coma constitutiva de delito “a tramitación polo plenario do Concello do expediente de modificación orzamentaria número 2 creto extraordinario e suplemento cto./2017 e recoñecemento de creto en favor de diversos acredores por importe de 2.114.426,13€”.

A Fiscalía esgrime, entre outros motivos para desestimar estas dilixencias de actuación penal, varios informes do interventor e do secretario municipal, que apuntan distintos erros na denuncia formulada polo Grupo Municipal do Partido Popular- entre eles que alude a feitos que non se refiren ao expediente tratado no Pleno de 16 de xuño de 2017, senón á modificación orzamentaria aprobada polo Pleno de 27 de xullo” por un importe de 2.174.982,80€-, ou que os gastos incluídos no expediente “corresponden a facturas expedidas nos anos 2014 a 1016, polo que resulta no posible a súa imputación directa ao orzamento de 2017”.

O ministerio público sinala, tamén que os devanditos informes advertían da posibilidade de interpoñer un recurso contencioso-administrativo antes do 20 de decembro de 2017 e que, sen embargo, “o 23 de novembro presentouse ante esta Fiscalía a denuncia que deu orixe ás presentes dilixencias de investigación penal” o cal, a xuízo da Fiscalía, ao non terse interposto ese recurso contencioso-administrativo e non haber pronunciamento do xulgado competente, “lévanos á conclusión de que non contamos con elementos de proba para poder instar a iniciación dun procedemento penal”, e “procede o arquivo das presentes dilixencias”.

A alcaldesa comparece este mércores nun Pleno Extraordinario do Concello

Tal e como anunciara, a alcaldesa do Porriño comparece este mércores,día 24 de xaneiro, a petición propia, nun Pleno no que dará resposta, polo miúdo, ás novas publicadas, nalgúns medios de comunicación, sobre  a suposta contratación irregular de servizos municipais.

Eva García de la Torre entende que “é diante das veciñas e veciños do Porriño e da súa Corporación Municipal onde teño que dar estas explicacións para tranquilizar ás porriñesas e porriñeses e deixar claro que non hai trama algunha para saltarse a lei”.

A Consellería de Medio Ambiente, coa financiación do Concello do Porriño, iniciou este martes no Contrasto as catas nos lugares”onde hai evidencias da presenza de refugallos de lindano soterrados”

A Consellería de Medio Ambiente, coa financiación do Concello do Porriño, que asume o pago dos 12.000€ do custo de realizar estas obras, vén de iniciar este martes, día 23 de xaneiro, a investigación polo miúdo dos tres camiños do Contrasto “onde hai evidencias da presenza de refugallos de lindano soterrados”, segundo informou ao Concello a subdirección xeral de Avaliación Ambiental.

O pasado venres, día 19, os técnicos da Xunta xa fixeron un recoñecemento do terreo e sinalaron os puntos nos que realizarán as gabias. Os traballos, como indicaron as técnicas da empresa APP Plus, contratada pola consellería, consistirán na apertura destes foxos na estrada, para confirmar a existencia do residuo, realizar medicións, tomar mostras e facer análises de cara a ter todos os datos precisos para elaborar o proxecto de recuperación do lugar.

Cunha pa escavadora fixéronse os primeiros cortes no asfalto, abrindo un foxo no cal as especialistas recolleron mostras de pedra e area antes de tapar o oco. Os foxos pecharanse cada día, sinala Medio Ambiente, deixando sempre un nivel de pedrullo limpo na superficie, antes do asfaltado completo final.

A previsión é a de facer entre 25 e 30 catas no prazo dunha semana, estudar se hai residuos de isómeros Alfa e Beta do lindano, tomar medidas de espesor e profunidade das escavacións e calcular a cantidade de refugallos que hai de cara á súa retirada.

Estes traballos, coma todos os que se fixeron durante os últimos meses no Contrasto, ata hoxe, coma o asfaltado a retirada de terra, o subministro de auga, os motores que permiten que a mesma chegue ás casas ou a limpeza, que superan en total os 152.000€ foron asumidos, na súa totalidade, polo Concello do Porriño, maila a que a competencia  nesta materia é exclusiva da Xunta de Galicia.

O Porriño, por medio da Concellería de Medio Ambiente, súmase á campaña ‘O que se enchufa recíclase’, impulsada pola Consellería de Medio Ambiente do Goberno de Galicia

Durante os días 23, 24, 25, 26, 27 e 30 deste mes de xaneiro, o Concello do Porriño, por medio da Concellería de Medio Ambiente, que dirixe Marcelino Coto, súmase á campaña “O que se enchufa recíclase” promovida pola  Consellería de Medio Ambiente da Xunta de Galicia.

Como sinala o concelleiro, “con esta campaña búscase a concienciación para a reciclaxe de residuos e aparellos electrónicos” , coñecidos como RAEE, a través dos puntos de venda dos mesmos e, ao mesmo tempo, informar dos dereitos e obrigas que que establece a lei tanto a consumidores coma a distribuidores deste tipo de aparellos.

Os aparellos eléctricos e electrónicos son produtos moi complexos, con moitos materiais e distintos tipos de pezas. Nos mesmos pode haber, metais, madeiras, plásticos, cartón ou cristal líquido, por exemplo: un teléfono móbil ten ata 40 tipos de materiais e terras raras que teñen un alto valor.

Por isto último, recuperar eses materiais é un novo xeito de ‘minería urbana’, respectuosa coa contorna, co medio ambiente e que favorece o aforro de recursos naturais.

Coa finalidade de informar ás veciñas e veciños do Porriño de todos estes temas, haberá un posto desta campaña situado na Praza de Antonio Palacios, diante do Concello, no que se dará ás persoas que se acheguen unha breve explicación sobre qué son e onde se poden depositar estes aparellos unha vez deixen de funcionar.

As veciñas e veciños que se acheguen a este posto poderán participar nun sinxelo xogo de ruleta grazas ao cal marcharán cun agasallo para casa.