Alcaldía

@festivaldecans, que este ano conta coa meirande achega do Concello na súa historia, reforza a súa programación infantil co ‘MiniCans’ máis completo

O Festival de Cans continúa nesta 15ª edición-na que a achega do Concello é a meirande da historia do certame– a súa aposta por atender a todos os públicos, e faino reforzando e ampliando MiniCans, a súa programación infantil.

O entorno do Parque do Río e espazos emblemáticos do festival como o Cuberto de Antonio, o Baixo de Carlos ou o Cuberto de Pato acollerán o venres 25 e o sábado 26 toda unha serie de actividades pensadas para que as gocen as familias e, en particular, as nenas e nenos de máis de 3 anos.

Dende as 5 da tarde do venres haberá obradoiros, música, proxeccións, maxia e ata unha degustación de Galletas Mariñeiras cortesía de Daveiga. A área do Parque, deseñada pola veciña de Cans e interiorista Isis Rodríguez, contará con postos de comida e parque infantil, todo elo pensado para facilitar o desfrute e participación da rapazada. Tanto o Parque como as salas permiten a total accesibilidade con carros de bebé, e o Festival poñerá autobuses adaptados dende o centro do Porriño ata Cans para facilitar o acceso á aldea. As entradas para as actividades de pago (O cinematomago, Therefilme e Unha vida de cine) están dispoñibles xa a un prezo de 3€ en tenda.festivaldecans.com, ata as 23:59 deste mércores.

14/05/2018 in Alcaldía, Cultura e festas

A Concellería de Vías e Obras remata a reforma integral da estrada no lugar da Lomba, no barrio de Vitureira, en Budiño, incorpora saneamento, tubaxes de pvc e aumenta o ancha da vía ata os 8 metros

A Concellería de Vías e Obras vén de rematar no lugar da Lomba, no barrio de Vitureira, na parroquia de Budiño, a reforma integral da estrada que pasa por esta zona, “cumprindo cunha vella demanda dos residentes nesta parte do Porriño”.

O tenente de alcalde, Manuel Carrera, subliña que este proxecto, financiado na súa totalidade con cargo ao ‘Plan Concellos 2017’ da Deputación de Pontevedra, foi posible “grazas a cesión voluntaria e de balde por parte de varios veciños de parte das súas fincas para poder ampliar a calzada”.

A mesma pasou dun ancho de 3,5 ou 4 metros, nalgún treito, a 7,5 e 8 metros, nunha actuación sobre 500 metros lineais, na que ademais do asfaltado, “que non se realizaba dende hai máis de 30 anos”, levouse a cabo a instalación dun novo colector de saneamento, que completa o existente, con 168 metros de tubaxes de pvc de 350 milímetros, con acometidas a vivendas con 290 metros de mangueiras de auga e recollidas de pluviais, amais da reconstrución dos muros de peche das fincas.

Manuel Carrera subliña o “compromiso deste  Goberno local e, particularmente o meu, coa mellora das comunicacións das parroquias e con proxectos que permitan facer chegar a todas elas a rede de saneamento e abastecemento municipal”.

O tenente de alcalde agradece “moi especialmente, a súa xenerosidade ás veciñas e veciños de Vitureira que cederon parte das súas fincas para que esta nova estrada ampliada e todas as melloras que abrangue sexa unha realidade”.

11/05/2018 in Alcaldía, Vías e obras

Alcadesas e alcaldes reiteran no Porriño o seu compromiso co futuro de Maderas Iglesias e, especialmente, co mantemento de 250 postos de traballo

As alcaldesas e alcaldes de Mos, Nidia Arévalo, As Neves,  Xosé Manuel Rodríguez, Salceda, Marcos Besada, Ponteareas, Xosé Represas, Mondariz, Xoán Carlos Montes, O Porriño, Eva García de la Torre, e  a tenente de alcalde de Salvaterra, Marta Valcarcel, mantiveron este venres unha xuntanza no Concello do Porriño, a petición do representante do Comité de Empresa de Maderas Iglesias, Vicente Molares, para ter información de primeira man, e polo miúdo, da situación actual da compañía e das xestións realizadas ata o momento para afrontar a difícil situación que atravesa a firma.

Os rexedores amosaron o seu interese por estreitar os contactos e saber o que acontece con Maderas Iglesias, que dende hai varios meses vive unha situación moi complicada, e manter as súa contribución para que se asegure a continuidade da empresa e, especialmente, os 250 postos de traballo.

11/05/2018 in Alcaldía

O Porriño celebra este domingo, día 13 de maio, a tradicional ‘Festa dos Cachos’

O Porriño celebra este domingo, día 13 de maio, a tradicional ‘Festa dos Cachos’ na que se agarda que centos de persoas dean conta de centos de pratos deste crustáceo, “digno de reis”, como sinalou a alcaldesa, Eva García de la Torre, durante a presentación.

Marcelino Coto, concelleiro de Comercio, acompañado por José Manuel Fortes, presidente da Asociación de Hostaleiros do Porriño, co-organizadora da festa, e Sindo Lago, vicepresidente da Asociación de Veciños de San Benito e San Sebastián, impulsora desta festa, lembrou que foi esta asociación veciñal a que recuperou hai tres anos esta celebración, que data de 1810, e que se celebra “no lugar mesmo na que a sitúa a tradición: no Cristo dos Cachos, un lugar emblemático do Porriño”.

O concelleiro sinalou que as pasadas edicións foron un “éxito” e que agardaba que neste 2018 seguise na mesma liña. Para facelo posible, engadiu, conta coa colaboración “total” do Concello que este ano, ademais da animación na rúa, coa actuación de charangas, tamén farase cargo da colocación dunha carpa de 150 metros cadrados, do sistema de son e do corte do tráfico, por medio da Policía Local. Ademais, haberá inchábeis, de balde, para que as cativos e cativas “poidan divertirse, tamén”.

O programa deste ano empezará ao mediodía coa ‘sesión vermú’ e a apertura da carpa para dar paso, dende a 1 da tarde ao servizo nos restaurantes participantes nesta edición: Val da Louriña, Maracaibo, Cólleo con Pinzas, O Carreteiro, La de Chato, Adega de Montero e Restaurante Manolo e O Xantar da Pepa.

José Manuel Fortes indicou que os prezos serán de 6€, para as persoas que acudan a degustar os cachos á carpa, e de 7€ para quen o fagan nos restaurantes participantes. O presidente dos hostaleiros subliñou que este ano a previsión é que a cantidade de persoas que se acheguen ao Porriño sexa maior que en 2017, ao cal contribuirá a previsión do tempo, xa que agárdanse ceos despexados, sol e boas temperaturas para o domingo.

10/05/2018 in Alcaldía, Cultura e festas, Turismo, Urbanismo, comercio e industria

Dende este xoves, día 10 de maio, está aberta a inscrición para os Campamentos de Verán do Concello que, un ano máis, estan co-financiados pola Deputación de Pontevedra

Dende este xoves, día 10 de maio, está aberto o prazo de inscrición para os Campamentos de Verán do Concello do Porriño, que baixo o nome de ‘Leo e as viaxes polo tempo’, ten coma obxectivo, tal e como sinala a concelleira de Benestar e Igualdade, Soledad Girón, “ofrecer unha alternativa de lecer e tempo libre ás nenas e nenos do Porriño durante o verán e, ao mesmo tempo, facilitar a conciliación da vida familiar e laboral ás porriñesas e porriñeses”.

Os campamentos, que están co-financiados pola Deputación de Pontevedra, abranguen do 2 de xullo ao 10 de agosto e están abertos a nenas e nenos de entre 5 e 12 anos de idade- nados entre 2006 e 2013-.

As quendas para os mesmos serán: 1ª.- do 2 ao 6 de xullo; 2ª.- do 9 ao 13 de xullo; 3ª.- do 16 ao 20 de xullo; 4ª.- do 23 ao 27 de xullo; 5ª.- do 30 de xullo ao 3 de agosto e 6ª.- do 6 ao 10 de agosto.

As inscricións poden facerse desde este mesmo xoves no Centro de Información á Muller (CIM), no 3º andar do Concello, de 9 da mañá a 2 da tarde. Para máis información as persoas interesadas poden chamar ao teléfono 986 337 429.

10/05/2018 in Alcaldía, Benestar, Igualdade

Corporación, colectivos, asociacións, clubs deportivos, comunidades de montes, entidades veciñais, sociais e culturais convocan unha manifestación o 1 de xuño para esixir a eliminación do paso a nivel

Nunha xuntanza convocada este mércores a última hora da tarde, a instancia de todos os membros da Corporación do Porriño, integrantes de todos os grupos políticos da mesma, con entidades veciñais, sociais e culturais, comunidades de montes, representantes de sindicatos, de colectivos económicos e empresariais, de clubes deportivos, asociacións de comerciantes, de hostaleiros ou gremios de toda a vila, decidiuse iniciar mobilizacións para esixir ao Goberno de España que tome en serio a demanda, que cumpre xa 70 anos, de eliminar o paso a nivel do Porriño.

Todos os representantes dos grupos municipais, sen excepción, consideraron que acabou o tempo de pedir a ADIF e ao Goberno que o tren deixe de pasar polo centro da vila e chegou xa o de que as porriñeses e os porriñeses saia a rúa, de xeito constante, masivo e continuado para que os responsábeis públicos decidan acabar con esta situación.

A alcaldesa, Eva García de la Torre, fixo un repaso do que pasou dende o ano 2007, cando o Ministerio de Fomento elaborara un proxecto no que se recollía a supresión do paso a nivel logo do desvío da actual traxectoria da vía e que, advertiu, “caducará en novembro deste mesmo ano”.

García de la Torre lembrou a xuntanza mantida en Madrid, en setembro de 2015 con dirixentes de ADIF; o accidente de setembro de 2016 no que morreron 4 persoas e outro medio centenar resultaron feridas; a visita a O Porriño da directora xeral de Infraestruturas de ADIF, en setembro do ano pasado, cunha proposta, “rexeitada, sen  fisuras por toda a Corporación”, que pasaba por ‘emparedar’ a vía tras uns muros abrindo un paso soterrado para peóns e vehículos.

Finalmente, sinalou, foron ata “cinco representantes de ADIF os que viñeron o pasado 17 de abril para, salientou a alcaldesa, “preguntarnos cómo estábamos e qué queríamos, sen plan ou proposta algunha para quitar o paso a nivel”.

Foi esta actitude a que levou á Corporación a decidir que había que prescindir das negociacións con ADIF logo do que parecía unha ‘tomadura de pelo’ e tener coma único interlocutor ao Ministerio de Fomento, polo cal o 23 de abril remitiuse unha carta a ministro, Íñigo de la Serna, pedindo unha xuntanza, carta que non tivo resposta a día de hoxe.

Ante todas estas circunstancias, e dacordo con todas as asociacións, clubes, colectivos e entidades locais, acordouse conxuntamente cos voceiros dos grupos políticos municipais, convocar para o vindeiro 1 de xuño,venres, ás 8 da tarde unha manifestación, á que se pide a asistencia de todas as veciñas e veciños, para esixir o desvío da vía do tren do centro do Porriño e a supresión do paso a nivel.

09/05/2018 in Alcaldía

A alcaldesa, asiste en representación do Concello do Porriño, a administración que máis inviste este ano no @festivaldecans, máis de 20.000€, a súa presentación

A Casa do Cid, espazo emblemático do Festival de Cans, acolleu hoxe, coa presenza da alcaldesa do Porriño, Eva García de la Torre, en representación do Concello, a administración pública que máis inviste no festival– 20.000€, ademáis da contribución á seguridade e ordenación do tráfico da Policía Local e a limpeza- a  presentación da 15ª edición do certame organizado grazas ás veciñas e veciños da parroquia de Cans.

No acto desvelouse o programa ao completo, que este ano contará con cineastas Fernando Trueba e Gracia Querejeta, que participarán dos Coloquios na ‘Leira de Alicia’, e de ‘Triángulo de Amor Bizarro’ na parte musical, entre moitos outros nomes e actividades que se suman ás xa anunciadas para esta edición na que o Festival cumpre 15 primaveras.

O éxito dos encontros con directores en edicións anteriores motivou que este ano se conte por primeira vez con dous coloquios en lugar de un e que estean protagonizados por dúas persoas da talla de Trueba e Querejeta, historia viva do cinema español. Pola súa banda, Triángulo de Amor Bizarro únense ao completo e variado cartel musical de Cans coa súa actuación no Torreiro, na que presentarán o seu recén editado EP El Gatopardo.

Entre as novidades do programa deste ano, cabe salientar as das seccións ‘A que andas?’, na que se descubrirán os guións en proceso de Borja Cobeaga, Ángeles Huerta ou Ignacio Vilar entre outros e outras cineastas, e o habitual seguimento dos Fillos e fillas de Cans, nos que o público do festival poderá ver imaxes inéditas de filmes tan esperados como ‘La sombra de la ley’, de Dani de la Torre; ‘Arima’, de Jaione Camborda, ou ‘Nación de muchachos’, de Javi Camino.

Tamén haberá unha atención especial ás conexións literarias do cinema, coa primeira proxección nun festival galego de Versogramas, documental de Belén Montero e Juan Lesta sobre o fenómeno das videopoesías; e o concurso de booktrailers ‘Ollo de vidro’.

Na presentación tamen estivo presente na presentación a actriz Isabel Naveira, “moi ilusionada” por recibir a chamada do Festival para formar parte do Xurado de Ficción e Animación, que compartirá con Anxos Fazáns, Felipe Lage, Nieve de Medina e Borja Cobeaga. O Xurado de Non ficción estará integrado por Ángeles Huerta, Luis Avilés e Isabelle Le Gonidec, e Paloma Zapata, Fernando F. Rego e Eduardo Herrero comporán o de Videoclips. Haberá tamén, como é tradición, un Xurado dos Veciños e Veciñas no formado por cinco habitantes de Cans.

09/05/2018 in Alcaldía, Cultura e festas

A alcaldesa rexeita e denuncia o xeito meserento, mesquiño e desprezábel co que o Partido Popular pretende empregar a un club deportivo local integrado por persoas con diversidade funcional

A alcaldesa, Eva García de la Torre, denuncia que o Partido Popular emprega de xeito desprezábel un dato referido a un equipo deportivo da nosa vila integrado por persoas con diversidade funcional, o Bacaropo, para os seus fins partidistas e electoralistas.

García de la Torre lembra que coa axuda do Concello 13 rapazas e rapaces porriñeses poden xogar ao baloncesto en cadeira de rodas para o cal dispoñen de 30.000€ para o material e 15.000€ máis para gastos ordinarios de funcionamento dun club que traballa para a prol da igualdade á que teñen dereito todas as porriñesas e porriñeses.

O Partido Popular do Porriño, de xeito mesquiño, pretende espallar públicamente e presentar coma algo sórdido este feito deixando entrever que unha concelleira da Corporación usa este club no seu propio beneficio e da súa familia: é falso pois ninguén está no club Bacaropo para lucrarse ou para cobrar un soldo, algo que saben, perfectamente, os responsábeis do PP local.

Do mesmo xeito, en caso algún, houbo un pacto, trato, arranxo ou componenda por parte da alcaldesa para que esta concelleira dera o seu apoio aos orzamentos municipais deste ano a cambio de axuda ou subvención algunha ao devandito club e, así mesmo, e isto tamén o saben moi ben os responsábeis do Partido Popular do Porriño, hai incompatibilidade ou ilegalidade algunha no feito de que un concelleiro ou concelleira, desta e de calquera Corporación, sexa directivo, presidente o dirixente dunha asociación sen ánimo de lucro ou, coma neste caso, dun club deportivo.

Eva García de la Torre pregúntase ¿por qué ao Partido Popular do Porriño non lle gusta que 13 rapazas e rapaces con diversidade funcional practiquen deporte?, ¿por qué non queren que o Concello do Porriño subvencione a un club que fai posible que compitan nenas e nenos con diversidade funcional?

Se de verdade os responsábeis do PP do Porriño queren que o Bacaropo funcione, que traballe para persoas con diversidade funcional, e están dacordo en que reciban unha axuda do Concello-por certo, unha das axudas máis baixas entre as entidades deportivas locais-, que rexeiten e desautoricen, tamén públicamente, a quen de xeito tan infame e abxecto tenta de emporcar o traballo dos integrantes do Bacaropo e o principio de igualdade de oportunidades ao que teñen dereito todas as porriñesas e porriñeses.

08/05/2018 in Alcaldía

@festivaldecans fai este ano unha grande aposta polos coloquios coa participación de Manuel Lourenzo, Berta Ojea, Borja Cobeaga ou Nieve de Medina

O Festival de Cans fará na súa 15ª edición unha gran aposta polos coloquios e encontros co público, que terán lugar no histórico ‘Baixo do Moncho’ nas mañás que van do mércores 23 ao venres, 26 de maio, sempre ás 11 e media, con entrada libre ata completar un aforo máximo de 100 persoas.

O mércores, 23 de maio, estes encontros abriranse cun coloquio sobre pioneiros no oficio da intepretación, onde se analizará a evolución da profesión de actriz e actor nas últimas cinco décadas. A presenza de Manuel Lourenzo, agora nun momento de gran popularidade polo seu papel de Vicente Otero “Terito” na serie “Fariña”, será un dos grandes atractivos destes coloquios. Neste coloquio, estará acompañado de Pilar Pereira, unha das actrices galegas de máis longa traxectoria, con multitude de papeis en máis de 50 anos de carreira no cine, no teatro ou nas curtametraxes.

O xoves, 24 de maio analizaranse as desigualdades entre actrices e actores e o debate que se está producindo sobre todo nos últimos meses, coas actrices Berta Ojea, Tamara Canosa e Mariana Fernández como relatoras. Mariana Fernández, agora presente na serie “Fariña”, pero tamén antes moi popular polo seu papel de Maribel no “Show dos Tonechos”. Mariana Fernández é ademais profesora da Universidade de Vigo onde imparte clases de dirección escénica.

Por último, o venres 26 de maio, os Coloquios de AISGE estarán dedicados ao acoso sexual, tratando de analizar este tabú que se está derrubando desde hai uns meses. A actriz Nieve de Medina, coñecida por filmes como Los lunes al sol e El Bola, a coñecida actriz galega Nieves Rodríguez, Presidenta de AAAG (Asociación de actrices e actores de Galicia) e Isabel Blanco, delegada en Galicia de AISGE e Chimpín de Prata deste ano en Cans, protagonizarán o terceiro deste encontros.

07/05/2018 in Alcaldía, Cultura e festas

@depo_es aproba unha achega de 248.000€ ao Concello do Porriño para a contratar a 27 persoas

A Xunta de Goberno da Deputación de Pontevedra vén de aprobar unha nova achega ao Concello do Porriño, neste caso no marco da Liña 3 de Emprego do Plan Concellos, por un importe de 248.115,20€ para que poida contratar a 27 persoas a fin de “garantir servizos básicos municipais”.

Ao través desta subvención, o Goberno local do Porriño poderá financiar a contratación de persoal para enfermería, arquivo, administración, albanelería, obras públicas, carpintería, fontanería, electricista, condución de escavadora e tractor, limpeza, pintura ou para o servizo de recursos humanos.

Coma salientou a presidenta da Deputación, Carmela Silva, este ano a liña 3 do Plan Concellos da institución provincial está dotada de 9.540.000€, un 2,5 % máis que no 2017.

07/05/2018 in Alcaldía