Alcaldía

Todo listo para o acendido do Alumeado de Nadal, este mércores, día 5, ás 8 e media da tarde na Praza de Antonio Palacios

O Porriño ultima os últimos arranxos para o acendido do alumeado de Nadal, este mércores, día 5 de decembro, ás 8 e media da tarde, na Praza de Antonio Palacios, un acto que estará animada pola actuación de ‘As Maimiñas’.

A alcaldesa, Eva García de la Torre, supervisou persoalmente a colocación das luces e da decoración que, subliñou, terá un custo inferior ao do ano pasado,“chegará a todas as parroquias” e, por primeira vez, tamén á zona da oficina de Correos ao redor das rúas Enrique Peinador, O Pinar e Cruceiro.

García de la Torre deu especial importancia ao “intenso” programa de actos e actividades de lecer, “especialmente para as pequenas e pequenos”, deseñado polo Concello este Nadal e que, lembrou, abranguen exposicións, festivais, música, teatro, obradoiros, os anunciados Campamentos para facilitar a conciliación da vida familiar e laboral, amais do da “xa tradicional e propia do Porriño,  Festa Pre-Fin de Ano”, a Cabalgata de Reis, a visita de Papa Noel o novo Concurso de Rondallas e, por suposto, a Cabalgata de Reis.

A estas actividades súmanse outras para todos os públicos coma o Festival de Panxoliñas (o día 15), o Festival de Nadal da Escola Municipal de Música (o día 20), o Concerto de Jazz (os día 21 e 22), a Gala Benéfica da Asociación Bastón ( o día 22 no Centro Cultural Municipal), o Flashmob e exhibición de baile Studio 57 (o domingo 23) ou o Concerto da Orquestra de Cámara Galega, o 6 de xaneiro.

04/12/2018 in Alcaldía, Cultura e festas

Este luns, día 3 de decembro, queda aberta a inscrición para o 1º Concurso de Rondallas do Porriño

O Concello abrirá este luns, día 3 de decembro, e ata o vindeiro día 14, o prazo de inscrición no 1º Concurso de Rondallas Concello do Porriño que terá lugar o vinddeiro 1 de xaneiro de 2019.

BASES DO I CONCURSO DE RONDALLAS

Primeira.- A Concellería de Festexos do Concello do Porriño organiza o I Concurso de Rondallas que terá lugar o día 1 de xaneiro de 2019, ás 18:00 h, no Pavillón Municipal de Deportes do Porriño.

Segunda.- Neste concurso poderán participar todas aquelas agrupacións que teñan un mínimo de 40 compoñentes e un máximo de 120.

O número máximo de agrupacións participantes limítase a 10 (dez). Como único criterio de selección estabelécese a orde de inscrición no Rexistro Xeral do Concello do Porriño.

Aquelas inscricións realizadas antes ou despois do prazo estipulado nestas bases non serán admitidas calquera que sexa a causa.

Terceira.– As inscricións para este concurso deberán presentarse no Rexistro Xeral do Concello, no impreso normalizado que se achega ás bases, dende o 3 ao 14 de decembro de 2018, ambos inclusive. Así mesmo, deberase acompañar á inscrición, unha certificación bancaria e fotocopia compulsada do CIF ou NIF segundo proceda.

As bases publicitaranse a través de anuncio nos medios de comunicación local nos días previos ó comezo do prazo e estarán a disposición dos/as interesados/as no citado rexistro e na páxina do Concello: https://oporrino.org/.

Cuarta.– Os premios do concurso serán os seguintes:

PRIMEIRO CLASIFICADO: 1.500 euros.

SEGUNDO CLASIFICADO: 1.000 euros.

TERCEIRO CLASIFICADO: 500 euros.

Todos os premios estarán suxeitos á normativa fiscal que proceda aplicar.

Quinta.- As agrupacións participantes realizarán, previo ó inicio do concurso e na mesma orde de actuación, un pasarrúas de trinta minutos polas seguintes rúas da vila: Praza do arquitecto Antonio Palacios, Rúa Antonio Palacios, Rúa Doantes de Sangue, manténdose neste último lugar á espera da entrada ó concurso.

No caso de suspensión dos pasarrúas por choiva, concentraranse na mesma orde e horario no Pavillón Municipal de Deportes do Porriño.

Sexta.- A orde de actuación no Pavillón Municipal de Deportes do Porriño das rondallasinscritas decidirase mediante un sorteo que se realizará na Casa do Concello do Porriño o día 17 de decembro ás 12:00 horas. Recoméndase que a este sorteo acuda un/unha representante de cada rondalla inscrita.

Sétima.– Cada agrupación disporá dun máximo de 12 minutos para realizar as interpretacións que estime oportunas.  O tempo dispoñible computarase dende o momento no que as agrupacións comecen a interpretar a primeira peza.

Oitava.- Estabelécense as seguintes penalizacións por exceso de tempo:

10 puntos.- polo primeiro minuto ou fracción

20 puntos.- polo segundo minuto ou fracción

30 puntos.- polo terceiro minuto ou fracción

Descualificarase inmediatamente a unha agrupación nos seguintes casos:

✔ cando o exceso de tempo supere os tres minutos;

✔ cando figuren na pista menos de 40 compoñentes;

✔ cando entre os seus compoñentes ou concursantes, figuren “majorettes”.

Novena.– Os himnos oficiais dos estados e das comunidades autónomas non poderán ser incluídos nos repertorios que executarán as rondallas participantes.

Décima.- A rondalla gañadora do concurso terá que actuar un día a convir por ambas partes, a organización e a agrupación, durante as festas de Nadal nas rúas do Concello do Porriño.

Décimo primeira.– O xurado do concurso cualificará entre 0 e 16 puntos cada unha das agrupacións, valorando os seguintes elementos:

  1. a) Criterios relacionados coa cultura tradicional e popular galega (valoración máxima 10 puntos):

– Instrumentación musical tradicional: máximo 4 puntos

– Repertorio musical: máximo 4 puntos

– Vestimenta de toda a rondalla: máximo 2 puntos

  1. b) Outros criterios (valoración máxima 6 puntos):

– Evolución e coreografía en pista: máximo 2 puntos

– Instrumentación musical xeral: máximo 1 punto

– Número de compoñentes: de 40 a 60 – 1 punto; de 60 a 80 – 2 puntos; de 80 a 120 – 3 puntos.

Décimo segunda.- O xurado do concurso, nomeado por resolución da Alcaldía, estará composto polos seguintes membros, en número impar:

Presidente/a: A alcaldesa-presidenta ou persoa en quen delegue

Vocais:

– dúas persoas relacionadas coa música, danza, etnografía, folclore ou cultura tradicionais galegos.

– un/unha representante das rondallas participantes.

– Un/dous representante/s do Concello.

A composición do mesmo variará para obter, en todo caso, un número impar de membros con voz e voto.

Secretario: Un funcionario do Concello do Porriño, con voz e sen voto, que certificará o cumprimento das condicións establecidas nas bases do concurso que se achegan no anexo a este convenio.

O presidente do xurado dispón tamén de voto de calidade para resolver os posíbeis empates.

Décimo terceira.- A concelleira de Festexos mailo xurado do concurso quedan facultados para resolver as posíbeis eventualidades e dúbidas que puidesen xurdir, non previstas nestas bases.

Décimo cuarta.- A participación neste concurso supón a aceptación de todas e cada unha destas bases. A decisión do xurado será inapelábel.

 

 

 

02/12/2018 in Alcaldía, Cultura e festas

En marcha o ‘Programa de Nadal do Porriño’, que durará máis dun mes, e que abrangue actividades e propostas para todas as idades

Dende o día 1 de decembro ata o sábado 6 de xaneiro de 2019, o Concello do Porriño leva adiante un completo programa de Nadal que abrangue dende ‘Animación na rúa’, concertos, actividades para cativos, Flashmob, a tradicional ‘Pre-Festa Fin de Ano’ ou a Cabalgata de Reis.

Este ano, ademais haberá novas propostas, coma a 1ª Xornada pola Integración da Discapacidade (o domingo día 2 de decembro, no Pavillón Municipal de Deportes); a celebración, o luns, día 3, do Día Internacional da Integración das Persoas con Diversidade Funcional; o 1º Concurso de Rondallas Concello do Porriño, o 1 de xaneiro, no Pavillón de Deportes, ou o Concerto da Orquestra de Cámara de Galicia, o 6 de xaneiro.

Xunto con estas novidades estarán as actividades tradicionais, coma o ‘Encendido das luces de Nadal’, o vindeiro mércores, día 5 de decembro, ás 8 e media da tarde na Praza do Arquitecto Antonio Palacios; o ‘Festival de Panxoliñas’, o venres día 14; a Visita de Papa Noel a San Benito e San Sebastián, o día 21; o Concerto dos Bolechas, o día 22 deste mes; a Festa ‘Pre Fin de Ano’, o domingo día 30 ás 11 da noite ou a Cabalgata das Súas Maxestades Melchor, Gaspar e Baltasar,o día 5 de xaneiro dende as 6 da tarde.

A estas propostas súmanse as actividades da Biblioteca Municipal, que depende directamente da Alcaldía, e que abrangue Club de Lectura para Adultos, Conta-Contos, o Teatro de Monicreques, entre os días 3 e 27 de decembro.

30/11/2018 in Alcaldía, Cultura e festas

A alcaldesa do Porriño, Eva García de la Torre, absolta dos presuntos delitos que se lle imputaban polo exercicio da súa actividade profesional

A alcaldesa do Porriño, Eva García de la Torre, vén de ser absolta de todos os cargos que se presentaran contra ela polo exercicio da súa actividade profesional coma avogada.

García de la Torre, que acudiu a xuizo o pasado día 22 de novembro, estaba acusada da presunta comisión dos delitos de Falsidade Documental e de Deslealtade Profesional.

O maxistrado titular do Xulgado do Penal número 1 de Pontevedra entende que García de la Torre non cometeu ningún dos delitos que lle imputaba o ministerio público e polos cales solicitaba 2 anos e medio de cadea, inhabilitación para o exercicio de cargo público, no caso da Falsidade Documental, e unha multa e doous anos de inhabilitación para exercer a súa profesión, no que se refire á Deslealtade Profesional.

29/11/2018 in Alcaldía

A alcaldesa recolle en Oviedo o recoñecemento do Porriño coma ‘Cidade Amiga da Infancia’, outorgado por UNICEF

A alcaldesa, Eva García de la Torre, recibiu este martes o nomeamento do Porriño coma ‘Cidade Amiga da Infancia’, outorgado por UNICEF, nun acto celebrado no Pazo de Exposicións e Congresos de Oviedo.

O Porriño é un dos 8 concellos de Galicia que vén de recibir este  recoñecemento que fora aprobado o pasado 26 de Outubro por UNICEF grazas á iniciativa do persoal da Oficina Municipal de Información Xuvenil (OMIX) do Porriño que iniciou o procedemento para que a vila se representase a esta convocatoria.

A alcaldesa, que estivo acompañada pola concelleira Lourdes Moure, e polo concelleiro Orlando Márquez, presidira o pasado día 20 o Pleno Infantil, no que as rapazas e rapaces plantexaran distintas iniciativas relacionadas cos espazos públicos, as barreiras arquitectónicas existentes, a peatonalización das rúas ou a eliminación do paso a nivel do centro do Porriño.

Resumo do proceso

O proceso para que O Porriño chegase a ser considerada por UNICEF coma ‘Cidade Amiga da Infancia’ empezara ao comezo do curso escolar 2017-2018: realizouse unha xuntanza coas directoras e directores dos centros de ensino para presentarlles o proxecto e valorar a posibilidade de organizar en cada centro talleres de participación, en especial no referente aos dereitos dos máis novos.

Ao mesmo tempo, adiantábanse nos traballos de elaboración do Plan de Infancia e Adolescencia do Concello do Porriño, que cubriu diferentes fases implicando, ademais dos centros educativos, a clubs deportivos, país e nais ou persoal técnico municipal.

Os talleres escomezaron hai máis dun ano en unha, dous ou tres aulas por centro, participando nos mesmos un total de 356 nenas, nenos e adolescentes de 19 grupos distintos, pertencentes aos  10 centros educativos existentes no concello.

Coma resultado celebrouse o primeiro Pleno Infantil no Concello o 28 de novembro de 2017 no que os representantes de cada centro, ademais de celebrar o Día dos Dereitos da Infancia, presentaron á alcaldesa as súas demandas, constituíndose o Consello Municipal de Infancia do Porriño.

Paralelamente se iniciara o labor de documentación e análise bibliográfico, coa intención de dar os primeiros pasos para coñecer a realidade da infancia e adolescencia no concello, as súas necesidades e demandas e así coma detectar situación de vulnerabilidade entre a poboación infantil e adolescente.

Coñecida a realidade e as demandas e opinión de cada un dos axentes participantes, elaborouse un documento base do plan cos obxectivos xerais de 5 grandes áreas e as actuacións concretas a realizar.

A participación seguiu nos meses de  marzo e abril deste ano materializando o seu traballo nun novo Pleno Infantil, o 18 de abril, con entrevistas individuais con técnicos municipais xuntanzas do órgano de coordinación interno (formado por persoal técnico de distintas áreas municipais), que finalmente deu a súa aprobación ás actuacións previstas.

28/11/2018 in Alcaldía

O 40% das participantes no Programa Integrado de Emprego para Mulleres (PIEM) do Concello acadaron un posto de traballo

A concelleira de Emprego, Formacion, Benestar e Igualdade, Soledad Girón, pechou o Programa Integrado de Emprego para Mulleres (PIEM) do Concello do Porriño, destinado só a mulleres, unha iniciativa que, sinalou Girón, conta coa colaboración da Xunta.

Este programa, no que participaron 85 alumnas, permitiu a inserción laboral de 34 delas , o 40% do total.

Soledad Girón lembrou as dificultades que tivo que salvar o Goberno local para poner en marcha este proxecto que estivo íntegramente adicado a mellorar as posibilidades das participantes para voltar ou acceder ao mercado de traballo, un obxectivo especialmente importante dado que a taxa de desemprego entre as veciñas do Porriño é moito máis alta que entre os homes.

O PIEM permitiu, porén,  nuns casos, a contratación de varias das participantes no mesmo e doutros, a mellora da súa formación, teórica e práctica, e a especialización para que atopar un emprego sexa máis doado.

28/11/2018 in Alcaldía, Benestar, Emprego e formación, Igualdade

Mercedes Peón, concerto de RAP, Concurso de Tuits, ‘Mulleres de cinema’ e a lembranza ás vítimas, forman parte do Programa do Concello co gallo do ‘Día da Eliminación da Violencia contra a Muller’

Co gallo do 25 de novembro , ‘Día Internacional para a Eliminación da Violencia contra a Muller’, o Concello do Porriño a través da súa Concellería de Igualdade, “optou este ano, por invitar á reflexión para que cada un/ha sexamos quen conclúa o lema segundo o seu criterio”, sinala a concelleira Soledad Giron.

‘NON ME DÁ IGUAL…’

Nesta liña, convócase o “II Concurso de tuits”contra a violencia de xénero, co fin de sensibilizar e previr á cidadanía presente na rede social contra a lacra machista.

En torno a este día, dende a Concellaría de Igualdade tamén organizase unha serie de actos que se desenvolverán nestas datas e horarios: o  sábado,día 24, ás 10 da noite, no Pavillón Municipal, concerto de Mercedes Peón. A  entrada é de balde ata completar aforo.

O domingo , 25  á 1 da tarde, na Praza do Concello, ‘mini’ concerto de rap “ Xénero Versos”, un proxecto desenrolado co alumnado da ESO do Porriño contra violencia de xénero no ano 2017-2018. Tras o concerto haberá unha concentración en memoria das vítimas.

Dentro do ciclo “ Mulleres cinema” proxectaranse tres películas: a primeira o mércores, día 28 ás 7 e media da tarde no Círculo Recreativo Cultural, baixo o título “ Todas as mulleres que coñezo”, da directora Xiana do Teixeiro; a segunda o xoves 29, ás 8 e media da tarde, no mesmo lugar, “Con el viento”, da directora, Meritxell Corell, e a terceira “ Viaje al cuarto de una madre”, o venres, 30, ás 7 e media da tarde, tamén no Círculo Recreativo Cultural , da directora Celia Rico. A entrada é libre e de balde ata completar aforo.

23/11/2018 in Alcaldía, Benestar, Igualdade

A alcaldesa denuncia o estado no que están os profesionais do PAC do Porriño e alerta do perido que supón para eles e para a saúde das veciñas e veciños a situación na que os deixa a Xunta

A alcaldesa, Eva García de la Torre, vén de poñerse en contacto coa xefa de servizo do Punto de Atención Continuada (PAC) do Porriño para amosarlle  seu apoio e poñerse a súa disposición ante a situación que está a sufrir o persoal do mesmo.

García de la Torre lembra que o servizo neste PAC vense prestando en equipos de dous médicos e dous enfermeiros  que fan gardas de 17 ou 24 horas cada catro días: 8 médicos e 8 enfermeiras que cobren todos os días, as noites e as fins de semanas do ano.

Nos vindeiros días, por mor das vacacións de Nadal, baixas por enfermidade ou excedencias, o equipo contará con catro médicos menos o que suporá que os outros catro terán que realizar o mesmo traballo que facían oito.

A alcaldesa considera esta situación “intolerábel e inaguantábel” e denuncia á Xunta de Galicia por someter a estes profesionais a unha presión e carga de responsabilidade  totalmente insoportábel e por “tratar ás veciñas e veciños do Porriño cunha falta de respecto insultante e consideralos coma cidadáns de segunda”.

Eva García de la Torre lembra que no pasado Pleno, no que se aprobara, a proposta de EU-Son, e co voto en contra do Partido Popular, pedir a dimisión do conselleiro de Sanidade, Jesús Vázquez Almuiña, a responsábel de sanidade do grupo municipal do PP insistiu, mesmo increpando a postura do resto dos concelleiros da Corporación, que O Porriño conta cun bo servizo de saúde e gabou o traballo da Xunta neste sentido.

A alcaldesa subliña que a xestión de Alberto Núñez Feijóo e do seu conselleiro de Sanidade no que atangue á atención sanitaria das porriñesas e porriñeses pódese resumir nunha palabra:desprezo.

Este abafallo amósase no feito de que non ten consideración algunha polos médicos e enfermeiras que traballan no Porriño, non ten intención de mellorar os actuais servizos: nin o centro de saúde, nin ten en conta as súas necesidades en radioloxía, saúde mental ou pediatría.

Aquel desprezo amósase de xeito máis descarado no silencio diante das constantes solicitudes por parte do Goberno local do Porriño para manter unha xuntanza cos responsábeis da Consellería de Sanidade, solicitudes, como sucede con varias das remitidas por correo electrónico, que se eliminan sen abrilas sequera.

19/11/2018 in Alcaldía

Concello e clubes do Porriño facilitarán a entrada de balde ás competicións nas que participen a veciñas e veciños con diversidade funcional, por medio do ‘Carné Municipal de Deporte Especial’

O tenente de alcalde e concelleiro de Deportes, Manuel Carrera, a concelleira de Educación, Lourdes Moure, e os responsábeis do Atletismo Porriño, Club Porriño de Baloncesto, Balonmano Porriño, Porriño Industrial, los clubs de fútbol de Mosende, Atios y Pontellas, o Club Ciclista avanza, Patín Porriño, Ximnasia Rítmica Porriño, o Club Baloncesto en Cadeira de Rodas do Porriño e Club Furaventos, veñen de asinar un convenio polo cal os mesmos comprométense a facilitar o acceso de balde a todas as actividades deportivas que estes clubs realicen nas instalacións municipais, a persoas con diversidade funcional.

Manuel Carrera salientou  o “xa coñecido interese e traballo que dende o Concello para impulsar a integración na actividade deportiva das persoas con capacidades diversas, como amosamos en cada unha das iniciativas postas en marcha dende o Goberno local”.

Dacordo con este convenio a Concellería de Deportes creará o  ‘Carné Municipal de Deporte Especial’, que dará dereito ás persoas con diversidade funcional, nun grao recoñecido igual ou superior ao 33%, titulares do mesmo, a entrar a todos os eventos  deportivos organizados polo Concello ou polos clubs que forman parte do Programa Municipal de Axuda Deportiva.

As persoas con diversidade funcional que queiran solicitar este carné- que abrangue, tamén a modalidade de persoas con acompañante- deben de presentar un formulario, acreditar  un grao de diversidade física, mental, intelectual ou sensorial igual ou superior ao 33%,  ter recoñecida unha pensión de incapacidade permanente no grao de total, absoluta ou grande invalidez, e aos pensionistas que teñan unha pensión de xubilación ou de retiro por incapacidade permanente para o servizo ou inutilidade, e estar empadroado no Concello do Porriño.

Estes trámites poden facerse no Centro Deportivo Municipal o nas Oficinas do Rexistro do Concello, ou doutros xeitos establecidos pola lei. Non haberá un prazo determinado, polo cal o carné pode solicitarse en calquera momento e o mesmo pode recollerse, logo do seu trámite, no centro Polideportivo Municipal.

17/11/2018 in Alcaldía, Deportes

O Goberno local continúa coa reforma dos parques infantís: o do Centro Social e Cultural de Atios, que conta cun investimento de 40.000€, estará rematado o mes que vén

O Goberno local segue adiante coa reforma e o arranxo dos parques infantís da vila, que en moitos casos, subliña o concelleiro de Parques e Xardíns, Orlando Márquez, “non se repararan en anos, precisaban xa unha remodelación completa ou estaban xa obsoletos”.

O mes que ven estará en funcionamento o parque do Centro Social e Cultural de Atios, ao que o Concello destina un orzamento de 40.000€ e que contará cunha pista ‘polideportiva’ para a práctica de fútbol, balonmán ou baloncesto; novos bambáns, na zona infantil que “está a ser completamente remodelada” e na que se colocará un moderno chan de caucho para garantir a seguridade das cativas e cativos; e, por primeira vez, un parque de actividade biosaudábel para adultos.

Esta iniciativa, que terá continuidade nas vindeiras semanas noutros parques da vila, súmase ás realizadas no Parque da Urbanización do Sol, no investíronse preto de 22.000€ para  arranxar todos os bambáns, colocar un deles para persoas con diversidade funcional e a instalación dun chan de caucho.

Tamén rematouse hai preto dun ano o do Campo da Feira, que contou cun orzamento de 4.173€; o Parque Lamazares, detrás de Correos, no que se cambiaron os seus elementos investindo 4.655€; o de San Diego, no que ademais colocouse un chan de caucho continuo, logo de facer unha inversión de 1.952€ e o de Torneiros no que, cun investimento de 9.181€, ademais dos distintos xogos, se arranxaron os bancos, as varandas, o valado de madeira e adaptouse para persoas con diversidade funcional.

17/11/2018 in Alcaldía, Parques e xardíns