Alcaldía

O Porriño transformará a súa praza de abastos para convertela nun centro de referencia do comercio e o ocio

O Concello do Porriño iniciou os trámites para licitar a contratación da primeira fase das obras de mellora que se levarán a cabo na Praza de Abastos, cun orzamento máximo de licitación de 106.000 euros.

O Concello pretende con este proxecto impulsar a Praza de Abastos converténdoa nun espazo de encontro e lecer que ofrecerá aos consumidores produtos de calidade e hostalería. As instalacións melloraranse para conseguir un interior máis diáfano e, nas seguintes fases, acondicionarase a contorna.

“Queremos reconverter o mercado, tanto no interior como na súa contorna, para facer deste emblemático edificio o centro neurálxico da zona comercial e de ocio e atraer nova clientela. Respectando sempre a esencia deste edificio de Xosé Bar Boo”, explicou o alcalde, Alejandro Lorenzo, “A nosa praza de abastos debe ser un centro de referencia para as compras non só no Porriño senón en toda a contorna, un lugar atractivo para a veciñanza”.

A actuación na Praza de Abastos inclúe a renovación das instalacións de fontanería e saneamento, infraestruturas eléctricas incorporando iluminación led e sistemas de dixitalización. Ademais, renovarase o pavimento de todo o edificio, tanto na planta baixa como na entreplanta, ampliando esta última para conseguir máis superficie de uso. Traballarase tamén no exterior do edificio para subsanar os danos estructurais que presenta.

O proxecto do Goberno Municipal para este espazo é global, e inclúe en seguintes fases a mellora da contorna, trasladando o espazo de aparcadoiro a unha parcela contigua para crear unha praza exterior anexa ao edificio, que permita dispoñer dun amplo espazo para a celebración de feiras e eventos, coa idea tamén de que sirva como reclamo para atraer a nova clientela á vila. Tamén a reordenación do tráfico para mellorar a circulación e solventar problemas de aparcamento, ademais da adaptación de todo o mobiliario urbano.

O alcalde incidiu en que todo isto se fará “da man dos praceiros e praceiras, atendendo ás súas propostas e necesidades e, por suposto, causando o menor perxuízo posible para a súa actividade mentres duren os traballos”.

12/09/2023 in Alcaldía, Urbanismo, comercio e industria

Merca na rúa celebrarase os días 15 e 16 de setembro

As previsións meteorolóxicas para esta fin de semana obrigan a pospoñer a vixésimo oitava edición da feira de oportunidades prevista para este sábado e domingo. Tal e como anunciaron hoxe dende Acipor e o Concello do Porriño finalmente Merca na Rúa celebrarase o vindeira semana, o venres 15 e o sábado 16 de setembro en horario ininterrompido de 10 a 21 h.

Serán 24 os postos que se instalarán na rúa peonil, cunha ampla representación de sectores e produtos. Roupa, calzado, óptica, mercería ou accesorios son algúns dos artigos nos que se pode atopar importantes descontos.

Para facilitar as compras ás familias o sábado pola mañá haberá inchables para os máis pequenos, de 10 a 14h, e pola tarde obradoiros infantís da man de Hypatia e clases de baile, animación e actuacións con Studio 57.

O alcalde, Alejandro Lorenzo, convidou a todo o mundo a visitar O Porriño e beneficiarse das grandes ofertas do comercio local.

12/09/2023 in Alcaldía

A ludoteca municipal volve abrir as súas portas este mes de setembro

O Concello do Porriño, a través da concellería de Igualdade que dirixe Carolina González, pon en este mes un servizo gratuíto de ludoteca dirixido aos máis pequenos e pequeñas da casa. Este recurso estará disponible dende o vindeiro luns 11 de setembro e ata o día 28 do mesmo mes, en horario de tarde, de 16 a 20 h, pero o Concello traballa para dar continuidade ao mesmo co fin de facilitar a conciliación familiar.

A concelleira explicou que se desenvolverá nas instalacións do Centro Cultural municipal e poderán facer uso os/as nenos/as de entre 3 e 12 anos inclusive. Cabe destacar que non se require inscrición previa, todas as persoas que queiran usar este servizo deberán dirixirse ao Centro Cultural a partir do luns 11 e facilitar os seus datos persoais, incluíndo o seu DNI e teléfono de contacto, así como o nome, apelidos e data de nacemento do/da neno/a.

Na mesma ficha ou plantilla sinalarase o día e a hora de entrega e recollida.

A ludoteca estará aberta de 16 a 20 h e o aforo está limitado a 50 usuarios/as.

“Traballamos para mellorar a conciliación da vida persoal e laboral das familias do Porriño impulsando medidas que, dentro das nosas competencias, poidan consolidarse na vila”, concluíu a edil.

Este recurso que engloba diversas actividades forma parte do Programa “Medidas de impulso por unha mellora na búsqueda de emprego e incorporación ao mercado laboral das mulleres con cargas familiares”, cofinanciado pola Federación Española de Municipios e Provincias FEMP e o Instituto da Muller.

07/09/2023 in Alcaldía, Igualdade

Os motores volverán ruxir no velódromo co XVI Dirt Track Xacob Agra

Un ano máis, e xa van dezaseis, o velódromo municipal do Porriño acollerá a Dirt Track Xacob Agra. Como cada ano, o motoclub Papaya en colaboración co Concello do Porriño, organiza esta carreira noturna que reunirá no óvalo porriñés a pilotos chegados de toda a xeografía galega e tamén do país veciño.

O alcalde, Alejandro Lorenzo, e o concelleiro de Deporte, Abel Estévez, xunto a Xoaquín Agra, presidente do motoclub Papaya, e o piloto porriñés Xacob Agra, presentaron esta mañá o evento.

“Como cada ano por estas datas poderemos disfrutar deste espectáculo deportivo, unha cita marcada na axenda de todos os amantes do motor que cada edición conta cunha enorme participación e implicación do público”, apuntou o alcalde, Alejandro Lorenzo, que quixo agradecer ao Motoclub Papaya o “gran nivel organizativo que demostran cada ano, que fixo posible consolidar este evento deportivo de referencia en toda Galicia”.

A proba desenvolverase como cada ano en eliminatorias por grupos (clasificatorias, repescas, semifinais e finais). Prevese que disputen a proba preto de 40 pilotos, 20 en adultos e outros na modalidade infantil que será exhibición, chegados de toda a xeografía galega e tamén do país veciño. Cabe destacar que nesta edición debutará nesta disciplina o piloto local Jose Calvar.

05/09/2023 in Alcaldía, Deportes

O elenco de Teatro Fontevella dará o pregón das Festas do Cristo 2023

As Festas do Cristo regresan este ano ao Porriño con máis dun cento de actividades para todos os públicos e gustos. Propostas deportivas, espectáculos, animación de rúa, monólogos, verbenas, concertos e moitas sorpresas conforman a programación que xa deu comezo esta fin de semana e que se prolongará ata o domingo 1 de outubro coa tradicional cita gastronómica dos callos, que este ano chega á súa trixésimo edición.

O alcalde, Alejandro Lorenzo, e o concelleiro de Cultura e Festexos, Bienvenido Estévez, presentaron hoxe o cartel das festas acompañados por unha representación da hostalería porriñesa e polos pregoeiros deste ano: o elenco de Teatro Fontevella.

“As nosas festas son unha seña de identidade, cultura e tradición e ninguén mellor que os actores e actrices de Fontevella para representar estes valores”, apuntou o alcalde, “Para O Porriño será unha verdadeira honra velos no balcón da Concello dando o pistoletazo de saída aos nosos días grandes”.

O rexedor quixo facer unha mención especial a Amparo Tellado, que a piques de cumprir os 94 anos será a encargada de dirixir o pregón. “Amparo é a actriz galega de maior idade e ten un talento que non deixa a ninguén indiferente”, engadiu Lorenzo, “Estou seguro que co seu pregón nos cautivará a todos como o fai cada vez que se sube ao escenario”.

Xunto a Amparo, estarán os seus compañeiros e compañeiras da compañía: Adriano, Balbina, Susana, José, Enrique, Daniel, Lola, Valentina, Andrés e Chelo Pampillón, a directora do grupo.

“É para nós unha honra ser os pregoeiros das Festas do Cristo”, manifestou Pampillón, “A ver se o balcón do Concello aguanta, porque ese día ten que soster os máis de 500 anos que sumamos de recordos, historia e moitas Festas do Cristo vividas”.

Cabe destacar que o pregón, á vez que recoñece a traxectoria deste grupo, será tamén unha celebración do aniversario xa que foi nas Festas do Cristo, hai xa 28 anos, cando subiron por primeira vez a un escenario con Castelao e a obra “Os vellos non deben namorarse”.

30 días festexando O Porriño

A programación arrancou xa na Vila do Louro e estenderase durante todo o mes de setembro. Como cada ano, a música e o deporte terán un papel protagonista, ao igual que as actividades infantís.

Panorama , El Combo Dominicano, Grupo América, Girls Gang, Os CoriBantes e moitos máis poñerán a banda sonora a estas festas, sen esquecernos do Louro Valley Festival, cuxo cartel será presentado nos vindeiros días, o Negrita Music Festival, que traerá ao Porriño a Melendi, Rels B e Cali & el Dandee, entre outros, e o Montando Cristo Festival, que reunirá a Buxa, Hard Trip Castro e Los Escoltas/ The Brooke.

Regresa tamén outro dos clásicos, o certame musical Tes Talento, e tamén o fai a Batalla de Galos. O deporte, da man dos clubs deportivos do municipio, xogará de novo un papel fundamental nestas festas.

O broche final, como cada ano, o poñerá a Festa dos Callos que chega xa á súa 30 edición e o fará por todo o alto.

“Agardo que estas Festas do Cristo sexan do agrado dos vecinos e veciñas e de todas aquelas persoas que queiran visitarnos”, concluíu o rexedor que quixo trasladar o seu “agradecemento á hostalería e comercio local, asociacións e clubs deportivos do Porriño que nos axudan a dar forma a estes días para que todos podamos disfrútalos xuntos e seguir facendo do noso pobo un lugar de referencia”.

05/09/2023 in Alcaldía, Cultura e festas

Publicadas as bases para a instalación de postos nas Festas do Cristo 2023

 

O Concello do Porriño vén de publicar as bases para a instalación de postos e atraccións nas Festas do Cristo 2023. 

A solicitude de preinscripción pode descargarse na seguinte ligazón:

https://oporrino.org/documentos/solicitude-postos-de-venda-tombolas-casetas-ou-atraccions-festas-do-cristo-2023/

Tamén pode recollerse no Concello do Porriño ata o 14 de setembro, en horario de 9 a 14h. Toda a documentación requerida nas bases será entregada no Rexistro do Concello ou a través da sede electrónica ata o 14 de setembro. 

BASES INSTALACIÓN POSTOS E ATRACCIÓNS FESTAS DO CRISTO 2022:

https://oporrino.org/documentos/bases-de-funcionamento-dos-postos-de-venda-tombolas-casetas-ou-atraccions-festas-do-cristo-2023/

01/09/2023 in Alcaldía

Porriño rematará o ano coa conta das facturas pendentes de pago dende 2016 a cero

 

  • O pleno vén de aprobar un recoñecemento extraxudicial de crédito para abonar 115 facturas por importe de 231.000 euros e a baixa na contabilidade doutra ducia que suman 177.000 euros
  • Na sesión desta mañá ratificouse o orzamento para este 2023 e iniciáronse os trámites para a concesión do aparcamento da Avenida de Galicia

 

Fai pouco máis de ano e medio, cando entrou o goberno actual no Concello do Porriño existían centos de facturas sen aboar, con data de 2016 en adiante, que sumaban un importe de 5,5 millóns de euros. Logo das xestións do equipo de goberno liderado polo alcalde Alejandro Lorenzo e pendente unicamente de diversas resolucións xudiciais, que auguran serán favorables á administración local, esta cifra quedará a cero a finais deste 2023.

“A gran maioría destas facturas, como demostramos neste tempo, eran irregulares e sen ningún tipo de contrato. Fomos reducindo a cifra logo das revisións e comprobacións correspondentes”, explica o rexedor. “Devolvéronse facturas duplicadas, que xa se pagaran, ou que non se demostraba a veracidade ou os prezos de mercado por importe de case 2 millóns de euros. Ademais, o Concello gañou sentencias xudiciais que denegaron o pago reclamado por empresas de case outro millón máis”, engade.

A día de hoxe deses 5,5 millóns iniciais quedaban pendentes de pago 819.202,03 euros, correspondentes a 201 facturas. Delas, 115 que suman 231.22,27 euros aboaranse de xeito inmediato a través do expediente de recoñecemento extraxudicial de crédito que foi aprobado por unanimidade esta mesma mañá en pleno.

Por outra banda, figuran 74 facturas por importe de 410.833,35 euros que quedan excluídas do recoñecemento extraxudicial. Dentro deste apartado están, por unha parte 71 facturas de dúas entidades que se atopan xudicializadas pendente de sentenza firme logo de seren recorridas polas empresas; e por outra, tres facturas sometidas a revisión de oficio e ditaminadas polo Consello Consultivo.

Por último, nun terceiro apartado atópanse 12 facturas presentadas en 2021 por servicios de limpeza viaria e lavado de colectores realizados nos ano 2019 e 2020, cuxo importes suman 177.143,41 euros, que se devolven e se dan de baixa na contabilidade municipal (conta 413) ao non demostrarse a súa veracidade.

O pleno extraordinario celebrado esta mañá serviu tamén para ratificar e aprobar definitivamente o orzamento do Concello do Porriño para este 2023, que ascende a 19 millóns de euros, o máis alto da historia, e tamén para iniciar os trámites dunha nova concesión para o aparcamento subterráneo da Avenida de Galicia.

Dende o ano 2014 a empresa concesionaria deste aparcamento non pagaba o seu canon anual, polo que o actual goberno procedeu a reclamar esa débeda, incautar o aval que tiñan e expulsala, quedándose o Concello ao fronte das instalacións. Agora, no pleno de hoxe aprobouse o estudo de viabilidade económico financeiro do contrato de concesión, así como tamén o regulamento de funcionamento do aparcadoiro.

31/08/2023 in Alcaldía

Avanza a bo ritmo a segunda fase da mellora do Parque da Alameda

  • Coa primeira fase xa executada, o Concello do Porriño continúa co acondicionamento deste espazo coa substitución do pavimento existente e a impermeabilización do soporte estrutural

O alcalde do Porriño, Alejandro Lorenzo, e o concelleiro de Vías e Obras, Ramón Porto, comprobaron de primeira man os avances da segunda fase das obras de mellora e humanización que se están a desenvolver no parque da urbanización Alameda, na Avenida de Galicia.

As continuas filtracións que se daban neste espazo de uso público estaban a causar danos estruturais no soporte da praza e afectando ao garaxe que se atopa baixo a mesma, algo que estaba a causar numerosos perxuízos aos usuarios destas prazas de aparcamento.

Co fin de resolver este problema, o Concello do Porriño acometeu as obras de impermeabilización deste espazo, que abrangue unha superficie de 2.000 metros cadrados, aproveitando a actuación para levar a cabo a humanización da outra parte da praza e o seu acondicionamento como espazo público de lecer, creando un novo parque infantil para disfrute dos máis pequenos.

“Coa primeira fase xa executada, continuamos coa humanización da praza cunha segunda intervención de substitución do pavimento existente e a impermeabilización do soporte estrutural da propia praza”, explicou Lorenzo, “Ademais, facilitarase a accesibilidade ás vivendas e baixos comerciais con acceso ao interior da praza, xa que algún deles presentaba desniveis que dificultaban a accesibilidade”.

O orzamento desta segunda fase do proxecto ascende a 83.182,61 euros. A humanización e mellora desta céntrica praza supuxo unha inversión de 138.868 euros, financiada na súa totalidade a través dun convenio de colaboración asinado coa Vicepresidencia Segunda e Consellería de Presidencia, Xustiza e Deportes da Xunta de Galicia.

04/08/2023 in Alcaldía, Vías e obras

O Porriño incrementa nun 84,21% as axudas ás traídas de augas

  • O novo orzamento destina 175.000 euros ás subvencións a comunidades de usuarios de augas

O Concello do Porriño destinará 175.000 euros a axudas para as comunidades de usuarios de auga do municipio. A administración local suma 80.000 euros aos 95.000 consignados no orzamento prorrogado, incrementando nun 84,21% as subvencións para a mellora e mantemento das instalacións das traídas.

Esta nova convocatoria, a de maior contía proposta desde a administración local,  suma unha nova liña destinada a inversións. Así o obxecto destas axudas comprenderá non só o mantemento e reparación das instalacións senón tamén a súa mellora. As beneficiarias poderán optar a financiación para a contratación de obras de reparación, substitución ou ampliación de redes de distribución, analíticas de control sanitario ou mantemento e conservación en captación, mantemento das instalacións ou sistemas de almacenamento e potabilización.

O concelleiro, Marcos Martínez, adiantou que “nas próximas semanas publicaranse as bases da convocatoria de axudas, á que poderán optar todas as comunidades de augas do Porriño que estean formalmente constituídas. En calquera caso, informaremos a todas as traídas para explicarlles máis polo miúdo o obxecto destas bases e facilitarlles a tramitación das solicitudes”.

“Con estas axudas queremos axudar ás traídas a aumentar a calidade do servizo que prestan á veciñanza, contribuír a mellorar tanto o sistema de abastecemento como a calidade da auga. Ademais, por suposto, de promover un uso máis eficiente dos recursos hídricos dos que dispoñemos, algo de vital importancia nun momento no que as alertas por seca son cada vez máis habituais”, explicou o alcalde, Alejandro Lorenzo.

03/08/2023 in Alcaldía, Parroquias

O Concello do Porriño adianta a redacción dos proxectos necesarios para completar o 100% do saneamento

O Concello do Porriño adianta a redacción de proxectos de obra de saneamento en todas as parroquias do termo municipal e no centro urbano, co obxectivo de axilizar ao máximo os trámites administrativos necesarios.
 
A tal fin, o Goberno Municipal aprobou este luns no pleno a súa proposta de inversión para a redacción dos proxectos e os traballos de topografía. O gasto total da execución das actuacións pendentes de proxectar, derivadas do Plan director do Consorcio de Augas do Louro ascende a 9.383.912 euros, e a estimación dos gastos para a redacción dos proxectos ascende a 404.709 euros.
 
“Contar cos proxectos listos, con todos os informes sectoriais das correspondentes administracións e, no caso de ser preciso, a cesión de terreos por parte de particulares é necesario para executar as obras. Todo este procedemento é algo que soe retrasar bastante os traballos”, explicou o alcalde, Alejandro Lorenzo, “Ademais ao dispoñer dos proxectos e a documentación necesaria preparada podemos optar de maneira case inmediata ás diferentes subvencións ou axudas que se oferten”.
 
Trátase pois de dar unha resposta máis áxil e eficaz a este problema que arrastra O Porriño dende hai anos e que é, sen dúbida, unha das maiores necesidades que presentan as súas parroquias. “Traballamos para avanzar da maneira máis rápida e eficaz cara o saneamento integral do municipio”, concluíu o rexedor, “Este foi sempre un dos nosos principais compromisos e o será ata que consigamos que todas as vivendas do Porriño estean conectadas á rede de saneamento”.
 
Cabe destacar que hai un ano o municipio tiña pendentes de execución obras de saneamento por valor de 14 millóns de euros e na actualidade restan 11 millóns.
03/08/2023 in Alcaldía