Alcaldía

A Escola Municipal de Música abre prazo para formalizar matrícula

As clases darán comezo o xoves 26 de outubro nas instalacións do Centro Cívico

A Escola Municipal de Música do Porriño abre o prazo de matriculación. Desde o luns 23 ao mércores 25 de outubro poderán formalizarse as matrículas e reservas dos horarios nas instalacións da Escola no Centro Cívico, a partir das 16 h. Os días 23 e 24 están destinados ao antigo alumnado con preinscrición e o día 25 para o novo alumnado con preinscrición.

As listaxes co nome, día e hora dos alumnos e alumnas preinscritos expoñerase na porta do Centro Cultural Municipal e da Escola Municipal de Música dende o venres día 20.

O alumnado sen preinscrición poderá matricularse a partir das 19 h do mércores 25, sempre e cando queden prazas disponibles.

A Escola Municipal de Música do Porriño oferta: música e movemento para nenos dende os 4 anos, linguaxe musical para todas as idades e especialidades instrumentais de violín, viola, violoncello, óboe, frauta traveseira, clarinete, saxofón, fagot, trompa, trompeta, trombón, bombardino, tuba, gaita, canto, piano, guitarra, percusión e percusión tradicional. Así tamén, conta con diversas agrupacións como a coral infantil, coral polifónica, grupo de música tradicional, orquestra de corda, banda; e, desde este ano, tamén se impartirá banda infantil.

20/10/2023 in Alcaldía, Educación e tecnoloxía

O obradoiro de emprego “Porremprego Cualifica II” formará a 20 persoas en dúas especialidades con moita demanda

O Concello do Porriño pon en marcha unha segunda edición do seu obradoiro de emprego “Porremprego Cualifica”. Para a súa posta en marcha, a Xunta de Galicia concedeu á entidade local unha subvención de 561.046,6 euros, aos que se sumarán outros 25.000 euros de achega municipal.
 
Serán un total de 20 persoas desempregadas as que se beneficien desta iniciativa, participando neste programa dual de formación e emprego, pois ademais de adquirir uns coñecementos teóricos e prácticos, tamén cobrarán polos labores desenvolvidos, todas todos eles centrados na realización de obras ou na prestación de servizos de interese xeral e social.
 
O obradoiro terá unha duración de un ano e impartiranse dúas áreas profesionais: Restauración (con dous certificados de profesionalidade en especialidades de cociña) e Tecnoloxías da xestión da información e comunicación (con dos certificados de profesionalidade en “operacións de grabación de datos e documentos” e a outra en “actividades administrativas na relación co cliente”).
 
Levarase a cabo unha especialidade de servizos de hostalería de cociña destinados aos colectivos máis desfavorecidos, incluíndo servizos de almorzos saudables, xornadas temáticas gastronómicas de portas abertas, participación en eventos e actos diversos.
 
Por outra banda preténdese a modernización dos procesos administrativos do Concello do Porriño mediante aplicación de novas tecnoloxías. Por iso é polo que se leve ou proxecto de especialidade de tecnoloxía da información e comunicación, así como de economía dixital. Esta é unha especialidade con moita demanda por parte das empresas e tamén entre a mocidade á hora de iniciar a súa carreira profesional.
 
“Estes obradoiros combinan dúas accións moi importantes para a veciñanza, por unha parte facilitar o acceso ao mercado laboral de persoas desempregadas coa súa capacitación e por outra axudar a aqueles que o necesitan coa oportunidade de traballar durante un ano” , explicou o alcalde, Alejandro Lorenzo.
 
As persoas interesadas en participar deste obradoiro poden solicitar máis información de maneira presencial nas oficinas de Porremprego, no Multiusos de Torneiros, a través do número de teléfono 986338217 ou ben enviando un email a orientacion@porremprego.org
18/10/2023 in Alcaldía, Emprego e formación

O Porriño reduce nun 35% o gasto no renting do seu parque móbil e incorpora vehículos eléctricos

O Concello do Porriño vén de licitar a renovación do seu parque móbil mediante o sistema de renting empregando criterios de eficiencia enerxética, incorporando dous vehículos eléctricos, e de aforro do gasto público, reducindo o gasto en catro anos en máis de 216.000 euros pese a que o prezo de mercado presenta un considerable incremento.

Como vén defendendo Lorenzo dende que foi investido alcalde “hai que facer un uso responsable dos recursos públicos e axustar o gasto”. De aí que foran devoltos varios vehículos recollidos na anterior licitación e substituídos por coches utilitarios, mantendo o mesmo criterio nesta contratación.

Cabe destacar que os vehículos que conformaban o parque móbil foron vendidos no ano 2020 cando se fixo o primeiro contrato de renting, polo que neste momento non se dispón de coches en propiedade. “A intención deste goberno é ir adquirindo vehículos para consolidar o parque municipal e reducir deste modo e paulatinamente os que se dispoñen a través do sistema de renting”, explicou o rexedor, “Deste xeito resulta viable”.

O contrato ten unha duración de un ano prorrogable en un ano -sendo posibles ata tres prórrogas- e un orzamento anual de 102.656,4 euros, o que supón un aforro do 35% respecto do anterior. Así, o precio por vehículo na licitación do 2019 oscilaba entre os 350 e os 850 euros, e na presente acótase de 300 a 350 euros, excepto en tres furgonetas de 390 euros.

A presente licitación inclúe a dotación de 18 furgonetas e 4 vehículos que se destinarán aos diferentes departamentos municipais. Serán concretamente 7 furgonetas pechadas diesel de dúas prazas e cilindrada de 1450 cc ou superior para as áreas de Vías e Obras, Parques e xardíns e Deportes; 8 furgonetas combi diesel de cinco prazas e cilindrada 1.450 cc ou superior para as áreas de Vías e Obras, Parques e Xardíns, Urbanismo, Notificador e Deportes; 2 vehículos de catro prazas mínimo motor mínimo 1200 e Etiqueta CERO para Servizos Sociais e Notificador e 2 coches de 5 prazas motor mínimo 1300 e Etiqueta ECO para Servizos Xerais.

Cabe destacar, que o lote que inclúe as 8 furgonetas combi quedou deserto na licitación pese a contemplar vehículos de segunda man, polo que se sacará de novo a licitación ampliando a marxe de quilometraxe.

18/10/2023 in Alcaldía

Segunda xornada de restauración ambiental no río Couso

Este sábado 14 de outubro continúa a actividade de restauración ambiental no río Couso. Será a segunda das tres xornadas organizadas por Verdegaia en colaboración coa Oficina de Voluntariado do Concello do Porriño.

Tal e como relatan dende a asociación ecoloxista, a primeira intervención foi un éxito de participación e de traballo. Nun ambiente de inmellorable convivencia e coa participación de algúns cativos, os 13 participantes puideron retirar unha grande cantidade de lixo na que sorprendeu a cantidade de zapatos e incluso un parabrisas. Tamén comezaron coa eliminación de especies invasoras como o bambú e a tintureira, algo que permitirá á vexetación autóctona desenvolverse correctamente.

Aínda queda moito lixo e moitas invasoras para retirar ata conseguir restaurar o río Couso, polo que vos animamos a que vos sumedes este sábado na segunda xornada.

Programación

A actividade de limpeza e eliminación de especias invasoras no río couso consta de tres xornadas, todas elas en horario de 11 a 13 h, os sábados 30 de setembro, 14 de outubro e 28 de outubro. Nelas, despois dunha breve charla explicando os obxectivos da actividade, repartiranse luvas e ferramentas entre os participantes. Non é imprescindible pero se podedes levade botas de auga.

A participación é gratuíta pero é necesaria a inscrición previa en vigo@verdegaia.org ou no 691657039.

O punto de encontro será na rúa Leandro Diz, 5 (ao lado do paso inferior da vía do tren).

13/10/2023 in Alcaldía, Medio Ambiente, Mocidade

A Escola Municipal de Música iniciará este curso nas súas instalacións orixinais, no Centro Cívico

A Escola Municipal de Música iniciará o curso 23-24 nas que sempre foron as súas instalacións no centro cívico, na Avenida Domingo Bueno. Así o demandaba a comunidade educativa da Escola dende que, hai tres anos, se reubicou nas aulas do multiusos de Torneiros.

“O multiusos non é un lugar apropiado para a Escola de Música xa que non ofrece as características necesarias para impartir formación musical, non está acondicionado e no inverno as condicións non son boas e ademais, impide que se destine ao seu uso que son os cursos de formación. Por iso urxe que volva ás súas instalacións”, explicou o alcalde, Alejandro Lorenzo.

A tal fin, o Concello do Porriño abrirá unha nova aula de estudio na rúa Antonio Palacios que permitirá desaloxar as instalacións que agora ocupa no centro cívico e devolver a escola á súa ubicación orixinal.

Abrirá as súas portas este mes, unha vez adxudicada a xestión da mesma, así como o mantemento da banda de música e do coro, que se atopa na última fase de licitación.

A oferta da Escola Municipal de Música do Porriño é ampla, incluíndo música e movemento para nenas e nenos dende os 4 anos, linguaxe musical para todas as idades e as especialidades de violín, viola, violonchelo, percusión, guitarra, piano, canto, gaita, clarinete, frauta traveseira, saxofón, oboe, fagot, trompa, trompeta, bombardino, trombón, tuba e percusión tradicional.

Tamén conta con agrupacións como a coral infantil, a coral polifónica, o grupo de música tradicional, a orquestra de corda e a banda.

10/10/2023 in Alcaldía

Un menú personalizado con produto local e de tempada para máis de 330 estudantes do CEIP Antonio Palacios

A Rede EcoComedores de Eu Rural desembarcou no Porriño para dar a probar os seus menús saudables á rapazada porriñesa. A presidenta de Eu Rural, Sandra González; o alcalde do Porriño, Alejandro Lorenzo; e as concelleiras de Educación e Turismo, Carolina González e Vanessa Ucha, visitaron o comedor do CEIP Plurilingüe Antonio Palacios, no que durante toda a semana pasada cativos e cativas degustaron un menú especialmente deseñado ao abeiro do proxecto con produto local, de tempada e ecolóxico.

Durante unha semana, os máis de 330 rapaces e rapazas que acoden ao comedor escolar deste centro educativo porriñés puideron probar un menú elaborado con produtos servidos por empresas provedoras do territorio de Eu Rural. Así, o luns comezaban cunha ensalada de tomate e revolto de ovo con espinacas; o martes degustaron arroz 3 delicias e polo guisado con verduras; o mércores foi a quenda de ensalada de garavanzos e fideuá de verduras; o xoves houbo ensalada de pasta de entrante e pescada en salsa verde de prato; e o venres rematou con brócoli gratinado con patacas guisadas con tenreira. De sobremesa houbo todos os días froita de tempada, agás o xoves que foi acompañada de requeixo ou queixo fresco.

Durante a visita, Sandra González destacou “a importancia de proporcionar unha alimentación equilibrada aos nosos nenos e nenas dende unha idade temperá, porque ensinarlles a comer ben dende pequenos e pequenas, inculcando hábitos alimenticios sans beneficiará a súa saúde ao longo de toda a súa vida. Cremos que este proxecto contribuirá de xeito significativo ao benestar da nosa rapazada e á promoción dos e das empresas produtoras locais”.

Pola súa banda, o alcalde do Porriño, Alejandro Lorenzo, amosou o orgullo do Concello por colaborar estreitamente no proxecto Rede EcoComedores. “Queremos mellorar a calidade de vida dos nosos veciños e veciñas en todos os aspectos e a alimentación saudable é un piar fundamental deste compromiso. Traballar da man cos centros escolares e apoiar iniciativas que promoven unha dieta equilibrada e o consumo de produtos locais e de tempada é esencial para construír un futuro máis sostible”, recalcou o rexedor.

Todos os produtos empregados para a elaboración dos menús están a ser servidos por empresas provedoras do territorio de Eu Rural. Así, por exemplo, o pan é do Porriño; a carne do Suído de Fornelos de Montes dun gandeiro con carnicería propia; o pito ecolóxico e o queixo de Redondela; os cereais integrais, o arroz e as legumes da Guarda; a horta e a froita do Rosal e o peixe de Mos. 

A Rede EcoComedores é un proxecto de cooperación que busca tecer unha rede para asesorar, promover e formar ao persoal de cociña e responsables dos comedores escolares na elaboración de menús equilibrados e saudables que inclúan produto local, de tempada e ecolóxico. Coordinado polo grupo de desenvolvemento local Mariñas-Betanzos, nesta iniciativa participan Eu Rural e outros oito GDR: Seitura 22, Asociación Ulla-Tambre-Mandeo, Asociación Desenvolvemento Comarcal Terras de Miranda, Asociación de Desenvolvemento Comarcal da Terra Chá, Asociación Terras de Lugo, Asociación Montes e Vales Orientais, GDR Limia-Arnoia e Asociación Condado-Paradanta. Conta tamén coa participación de Gadisa e a Axencia Galega de Servizos Sociais (AGSS) como entidades colaboradoras,

O proxecto está cofinanciado nun 90% pola Axencia Galega de Desenvolvemento Rural da Xunta de Galicia, o Ministerio de Agricultura, Pesca e Alimentación e o Fondo Europeo Agrícola de Desenvolvemento Rural a través da submedida LEADER 19.3 Cooperación, do Programa de Desenvolvemento Rural de Galicia 2014-2020, en un 10% polas entidades colaboradoras do proxecto.

09/10/2023 in Alcaldía, Educación e tecnoloxía, Turismo

A praza de Sol converterase nun espazo máis amable e inclusivo

A mellora da calidade dos espazos públicos vai estendéndose no Porriño. Con varios proxectos de humanización en execución no centro urbano, como o do parque do Campo da Feira ou as rúas Buenos Aires e Progreso, o Concello do Porriño anunciou hoxe a mellora da impermeabilización e renovación da praza pública interior da urbanización Sol.

“Falamos dunha actuación moi necesaria e urxente coa que queremos emendar os problemas de impermeabilización desta praza que están a causar importantes filtracións aos garaxes inferiores”, explicou o alcalde, Alejandro Lorenzo.

O rexedor engadiu que ademais “acondicionarase totalmente este concorrido espazo cun novo deseño actualizado que se axuste ás necesidades que presenta, incluíndo zonas axardinadas e arboradas, mellorando as zonas de xogo infantil e renovando toda a iluminación, pavimento e mobiliario urbano. En definitiva facer desta praza un espazo máis amable e inclusivo”.

E é que estamos ante un dos parques máis concorridos do municipio ao situarse nunha das zonas máis habitadas do centro urbano. A praza, cunha superficie de máis de 3.700 m2, conecta as rúas Antonio Palacios e Pinar, polo que son moitos os peóns que atravesan a praza diariamente. As zonas de parque infantil foron reparadas recentemente e na actualidade contan con céspede artificial e xogos infantís en perfecto estado polo que o seu uso tense incrementado.

“Ao tratarse dun espazo amplo e ben situado cada día fan uso del moitos cidadáns, que gozan dos parques infantís e as terrazas dos locais de hostalería, explicou o rexedor, Queremos potenciar as características desta praza para mellorala e facela máis accesible”.

Un espazo máis aberto

Eliminaranse os parterres vexetais, que non contribúen a biodiversidade e están a delimitar excesivamente o espazo e dificulta a circulación dos usuarios. Así xerarase un espazo máis aberto con maiores posibilidades de uso. Ademais xeraranse dúas zonas cubertas que permitan distribuír as terrazas de hostalería e tamén cubrirán parcialmente as zonas de xogo infantil, protexéndoas do sol e das primeiras choivas.

Renovarase o pavimento, dispoñendo sistemas de impermeabilización, e tamén o sistema de iluminación.

09/10/2023 in Alcaldía, Urbanismo, comercio e industria

Pablo Dapena súmase á I Carreira de Empresas, que xa supera os 1200 inscritos

O Campión do Mundo de Triatlón Larga Distancia, Pablo Dapena, será un dos participantes da primeira edición da Carreira de Empresas de Galicia que se disputará este domingo 8 de outubro no Porriño.
 
O triatleta pontevedrés levará o Dorsal 1 da proba 10K en recoñecemento á súa traxectoria deportiva e como agradecemento á súa disposición a colaborar neste evento, que non só se presenta cun alto nivel deportivo senón tamén solidario. E é que a proba, organizada polo Interrunning Club , en colaboración co Concello do Porriño e LaserGalicia, ten como obxectivo recadar fondos para Asociación Bicos de Papel , destinando o 100% da inscrición a esta asociación de axuda aos nenos e nenas de oncoloxía do Hospital Álvaro Cunqueiro.
 
A participación superou todas as expectativas e, a tres días de pechar prazo, alcanza os 1500 participantes nas súas probas. O alto índice de inscricións, levou á organización a lanzar unha edición especial de 100 dorsais máis para as probas de 5K e 10K que sairán á venta mañá e poderán adquirirse ata agotar existencias.
 
Neste peculiar evento poderán participar traballadores por conta allea (sempre que se inscriban como equipo de ata 4 compoñentes todos da mesma empresa ou ben sexan socios acreditados da mesma), profesionais autónomos ou parados de maneira individual ou atletas ou deportistas individuais. É dicir, non é necesario participar como traballador en equipo, calquera pode facelo!
 
Serán un total de 3 carreiras: unha andaina de 6 km, unha carreira de 5 ou 10 km e unha carreira de 100 metros para os Pitufos. A idade mínima para participar é de 16 anos, excepto na proba dos Pitufos (nados a partir do 1 de xaneiro do 2019). A andaina e a proba de Pitufos son probas non competitivas pero as carreiras 5K e 10K si o son.
 
A inscrición pode formalizarse en https://ccnorte.com
04/10/2023 in Alcaldía, Deportes

O Porriño avanza na mellora das súas instalacións deportivas

O Concello do Porriño continúa traballando para que as súas instalacións deportivas ofrezcan o mellor servizo aos usuarios e aos clubes deportivos que as utilizan.
 
Entre elas, as dos campos de fútbol dos diferentes clubs do municipio nos que se levarán melloras a curto prazo que aumenten o rendemento destas instalación, reforcen a seguridade e permitan unha maior calidade deportiva no seu uso. As primeiras proxectadas, tal e como anunciaron hoxe o alcalde, Alejandro Lorenzo, e o concelleiro de deportes, Abel Estévez, son as que se levarán a cabo nos campos de San Campio en Pontellas e do Lourambal, que usan o CD Pontellas e o Porriño Industrial, respectivamente.
 
En ambas pistas procederase á substitución do actual céspede de herba por articficial. “Debido ás crecentes necesidades de uso faise necesario adecualos e dotalos de céspede artificial para permitir a súa utilización por varios equipos e ter a posibilidade de que se xoguen varios partidos nun mesmo día, cuestión que un campo de herba natural non permite”, explicou o rexedor. En ambos campos de xogo a remodelación farase atendendo aos requisitos definidos pola normativa para garantir as condicións nas que deben desenvolverse a práctica deportiva. “É moi importante que todas e cada unha das instalacións que usas os nosos clubes estén nas mellores condicións, xa que tamén as usas as categorías inferiores, xa o deporte base é unha das nosas apostas”.
03/10/2023 in Alcaldía, Deportes

30 anos de Festa dos Callos no Porriño

O domingo do Recristo, como manda a tradición, a Festa dos Callos do Porriño poñerá o broche de ouro á celebración das festas patronais. A festa gastronómica por excelencia do Porriño chega este ano á súa décimo terceira edición, congregando na vila a milleiros de persoas cada ano.

O alcalde, Alejandro Lorenzo, xunto co presidente de Ahospor representantes de Acipor , a cociñeira Macu Moreno e a que xa se converteu en protagonista destas festas, a porriñesa Juaniña da Cruz, presentaron hoxe esta festa que se celebrará o domingo 1 de outubro. Á presentación acudiron os usuarios e usuarias do centro de día de Navuxil, da unidade asistencial de Afaga e representantes da comunidade educativa que, xunto cos vecinos que se achegaron á praza, disfrutaron dunha degustación de callos.

“Este certame gastronómico é un dos principais reclamos para quen nos visita nestas datas e tamén parte moi importante da nosa cultura, as Festas do Cristo xa non se poden entender sen unha boa tapa de callos para despedilas”, explicou o alcalde, Alejandro Lorenzo, “Estou moi contento de presentar esta edición con todos os que hoxe están aquí, estes porriñesas e porriñesses que tanto nos ensinaron e dos que tanto seguimos a aprender. Eles escribiron a historia deste pobo e desexo de todo corazón que a sigamos a escribir xuntos”. O rexedor agradeceu a “implicación da hostalería local, que fai posible que cada ano agotemos as existencias de callos e sempre nos sorprendan con novas propostas”.

E é que haberá receitas para todos os gustos, como indicou o presidente de AHOSPOR, José Manuel Fernández. “Cada un de nós dalle a este prato o seu toque especial e tedes que vir a probalos todos. E para que ninguén quede sen disfrútalos hai tamén a opción vegana, como a de Macu, que penso que foi a primeira persoa en facer callos veganos”.

Pola súa banda, Macu, que conta con miles de seguidores nas súas redes sociais, nas que comparte receitas de cociña vegana, convidou a todo mundo a achegarse este domingo ao Porriño e disfrutar desta festa.

O humorista Isi será o encargado de dar o pistoletazo de saída á xornada ás 12:30h na Praza Arquitecto Antonio Palacios.

O custo da ración unifícase a 7 euros por acordo dos organizadores e dos establecementos de hostalería e este prezo inclúe unha ración de callos, pan e cazola.

📌 ESTABLECEMENTOS HOSTALEIROS PARTICIPANTES

A Francachela, A Vinoteca, Amaquía, Argentino 2, Bar A Guía, Bolboreta Café, Cafetería CRC, Casa di Mili, Celtiña, Churrasquería Pontenova, Cólleo con pinzas, El alambre del abuelo, El Pincho, El cincuentaicinco, Galibar, Hamburguesería Fran, Hotel Parque, La Bendecida, La Bici, La Cueva, Liceum, Maracaibo, Nómadas, Origen Café, Paso a Nivel, Restaurante Val do Louriña, Scala, The Classic Coffe Beer, Treinta y Tau, Xantar de Pepa, Zentral.

28/09/2023 in Alcaldía, Cultura e festas