Alcaldía

17 novas incorporacións reforzan o persoal municipal

O Concello do Porriño incorporou hoxe a 17 traballadoras/es que reforzarán equipos en diferentes servizos municipais.

 

O Departamento de Vías e Obras conta desde hoxe con cinco incorporacións: un oficial 1ª de carpintería, un oficial 1ª de soldadura, un oficial 1ª de albanelería e dous peóns de obra pública. Pola súa banda, o Departamento de parques, xardíns e limpeza conta con seis novos peóns forestais. E para departamentos e instalacións municipais contase con tres conserxes, unha publicista e un analista de xestión e organización ou estatística.

 

Todas estas contratacións supuxeron unha inversión de 292.000 euros, dos cales 211.000 foron a cargo do Plan + Provincia da Deputación de Pontevedra e 81.000 euros de aportación municipal.  

 

O alcalde, Alejandro Lorenzo, e a concelleira de Emprego e Formación, Rosario Costas, déronlle hoxe a benvida ao seu novo posto de traballo.

 

Ambos representantes municipais destacaron a oportunidade que estas incorporacións supoñen para activar o emprego e tamén para poder dar un mellor servizo á veciñanza.  “O voso traballo é moi necesario e estamos encantados de que formedes parte do noso equipo”.

 

24/04/2024 in Alcaldía, Emprego e formación

Retomamos a restauración ambiental do río Couso

Retomamos xunto con Verdegaia os traballos realizados o ano pasado encamiñados a recuperar o estado natural do treito final do río Couso, tamén coñecido como Fonteliño, mesmo ao carón do paseo do Louro no Porriño.

Ao longo de tres xornadas, 4 de maio, 1 de xuño e 15 de xuño, recollerase o lixo acumulado, eliminaranse algunhas especies invasoras e acompañarase o crecemento das arboriñas que plantaron durante o inverno.

Esta actividade procura tamén, ademais do impacto directo sobre o medio, visibilizar as intervencións de restauración de espazos naturais, que moitas veces se realizan en zonas afastadas e non se observan por parte do público. Programandoa nunha zona que moitas persoas de toda a comarca utilizan para pasear e facer deporte demostraremos como a recuperación de espazos naturais moitas veces é posible contando simplemento co traballo voluntario e comunitario dos propios veciños.

A actividade constará de tres xornadas, todas elas en horario de 11 a 13 h, os sábados 4 de maio, 1 de xuño e 15 de xuño. Nas mesmas, despois dunha breve charla explicando os obxectivos da actividade, repartiranse luvas e ferramentas entre as persoas participantes para proceder á retirada do lixo e de especies invasoras que impiden o crecemento das especies autóctonas.

A inscrición é gratuíta e pode formalizarse a través do email omix@oporrino.org ou chamando ao 691 657 039. O punto de encontro será como sempre na rúa Leandro DIz, número 5 (ao lado do paso inferior da liña do tren).

24/04/2024 in Alcaldía, Medio Ambiente

Torneiros acollerá a III Xuntanza Literaria Escolar

A concellería de Educación e Normalización Lingüística e a OMIX do Concello do Porriño continúa apostando por proxectos innovadores para difundir a lingua e cultura galegas entre a nosa comunidade educativa.

Tras o éxito das pasadas edicións, a celebración da III Xuntanza Literaria dará lugar a unha xornada de convivencia e fomento e animación á lectura, favorecendo a inclusión coa participación dos centros educativos do Porriño, ACEESCA, o Centro de Día de Torneiros e a Asociación AFAGA. Intentaremos facelo dun xeito lúdico e utilizando a contorna natural que nos ofrece a parroquia de Torneiros.

O programa para este día está organizado polos/as coordinadores/as das bibliotecas dos centros escolares, coas que o Concello do Porriño colabora.

Os centros participantes nesta III Xuntanza Literaria son o CPR Santo Tomás, IES Pino Manso, Aceesca, CEIPP Fernández López, CPR Hermanos Quiroga, CEIPP Antonio Palacios, IES Ribeira do Louro, CEIP da Cruz-Budiño, CEIPP de Atios, o Centro de Día de Torneiros, a Asociación Afaga e o CEIPP da Ribeira.

O alumnado distribuirase por grupos nos que, ademais da lectura individual, compartirán lecturas grupais de fragmentos de obras galegas. Estas expresións literarias reforzaranse tamén, coa música (outra forma de expresión literaria) que serve para expresar determinados sentimentos e emocións dunha forma máis lúdica e divertida.

Será da man, outro ano máis, de Xoán Curiel, con dous artistas máis en escena, que ofrecerán un concerto interactivo de 50 minutos ao estilo dunha representación teatral; no que pequenos, mozos e maiores, non serán simples espectadores/as senón que participarán desta actividade lúdica e cultural mediante coros e xogos e sempre empregando a lingua galega como ferramenta de traballo.

24/04/2024 in Alcaldía, Educación e tecnoloxía

Aberto o prazo de solicitude das axudas para a rehabilitación de vivendas en Torneiros

O BOP publicou o pasado venres, 19 de abril, o extracto da resolución da alcaldía pola que se aproban as Bases e convocatoria para a concesión de axudas en materia de rehabilitación residencial e vivenda social no entorno residencial de rehabilitación programado de Torneiros, abrindose así o prazo para solicitalas. O prazo para requerilas finalizará o 31 de xaneiro de 2026.

Para este proxecto o Concello do Porriño recibiu un millón de euros, no marco do Programa de axudas para a rehabilitación de entornos residenciais a nivel barrio, que se distribuirán en axudas para impulsar medidas de eficiencia enerxética.

Dentro do ámbito delimitado do proxecto, que comprende 945 vivendas en 81 edificios, programouse inicialmente a rehabilitación dun número estimado de 105 vivendas que ocupan 1,38 hectáreas, repartidas en diferentes bloques. Deste millón de euros, preto de 130.000 destinaranse á urbanización e mellora da contorna, que se complementa con outras actuacións que o Concello está a levar a cabo para humanizar a zona, como o acondicionamento de beirarrúas ou a renovación do alumeado público. No marco desta actuación instalaranse 156 lámpadas leds, cunha inversión total de preto de 75.000 euros.

A parte restante será para axudas a particulares e/ou comunidades de propietarios destinadas á mellora de fachadas, mellora de cubertas, incluíndo aquí a eliminación de amianto, e o relevo de xanelas e vidros exteriores, empregando carpintería de pvc e vidro eficiente térmicamente, todo isto co obxectivo de conseguir un aforro enerxético mínimo do 30%.

O importe das subvencións a particulares dependerá do grao de eficiencia enerxética que se alcance coas obras executadas, que pode ser do 40%, do 65% ou do 80% do orzamento, incluso do 100% cando se identifique un caso de vulnerabilidade económica.

24/04/2024 in Alcaldía, Urbanismo, comercio e industria

Cáritas A Louriña organiza a súa I Andaina Solidaria

O sábado 20 de abril, ás 17 h, o grupo de Cáritas do arciprestazgo da Louriña organiza a primeira edición da súa “Andaina solidaria”, co obxectivo de recaudar fondos para poder continuar desenvolvendo os prexentos que levan a cabo desde esta organización na bisbarra. A iniciativa conta coa colaboración dos concellos do Porriño, Mos e Salceda de Caselas, así como da Asociación de Hostaleiros do Porriño, Pan do Porriño e Dj Pitty.

A andaina presentouse hoxe aos pés da Igrexa de Santa María do Porriño, que será punto de partida este sábado. O alcalde do Porriño, Alejandro Lorenzo, a alcaldesa de Mos, Nidia Arévalo, e a alcaldesa de Salceda de Caselas, Loli Castiñeira, presentaron a actividade xunto cos representantes de Cáritas Parroquial, Pepi Rodriguez, Sugui e Beatriz Correa, hostaleiros e o Dj Pitty, que animará o fin da camiñata.

Esta ruta, que ten un nivel medio de dificultade comezará na igrexa de Santa María do Porriño, continuarán pola senda do Louro, Fonte do Cristo, capela das Angustias, Malladoura e Aloques, rematando na capela do Cristo, onde os/as participantes repoñerán forzas cunha chocolatada e roscas.

A inscrición ten un custo e 5 euros, para todas as persoas maiores de 14 anos – os menores desta idade participan gratis. Tamén se aceptan donativos a través do número de Bizum 08323, baixo o concepto “Andaina”. As persoas interesadas en participar poden inscribirse ou solicitar máis información n o número de teléfono 662 455 815.

Os representantes municipais animaron a toda a veciñanza a participar e sumarse a esta acción solidaria camiñando por unha boa causa.

Cáritas parroquiais do Val da Louriña

Cáritas Parroquian atende na Louriña a 70 familias. Co de centrar nas persoas a atención, recentemente cambiou o seu tradicional modelo de axuda social de doazón de alimentos e roupa por tarxetas económicas. Tal e como indican desta maneira dignifican o proceso de atención e responden mellor ás necesidades dos seus usuarios/as.

Ademais ofrecen nas súas parroquias do Porriño, Mos e Salceda de Caselas obradoiros de formación e búsqueda de emprego, atención a maiores, obradoiros de costura, e acollida e acompañamento como acción central.

18/04/2024 in Alcaldía, Servizos sociais

O Kiwi Atlántico-Creaga presenta o seu equipo para esta tempada

O Club Master Louriña presentou hoxe ao seu equipo feminino, o Kiwi Atlántico-Craega. Ao acto de presentación acudiron o concelleiro de Deportes, Abel Estévez, o presidente do Club Master Louriña, Juan José Álvarez, a directora nacional do equipo, Sonia Pariente, e o responsable do principal patrocinador Kiwi Atlántico, Rafa Pérez

O Kiwi Atlántico-Louriña naceu en pleno ano da pandemia, 2020 e nestes anos foi quen facerse un oco no pelotón nacional e, sobre todo, no galego. Na actualidade, o equipo disputa o ranking Nacional, destacando a Copa de España, ocupando un noveno posto e coa vista posta a rematar o ano no top 10.

Destacan os reforzos da actual campioa Uruguai yeBrasil Sub 23, Luciana Wynants, e a campioa brasileña Sub 23, Lara Gabriel nunha clara aposta polos novos talentos. Renovan a campiona galega de Élite de ruta, María Coya e a porriñesa Carla Guisande, Medalla de bronce nos europeos de Triatlón.

O presidente do Master Louriña quixo destacar a evolución do equipo “desde a nosa humilde orixe ata hoxe, que disputamos contra os grandes e nos convertemos nun importante trampolín para que moitas mulleres dean o salto ao ciclismo profesional. Como é por exemplo o caso de Allison Mugral, que tras pasar polo Kiwi Atlántico-Craega hoxe é profesional en Francia”.

Pola súa banda, o concelleiro de Deportes reiterou “o apoio do Concello ao deporte feminino e a este equipo en concreto. O Master Louriña é un club que xoga un papel importante no no Porriño, organizando eventos con especial esmero que colleitan éxitos de participación e público. Unha entidade que non para de crecer e que nos permite ter no Porriño a ciclista de primeiro nivel, á que lle desexo unha tempada de éxitos”.

15/04/2024 in Alcaldía, Deportes

Volve “Do libro ás letras”

O club de lectura da Biblioteca Municipal do Porriño volve celebrar este ano o Día do Libro e o Día das Letras Galegas dun xeito moi especial: con varias actividades en aberto que enlazarán as dúas festividades, a do 23 de abril e a do 17 de maio, nun programa que leva como título Do Libro ás Letras.

Calquera persoa interesada está convidada a unirse ao club de lectura os luns 15 e 29 de abril e 13 de maio na biblioteca, en horario de 18.00 a 19.30 horas, nuns encontros especiais que porán en valor tanto os libros como a riqueza do mundo das letras.

Neles, “as persoas asistentes poderán participar e compartir o amor polos libros a través de lecturas conxuntas, recomendacións, xogos e retos literarios, así como coloquios arredor de anécdotas e inquedanzas relacionadas co mundo das letras, e achegaranse tamén á figura e á obra da autora homenaxeada este ano no Día das Letras Galegas, Luísa Villalta, explicou o alcalde, Alejandro Lorenzo, que hoxe se compartiu un ratiño co Club de Lectura.

O club de lectura volve celebrar en 2024 este programa especial de actividades, que complementa os seus encontros regulares e que se abre a calquera persoa interesada en participar nel. Do Libro ás Letras está organizado pola Biblioteca Municipal e a coordinadora do club, Ana Abad de Larriva, en colaboración coas participantes, e tivo xa moi boa acollida en anos anteriores.

15/04/2024 in Alcaldía, Cultura e festas

Nova edición do curso de monitor de tempo libre

A Concellería de Xuventude do Porriño, a través da OMIX, presenta unha nova edición do curso oficial de Monitor/a de Actividades de Tempo Libre, a desenvolver en seis fins de semana de maio e xuño no Centro Cultural Municipal do Porriño, impartido pola Escola de Tempo Libre Scolé e a cooperativa Avada, especializada no sector.

Un primeiro curso desenvolveuse nos meses de marzo e abril nas instalacións municipais, pero debido á gran acollida e sobretodo ao elevado número de persoas que quedaron en lista de espera, o Concello do Porriño agarda poder respostar ás inquedanzas formativas e laborais da súa mocidade.

Os contidos do curso impartiranse seguindo unha formación mixta que combina a docencia presencial e en liña. Trátase dun curso de 200 horas, combinando a formación presencial de 125 h coa telemática, neste caso de 75 h, e cunha fase de prácticas obligatorias de 150 horas, a realizar unha vez rematado o curso.

O alumnado que remate o curso obterá o título oficial de Monitor/a de Actividades de Tempo Libre e aprenderá a dirixir actividades para grupos de persoas menores ou maiores, e así dinamizar, coidar, entreter e sobre todo educar mediante as súas accións.

Este curso é requisito imprescindible para traballar en campamentos, conciliacións, granxas escola, ludotecas, parques de aventuras, obradoiros, extraescolares, centros socioculturais, establecementos turísticos…

Desde hoxe ata o próximo 1 de maio poderanse realizar as inscricións (daráse prioridade ás persoas empadroadas no Concello do Porriño ata o día 25 de abril) a través da seguinte ligazón

https://forms.gle/s8aWwSZZA3DcS2ei7

11/04/2024 in Alcaldía, Mocidade

O Porriño acolle a XXXVI Feira Apícola Rías Baixas

A Feira Apícola Rías Baixas chega á súa trixésimo sexta edición con máis forza ca nunca da man dun nutrido programa de actividades dirixidas tanto aos maiores como aos cativos da casa, que nos convidan a vivir unha doce e diferente fin de semana no Porriño.

Organizada polo Concello do Porriño, xunto coa Agrupación Apícola de Galicia e a Asociación de Apicultores da Provincia de Pontevedra, este evento constitúe un importante encontro cos mellores profesionais do sector e unha cita indispensable para todas aquelas persoas versadas ou afeccionadas ao interesante mundo das abellas.

A apertura da feira terá lugar este sábado 13 de abril, ás 10 h, cun programa cheo de actividades que se estenderán ata última hora da tarde. As Xornadas Técnicas Internacionais de Apicultura emprazaranse nunha carpa situada no parque do Cristo, entre as 10 h e as 19:30 h. Case o mesmo horario no que permanecerá activo o mercado de artesanía Bee Happy Market e a Feira do Mel, concretamente de 10:30 h a 20 h. As catas, degustacións e obradoiros infantís terán lugar tanto en horario de mañá coma de tarde. A asistencia a calquera das actividades é totalmente de balde, pero contan con aforo limitado.

Mentres, a ruta hostaleira convídanos a saborear diferentes preparacións e cócteis os días 12 e 13, ao longo de todo o día, nos locais do municipio.

A trixésimo sexta edición desta feira foi presentada hoxe no Concello do Porriño polo alcalde, Alejandro Lorenzo, as concelleiras de Mercados e Turismo, Antía Carrera e Vanessa Ucha, respectivamente, o presidente da Agrupación Apícola de Galicia, José María Seijo, a presidenta da IXP Mel de Galicia, Ester Ordóñez, e Diego Collazo en representación da Asociación de Apicultores da provincia de Pontevedra.

11/04/2024 in Alcaldía, Cultura e festas