Novas - Páxina 81 de 270

Reunión de traballo para establecer os protocolos de seguridade para o II Festival “Sons da Canteira”

A concelleira de Festas, Cami Moreira presidiu esta mañá unha reunión de traballo para establecer os protocolos de seguridade para o II Festival “Sons da Canteira”, evento organizado polo Concello do Porriño, que volverá o próximo 28 de agosto á canteira en proceso de restauración de Vilafría.
Xunto coa concelleira de Seguridade, Lourdes Moure, asistiron por parte do Concello, el oficial xefe en funcións da Policía Local e o responsable da agrupación de Protección Civil. Tamén participaron mandos da Garda Civil e os responsables da empresa promotora do espectáculo, “Doppler Gestión Cultural”.
“Sons da Canteira establece estritos protocolos de seguridade e distanciamento social para un aforo reducido de persoas ao aire libre. O festival ten, ademais, persoal dedicado en exclusiva á limpeza e xestión de residuos.
Os protocolos de seguridade, coa experiencia acadada na edición de 2020, son basicamente os mesmos cos engadidos que require o aumento de aforo que haberá este ano. En 2020 houbo 500 espectadores e para este ano haberá 600.

Para facilitar o acceso á Canteira de Vilafría, a organización porá a disposición autobuses gratuítos con saída dende O Porriño (ás 17h00, 17h30 e 18h00). Á hora de facer a compra, cada persoa poderá escoller o horario de autobús que mellor se lle axuste, xa que este será o único xeito de acceder cun vehículo ao recinto do festival. Unha vez no recinto, a pulseira de acceso funcionará tamén como moedeiro para facer todos os pagos pertinentes durante o festival utilizando a tecnoloxía cashless. Do mesmo xeito, o festival implanta nesta edición un servizo de atención en mesa para evitar aglomeracións e desprazamentos durante os concertos.

As entradas para esta edición de Sons da Canteira aínda seguen á venda. Poden mercarse na web sonsdacanteira.gal.
O prezo das entradas é de 24 €/persoa a entrada individual e en parellas, e de 22 €/persoa para grupos de catro e seis asistentes.

O cartel desta edición estará formado polo trap galego, flow costumista o twerking rural de Boyanka Kostova; o pop, disco e trap de Verto; o folklore africano, a electrónica e o dancehall da lisboeta Pongo que ofrecerá en Sons da Canteira o seu único concerto en España; os sons eclécticos de Mounqup, que estreará no festival o seu novo espectáculo de gran formato, “Akelarre AVS Extended Show”; polos sets variados e transversais da DJ Teresa Ferreiro; e polo grupo local de danza e música tradicional Os Penediños de Atios.

09/08/2021 in Cultura e festas, Seguridade

A xunta de voceiros municipais debateu novas propostas de axuda á economía local e futuros convenios coas comunidades de montes

O alcalde accidental, Pedro Pereira presidiu hoxe a reunión da xunta de voceiros municipais que abordou dous asuntos: novas propostas de axudas á economía local e a negociación de convenios coas comunidades de montes.
O concelleiro de Promoción Económica, David Alonso solicitou aos restantes grupos da corporación que fixeran as súas propostas sobre que destino darlle aos cartos sobrantes do fondo de axudas Covid que ao longo deste ano repartiu o Concello entre establecementos de hostalería, comercio, autónomos e micro empresas que as solicitaron. A partida era de 140.000 € dos que se entregaron achegas por importe de 112.280 € polo que a cantidade nos disposta é de preto de 28.000 €.
Acordouse que o concelleiro daralle forma a unha proposta para habilitar unha convocatoria de axudas á que poderán presentarse establecementos, autónomos e micro empresas que non tiveran recibido anteriormente achegas desta liña de axudas ”Porriño Impulsa”.
Por outra banda, Pedro Pereira, en condición de concelleiro de Patrimonio Municipal informou aos voceiros dos grupos da corporación que está a negociar coas comunidades de montes. Trasladoulles un borrador de convenio coa comunidade de montes de Budiño que establece unha cesión de uso dos locais namentres non haxa unha resolución xudicial firme. Pereira Fernández informoulles que tamén está a traballar e negociar outro convenio similar coa comunidade de montes de Atios.

05/08/2021 in Alcaldía, Emprego e formación, Patrimonio Municipal, Urbanismo, comercio e industria

Iniciáronse hoxe a limpeza das fachadas e posterior arranxo da cuberta do Concello

Operarios da empresa “Naturgalia” comezaron hoxe a hidro limpeza das fachadas do Concello, iniciando os traballos polo lateral do edificio consistorial que cara á rúa Antonio Palacios. A previsión é que en sete días laborais a hidro limpeza estea rematada.

Cando seque a pedra, realizarase unha imprimación das fachadas para preservar o edificio, deseñado polo arquitecto Antonio Palacios.

A concelleira responsable de Vías e Obras, Lourdes Moure explicou que elixira estas datas porque “o mes de agosto tradicionalmente hai menos veciñanza en Porriño polas vacacións e deste xeito teremos o edificio do Concello limpo e arranxado para as festas do Cristo, na quincena final de setembro.

A ocupación de vía pública na contorna do Concello deberá terse rematada para o venres que ven, segundo as previsións da adxudicataria dos traballos.

Os traballos de conservación da casa consistorial continuarán ao longo do mes de agosto co arranxo da cuberta para resolver as filtracións que cando chove afectan ao departamento de Servizos Sociais. Na última fase, acometerase a impermeabilización da cuberta e o selado das fiestras, que remataran na primeira quincena de setembro.

05/08/2021 in Vías e obras

Convocada xunta de voceiros municipais para debater novas propostas de axudas á economía local e convenios coas comunidades de montes de Atios e Budiño

O xoves 5 celebrarase xunta de voceiros municipais, convocada ás 12,30 horas, con dous asuntos na orde do día que se comunicou aos grupos políticos da corporación.

Por unha banda trasladase á consideración dos voceiros municipais, a proposta de convenios coas comunidades de montes de Atios e Budiño, negociados polo concelleiro de Patrimonio Municipal, Pedro Pereira.

E por outro lado, por iniciativa do concelleiro de Promoción Económica, David Alonso debateranse novas propostas de axuda á hostalería e outros sectores da economía local cos cartos sobrantes do fondo de axudas Covid, dotado con 140.000 euros que se habilitaron polo Concello para este exercicio. Dese total abonáronse nestes meses trancorridos, 112.280 euros en axudas económicas directas á hostalería, comercio, autónomos e micro empresas que se destinaron polos solicitantes a pagos de alugueres, hipotecas, mercadorías, subministracións e gastos xerais.

De xeito que hai un sobrante de algo máis de 27.000 euros para destinar ás novas propostas de axudas que se traten pola xunta de voceiros municipais.

03/08/2021 in Alcaldía, Emprego e formación, Patrimonio Municipal, Urbanismo, comercio e industria

O programa municipal de inserción laboral “Porriño Accede” acada colocar 42 persoas no primeiro semestre do ano

A Concellería de Emprego que dirixe o concelleiro David Alonso ven de facer balanzo dos resultados acadados no primeiro semestre deste ano polo programa municipal de inserción laboral “Porriño Accede”. Dos 75 usuarios que teñen participado ata xuño nos programas de formación, 42 persoas obtiveron emprego nas dez empresas colaboradoras.
As empresas que están a colaborar co programa municipal “Porriño Accede” son “PSA Citroen”, “Staroil”, “Asientos de Galicia”, “Chousal”, “Megalta”, “Plenoil”, “Fegoblan”, “Zoka”, Valver” e “Narwhall Boats”.
A xuízo do concelleiro “as cifras de ocupación son lixeiramente mellores das obtidas en 2020”. “Coidamos que é debido ao impacto da crise dos micro chips que afecta ao sector da automoción que é o tractor que tira en maior medida do emprego no noso concello”, engadiu David Alonso.
O concelleiro anunciou que en agosto continuarán as formacións con cursos presenciais nas instalacións de “Porremprego” “enfocados aos segmentos con máis demanda de emprego actualmente como son gasolineiras e operarios de almacén”, rematou David Alonso.

02/08/2021 in Emprego e formación

A Piscina Municipal pechada en agosto

Lembramos aos usuarios que a Piscina Municipal do Porriño permanece pechada desde hoxe, luns 2 de agosto e ata o martes 31. A instalación reabrirá o mércores 1 de setembro.
Desde o pasado 1 de xullo, fíxose cargo da explotación da Piscina, a empresa “Soom Management” que foi a gañadora do proceso de licitación que se resolveu en marzo.
Esta empresa, que actualmente leva tamén as piscinas municipais de Marín, Boiro e Cangas, foi a plica máis valorada, cunha oferta anual de 508.000 € e subrogou ao persoal actual, de 24 traballadores, desta instalación.

02/08/2021 in Deportes

A segunda edición do festival Sons da Canteira do Porriño celebrarase o próximo 28 de agosto

A venda de entradas comeza o vindeiro luns 2 de agosto

A segunda edición do festival Sons da Canteira, evento organizado polo Concello do Porriño, volverá o próximo 28 de agosto á canteira en proceso de restauración de Vilafría, no Porriño, para encher de música e proxeccións o seu impactante escenario de pedra. O evento está motivado polo afán de recuperar o territorio e por utilizar para actividades culturais espazos que antano tiñan outro uso.

“Sons da Canteira” é un evento organizado pola Concellería de Cultura do Porriño e producido por Doppler Gestión Cultural.

O cartel desta edición estará formado polo trap galego, flow costumbrista o twerking rural de Boyanka Kostova; o pop, disco e trap de Verto; o folklore africano, a electrónica e o dancehall da lisboeta Pongo que ofrecerá en Sons da Canteira o seu único concerto en España; os sons eclécticos de Mounqup, que estreará no festival o seu novo espectáculo de gran formato, “Akelarre AVS Extended Show”; polos sets variados e transversais da DJ Teresa Ferreiro; e polo grupo local de danza e música tradicional Os Penediños de Atios.

Entradas e accesos

As entradas para esta edición de Sons da Canteira poderán mercarse a partir deste luns 2 de agosto na web sonsdacanteira.gal, tendo un desconto do 25% durante as dúas primeiras horas de venda. Despois disto, o prezo das entradas será de 24 €/persoa a entrada individual e en parellas, e de 22 €/persoa para grupos de catro e seis asistentes.

Para facilitar o acceso á Canteira de Vilafría, a organización porá a disposición dos usuarios e usuarias autobuses gratuítos con saída dende O Porriño (ás 17h00, 17h30 e 18h00). Á hora de facer a compra, cada persoa poderá escoller o horario de autobús que mellor se lle axuste, xa que este será o único xeito de acceder cun vehículo ao recinto do festival. Unha vez no recinto, a pulseira de acceso funcionará tamén como moedeiro para facer todos os pagos pertinentes durante o festival utilizando a tecnoloxía cashless. Do mesmo xeito, o festival implanta nesta edición un servizo de atención en mesa para evitar aglomeracións e desprazamentos durante os concertos.

Sustentabilidade e apoios

Sons da Canteira establece estritos protocolos de seguridade e distanciamento social para un aforo reducido de 500 personas ao aire libre. O festival ten, ademais, persoal dedicado en exclusiva á limpieza e xestión de residuos.

O enclave natural no que se celebra hai un claro protagonista: o granito. Un recurso natural con altos valores de durabilidade, reutilización e reciclabilidade, entre outras características, o que fan del un dos materiais máis sustentables.

Como sustentable quere ser Sons da Canteira, o festival suscríbese dende este ano a unha política que aposta pola cultura galega, pola presenza de artistas femininas, pola colaboración con entidades locais, e pola minimización dos seus impactos ambientais, contribuido así a facer deste entorno un lugar mellor e deste xeito contribuir dende o local a Axenda 2030 de Desenvolvemento Sostible.

As bandas

PONGO

Os ritmos do folclore africano interactúan coa música electrónica. Kuduru e dancehall únense nesta sólido artista lisboeta nacida en Angola que fai vibrar as pistas de baile, recentemente galardoada nos Music Moves Europe Talent Awards a novos talentos europeos. A piques de debutar con Universal, o seu último traballo, Colors, soará no escenario Sons da Canteira.

MOUNQUP

Dinamizadora cultural e creadora de música e videocreación francesa establecida en Galicia, no seu último traballo investiga a comprensión das súas raíces na natureza galega. Premiada a nivel internacional, a artista fai no Sons da Canteira a estrea mundial do seu LP Aquelarre coa primeira produción multidisciplinar de gran formato ‘Akelarre AVS Extended Show’.

BOYANKA KOSTOVA

Fan trap galego, flow costumista e twerking rural. Son o grupo revelación da Nova Canción Galega 2.0. Beben de bandas como Ghostemane, de clásicos galegos como Ana Kiro, Os Resentidos ou Malandrómeda. No 2019 lanzaron o seu primeiro disco e no 2020 fixéronse virais con Os dous de sempre, onde se xuntan trap e muiñeira.

VERTO

Pop, disco e trap compoñen as cancións de Verto. O dúo compostelán arrasa no escenario e en Spotify, con cancións emblemáticas como Oie Gayego ou Algo que non sexa. Debutaron en 2019 con Amolecer e Rebolando x ti. Acaban de presentar a súa versión da famosa Muiñeira de Chantada.

TERESA FERREIRO

Investigadora musical, activista pro-feminista e pro-LGBTQ, harmonizadora de ritmos de diferentes orixes e xéneros, a súa ampla formación como DJ levouna ás pistas dos mellores clubs e festivais culturais.

OS PENEDIÑOS DE ATIOS

Recoñecidos no mundo da danza e da música tradicional, este grupo local do Porriño, que na pasada edición sorprendeu ao público acompañando a Baiuca, volverá subir ao escenario de Sons da Canteira.

Festival Sons da Canteira 2021

30/07/2021 in Cultura e festas

O luns recuperarase a atención presencial nas oficinas do Concello, sen cita previa, agás en Servizos Sociais

A partires do vindeiro luns 2 de agosto, as oficinas do Concello do Porriño recuperarán a atención presencial en todas as dependencias agás no departamento de Servizos Sociais. Nas oficinas de Servizos Sociais manterase un control de aforamento e requirira cita previa para atención, aínda que se simplificará a petición por teléfono ou en persoa.

A resolución adoptouse este mediodía na reunión da Comisión Municipal de Seguimento da Covid, que implementou o acordo que tomou o pleno da corporación local na sesión do pasado mércores.

Na reunión da Comisión de Seguimento da Covid que presidiu a alcaldesa, Eva García de la Torre comentáronse as medidas que a Xunta de Galicia aplicará no Porriño, nomeadamente no sector da hostalería, ao atoparse este concello no nivel alto de restricións.

A Comisión decidiu non aplicar medidas adicionais agás o incremento da vixilancia a cargo da Policía Local no mercado ambulante dos martes.

Ao termo da reunión a alcaldesa Eva García declarou o seu malestar porque “de novo sexa o sector da hostalería o que ten que cargar coa maioría das restricións”.

30/07/2021 in Alcaldía, Seguridade, Servizos sociais, Urbanismo, comercio e industria

Convocada Comisión Municipal de Seguimento da Covid para este venres 30

A alcaldesa Eva García convocou reunión da Comisión Municipal de Seguimento da Covid que vai ter lugar este venres 30, ás 12 horas, de xeito `presencial, no Concello. Na devandita Comisión participan todos os grupos políticos da corporación porriñesa.

A convocatoria responde ao anuncio realizado pola Xunta de Galicia de que O Porriño entrará en maiores restricións, nivel alto, a partires das 00:00 do sábado 31. O Porriño ten hoxe unha taxa de 736, con 146 casos en 14 días e 87 casos en 7 días.

A alcaldesa lamentou que “de novo, sexa penalizada a hostalería porriñesa coas medidas anunciadas pola Xunta de Galicia”.

En consonancia, a alcaldesa Eva Garcia anunciou que a comisión municipal de seguimento da Covid determinará actuacións a seguir cara á estrea de novas restricións na hostalería local.

Por outra banda, a Comisión de Seguimento implementará o acordo acadado pola corporación no pleno do mércores, a partires dunha moción presentada polo grupo EU SON e apoiada polos restantes grupos políticos, para recuperar a atención presencial nas oficinas do Concello e prescindir da obrigatoriedade da cita previa para diversos trámites.

29/07/2021 in Alcaldía

A corporación aprobou por unanimidade o gasto de máis de 700.000€ en asfaltados e saneamentos; duplicar a achega ao Festival de Cans e retomar a atención presencial no Concello

A corporación municipal do Porriño aprobou por unanimidade dispoñer o gasto de 729.478 euros para obras de asfaltado e saneamento de vías municipais, segundo acordou o pleno ordinario de xullo celebrado onte. Trátase da primeira fase dun plan de actuación plurianual máis ambicioso valorado en máis de 2 millóns de euros.

Este primeiro paquete de actuacións financiase con remanente de tesourería. Foi negociado pola concelleira de Vías e Obras, Lourdes Moure cos demais grupos políticos da corporación local. A concelleira agradeceu nomeadamente ao Partido Popular e ao seu voceiro que “sexamos quen de chegar a acordos entre forzas políticas tan antagónicas” namentres Alejandro Lorenzo agradeceu á concelleira de Vías e Obras que “accedera a introducir as nosas propostas”.

BNG e EU SON votaron a favor, aínda que a voceira de Esquerda Unida, Patricia Sío expresou a súa discrepancia por non ter negociado a través da xunta de voceiros, en lugar de reunións bilaterais.

Ao remate da votación, a alcaldesa Eva García felicitou a concelleira de Vías e Obras polo consenso acadado.

Tamén por unanimidade, a corporación porriñesa aprobou duplicar a achega ao Festival de Cans, que pasará de 20.000 a 40.000 euros anuais, segundo a proposta que defendeu Cami Moreira, concelleira de Cultura. A cambio do incremento, o Concello deixará de gastar en prestar apoio loxístico ao Festival en valados, sinalización, carpas e outras; realizaranse polos responsables do Festival unha ducia de proxeccións en parroquias e barrios ao longo do ano, e haberá unha maior visibilidade nos actos do Festival do apoio institucional do Concello.

A través dunha moción presentada polo grupo EU SON e apoiada polos restantes grupos políticos, o pleno da corporación acordou por unanimidade recuperar a atención presencial nas oficinas do Concello e prescindir da obrigatoriedade da cita previa para diversos trámites. En consonancia, a alcaldesa Eva Garcia anunciou que convocará a comisión municipal de seguimento da Covid para determinar as actuacións a seguir e valorar a estrea de novas restricións na hostalería local, xa que O Porriño entra a partires do sábado 31, en nivel alto, por decisión da Xunta de Galicia.