Novas

A Biblioteca Municipal do Porriño, dependente da Alcaldía, retoma as ‘Visitas Escolares’ e o ‘Clube de Lectura Infantil’

Este ano 2018 a Biblioteca Municipal do Porriño, dependente da Alcaldía, renovará o servizo das ‘Visitas Escolares’ dándolle un novo enfoque e organizando a actividade de xeito regular para todo o curso 2017-18.

A finalidade desta actividade é potenciar as liñas de cooperación entre a biblioteca municipal  e os centros escolares co “obxectivo fundamental de acercar a biblioteca ao alumnado e formalo na utilización dos diferentes servizos e recursos que esta ofrece”.  

Os contidos das visitas serán unha ‘Presentación e benvida á Biblioteca’; Uso do carné de socio/a; Explicación dos diferentes Servizos e Actividades da Biblioteca; Procura de libros na sala infantil; Consulta e manexo da páxina web da biblioteca municipal e do catálogo en liña-opac  (actividade práctica na que se facilitarán ordenadores para uso das alumnas e alumnas).

As visitas realizaranse os mércores de febreiro a xuño- debendo concertar a data exacta chamando á biblioteca municipal- en horario de 11:15 a 12:45 horas, para estudantes dos cursos 4º, 5º e 6º de Educación Primaria.

O número de prazas non poderá superar as 25 por grupo e cada centro ten a posibilidade de concertar dúas visitas, con inscrición previa, podéndose ampliar no caso de que queden días libres sen ocupar.

Os colexios interesados en concertar unha visita escolar, deberán chamar ao teléfono 986 33 76 24 e aportar os seguintes datos: nome do centro, persoa de contacto e teléfono, curso do alumnado que asistirá á visita, número de participantes e se ten necesidade de autobús gratuíto.

Neste último caso, poñerase a disposición dos centros un autobús de balde para o desprazamento das alumnas e alumnas do colexio á biblioteca municipal, ida e volta.

Clube de lectura Infantil

Asemade, a Biblioteca Municipal, tendo en conta a importancia que a lectura ten na idade infantil, pon en marcha o ‘Clube de Lectura Infantil’ para nenas e nenos de 3º a 6º de Educación Primaria, como actividade de animación á lectura e como complemento á educación formal que se imparte na escola.

É unánime o saber que o hábito da lectura é un gran estímulo á creatividade, imaxinación, intelixencia e a capacidade verbal e de concentración de nenos e nenas. Desde sempre os libros nos enriquecen e nos levan a investigar en aventuras, historias, a soñar espertos. O libro é unha porta á formación e información en todos os sentidos.

10/01/2018 in Alcaldía, Cultura e festas

A alcaldesa ordea o peche da última planta do CEIP da Ribeira, logo de que se desprendese parte do teito, e esixe á Xunta que asuma a súa competencia e deixe de recortar no mantemento dos centros educativos do Porriño

A alcaldesa, Eva García de la Torre, acompañada pola concelleira de Educación, Lourdes Moure, e os concelleiros de Vías e Obras, Manuel Carrera, e Urbanismo, Marcelino Coto,acudiu este martes pola tarde ao CEIP da Ribeira, en Torneiros, centro no que por mor dunhas filtracións de auga, desprendeuse parte do teito nunha aula do último piso, empregada coma salón de actos, e onde apareceron importantes fendas noutra das dependencias empregada para dar as clases de música.

“Afortunadamente ninguén sufriu dano algún, aínda que sí quedou á vista a falla completa de mantemento deste centro e os danos ocasionados pola auga no teito de escaiola e  en varias paredes, polo cal tomamos a decisión de pechar toda a terceira planta do colexio”, sinalou a alcaldesa.

García de la Torre, quen adiantou que “mañá mesmo”, acudirá ao centro a arquitecta municipal para estudar o estado desta planta, esixiu á Xunta de Galicia que “asuma as súas competencias e, cando menos, se faga cargo do mantemento dos colexios que é o seu traballo”.

A alcaldesa lamentou que o Goberno galego que non preste atención algunha aos centros educativos do Porriño, “non só considerando que é a súa obriga, senón á vista de que somos o concello que máis medra de toda Galicia”, un abandono que transcende a outros eidos, que tamén son competencia da Xunta, como é “o centro de saúde, que ademais de carecer do persoal que precisa, como veñen de denunciar os veciños en constantes manifestacións, tamén sofre un considerable deterioro pola falla de mantemento, como puxo de manifesto a caída de varias lousas da súa fachada hai poucos días”.

09/01/2018 in Alcaldía, Educación e tecnoloxía

O Concello do Porriño destinará un total de 20.000€- o maior investimento da súa historia- ao Festival de Cans que este 2018 chega á súa XV edición

Así transmitiullo a alcaldesa, Eva García de la Torre, ao director do certame, Alfonso Pato, e a presidenta da Asociación Cultural Arela, organizadora do mesmo, Keka Iglesias, nunha xuntanza á que tamén asistiron as concelleiras de Benestar e Igualdade, Soledad Girón, e Educación e Seguridade, Lourdes Moure.

García de la Torre subliñou o compromiso do Goberno local e de todas as veciñas e veciños do Porriño, “que fan un importante esforzo”, co festival e cos veciños de Cans e de aí que no orzamento para 2018, “que está pechado e que se levará a Pleno”, haxa unha partida orzamentaria nominativa para o festival.

O obxectivo, apunta a alcaldesa, é o de garantir un “aporte económico vital para o festival” de xeito que  o mesmo poida seguir celebrándose cada ano con maior éxito e “siga a situar a O Porriño no mapa cultural dentro e fora de Galicia”.

Pola súa banda, Alfonso Pato amosouse “moi satisfeito pola nosa relación co Concello” e non só, comentou, polo seu apoio económico, senón polo “enorme esforzo de loxística” que ten que afrontar no caso dun festival que organizativamente é moi complicado e que pola súa “transversalidade”, require a intervención de distintas concellerías: a de Seguridade, Tráfico, Vías e Obras ou Educación, que contribúen a que o festival poida realizarse ano tras ano.

09/01/2018 in Alcaldía, Cultura e festas

Este mércores, no Pavillón Municipal do Porriño, con entrada de balde, partido das seleccións absolutas de Galicia e Arxentina de balonmano

A selección galega absoluta masculina volverá enfrontarse a Arxentina, nesta ocasión no Pavillón Municipal do Porriño, este mércores, día 10 as 8 e media da tarde, con entrada libre.

Hai que lembrar que este luns Galicia empatou contra o combinado arxentino no Rosal (22-22), nun choque no que foi sempre por diante no marcador.

O combinado galego, dirixido por Quique Domínguez, ten moitas novidades con respecto ao equipo que xogou onte, xa que os xogadores do BM Cangas non poden acudir á cita cos galaicos. Desta forma, a selección está formada por un núcleo moi importante de deportistas do Teucro, mesturados con membros do Novás, BM Lalín, Academia Octavio e OAR, para facer así un conxunto de bo nivel.

Enfronte estará un gran equipo dirixido por Manuel Cadenas, que está a comezar a preparación do ciclo olímpico. O conxunto arxentino está de xira por España, onde participou no Memorial Domingo Bárcenas. Neste torneo venceu a Polonia (por vez primeira) e plantou cara a España. O terceiro partido contra Bielorrusia foi o máis frouxo, e rematou na terceira posición do torneo con dous puntos.

O pasado ano, Galicia tamén xogou no mes de xaneiro, nesta oportunidade contra Xapón e logrou ofrecer un magnífico espectáculo, vencendo nun partido aos asiáticos e empatando o segundo.

09/01/2018 in Alcaldía, Deportes

Todo listo para a Cabalgata de Reis do Porriño que sairá este venres ás 6 da tarde

O Porriño ten ultimada xa para a Cabalgata das Súas Maxestades os Reis Magos, que chegarán á vila este venres,  día 5, ás 6 da tarde. A esa hora Melchor, Gaspar e Baltasar, sairán nas súas carrozas cara ao centro antes de empezar, xa pola noite, o reparto dos xoguetes.

A Cabalgata que estará encabezada pola Rondalla de Pontellas, estará composta polas tres carrozas das Súas Maxestades, outras dúas máis con regalos e unha terceira que pechara a comitiva na que haberá duendes, zancudos, cabalos ou figuras de luz, entre outras sorpresas. 

Os Reis, logo de saír da rúa Doantes de Sangue, percorrerán a Avenida Antonio Palacios, continuarán por Domingo Bueno, San Sebastián, San Benito e Ramón González para chegar, á Praza de Antonio Palacios, diante do Concello, logo de facer un percorrido ‘áxil’, posto que as previsións sinalan que podería chover ás 8 da tarde..

Diante do Concello, haberá un palco onde se disporán os tronos dos tres Magos nos que recibirán as nenas e nenos que se acheguen a saudalos, escoitarán os seus últimos pedidos, collerán as súas últimas cartas e posarán para as fotos que os pequenos queiran facerse con eles.

No caso de que chovese antes do remate da Cabalgata, a recepción ás Súas Maxestades se realizaría no Pavillón Municipal.

Rúas afectadas por cortes de tráfico

A Policía Local informa de que por mor da Cabalgata non se poderá estacionar na rúa Donantes de Sangue, dende as 3 da tarde deste venres, dende a entrada á piscina ata a rúa Antonio Palacios. Esta rúa estará cortada ao tráfico dende as 5 ás 6 da tarde, momento no que se iniciará a comitiva.

Tamén se cortará ao tráfico rodado a rúa Antonio Palacios, dende o cruzamento con Donantes de Sangue –pavillón- ata a rotonda de Aloqus- rúa Domingo Bueno- dende as 6 da tarde.

Así mesmo estará cortada a rúa Domingo Bueno, dende o número 1 ata o cruzamento da Pontenova, dende as 6 e cuarto da tarde; o mesmo pasará nos dous carrís da Avenida de Galicia- aínda que se permitirá o acceso a residentes-; tamén Pío XII e Ramón González, Manuel Rodríguez, dende o cruzamento de Xogo da Ola ata a Panadería Chinchina-nestas rúas tamén estará prohibido aparcar.

04/01/2018 in Alcaldía, Cultura e festas

O Concello destinará 20.000€ ao Festival de Cans 2018, o maior investimento municipal na historia do certame

O Concello do Porriño destinará un total de 20.000€- o maior investimento da súa historia- ao Festival de Cans que este 2018 chega á súa XV edición.

Así transmitiullo a alcaldesa, Eva García de la Torre, ao director do certame, Alfonso Pato, e a presidenta da Asociación Cultural Arela, organizadora do mesmo, Keka Iglesias, nunha xuntanza á que tamén asistiron as concelleiras de Benestar e Igualdade, Soledad Girón, e Educación e Seguridade, Lourdes Moure.

García de la Torre subliñou o compromiso do Goberno local e de todas as veciñas e veciños do Porriño, “que fan un importante esforzo”, co festival e cos veciños de Cans e de aí que no orzamento para 2018, “que está pechado e que se levará a Pleno”, haxa unha partida orzamentaria nominativa para o festival.

O obxectivo, apunta a alcaldesa, é o de garantir un “aporte económico vital para o festival” de xeito que  o mesmo poida seguir celebrándose cada ano con maior éxito e “siga a situar a O Porriño no mapa cultural dentro e fora de Galicia”.

Pola súa banda, Alfonso Pato amosouse “moi satisfeito pola nosa relación co Concello” e non só, comentou, polo seu apoio económico, senón polo “enorme esforzo de loxística” que ten que afrontar no caso dun festival que organizativamente é moi complicado e que pola súa “transversalidade”, require a intervención de distintas concellerías: a de Seguridade, Tráfico, Vías e Obras ou Educación, que contribúen a que o festival poida realizarse ano tras ano.

04/01/2018 in Alcaldía

O paro baixou no Porriño en decembro por noveno mes no ano 2017 e a finais de ano traballaban 521 persoas máis que cando o actual Goberno local empezara a súa xestión

O paro descendeu por cuarto mes consecutivo no Porriño e a finais do pasado mes de decembro había na vila 1.618 persoas desempregadas, un dato que non se coñecía dende hai unha década.

Segundo os datos publicados este mércores polo Ministerio de Emprego e Seguridade Social e a Consellería de Economía, Emprego e Industria da Xunta de Galicia, a taxa de desemprego situouse no Porriño no 17,4%, en total 5,6 puntos menos que no inicio da xestión do actual Goberno Local cando 2.139 porriñeses estaban na procura dun posto de traballo, 521 máis que na actualidade.

En relación co mes de decembro de 2016, o número de veciñas e veciños anotadas coma demandantes na oficina do Servizo Galego de Emprego do Porriño baixou de 1.844 a 1.618, o que supón que hai 226 traballadoras e traballadores máis no concello: en so un ano o paro caeu en máis de 2,5 puntos.

A alcaldesa, Eva García de la Torre subliña a importancia das medidas que se están a tomar dende a Concellería de Emprego, que dirixe Soledad Girón,entre elas o programa ‘Porriño Accede’, baseado en convenios asinados entre o Concello e empresas da vila, grazas ao cal hai ducias de veciñas e veciños que volveron ao mercado laboral ou empezaron a traballar.

Tamén están a facilitar o descenso do paro os ‘Plans de Emprego’, posibles grazas ao investimento de máis de 600.000€ de fondos municipais, e os acordos con outras administracións, obtendo axudas e subvencións que tiveron coma destino accións que serviron para incrementar as probabilidades de empregabilidade das veciñas e veciños do Porriño, e pon coma exemplo o recen aprobado ‘Plan Integrado de Emprego para Mulleres’ (PIEM), que conta cunha importantes achega da Consellería de Economía, Emprego e Industria da Xunta de Galicia.

04/01/2018 in Alcaldía, Benestar, Emprego e formación

Volta aos anos 80 na Festa Pre-Fin de Ano coa que O Porriño despide o sábado, día 30, este 2017

Como xa é tradicional, O Porriño dille adeus ao ano cun día de antelación. Este sábado día 30, na carpa municipal a ‘Festa Pre-Fin de Ano’ levará aos asistentes á despedida de 1979 e a benvida de 1980…ano ao que vai adicada esta noite.

A festa comezará as 23:00h coa actuación de Club Naval, banda encargada de despedir  o ano na primeira parte do seu concerto. Ás 12 menos cuarto, todo o mundo irá á Praza de Antonio Palacios, diante do Concello, para tomar os ’12 lacasitos’ ao compás das badaladas, evento dirixido polo showman Carlos Veleiro.

De volta á carpa, empezará a segunda parte da actuación de Club Naval ata a 1:30 para dar paso á ‘animación dos 80’s’, con  baile, música, coreografías,  espectáculo e a participación do público.

Nesta parte da celebración o mestre de cerimonia será  Cristian de Samil.

28/12/2017 in Alcaldía, Cultura e festas

As traballadoras e traballadores de Maderas Iglesias tentan que os grupos políticos do Parlamento de Galicia eviten o despido de 140 empregados ou o peche da empresa

A primeira hora da maña representantes das traballadoras de Maderas Iglesias, que este xoves levaron as súas demandas a Compostela, mantiveron un encontro con representantes dos grupos políticos no Parlamento de Galicia e, posteriormente, tentaron reunirse con responsábeis do Instituto Galego de Promoción Económica (IGAPE), que só recibiu a 7 representantes do comité, pero non permitiu que participaran na xuntanza nin alcaldes, concelleiros, entre eles varios do Porriño, como o responsábel de Tráfico Orlando Márquez, nin asesores das organizacións sindicais.

O pasado día 12 de decembro comezaron as negociacións entre a representación dos traballadores e a dirección da empresa na que, segundo explica o presidente do comité, Vicente Morales, os xestores de Maderas Iglesias puxeron sobre a mesa a liquidación de 140 postos de traballo dos 249 cos que conta na actualidade, ou a liquidación de todos, se esta proposta non se acepta. “A empresa dá un prazo do 12 ao 30 de xaneiro para chegar a un acordo, pero non garante que vaia cumprir”.

Por iso trasladaron a súa protesta e demandas ao Parlamento de Galicia, co obxectivo de “salvar a empresa e garantir os postos de traballo”. Para elo demandan o apoio do Parlamento cun “compromiso político”

A situación para o persoal, que denuncia que vén padecendo atrasos nos cobros das súas nóminas desde hai tempo, é moi delicada. “Hai traballadoras e traballadores  ás que está axudando o propio Concello. Até o de agora cobrabas o 10, o 15 ou máis do 20. Iso para unha familia que teña unha hipoteca, repercute en todo”, lamenta o presidente do comité.

Morales lembra que Maderas Iglesias chegou a ter máis de 800 traballadores e que concellos da zona e asesores cren que é viábel. Por iso reclama que se lles aclare exactamente cal é a situación. “A información que temos é o que nos conta o empresario”, afirma, e se non se fai algo antes, ou se acepta o acordo de liquidar os 140 postos de traballo ou a empresa pecharía o día 13 de febreiro.

Hoxe mesmo, o deputado socialista por Pontevedra, Abel Losada, rexistrou no propio Parlamento varias preguntas dirixidas ao Goberno de Galicia nas que pide ao mesmo que aclare qué xestións ten feito para cumprir o mandato do Parlamento, aprobado por unanimidade, para cooperar na busca de solucións aos problemas económicos e laborais de Maderas Iglesias.

Así mesmo, Losada pide ao Goberno galego que diga si é consciente do problema social e laboral que arrastra dende hai anos a empresa Maderas Iglesias; se sabe da importancia social e económica que o emprego desta empresa, maioritariamente feminino, ten para as comarcas do sur da provincia de Pontevedra e  se a Xunta de Galicia exerceu algún tipo de control específico os recursos públicos concedidos a esta empresa, a pesar dos problemas laborais e financeiros que presenta dende hai anos.

28/12/2017 in Alcaldía, Emprego e formación

O Concello do Porriño e a Deputación asinan un convenio por un importe de 800.000€ para levar adiante a actuación no módulo de atletismo que ten un coste de 1.000.000€

Carmela Silva asinou está mañá 21 convenios cos alcaldes e alcaldesas da provincia dos 25 concellos que disporán de 15 millóns de euros para obras singulares dentro do Plan de reequilibrio territorial do ente provincial.

A presidenta da Deputación subliñou a “celeridade” da administración provincial para  poñer a disposición dos concellos estes fondos e a dos concellos en aprobar os seus proxectos que permitirán que os entes locais podan, de maneira inmediata, licitar as obras incluídas neste plan.

No caso do Porriño, a Deputación de Pontevedra achegará 800.000€, como sinala o convenio asinado pola alcaldesa, Eva García de la Torre, que estivo acompañada polo concelleiro de Deportes, Manuel Carrera, para levar a cabo a actuación no módulo de atletismo, cuxo custe total é de 1.000.000€.

28/12/2017 in Alcaldía, Deportes