Novas

A alcaldesa informou polo miúdo aos veciños da ‘zona cero’ do Contrasto sobre as medidas de seguridade que estarán vixentes durante as obras do tendido da rede de abastecemento

A alcaldesa, Eva García de la Torre, acompañada do responsable da Policía Local, a enxeñeira xefe da obra e representantes da empresa que fará os traballos da abastecemento na ‘zona cero’ do barrio do Contrasto, mantivo  unha xuntanza cos veciños desta zona, para explicarlles polo miúdo cómo se acometerán os mesmos, cando durarán e qué medidas de seguridade haberá que seguir durante a súa realización.

A obra, que abrangue a colocación das canles de abastecemento nun camiño de 600 metros lineais, estará dividida en tres treitos: o primeiro, de 250 metros, o segundo de 200 e o terceiro de 160 metros, que estarán cortados ao tráfico-agás aos residentes– durante un período de tres semanas, como máximo, que ó que se estima que durarán os traballos.

O avance das obras será de entre 40 e 60 metros ao día e mentres as foxas estean abertas non estará permitido o acceso nin aos veciños, aínda que a empresa comprométese a que os treitos que se abran ao comezo da xornada estean pechados ao final da mesma, de xeito que os residentes desta zona poidan entrar e saír das súas casas, sen risco, a diario.

Para garantir a seguridade, e dado que as altas temperaturas ás que terán que traballar elevan as posibles emisións de lindano, os operarios realizarán vestirán ‘buzos’ e levarán equipos de respiración autónomos; as foxas abertas pecharanse cada día e mentres estean a realizarse as tarefas de tendido da rede de abastecemento as casas deberán ter as portas exteriores e as  fiestras pechadas.

As obras comezarán a principios desta semana, última do mes de agosto, ás 8 da mañá de cada día; nos primeiros 250 metros de actuación está previsto un avance diario de 60 metros, con tres acometidas, tendo en conta que os  traballos poden verse limitados pola existencia doutros servizos soterrados, como os de telefonía ou electricidade, a accesibilidade veciñal e a exposición dos equipos de respiración autónoma.

28/08/2018 in Alcaldía

O Concello informa este venres, día 24, aos veciños do Contrasto sobre a realización das obras de abastecemento na ‘zona cero’, na que hai meses apereceron refugallos de lindano

O Concello  vai comezar as obras de abastecemento  na ‘zona cero’  do Contrasto, en Torneiros, onde hai meses aparecerán refugallos de lindano, motivo polo cal este mércores, a alcaldesa, Eva García de la Torre, mantivo unha xuntanza, no mesmo lugar, con representantes da empresa que vai realizar os traballos, a enxeñeira encargada, o director de obra, o coordinador de  seguridade e saúde da obra, un técnico do Consorcio de Augas do Louro e o xefe da Policía Local.

Na xuntanza expuxéronse as medidas  que está previsto adoitar para protexer aos traballadores e aos veciños do Contrasto durante a realización dos traballos, que vanse a desenrolar por treitos e que abranguen, ademais da protección das persoas máis achegadas ás obras, o corte do tráfico.

Estímase que os traballos estean rematados en tres semanas, tempo durante o cal estará cortado o tráfico nesta zona, así mesmo, o venres, día 24, tampouco haberá subministro de auga entre as 4 e as 7 da tarde na Urbanización San Rafael, A Relba e Mota-Noval.

Coa finalidade de informar, polo miúdo, ás veciñas e veciños, este venres, día 24, ás  7 da tarde, no Centro Cultural de Torneiros, haberá unha xuntanza na que se indicarán qué medidas deben de adoitar durante o tempo de duración deste treito final da acometida.

23/08/2018 in Alcaldía

A Axencia Galega de Sangue, que volve a semana que ven ao Porriño, agradece ás veciñas e veciños a súa solidariedade

A Axencia Galega de Sangue, Órganos e Tecidos (ADOS), vén de agradecer ás veciñas e veciños do Porriño, nunha carta enviada á alcaldesa, a súa “contribución e compromiso sincero” durante os pasados días 26, 17 e 28 de xullo no que 136 persoas achegáronse a facer doacións de sangue á unidade móbil da Axencia.

Esta mesma unidade estará no Porriño, de novo, o vindeiro venres, 31 de agosto – de 10 da mañá a 2 da tarde e de 4 da tarde a 9 da noite- e o sábado, día 1 de setembro, de 10 da mañá a 3 da tarde, diante da Cafetería Scala, en Domingo Bueno.

Sobre a Axencia Galega de Sangue, Órganos e Tecidos

A Axencia Galega de Sangue, Órganos e Tecidos (ADOS), que integra o traballo do Centro de Transfusión de Galicia, subministra compoñentes sanguíneos a todos os hospitais de Galicia.

Cada día, as doazóns de sangue recollidas nos locais de doazón e nas 10 unidades móbiles que percorren os concellos galegos envíanse ás dependencias de ADOS para o seu procesamento, análise e conservación. Establécese con cada hospital unhas reservas de seguridade de cada grupo sanguíneo e, diariamente, envíanse os compoñentes sanguíneos que precisan para a súa actividade asistencial programada e facer fronte ás urxencias.

22/08/2018 in Alcaldía

Aberto o prazo de inscrición para os ‘Obradoiros de Emprego Porriño Social’

A Concellería de Formación e Emprego do Porriño, que dirixe Soledad Girón, vén de abrir ata o vindeiro luns, día 27, incluido, o prazo de inscrición para os cursos de ‘Atención Socio-sanitaria a persoas no domicilio’ (SSCS01ET, código 340 ou 320), e ‘Atención socio-sanitaria a persoas en institucións sociais’ (SSCS11ET Código 340 ou 320), dentro dos ‘Obradoiros de Emprego Porriño Social’.

As persoas interesadas en participar nos mesmos deberán acreditar estar graduadas en Ensino Secundario Obrigatorio (ESO)ou Competencias clave nivel 2, e ser menores de 30 anos de idade e para solicitar a súa inclusión nos mesmos deben dirixise á oficina do Servizo Galego de Emprego (antigo INEM) do Porriño.

Terán prioridade as aquelas persoas que soliciten un dos devanditos cursos e as que sexan seleccionadas  asinarán un contrato de traballo en formación, retribuido, durante un periodo de seis meses.

21/08/2018 in Alcaldía, Emprego e formación

Publicadas as Bases de funcionamento dos postos de venda das Festas do Cristo deste 2018

O Concello vén de publicar as ‘Bases de funcionamento dos postos de venda das Festas do Cristo que teñen prevista a súa celebraciçon os días 21, 22, 23, 24, 28, 29 e 30 de setembro.

As mismas son as seguintes:

I.- DE CANDO E DONDE SE CELEBRA

Art. 1.- As festas do Cristo 2018 celebraranse nas datas do 21, 22, 23, 24 e 28, 29 e 30 de setembro do 2018. Os postos de venda poderán estar abertos ao público de 11:00h a 02:00 h. Non se permitirá a apertura de ningún posto na rúa fóra do horario establecido.

Art. 2.- Os postos extenderanse polas seguintes rúas: Pío XII, Domingo Bueno, Avelino Villasuso, Servando Ramilo, Ramiráns, Ramón González, Manuel Rodríguez, Praza Arquitecto Antonio Palacios e barrios de S. Benito e S. Sebastián.

Art. 3.- Non se permitirá o asentamento de ningún posto nin a venda ambulante de ningún producto fóra do recinto establecido pola organización.

II.- DOS POSTOS DE VENDA

Art. 1.- Estableceranse tres clases de postos de venda:

a)  Postos de venda de produtos varios.

  1. b) Postos de degustación e venda de comidas: son aqueles postos de venda de comidas e bebidas. A organización decidirá a distribución dos postos de rosquillas.
  2. c) Establecementos privados: son aqueles establecementos coma tabernas, bares, bodegas, restaurantes, negocios de venda de produtos, con sede social no Porriño, que soliciten asentarse na vía pública diante do seu negocio. A organización só autorizará estes postos no caso de que non precise dese espacio e sempre e cando as condicións da rúa o permitan.

Art. 2.- Os postos de comida que dispoñan de cociñas, bombonas, asadores, parrillas, brasas ou sustancias inflamables deberán estar protexidos, xa que poden supoñer un perigo para as persoas.  Será obrigatorio para estes postos que conten cun extintor homologado, e en bo funcionamento de po seco de 6 k. Deberán tamén contar cun xerador de enerxía propio co fin de poder desenvolver a súa actividade. A organización non se fai responsable dos danos ocasionados por este tipo de instalacións.

Art. 3.- Todos os postos de degustación de comida e bebida deberán cumprir as normas básicas de seguridade e hixiene marcadas pola lei.

Art. 4.- Todas aquelas persoas que persoas que manipulen alimentos ou bebidas estarán en posesión do carné de manipulador/a de alimentos.

Art. 5.- Non se permitirá a reprodución de música fóra do horario establecido pola lei.

III.- DA SOLICITUDE DOS POSTOS DE VENDA

Art. 1.- Inscricións: a solicitude de inscrición poderá descargarse na nosa páxina: https://oporrino.org/ ou ben recollela no Centro Cultural Municipal ou Concello do Porriño, do 29 de agosto ao 10 de setembro, en horario de 09:00 a 14:00 h.

Toda a documentación requerida será entregada no Rexistro do Concello do Porriño do 29 de agosto ao 10 de setembro en horario 09:00 h. a 14:00 h.

Art. 2.- Aceptacións: unha vez cumprimentada a solititude facilitada e presentada a documentación requerida o 11 de setembro procederase a asignación da ubicación do posto; dita responsabilidade quedará a cargo do Concello do Porriño.

Rematado o prazo de inscrición e confirmada a aceptación do posto, os/as interesados/as formalizarán o correspondente  pago de taxas previsto na Ordenanza municipal en vigor no ORAL (Deputación Provincial de Pontevedra).

Queda totalmente prohibido o aluguer ou cesión a terceiros dos postos asignados.

Art. 3.- Taxas: a ordenanza reguladora da taxa por instalación de postos ambulantes situados en terreo públicos así coma industrais estipula a cota de aplicación por posto de venda  de 1,32 € por m2/día. O pago farase no ORAL. Os xustificantes de pago serán entregados no Concello do Porriño do 12 ao 19 de setembro.

Non se admitirá ningún posto sen a debida presentación do xustificante de pago.

IV.- DA MONTAXE DOS POSTOS DE VENDA

Art. 1.-  O horario da montaxe será entre as 08:30 e as 10:00 h.

Art. 2.- Todos os postos han de estar totalmente ubicados e preparados para a hora de comezo das actividades das festas. Non se poderán ampliar os postos con mesas adicionais ou plataformas, toldos, etc.

Art. 3.- Durante o desenvolvemento da festa quedará prohibida a entrada e saída de vehículos non autorizados, así coma a colocación de obstáculos dentro da zona de celebración dos distintos eventos.

Art. 4.- Durante o desenvolvemento das distintas actividades que terán lugar na rúa (concertos, animación, procesión do Santísimo Cristo…) non estarán permitidos obstáculos que poidan impedir o normal transcurso das mesmas.

Art. 5.- Unha vez rematadas as festas, nas noites do luns 24 ao martes 25 de setembro e do domingo 30 de setembro ao luns 1 de outubro todos os postos de venda deberán estar desmontados e o seu recinto limpo.

V.-  DAS MERCANCÍAS

Art. 1.- Queda totalmente prohibida a exposición e presenza de animais vivos.

VI.- DOS VENDEDORES

Art. 2.- A organización así como a Policía Local e Protección Civil do Porriño velará polo estricto e riguroso cumprimento das presentes bases.

16/08/2018 in Alcaldía

A concelleira de Igualdade e Benestar pecha os Campamentos de Verán, que este ano estiveron subvencionados pola Deputación de Pontevedra e nos que participaron 240 nenas e nenos do Porriño

A concelleira de Benestar e Igualdade, Soledad Girón, entregou os diplomas ás nenas e nenos que participaron nos Campamentos de Verán do Concello, este ano. En total, sinala a concelleira, foron 240 participantes que puideron gozar durante 6 semanas de actividades coma xogos, deportes, excursións, ou saídas ao Museo do Mar de Galicia ou á Praia de Alcabre, en Vigo.

Este ano os campamentos, baixo o nome de ‘Leo e as viaxes polo tempo’, estiveron subvencionados pola Deputación de Pontevedra e tiveron coa obxectivo principal, subliña Soledad Girón, “ofrecer unha alternativa de lecer e tempo libre ás nenas e nenos do Porriño durante o verán e, ao mesmo tempo, facilitar a conciliación da vida familiar e laboral ás porriñesas e porriñeses”.

Os campamentos, que se desenrolaron entre o 2 de xullo e o pasado 10 de agosto, estiveron a  abertos a nenas e nenos de entre 5 e 12 anos de idade– nados entre 2006 e 2013-, que puideron elixir ata 6 quendas distintas: a 1ª.- do 2 ao 6 de xullo; 2ª.- do 9 ao 13 de xullo; 3ª.- do 16 ao 20 de xullo; 4ª.- do 23 ao 27 de xullo; 5ª.- do 30 de xullo ao 3 de agosto e 6ª.- do 6 ao 10 de agosto.

13/08/2018 in Alcaldía, Benestar, Igualdade

A Concellería de Emprego impulsa, por medio do ‘Plan Porriño Accede’, un ‘Curso de Loxística e carretilla elevadora’ para veciñas e veciños que estean en situación de demandantes de emprego

A Concellería de Formación e Emprego, que dirixe Soledad Girón, impulsa, por medio do ‘Plan Porriño Accede’, un ‘Curso de Loxística e carretilla elevadora’ que ten coma destinatarias a veciñas e veciños do Porriño que sexan demandantes de emprego.

Como sinala a concelleira, o prazo de inscrición para as interesadas e interesados en participar neste curso péchase nas vindeiras semanas, a formación, que será a cargo de especialistas de Maviva, empresa especializada en loxística de automoción que ten sedes en Vigo, Gondomar e O Porriño, abrangue preparación teórica e práctica nas instalacións da mesma.

‘Porriño Accede’

O programa “Porriño Accede” é un programa que pon en marcha o Concello do Porriño, con fondos propios, e que pretende formar e insertar no mercado laboral ás persoas veciñas inscritas como demandantes de emprego, tendo como punto de partida as necesidades de contratación nas empresas.

10/08/2018 in Alcaldía, Emprego e formación

Os traballos de recuperación da antiga Escola Unitaria de Covelo, en Atios, a piques de rematar, logo da colocación das novas fiestras, portas e persianas

As obras de recuperación da antiga Escola Unitaria de Covelo, na parroquia de Atios, están chegando á súa finalización logo dun traballo levado a cabo polas concellerías de Vías e Obras, que dirixe Manuel Carrera, e de Emprego e Formación e Benestar, a fronte das cales está Soledad Girón.

Precisamente, a Concellería de Vías e Obras vén de rematar a colocación das fiestras, portas e persianas no inmoble, cun investimento total de 24.000€ con cargo ao ‘Plan Concellos’ da Deputación de Pontevedra.

Manuel Carrera sinala que as novas fiestras son de PVC, de cor branca no interior e alumiño no exterior, “gardando a estética xeral deste edificio que finalmente podemos dicir que vaise a recuperar para as veciñas e veciños de Atios”.

Novo tellado

O alcalde accidental lembra que “xusto hai un ano”, substituímos o tellado que, daquela, estaba nun estado de total deterioro, polo que era “moi urxente” mudalo dada que as filtracións poderían causar o derrubo do mesmo.

Carrera subliña que, coma neste caso, aquela obra fíxose con cargo a dúas achegas da Deputación de Pontevedra, que abranguía a colocación dunha nova cuberta metálica de 3.800 quilos de peso, con tella cerámica sobre unha superficie total de 390 metros cadrados, para o cal dispúxose dun orzamento total de 60.080,71€.

10/08/2018 in Vías e obras

A concelleira de Emprego e Formación, Soledad Girón, responde ao PP do Porriño sobre os empregos da Deputación

En relación coa nota publicada no xornal de onte, 9  de agosto de 2018, polo Partido Popular do Porriño, en boca do seu concelleiro e presidente local, Manuel Alejandro Lorenzo, sobre as políticas de emprego no Concello do Porriño, como concelleira responsable dese área, quero sinalar:

O señor Manuel Alejandro non di a verdade ao asegurar que “o Concello puido dar emprego a 27 persoas durante todo este ano” polo Plan da Deputación.

Resulta sorprendente ademais que o faga, quen foi concelleiro de Emprego no anterior goberno, pois, pola súa experiencia neste tema, sabe perfectamente que esa afirmación é falsa. Polo tanto, non cabe máis conclusión que entender que, nun asunto tan delicado como é o desemprego e a traxedia persoal para quen o padece, preferiu buscar un titular vistoso pero falso que lle axude na súa carreira política como candidato previsible do PP ás eleccións locais do vindeiro ano.

Invito ao PP local e ao seu presidente, a nomear un só concello da provincia que, coa convocatoria da Deputación Provincial, contratara, aínda que fora unha soa persoa, durante todo o ano. Non o hai, porque é imposible e a orde nin tan sequera contempla esa posibilidade, nin por fondos nin por prazos.

O 3 de xaneiro, cando sae a orde, o que se inicia é o proceso regulamentado, transparente e público, para optar á concesión se subvencións e, unha vez concedida, ao proceso de preselección de candidatas  e candidatos que se fai polos servizos do Servizo Galego de Emprego (antigo INEM) e a elaboración dunhas bases e inicio do proceso de selección de candidatas e candidatos polos servizos de contratación do Concello. Trámites xustos, regulamentarios e fiscalizados que impiden que sexan contratos a partir da saída da orde.

O candidato do PP e o seu partido, que teñen experiencia de moitos anos de  goberno no Concello, saben que é así e que están, polo tanto falseando a realidade e creando expectativas falsas a un colectivo, a das persoas desempregadas, que merecen información real e contrastada.

Dende que estamos gobernando, cunha “nefasta xestión en materia de emprego” (según o señor Alejandro), as cifras contrastadas de paro no Porriño baixaron do 23,1 % que deixaron ao 15% . Sendo nos últimos sete meses, con datos oficiais da Xunta, onde se acadou un 3% desa baixada, a maior de toda a Área Metropolitana. Iso amosa que O Porriño ten poder de recuperación na crise e que o Concello, xunto con outras instancias, ten mellorado a capacidade de xerar emprego para as súas veciñas e veciños.

Ademais, polo que a nosa xestión respecta, se ten mellorado substancialmente a colaboración coas empresas radicadas no Porriño, con plans de formación e inserción conveniados, que teñen dado froito en mellores condicións de contratos e estabilidade. O ‘Plan Accede’, creado polo noso goberno, é a proba máis obxectiva desa mellora.

Nós confiamos nunha actuación rigorosa e transparente en materia de emprego, á que todos os cidadáns poidan acceder en igualdade de condicións, frente á política de “pásese pola Alcaldía e o alcalde chama para buscarlle algo e vostede queda a deber o favor” que vostedes non só practicaban senón que se gababan da mesma en declaracións a medios locais e nacionais.

Nós confiamos en por en valor o servicio de emprego e confiar no bo labor profesional das traballadoras e traballadores que pertencen a este servizo e darlle a calidade do que realmente é e debe ser un servizo público e non unha axencia clientelar de quen detenta o goberno.

Nós actuamos e adicamos os nosos esforzos a tentar que os grupos máis vulnerabeis dentro do colectivo de persoas sen emprego (mulleres en formación e parados de longa duración, principalmente) poidan acceder ao traballo e, como as cifras demostran, o labor está sendo exitoso. Mellorable pero exitoso. En nada melloraría, sen dúbida, en voltar á dirección que vostedes lle deron cando gobernaron.

Recuperamos a concesión de obradoiros de emprego pola Xunta de Galicia, voltamos a por en marcha o PIEM (adicado a fomentar o emprego para mulleres) que vostedes deixaron desactivado e, por imposibildade de prazos de tramitación, si tivemos que renunciar a algún curso de ADF, como vostede mesmo renunciou no ano 2014, sendo concelleiro de emprego.

 

10/08/2018 in Emprego e formación

A Policía Local do Porriño recupera un coche que fora roubado o pasado mes de novembro

Axentes da Policía Local do Porriño recuperaron o pasado martes, no casco urbano, un coche que figuraba coma roubado en Vigo en novembro do ano pasado.

O xefe da Policía Local sinala que estas actuacións forman parte do Plan de Seguridade e Prevención da Seguridade Cidadá posto en marcha dende a Concellería de Seguridade, que dirixe Lourdes Moure, e que ten coma obxectivos perseguir a comisión e prevención dos Delitos contra o patrimonio das persoas.

O coche, logo da súa recuperación, será entregado ao seu propietario, “logo da inspección ocular, co obxecto de localizar ao presunto autor ou autores do roubo do mesmo”.

Dende a Policía Local recomendase ás veciñas e veciños que, ante calquera tipo de incidencia, chamen ao número de teléfono  620404040, que é “inmediato e sen intermediarios”.

09/08/2018 in Alcaldía, Tráfico