Novas

A Policía Local do Porriño dispón xa dun novo coche, adquirido polo sistema de ‘renting’, que vén tanto a iniciar a renovación do parque deste corpo, que conta con vehículos de máis de 15 anos de antigüidade algún deles superando os 350.000 quilómetros, coma a facer unha aposta polo coidado do medio ambiente.

O novo coche, un Citroen DS, modelo 5, que foi recibido pola concelleira de Seguridade, Lourdes Moure, e polo xefe da Policía, Daniel Rodríguez, supón que O Porriño pasa a ter un vehículo de que dispoñen moi poucos concellos e, ademais, segundo subliña o xefe da Policía, “mellora e actualiza os nosos medios, preserva a seguridade dos axentes e, o máis importante, mellora notablemente o servizo aos cidadáns”.

Os coches híbridos aportan beneficios para o medio ambiente grazas ao seus baixos consumos globais, á posibilidade de condución en modo EV (eléctrico) e as baixas emisión que emite á atmosfera.

Un equipo de investigadores internacionais, liderado polos arqueólogos Eduardo Méndez-Quintas e Manuel Santonja, do Centro Nacional de Investigación sobre la Evolución Humana (CENIEH) retomaron a semana pasada os traballos de investigación nas Gándaras de Budiño, “considerado historicamente o xacemento paleolítico máis importante de Galicia”.

Como puido comprobar a alcaldesa, Eva García de la Torre, que fixo unha visita ao lugar, estas investigacións, nas que participan investigadores portugueses, españois, franceses e australianos, teñen como obxectivo “explicar as características xeolóxicas deste importantísimo xacemento e datar definitivamente os diferentes episodio de ocupación humana”, sinala Eduardo Méndez-Quintas, director destes traballos.

200.000 anos de antigüidade

O xacemento de As Gándaras de Budiño foi un dos primeiros lugares de época paleolítica escavados en Galicia, tralo seu descubrimento en 1961. Inicialmente perforado por Emiliano Aguirre, mundialmente coñecido por ser o impulsor do proxecto Atapuerca, Budiño pasou a converterse nun xacemento altamente problemático, subliña Méndez-Quintas, “posto que as primeiras datacións deste lugar indicaban un cronoloxía de uns 26.000 anos, cando este tipo de lugares tiñan que ter unha idade superior aos 100.000 anos de antigüidade”. Esta circunstancia levou a idea de que no NW da Península Ibérica existía un Paleolítico atípico e anacrónico con respecto ao que acontecía no resto do SW de Europa. “Isto supuña un argumento para defender a idea do “atraso secular de Galicia”, o cal xa arrincaba no Paleolítico.

As investigacións actuais inciden nunha situación totalmente diferente, xa que “na actualidade sabemos que a primeira presenza humana na nosa rexión é anterior aos 300.000 anos, en cronoloxía semellantes as de outras rexión Europeas. Doutro lado os traballos en curso no xacemento indican que estamos ante depósitos moi antigos e con restos arqueolóxicos cunha cronoloxía que debe exceder amplamente os 200.000 anos de antigüidade”, afirma  o director da escavación.

Estes traballos enmárcanse dento do proxecto de investigación internacional “Minho/Miño: Os primeiros poboadores do río Miño”, que estase a desenvolver de xeito simultáneo nas dúas beiras do río . Asemade estas investigación nas Gándaras de Budiño contan co apoio económico do Concello do Porriño.

Difusión dos traballos

Durante os traballos de escavación, e en colaboración co Concello, organízanse visitas guiadas aos traballos arqueolóxicos todos os días ás 5 da tarde, ata o vindeiro sábado, 14 de xullo, último día de traballos nesta primeira fase de investigación no xacemento.

Aumentar a seguridade vial coa construción de tres novas rotondas, controlar o cumprimento da ordenanza municipal que limita as horas de estacionamento de camións ou que o transporte metropolitano chegue ata o polígono industrial, foron algún dos temas tratados pola alcaldesa do Porriño, Eva García de la Torre, e empresarios da Entidade Urbanística de Conservación da Granxa, co seu presidente, Indalecio Cuevas, á cabeza, nunha xuntanza que as dúas partes cualificaron de “moi positiva”.

Os empresarios trasladáronlle  á alcaldesa os asuntos principais tratados hai días na Asemblea Xeral da Entidade Urbanística de Conservación da Granxa, entre os que cabe salientar a necesidade urxente, coma sublimaron os empresarios e a propia García de la Torre, que “entre xa en funcionamento a extensión do transporte metropolitano ata o polígono industrial”, no que traballan milleiros de persoas e polo que circulan, a diario, varios milleiros máis.

Outro asunto tratado na xuntanza foi o da necesidade de suprimir a peaxe de AP-9 para camións no  treito Vigo-O Porriño. As dúas partes salientaron que é unha oportunidade para aproveitar mellor as infraestruturas, posto que “ademais de optimizar o uso da autoestrada rebaixaríase a densidade de tráfico da A-55”.

Outra das demandas dos empresarios da Granxa, da que informaron á alcaldesa, é a necesidade da construción e posta en funcionamento dunha  Central de Transporte na Área de Vigo, “a ser posible no Porriño”, que dea servizo ao sector, sendo esta unha iniciativa que está en mans do Consorcio da Zona Franca de Vigo onde xa hai partida orzamentaria para facelo.

Gardería

Tamén tratouse dun dos principais obxectivos dos empresarios: que haxa unha gardería en A Granxa. Neste senso informouse á alcaldesa que a Entidade Urbanística de Conservación da Granxa, colabora coa Consellería de Política Social, para poder dotar ao polígono desta escola infantil.

Eva García de la Torre ofreceu a colaboración do Concello para poñer unha parcela dotacional municipal, no PPI6 sector 2, ao servizo desta iniciativa.

Por último, a alcaldesa amosou a súa total disposición á seguir realizando melloras, “de xeito continuado”, nas estradas, beirarrúas, limpeza e mantemento de zonas verdes que, para os empresarios é un tema de grande importancia, en especial para os usuarios e traballadores do parque empresarial.

A alcaldesa do Porriño, Eva García de la Torre, supervisou  este mércores as obras que están a realizarse no barrio do Contrasto, onde apareceron refugallos de lindano, para levar a rede municipal de abastecemento de auga a todas as vivendas que carecían deste servizo, e que hai días que acometeu o Concello nesta zona de Torneiros e nas que se investirán uns 350.000€ que serán sufragados, na súa totalidade, con fondos municipais.

Hai uns días García de la Torre supervisara o inicio destes traballos que, lembrou, de novo, realízanse seguindo, “exactamente” os protocolos para garantir a seguridade dos operarios e dos veciños.

A alcaldesa reiterou que as obras están nos prazos previstos de xeito que a finais do verán todas as casas estarán xa conectadas á traída de augas municipal, “tal e coma prometerá ás veciñas e veciños”.

Outro dos compromisos que tiña con eles é o de informarlles “periodicamente e polo miúdo de canto fixeramos neste lugar”, e neste senso, o vindeiro luns, día 9, ás 8 da tarde, na sede da Asociación de Veciños San Salvador de Torneiros, manterá unha xuntanza con todos eles para explicarlles cal é o estado das obras, indicarlles cales son os seguintes pasos a seguir, e respostar calquera pregunta e dúbida que teñan.

Todos os custos foron asumidos, polo dagora, polo Concello

A alcaldesa salientou, de novo, que o Concello do Porriño asumiu a totalidade dos custos de cantas iniciativas e accións acometéronse no Contrasto:  o subministro de auga para o consumo diario, a instalación nas vivendas nas que non se podían usar os pozos  e depósitos de 1.000 e 2.000 litros, que se enchen a demanda dos veciños; a  contratación dos servizos dunha empresa especializada en tratamento de terras, dacordo coas indicacións, normas e criterios do Servizo galego de Xestión de Refugallos ou a realización dun dobre asfaltado no lugar nos que se apareceron restos de lindano cando estaban a facerse obras de saneamento.

Eva García de la Torre, insistiu en que “sempre, dende o primeiro minuto”, o Goberno local, a “seguirémolo a facer así”, mantivo puntualmente informados, tanto ás veciñas e veciños do Contrasto e aos representantes dos grupos municipais, coma á administración que ten a competencia exclusiva no que se refire á actuación en casos de contaminación coma este: a Xunta de Galicia.