Novas

O Concello do Porriño saca a licitación a mellora do pavimento de camiños en Devesa, Filgueiras e Portela de Souto por máis de 132.000 euros

 

  • A actuación permitirá mellorar a seguridade viaria e a mobilidade en tres viarios municipais situados en Budiño, O Porriño e Atios

O Porriño, 16 de decembro de 2025.- O Concello do Porriño vén de sacar a licitación o proxecto de mellora do pavimento en tres camiños de titularidade municipal, situados nos lugares de Devesa, Filgueiras e Portela de Souto, cun orzamento base de licitación de 132.979,42 euros (IVE incluído).

A actuación, financiada pola Deputación de Pontevedra a través do Plan + Provincia, ten como obxectivo mellorar o estado actual destes viarios, incrementar a seguridade viaria e facilitar a mobilidade da veciñanza, xa que os camiños presentan diversos signos de deterioro, como fisuras, baches e unha degradación xeral da capa de rodadura.

O alcalde do Porriño, Alejandro Lorenzo, destaca que “esta licitación é unha mostra máis do compromiso do goberno municipal coa mellora das infraestruturas básicas, especialmente nos núcleos rurais, onde os camiños municipais son fundamentais para o día a día da veciñanza”. O rexedor subliña tamén que “seguimos investindo en obras útiles, pensadas para mellorar a seguridade viaria e a calidade de vida dos porriñeses e porriñesas”.

O proxecto contempla, entre outras actuacións, o desbroce e limpeza de marxes e cunetas, o fresado puntual do firme existente, a reposición da zahorra artificial nos puntos necesarios, así como o reforzo do pavimento mediante a execución dunha nova capa de mestura bituminosa en quente de cinco centímetros de espesor.

Ademais, procederase ao recrecido de arquetas e tapas de rexistro, á reposicion dun colector de drenaxe transversal no camiño de Filgueiras e á execución de nova sinalización horizontal e vertical, co fin de mellorar a seguridade e a ordenación do tráfico.

Pola súa banda, o concelleiro de Vías e Obras, Ramón Porto, sinalou que “se trata dunha actuación moi necesaria, que dá resposta ao mal estado do pavimento nalgúns tramos e que permitirá contar con camiños máis seguros e duradeiros”, engadindo que “as obras están deseñadas para minimizar as molestias á veciñanza e garantir unha execución áxil e eficiente”.

As obras desenvolveranse en camiños situados nas parroquias de San Salvador de Budiño, O Porriño e Atios. O prazo previsto de execución dos traballos será de seis semanas, unha vez adxudicadas as obras, establecéndose durante ese período as medidas necesarias de sinalización e regulación do tráfico.

Con esta licitación, o Concello do Porriño reafirma o seu compromiso coa mellora das infraestruturas municipais, especialmente nos núcleos rurais, apostando por actuacións que contribúen á seguridade viaria e á calidade de vida da cidadanía.

16/12/2025 in Parroquias, Vías e obras

O Porriño aposta pola enerxía limpa cunha inversión de máis de 113.000 euros nun proxecto innovador de autoconsumo colectivo

 

  • O Concello adhírese ao programa “Concellos + Renovables”, impulsado pola Deputación de Pontevedra e financiado con fondos Next Generation
  • A iniciativa permitirá instalar unha planta fotovoltaica con almacenamento no pavillón municipal e reducir custos enerxéticos e emisións de CO₂

O Porriño, 15 de decembro de 2025.- O Concello do Porriño vén de adherirse ao proxecto PR-RENOINN Concellos + Renovables I, unha iniciativa innovadora promovida pola Deputación de Pontevedra e presentada ante o Instituto para a Diversificación e Aforro da Enerxía (IDAE), co obxectivo de impulsar o autoconsumo colectivo con sistemas de almacenamento e garantir a participación de consumidores vulnerables.

O proxecto permitirá avanzar cara a un modelo enerxético máis sostible, eficiente e tamén inclusivo, reducindo o consumo eléctrico, os custos asociados e as emisións de CO₂, ao tempo que se combate a fenda enerxética.

O alcalde do Porriño, Alejandro Lorenzo, sinalou que “este proxecto supón un paso firme na aposta do Concello polas enerxías renovables e pola sustentabilidade. O rexedor destacou ademais que “o autoconsumo colectivo permítenos optimizar os recursos públicos e avanzar cara a un Concello máis eficiente e responsable co medio ambiente”.

O custo total das actuacións previstas ascende a 113.654,09 euros, dos cales 64.440,50 euros serán financiados a través dunha subvención do IDAE con cargo aos fondos Next Generation EU; a Deputación de Pontevedra achegará 24.975 euros, mentres que o Concello do Porriño asumirá os 24.238,59 euros restantes con fondos propios.

Deputación e Concello xa asinaron o convenio para levar a cabo os traballos de instalación e posta en funcionamento dunha instalación fotovoltaica de autoconsumo colectivo no pavillón municipal de capacidade máxima de 99,99 kWp, composta por 185 paneis solares de 540 W, así como dun sistema de almacenamento de enerxía de 50 kWh mediante baterías de litio. A instalación contará tamén cun sistema software de monitorización, que permitirá controlar en tempo real a produción e o consumo enerxético.

O proxecto inclúe ademais a participación obrigatoria de consumidores vulnerables, que representarán polo menos o 10 % da enerxía producida, garantindo así un acceso máis xusto e sostible á enerxía renovable e contribuíndo a reducir a fenda enerxética no municipio.

Con esta iniciativa, o Concello do Porriño reafirma o seu compromiso coa transición enerxética, a innovación e a sustentabilidade, avanzando cara a un modelo de desenvolvemento máis respectuoso co medio ambiente e socialmente responsable.

 

15/12/2025 in Infraestruturas, Medio Ambiente

O Porriño, referente de solidariedade en Galicia coa súa elevada taxa de doazón de sangue

 

  • Tras acadar 1.375 doazóns o pasado ano e situarse moi por riba da media autonómica, O Porriño acolle hoxe unha nova visita da unidade móbil de doazón de sangue dentro da súa campaña especial de Nadal

O Porriño, 15 de decembro de 2025.- O Concello do Porriño continúa a destacar polo compromiso solidario da súa cidadanía nas doazóns de sangue e anima a seguir participando nunha das campañas máis importantes do ano. En 2024, a veciñanza efectuou 1.375 doazóns de sangue, o que supuxo 66 doazóns por cada 1.000 habitantes, unha taxa 27 puntos superior á media galega e que sitúa ao municipio como un dos máis solidarios da provincia de Pontevedra e de toda Galicia.

Dende a Axencia Galega de Sangue, Órganos e Tecidos (ADOS) sinalan que do presente exercicio, polo momento, non se dispoñen de datos oficiais pero aseguran que a participación está sendo excelente e estímase unha participación similar, “o que xa é moito, pois acadadas estas taxas de doazón, resulta complexo xa non só incrementalas, senón mantelas. Trátase de índices moi elevados e que falan moito e moi ben do carácter solidario dos seus veciños e veciñas”, indican dende ADOS.

Neste sentido, o alcalde do Porriño, Alejandro Lorenzo, expresa “o noso máis sincero agradecemento a todas as persoas que, coa súa solidariedade, contribuíron a estas elevadas cifras de doazón. A presenza da unidade móbil hoxe na nosa vila é unha nova oportunidade para que moitas máis persoas se sumen a este xesto altruísta. Cada doazón axuda a salvar vidas e fortalécenos como comunidade.”

Con motivo da campaña especial de Nadal, que se estende do 15 de decembro ao 15 de xaneiro para cubrir as necesidades dos centros sanitarios, unha unidade móbil de doazón de sangue permanece hoxe no Porriño. Está, como sempre, ao carón do Centro Cultural, en horario de 10.00 a 14.30 horas e de 16.00 a 21.00 horas, facilitando así que máis persoas poidan doar sangue sen ter que desprazarse fóra do municipio.

A colaboración de todos é fundamental para alcanzar a meta de 8.500 doazóns que precisan os centros sanitarios nestas datas tan especiais. Dende ADOS aseguran que “nos consta a excelente participación de todos os veciños e veciñas do Porriño e, por suposto, da corporación municipal, que sempre nos apoia no desenvolvemento de campañas destinadas a promover este acto solidario. Ademais, todas as iniciativas destinadas a sensibilizar á poboación que parten desde a corporación municipal axúdanos a achegarnos de modo máis directo á cidadanía”.

15/12/2025 in Sanidade

Concello de Porriño e Xunta de Galicia anuncian a licitación do proxecto de construción de 300 novas vivendas

 

  • A conselleira de Vivenda e Planificación de Infraestruturas, María Martínez Allegue, e o alcalde Alejandro Lorenzo estiveron esta mañá no lugar onde se desenvolverá este Proxecto de Interese Autonómico (PIA) por importe de 212.414 euros

O Porriño, 13 de decembro de 2025.- A construción de 300 novas vivendas das cales o 80 % estarán sometidas a réxime de protección, na rúa Fernández Areal, dá un paso máis coa licitación do proxecto. A conselleira de Vivenda e Planificación de Infraestruturas da Xunta de Galicia, María Martínez Allegue, acompañada do secretario xeral de Vivenda e Urbanismo, Heriberto García e do director territorial en Pontevedra, José Manuel González, acudiu esta mañá ao Porriño onde foi recibida polo alcalde Alejandro Lorenzo e concelleiros do equipo de goberno local, para anunciar, no mesmo lugar onde se situará o desenvolvemento residencial, a licitación deste Proxecto de Interese Autonómico (PIA) por importe de 212.414 euros.

O Consello da Xunta deulle xa luz verde ao inicio da tramitación do expediente relativo á delimitación e declaración de interese autonómico das actuacións para habilitar solo residencial destinado a vivendas protexidas (80%) e libre (20%). O visto e prace a este trámite ten por obxectivo a aprobación e a delimitación do ámbito de actuación identificado no planeamento xeral como solo urbanizanable, localizado na zona próxima aos Xulgados, centro de saúde e pavillón municipal de deportes, dentro do polígono SUR-PPR-2, cunha superficie de 43.000 metros cadrados na que se prevé tamén a creación de espazos libres e verdes.

O alcalde explicou que se trata “dun proxecto clave para responder á crecente demanda de vivenda accesible no municipio”, destacando o papel do mesmo para acompañar o crecemento demográfico do Porriño, “consolidando o municipio como un lugar atractivo para vivir e formar familia”. O rexedor cualificou a visita como “un paso importante para reforzar a colaboración institucional e garantir a continuidade dos trámites necesarios”. Neste sentido, sinalou tamén que “cando estea o proxecto realizado poderemos coñecer a ordenación exacta do ámbito e informaremos e atenderemos ás solicitudes da veciñanza que poidan xurdir”. Abordaranse as cuestións relacionadas coa planificación urbana, a integración de zonas verdes e a creación de espazos públicos de calidade que complementen as futuras vivendas.

O Concello reiterou a súa disposición a coordinar todos os pasos necesarios para que este proxecto avance con axilidade e se converta nunha realidade no menor tempo posible, contribuíndo a ofrecer vivenda accesible e a planificar o crecemento do municipio de forma ordenada e sostible.

 

13/12/2025 in Urbanismo, comercio e industria

A cúpula máxima ilumina o Nadal do Porriño cunha experiencia única para toda a familia

 

  • Unha burbulla recrea, no Parque do Cristo, unha atmosfera encantada, chea de ilusión e cun escenario ambientado e decorado para recibir a Papá Noel e aos Reis Magos
  • Fin de semana de música de rondallas, contacontos, teatro, espectáculo de títeres e animación de rúa

O Porriño, 12 de decembro de 2025.- O Porriño xa respira ambiente festivo coa apertura esta tarde da cúpula máxica de Nadal, situada no Parque do Cristo. Trátase dunha espectacular estrutura en forma de burbulla de oito metros de diámetro que permanecerá aberta desde hoxe e ata véspera de Reis, ofrecendo un espazo cheo de ilusión para toda a familia.

Nesta cúpula, totalmente ambientada para a ocasión, o público poderá deixar as súas cartas e vivir encontros moi especiais: o 24 de decembro estará Papá Noel, mentres que o 5 de xaneiro, coincidindo coa cabalgata, serán os Reis Magos quen escoiten os desexos dos máis pequenos.

O alcalde Alejandro Lorenzo sinala que “este Nadal demos un paso máis para facer do Porriño un lugar no que a ilusión se viva en cada recuncho. A nova cúpula máxica é un espazo pensado para toda a veciñanza, en especial os máis pequenos da casa, un punto de encontro onde nenos e maiores poden desfrutar da maxia destas datas. Queremos un Nadal que una á xente, que encha as rúas de vida, música e tradición, e que faga sentir orgullosos a todos os porriñeses e porriñesas. Con esta programación ampla que deseñamos, e na que ten especial mención a implicación das nosas asociacións, O Porriño consolídase como unha vila que celebra o Nadal cunha identidade propia, aberta e acolledora. Convido a toda a cidadanía a compartir con nós este espírito do Nadal reflexado, máis ca nunca, nesta cúpula”.

A programación de Nadal para esta tarde contempla a representación infantil de títeres “Barriga Verde ataca de novo”, da compañía Títeres Alakrán, ás 17.00 horas na Praza Arquitecto Antonio Palacios.

Ao longo da fin de semana a actividade non para. Mañá sábado, á mesma hora e no mesmo lugar, será a quenda da compañía Barafunda Animación co contacontos “Xan das Ondas” e Fantasy Troupe de Anim@ocio Miúdos encherá de música e diversión as rúas da vila de 17.00 a 20.00 horas. O domingo 14 Títeres Alakrán regresará cunha nova proposta, “A pita xefa”, unha adaptación da obra de Marta Lado, obra gañadora do III Premio Fina Casalderrey de Literatura Infantil pola Igualdade 2021.

Ademais, continúan os percorridos das rondallas polo casco urbano e polas distintas parroquias, levando o espírito festivo e de Nadal por tódolos recunchos do municipio. Así, mañá sábado, a Rondalla da Asociación Recreativa Santa Eulalia de Atios actuará ás 16.15 horas no Centro Cultural A Lagoa, en Orbenlle e as rondallas da Asociación Cultural Musical de Pontellas e Santa María do Porriño farano ás 19.00 horas no centro da vila. O domingo 14 a Rondalla de Atios ofrecerá un primeiro pase ás 17.00 horas no Centro Cultural A Forna, en Budiño, para máis tarde, ás 18.30 horas, realizar un pasarrúas no casco urbano que culminará no Círculo Recreativo Cultural; por outra parte, a Rondalla Santa María do Porriño actuará ás 18:00 horas no Centro Cultural Alba, de Torneiros, dende onde emprenderá camiño ata a Asociación de Veciños de San Salvador, onde volverá a tocar a partir das 19.00 horas.

Deste modo, as rondallas volverán converterse nesta fin de semana nun dos grandes atractivos do Nadal porriñés, mantendo viva unha tradición profundamente enraizada e achegando música, convivencia e identidade a cada recuncho da vila.

Con esta ampla programación e coa incorporación da nova cúpula máxica, O Porriño consolida un Nadal cheo de propostas para todas as idades, convidando a veciños e visitantes a vivir a maxia destas datas dun xeito especial.

12/12/2025 in Cultura e festas

O Concello apoia ao comercio local coa campaña de Nadal e Reis de Acipor

 

  • A iniciativa repartirá 3000 euros en vales para incentivar as compras no comercio de proximidade durante estas datas festivas

O Porriño, 11 de decembro de 2025.- O Concello do Porriño únese ao tecido empresarial local para apoiar a campaña de Nadal impulsada pola Asociación de Comerciantes e Industriais de Porriño (Acipor). A nova edición da campaña de promoción do comercio, que se desenvolve do 5 de decembro de 2025 ao 10 de xaneiro de 2026, sorteará 50 cheques-compra de 60 euros cada un deles entre a clientela que realice as súas compras nos establecementos asociados.

A iniciativa conta, un ano máis, coa colaboración do Concello do Porriño, que destaca o impacto positivo deste tipo de accións na economía local e na dinamización das rúas durante o Nadal. “O comercio local é unha parte esencial da identidade do noso municipio, un motor económico e social que mantén vivas as nosas rúas. Por iso, desde o Concello estamos sempre ao lado de Acipor para impulsar este tipo de campañas que favorecen tanto aos negocios como á veciñanza porriñesa”, salientou o alcalde do Porriño, Alejandro Lorenzo, durante a presentación na que estivo unha representación dos comerciantes encabezada pola súa presidenta Juana Pérez.

A campaña contempla dúas modalidades de participación: por un lado, rifas en papel que entregarán os comercios adheridos e que permitirán participar nos sorteos presenciais do 22 de decembro de 2025 e do 14 de xaneiro de 2026, ás 20.30 horas, na propia sede de Acipor; e, por outro, o rexistro de tíckets a través da páxina web www.ccamorea.es ou escaneando o código QR, opción que ofrece aos clientes a posibilidade de inscribirse tamén nos dous sorteos dixitais, previstos para as mesmas datas. Nun acción de incentivar a participación online, dende Acipor promocionan esta vía destinando 34 vales para o sorteo dixital, que se realizará mediante unha app, e 16 para os boletos entregados fisicamente.

En total, repartiranse 25 cheques en decembro e 25 cheques en xaneiro, que deberán ser consumidos exclusivamente nos establecementos pertencentes a ACIPOR nas datas indicadas en cada vale.

O alcalde concluíu destacando que “apostar polo comercio de proximidade é investir no Porriño. Cada compra que facemos aquí revértese directamente na economía local, no emprego e na vida diaria do noso pobo. Esta campaña de Nadal é un exemplo de colaboración que funciona, e estou convencido de que volverá ser un éxito”.

11/12/2025 in Urbanismo, comercio e industria

O Concello aproba por unanimidade o traspaso á Xunta de Galicia do Servizo da Unidade Asistencial de Drogodependencias

 

  • A corporación municipal deu luz verde ao acordo que permitirá integralo no Servizo Galego de Saúde, garantindo a continuidade da atención e a estabilidade do persoal e dos recursos

 

O Porriño, 10 de decembro de 2025.- O Concello do Porriño celebrou esta mañá un Pleno extraordinario urxente no que se aprobou por unanimidade o traspaso á Xunta de Galicia dos servizos e medios persoais e materiais vinculados á Unidade Asistencial de Drogodependencias (UAD) municipal, un recurso que leva preto de catro décadas prestando asistencia sanitaria e apoio ás persoas con problemas de drogodependencias dunha vintena de concellos do sur da provincia de Pontevedra.

Co acordo adoptado hoxe, o Concello valida o borrador do Decreto de traspaso elaborado pola Consellería de Sanidade e remitido pola FEGAMP, así como o certificado da Comisión Mixta encargada de avaliar e formalizar a integración das UADs municipais no sistema sanitario autonómico. O Porriño é unha das 13 unidades existentes en Galicia que se incorporarán ao Servizo Galego de Saúde (SERGAS).

A concelleira de Sanidade e Política Social, Teresa Veloso, explicou no Pleno que este traspaso “supón un avance importante na integración funcional e sanitaria dun servizo esencial, garantindo unha atención máis coordinada, estable e plenamente incorporada ao ámbito sanitario autonómico”.

O acordo plenario inclúe tamén a aprobación dos anexos correspondentes ao persoal que se integra no SERGAS, os postos vacantes, o inventario de bens, contratos e inmobilizado, así como a cesión temporal do local municipal situado no edificio do Centro Cívico, onde continuará funcionando a UAD.

Desde a Intervención Municipal emitiuse un informe favorable ao considerar que o traspaso é positivo para a estabilidade orzamentaria, mentres que o Secretario Municipal informou tamén favorablemente tanto sobre a cesión do inmoble como sobre o proceso de integración do persoal.

O Concello notificará ás persoas traballadoras afectadas a súa nova situación administrativa e remitirá ao SERGAS toda a documentación preceptiva. O acordo queda supeditado á aprobación definitiva do Decreto por parte da Xunta de Galicia, previsto para entrar en vigor a partir do 1 de xaneiro de 2026.

O alcalde Alejandro Lorenzo lembra que o Concello do Porriño vén prestando desde fai 37 anos o servizo de atención a persoas drogodependentes a través do denominado centro de asistencia de drogodependencias e marxinación no ano 1988, que logo pasou a ser denominado Unidade Asistencial de Drogodependencias (UAD) no ano 1991, nome que persiste na actualidade. Expertos nesta materia fixeron recomendacións de que este tipo de centros debían integrase, funcional e organicamente, nos servizos de atención primaria das Comunidades Autónomas ou, de ser o caso, de atención especializada-saúde mental.

10/12/2025 in Sanidade

O Porriño celebra unha xornada para abordar a prevención da violencia de xénero e a protección das vítimas desde unha perspectiva social e tecnolóxica

 

  • Será este xoves, ás 17.30 horas, na Sala de Comunicacións aberta a toda a cidadanía

O Porriño, 9 de decembro de 2025.- Baixo o nome de “A prevención da violencia de xénero e a protección das vítimas, dende unha perspectiva social e tecnolóxica”, o Concello do Porriño organiza unha xornada enmarcada na conmemoración do 25N. Trátase de tres relatorios a través dos cales se busca ofrecer un espazo de reflexión, formación e coordinación entre profesionais, ademais de achegar á cidadanía información actualizada sobre os recursos dispoñibles fronte á violencia de xénero.

O encontro, co lema “non á violencia. Si a unha sociedade libre, xusta e segura” terá lugar este xoves, 11 de decembro, ás 17.30 horas na Sala de Comunicacións e contará coa participación de distintos perfís expertos na atención, intervención e apoio ás mulleres vítimas.

Roberto Barba, director Xeral de Loita contra a Violencia de Xénero da Xunta de Galicia, abrirá a xornada cun relatorio centrado nas prestacións económicas e dispositivos a man das mulleres vítimas de violencia de xénero. A continuación, Mª José Rodríguez, xefa da Unidade da Violencia sobre a Muller en Pontevedra, abordará o papel das mesas locais de violencia de xénero como mellora na coordinación entre os axentes que interveñen directamente coas vítimas. Ademais, profundará nos dispositivos de seguridade destinados a garantir a protección destas. Pechará as intervencións Elena Molanes, directora do Centro de Emerxencias para Mulleres Vítimas de Violencia de Xénero (CEMVI), co relatorio “Cando a emerxencia se transforma en esperanza: o rol dos centros de acollida”, na que explicará como estes recursos se converten nun espazo seguro e nunha oportunidade de reconstrución vital para as mulleres que dan o primeiro paso para saír da violencia.

Con esta xornada, o Concello do Porriño reafirma o seu firme compromiso na loita contra a violencia de xénero e na promoción dunha sociedade libre, xusta e segura, facilitando espazos de colaboración e formación que contribúan a mellorar a prevención, a detección e a atención ás vítimas.

09/12/2025 in Igualdade

O Concello impulsa o gran parque fluvial do Louro coa compra de 64 novas parcelas

 

  • O alcalde Alejandro Lorenzo vén de asinar a adquisición de 32 e antes de que remate o ano rubricará a compra doutras tantas, que sumadas ás 24 mercadas en 2023 suman unha superficie total de máis de 6 hectáreas que xerarán un gran espazo de recreo e lecer que actuará tamén como corredor ecolóxico e infraestrutura de protección fronte as inundacións

O Porriño, 8 de decembro de 2025.- O Concello do Porriño dá un novo paso decisivo na transformación ambiental da contorna do río Louro. O alcalde Alejandro Lorenzo vén de formalizar a compra de 32 novas parcelas situadas na marxe do río, unha actuación estratéxica que permitirá avanzar na creación do futuro Espazo Público de Lagunaxe Multifuncional, unha infraestrutura verde destinada a reducir o risco de inundación, restaurar o ecosistema fluvial e xerar un novo ámbito de convivencia e uso social para a cidadanía. Un proxecto incluído no PIA que se levará a cabo con fondos europeos.

O alcalde destacou a relevancia deste avance asegurando que “este é un paso histórico para o Porriño. Veño de asinar cos propietarios a compra destas 32 parcelas que nos permiten consolidar o espazo necesario para un gran parque fluvial que protexerá das inundacións e que, ao mesmo tempo, se converterá nun novo punto de encontro, recreo e calidade de vida para toda a veciñanza”. O rexedor subliñou tamén que o proxecto “coloca ao municipio á vangarda das políticas ambientais e de adaptación ao cambio climático”.

Lorenzo lembra que “estas novas adquisicións súmanse ás 24 parcelas mercadas en 2023 e outras 32 cuxa compra asinarei antes de rematar este ano”, configurando un conxunto continuo de terreos que suman 63.475,19 metros cadrados, que “con futuras adquisicións que seguiremos facendo” completará a superficie necesaria para a execución integral do espazo.

O proxecto define un modelo de adaptación climática fundamentado en solucións baseadas na natureza, coa creación dun lagunaxe multifuncional capaz de almacenar auga en episodios de choivas intensas. Isto permitirá protexer áreas urbanas e industriais especialmente vulnerables ás inundacións, ao tempo que se xera un novo pulmón verde para o municipio.

A intervención inclúe tamén a restauración ecolóxica das ribeiras e humedais asociados ás Gándaras de Budiño, espazo da Rede Natura 2000, incorporando vexetación autóctona, eliminando especies invasoras e creando zonas de alta biodiversidade.

O futuro parque fluvial ofrecerá novos espazos públicos para o lecer e a vida activa, con sendas peonís e ciclistas, pasarelas de madeira sobre zonas inundables, áreas de xogo, puntos de encontro e zonas recreativas que conectarán directamente O Porriño con Torneiros, superando a actual fractura territorial xerada pola canle do Louro.

Con esta adquisición de parcelas, o Concello consolida un proxecto clave para o seu futuro ambiental e urbano: un espazo natural resiliente, accesible e útil para a cidadanía, pensado para mellorar a calidade de vida e para afrontar con garantías os efectos crecentes do cambio climático.

 

 

08/12/2025 in Sen categoría