Novas

O Porriño, á procura de talentos musicais

O Concello publica as bases e abre o prazo para participar no xa tradicional concurso “Tes Talento?” para impulsar músicos emerxentes
Celebrarase o venres 3 e sábado 4 de outubro, sendo a gran final o domingo 5, broche de ouro das Festas do Cristo 2025, cun primeiro premio de 1.000 euros

O Porriño, 9 de setembro de 2025.- O Concello do Porriño vén de publicar as bases do concurso de novos talentos musicais Val da Louriña “Tes talento?”, unha cita xa tradicional no calendario das Festas do Cristo dirixida ao descubrimento de novos artistas e a promoción de músicos emerxentes, nun certame estruturado en varias actuacións en directo abertas ao público, o que supón a súa vez un atractivo festivo e cultural na vila.

“‘Tes Talento?’ é unha oportunidade fundamental para descubrir e apoiar os novos talentos musicais do noso Concello. Queremos ofrecer un espazo onde os artistas locais emerxentes, que moitas veces precisan dese empuxe para dar a coñecer a súa música, poidan brillar e medrar profesionalmente a través desta oportunidade, de poder subirse a un escenario e amosar diante dun xurado profesional e tamén dun gran público, o seu potencial”, explica o alcalde Alejandro Lorenzo que lembra que todos os gañadores de edicións anteriores, a día de hoxe dedícanse profesionalmente á música, e viven dela, un grupo de xente nova á que, precisamente, recibiu esta mañá no Concello.

O concurso está dirixido a artistas afeccionados que desenvolven a súa vocación no país, calquera que sexa o seu estivo musical, establecéndose dúas modalidades: infantil, ata os 15 anos inclusive, e adultos, de 16 en adiante. De igual xeito, poderán presentarse grupos musicais de ata un máximo de catro compoñentes en calquera das dúas categorías.

Os premios establecidos nesta edición son de 1.000 euros e a produción dun tema propio (valorado en 600 euros) para o primeiro posto, 400 euros para o segundo e 250 euros para o terceiro no caso da modalidade de adultos. En infantil farase entrega dun lote de produtos escolares xunto cun trofeo para os tres finalistas clasificados.

O prazo de inscrición ábrese hoxe martes, ata ás 14.00 horas do vindeiro 20 de setembro, podendo formalizarse a mesma de xeito presencial no rexistro xeral do concello (de luns a venres en horario de 09.00 a 14.00) ou a través da sede electrónica. En ambos casos é preciso entregar o impreso cuberto de solicitude de inscrición dispoñible na páxina web www.ecultura.net, acompañado no caso de menores da autorización pertinente, modelo que tamén se pode descargar na mesma web, na cal tamén están publicadas as bases para a súa consulta.

Como vén sendo habitual, “Tes Talento?” iniciarase cunha primeira fase preliminar o día 26 de setembro, pechada ao público, na cal o xurado realizará unha preselección das persoas inscritas. As seleccionadas, na categoría de adultos, participarán nas semifinais que se celebrarán o venres 3 e sábado 4 de outubro, das cales sairán aquelas finalistas que actuarán na gran final do domingo 5. No caso da modalidade infantil, os preseleccionados na fase preliminar actuarán directamente na final.

Entre os requisitos da actuación establécese un tempo máximo de tres minutos, con temática, estilo e idioma libres. O xurado estará constituído por un comité de observación e valoración de premios e composto por unha serie de membros en número impar; o seu veredicto será definitivo e inapelable.

“Tes Talento?” preséntase, pois, como unha iniciativa que impulsa e brinda unha oportunidade única aos músicos emerxentes do Porriño e arredores para darse a coñecer e medrar profesionalmente, e por outra, convértese nunha actividade lúdica que enriquece a programación das Festas do Cristo, sendo un gran atractivo de público, creándose un espazo no que se fusiona cultura, música e diversión.

Descarga aquí as bases, a solicitude de inscrición e autorización para menores:

BASES-CONCURSO-NOVOS-TALENTOS-MUSICAIS-VAL-DA-LOURINA-2025

ANEXO-I_Solicitude-Inscricion-Concurso-Novos-Talentos-Musicais-Val-da-Lourina-2025

ANEXO-II_Autorizacion-Concurso-Novos-Talentos-Musicais-Val-da-Lourina-2025

09/09/2025 in Cultura e festas

Unha vintena de comercios sacan o seu stock no XXXII Merca na rúa na zona peonil do Porriño

A tradicional feira de oportunidades celébrase o venres 12 e sábado 13 ao longo de todo o día, con descontos que parten do 50% e unha morea de actividades para tódolos públicos destacando como novidade un obradoiro creativo de moda

O Porriño, 8 de setembro de 2025.- A zona peonil do Concello do Porriño acolle como xa vén sendo habitual por estas datas a tradicional feira de oportunidades organizada por Acipor. Merca na rúa chega a súa trixésimo segunda edición con importantes descontos que parten do 50% e actividades lúdicas para tódolos públicos, destacando como novidade un taller creativo de moda.

Son un total de 21 establecementos comerciais os que instalarán cadanseu posto o venres 12 e sábado 13, en horario ininterrompido, de 10.00 a 21.00 horas, de sectores que abranguen dende o téxtil, calzado, complementos, deporte e incluso viaxes.

“A feira Merca na Rúa é moito máis que unha cita comercial; é un acto de celebración do noso comercio local, do esforzo diario dos nosos establecementos e da vitalidade das rúas do Porriño”, explica o alcalde Alejandro Lorenzo. Esta iniciativa, que na súa quenda do mes de setembro, pois celébrase sempre outra en marzo, enmárcase nas Festas do Cristo, “permite que veciños e visitantes atopen oportunidades únicas ao tempo que apoiamos a economía local, contribuíndo á continuidade do tecido comercial que dá vida ao noso concello. Desde o Concello do Porriño seguiremos colaborando con Acipor para que este evento continúe medrando e consolidándose como un referente na comarca”, indican as concelleiras de Comercio, Rosa Isabel Alonso, e Mercado, Antía Carrera.

De xeito paralelo, levaranse acabo actividades lúdicas para cativos e non tan cativos. Así haberá inchables o venres pola tarde e o sábado en horario de mañá e de tarde; tamén para o público infantil desenvolveranse obradoiros os dous días, de 18.00 a 20.00 horas. Xa para o público adulto está pensado o espectáculo de humor que terá lugar o venres ás 20.00 horas e o taller creativo “Combina e apoia o local” o sábado ás 18.00 horas. Todo elo de balde.

“Merca na Rúa naceu como unha proposta práctica para que os comercios locais poidan dar saída ao seu stock de tempada, tanto de inverno como de verán. Por iso a celebramos dúas veces ao ano, adaptándonos ao ritmo real do comercio de proximidade. Nesta 32ª edición incorporamos novas propostas creativas, como o obradoiro de moda, que reforzan a idea de que mercar no local é sinónimo de estilo, aforro e compromiso coa nosa vila”, sinala Juana Pérez, presidenta da Asociación de Comerciantes e Industriais do Porriño (Acipor).

Obradoiro creativo de moda

Para os amantes da moda, o XXXII Merca na rúa inclúe, da man da Asociación Remade Textil, un obradoiro creativo no que, segundo explican dende Acipor, “xogaremos co meu descubrimento favorito cunha prenda adquirida na propia feira, como levar e actualizar calquera look, un look para tres ocasións diferentes, como identificar cores e como combinalas e remataremos cunha mini pasarela divertida para amosar os resultados”.

O XXXII Merca na Rúa reafírmase, pois, como unha oportunidade única para apoiar ao comercio de proximidade, desfrutar dun ambiente festivo nas rúas do Porriño e atopar grandes descontos en produtos de calidade. Unha iniciativa consolidada que, edición tras edición, fortalece o vínculo entre comerciantes e veciñanza, dinamiza a economía local e converte a vila nun punto de encontro onde o comercio, a creatividade e o lecer van da man.

08/09/2025 in Cultura e festas, Urbanismo, comercio e industria

O Porriño inicia o curso escolar cun incremento do alumnado

Convértese no único municipio da área de Vigo no que crece o número de estudantes acadando un total de 2695, sendo as etapas de Educación Infantil e de Bacharelato onde se rexistra ese ascenso

O Porriño, 8 de setembro de 2025.- O inicio do curso escolar 2025/2026 no Porriño marca unha tendencia positiva e singular respecto de Vigo e a súa comarca, así como do conxunto de toda Galicia, onde as cifras globais marcan un descenso de número de estudantes. Así, o Concello do Porriño convértese no único da área metropolitana onde se incrementa a o número de alumnado matriculado.

Ao igual que a media de toda a Comunidade, o resto de localidades da comarca rexistran unha cifra inferior que o ano pasado, sen embargo no Porriño as matrículas van en aumento “unha boa sinal porque reflicte que O Porriño segue medrando, que somos un lugar atractivo para vivir e para formar unha familia. Ademais, amosa a confianza das familias nos servizos públicos que ofrecemos que abranguen dende unha conciliación gratuíta con campamentos nas diferentes épocas vacacionais do ano e outras actividades de lecer ata a propia oferta cultural”, sinalaba esta mañá o alcalde Alejandro Lorenzo durante unha visita aos centros escolares para dar a benvida ao alumnado e ao profesorado e coñecer o transcurso desta primeira xornada lectiva.

As cifras deste curso 2025/2026 reflexan un incremento de 31 estudantes no cómputo global, acadando os 2.695, 31 máis que no 2024/2025. Por niveis, son 448 as matrículas en Educación Infantil, 1088 en Educación Primaria, 37 en Educación Especial, en ESO hai 838 alumnos e 284 cursando Bacharelato. Precisamente, é no Bacharelato onde maior incremento se rexistrou, un 27% máis, e tamén na etapa de Infantil sumáronse 7 nenos máis. “Este crecemento reflicte a vitalidade demográfica do concello e a súa capacidade de atraer novas familias”, remarca o alcalde.

Acondicionamentos das instalacións escolares

O Concello do Porriño pon a punto as instalacións dos diferentes colexios públicos do municipio, executando diversos traballos de mantemento e mellora que supuxeron diversas reparacións que abranguen dende as superficies de pavillóns e ximnasios, a persianas, aseos, tellados e redes que bordean os patios. Tamén se lavaron e pintaron algúns muros exteriores e fachadas.

Estas actuacións evidencian o compromiso do goberno local coa calidade da educación pública e co benestar da comunidade educativa, creando unha contorna máis segura, cómoda e motivadora para o alumnado e o profesorado.

08/09/2025 in Educación e tecnoloxía

Dez horas de música urbana en directo no Porriño

O aparcadoiro da rúa Progreso acolle dende primeira hora da tarde o Negrita Music Festival

O Porriño, 6 de setembro de 2025.- O Porriño volve ser por terceiro ano consecutivo a única parada en Galicia do Negrita Music Festival que pechará a xira nacional a vindeira fin de semana en Barcelona. O aparcadoiro da rúa Progreso acolle a milleiros de persoas dende primeira hora desta tarde concertos de maneira ininterrompida de artistas de música urbana liderados por Yung Beef, cabeza de cartel desta edición, que se prevé suba ao escenario ás 22.15 horas.

“O Negrita Music Festival, igual que outros eventos que xa se teñen celebrado no noso concello —e os que están por vir—, son unha mostra clara do atractivo que representa O Porriño para as promotoras a nivel nacional. Cada vez son máis as que ven na nosa vila un auténtico fervedoiro cultural, cun público entregado e unhas condicións únicas para acoller grandes citas musicais e culturais. E iso é motivo de orgullo para todos os porriñeses e porriñesas”.

West SRK abrirá o festival, ás 16.15 horas, ao que seguirán Xiyo & Fernández ás 17.15h, Cyril Kamer ás 18.15 horas, La Pantera ás 19.30 horas e Hard GZ sobre as 20.45 horas. Logo da actuación de Yung Beef, será a quenda de Groove Amigos B2B Traffic House (23.20 h), seguido de Alvama Ice (00.00 h) e pechará Galician Army a partir das 01.00 horas.

O Negrita Music Festival consolídase un ano máis como un referente da música urbana en Galicia, escollendo novamente O Porriño como única parada na Comunidade. Ademais de traer artistas de primeiro nivel e ofrecer unha xornada de música continua, o evento serve como pistoletazo de saída ás Festas do Cristo, reforzando o papel do municipio como epicentro cultural e festivo.

06/09/2025 in Cultura e festas

Vinte pilotos na vinte edición do Dirt-Track Xacob Agra

A proba de motociclismo celebrarase o vindeiro domingo, ás 18.00 horas, no velódromo municipal

O Porriño, 5 de setembro de 2025.- Unha vintena de pilotos de España e Portugal participarán no XX Dirt-Track Xacob Agra que se celebrará o vindeiro domingo, 7 de setembro, no velódromo municipal a partir das 18.00 horas. A proba foi presentada esta tarde na Praza Arquitecto Antonio Palacios polo alcalde Alejandro Lorenzo; o concelleiro de Deportes, Abel Estévez; o presidente do Moto Club Papaya, Joaquín Agra e algúns dos pilotos participantes.

Durante a presentación, o alcalde Alejandro Lorenzo destacou a importancia deste evento para o municipio enmarcado nas Festas do Cristo 2025, “sendo un referente que cada ano reúne a veciños, afeccionados e visitantes arredor dunha paixón compartida polas dúas rodas. Desde o Concello seguiremos apoiando este tipo de iniciativas que dinamizan a vida social e deportiva da nosa vila”.

Con vinte edicións ás costas, o Dirt-Track Xacob Agra consolídase como unha cita imprescindible do motociclismo galego, combinando espectáculo, tradición e compromiso coa promoción do deporte local. A organización convida a toda a cidadanía a achegarse ao velódromo para gozar dunha tarde de emoción e velocidade. As entradas poden adquirirse no despacho de billetes o mesmo día. A proba conta coa colaboración do Concello do Porriño, Federación Galega de Motociclismo e Xunta de Galicia.

05/09/2025 in Cultura e festas, Deportes

As xogadoras do Balonmán Porriño serán as pregoeiras das Festas do Cristo 2025

Beret, Sash!, Herdeiros da Crus, Panorama, París de Noia e o certame Tes talento, grandes citas musicais da programación que se prolongará ata o 5 de outubro coa Festa dos Callos
O alcalde Alejandro Lorenzo destacou a diversidade de actos pensados para todas as idades con concertos, deporte, comercio, monólogos, espectáculos e obradoiros, agradecendo a colaboración e implicación de asociacións, clubs deportivos e veciñanza

O Porriño, 5 de setembro de 2025.- As subcampioas de Europa de balonmán feminino serán as encargadas de dar o pregón das Festas do Cristo 2025. “É un orgullo inmenso contar coas xogadoras do Club Balonmán Porriño como pregoeiras das nosas festas. Son un exemplo de esforzo, constancia e superación. O que conseguiron na competición europea é histórico, pero máis alá dos resultados, o que máis admiramos é o seu espírito loitador. É un orgullo contar cunhas embaixadoras como elas, dentro e fóra da pista”, sinalou o alcalde Alejandro Lorenzo durante o acto de presentación das Festas do Cristo 2025 que contou coa actuación do grupo Acordecans. A mostra de orgullo e recoñecemento foi mutua porque as xogadoras tamén agradeceron o apoio que dende o Concello sempre se lles brinda “para nós é unha honra ser as pregoeiras destas festas, fainos moita ilusión e esperamos estar á altura”, sinala Alicia, unha das capitanas coa que coincidiu a súa compañeira, Aitana, que remarcaba que “despois dun moi bo ano é unha maneira de dar comezo a nova tempada, para nós esta é unha gran oportunidade”, á vez que animan á toda a veciñanza a participar das festas e tamén a acudir ao pavillón a ver os seus partidos.

A lectura do pregón será o sábado 27, ás 13.00 horas, e marcará o inicio da fin de semana grande das festas, pero ata entón xa serán moitas as citas culturais que se celebren incluídas na programación que se prolongará ata o domingo 5 de outubro, coa cita gastronómica por excelencia do Porriño, a Festa do Callos, que este ano chega a súa trixésimo segunda edición. “Un ano máis, O Porriño demostra ser unha vila chea de vida, cultura e participación. Estamos seguros de que as nosas festas, que se prolongan todo este mes de setembro e a primeira fin de semana de outubro, serán un verdadeiro éxito tanto pola diversidade dos actos programados como pola implicación da veciñanza, das asociacións e dos clubs deportivos”, explicou o alcalde.

Son en total 26 xornadas de festas con máis de 70 actividades dirixidas a todos os públicos e que abranguen dende actuacións musicais, deporte, expresión escénica e tamén accións de promoción do comercio local como pode ser a xa tradicional feira de Merca na rúa, os días 12 e 13, e a nova iniciativa de Noite aberta, o venres 19, celebrándose tamén este día a Festa Flamenca e o concerto de Xoana. A primeira gran cita musical será mañá co Negrita Music Festival e continuará o venres 26 cos concertos de Heredeiros da Crus e Beret, o sábado 27 actuará Sash! e o luns do Cristo Panorama e París de Noia amenizarán a máis grande das sete verbenas que pecharán o domingo 5 con El Combo Dominicano. O certame Tes talento?, a batalla de baile e concertos Summer Son Jam e o espectáculo infantil Cantajuego Coco y Pepe completan a axenda musical na que tampouco faltarán concertos de bandas de música. No ámbito deportivo, coma sempre os clubs deportivos estarán presentes con exhibicións e presentacións das diferentes modalidades: fútbol, baloncesto, patinaxe e aeromodelismo, destacando a celebración de eventos como La nocturna mañá sábado, o Dirt-Track Xacob Agra o domingo, a Interrunning o día 21, o Torneo de Xadrez o 23 e a Milla Porriñesa o 4 de outubro. A Festa do Peregrino, monólogos, obradoiros infantís, animación de rúa con batucadas e charangas e outras actividades completan o programa festivo.

“Desde o pregón ata a tradicional Festa do Callos, broche de ouro da programación, pasando polos concertos, actividades infantís, deportivas e iniciativas de apoio ao comercio local, viviremos momentos inesquecibles que reflicten o espírito participativo e dinámico do noso pobo. Quero agradecer de corazón a todas as persoas que traballan para facer posible esta celebración e, por suposto, á cidadanía por participar con entusiasmo e respecto. O Porriño está máis vivo ca nunca e estas festas son boa mostra diso. Viva O Porriño e viva o balonmán”, rematou o alcalde.

Primeira fin de semana festiva con música urbana e deporte

Logo do espectáculo de ilusionismo de onte e o de marionetas que terá lugar esta tarde, ás 18.00 horas na Praza Arquitecto Antonio Palacios, a programación continuará ao longo da fin de semana con importantes eventos deportivos. O Club de Aeromodelismo Furaventos celebra o sábado e o domingo o Furaventos Meeting, un encontro internacional que reunirá a medio cento de pilotos de España, Francia e Portugal no que se exhibirán grandes avións. Ademais, mañá sábado, a partir das 16.00 horas, terá lugar a proba ciclista La Nocturna polas rúas do casco urbano, e o domingo, ás 18.00 horas no velódromo municipal, disputarase o XX Dirt-Track Xacob Agra.

O Negrita Music Festival será a gran cita musical da fin de semana. Mañá a partir das 16.00 horas e ata a madrugada, no aparcadoiro da rúa Progreso, actuarán West SRK, Xiyo & Fernández, Cyril Kamer, La Pantera, Hard GZ, Yung Beef, Groove Amigos B2B Traffic House, Alvama Ice e Galician Army.

Tamén o sábado, ás 20.00 horas no Parque do Cristo, concerto do trompetista Manuel Mardanás e o domingo, á mesma hora, na Praza Arquitecto Antonio Palacios, actuación “Nas tres linguas do Camiño” de Gustavo Almeida.

Toda a programación pode consultarse de xeito actualizado na web ecultura.net onde tamén se irán informando de posibles cambios debido, sobre todo, ás condicións meteorolóxicas, e irase publicando a diario nas redes sociais municipais.

De xeito paralelo, esta fin de semana Carracido celebra as festas na honra á Virxe dos Milagros. O sábado haberá verbena con Son de Cíes, o domingo misa solemne ás 12.30 horas con procesión acompañada pola Banda de Música Municipal do Porriño e o luns 8, ao mediodía, de novo misa con procesión coa Banda de Música Municipal de Redondela e pola tarde as tradicionais cucañas.

05/09/2025 in Cultura e festas

O Concello do Porriño presenta dous proxectos de mellora de infraestruturas e seguridade viaria nos polígonos das Gándaras e A Granxa por valor de 300.000 euros

A conselleira de Economía e Industria María Jesús Lorenzana anunciou esta mañá nun encontro con empresarios do municipio a ampliación do crédito dunha liña de axudas a través da cal se poderán executar ambos proxectos
O alcalde do Porriño Alejandro Lorenzo resalta os máis de 3,5 millóns de metros cadrados de solo industrial os cales con axudas como estas veranse modernizados e acondicionados

O Porriño, 4 de setembro 2025.- O Concello do Porriño foi o lugar elixido pola conselleira de Economía e Industria, María Jesús Lorenzana, para anunciar a ampliación do crédito en 2,5 millóns das axudas encamiñadas á mellora de infraestruturas dos parques empresariais de Galicia, publicada hoxe no Diario Oficial de Galicia. Nun encontro con empresarios do municipio, celebrado esta mañá na casa consistorial porriñesa, o alcalde Alejandro Lorenzo agradeceu a asistencia tanto da conselleira, acompañada da directora xeral de Estratexia Industrial e Solo Empresarial, Margarita Ardao, como dos propios empresarios animándoos a aproveitar esta xuntanza para formular suxestións e propostas, xerando un diálogo construtivo entre administracións e empresariado.

Nesta liña, o rexedor local destacou e agradeceu “a complicidade e colaboración que existe xa entre o Concello e os entes empresariais”, algo que se traduce na coordinación á hora da posta en marcha de diversas actuacións ou incluso na solicitude de subvencións como as que hoxe se anunciaron, “pois ao estudar os proxectos presentados vese que ides da man e vos complementades”, subliñaba Ardao. E é que, de xeito paralelo a estas axudas dirixidas aos concellos galegos, dende a Consellería de Economía e Industria sacaron tamén outra orde de subvencións dirixida ás asociacións e entidades de parques empresariais co mesmo obxectivo de mellora de infraestruturas e servizos, e das que os empresarios do Porriño serán tamén seguramente beneficiarios podendo así executar os seus proxectos que contribuirán á modernización e á competitividade dos seus polígonos industriais.

Lorenzo remarcou que “ao Porriño non se lle dá o apoio con palabras senón con feitos e a Xunta de Galicia faino unha vez máis con subvencións como estas destinadas á mellora deste noso pulmón industrial, con máis de 3,5 millóns de metros cadrados de solo industrial e 2.200 empresas”. A conselleira pola súa parte explicou que dado o elevado volume de solicitudes recibidas e vendo que existe unha gran demanda de necesidades reais, dende a Xunta de Galicia considerouse aumentar a partida orzamentaria inicial, de 3.032.718,00 euros, en 2.582.743,30 euros máis, de maneira que a anualidade de 2025 desta liña de axudas, pasa a ser de 5.615.461,30 euros. “Unha orde de subvencións que permite modernizarse e implementar melloras nas infraestruturas de todo tipo. Porriño foi beneficiario o ano pasado e está agora mesmo esperando que se lle poidan conceder, ao amparo desta ampliación, novas axudas para os seus parques empresariais”. Deste xeito, a falta da reunión da comisión de valoración, todo apunta a que O Porriño será un dos concellos aos que se lles concederá subvención para a execución dos dous proxectos presentados polo Concello a esta liña de axudas, un centrado na mellora de infraestruturas do Parque Empresarial das Gándaras e outro de mellora de seguridade vial do Polígono de A Granxa, que suporán unha inversión de preto de 150.000 euros cada un deles.

04/09/2025 in Urbanismo, comercio e industria, Vías e obras

O casco urbano do Porriño convértese nun circuíto de ciclismo

250 persoas tomarán as rúas da vila este sábado, a partir das 16.00 horas, para participar de La Nocturna

O Porriño, 4 de setembro de 2025.- O Concello do Porriño comeza a programación deportiva enmarcada nas Festas do Cristo coa tradicional La Nocturna este sábado, 6 de setembro, polas rúas da vila. O Club Master Louriña organiza esta proba de circuíto ao estilo americano, na que se eliminan corredores en cada volta ata que se coñece ao vencedor. Serán 250 participantes os que están inscritos para tomar a saída, ás 16.00 horas comezarán os máis pequenos, os da categoría promesas, seguidos de principiantes, alevíns, infantís, cadetes, juniors, master 30, máster 40 e master 50, para rematar coa categoría Elite sub-23, prevista para ás 20.30 horas. Ao remate terá lugar a entrega de premios.

O alcalde do Porriño Alejandro Lorenzo destacou durante o acto de presentación esta mañá a importancia de La Nocturna dentro das Festas do Cristo, sinalando que “eventos como este poñen en valor o deporte de base e converten ao Porriño nun punto de encontro para centos de persoas, reforzando o noso compromiso cunhas festas participativas, saudables e abertas a toda a veciñanza”.

Tamén quixo agradecer ao Club Master Louriña a súa implicación ano tras ano e subliñou que “a colaboración entre o Concello e os colectivos deportivos locais é clave para manter viva esta tradición e seguir facendo do Porriño unha vila referente no deporte galego”.

La Nocturna consolídase un ano máis como un dos actos deportivos máis emblemáticos das Festas do Cristo do Porriño reunindo centos de persoas arredor do deporte e da convivencia veciñal. Gracias á colaboración entre o Concello do Porriño e o Club Master Louriña, este evento non só promove o deporte de base, senón que tamén reforza o papel do Porriño como referente deportivo en Galicia, demostrando o valor das iniciativas locais na dinamización social e cultural da vila.

04/09/2025 in Cultura e festas, Deportes

A CAE Interrunning espera superar os dous mil participantes

A organización espera dobrar o número de participantes xa anotados para o cal o prazo de inscrición segue aberto ata o día 17 a través da web www.emesports.es
Esta fusión de dúas carreiras, que se celebrará o domingo 21 de setembro polas rúas do Porriño, foi presentada con maxia hoxe na Praza Arquitecto Antonio Palacios

O Porriño, 4 de setembro de 2025.- O Mago Xulio foi o encargado de conducir a presentación da CAE Interruning 2025 esta mañá na Praza Arquitecto Antonio achegando así, máis se cabe, a toda a cidadanía este evento deportivo que integra dúas probas, a que sería a terceira edición da Carreira de Empresas de Galicia e a XIV Interrunning, que conta nesta ocasión ademais cunha triple acción solidaria de apoio a Asociación Española Contra o Cancro, Aceesca e Afaga. Precisamente, a CAE Interrunning 2025 celebrarase o domingo, 21 de setembro, coincidindo co Día Mundial do Alzhéimer que promoven e poñen en valor as accións levadas a cabo por asociacións como Afaga, destinada a mellorar a calidade de vida dos enfermos de Alzhéimer e outras demencias.

O alcalde Alejandro Lorenzo destacou así que “estamos ante un evento único en Galicia, que unifica deporte popular, cultura empresarial e compromiso solidario, destinando parte dos fondos recadados a estas tres entidades sen ánimo de lucro. A Interrunning é moito máis ca unha carreira, estamos moi orgullosos de acoller un evento que promove hábitos saudables, visibiliza o compromiso social e dinamiza o centro urbano do Porriño. Con cada edición, damos un paso máis cara a excelencia”.

Por parte da organización da CAE interrunning, o seu coordinador Fredy Velasco, tivo palabras de agradecemento a patrocinadores e colaboradores, ademais de ao Concello do Porriño, destacando ao equipo de 129 voluntarios que o día da proba traballarán para que todo se desenvolva con total normalidade. Velasco explicou que as inscricións van a bo ritmo, “pasamos a barreira dos 1.000 e esperamos chegar aos 2.000 participantes”, para elo o prazo de inscrición mantense aberto ata ás 20.00 horas do día 17 de setembro a través da páxina web www.emesports.es.

A xornada do domingo arrancará ás 09.30 horas coa Andaina Antonio Palacios de 8 quilómetros, ás 11.30 horas será a saída das competicións 5K e 10K, das cales se poderá participar de xeito individual, en parellas ou en equipo de tres, e ás 12.45 e 12.50 horas celebraranse as carreiras infantís de Pitufos e Chupetes. Trala entrega de premios terá lugar unha “after run party” aberta a todo o público, con música, regalos e moito ambiente festivo.

04/09/2025 in Cultura e festas, Deportes

Beret e SASH!, cabezas de cartel das Festas do Cristo 2025

O alcalde Alejandro Lorenzo adianta estes dous concertos enmarcados no tradicional Louro Valley Festival e no novo Dabuten! Remember Festival
Toda a programación será presentada este venres nun acto público no Parque do Cristo

O Porriño, 3 de setembro 2025.- O sevillano Beret, un dos artistas máis recoñecidos do panorama musical español actual cun estilo que mestura pop urbano, reggae, rap melódico e baladas e SASH!, o DJ e produtor máis icónico da escena dance europea dende os anos 90, encabezan o cartel musical das Festas do Cristo 2025. O alcalde Alejandro Lorenzo adianta estas dúas citas que terán lugar o venres 26 e sábado 27 de setembro, no aparcadoiro da rúa Progreso, con entrada de balde.

Xunto a estes dous artistas serán moitos outros os que completen unha programación chea de eventos e actividades para todos os gustos e públicos que se dará a coñecer este venres, ás 13.15 horas, no Parque do Cristo, nun acto no que se desvelará o pregón e outras moitas sorpresas. “Queremos que as festas sexan un punto de encontro para todas as idades e que reflictan a diversidade e talento que temos”, sinala o alcalde.

Beret compartirá escenario con outros artistas locais, mantendo así viva a esencia orixinal dun festival que naceu con vocación local e medrou ata converterse nunha das citas musicais de referencia en Galicia. Pola súa parte, SASH! estreará o Dabuten! Remember Festival, no que tamén tocarán outros artistas. “Ámbolos dous festivais son un claro exemplo do compromiso do Concello para apoiar a cultura local á vez que atrae grandes nomes do panorama musical nacional e internacional, consolidándose como espazos de celebración, convivencia e proxección cultural que enche de vida o noso municipio cada setembro”, indica o alcalde.

O Louro Valley Festival e o Dabuten! Remember Festival serán uns dos epicentros musicais das Festas do Cristo, cunha programación que combina a música urbana, electrónica e dance, atendendo a gustos e franxas de idade diferentes.

03/09/2025 in Cultura e festas