Novas

• O Concello habilitará diferentes canais de información e consulta para que tanto os grupos da corporación como a cidadanía poidan coñecer os detalles da proposta antes do deseño definitivo que se levará a pleno.

O Porriño, 21 de xullo de 2025.– O Concello do Porriño comeza esta semana un proceso histórico co obxectivo de dotarse por primeira vez de escudo e bandeira municipais. O equipo de goberno convocou hoxe a comisión informativa na que se abordará esta proposta, que se celebrará o vindeiro mércores. O obxectivo é dar conta á corporación e á veciñanza do acordo adoptado pola Comisión de Heráldica de Galicia na súa sesión do 30 de xuño, e poñer á súa disposición os informes e as propostas correspondentes, garantindo así o coñecemento e a transparencia do proceso previo á súa aprobación definitiva en pleno, prevista inicialmente para finais de agosto.

O alcalde Alejandro Lorenzo cualificou este paso como “un fito para o noso concello, que por fin contará con símbolos oficiais que representen a súa identidade e a súa historia”. Segundo explicou, o escudo e a bandeira propostos foron deseñados tendo en conta elementos chave que definen O Porriño, baseándose nos estudos e informes realizados por Eduardo Pardo de Guevara, Vicepresidente e Asesor da Comisión de Heráldica da Xunta de Galicia así como no asesoramento levado a cabo polo historiador local Diego Giráldez.

A proposta recolle símbolos vencellados á historia, á economía e ao patrimonio do municipio. No escudo, mantense a ponte defendida como elemento central, coroada por unha torre que evoca a Casa Consistorial, obra emblemática do arquitecto Antonio Palacios Ramilo. Engádese un compás e unha chumbada de prata como homenaxe directa a Palacios, figura senlleira da nosa arquitectura. Dúas espigas de trigo de ouro fan referencia á tradición panadeira do Porriño, documentada desde o século XVI, mentres que unha roda dentada de prata representa o forte tecido industrial do concello, cunha presenza destacada dos sectores da automoción, construción, industria farmacéutica e as explotacións de granito.

O blasonamento proposto describe un campo azul sobre ondas de prata e azul, coa ponte e a torre de ouro no centro, flanqueadas polas espigas, o compás e a chumbada enriba e a roda dentada no centro do xefe. O escudo irá timbrado cunha coroa real pechada.

A bandeira deseñada garda coherencia co escudo e incorpora os mesmos elementos principais: fondo azul, torre amarela entre dúas espigas da mesma cor, compás, chumbada e roda dentada en branco na parte superior, e dúas franxas verticais ondadas de branco no lado do mastro, en alusión ao río Louro.

“O noso obxectivo é representar o que somos, o esencial da nosa historia e do noso presente. Non todo pode estar reflectido, pero si aquilo que nos define: a pedra, o pan, a industria, o río, a arquitectura…”, sinalou o alcalde. Alejandro Lorenzo tamén quixo subliñar que se trata dunha proposta inicial que se comparte co conxunto da corporación e da cidadanía para que todos coñezan en profundidade o seu contido. “Queremos que a veciñanza a faga súa, que se implique neste proceso simbólico para o Porriño”, engadiu.

O Concello habilitará diferentes canais de información e consulta para que tanto os grupos da corporación como a cidadanía poidan coñecer os detalles da proposta antes do deseño definitivo que se levará a pleno.

O Porriño, 19 de xullo de 2025.- O Porriño vive un auténtico auxe no número de vodas civís, converténdose nun dos municipios máis demandados da provincia para celebrar enlaces matrimoniais. O alcalde, Alejandro Lorenzo, é parte fundamental deste fenómeno, acumulando cifras históricas na oficiación de cerimonias e vén de superar a súa propia marca de cerimonias celebradas en tempo récord.

Se no ano 2023 xa sorprendera oficiando seis vodas en menos de oito horas, nesta ocasión oficiou sete casamentos en 24 horas, o que supuxo un reto importante, xa que entre varias das cerimonias había moi pouca diferenza horaria. Por exemplo, este sábado tivo seis vodas en apenas cinco horas, o que supuxo un desafío para chegar puntual a todas, xa que foron en lugares diferentes. “Foron 24 horas intensas, pero moi gratificantes. Cada voda é distinta e emocionante. Que tantas parellas confíen en min para acompañalas nun momento tan especial é un orgullo persoal e institucional”, explicou Alejandro Lorenzo.

Desde que asumiu a Alcaldía en 2022, Lorenzo oficiou centos de vodas e cada vez con máis intensidade, cunha media anual que ronda o centenar. Oito vodas oficiadas esta fin de semana e o calendario non afrouxa: nestes quince días vai sumar quince cerimonias civís.

O rexedor lembra que leva oficiando vodas desde 2007 como concelleiro, pero foi a partir da súa chegada á Alcaldía cando a demanda se multiplicou. Esta tendencia tamén se explica por medidas adoptadas polo propio goberno local.

Casarse no Porriño está de moda e mesmo hai parellas que escollen o municipio para renovar os seus votos. Ademais das vodas oficiais, en numerosas ocasións tamén se celebran aniversarios de matrimonio como as vodas de prata ou de ouro, para os que tamén se solicita a súa presenza para presidilos.

Casarse en Porriño é sinxelo e gratuíto

En 2022, o Concello aprobou a supresión da taxa de 100 euros por oficiar vodas, o que facilitou o acceso a este servizo a todas as parellas. Desde entón, o número de expedientes tramitados non deixou de medrar.

“Cremos nunha administración próxima, útil e que acompañe á veciñanza nos momentos importantes da vida. Casarse no teu Concello, co teu alcalde, sen barreiras nin taxas, é unha mostra máis dese compromiso”, apuntou o rexedor.

Actualmente, as cerimonias realízanse na Casa Consistorial ou noutros espazos elixidos polas parellas, como o Templete de San Luis. Hoxe, dúas parellas escolleron este entorno único para dar o “si quero”. O alcalde tamén se despraza ás propias vivendas dos noivos para oficiar os casamentos cun único obxectivo: “compartir a felicidade con eles e coas súas familias” porque, como sempre di Alejandro Lorenzo, “a felicidade non consiste en facer o que un quere, senón en querer o que un fai”.

O Porriño segue así avanzando como referente no ámbito social e institucional, ofrecendo un servizo público de calidade e próximo á cidadanía.