Novas

A páxina web do concurso “Improvisdado” xa está dispoñible

 

A segunda edición do concurso “Batalla de debuxantes Improvisdado” xa ten o seu propio sitio web.
Foi realizado pola entidade “Vella Escola”, produtora do certame, organizado polo Concello de Porriño, a través da Concellería de Cultura e Xuventude.

A través desta ferramenta, proporcionaráselle a todas as persoas interesadas información sobre a convocatoria, o acceso á inscrición e incluso a carteira co deseño para presentar á selección dos finalistas que participarán no concurso, en setembro durante as Festas do o Cristo.

Deixamos ligazón

 

https://www.vellaescola.com/improvisdado/

16/03/2021 in Cultura e festas, Mocidade

O Concello únese á conmemoración do Día Internacional da Narración Oral

 

O Concello do Porriño, a través da Concellería de Cultura, súmase á conmemoración do Día Internacional da Narración Oral que se celebrará o vindeiro sábado 20 de marzo. Por este motivo, celebrarase un espectáculo cun aforo restrinxido a 50 persoas, no auditorio ao aire libre do Centro Cultural Municipal (18.00 horas) a cargo da actriz Vero Rilo.

Narración oral por Vero Rilo: “E a ti… que che contaban?”. Conmemoración do Día Internacional da Narración Oral

15/03/2021 in Cultura e festas

A xunta de voceiros municipais estuda o programa de axudas económicas pola crise derivada da pandemia

A xunta de portavoces municipais do Concello estudará este martes na reunión convocada a partir das 18:00 horas, as bases e a convocatoria para a concesión de axudas económicas extraordinarias a autónomos, microempresas e pequenas e medianas empresas situadas en Porriño.  Trátase de minimizar a grave situación social e económica que teñen que soportar os empresarios que resultaron afectados na súa actividade mediante o cese total ou parcial dos seus negocios polas sucesivas restricións.

A proposta que leva o goberno municipal porriñés á consideración dos voceiros dos grupos da corporación, contempla unha contía destinada a esta liña de subvencións cun importe total de 140.000 euros.

Cóntase coa axuda da Deputación Provincial que autoriza a utilización do 20% da liña 1 do Plan Concellos para financiar achegas económicas directas por importe de 57.861,02 euros, aportando o Concello dos recursos propios a cantidade de 82.138,98 euros ata acadar a cifra total na presente convocatoria de 140.000 euros o que supón un 1% do orzamento municipal total en vigor.

 O límite por beneficiario establécese na cantidade de 1.500 euros para aqueles sectores que sufriron o peche total e 1200 euros para aqueles outros que estiveran limitados no horario de apertura ao público ou sufriran perdas significativas.

 Este programa de axudas económicas directas preténdese levar ao próximo pleno da corporación municipal para a súa aprobación.  Despois da súa publicación no BOPPO, abriríase o prazo para presentar as solicitudes.

 

15/03/2021 in Alcaldía

Comeza “Louriña TV Escolar”, unha canle de televisión escolar municipal por internet

A Consellería de Educación e a Oficina Municipal de Información Xuvenil (OMIX)anunciaron a posta en marcha, a partir deste mes de marzo, de “LOURIÑA TV ESCOLAR”, unha canle de televisión escolar municipal por Internet no Porriño.

Lourdes Moure, concelleira de Educación explicou que “esta canle online pretende ser un proxecto colectivo de innovación educativa, no que poidan estar implicados tódolos centros de ensino do Concello ao elaborar os seus propios programas de televisión”.

Moure enmarcou esta iniciativa, que definiu como “unha actividade súper innovadora” na “vocación do departamento que dirixo para seguir progresando no camiño que iniciamos coa consecución do título de Cidade Amiga da Infancia, coa celebración anual dos plenos infantís e dos numerosos programas de actividades que mantemos en colexios e institutos”, engadiu.

O desenvolvemento do proxecto realizase en colaboración coa entidade “Atelier Social”, representada na roda de prensa celebrada hoxe no Concello por Rubén Varela e Pedro Iglesias. Segundo explicaron o lanzamento desta canle virá acompañado dun obradoiro de formación audiovisual e de xornalismo para o alumnado participante, cos recursos e coñecementos suficientes para que os propios rapaces e rapazas sexan quen de realizar as distintas pezas audiovisuais.


“A primeira fase do proxecto se realizará de xeito experimental dende este mes e ata final de curso, con cada un dos centros participantes elaborando un programa piloto. A segunda fase arrancará ao comezo do curso que vén, cunha programación semanal estable”, segundo subliñou Pedro Iglesias.

 

 

12/03/2021 in Educación e tecnoloxía

O Concello comunica a súa “preocupación” polos atrasos na vacinación do persoal do SAF

 

 

O Concello do Porriño trasladou a súa “preocupación” á Dirección da Área Sanitaria de Vigo polos atrasos na vacinación do persoal do Servizo de Axuda no Fogar (SAF), atribuídos a “problemas técnicos”.

Na carta enviada hoxe desde a Alcaldía, indicase que “a día de hoxe cónstannos que soamente foron vacinados cinco traballadores dun total de cincuenta e cinco”.

A misiva que firma Pedro Pereira como alcalde accidental, remata solicitandolle “celeridade no proceso” a Javier Puente, xerente da Área Sanitaria de Vigo.

12/03/2021 in Alcaldía

Presentada a II “Batalla de Debuxantes Improvisdado”, un certamen único e singular organizado polo Concello

Hoxe presentouse a segunda edición da “Batalla de Debuxantes Improvisdado”, un certame “singular e único que organiza o Concello do Porriño coa intención de crear novas formas de expresión artística, querendo romper estándares e normas non escritas da arte”, segundo anunciou Cami Moreira, concelleira de Cultura, Mocidade e Festas.

Para esta segunda edición “vaise simplificar o método de inscrición a través dun formulario nunha páxina web específica do concurso Improvisdados que ademais terá vídeos da edición anterior e un capítulo de preguntas frecuentes”, explicou Pablo Castiñeira, responsable de “Vella Escola”, entidade produtora do certame. A páxina web estará dispoñible de xeito inmediato.

Outra dúas novidades serán o aumento da bolsa de premios para os finalistas e o escenario onde terá lugar a final, que este ano representará un taller mecánico, cun coche incluído, como se pode ver na maqueta nunha imaxe adxunta. Precisamente ese escenario da final mudará este ano. Trasladase ao Parque do Cristo.

Cami Moreira manifestou que “no Porriño temos certa tendencia a localizar moitos eventos na praza do Concello e pensamos que é bo explorar outras zonas a ver como funcionan cun evento de visualización tan plástica”, segundo a concelleira.

Este concurso lanzouse no 2020, no primeiro estado de alarma como un estímulo para os creativos, para que puideran traballar dende as súas casas pese ao confinamento. Realizouse unha convocatoria por redes sociais para debuxantes que, de xeito profesional ou aficionado, desenvolveran algunha disciplina artística relacionada coa pintura. Entre os debuxos presentados, seleccionáronse seis artistas que concorreron á final celebrada nas Festas do Cristo nun escenario habilitado na praza do Concello. O artista alcumado “O Ras”, de Pontevedra foi o gañador daquela.

11/03/2021 in Cultura e festas, Mocidade

Ábrese prazo de inscrición para unha bolsa de formación e emprego, por acordo do Concello e empresas de automoción

O Concello do Porriño vén de reunirse en segunda sesión con empresas do sector da automoción para lanzar unha bolsa de formación e emprego no sector. David Alonso, concelleiro de Emprego mantivo hoxe unha reunión telemática con representantes de empresas do sector como “Ti Automotive”, “Magna Seating” e “Gestamp”.

As accións de preselección e formación dos interesados realízanse ao abeiro do programa “Porriño Accede” que convocará accións formativas e prácticas en empresas cara a inserción laboral das persoas participantes.

A partir do día de hoxe as persoas interesadas poderanse anotar na bolsa de formación, a través da páxina web de Porremprego ou enviando un correo electrónico á dirección formacion@porremprego.org.

Esta bolsa está dirixida a personas desempregadas.

10/03/2021 in Emprego e formación

Mañá presentase a segunda edición do certame “Batalla de Debuxantes Improvisdado”

A Concellería de Cultura e Festas que dirixe Cami Moreira anuncia a presentación mañá xoves, en roda de prensa, da segunda edición do certame “Batalla de Debuxantes Improvisdado”. A comparecencia terá lugar ás 12 horas no salón de plenos do Concello e xunto coa concelleira, participarán Noelia de la Fuente, responsable da Oficina Municipal de Información á Xuventude (OMIX) e Pablo Castiñeira, responsable de “Vella Escola”, entidade productora do certame.

Este concurso lanzouse por primeira vez no 2020, no primeiro estado de alarma “como un estímulo para os creativos, para que puideran traballar dende as súas casas pese ao confinamento”, como explicou entón Cami Moreira. Realizouse unha convocatoria por redes sociais para debuxantes que, de xeito profesional ou aficionado, desenvolverán algunha disciplina artística realacionada coa pintura. Entre os debuxos presentados, seleccionaronse seis artistas que concorreron á final  celebrada nas Festas do Cristo nun escenario habilitado na praza do Concello. O artista alcumado “O Ras”, de Pontevedra foi o gañador daquela.

10/03/2021 in Cultura e festas

Segunda quenda do ciclo “Marzo de Sábados Teatrais” coa representación de “Interferencia varada”

 

O vindeiro día 13 terá lugar a segunda quenda do ciclo “Marzo de Sábados Teatrais”, espectáculo teatral en liña, coa representación da peza “Interferencia varada”, a cargo de “Xerpo”, a partir das 21 horas.

Require inscrición previa. Ata a media noite do venres 12, as persoas interesadas terán que enviar un correo electrónico ao enderezo xerpoteatro@xerpocultural.com indicando o nome, apelidos e teléfono de contacto para facer a reserva.

Deixamos ligazón coa web do departamento de Cultura

Ciclo “Marzo de sábados teatrais”. Obra: “#InterferenciaVarada”

09/03/2021 in Cultura e festas

Xa está aberto o prazo para presentar solicitudes ás subvencións municipais para as comunidades de augas de consumo do Porriño

O Concello do Porriño informa de que xa está aberto o prazo para presentar as solicitudes para beneficiarse das subvencións municipais ás comunidades de auga potable, que este ano 2021 teñen un importe total de 95.000 €.

A convocatoria publicouse o pasado martes 2 no Boletín Oficial da Provincia (BOPPO), entrou en vigor a partir do día seguinte e polo tanto, por un período de dous meses.

A convocatoria, a través da Concellería de Infraestruturas e Urbanismo que dirixe Pedro Pereira, ten por obxecto apoiar e promover, en réxime de concorrencia competitiva, a concesión de subvencións entre as comunidades de usuarios de augas de consumo do Porriño que reúnan os requisitos establecidos nas bases.

O obxecto das axudas comprenderá a contratación de obras de reparación, substitución de redes de distribución cando non superen os 20 metros, así como os gastos correspondentes a analíticas de control sanitario e os gastos de mantemento e conservación en captación de augas, sistemas de almacenamento e potabilización e mantemento das instalacións.

Para estas axudas estableceuse un importe máximo de 8.000 euros por asociación.

No ano 2020 repartíronse un total 59.976 euros nas achegas municipais que acadaron dez comunidades solicitantes, conforme a resolución final da comisión de avaliación que presidiu o concelleiro de Infraestruturas, Pedro Pereira asistido por tres técnicos municipais.

09/03/2021 in Alcaldía, Urbanismo, comercio e industria