A actual situación de pandemia pola Covid e as restricións en vigor, impiden celebrar este ano o Entroido. Por este motivo A Concellería de Cultura e Festas que dirixe Cami Moreira ven de abrir hoxe mércores 20, o prazo de presentación de traballos para unha mostra fotográfica de máscaras hixiénicas decoradas.
Deixamos ligazón coa páxina web de Cultura cos detalles da convocatoria
Decora a túa máscara hixiénica
A Concellería de Deportes enviou unha circular aos clubs do Porriño indicando as novas restricións no deporte autonómico federado, comunicadas hoxe pola Xunta de Galicia. Como consecuencia da suspensión de todas as competicións deportivas federadas no ámbito galego que entrarán en vigor a partir deste xoves, segundo a Consellería de Sanidade.
En consecuencia, a Concellería de Deportes do Porriño informa aos clubs da suspensión temporal das actividades programadas nos pavillóns municipais. Só se manterán as competicións rexidas polo Consello Superior de Deportes e a nivel federado nacional.
David Alonso, o concelleiro responsable, informou de que as instalacións da piscina municipal, as pistas de tenis e as pistas de atletismo permanecerán abertas.
O concelleiro pide aos clubs que teñen dúbidas que se poñan en contacto co Servizo de Deportes para obter as aclaracións oportunas.
O Porriño é un dos concellos da área sanitaria de Vigo que entrará en maiores restricións a partir das cero horas do xoves 21, cando entrarán en vigor as novas medidas anunciadas hoxe polo conselleiro de Sanidade da Xunta de Galicia.
As máximas restricións supoñen que a hostalería só poida servir en terraza, con 50% da capacidade e ata as 18:00 horas; se non a teñen, a súa actividade limítase ao servizo a domicilio ata a unha da madrugada.
Outra medida salientable é o peche perimetral individual, co que ninguén pode entrar nin saír do seu concello excepto por causas xustificadas, como sanitarias, laborais ou coidado de maiores e menores.
O goberno municipal fará unha valoración máis polo míudo cando o DOG publique a orde coas novas medidas para decidir se engádense outras restricións de ámbito local que se trasladarían á Comisión Municipal de Seguimento da Covid.
Desde o seu domicilio onde garda corentena, a alcaldesa Eva Garcia prégalle a toda a veciñanza que “usen as máscaras, garden a distancia, cumpran cos protocolos de hixiene e limiten a súa mobilidade a cuestións indispensables. O compromiso de todos nos é fundamental para vencer esta terceira vaga”, manifestou a rexedora.
A aparición dun positivo por Covid, aínda que asintomático, entre o persoal de confianza da Alcaldía do Porriño, obriga á propia alcaldesa, Eva García, e a outras persoas do seu equipo, a gardar corentena durante dez días, segundo establecen os protocolos.
De xeito que a axenda oficial para hoxe luns 18 cancelouse. A alcaldesa vese na obriga de suspender as reunións presenciais que ía manter hoxe. Unha delas con Andrés Fernández, conselleiro delegado do “Grupo Zendal”, que fabrica na factoría “Biofabri”, sita no Porriño, unha das vacinas contra a actual pandemia. A entrevista que se adía está relacionada cos plans de expansión desta firma no Porriño.
Tamén a alcaldesa porriñesa ten que aprazar a visita e reunión que ía manter co empresario Indalecio Cuevas, presidente da entidade urbanística de conservación do polígono da Granxa.
Sen embargo, a alcaldesa manterá parte da súa actividade a través de tele traballo.
O Concello do Porriño anuncia a venda dunha parcela de titularidade municipal á firma “IBEREMBAL” por un importe de 960.000 euros, cantidade á que hai que engadir o correspondente 21% de IVE.
O predio ten 13.335 metros cadrados de superficie dos que 10.668 son edificables con fins industriais. Localizase no PPI 7. A firma compradora vai construir unha fábrica de envases metálicos para conservas alimenticias.
“IBEREMBAL” fora a única empresa que presentou plica no prazo de presentación de ofertas que o Concello do Porriño convocara e que rematou en decembro de 2020.
O Concello do Porriño anuncia que puxo en marcha o Servizo de Asesoramento ao Emprendemento que comezará a funcionar a partir do vindeiro luns 18. Trátase dunha iniciativa da Concellería de Emprego dirixida por David Alonso, con financiamento municipal e coa contribución da Xunta de Galicia, a través da Consellería de Emprego.
O servizo ofrece aos novos emprendedores do Porriño, un análise da viabilidade do plan de negocio; información para determinar a forma xurídica da empresa dado que cada proxecto conta cunhas características propias, e asesoramento laboral, fiscal e contable, segundo as obrigas de cada tipo de negocio.
Tamén o Servizo de Asesoramento a Emprendedores facilitará axuda para os trámites telemáticos de constitución da empresa, a través do sistema de tramitación que ten a Dirección Xeral de Industria e Pemes da Xunta de Galicia mediante a utilización do Documento Electrónico Unico (DUE). E por último, este novo Servizo de Asesoramento tamén axudará aos novos emprendedores a solicitar e tramitar axudas e subvencións da administración autonómica.
O novo Servizo de Asesoramento está ubicado no Multiusos de Torneiros, funcionará en horario de 8 da mañá a 3 da tarde e con cita previa.
A alcaldesa Eva García informou hoxe que o Concello do Porriño está a planificar e desenvolver nestes primeiros días de 2021, unha serie de obras de mellora das infraestruturas viarias nos polígonos industriais.
Esta semana, a través do departamento de Vías e Obras dirixido por Lourdes Moure, acometeu e concluíu esta semana a reparación dun tramo da estrada principal do Polígono das Gándaras. Esta é a sección que discorre fronte ás instalacións da empresa “Gestamp”.
O vial atopábase en moi mal estado, polo que foi necesario fresar e renovar o pavimento. A reparación realizouse cos medios propios do Concello. Executouse esta semana unha vez que o persoal de Vías e Obras reincorporouse despois das vacacións de Nadal.
O Concello anuncia que acometerá en breve a reparación mediante obra nova das dúas rotondas do polígono da Granxa, a cargo do departamento de Infraestruturas dirixido por Pedro Pereira. A primeira que se arranxará será a rotonda da gasolineira que se acometerá cando se obteña a autorización do Ministerio de Transportes e Mobilidade.
No abeiro destas actuacións, o vindeiro luns 18, ás 12,30 horas, a alcaldesa Eva García manterá unha reunión de traballo con Indalecio Cuevas, presidente da Entidade Urbanística de Conservación do Polígono da Granxa.
Nun acto celebrado esta mañá nas instalacións da Biblioteca Municipal, Lourdes Moure, concelleira de Educación, fixo entrega ás directoras das garderías do agasallo habitual de Nadal para os nenos e nenas, consistente en material didáctico.
Debido ás restricións actuais impostas polos protocolos anti-Covid, a entrega e distribución realizouse ás “Galiñas Azuis” de Doantes de Sangue e Torneiros, para que puxeran o material en corentena.
A partir do vindeiro martes 19, comezará a distribución entre pais e titores dos alumnos de ambas garderías públicas.
O piloto porriñés, Yago Martínez, proclamado por segundo ano consecutivo, campión de España sub 18 de motocross, agradeceu persoalmente ao Concello do Porriño o apoio recibido na tempada que acaba de rematar. Yago recibiu a través do contrato de patrocinio que asinou co Concello, unha achega de 3.000 euros en 2020.
O piloto entregou a través do concelleiro de Deportes, David Alonso, agasallos para o Concello como se mostra na imaxe do encontro celebrado no Polideportivo Municipal.
De cara a esta nova tempada, o concelleiro de Deportes informou a Yago Martínez de que se convocará unha bolsa de axuda para deportistas individuais de alto nivel, cunha partida do orzamento municipal de 2021 á que poderá acceder para recibir unha vez máis o apoio do Concello do Porriño.
O último número da revista mensual “Carta Local”, editada pola Federación Española de Municipios e Provincias (FEMP), publica un extenso informe baixo o título “Municipios de vacinas” no que eloxia o papel protagonista do Porriño e da fábrica “Biofabri “na produción dunha das vacinas contra a pandemia actual.
O informe inclúe declaracións da alcaldesa, Eva García de la Torre a “Carta Local”, que expresou a súa satisfacción polo papel protagonista de “Biofabri” e o “Grupo Zendal” que “amosa o alto nivel tecnolóxico que teñen as empresas de Porriño “.
A alcaldesa tamén salientou o impacto que pode ter a produción da vacina na creación de emprego para o municipio.
As ilustracións do informe inclúen imaxes da visita do ministro de Sanidade ás instalacións do “Grupo Zendal” en Porriño o pasado 5 de novembro, onde foi recibido pola alcaldesa Eva García e por Abel Caballero, presidente da FEMP.
Axuntamos ligazón co “pdf” da publicación
file:///C:/Users/Usuario/Downloads/Carta%20Local%20n%C2%BA%20341,%20diciembre%202020.pdf