Novas

Protección Civil do Porriño atendeu os tres accidentes de tráfico con camións ocorridos nas últimas horas

A Agrupación de Protección Civil do Porriño atendeu os tres accidentes de tráfico con catro camións e outros vehículos implicados que ocorreron nas últimas horas en tres puntos do termo municipal. Un deles foi na Autovía A-55 pola saída dun camión que impacto contra a mediana.


Outro sinistro foi a colisión entre dos vehículos pesados no Polígono da Granxa na que tamén resultaron afectados outros vehículos como consecuencia do derrubamento dun poste do alumeado público. Neste suceso tamén acudiron axentes da Policía Local do Porriño para levantar o correspondente atestado por danos.


O terceiro accidente atendido polos efectivos de Protección Civil do Porriño foi o envorco dun camión na estrada de Salceda (PO-510) que transportaba un contedor con restos de madeira.


Suso Gónzalez “Carrola”, responsable de Protección Civil Porriño, informou que, precisamente, onte foi o derradeiro día no que estaban a facer prácticas 6 voluntarios que completaron deste xeito a súa formación no curso de FP “Atención Sanitaria a múltiples vítimas e catástrofes” para obter o certificado de profesionalidade no ámbito da atención sanitaria. Os alumnos e alumnas, de idades comprendidas entre 22 e 50 anos, realizaron as prácticas dende o 26 de maio cando recibiron a benvida da concelleira de Seguridade, Lourdes Moure, no nome do Concello do Porriño.

16/06/2021 in Seguridade, Tráfico

A fase final do Campionato de España de Balonmán Cadete Masculino comeza este mércores no Porriño


Finalmente serán sete os equipos que participen a partir deste mércores 16, na fase final do Campionato de España de Balonmán Cadete Masculino que se celebrará ata o domingo no Polideportivo Municipal do Porriño. Lamentablemente un gromo de coronavirus con media ducia de xogadores contaxiados impediu que o Balonmán Granollers poida participar, e de feito xa renunciaron a viaxar.
Os sete equipos participantes nesta fase final da que sairá o campión de España cadete masculino serán: Barcelona, Zaisa Bidasoa Irún, Cajasur Córdoba Balonmano, Grupo IMQ, CBM Delicias Play 360, Fertiberia Puerto Sagunto e o club anfitrión e campión de Galicia, Balonmán Porriño.
O vindeiro xoves, a alcaldesa Eva Garcia ofrecerá unha recepción aos equipos participantes no Concello.
Deixamos imaxe adxunta co cadro de emparellamentos e horarios de partidos desta fase final.

15/06/2021 in Alcaldía, Deportes

A concelleira de Vías e Obras denuncia que “unha pinza entre Manuel Carrera e o PP” obstrúe o investimento de 730.000€

Os votos conxuntos do PP e de Manuel Carrera obrigaron a deixar enriba da mesa, a tramitación do Plan Estratéxico de Obras de Mantenento en Vías Municipais e Saneamento que a Concellería de Vías e Obras, dirixida pola socialista Lourdes Moure, levou hoxe a ditame pola Comisión Municipal de Economía. O devandito Plan, cun investimento previsto de 730.000 €, está baseado nunha moción que presentara o PP no pleno de abril, aprobada por unanimidade. Unha primeira proposta de plan plurianual da Concellería, levada ao pleno de maio, quedou pendente para matizar cos voceiros que foron chamados a consultas.

Segundo a concelleira Lourdes Moure “das reunións con Manuel Carrera e Alejandro Lorenzo e Pedro Pereira concluímos que había acordo coas actuacións descritas no Plan aínda que formularon algunhas propostas concretas que temos recollido”, indicou a responsable de Vías e Obras.

Tan só as concelleiras de EU SON non acudiron á convocatoria de reunións previas realizada pola concelleira Moure.

Hoxe, na Comisión Municipal de Economía, o Plan Estratéxico de Obras non se ditaminou. Os tres votos favorables a súa tramitación (2 PSOE e 1 BNG) foron derrotados por 5 votos en contra. “Produciuse, de xeito inesperado, unha pinza entre os concelleiros do PP e o voceiro de UDDL para obstruir o traballo desta concelleira”, explicou Lourdes Moure.

O catro concelleiros do PP pediron deixar enriba da mesa o asunto, proposta que contou co respaldo de Manuel Carrera. EU SON non asistiu.

Lourdes Moure valorou que “a pinza que fan PP e Manuel Carrera o que intentan é obstruir e non permitir que esta Concellería de Vías e Obras faga o seu traballo”. A segunda tenente de alcalde lamentou a “falla de coherencia dos que presentan mocións queixándose que todo está fatal e reclamando que hai que arranxar O Porriño”.

A concelleira reclamou “unha política sinceira de mellorar Porriño, tanto desde o goberno como na oposición” e pediu que “nos deixemos de pataleos, non vaia ser que o faga ésta e non o fixeramos nós”, rematou Moure.      

11/06/2021 in Vías e obras

A Concellería de Vías e Obras prioriza os arranxos urxentes de camiños en Chenlo e Torneiros

A Concellería de Vías e Obras que dirixe a socialista Lourdes Moure anuncia o arranxo por vía de urxencia de dous camiños en Chenlo e Torneiros que se atopan en moi mal estado. Trátase do Camiño de Penedo, en Chenlo onde a concelleira comprobou o estado do mesmo en compañía do alcalde pedáneo da entidade local menor, Jacobo Alonso. E do Camiño existente en Torneiros entre a Fase 1 e o local da AAVV San Salvador, cun grao de deterioro moi importante, segundo comprobou a concelleira en compañía do enxeñeiro municipal.

Estas obras acometeranse con cargo a unha partida de 30.000 € de fondos propios. Sepáranse e priorízanse estes arranxos de ambas vías municipais en Chenlo e Torneiros, do proxecto máis ambicioso que é o Plan Estratéxico de Obras e Mantemento en Vías Municipais e Saneamento que elaborou a Concellería que dirixe Lourdes Moure. Precisamente hoxe venres levase para ditame o devandito Plan, á Comisión Municipal Informativa de Economía pois require dunha modificación orzamentaria de 730.000 euros para o seu desenvolvemento.

11/06/2021 in Vías e obras

A alcaldesa do Porriño solicitou unha rúa para Antonio Palacios en Madrid ante un auditorio onde estaba a vicepresidenta do Goberno, Yolanda Díaz

Eva García de la Torre solicitou que Madrid “honre debidamente ao noso arquitecto Antonio Palacios, que deixou unha obra tan destacada nesta capital, coa concesión do nome dunha rúa sobranceira da cidade”. A alcaldesa do Porriño falou este serán ante un auditorio ateigado de público no Círculo de Belas Artes de Madrid. Entre os espectadores ocupou un lugar salientable na primeira fila de cadeiras, Yolanda Díaz, vicepresidenta terceira do Goberno Central e deputada de Galicia en Común-Unidas Podemos pola provincia de Pontevedra.
Antes de que dera comezo o acto, alcaldesa e vicepresidenta estiveron falando e recibiron un agasallo da directiva do Círculo de Belas Artes.


Na súa intervención, Eva García reivindicou a “enorme transcendencia de Antonio Palacios como urbanista cunha pegada innegable en Vigo e no Porriño e tamén en Madrid onde deixou un legado impresionante do que unha mostra é este edificio do Círculo de Belas Artes onde nos atopamos”.
A rexedora reivindicou que “dende a nosa chegada á Alcaldía do Porriño temos traballado de arreo para recuperar unha meirande parte dos cadernos de debuxos de Antonio Palacios que serviron para editar libros como este que estamos a presentar hoxe, obra de Alvaro Bonet”, manifestou Garcia de la Torre. Precisamente Alvaro Bonet, autor de de “Trazar la mirada. Cuaderno de viaje de Antonio Palacios”, editado por “Engaiolarte”, agradeceu a colaboración do Concello do Porriño e da súa alcaldesa que lle permitiu acceder ao fondo documental de Palacios que se ten recuperado.

10/06/2021 in Alcaldía

Concedido o primeiro lote de axudas económicas directas do Concello á hostalería, comercio e autónomos por un importe de 60.926 €

O tribunal de avaliación formado por técnicas municipais e presidido polo concelleiro de Emprego, David Alonso resolveu hoxe o primeiro lote de axudas económicas directas outorgadas polo Concello do Porriño a establecementos de hostalería, comercio e autónomos que as solicitaron polo impacto dos peches derivados da pandemia.

Nesta primeira quenda, adxudicáronse axudas por un total de 60.926 euros. Trinta desas axudas por peche total da actividade por un importe de 42.926 € e quince por cese parcial da actividade, por un valor global de 18.000 euros.

O destino destas axudas, segundo as solicitudes presentadas, é para pagar alugueres, hipotecas, seguros, mercadorías, subministracións e gastos xerais.

Nesta primeira quenda denegáronse 20 solicitudes de axudas que xa notificáronse aos interesados para que resolvan a deficiencias e volvan a presentarse. Nas vindeiras semanas, haberá unha próxima reunión do tribunal de avaliación para outorgar novas axudas con cargo ao fondo total de 140.000€ que acordou o pleno da Corporación Municipal do Porriño.

10/06/2021 in Alcaldía, Emprego e formación, Urbanismo, comercio e industria

Os concelleiros de Comercio e Emprego apadriñaron a presentación da plataforma “ROOMBO” para reparto a domicilio no Porriño

Os concelleiros, David Alonso, de Emprego e Novas Tecnoloxías, e Sergio Casal, de Comercio, apadriñaron a presentación da plataforma “ROOMBO” de reparto a domicilio que leva funcionando semana e media no Porriño. O seu franquiciado local, Alberto Parada e representantes do sector hostaleiro local asistiron ao acto informativo, celebrado esta mañá no salón de plenos do Concello.

“ROOMBO” funciona como una aplicación (“app”) que pode descargarse gratuitamente para teléfonos móbiles “IOS” ou “Android”. Permite encargar comida a domicilio e pagar a golpe de “clic”. O reparto faise con tres persoas nun radio de 8 quilómetros e de momento, hai sete establecementos do Porriño adheridos á plataforma que son: “Hamburguesería Alhambra”, “Galibar”, “Pastelería D’Carlo”, “Argentino2”, “Don Kebab”, “Pantera” e “A Tentación”.

O promotor local, Alberto Parada explicou que “é unha plataforma 360, é dicir que estamos abertos non só a restaurantes senón tamén para calquera comercio que desexe incorporarse e utilizar este escaparate para realizar as súas vendas”.

O presidente da Asociación de Hostaleiros do Porriño, José Manuel Fernández subliñou que “parécenos unha aplicación moi interesante xa que non ten custe engadido nin require investimento algún e tan só supón un pequeno desconto da comisión que cobra a plataforma”, manifestou o máximo responsable de “AHOSPOR”.

Sergio Casal felicitou ao promotor da plataforma e aos primeiros hostaleiros que se adheriron namentres David Alonso eloxiou “a idea que mellora a competividade dos hostaleiros, a accesibilidade da veciñanza a novos servizos e que ademais crea postos de traballo”.

10/06/2021 in Emprego e formación, Novas Tecnoloxías, Urbanismo, comercio e industria

“A cultura viaxa ás parroquias”

 
A Concellería de Cultura programou neste mes de xuño unha serie de actividades baixo o título “A Cultura viaxa ás parroquias” que inclúe nesta vindeira fin de semana dúas sesións de narración oral que teran lugar en Torneiros e Budiño, a cargo de Vero Rilo. Tamén o sábado 12, haberá en Chenlo, unha sesión de cinema familiar coa proxección da película “O soño dunha noite de San Xoán”.
Deixamos ligazón coa web de Cultura para consultar datas e horarios dos eventos.
09/06/2021 in Cultura e festas

A alcaldesa participará, no Círculo de Belas Artes de Madrid, na presentación do libro “Trazar la mirada, Cuaderno de Viaje de Antonio Palacios”

 

Eva Garcia de la Torre participará mañá xoves en Madrid, no Círculo de Belas Artes, na presentación do libro “Trazar la mirada, Cuaderno de Viaje de Antonio Palacios”, do que é autor o arquitecto Alvaro Bonet.
O acto vai ter lugar ás 19 horas, na sede do Círculo, un edificio de seis plantas na rúa Alcalá que é un deseño do propio Palacios. O presidente da entidade anfitrioa, Juan Miguel Hernández de León abrirá o acto e presentará á alcaldesa de Porriño. Ademais, intervirán Manuel Blanco Lage, director da Escola Técnica Superior de Arquitectura de Madrid; Ana Belén Berrocal, enxeñeira de camiños e o autor, Alvaro Bonet.
A obra é editada pola firma “Engaiolarte” que xa publicara anteriormente “Unha viaxe por Galicia”, de Xosé Ramón Iglesias, por iniciativa do Concello do Porriño, despois de que a alcaldesa acadase a cesión dun fondo documental con debuxos orixinais de Antonio Palacios conservados en 11 cadernos e outro material de traballo do arquitecto porriñés.
Agora Alvaro Bonet, seguindo o traballo comezado polo profesor Moncho Iglesias, inclúe en “Trazar la mirada, Cuaderno de Viaje de Antonio Palacios” máis de 250 imaxes de paisaxes, monumentos e tipos humanos que permiten comprender mellor a dimensión artística do arquitecto porriñés.
Na súa intervención, a alcaldesa lembrará que O Porriño está a celebrar o “Ano Antonio Palacios” cunha serie de actos programados ata outubro. Actualmente e con moitísima aceptación, realízanse as visitas guiadas teatralizadas, con actores e acompañamento musical, que instrúen aos visitantes sobre a traxectoria e personalidade do arquitecto a través dun roteiro polas obras de Palacios na súa vila natal.

09/06/2021 in Alcaldía

A alcaldesa recibiu ao equipo infantil feminino do PBB antes de desprazarse a Marín para xogar a fase final do Campionato de España

A alcaldesa, Eva Garcia, acompañada de David Alonso, concelleiro de Deportes, recibiron ás compoñentes do equipo infantil feminino do “Porriño Baloncesto Base” que esta semana participará na fase final do Campionato de España que se vai celebrar en Marín.
O “PBB” clasificouse como mellor terceiro equipo de Galicia e terá como rivais na primeira quenda a Canoe, de Madrid e os campións de A Rioxa e Murcia.


A alcaldesa desexoulles “moitísima sorte” nesta competición pois “xa é un mérito moi grande destas rapazas terse clasificado entre os 32 mellores equipos de España”, segundo manifestoulles Eva Garcia.
Aproveitando o encontro, alcaldesa, concelleiro, xogadoras, técnicos e directivos do PBB fixeron una sesión de fotografías na Fonte do Cristo e tamén ante a sede do “sponsor” privado do equipo que ten ao Concello do Porriño como principal patrocinador.

08/06/2021 in Alcaldía, Deportes