Novas - Páxina 10 de 303

O complexo deportivo do Porriño contará con cuberta para as pistas de pádel e novos espazos axardinados

O complexo deportivo do Porriño someterase a un acondicionamento integral do seu entorno exterior cun investimento de 448.968,48 euros. O proxecto inclúe diversas intervencións no recinto para mellorar tanto a imaxe urbana como a funcionalidade das instalacións, cun enfoque na accesibilidade, a sustentabilidade e o confort dos usuarios.

Entre as actuacións previstas atópase a mellora das zonas exteriores de aparcamento, que se reorganizarán para optimizar os espazos dispoñibles e mellorar a accesibilidade ao complexo. Tamén se renovarán os espazos axardinados existentes e crearán novas áreas verdes, favorecendo a mellora da estética do entorno e contribuíndo a un espazo máis sostible e agradable para a cidadanía.

Unha das intervencións máis destacadas do proxecto é a instalación dunha cuberta para as dúas pistas de pádel, que permitirá aumentar o seu uso ao longo de todo o ano, superando as limitacións que as condicións meteorolóxicas impoñen na actualidade. A nova estrutura, que será independente, cubrirá non só as pistas de xogo, senón tamén todas as áreas de circulación adxacentes, creando novas zonas de tránsito exteriores á pista. Esta intervención permitirá protexer en maior medida as zonas de xogo, ao tempo que integra o conxunto das pistas de pádel co complexo deportivo existente, converténdoas nun único elemento arquitectónico cunha serie de volumetrías diferenciadas.

Ademais, o proxecto inclúe a incorporación dun muro vexetal que mellorará a eficiencia enerxética da piscina do complexo, favorecendo unha maior sustentabilidade nas instalacións e promovendo o respecto polo medio ambiente.

O custo total da actuación ascende a 448.968,48 euros, dos cales 204.404,30 euros serán financiados pola Deputación de Pontevedra a través do II Plan Extraordinario de Infraestruturas Deportivas, mentres que o Concello do Porriño asumirá os 244.564,18 euros restantes con fondos propios. Este investimento forma parte dos máis de 2.400.000 euros que a Deputación de Pontevedra asignará ao Porriño en 2025 mediante diversos programas destinados a mellorar as infraestruturas e servizos do municipio.

O alcalde do Porriño, Alejandro Lorenzo, subliñou que este proxecto dá resposta a unha demanda histórica da veciñanza. “Con esta intervención, non só melloramos as infraestruturas deportivas do municipio, senón que tamén atendemos unha necesidade que se leva reclamando durante anos. A cuberta nas pistas de pádel e as melloras no entorno exterior permitirán un uso máis amplo e cómodo das instalacións, garantindo que sexan accesibles durante todo o ano”, afirmou Lorenzo.

Por súa parte, o concelleiro de Deportes, Abel Estévez, destacou que esta intervención mellorará as condicións de uso das instalacións e fará o complexo máis atractivo para a veciñanza. “A nova cuberta nas pistas de pádel permitirá que moitos usuarios poidan practicar este deporte en mellores condicións, sen depender das inclemencias do tempo. Tamén, a creación de novos espazos verdes e a mellora dos aparcadoiros farán do complexo un lugar máis funcional e agradable”, afirmou Estévez.

As melloras que se levarán a cabo no complexo deportivo do Porriño supoñen un paso importante cara a unha maior integración das instalacións co entorno urbano, facendo que o complexo sexa máis moderno, funcional e adecuado ás necesidades da veciñanza.

22/03/2025 in Deportes, Infraestruturas

O Concello do Porriño concederá unha subvención de 10.000 euros ao Club de Balomán Porriño pola súa participación histórica en competición europea

O Pabellón de O Porriño será escenario dun momento histórico este domingo 23 de marzo. O equipo Conservas Orbe Zendal BM Porriño xogará, por primeira vez, unha semifinal da EHF European Cup. O encontro, que se disputará ás 19:00 horas, terá como rival ao equipo checo HAZENA KYNZVART.

Este fito deportivo foi posible grazas ao seu gran traballo e a súa gran tempada, e tamén ao apoio de diferentes entidades públicas e privadas. O Concello de O Porriño aprobará unha subvención extraordinaria de 10.000 euros para axudar a cubrir os gastos da competición. Esta achega sumarase á subvención nominativa que o club recibe anualmente, sendo o Concello o principal patrocinador da entidade.

“Esta achega extraordinaria de 10.000 euros é un respaldo ao enorme esforzo do BM Porriño, que está levando o noso nome por Europa. Seguiremos apostando polo seu crecemento e polos valores que transmite”, declarou o alcalde, Alejandro Lorenzo.

Dende o Concello destacan a súa aposta firme polo deporte e o respaldo a un club que leva trece tempadas consecutivas na División de Honor Feminina. A pasada campaña, o BM Porriño alcanzou o cuarto posto na liga, o que lle permitiu clasificarse por segunda vez para unha competición europea. Na súa primeira clasificación, o equipo viuse obrigado a renunciar por falta de recursos económicos. Nesta ocasión, grazas ao apoio institucional e ao respaldo de patrocinadores, logrou superar catro eliminatorias e atópase ás portas dunha final histórica.

“Sentimos moita responsabilidade, pero tamén vemos que temos moitas posibilidades de chegar á final”, explicou Ismael Martínez, o adestrador do BM Porriño. “Estamos moi arropados polo pobo e pola afección. Tentaremos devolver ese apoio”.

“Queremos levar a Porriño á final, e levalo con orgullo”, contou Sarai Sanmatín, a capitana do equipo. “Sabemos que esto pode ser unha alegría para o pobo e as sensacións son moi boas, competimos soñando coa final”.

Se logra o pase, o BM Porriño disputará a final da EHF European Cup no mes de maio, marcando outro fito para o balonmán galego.

21/03/2025 in Deportes

AVISO: Restricións de tráfico con motivo da carreira OP.10K

O Concello informa que, con motivo da celebración da carreira OP.10K o domingo 23 de marzo de 2025, establécense restricións de aparcamento e circulación nas seguintes rúas:

Prohibicións de estacionamento
Desde as 22:00 h do sábado 22 de marzo ata a finalización da proba deportiva, estará prohibido o estacionamento nas seguintes vías:

Avenida de Galicia (únicamente o carril de entrada de Mos a Porriño).
Rúa Domingo Bueno (desde Aloques ata a gasolineira de Atios – A Guía).
Rúa Fernández López.
Rúa Manuel Rodríguez (desde o cruce de Pontenova ata a Praza de San Sebastián).
Rúa San Sebastián (desde Manuel Rodríguez ata a Praza de San Sebastián).
Rúa Leandro Diz (na súa totalidade).
Rúa Cando e Praza de Abastos.
Rúa Xogo da Ola.
Rúa Ramiráns (en sentido saída desde a Praza Central cara a Mos).

Peche ao tráfico rodado
O domingo 23 de marzo, a partir das 9:00 h, todas as rúas afectadas pola prohibición de aparcamento tamén permanecerán pechadas ao tráfico, incluíndo ademais:

Rúa Pío XII.
Rúa Fontevella.

Agradecemos a colaboración da veciñanza e lamentamos as posibles molestias.

20/03/2025 in Tráfico

O Porriño impulsa o emprego local con 18 novas contratacións municipais

O Concello do Porriño vén de presentar a solicitude de subvención á Liña 3 do Plan de Obras e Servizos de Competencia Municipal da Deputación de Pontevedra co obxectivo de impulsar a activación do emprego local a través da contratación de persoal para distintos departamentos municipais. A iniciativa, enmarcada dentro do Plan máis Provincia 2025, busca ofrecer novas oportunidades laborais a persoas en situación de desemprego ao tempo que se reforzan os servizos municipais. Esta iniciativa permitirá crear 18 novos postos de traballo cun investimento total superior aos 282.000 euros, dos cales máis de 211.000 euros serán financiados pola Deputación.

O alcalde, Alejandro Lorenzo, destacou a importancia desta solicitude para dinamizar o mercado laboral no Porriño. “Queremos que esta subvención se traduza en novas oportunidades para os veciños e veciñas que buscan incorporarse ao mundo laboral. Non só estamos a falar de mellorar os servizos municipais, senón de ofrecer emprego digno a persoas no ámbito público”, afirmou.

A concelleira de Emprego e Formación, Rosario Costas, explicou que “as contratacións abranguen diversas áreas, dando resposta a sectores nos que hai unha demanda laboral importante”. Dentro do departamento de obras municipais, contrataranse un carpinteiro, un soldador e un palista que traballarán no mantemento e mellora de parques infantís, instalacións deportivas e espazos públicos. Tamén se crearán postos no departamento de parques e xardíns, onde seis peóns forestais se encargarán de realizar labores de roza, limpeza e acondicionamento de terreos públicos e zonas rurais.

No ámbito sanitario, prevese a contratación dun auxiliar de enfermería para a Unidade Asistencial de Drogodependencias, quen desempeñará funcións fundamentais para o control e administración de tratamentos, ademais de colaborar con outros servizos sanitarios. Ademais, reforzarase a atención nas instalacións municipais con catro conserxes, que traballarán en espazos deportivos, culturais, de emprego e turismo, encargándose da súa apertura, peche, vixilancia e atención ao público.

A convocatoria tamén inclúe perfís especializados, como graduados en Administración, Dereito ou Economía, que desenvolverán un papel clave na captación de ofertas de Emprego para a Bolsa Municipal de Emprego. Tamén se incorporará un publicista-redactor, que terá a función de divulgar as actividades municipais e informar sobre programas de axudas e subvencións, así como un arquiveiro para a organización e mantemento do arquivo municipal.

Coa presentación desta solicitude de subvención, o Concello do Porriño continúa apostando por mellorar a calidade dos servizos públicos e fomentar o emprego local, traballando de maneira coordinada coas administracións supramunicipais para garantir un mellor funcionamento do municipio.

20/03/2025 in Emprego e formación

A cesteira Julia De la Cal reinterpreta a tradición artesanal no Porriño

O alcalde do Porriño, Alejandro Lorenzo, destacou hoxe a importancia da artesanía como elemento clave para o desenvolvemento económico e cultural do municipio durante a visita ao taller La Parabólica da deseñadora e cesteira Julia de la Cal. O rexedor acompañou ao conselleiro de Emprego, Comercio e Emigración, José González, ao director xeral de Comercio e Consumo, Gabriel Alén, e á xerente da Fundación Artesanía de Galicia, Elena Fabeiro, nesta visita institucional que puxo en valor o talento local e o futuro do sector artesán.

Lorenzo Alonso subliñou que “no Porriño temos a sorte de contar con obradoiros que son exemplo de como a tradición pode convivir coa innovación e a modernidade. A artesanía non só representa un legado cultural senón que tamén se converte nun motor de xeración de emprego e dinamización económica para a nosa vila”.

Durante o percorrido polo taller, o alcalde resaltou o papel de Julia de la Cal como referente no sector, especialmente tras ser galardoada nos Premios Artesanía de Galicia pola súa obra PERIFERIA#01. “A súa traxectoria demostra que a formación e a aposta pola contemporaneidade permiten que os oficios tradicionais sigan tendo un papel relevante no mercado actual. Desde o Concello seguiremos apoiando estas iniciativas que contribúen á nosa identidade e ao desenvolvemento sostible”, afirmou Lorenzo Alonso.

A súa obra ‘PERIFERIA#01’, pola que foi recoñecida na última edición dos galardóns Artesanía de Galicia, supón unha redefinición da cesta tradicional, experimentando co uso de elementos e materiais máis industriais como o cemento.

O concelleiro de Cultura, Benvenido Estévez, tamén quixo destacar o valor da artesanía para a identidade cultural do Porriño. “A artesanía non é só un oficio, é unha manifestación da nosa historia e do noso xeito de entender o mundo. Iniciativas como as de Julia de la Cal mostran como o pasado e o presente poden fusionarse para crear proxectos con gran proxección de futuro. Desde a Concellería de Cultura seguiremos promovendo e apoiando a difusión destas manifestacións artísticas e tradicionais”, sinalou Estévez.

O goberno municipal, consciente da importancia de preservar e impulsar o sector artesanal, reitera o seu compromiso de colaborar con iniciativas que fomenten a remuda xeracional e a competitividade do sector con modelos de negocio sustentables e innovadores.

19/03/2025 in Cultura e festas

O Porriño reforzará a competitividade empresarial con novas actuacións nos Polígonos de As Gándaras e A Granxa

O Concello do Porriño ven de solicitar unha subvención á Consellería de Economía e Industria da Xunta de Galicia para levar a cabo dúas actuacións clave de mellora nas infraestruturas dos parques empresariais de A Granxa e As Gándaras. Esta iniciativa, cun orzamento total de preto de 300.000 euros, busca reforzar a competitividade das empresas locais e fomentar a creación de emprego na comarca.

O alcalde do Porriño, Manuel Alejandro Lorenzo Alonso visitou as futuras obras acompañado por David Sobral, Secretario Xeral da Federación Galega de Parques Empresariais, e Indalecio Cuevas, Presidente da Entidade Urbanística de Conservación de A Granxa. Durante a visita, analizáronse posibles melloras nas infraestruturas co obxectivo de optimizar a competitividade dos polígonos e afianzar o seu desenvolvemento futuro.

No marco deste proxecto, o Concello propón dúas intervencións concretas. A primeira, centrada na mellora das infraestruturas do parque empresarial de As Gándaras, contará cun investimento de 149.900 euros. Deste importe, 119.920 euros serán achegados pola Xunta de Galicia, mentres que os 29.980 euros restantes provirán de fondos municipais. As obras, cun prazo de execución estimado de tres meses, inclúen a renovación do firme, a ampliación da calzada, a aplicación de novas capas de rodadura, a execución de cunetas de seguridade e a actualización da sinalización horizontal e vertical. Esta actuación abranguerá unha lonxitude de 780 metros.

A segunda intervención estará centrada na mellora da seguridade viaria no polígono industrial de A Granxa. Con un orzamento de 149.723,28 euros, dos cales 119.794,62 euros procederán das axudas da Xunta e 29.948,66 euros de fondos propios, esta actuación contempla a construción de tres novas glorietas en puntos de maior intensidade de tráfico, co obxectivo de reducir a sinistralidade viaria derivada da ampliación do polígono. Ademais, tamén se levará a cabo a demolición e reposición de beirarrúas, a aplicación de novas capas de rodadura e a renovación da sinalización.

O alcalde subliñou que “a constante mellora da oferta de solo empresarial é esencial para atraer e consolidar empresas na nosa contorna. Estas accións permiten dotar aos nosos parques empresariais de infraestruturas modernas e eficaces, facilitando as condicións idóneas para o desenvolvemento da actividade industrial”.

Por outra banda, o concelleiro de Vías e Obras, Ramón Porto Oya, resaltou que “con estas melloras non só se favorece a implantación de novas empresas, senón que tamén se incrementa a seguridade vial, optimizando a mobilidade dentro dos parques industriais”.

Estas actuacións son parte do compromiso do goberno local coa mellora da competitividade empresarial e a creación dun entorno máis favorable para o investimento. Boa proba disto foi a declaración de O Porriño como membro da Rede de Concellos Emprendedores de Galicia, un recoñecemento que reforza a súa posición como destino estratéxico industrial referente en toda Galicia.

19/03/2025 in Vías e obras

Atletas de renome afrontan un novo récord na O Porriño 10 Km

O Porriño volve facer gala do seu lema “O Concello do Deporte” coa organización, xunto co Club Atletismo Porriño, da proba O Porriño 10 Km – OP 10K. Preto de mil persoas tomarán a saída o vindeiro domingo para completar un circuíto homologado pola Real Federación Española de Atletismo polas rúas do centro urbano, cuxa lonxitude variará en función da categoría, dende os 100 metros dos máis pequenos (chupetes e pitufos), aos 1.000 dos benxamíns e alevíns, 2.000 para a categoría infantil e 5.000 para cadete e xuvenil; na categoría absoluta ademais dos 10 quilómetros, ofrécese a posibilidade de facer unha única volta e completar os 5 quilómetros.

“Para os que aínda non se inscribiron, están a tempo de facelo ata esta medianoite a través da páxina web ccnorte.com”, lembra o alcalde Alejandro Lorenzo á vez que anuncia a participación de atletas de renome que fan que esta proba sexa considerada “posiblemente o 10K máis rápido de Galicia”.

En categoría feminina está confirmada a asistencia da internacional francesa Alice Finot, do R.C. Celta Atletismo, campioa de Europa 2024 en 3.000 metros obstáculos e cuarta na mesma proba nas Olimpíadas de París 2024. Finot tentará superar o récord feminino da O Porriño 10 km, 33’18’’ que rexistrou Ester Navarrete o pasado ano, quen compartiu podio con Uxía Pérez do RC Celta Atletismo e Sonia Abad do Taninos Runners, que volverán participar tamén nesta XVI edición. Na categoría masculina tomarán a saída David de la Fuente (CD Pinarium), Pablo Otero (Atletismo Narón) e Carlos Porto (Ximnastica Pontevedra), todos eles en disposición de correr os 10.000 metros por debaixo do récord que marcara no ano 2015 Alejandro Fernández, 29’23’’.

Este ano a saída e a meta trasládase ao Parque Infantil, antigo campo da feira, na mesma avenida Domingo Bueno, uns 300 metros máis adiante, onde ao finalizar a competición terá lugar unha festa na que se procederá a entrega de premios e trofeos. Repartiranse 3.100 euros de premios en metálico, “cos que se busca incentivar a participación e o rendemento deportivo dos atletas, así como recoñecer o esforzo e a dedicación que supón a preparación e competición nunha carreira desta natureza”, sinala o concelleiro de Deportes, Abel Estévez.

Así establécese un premio especial de 500 euros ao primeiro atleta e á primeira atleta que logren bater o récord da proba, será un recoñecemento destacado ao logro deportivo; e outros aos tres primeiros clasificados na carreira de 10 km en cada unha das categorías (masculina e feminina), deste xeito a primeira e o primeiro clasificados recibirán 500 euros, os que rematen en segunda posición 350 euros e os terceiros 200 euros. A maiores haberá trofeos para os tres primeiros (masculino e feminino) de cada categoría e tamén se levará a cabo un sorteo de agasallos coa inscrición, que se entregarán aos afortunados no momento da recollida do dorsal.

17/03/2025 in Deportes

“FLI-PO MARKET”: O primeiro mercado sostible chega a O Porriño

A Praza 8 de Marzo, na Avenida de Galicia, será o escenario dunha iniciativa pioneira para promover o consumo responsable durante a primeira fin de semana de maio. O Fli-Po Market, organizado polo Concello do Porriño, ofrecerá un espazo para a compra, venda e intercambio de produtos de segunda man. Ademais, contará cunha ampla programación de actividades lúdicas, música en directo e unha variada oferta gastronómica con postos de comida.

O alcalde do Porriño, Manuel Alejandro Lorenzo Alonso, destacou a importancia deste mercado como unha acción innovadora e comprometida co medio ambiente, subliñando que “o Fli-Po Market supón unha oportunidade para concienciar á cidadanía sobre a importancia de reducir residuos e apostar pola reutilización, co obxectivo de converter O Porriño nun referente en iniciativas sostibles”.

O sábado 3 de maio abrirá as súas portas ás 11:30 e estenderase ata as 22:00 horas, con participación de profesionais do sector. O domingo 4 de maio funcionará entre as 12:00 e as 21:00 horas e estará dirixido principalmente a particulares. Durante ambas xornadas, os asistentes poderán gozar de espectáculos en directo, foodtrucks, obradoiros infantís e un showcooking.

A concelleira de Mercados e Medio Ambiente, Antía Carrera Couselo, manifestou que “este evento pretende dar visibilidade á economía circular e ofrecer unha alternativa sostible de consumo, especialmente no sector téxtil, un dos máis contaminantes”. Ademais, destacou que “o mercado estará dinamizado con actividades para todas as idades, garantindo unha experiencia enriquecedora para os asistentes”.

As persoas interesadas en participar ofrecendo produtos de segunda man poderán presentar a súa solicitude ata o 18 de abril ás 14:00 horas, de forma presencial no Rexistro do Concello do Porriño, en horario de 9:00 a 14:00 horas, ou a través da sede electrónica na ligazón https://oporrino.sedelectronica.gal.

Dende o Concello do Porriño, animamos á veciñanza a sumarse a este mercado sostible, contribuíndo así ao consumo responsable e á protección do medio ambiente.

Bases Reguladoras I Mercado Sostible Fli-Po

15/03/2025 in Medio Ambiente, Urbanismo, comercio e industria

O Club de Lectura do Porriño conmemora o Ano Castelao cunha sesión especial en diálogo coa exposición “Castelao grafista (facsímile)”

O Club de Lectura da Biblioteca Municipal do Porriño celebrará o vindeiro 17 de marzo unha sesión especial en aberto dedicada á figura de Castelao, coincidindo coa exposición “Castelao grafista (facsímile)”, que pode visitarse no Centro Cultural Municipal ata o 19 de marzo. Esta iniciativa enmárcase na conmemoración do Ano Castelao, ao cumprirse o 75 aniversario do seu pasamento.

A sesión, aberta a toda a cidadanía interesada, estará guiada pola coordinadora do Club de Lectura, Ana Abad de Larriva, quen participou como tradutora no catálogo Castelao grafista. Pinturas, dibujos, estampas. Durante o encontro, que se desenvolverá no Centro Cultural Municipal de 18.00 a 19.30 horas, abordarase especialmente a relación entre pintura, ilustración e texto na obra do autor rianxeiro, achegando unha perspectiva singular sobre a súa produción artística e literaria.

O alcalde do Porriño, Manuel Alejandro Lorenzo Alonso, quixo salientar a relevancia desta actividade dentro do panorama cultural local: “Con esta sesión especial, seguimos a fomentar o acceso á cultura e a poñer en valor o legado de Castelao, unha figura fundamental da nosa identidade e do noso patrimonio”.

Pola súa banda, o concelleiro de Cultura, Benvido Estévez Maceira, destacou o papel que xoga esta iniciativa dentro da ampla programación cultural do Concello: “A exposición e o encontro do club de lectura son unha oportunidade excepcional para que a veciñanza se achegue a Castelao desde diferentes perspectivas, promovendo un diálogo enriquecedor entre a literatura e a arte”.

A exposición Castelao grafista (facsímile) está comisariada por Miguel Fernández-Cid e organizada pola Fundación Gonzalo Torrente Ballester, a Real Academia Galega de Belas Artes e Turismo de Galicia – Xunta de Galicia. Trátase dun dos proxectos máis ambiciosos para difundir a obra e o pensamento de Castelao a nivel internacional. Ademais, enmárcase dentro da iniciativa Cultura por Alimentos, promovida por Afundación a favor de FESBAL (Federación Española de Bancos de Alimentos).

Esta actividade especial forma parte da ampla travesía literaria e artística que realiza o Club de Lectura da Biblioteca Municipal do Porriño, que combina paradas en referentes do contexto máis próximo con achegamentos a culturas máis afastadas. Despois de explorar a figura de Castelao, o club continuará a súa viaxe literaria ata Corea do Sur, coa lectura de A vexetariana, obra da recente gañadora do Premio Nobel de Literatura, Han Kang.

13/03/2025 in Cultura e festas

Xogos tradicionais e música para reivindicar a igualdade no Porriño

O Concello do Porriño estende aos 365 días do ano a reivindicación dos dereitos das mulleres e da igualdade de xénero. Así, pasado xa o 8 de Marzo, continúan esta semana as actividades integradas na programación organizada con motivo do Día Internacional da Muller baixo o lema “8M, 365 días”.

Mañá xoves, a partir das 17,00 horas, na praza Arquitecto Antonio Palacios, celebranse xogos tradicionais con enfoque de xénero para a cativada. Serán Xogos de Sororas, “unha proposta lúdica para fomentar a igualdade a través de xogos populares e tradicionais, incluíndo o xogo Sororas na Memoria, que permitirá coñecer mulleres galegas clave na historia”, explica a concelleira de Igualdade, Carolina González.

Xa o venres, no mesmo escenario, ás 8 do serán, concerto de LAW, quen traerá ao Porriño un dos seus recoñecidos “rituais de barrio”, mesturando reggae, r&b, psytrance e música tradicional galega, para reivindicar a igualdade a través da música e celebrar o papel das mulleres artistas na historia.

“Dende o Concello animamos á veciñanza a participar activamente nos actos programados co convencemento de que a igualdade real e efectiva constrúese coa implicación de toda a sociedade, día a día”, sinala o alcalde Alejandro Lorenzo, á vez que se reafirma no seu compromiso de “construír un Porriño máis igualitario e libre de violencia machista”.

As actividades polo 8M proseguirán no mes de xuño coa celebración do acto conmemorativo “Mulleres da vila” e, de xeito paralelo, lévase a cabo a iniciativa educativa “Banco de Igualdade”. E é que ademais da programación aberta ao público, a Concellaría de Igualdade, en colaboración coa OMIX, desenvolverá esta actividade nos centros educativos do municipio consistente en facer entrega a cada centro participante un banco de madeira e pintura púrpura, co obxectivo de que o alumnado o decore con frases inspiradoras sobre igualdade, respecto, tolerancia e apoderamento das mulleres.

12/03/2025 in Igualdade