Vías e obras

@depo_es inicia as obras da glorieta do lugar da Costeira, na intersección de Cerquido-Budiño

A Deputación de Pontevedra vén de iniciar nesta semana as obras da nova glorieta de ordenación do tráfico no cruce  da intersección da estrada provincial EP-2405 Cerquido-Budiño con dúas vías municipais no lugar de A Costeira.

Segundo explicou o deputado de Mobilidade Uxío Benítez, xa están derrubadas a antiga marquesiña de autobús e os galpóns expropiados para ampliar a zona de actuación, e tamén se están a realizar estudos sobre as canalizacións existentes na zona co que o persoal técnico denomina unha ‘toupeira’. Estímase, segundo o nacionalista, que se non se producen complicacións a obra poderá estar rematada no mes de xullo.

O concelleiro de Vías e Obras Manuel Carrera, que estivo visitando os traballos, subliña que os mesmos comezan logo de ser “longamente demandados por veciñas e veciños desta zona” e lembra que xa pedirá ao anterior goberno da Deputación, “sen que nos fixeran caso”, que acometeran esta obra.

Carrera agradece aos actuáis responsábeis do organismo provincial que tomaran en conta a reivindicación do Porriño, e salientou que ista é unha actuación “moi necesaria” dada a perigrosidade deste lugar , con “moi pouca visibilidade” e dificultades para circular sen correr riscos.

Hai que lembrar que as obras en A Costeira estaban paralizadas debido a que no momento en que a empresa adxudicataria, Construcciones Vale SL, asinara o contrato e pressentara a acta de replantexamento había unha climatoloxía moi adversa debido á chuvia. Unha vez mellorou o tempo a actuación comezou tan pronto a empresa estivo dispoñible.

O orzamento global do proxecto ascendeu a 220.336,36€, sendo 21.534 para expropiacións e o resto á execución da obra. Finalmente a licitación pechouse por un prezo menor: 132.719,68€.

Os traballos consisten na instalación dunha nova glorieta para reordenar o tráfico, suavizar o trazado e mellorar as condicións de visibilidade e manobra dos vehículos. Foi necesario ocupar dúas parcelas privadas e unha municipal, e víronse afectadas dúas construcións, un alpendre-almacén e unha marquesiña de bus na parcela municipal, cuxa demolición e nova instalación se incluíu no orzamento do proxecto.

Urbanizarase a zona con novas beirarrúas para prestar continuidade ao tránsito peonil, habilitaranse pasos de peóns e a limitación específica de velocidade baixará de 50 a 30 quilómetros hora. Tamén se instalarán oito novas luminarias tipo led que garantirán a correcta visibilidade na intersección.

18/05/2018 in Alcaldía, Vías e obras

Rematadas as obras na cuberta do Pavillón Municipal, anunciadas polo concelleiro de Deportes, e que supuxeron na práctica a reforma de todo o teito do mesmo

Tal  e como adiantara o tenente de alcalde e concelleiro de Deportes, Manuel Carrera, as obras de mantemento que precisaba a cuberta do Pavillón Municipal quedaron rematadas a finais do mes pasado logo de que “fose posible acometelas unha vez que as condicións climatolóxicas o permitiron”.

Carrera subliña que estes traballos precisaban para a súa realización “varios días seguidos sen choiva”, como explicara xa a usuarios do pavillón, veciños e á Corporación en resposta a preguntas formulada no Pleno da mesma.

As obras, explica Manuel Carrera, realizáronse sobre as dúas ‘alas’ do pavillón, de 250 metros cadrados cada unha, e requiriron a retirada da anterior impermeabilización, a malla que había debaixo dela e picar unha cuberta de formigón de 20 centímetros de groso. Logo de rematada esta tarefa, procedeuse á substitución das tubaxes de fibrocemento por unhas novas de pvc, á cobertura da parte superior do inmoble cunha primeira capa de ‘polibreal’, a colocación doutra de ‘geotextil’, un material permeábel e flexible de fibras sintéticas, principalmente polipropileno e poliéster, unha segunda capa de ‘polibreal’ e, finalmente, pedregullo.

Así mesmo a nova cuberta conta cunha chapra illante que, ao mesmo tempo, protexe o teito  contra a acción dos paxaros, do sol e das correntes de aire.

Rematados os traballos, elimináronse, finalmente, as goteiras nos baños, a cafeterías, a oficinas adicadas ao balonmán, salas e a oficina do encargado xeral do pavillón.

16/05/2018 in Alcaldía, Deportes, Vías e obras

A Concellería de Vías e Obras remata a reforma integral da estrada no lugar da Lomba, no barrio de Vitureira, en Budiño, incorpora saneamento, tubaxes de pvc e aumenta o ancha da vía ata os 8 metros

A Concellería de Vías e Obras vén de rematar no lugar da Lomba, no barrio de Vitureira, na parroquia de Budiño, a reforma integral da estrada que pasa por esta zona, “cumprindo cunha vella demanda dos residentes nesta parte do Porriño”.

O tenente de alcalde, Manuel Carrera, subliña que este proxecto, financiado na súa totalidade con cargo ao ‘Plan Concellos 2017’ da Deputación de Pontevedra, foi posible “grazas a cesión voluntaria e de balde por parte de varios veciños de parte das súas fincas para poder ampliar a calzada”.

A mesma pasou dun ancho de 3,5 ou 4 metros, nalgún treito, a 7,5 e 8 metros, nunha actuación sobre 500 metros lineais, na que ademais do asfaltado, “que non se realizaba dende hai máis de 30 anos”, levouse a cabo a instalación dun novo colector de saneamento, que completa o existente, con 168 metros de tubaxes de pvc de 350 milímetros, con acometidas a vivendas con 290 metros de mangueiras de auga e recollidas de pluviais, amais da reconstrución dos muros de peche das fincas.

Manuel Carrera subliña o “compromiso deste  Goberno local e, particularmente o meu, coa mellora das comunicacións das parroquias e con proxectos que permitan facer chegar a todas elas a rede de saneamento e abastecemento municipal”.

O tenente de alcalde agradece “moi especialmente, a súa xenerosidade ás veciñas e veciños de Vitureira que cederon parte das súas fincas para que esta nova estrada ampliada e todas as melloras que abrangue sexa unha realidade”.

11/05/2018 in Alcaldía, Vías e obras

As medidas adoptadas polo Goberno local para a mellora do alumeado e o cambio de caldeiras supoñen 100.000€ anuais de aforro no recibo do subministro de enerxía e 220 toneladas menos de emisión de dióxido de carbono á atmosfera

Esa é a cantidade que deixará de pagar o Concello do Porriño e a de CO2 que deixarán de respirar as veciñas e veciños logo das iniciativas postas en marcha pola Concellería de Vías e Obras, que abranguen dende a renovación das instalacións do alumeado público, a substitución de 1.200 novas luminarias led, o cambio de caldeiras por outras tipo de ‘pallets’ ou a eliminación de parte dos coñecidos como ‘puntos de tantos alzados’ por modernos contadores que permiten a facturación real e que se pague pola enerxía consumida en realidade.

O tenente de alcalde, Manuel Carrera, amósase “especialmente orgulloso” de ter cumprido o abxectivo que se fixara a principios do actual mandato, hai preto de tres anos, e adianta que a inversión de 1 millón de euros nos vindeiros meses, cantidade solicitada ao Instituto para a Diversificación e Aforro de la Enerxía (IDAE) para rematar, coa “alegalidade, logo de 30 anos”, dos ‘tantos alzados’, e rematar a “legalización total” de todos os puntos de subministro e a extensión das luminarias tipo led a todas as parroquias do concello.

‘Plan Concellos 2016’ da Deputación

Manuel Carrera subliña que con cargo ao Plan Concellos 2016, da Deputación de Pontevedra, colocáronse, en total, 467 luminarias novas de 30 e de 60W, delas 96 en Torneiros, 176 en Budiño, 84 en Mosende, e 111 en Pontellas, ás que hai que engadir as preto de 400 nos polígonos industriais- PPI 6, PPI7, A Granxa e As Gándaras-.

Estes novos focos teñen unha vida útil, media, de 60.000 horas, un custo mínimo en mantemento, ofrecen un alumeado de 110 lumens por watt, “mantendo os niveis de luminosidade nesta zona tan transitada”, recortan o consumo de máis de 220.000 Kilowatios/Hora a 82.000 e, “e o máis importante: reducen en máis de 80 toneladas as emisións de CO2 á atmosfera”.

 Novas caldeiras de biomasa

O aforro e a redución da contaminación complétanse coa posta en funcionamento das novas caldeiras de biomasa instaladas polo Goberno local en 11 dependencias da vila, entre elas o propio Concello ou o Pavillón Municipal do Deporte-como tivo ocasión de comprobar hai xa un ano o conselleiro de Economía, Emprego e Industria, Francisco Conde, quen felicitara ao Concello por esta iniciativa-.

As novas caldeiras, indica Manuel Carrera, “están a aforrarnos preto de 20.000€ anuais no recibo de enerxía e teñen evitado xa, en este ano, a emisión de 142 toneladas de CO2 ao aire”.

25/04/2018 in Alcaldía, Vías e obras

A Concellería de Vías e Obras impulsa un dos traballos máis importantes do mandato actual para que o saneamento chegue a 200 casas de budiño nun prazo de 4 meses

A vindeira semana empezan na parroquia de Budiño un dos traballos máis importantes do mandato do actual Goberno local do Porriño que permitirán a conexión á Rede Municipal de Saneamento de máis de 200 casas.

Os mesmos, impulsados pola Concellería de Vías e Obras, que dirixe Manuel Carrera, serán acometidos por Augas de Galicia, co-financiados polo Fondo Europeo Agrícola de Desenvolvemento Rural de Galicia (FEADER) e permitirán que a rede do saneamento chegue aos barrios da Cruz, Vaquería, Vitureira e se espallen ata o torreiro da Forna, en Budiño.

Trátase dunhas obras longamente desexadas por veciños desta parroquia que, subliña Manuel Carrrera, “nalgún caso levan agardando dez anos” para conectar as súas vivendas á rede municipal de saneamento e tamén por aqueles que queiran trasladarse a esta parroquia e que agora poderán facelo sen necesidade de ter que construír un pozo séptico.

Carrera, que o xoves pasado mantivo unha xuntanza en Santiago de Compostela co director xeral de Augas de Galicia, Roberto Rodríguez para darlle pulo a este proxecto, lembra que o mesmo, “que finalmente será unha realidade, data de de xaneiro de 2014, aprobárase polo Pleno do Concello daquela e, por motivos que non teñen explicación, fora esquecido”.

Hoxe,cun orzamento total de 425.000€ e un período de execución de 4 meses se fai realidade e fará posible levar o saneamento a preto de 1.000 veciñas e veciños, “continuando co propósito de que a rede municipal de saneamento chegue a todo O Porriño”.

08/04/2018 in Alcaldía, Vías e obras

A Concellería de Vías e Obras segue adiante co seu obxectivo de levar o saneamento a todo O Porriño e en 15 días rematará os traballos de conexíon á Rede Municipal de Saneamento de varias vivendas de San Pelayo, en Pontellas

Seis vivendas máis de San Pelayo, na parroquia de Pontellas, poderán conectarse á Rede Municipal de Saneamento en apenas 15 días, prazo no que estarán rematadas as obras que a Concellería de Vías e Obras, que dirixe Manuel Carrera, está realizando neste lugar.

As mesmas son “un paso máis do esforzo realizado polo Goberno local para levar o saneamento a todo O Porriño”, un obxectivo que “para nós é absolutamente prioritario”, salienta Carrera.

No caso destes traballos, os mesmos consisten na colocación dun total de 190 metros lineais de tubaxes para o saneamento, 10 metros de colectores para recollida de pluviais e 6 pozos de saneamento, cun investimento de 15.000 €, “cuberto con fondos municipais”.

Manuel Carrera engade que en cando estean rematadas as obras de tendido do saneamento, “levaremos a cabo o asfaltado con cargo a unha subvención da Consellería do Medio Rural”, subvención que abrangue todo o territorio de San Pelayo.

26/02/2018 in Alcaldía, Vías e obras

A Concellería de Vías e Obras acomete a mellora da seguridade vial do PPI-VII e do Polígono da Granxa coa renovación da totalidade da sinalización horizontal e vertical

A Concellería de Vías e Obras, que dirixe Manuel Carrera, está a acometer as obras de renovación da seguridade vial do Polígono de A Granxa e do PPI VII, co pintado da sinalización horizontal e a substitución da sinalización vertical nos mesmos.

“Na actualidade estas vías atópanse, en xeral, en mal estado de conservación, coas marcas viais case totalmente borradas e os sinais verticais, ou ben moi deteriorados ou, directamente, inexistentes, o incide na seguridade dos vehículos e peóns”, subliña Manuel Carrera.

O obxecto destes traballos, que contarán cun orzamento aproximado duns 70.000€ e un período total de execución duns dous meses, abrangue a mellora integral da sinalización horizontal, coa delimitación de illas, carrís e pasos de cebra, e a renovación total dos sinais verticais, “tendo coma eixe esencial a seguridade vial á que se suma a reordenación do tráfico e a mellora da fluidez do mesmo”.

Manuel Carrera salienta que para completar a sinalización seguíronse os criterios establecidos polo Ministerio de Fomento e a Dirección Xeral de Obras Públicas e engade que o labor comprende o vial principal que conecta a parte norte e sur do PPI-VII coa estrada provincial EP-2405, así coma outra estrada anular na parte sur e, no que se refire ao Polígono de A Granxa, un total de 5,5 quilómetros de lonxitude das rúas  Paralela 3, de 1.950 metros-, rúa As Gándaras-1.020 m.-, Cíes-490 m.-Ons-200 m.- San Simón-250 m.-Sisagras-280 m.-Sálvora-120 m.-Tambo-550 m- e A Tolda-270 metros-.

25/01/2018 in Vías e obras

@regades confirma nunha visita ao Porriño que a vila disporá de case 2 millóns de euros do Plan Concellos da @depo_es

O deputado de Cooperación, David Regades, confirmou este xoves, na súa visita ao Concello do Porriño, que a Deputación de Pontevedra porá este ano a dispor do goberno municipal de Eva García de la Torre, case 2 millóns de euros co Plan Concellos. “Estamos a falar dunha inversión moi importante, dixo o deputado, 1.883.863,81€, dos cales 1,1 pertencen ao Plan 2018 e o importe restante ao adianto da liña 1 do 2019”.

Regades, quen estivo acompañado tamén polo tenente de alcalde e concellerio de Deportes e Vías e Obras, Manuel Carrera, sinalou que “a nosa aposta está clara, un incremento dun 88,4% respecto ás inversións do Plan no 2017, para que o goberno poida afrontar proxectos de envergadura, grandes actuacións pensadas para a veciñanza”.

O deputado de Cooperación tamén sinalou que “con esta decisión de sumar este ano o diñeiro da LIÑA 1 do Plan 2019, os concellos poderán planificar moito mellor as súas necesidades e, amais, facémolo coa marca propia deste Plan: o total respecto á autonomía local. Son os Concellos os que deciden os proxectos que fan cos cartos provinciais. Non decide a Deputación, deciden eles porque nós cremos que son os alcaldes, alcaldesas, concelleiros e concelleiras, os que mellor coñecen as necesidades dos seus pobos”

A remodelación e humanización da Avenida de Galicia, a entrada ao concello do Porriño, será un dos proxectos estrela de este ano que se financiará co Plan Concellos. “Hai que agradecer, dixo Regades, que o concello dedique as achegas da Deputación a proxectos como este porque falamos dunha obra de humanización que vai cambiar a vila, vai transformala para que as rúas deixen de ser lugares onde os vehículos son os protagonistas a espazos para o goce das veciñas e dos veciños”.

Pola súa banda, a alcaldesa, agradeceu o esforzo da Deputación. “O goberno provincial e nós temos unha forma de ver as cidades moi parecidas e por iso propuxemos investir as achegas na transformación desta vía de entrada ao Porriño para que sexa máis humana, máis compatible co uso do espazo público por parte da cidadanía”. García de la Torre subliñou que se vai reformar o Parque da Alameda e realizaranse actuacións na mediana e beirarrúas, con árbores e espazos máis atractivos e acondicionados para as veciñas e veciños.

Plan de Reequilibrio

O deputado, a alcaldesa e o tenente de alcalde e concelleiro de Vías e Obras e Deportes,  tamén visitaron as instalacións de atletismo da Granxa, acompañados pola directiva do Club de Atletismo, que serán reformadas ao abeiro do novo Plan de Reequilibrio da Deputación. As obras, cun orzamento dun millón de euros, serán cofinanciadas pola institución provincial con 800.000€.

O proxecto elixido polo concello, que Regades definiu como “unha aposta de futuro que dará un enorme impulso ao deporte do Porriño”,  dotará aos e ás integrantes do club dunhas instalacións óptimas para os seus adestramentos. Amais, as obras que está previsto que rematen no verán do 2019 servirán para homologar a pista con vistas a acoller competicións oficiais.

Na actualidade, a parcela posúe un campo de fútbol e unha pista perimetral que se usa para adestramentos pero carece das medidas necesarias para competición e do pavimento axeitado. Executarase un módulo cuberto con unha recta de 6 rúas de 60 m de lonxitude e unha pista homologada, e contará cunha cuberta dotada de lucernarios que permitan o paso da luz natural. Amais, dotarase da iluminación necesaria para o desenrolo de competicións e adestramentos e prevese a posible instalación dun sistema de “fotofinish”. Na parte central da pista executarase un módulo de lanzamento de peso cun aro de formigón provisto do aro de seguridade. O entorno terá un espazo verde de céspede que integra a instalación coa súa contorna.

A alcaldesa puxo en valor o proxecto nunha vila xa coñecida pola súa importancia no deporte.  “Nos vai permitir prestar servizos relacionados co deporte á cidadanía, incrementando a súa participación e impulsando a atracción de grandes eventos deportivos ata O Porriño”, dixo.

O Plan de Reequilibrio é unha iniciativa, con bases claras, transparentes e obxectivas, dirixida aos concellos de menos de 20.000 habitantes da provincia, para poñer en marcha novos investimentos en dotacións singulares. A través deste plan beneficiaranse 25 concellos para os que a Deputación inviste un total de 15 millóns de euros.

11/01/2018 in Alcaldía, Deportes, Vías e obras

Protección Civil do Porriño recibe da Xunta de Galicia un novo remolque que servirá para completar o material de emerxencias que manexa a diario este servizo

Manuel Carrera, tenente de alcalde do Porriño recibiu, en nome do Concello e de mans da Vicepresidencia do Goberno de Galicia, un novo remolque para o Servizo de Emerxencias e Protección Civil do Porriño.

O remolque inclúe unha electro-bomba somerxible, unha motobomba para augas residuais, un xerador de electricidade portátil de gasolina, unha motoserra, unha rozadora, unha torre de iluminación e kit de balizamento e sinalización todos estes elementos con todos os complementos de seguridade necesarios para una correcta utilización.

Carrera, que estivo acompañado por responsábeis de Protección Civil do Porriño, salientou o “importantísimo traballo, altruísta e desinteresado e constante” dos integran deste servizo que, subliñou, contribúen a garantir a seguridade e tranquilidade das porriñesas e porriñeses en cooperación co traballo que levan a cabo outros servizos profesionais de emerxencias.

15/12/2017 in Alcaldía, Benestar, Vías e obras

A Concellería de Vías e Obras sustitúe as luminarias dos polígonos industriais o que permitirá un aforro de 51.430€ anuais e reducirá as emisións de CO2 á atmosfera

51.430€. Ese será o aforro anual en subministro de electricidade que acadarán as veciñas e veciños logo da substitución das instalacións de alumeado  nos polígonos industriais do Porriño levada a cabo polo Goberno local a través da Concellería de Vías e Obras, que dirixe Manuel Carrera.

Os traballos de substitución das lámpadas de vapor de sodio de 150 e 250 W, xa obsoletas e enerxéticamente insuficientes, por luminarias de tecnoloxía LED de 40 e 60W, non so suporán un “importantísimo aforro enerxético, senón que cumprirán cunha das premisas que nos fixaramos ao comezo do mandato: a reducións das emisións de CO2 á atmosfera”, sinala Manuel Carrera, que superarán os 70.000 quilos de dióxido de carbono anuais.

En total, e por medio dunha subvención da Consellería de Economía, Emprego e Industria, dentro do Plan de Habilitación e Mellora de Infraestruturas dos Parques Empresariais de Galicia, substituíronse 370 focos no Polígono de As Gándaras, o PPI6 e PPI7 instalando non so luminarias re-programadas sen fío demando, senón incorporando ás mesmas de  programadores dotados de reloxos astronómicos, que permiten un aforro adicional de enerxía.

Os novos focos teñen unha vida útil, media, de 60.000, un custo mínimo en mantemento, ofrecen un alumeado de 110 lumens por watt, “mantendo os niveis de luminosidade nesta zona tan transitada”, e permiten que a inversión feita na súa colocación estea amortizada nun período de 2 anos e medio.

27/11/2017 in Alcaldía, Vías e obras