Urbanismo, comercio e industria

Avanzamos na creación dunha gran zona verde no centro urbano

O Concello do Porriño deu hoxe un paso importante na humanización do seu centro urbano dotando de partida orzamentaria un dos proxectos urbanísticos de maior impacto: a humanización da contorna do centro social que acondicionará as rúas Antonio Palacios, Domingo Bueno, Ramón González e Pío XII creando un gran espazo público.
 
A goberno municipal aprobou definitivamente a modificación orzamentaria que consigna a aportación municipal comprometida no convenio asinado coa Deputación de Pontevedra para executar a primeira fase do proxecto. Concretamente 460.000 euros, o 33% do orzamento total. Simultaneamente, a administración local está a adquirir os terreos necesarios para levar a cabo estas obras.
 
Este proxecto consiste na creación dun gran espazo público pensado para dar prioridade á mobilidade peonil e máis importancia ás zonas verdes, ao tempo que se limita o paso de vehículos. Para conseguilo está prevista a creación dun espazo contínuo, accesible e verde, no que se mellorará a comunicación peonil entre o centro urbano e a rúa Pío XII, crearanse novas zonas de convivencia baixo a sombra de novas especies arbóreas e buscarase a apertura da contorna do centro social coa rúa e o parque, ademais de executarse a renovación integral da zona de ocio infantil. Ao mesmo tempo, na calzada de Pío XII renovaranse todas as redes de servizos e dotarase dunha plataforma única que conecte coa nova zona verde da contorna, reducirase o tráfico e a súa velocidade.
13/05/2024 in Parques e xardíns, Urbanismo, comercio e industria, Vías e obras

Os comerciantes do Porriño celebran con premios o Día da Nai

Os comeciantes do Porriño adiantan as celebracións do Día da Nai cunha divertida acción para que a veciñanza participe e entre no sorteo de varias tarxetas regalo.

Dende hoxe, 25 de abril, ata o vindeiro 5 de maio haberá instalados tres photocalls en horario comercial na praza do arquitecto Antonio Palacios, e nas rúas Antonio Palacios e San Benito. As persoas que queiran participar no sorteo de tres tarxetas regalo de 50 euros para gastar nos comercios locais asociados, terán que sacarse unha foto no photocall e subila os seus perfís de Facebook ou Instagram e etiquetar a CCA Morea. O sorteo realizarase o 8 de maio.  

Noelia Conde, xerente de ACIPOR, salienta que “dada a gran acollida da campaña similar para o Día do Pai, queríamos repetir e darlle agora o protagonismo as nais no seu día. Unha campaña na que poda participar todo o mundo e sexa divertido para os cativos e cativas, que son unha parte moi importante da clientela dos comercios do Porriño”. Noelia anima á participación recordando que “non hai límite de fotos por persoa, cantas máis fotos subidas, máis opcións hai de gañar!”.

Un convite ao que se sumaron o alcalde, Alejandro Lorenzo, e a concelleira de Comercio, Rosa Isabel Alonso, agradecendo ademais a Acipor as súas iniciativas de dinaminación do comercio local.

25/04/2024 in Alcaldía, Urbanismo, comercio e industria

Aberto o prazo de solicitude das axudas para a rehabilitación de vivendas en Torneiros

O BOP publicou o pasado venres, 19 de abril, o extracto da resolución da alcaldía pola que se aproban as Bases e convocatoria para a concesión de axudas en materia de rehabilitación residencial e vivenda social no entorno residencial de rehabilitación programado de Torneiros, abrindose así o prazo para solicitalas. O prazo para requerilas finalizará o 31 de xaneiro de 2026.

Para este proxecto o Concello do Porriño recibiu un millón de euros, no marco do Programa de axudas para a rehabilitación de entornos residenciais a nivel barrio, que se distribuirán en axudas para impulsar medidas de eficiencia enerxética.

Dentro do ámbito delimitado do proxecto, que comprende 945 vivendas en 81 edificios, programouse inicialmente a rehabilitación dun número estimado de 105 vivendas que ocupan 1,38 hectáreas, repartidas en diferentes bloques. Deste millón de euros, preto de 130.000 destinaranse á urbanización e mellora da contorna, que se complementa con outras actuacións que o Concello está a levar a cabo para humanizar a zona, como o acondicionamento de beirarrúas ou a renovación do alumeado público. No marco desta actuación instalaranse 156 lámpadas leds, cunha inversión total de preto de 75.000 euros.

A parte restante será para axudas a particulares e/ou comunidades de propietarios destinadas á mellora de fachadas, mellora de cubertas, incluíndo aquí a eliminación de amianto, e o relevo de xanelas e vidros exteriores, empregando carpintería de pvc e vidro eficiente térmicamente, todo isto co obxectivo de conseguir un aforro enerxético mínimo do 30%.

O importe das subvencións a particulares dependerá do grao de eficiencia enerxética que se alcance coas obras executadas, que pode ser do 40%, do 65% ou do 80% do orzamento, incluso do 100% cando se identifique un caso de vulnerabilidade económica.

24/04/2024 in Alcaldía, Urbanismo, comercio e industria

Publicadas as bases para a instalación de postos de venda e casetas no Porriño Fashion Market

A concellería de Comercio do Concello do Porriño convoca a Festa Fashion Weekend para os días 19, 20 e 21 de abril. Dita festividade distribuirase en tres acontecementos que arrancará coa Shoping Night, continuará coa Fashión Night e concluirá cunha Fashion Market. A finalidade destas bases é establecer os requisitos, pautas e condicionantes que se deberá cumprir para poder participar durante a celebración deste ultimo acontecemento, e dicir, da Fashion Market.

BASES POSTO DE VENTA : https://oporrino.org/documentos/bases-de-funcionamento-postos-de-venda-fashion-market/

BASES ASOCIACIÓNS CULTURAIS E VECIÑAIS SEN ÁNIMO DE LUCRO https://oporrino.org/wp-content/uploads/2024/04/BASES-DE-FUNCIONAMENTO-DOS-POSTOS-DE-VENDA-OU-CASETAS-POLAS-ASOCIACIONS-CULTURAIS-E-VECINAIS-SEN-ANIMO-DE-LUCRO-Fashion-Weekend.pdf

ANEXO I: https://oporrino.org/wp-content/uploads/2024/04/Anexo-I.pdf

DOCUMENTACIÓN A ADXUNTAR: https://oporrino.org/documentos/documentacion-a-presentar-coa-solicitude/

10/04/2024 in Alcaldía, Urbanismo, comercio e industria

A Praza de Abastos abre de novo as súas portas cunhas instalacións totalmente renovadas

Tras un mes pechada por obras de mellora, a Praza Abastos do Porriño abriu as súas portas este martes e o fixo por todo o alto. Unha vez completados os traballos da primeira fase da mellora, que incluíron a renovación do pavimento, instalación de fontanería e eléctrica e reparación dos danos que presentaba a estructura, os praceiros e praceiras atenderon de novo aos centos de usuarios que hoxe pasaron polo mercado municipal para facer as súas comprar e coñecer as melloras.
 
O alcalde, Alejandro Lorenzo, e a concelleira de Mercados, Antía Carrera, acompañaron á conselleira de Promoción do Emprego e Igualdade, Elena Rivo, que hoxe se uníu á inauguración. Con eles estiveron a xerente do Instituto Galego de Consumo e da Competencia, Sol Vázquez, e a delegada da Xunta en Vigo, Ana Ortiz, así como concelleiros e concelleiras do goberno local.
 
“Con esta reforma daremos ese salto de calidade que necesitaba a nosa Praza de Abastos para transformarse de novo no centro neurálxico do comercio da vila”, explicou o alcalde, “Estamos máis cerca de conseguir o selo de Mercado Excelente de Galicia e de que a praza sexa de novo o foco de dinamización económica que foi antaño. Contamos cunha ampla variedade de produtos de alta calidade á venta, unha representación de todos os sectores: florerías, froiterías, peixeiras, carnicerías… e un incontestable traballo dos nosos praceiros e praceiras. Só nos quedaba por tachar o único dos requisitos que estaba pendente dende hai décadas: a mellora das nosas instalacións”.
 
O rexedor incidiu en que se trata só da primeira fase dun proxecto global que “modernizará e dinamizará a praza” e en que iso non sería posible sen o respaldo da Xunta de Galicia “que apoiou sempre este proxecto” e sen o “dos nosos praceiros e praceiras, que dende o principio traballaron con nós man a man. Moitas grazas por isto e por facer pobo”.
 
A conselleira destacou tamén esta infraestrutura como “punto dinamizador do comercio e da economía da contorna” e felicitou ao alumnado traballador da especialidade de Cociña “Porremprego Cualifica II”, que prepararon in situ uns petiscos elaborados con produtos da Praza de Abastos que puido degustar toda veciñanza.
 
Tamén os nenos e nenas tiveron o seu espazo, participando en obradoiros para eles na contorna da praza onde aprenderon xogando sobre os productos que ofrece o mercado municipal.
19/03/2024 in Alcaldía, Urbanismo, comercio e industria

O comercio do Porriño celebra o Día do Pai con premios

Os comerciantes do Porriño celebran o Día do Pai sorteando varias tarxetas regalo.

Participar é moi doado. Desde hoxe e ata o 19 de marzo instalarán photocalls na rúa peonil, no barrio de San Benito e na rúa Antonio Palacios e toda aquela persoa que queira participar na campaña ten que facerse unha foto e subila as súas redes –Instagram e Facebook- etiquetando a CCA Morea

Entre todos os participantes sortearanse tres tarxetas regalo de 50 € para canxear nos establecementos pertencentes a Morea. Podes etiquetar tantas fotos como queiras e así terás máis opción! .

O sorteo realizarase o día 20 de marzo e anunciaranse os gañadores a través das redes sociais de CCA Morea, ACIPOR.

14/03/2024 in Alcaldía, Urbanismo, comercio e industria

O Concello renovará o alumeado público dos polígonos residenciais de Torneiros

O Concello do Porriño xa puxo en marcha o proxecto de sustitución do alumeado público do polígono residencial de Torneiros e parque Piñeiro.

A primeira fase desta actuación xa está aprobada e contempla a renovación de 105 lámpadas por luminarias LED nas zonas peonís das fases II e III. Conta cun investimento de 40.000 euros ao abeiro dunha subvención do Fondo de Compensación Ambiental da Xunta de Galicia.

A intervención neste núcleo de vivendas, un dos que máis poboación concentra do municipio, é global e non se limita a esta área. O Concello ten proxectada unha segunda actuación nas fases I e IV, onde se instalarán 51 luminarias LED. Este proxecto supoñerá un investimento de máis de 34.000 euros.

“Trátase de mellorar a seguridade e a calidade na prestación do servizo de alumeado público nesta zona residencial, xa que a instalación actual está obsoleta, ten unha antigüidade de 30 anos”, explicou o alcalde, Alejandro Lorenzo, “Coa sustitución das luminarias non só melloraremos os niveis de iluminación e de eficiencia enerxética, tamén se reducirá o consumo, o gasto e contribuiremos á mellora medioambiental coa optimización dos recursos enerxéticos”.   

29/02/2024 in Alcaldía, Urbanismo, comercio e industria, Vías e obras

Avanzados os traballos de acondicionamento da nova área de autocaravanas

O Porriño contará nas próximas semanas cun área de caravanas e autocaravanas no centro urbano.

Trátase dunha zona que ocupará uns 200 m2 da parcela de Leandro Diz habilitada como aparcamento gratuíto.  Os traballos de acondicionamento da parcela xa comezaron e unha vez rematados ofrecerán aparcamento con todos os servizos necesarios para as autocaravanas, ademais da zona habilitada como aparcamento gratuíto que xa está en funcionamento.

O alcalde, Alejandro Lorenzo, supervisou hoxe as obras de acondicionamento do aparcadoiro, no que se está a instalar a rede de abastecemento e acometidas, sinalización e a renovación do firme.

“Esta era unha demanda  que considero tiña que ser atendida, xa que se trata dunha forma de turismo en auxe e o turismo e prestando este servizo potenciamos o turismo na vila, que é sen dúbida un factor de desenvolvemento”, explicou o alcalde, “É unha forma ademais de impedir que as caravanas e autocaravas que chegan ao Porriño se instalen noutros aparcadoiros ante a falta dun aparcamento municipal habilitado”.

O rexedor concluíu engadindo que “se están a estudiar outros espazos para habilitar novas áreas destinadas a este fin”.

29/02/2024 in Alcaldía, Urbanismo, comercio e industria, Vías e obras