Urbanismo, comercio e industria

Finalmente, ‘Merca na rúa’ celebrarase o sábado 7 e domingo 8 de abril

A Concellería de Comercio, dirixida por Marcelino Coto, e a dirección da Asociación de Comerciantes e Industriais do Porriño (ACIPOR), presidida por Juana Pérez, veñen de anunciar que a XVIII edición de ‘Merca na rúa’, finalmente, se celebrará o sábado 7 e domingo 8 de abril.

Nun primeiro momento estaba previsto que esta feira de oportunidades fose os días 10 e 11 deste mes de marzo, pero a chegada da borrasca ‘Félix’ fixo que se aprazase, en principio, para o día 17 e, agora que se tomase a decisión de que o máis acaído era que se celebrase a principio de abril.

21 postos estarán abertos ao público na rúa peonil do Porriño, de 10 da mañá a 9 e media da  da noite, ininterrompidamente, o sábado, día 7, e de 11 da mañá a 8 e media da tarde, o domingo, 8, ofrecendo distintos artigos con descontos de ata un 60 e 70%.

Como en edicións anteriores, o Concello asume os custes de alumeado, limpeza, os inchábeis para os cativos e a vixianza de seguridade dos postos, para que os expositores non teñan que recoller e desmontar os mesmos pola noite, unha labor de garda na que desempeñará un papel esencial a Policía Local.

14/03/2018 in Alcaldía, Urbanismo, comercio e industria

‘Merca na rúa’ queda aprazada ata o sábado día 17 a causa das malas previsións meteorolóxicas

A Concellería de Comercio, dirixida por Marcelino Coto, e a dirección da Asociación de Comerciantes e Industriais do Porriño (ACIPOR), presidida por Juana Pérez, veñen de acordar a suspensión da XVIII edición de ‘Merca na rúa’, que tiña prevista a súa celebración o vindeiro sábado e domingo, días 10 e 11 de marzo.

A decisión, indica Marcelino Coto, está motivada polas previsións meteorolóxicas que prevén un temporal de choiva e vento para os vindeiros días e que impedirían que ‘Merca na rúa’ puidese desenrolarse.

A intención , sinala o concelleiro, é trasladar a celebración desta feira de oportunidades ao vindeiro día 17, sábado, “sempre que as condicións climatolóxicas o permitan”.

08/03/2018 in Alcaldía, Urbanismo, comercio e industria

A Concellería de Medio Ambiente ‘mobiliza’ aos veciñas na loita contra a Velutina e empeza a entregar 500 trampas que estarán distribuidas en todo o territorio do Porriño

A Concellería de Medio Ambiente quere mobilizar aos veciños na loita contra a vespa velutina e xa empezou a repartir 500 trampas -300 máis que o ano pasado- e 175 litros de líquido atrainte deste insecto que estarán situados en todas as parroquias do Porriño.

“¿Quén mellor que os propios veciños, algúns deles apicultores, para facerlle fronte a esta especie invasora?”, sinala o concelleiro Marcelino Coto, quen asegura que cada trampa que entregue o Concello estará numerada e nunha localización concreta, “o cal permitirá ter un rexistro exacto da súa efectividade”.

Coto subliña que as porriñesas e os porriñeses son os máis interesados en acabar coa vespa velutina, en defender as súas casas, as súas árbores, as súas colmeas, e defender eles mesmos, “non esquecemos a morte de Ángel González, veciño de Orbenlle, en Budiño, logo do ataque de varias destas vespas”.

O reparto e a colocación destas trampas, o 95% das cales serán reutilizabeis o ano que ven, coincide, “como xa tiñamos previsto”, co comezo da floración, que é o momento, segundo indican os expertos, no que empezan a sair as raíñas, ao redor das cales formaranse os panais, “e ista é unha época do ano que é clave para causar o maior daño posible a esta especie”. Ademáis, está a poucas semanas do celebración da XXX edición da Feira Apícola das Rías Baixas, impulsada polo Concello do Porriño e organizada pola Agrupación Apícola de Galicia e a Asociación de Apicultores de Pontevedra, coa colaboración da Indicación Xeográfica Protexida (IXP) Mel de Galicia.

Marcelino Coto lembra o “constante traballo” que se fai, dende hai anos, polo Concello para afrontar a invasión da vespa velutina, unha labor que foi recoñecida pola Facultade de Ciencias da Universidade de Vigo o pasado 2017, cando se eliminaron 3.800 exemplares deste insecto, “o 85% deles raíñas fundadoras”, aproximadamente unas 3.300.

22/02/2018 in Alcaldía, Urbanismo, comercio e industria

O posto da campaña ‘O que se enchufa, recíclase’ está aberto na Praza de Antonio Palacios e as persoas que se acheguen ao mesmo levarán un agasallo para casa

Coa finalidade de informar e concienciar ás veciñas e veciños do Porriño sobre a reciclaxe de residuos e aparellos electrónicos, dende o pasado martes, e durante os días 23, 24, 25, 26, 27 e 30, haberá un posto desta campaña ‘O que se enchufa, recíclase’ situado na Praza de Antonio Palacios, diante do Concello, no que se dará ás persoas que se acheguen unha breve explicación sobre qué son e onde se poden depositar estes aparellos unha vez deixen de funcionar.
O posto está aberto os días sinalados de 11 a 14 horas e de 16 a 19 h., e as veciñas e veciños que se acheguen ao mesmo poderán participar nun sinxelo xogo de ruleta grazas ao cal marcharán cun agasallo para casa.
25/01/2018 in Alcaldía, Urbanismo, comercio e industria

O Porriño, por medio da Concellería de Medio Ambiente, súmase á campaña ‘O que se enchufa recíclase’, impulsada pola Consellería de Medio Ambiente do Goberno de Galicia

Durante os días 23, 24, 25, 26, 27 e 30 deste mes de xaneiro, o Concello do Porriño, por medio da Concellería de Medio Ambiente, que dirixe Marcelino Coto, súmase á campaña “O que se enchufa recíclase” promovida pola  Consellería de Medio Ambiente da Xunta de Galicia.

Como sinala o concelleiro, “con esta campaña búscase a concienciación para a reciclaxe de residuos e aparellos electrónicos” , coñecidos como RAEE, a través dos puntos de venda dos mesmos e, ao mesmo tempo, informar dos dereitos e obrigas que que establece a lei tanto a consumidores coma a distribuidores deste tipo de aparellos.

Os aparellos eléctricos e electrónicos son produtos moi complexos, con moitos materiais e distintos tipos de pezas. Nos mesmos pode haber, metais, madeiras, plásticos, cartón ou cristal líquido, por exemplo: un teléfono móbil ten ata 40 tipos de materiais e terras raras que teñen un alto valor.

Por isto último, recuperar eses materiais é un novo xeito de ‘minería urbana’, respectuosa coa contorna, co medio ambiente e que favorece o aforro de recursos naturais.

Coa finalidade de informar ás veciñas e veciños do Porriño de todos estes temas, haberá un posto desta campaña situado na Praza de Antonio Palacios, diante do Concello, no que se dará ás persoas que se acheguen unha breve explicación sobre qué son e onde se poden depositar estes aparellos unha vez deixen de funcionar.

As veciñas e veciños que se acheguen a este posto poderán participar nun sinxelo xogo de ruleta grazas ao cal marcharán cun agasallo para casa.

21/01/2018 in Alcaldía, Urbanismo, comercio e industria

O Goberno local informa aos veciños do Contrasto que as análise feitas pola Xunta dan “valores moi altos” de lindano na terra onde se realizaba unha obra

Os concelleiros de Medio Ambiente, Marcelino Coto, e de Seguridade, Lourdes Moure, xunto co xefe da Policía Local, Daniel Rodríguez, informaron este luns ás 75 familias da Zona do Contrasto, en Torneiros, que poden estar afectados polo achado de lindano nunha obra de saneamento que se estaba a realizar nesta zona, sobre os resultados das análise feitas en terra polos técnicos da Xunta de Galicia, que ten a competencia no tratamento desta situación.

Como subliñou Marcelino Coto, as analíticas, comunicadas ao Concello pola xefa territorial de Sanidade, indican “valores moi altos de contaminación” na terra do lugar da obra que superan “en máis de 100 veces o valor de referencia”.

Coto aclarou que estas análise non teñen que ver coas das mostras de auga, que aínda están a realizarse e que se coñecerán nuns días, e asegurou que aquelas casas que teñan abastecemento de auga da traída, “non teñen risco algún”, posto que non hai filtracións de lindano neste subministro.

Sí que pediu aos veciños das 13 vivendas da zona que so teñen auga de pozo, que non usen a mesma “nin para beber nin para cociñar” e, así mesmo, que tampouco  se consuman os alimentos que puidesen ter cultivado nos terreos desta zona.

O concelleiro de Medio ambiente, quen recoñeceu que a situación é “preocupante”, pediu que non se cre alarma social e asegurou que nin os obreiros que estaban a facer os traballos de saneamento, “e que estiveron en contacto directo co lindano”, nin os persoal municipal que se achegou ao lugar “tivo reacción algunha”.

Os concelleiros, que están en “contacto diario” cos responsábeis das consellerías de Sanidade e de Medio Ambiente, aseguraron que os veciños estarán informados “en todo momento” e que se lles dará traslado, “de inmediato”, de calquera novidade que haxa.

14/11/2017 in Alcaldía, Urbanismo, comercio e industria, Vías e obras

En novembro, O Porriño ‘se destapa’ co Pinchorriño

Os amantes do tapeo teñen unha nova cita co Pinchorriño, a cita gastronómica organizada pola Asociación de Comerciantes e Industriais do Porriño (ACIPOR) e a Asociación de Hostaleiros da localidade coa colaboración do Concello.

Este 2017, como salientou o concelleiro de Comercio, Marcelino Coto, na presentación feita este luns ao mediodía, o 12º Pinchorriño rexistrará unha nova marca de participantes: 44 establecementos en total fronte aos 41 do ano pasado, que todos os venres e sábados de novembro, de 7 da tarde a 11 da noite, ofrecerán un pincho de balde aos seus clientes.

Coto desvelou que o segredo do “éxito” desta iniciativa está “na calidade e no prezo dos pinchos que se serven”. Na mesma liña, a presidenta de Acipor, Juana Pérez, garantiu que os prezos das consumicións non subirán durante os días de celebración do Pinchorriño e lembrou que o custo desta mostra da gastronomía do Porriño recae nos propios hostaleiros.

O obxectivo este ano é o de superar as máis de 18.500 persoas que participaron na edición de 2016, unha meta que está ao alcance da man considerando que haberá tapas para todos os gustos e de todas as texturas e sabores, mesmo pinchos para veganos, sen glute e para celíacos.

A ‘ruta’ dos pinchos, os locais, as súas propostas, mesmo fotografías dos pinchos, poden seguirse por medio da APP ‘QuedamosdeTapas’, que pode baixarse dende Google Play e AppStore. Así mesmo, os clientes poden optar a gañar unha estadía nunha casa de turismo rural selando, no folleto que estará a dispor nos propios locais, catro cupóns de catro establecementos s participantes no Pinchorriño 2017.

Para rematar a presentación destas xornadas culinarias, a alcaldesa, Eva García de la Torre, lembrou que O Porriño está xa nas axendas gastronómicas de Galicia polas festas do Pan, dos Callos, dos Cachos e, por suposto do Pinchorriño.

García de la Torre animou ás porriñesas e porriñeses e a todas as veciñas e veciños da Área Metropolitana a achegarse a O Porriño e gozar duns pinchos que, “son imaxinativos, están elaborados cos mellores ingredientes…e parando en tres ou catro locais un xa vai cenado para casa”.

30/10/2017 in Alcaldía, Cultura e festas, Turismo, Urbanismo, comercio e industria

A alcaldesa e o concelleiro de Industria reafirman a traballadores e directivos de Maderas Iglesias a disposición do Concello do Porriño a mediar no conflito

Os traballadores de Maderas Iglesias, reunidos en asemblea,amosáronse a prol de que o Concello do Porriño sexa un dos mediadores no conflito que o persoal mantén coa dirección da empresa.

Este mércores a alcaldesa, Eva García de la Torre, xunto con concelleiro de Industria, Marcelino Coto, e o tenente de alcalde e o concelleiro de Emprego de Mos, mantiveron xuntanzas cos traballadores e con representantes da empresa de cara a facer posible un entendemento entre as dúas partes.

Eva García de la Torre sinalou que constatouse que a empresa xa pagara a meirande parte do adebedado ás traballadoras e traballadores, aos que aínda queda por cobrar unha cantidade, e sinalou que agora o eido no que hai máis desacordo é o desenrolo do Expediente de Regulamento de Emprego (ERE) temporal que afecta a boa parte das empregadas e empregados.

Neste punto, os traballadores sinalaron que a aplicación do mesmo non está a ser equitativa, posto que mentres hai membros do plantel que acumulan 300 ou 400 días de ERE, “e que están ao límite ou esgotando xa a súa prestación por desemprego”, outros ou non consumiron nin 20 días dese ERE.

Tanto a alcaldesa coma o concelleiro Coto reafirmaron a “total dispoñibilidade” do Goberno local a mediar nesta situación, “cumprindo o mandato do Pleno da Corporación”, coa finalidade de que esta mediación teña coma obxectivos o mantemento dos empregos e dos dereitos dos traballadores e o reforzo da viabilidade dunha empresa que forma parte da vida, do tecido social e da economía do Porriño.

Neste senso, considerando que Maderas Iglesias ao estar en concurso de acredores non pode acceder a liñas de creto, faise “vital” que cobre con puntualidade os encargos dos seus clientes, a alcaldesa e o concelleiro de Industria sinalaron a necesidade de que, considerando que a maior parte da débeda cos traballadores está xa pagada, os representantes sindicais poderían facer un xesto de boa vontade desconvocando as mobilizacións anunciadas para as vindeiras datas.

Este feito, indicaron Eva García de la Torre e Marcelino Coto, contribuiría a reforzar a imaxe de Maderas Iglesias e facilitaría que os seus clientes renovasen a súa confianza nesta empresa, posibilitando a que houbese un aumento dos pedidos e, co mesmo, un incremento da actividade.

18/10/2017 in Alcaldía, Benestar, Emprego e formación, Igualdade, Urbanismo, comercio e industria

Cada estrada, camiño, lugar e rúa do Porriño estarà nomeada e numerada oficialmente e todo o concello estará cartografiado dixitalmente

Nuns meses, todo O Porriño estará cartografado dixitalmente, e todos os seus camiños, lugares, estradas, carrís, travesías e rúas estarán perfectamente nomeados. Os traballos, impulsados pola alcaldesa, Eva García de la Torre, e que están a ser realizados pola Concellería de Urbanismo, que dirixe Marcelino Coto, xa comezaron e o resultado da primeira fase dos mesmos poderá verse nun prazo de 6 meses.

O obxectivo é que cada casa do concello estea perfectamente sinalada, empezando polo seu emprazamento exacto, o nome da parroquia e do lugar, o camiño no que se sitúa e polo que se accede á mesma-se este é de terra, se grava ou de asfalto- a numeración, unha xeo-referencia que inclúe a súa situación e a dos seus habitantes e unha referencia catastral que pode consultarse, informáticamente, en medio minuto.

A empresa Laya, especializada na realización de rueiros e numeración municipal, en dixitalización cartográfica, elaboración de mapas e publicación dos mesmos en portais web, empezou este martes, no lugar de Pinzal, na parroquia de Cans, este traballo que se prevé estea rematado a vindeira primavera.

Persoal da mesma, “perfectamente identificado cunha acreditación que leva o selo do Concello”, indica Marcelino Coto, percorre xa O Porriño falando cos veciños e tomando os datos que demanda este Sistema de Información Xeográfica (SIG pola súa abreviatura en inglés), que permitirá dispor dos mesmos nun software e,dunha banda, pendurar esta cartografía, para a súa consulta, na páxina web do Concello e, doutra, que servizos municipais coma o Padrón, Estatística ou os servizos de Emerxencia, poidan consultar calquera información que precisen.

“Este proxecto terá tamén outras utilidades esenciais, coma que os envíos que reparte Correos cheguen ao domicilio ao que van dirixidos, algo que moitas veces non sucede posto que os carteiros cambian e cando non coñecen unha parroquia non teñen unha situación exacta na que deixar ese paquete ou esa carta xa que non hai o nome dun camiño e, moito menos o número de cada unha das casas do mesmo”, sinala Marcelino Coto.

Ao mesmo tempo que se leva a adiante esta labor, o Concello pedirá aos veciños de cada lugar que sexan os que decidan os nomes das estradas, travesías e camiños, “en función dos nomes polos que son coñecidos habitual ou historicamente”, nomes que pasarán a ser oficiais e a incorporarse a este novo ‘rueiro’ que, sinala o concelleiro, “mesmo contempla o feito de que nunha finca na que non haxa construción algunha pódase edificar no futuro, asignándolle xa un número por anticipado”.

10/10/2017 in Alcaldía, Educación e tecnoloxía, Urbanismo, comercio e industria

Os ‘mellores callos do mundo’ este domingo, 1 de outubro, no Porriño

O Porriño agarda superar as 20.000 racións o vindeiro domingo, día 1 de outubro, na que será a XXIV ‘Festa dos Callos’, coa que se pon fin ao Cristo deste 2017.

A presentación da mesma, na que participaron este martes a alcaldesa, Eva García de la Torre, o concelleiro de Comercio, Marcelino Coto, o presidente dos hostaleiros do Porriño, José Manuel Fernández, a presidenta da Asociación de Comerciantes (ACIPOR), Juana Pérez, a a xerente da mesma, Noelia Conde, contou coa intervención dunha das protagonistas da festa deste ano a coñecida Lola Manisca, quen aportou a súa experiencia e as súas lembranzas desta festa que, como indicou “ten moitos máis anos ca min”.

Preto de 50 locais, restaurantes e bares ofrecerán callos cociñados con distintas receitas-algunhas delas seguen a ser un segredo que gárdase en cada familia- e que se servirán a un prezo de 4,5€ a ración con pan e a cazola, ou 4€ se son para levar.

26/09/2017 in Alcaldía, Cultura e festas, Turismo, Urbanismo, comercio e industria