Urbanismo, comercio e industria

O colectivo de vendedores zamoranos volverá montar os seus postos no mercado ambulante do Porriño que polo tanto recuperará a plena normalidade.

Despois dunha reunión solicitada polo colectivo na que expuxeron que o motivo fora un problema interno entre eles por desacordos cos emprazamentos dos postos, chegouse ao acordo de que o vindeiro martes 30 de xuño, volverán a instalarse.

Tres representantes do colectivo acompañados por Luis León Salazar entrevistáronse cos concelleiros Sergio Casal, responsable de Comercio, David Alonso, de Servizos Sociais e Lourdes Moure, de Seguridade.

Os voceiros do colectivo de ambulantes zamoranos amosaron plena disposición a colaborar co Concello nesta nova organización do mercado dos martes. Pola súa banda o concelleiro Sergio Casal agradeceu que o colectivo reconsiderase e volva ao mercado e reiterou que “a disposición do goberno municipal a manter vías de diálogo e entendemento con eles é permanente”.

Sergio Casal, concelleiro de Comercio manifestou estar “satisfeito do resultado e ambiente que lle da á vila” a nova organización de espazos do mercado ambulante dos martes que se celebrou hoxe, por primeira vez despois de cen días polo estado de alarma.

Tamén a alcaldesa Eva García resaltou que “a nova configuración do mercado dalle moita máis vida á zona peonil ao tempo que se respectan os protocolos sanitarios”. A alcaldesa, acompañada de Lourdes Moure, concelleira de Seguridade percorreu o mercado a mediodía para comprobar o resultado entre a veciñanza.

O mercado ocupa unha franxa de aproximadamente un quilómetro entre San Sebastián e a praza do Concello coa ocasión da estrea da nova distribución. Os postos colocaronse tan só nunha beirarrúa o que permite ter espazo dabondo para que os peons poidan circular gardando as distancias de seguridade e ao mesmo tempo respectar as terrazas dos bares e os escaparates do comercio establecido.

Cada posto ocupou un máximo de 6 metros lineais e gardaba unha unha distancia de 2 metros co seguinte. Os postos de venda de productos alimentarios e prantas instalaronse na rotonda de San Sebastián.

Finalmente, montaronse a meirande parte dos 128 postos de venda autorizados e sinalizados. Sen embargo, unha parte de vendedores, do colectivo xitano decidiron non montar os seus postos en desacordo coa orde de asignación dos mesmos.
Ao respecto, o concelleiro de Comercio manifestou que agarda que “ese sector de vendedores volva no Porriño”. Sergio Casal declarou que “lles pido que reflexionen e que comproben que a nova organización de espazos é do gusta da xente e que nos gustarían que todos estean no novo mercado ambulante dos martes”.

Sergio Casal, concelleiro de Mercados e representantes do sector de vendedores acordaron hoxe que o mercado ambulante do Porriño volverá o vindeiro martes 23 de xuño. O mercado ambulante non se celebra dende a declaración do estado de alarma.

Haberá unha nova distribución de espazos. Concelleiro e ambulantes acordaron que os postos de venta só sexan montados nun lateral da rúa. Cada posto ocupará un máximo de 6 metros lineais e haberá unha distancia de 2 metros co seguinte. O primeiro posto será montado á altura do establecemento “Cólleo con pinzas” e seguirán por orde colocándose cara ao Concello.
Os postos de venda de produtos alimentarios e plantas instalaranse na rotonda de San Sebastián.
Para garantir que o mercado ambulante funcione con normalidade, a rúa Pío XII estará cortada ao tráfico rodado.

No que atinxe á limpeza, cada ambulante comprometese a recoller en sacos e bolsas o lixo que se produza no seu posto. E, ademais, en todos os postos de venda haberá xel para hixiene de mans e será obrigatorio o emprego de máscaras de protección.
Non obstante, concelleiros e representantes dos ambulantes volverán reunirse o vindeiro mércores para rematar detalles.

Esta semana comezaron as obras de pavimentación do camiño da Vacaría, en Budiño, acometidas polo Concello do Porriño, por iniciativa da Concellería de Urbanismo que dirixe Pedro Pereira.
As obras consisten no acondicionamento, limpeza, mellora da drenaxe e pavimentación con aglomerado quente, e posterior sinalización do camiño veciñal. Teñen un prazo de execución de 3 meses e un orzamento de 36.000 €. Execútanse con cargo ao Plan Concellos 2020, da Deputación Provincial.
Previamente a comunidade de augas, coa autorización da Concellería de Urbanismo e Infraestruturas, renovou a traída de augas veciñal.