Tráfico

A Policía Local, seguindo co seu programa de Eduación Vial, impartiu unha clase aos pais, técnicos e deportistas do clube cilista Avanza

A Policía Local do Porriño segue co seu programa de ‘Educación Vial’ que imparten os seus integrantes a alumnas e alumnos de colexios e institutos e tamén de asociacións, clubs deportivos e colectivos de fora do eido lectivo.

O xefe da Policía Local, Daniel Rodriguez, e o axente  Francisco Javier Rodríguez Fernández – medalla de ouro nas olimpiadas de Policías e Bombeiros nas categorías de crono escalada, velocidade e critérium- falaron a país, técnicos e deportistas, de entre 5 e 17 anos, do Club Ciclista Avanza, sobre a circulación en vías urbanas,  interurbanas e pistas forestais.

Na charla debatéronse temas como normativa vixente en materia de tráfico, que afecta á circulación dos ciclistas, a importancia de que sexan o máis visíbeis posible cando saen á rúa ou a estrada, a importancia del casco e, especialmente, a necesidade do cumprimento das  normas de tráfico.

Os axentes tamén explicaron cómo actuar no caso dun accidente, o funcionamento do Servizo de Emerxencias 112, cómo  como rodar en grupo ou a circulación por pistas forestais.

06/03/2018 in Alcaldía, Tráfico

Cortes de tráfico e prohibicións de estacionamento polo Entroido

A Policía Local informa de que co gallo da celebración do Entroido, non se poderá estacionar na rúa Donantes de Sangue, a partir das 3 da tarde do sábado 10, dende a entrada á piscina ata Antonio Palacios. Esta rúa estará cortada ao tráfico dende as 5 ás 6 da tarde, coincidindo co desfile das comparsas.

Tamén se suspenderá a circulación en Antonio Palacios dende o cruzamento con Donantes de Sangue –pavillón- ata a rotonda de Aloques- rúa Domingo Bueno- dende as 6 da tarde.

Así mesmo, estará cortada a rúa Domingo Bueno, dende o número 1 ata o cruzamento da Pontenova, dende as 6 e cuarto da tarde; o mesmo pasará nos dous carrís da Avenida de Galicia– aínda que se permitirá o acceso a residentes-; tamén Pío XII e Ramón González, Manuel Rodríguez, dende o cruzamento de Xogo da Ola ata a Panadería Chinchina-nestas rúas tamén estará prohibido aparcar.

08/02/2018 in Alcaldía, Cultura e festas, Tráfico

Este  xoves, día 21, entra en funcionamento no Porriño o novo sistema de transporte público baixo demanda

Este  xoves, día 21, entra en funcionamento no Porriño o novo sistema de transporte público baixo demanda, posto en marcha pola Xunta, logo da esixencia da maioría da Corporación, para que resolvese as graves dificultades de mobilidade xeradas ás veciñas e  veciños  coa implantación do novo Plan de Transportes de Galicia.

As persoas que precisen desprazarse poderán pedir o servizo chamando ao teléfono 988 68 78 00, que estará operativo de 8 da mañá a 8 da tarde todos os días laboráis.  Nunha única chamada poderá reservar varias prazas no autobús ou, mesmo, reservar varias viaxes para os seguintes 15 días.

A reserva debe facerse antes das 8 da tarde do día laborable anterior a aquel no que se vaia viaxar. Así, se o vindeiro mércores 27 de decembro quere coller o autobús para ir ao centro de saúde, deberá chamar antes das 8 da tarde do martes 26 de decembro. En cambio, se o martes 26 de decembro quere coller o autobús para ir facer compras, como o luns é festivo deberá chamar antes das 8 da tarde do venres 22 de decembro.

Para solicitar o servizo, cando chame, so deberá ter a man o número do seu DNI e saber cando quere viaxar e entre que paradas– poderá solicitar información da oferta dos servizos de transporte á empresa que o presta ou consultala na web www.bus.gal, na que tamén se publican os teléfonos e páxinas web das empresas-.

Ao final da chamada indicaráselle o número de confirmación da súa reserva, que deberá ter onde anotar.  Se ao chamar indica un correo electrónico, enviaráselle ao mesmo a confirmación da reserva co seu número e os seus datos, o que tamén lle facilitará a súa anulación, se fose o caso.

Si finalmente non vai viaxar deberá anular a reserva. Se non o fixese, outras persoas poderán quedar sen praza.

Só terá que chamar para reservar praza para autobuses que se presten baixo demanda. Tamén pode obter información dirixíndose á empresa de transporte que preste o servizo.

Ao subir ao autobús na súa parada deberá poder indicar ao condutor o nome da persoa que fixo a reserva e o código da reserva que se lle indicou.

Se ninguén fixo unha reserva para a súa parada o autobús non pasará por ela, polo que non poderá subir. Ademais, outras persoas poderán ter reservado noutras paradas as prazas das que dispoña o autobús, polo que aínda que non estean ocupadas pode que non queden prazas libres para a súa viaxe.

A partir da posta en funcionamento do novo sistema as reservas deberán facerse a través do teléfono 988 68 78 00, e xa non será posible facelas nos teléfonos das empresas.

20/12/2017 in Alcaldía, Tráfico

A Policía Local do Porriño imparte educación vial a 215 alumnas e alumnos de centros de infantil e primaria

A Policía Local do Porriño está a desenrolar  os colexios de ensino infantil e de primaria Xosé Fernández López, Atios, Cruz-Budiño, Antonio Palacios, Da Ribeira, Santo Tomás e Hermanos Quiroga, unha campaña de educación vial que chegará a un total de 215 rapazas e rapaces.

Nunha primeira parte teórica, os axentes ensinarán aos estudantes cal é a función da Policía Local, a súa mobilidade coma peóns, o uso da bicicleta, monopatín e patíns, o transporte de mascotas, o comportamento que deben de gardar coma viaxeiros, o uso do cinto de seguridade, o casco e os sistemas de retención nos vehículos, os sinais de circulación e o 112, o teléfono de Emerxencias.

Nunha segunda parte, que será práctica, as rapazas e rapaces deberán conducir e camiñar por un circuíto aplicando o  que aprenderon nas clases teóricas. Mesmo haberá un ‘carné por puntos’ para impoñer sancións no caso de que non respecten os sinais, non sigan as normas de tráfico ou non fagan caso das indicacións dos axentes.

14/11/2017 in Alcaldía, Benestar, Educación e tecnoloxía, Tráfico

O Concello e os veciños do Porriño renden homenaxe aos 32 voluntarios de Protección Civil e Policía Local pos súa “excepcional entrega” durante os lumes do pasado día 15

A alcaldesa do Porriño, Eva García de la Torre xunto coa concelleira de Seguirdade, Lourdes Moure, a de Igualdade e Benestar, Soledad Girón, e o concelleiro de Limpeza, Orlando Mázquez, rendeu homenaxe, “no nome da Corporación e de todas veciñas e veciños”, aos 23 voluntarios de Protección Civil e 9 axentes da Policía Local do Porriño-co seu xefe, Daniel Rodríguez, a fronte- pola súa “excepcional actuación” durante a vaga de incendios dos pasado días 14 e 15 deste mes.

García de la Torre subliñou a “entrega, máis aló do seu deber” de cada un dos voluntarios e voluntarias de Protección Civil e integrantes da Policía Local que acudiron eses días a axudar e auxiliar a veciños de Gondomar, Salceda, Nigrán, Vigo e, por suposto O Porriño, que estaban nunha situación moi comprometida por mor das chamas.

13 dos integrantes dos dous corpos correron perigo físico, mesmo dous deles foron trasladados ao hospital-un axente da Policía Local por queimaduras e un voluntario de Protección Civil por  inhalación de fume– cando socorrían a varias persoas en lugares tan castigados polo lume coma Chandebrito-en Nigrán- ou Fragoselo- en Vigo-.

Todos eles acudiron ás chamadas de apoio do alcalde de Gondomar, Francisco Ferreira, para que que se achegasen a Vincios, onde finalmente salvaron varias casas do lume; outra chamada de auxilio da Policía Nacional, para que se unisen ás dotacións que actuaban en Chandebrito e Porto do Molle, en Nigrán; a Fragoselo, en Vigo, lugar no que había varias dotacións do Corpo Nacional de Policía e veciños cercados polas lapas, ademais de á parroquia de Chenlo, no límete entre O Porriño e Gondomar, e a zona de Mosteiro, en Budiño.

Eva García de la Torre fixo entrega aos 32 voluntarios e axentes dun galano como mostra do recoñecemento do Concello e comprometeuse a destinar unha partida orzamentaria para dotar a Protección Civil, “aínda que sexa competencia da Xunta de Galicia”, do material axeitado para a realización do seu labor que, subliñou “facedes de xeito totalmente altruísta”.

A alcaldesa agradeceu tamén o traballo de prevención, coa realización de rozado en incontábeis lugares do territorio municipal, acometido pola Concellería de Limpeza que, indicou, “fixo posible que no Porriño os danos causados polo lume fosen moito menores”.

Neste senso, o concelleiro Orlando Márquez reiterou que o Concello multará aos propietarios de montes e de fincas que non manteñan rozadas e limpas a súas propiedades, sancións que, advertiu, superan os 1.000€ e que, insistiu, son necesarias posto que o non retirar a maleza, tendo en conta as altas temperaturas e a falla de choiva, fai que aumenten os perigos en caso de incendio e pon en risco ao resto dos veciños.

29/10/2017 in Alcaldía, Benestar, Educación e tecnoloxía, Emprego e formación, Igualdade, Limpeza, Parques e xardíns, Tráfico

A alcaldesa entrega á Xunta todas as reclamacións dos veciños e pide que haxa “axiña” unha solución para o transporte

A alcaldesa do Porriño, Eva García de la Torre, e o concelleiro de Tráfico, Orlando Márquez, mantiveron este martes, en Vigo, unha xuntanza, solicitada polo Goberno local, co xefe territorial da Consellería de Infraestruturas en Pontevedra, José Luis Díaz Yañez, na que expuxeron os problemas causados na vila tras a posta en marcha do novo Plan de Transportes.

Eva García de la Torre entregou ao xefe territorial todas e cada unha das reclamacións presentadas por veciñas e veciños do Porriño que “víronse afectados por esta desorganización”, logo de que unha das empresas adxudicatarias do servizo de transporte interurbano renunciase a seguir prestando o mesmo,”e de que a Xunta non  preveraa, con suficiente adianto, os graves contratempos que isto causaría aos usuarios”.

A alcaldesa sinalou que estes problemas afectan, especialmente, ás veciñas e veciños de Budiño, “porque elimináronse liñas e frecuencias de Salceda”, e ás veciñas e veciños de Mosende, de Chenlo e de Torneiros, e subliñou que os datos difundidos publicamente pola Xunta e os que se manexaban dentro da propia administración autonómica “non cadraban”.

García de la Torre sinalou coma exemplo que, en teoría, O Porriño tería servizo, dende a Avenida de Galicia ata Vigo cada media hora, algo que na xuntanza púxose de manifesto que non está a ocorrer, e tamén, indica a alcaldesa, o feito de que se suprimiron autocares e horarios, entre eles un dos que tiña máis viaxeiros: o autobús de Vigo a O Porriño das 10 e media da noite.

A rexedora, que cualificou a reunión como moi cordial, afirma que o responsábel de Infraestruturas tomou nota de todo elo, salientou que “deixamos moi craro que unha cousa é o que se di nos papeis e outra o que ocorre na realidade no Porriño co transporte de viaxeiros” e reiterou que a Xunta ten reclamacións “no so do noso Concello, senón de Salvaterra, Salceda, Tui, Ponteareas e Mos” para saber que agora estamos nun problema de falla de planificación no transporte, aínda que constatou que viu o interese do xefe territorial por solucionar axiña esta situación, “e de o servizo se preste con regularidade e con previsibilidade, de xeito que os veciños saiban que cada 20 minutos ou cada media hora hai un autobús e que pasa a unha hora determinada e establecida”.

Neste senso, Eva García de la Torre adiantou que xa hai unha empresa disposta a facerse cargo do servizo de transporte que deixara de prestar a anterior e que agrada que isto faga que “este problema vaia solucionándose”.

10/10/2017 in Alcaldía, Benestar, Tráfico, Turismo

Avanzan as obras na senda peonil e ciclista na PO-331 ata o CEIP de Atín, nos concellos do Porriño e Mos

O concelleiro de Vías e Obras, Manuel Carrera, xunto coa alcaldesa de Mos, Nidia Arévalo, e o delegado da Xunta en Vigo, Ignacio López-Chaves, desprazouse hoxe ata a PO-331, no lugar de Atín, para supervisar o avance das obras da senda peonil e ciclista que a Administración galega executa nesta estrada, concretamente entre os puntos quilométricos 1+890 e 2+810, ao seu paso polos concellos de Mos e O Porriño.

Durante a visita constataron que os traballos avanzan a bo ritmo e que as obras iniciadas o pasado 2 de setembro poderían estar finalizadas no vindeiro mes de novembro. Esta actuación conta  cun orzamento de máis de 378.000 euros, e enmárcase no Plan de sendas de Galicia que na comarca de Vigo proxecta 11 treitos, que foron definidos en 9 proxectos de construción. A Axencia Galega de Infraestruturas executará 12,5 quilómetros de novas sendas nesta bisbarra, cun orzamento que se achega aos 5 millóns de euros, para o que conta co financiamento asegurado ao terse incluído no programa operativo de Galicia dos fondos europeos FEDER para o período 2014 -2020.

A senda na estrada PO-331 dará continuidade ao itinerario peonil existente no núcleo do Porriño ata o paso superior existente sobre a AP-9 nas proximidades de Atín.

A intervención iníciase na marxe esquerda da estrada, na que se construirá unha senda da 933 metros de lonxitude, desde as proximidades do Colexio Santo Tomás no que finalizan as actuais beirarrúas, ata a ponte sobre a AP-9, pasando pola intersección existente coa estrada a Pereiras–Tameiga.

Pola marxe dereita da PO-331, a obra terá unha lonxitude de 200 metros e comezará na intersección coa estrada municipal Pereiras- Tameiga, dado que ata este punto xa existe beirarrúa. A senda nesta marxe desviarase da estrada nos últimos 80 metros ata o acceso ao centro escolar de Atín. Neste último tramo terá un ancho de tres metros. Coa execución desta senda existirá un itinerario peonil continuo polas dúas marxes da vía que comunicará os dous centros de ensinanza co Porriño.

Tamén se proxecta a mellora da intersección entre a PO-331 e a estrada Pereira-Tameiga, na que se construirá unha semiglorieta para facilitar os xiros á esquerda neste punto.

02/10/2017 in Alcaldía, Benestar, Educación e tecnoloxía, Emprego e formación, Igualdade, Limpeza, Parques e xardíns, Tráfico, Turismo, Vías e obras

A Corporación esixe, maioritariamente, á Xunta que resolva urxentemente as dificultades de mobilidade xeradas aos veciños do Porriño co novo Plan de Transportes de Galicia

A Xunta de Portavoces da corporación municipal do Porriño, co apoio dos representantes do PSOE, UDDL, EUSON, BNG,  e NON ADSCRITOS,  decidiu esixir á Xunta de Galicia, en concreto á conselleira de Infraestruturas e Vivenda, Ethel Vázquez, que resolva  urxentemente as dificultades de mobilidade xeradas aos veciños  coa implantación do novo Plan de Transportes de Galicia.

A Xunta de Portavoces analizou na súa última reunión a eliminación de liñas, de frecuencias e os continuos atrasos na prestación do servizo de transporte público por parte da Xunta, que están a provocar numerosas queixas dos veciños.

Os representantes do PSOE, UDDL, EUSON, BNG,  e NON ADSCRITOS  esixen  en tanto non se estableza un sistema alternativo eficiente de transporte público  a  recuperación das liñas e frecuencias de autobús eliminadas pola aplicación do novo Plan de Transporte da Xunta. Solicitan ademáis que a consellería de Infraestructuras e Vivenda cumpra o seu compromiso de diálogo cos concellos, para a elaboración dun novo Plan que ruralice o transporte público e fixe poboación con servizos.

30/09/2017 in Alcaldía, Benestar, Igualdade, Tráfico

A Deputación atende a petición do Goberno local e aproba un orzamento de 220.000€ para a mellora do cruce de A Costeira

A Deputación de Pontevedra vén de anunciar oficialmente no Boletín Oficial da Provincia (BOPPO) a contratación dos traballos de mellora da intersección da EP-2405 con dúas vías municipais no lugar de A Costeira, en O Porriño. O prazo de presentación das ofertas finaliza o vindeiro 24 de outubro, e a adxudicación realizarase mediante procedemento aberto.

O orzamento global da actuación é de 220.336,36€ dos que 198.801,60 euros están previstos para a realización da obra e a cifra restante para as expropiacións necesarias. Nos criterios de adxudicación do contrato avaliaranse o programa e equipa de traballo, o plan de control de calidade, a memoria e o plan de actuacións ambientais, se ben o prezo ofertado suporá para as empresas unha puntuación máxima do 55% do total.

O deputado de Mobilidade Uxío Benítez, afirma que a renovación deste cruce en O Porriño para mellorar a visibilidade dos vehículos e garantir o tránsito peonil aos veciños e veciñas foi unha petición do goberno que encabeza Eva García de la Torre que encaixa “nas  prioridades e eixos estratéxicos da Deputación de mellora da seguranza viaria nas estradas provinciais”.

De feito, indicou que a institución provincial ten en marcha un plan xeral de mellora de interseccións para eliminar puntos de sinistralidade na rede viaria propia e que esta en concreto é unha das máis problemáticas da provincia pola afluencia de vehículos pesados que se dirixen ao parque empresarial das Gándaras e ao Centro Tecnolóxico do Automóbil.

Benitez explica que a actuación consistirá na instalación dunha nova glorieta de reordenación do tráfico para mellorar a seguranza viaria, suavizar o trazado e mellorar as condicións de visibilidade e manobra. Para resolver a intersección ocuparanse dúas parcelas privadas e unha municipal e veranse afectadas dúas construcións, un alpendre-almacén e unha marquesiña de bus na parcela municipal, cuxa demolición e nova instalación se inclúe no orzamento do proxecto.

Ademais, urbanizarase a zona con beirarrúas para prestar continuidade ao tránsito peonil, habilitaranse pasos de peóns e a limitación específica de velocidade baixará de 50 a 30 quilómetros hora. Tamén se instalarán oito luminarias tipo led.

29/09/2017 in Alcaldía, Tráfico

Primeiro servizo conxunto da Policía Local e a Garda Civil do Porriño logo da Xunta local de Seguridade

Logo da celebración os pasados días da Xunta Local de Seguridade do Porriño, na que, entre outros temas, abordárase a coordinación de servizos conxuntos entre a Policía Local do Porriño e a Garda Civil, este martes realizouse o primeiros destes servizos conxuntos co arresto de Y.C.G, de 30 anos de idade, que tiña unha orde de detención e ingreso na cadea dende hai máis de dous anos.

Os feitos sucederon sobre as 9 da maña: a Policía Local de Vigo alertou á do Porriño que logo de comprobar a documentación dun vehículo verificouse que o condutor do mesmo posuía unha orde ditada polo Xulgado do Penal de Vigo para a súa detención e ingreso no cárcere.

Axentes da Policía Local e da Garda Civil do Porriño procederon ao seu arresto pouco antes da 1 da tarde e trasladaron ao detido ao Centro Penitenciario de A Lama.

Segundo subliña o xefe da Policía Local do Porriño, Daniel Rodríguez, “o obxectivo e sumar esforzos entre distintos corpos policiais e que ese feito contribúa no servizo aos veciños e a lograr un estado de seguridade óptimo”.

27/09/2017 in Alcaldía, Tráfico, Turismo