Servizos sociais

Cesión temporal da aula restaurante-bar do Multiusos para unha formación de “Aceesca”


O Concello de Porriño e “Aceesca” asinaron hoxe a cesión de uso temporal da aula de restauración existente no Multiusos Municipal de Torneiros para unha formación práctica de alumnos do centro de educación especial.

A cesión realizarase do 23 de febreiro ao 14 de maio, en horario de mañá (de 10:00 a 14:00). A formación será para un curso de “auxiliar de operacións básicas de restaurante-bar” para persoas con discapacidade intelectual. O documento establece que se deben respectar os protocolos de seguridade sanitarios necesarios na prevención do Covid.

David Alonso, concelleiro de Servizos Sociais asinou esta mañá con Esteban Bacelo, presidente da Asociación para o Apoio ás Persoas con Diversidade Intelectual, a cesión de uso en presenza de Angeles Leirós, xerente de “Aceesca”.

16/02/2021 in Emprego e formación, Servizos sociais

Rematou o reparto de alimentos e xoguetes ás familias máis desfavorecidas

 

Este mes de decembro a distribución de alimentos levouse a cabo entre o 17 e o 22 con entrega a domicilio, realizada por voluntarios que colaboran co Banco de Alimentos SOS Porriño e por voluntarios da Asociación de Protección Civil.

 

Na actualidade, a proporción de destinatarios dos lotes de comida diminuíu algo.  Agora están atendidas 350 familias do Porriño, polo que se estima que 1.000 persoas recibiron eses lotes.

 

A entrega realízase en casa desde novembro como consecuencia das restricións anticovidas e, sobre todo, “para evitar a vergoñenta imaxe das colas de fame” segundo declarou David Alonso, concelleiro de Servizos Sociais.

Ao lote habitual de comida que recibe cada familia, neste mes de decembro engadíronse algúns extras grazas ás doazóns de empresas como “Coren” que regalaron 200 capóns conxelados e “Ceamsa” que regalaron caixas con produtos de Nadal. Os capóns entregáronse a familias con máis de 3 membros.

Por outra banda, hoxe mércores no Multiusos de Torneiros entregaronse xoguetes educativos e de mesa para 70 nenos e nenas porriñeses de 48 familias máis desfavorecidas que foron seleccionados polos Servizos Sociais.  A entrega fíxose aos seus pais que foron convocados para este fin.

23/12/2020 in Servizos sociais

Servizos Sociais repartirá xoguetes educativos para nenos e nenas das familias máis desfavorecidas

 

 

 

Este mércores, nas instalacións de “Porremprego”, entre as 9 e as 12 do mediodía, terá lugar o reparto de regalos para nenos e nenas de ata 12 anos das familias máis desfavorecidas do concello.

Serán 70 regalos de xoguetes educativos e de mesa a outros tantos nenos e nenas pertencentes a 48 familias seleccionadas por Servizos Sociais.

Os xoguetes adquiríronse nas dúas xogueterías do casco urbano para axudar ao comercio local 

A entrega dos xoguetes realizarase exclusivamente aos pais, segundo avisou David Alonso, concelleiro titular de Servizos Sociais.

 

22/12/2020 in Servizos sociais

O Concello rematou hoxe o pagamento das axudas pola Covid aos autónomos e micro empresas do Porriño

O Concello rematou hoxe o pagamento mediante transferencia bancaria da segunda e última quenda de axudas económicas directas concedidas pola administración municipal pola Covid. Abonáronse en total 84.589 € entre autónomos e micro empresas do Porriño que se acolleron á convocatoria municipal.

Concedéronse 72 axudas entre o total de 78 solicitudes que se presentaron no prazo correspondente. Denegouse unha por incumprir as bases e 5 por non completar a documentación requirida.

As solicitudes procederon de bares, cafeterías, restaurantes, perruquerías e comercio téxtil, entre outros. A maioría recibiron o máximo estipulado nas bases da convocatoria, é dicir 1.200 € por peticionario, segundo resolveu a comisión técnica municipal de avaliación formada por funcionarios do Concello e presidida por David Alonso, concelleiro de Emprego e Servizos Sociais.

A meirande parte deses cartos solicitáronse para gastos xerais sobre todo alugueres e amortización de préstamos bancarios. Os demais repártense entre costear gastos de mellora tecnolóxica e medidas anti-covid.
O Concello do Porriño por acordo plenario da corporación habilitou esta liña de axudas cunha partida de 100.000 euros.

A alcaldesa Eva García sinalou que “aínda que non esgotamos a partida, iso non significa que non vaiamos a habilitar unha nova liña de axudas en 2021 enfocada aos sectores máis necesitados, especialmente comercio e sobre todo a hostalaría que é a gran damnificada polas medidas de restrición. Quero que saiban que este goberno municipal e esta alcaldesa está preocupada e empatiza cos problemas que teñen e estou a súa enteira disposición para seguir artellando as medidas de apoio que necesiten”, engadiu García de la Torre.

17/12/2020 in Alcaldía, Servizos sociais, Urbanismo, comercio e industria

Excepcional resultado da recollida solidaria polo #GivingTuesday entre os centros de primaria do Porriño

Esta mañá operarios do Concello e o concelleiro delegado de Servizos Sociais recolleron nos colexios do Porriño os donativos de alimentos e produtos de hixiene infantil que centos de nenos e nenas entregaron nos seus respectivos centros docentes coa ocasión do “#GivingTuesday” (“Martes de dar”).

Na recollida solidaria que se efectuou ao longo desta semana, os centros educativos de Primaria do Porriño centralizaron a recollida. Este ano 2020, por iniciativa dos nenos e nenas do Porriño e segundo acordouse no último pleno infantil celebrado o pasado 20 de novembro, realizouse unha recollida específica de alimentos, leite e produtos de hixiene para bebés.

Os quilos de comida e produtos de hixiene recadados trasladáronse ao almacén de “SOS PORRIÑO” que canalizará a entrega e a súa posterior distribución entre as familias do concello con menores recursos.

04/12/2020 in Alcaldía, Educación e tecnoloxía, Servizos sociais

O Porriño conmemorou o Día das Persoas con Discapacidade

 
A casa consistorial do Concello do Porriño luce esta noite en verde coa iluminación artística realizada coa ocasión de conmemorarse o 3 de decembro o Día das Persoas con Discapacidade. Con este motivo, a consistorio tamén lucía desde onte, no balcón principal unha lona realizada polas persoas usuarias de ACEESCA
 
Neste ano, 2020, o lema do Día das Persoas con Discapacidade, é “Un día para todos” porque, segundo preconiza unha declaración institucional do Concello, “a discapacidade forma parte da condición humana, xa que todas as persoas, nalgún momento da nosa vida, podemos experimentar unha discapacidade temporal ou permanente; e a sociedade ten que estar preparada para iso”.
 
 
 
 
 
 
03/12/2020 in Alcaldía, Cultura e festas, Servizos sociais

O Porriño conmemora o 3 de decembro, Día das Persoas con Discapacidade

A casa consistorial do Concello do Porriño, luce desde hoxe  unha lona realizada polas persoas usuarias de ACEESCA coa ocasión de conmemorarse o 3 de decembro o Día das Persoas con Discapacidade. Con este motivo, mañá iluminaremos a fachada do concello en verde.

Neste ano, 2020, o lema do Día das Persoas con Discapacidade, é “Un día para todos” porque, segundo preconiza unha declaración institucional do Concello, “a discapacidade forma parte da condición humana, xa que todas as persoas, nalgún momento da nosa vida, podemos experimentar unha discapacidade temporal ou permanente;  e a sociedade ten que estar preparada para iso”.

“As persoas con discapacidade son a minoría máis grande do mundo e adoitan ter máis dificultades que outros grupos a todos os niveis, especialmente no acceso á educación, ao mercado laboral e ás dificultades económicas”, engade a declaración municipal.

“E isto débese á falta de recursos que lles faciliten a vida, como o acceso ao transporte ou o acceso á información, en caso de discapacidade sensorial. Todo isto, xunto coa discriminación social que ás veces existe na súa contorna e a falta dunha lexislación adecuada, dificultan a vida das persoas con discapacidade. Amais, as persoas con discapacidade son máis vulnerables á violencia.  As nenas e os nenos, con discapacidade son 4 veces máis propensas a ser vítimas de violencia, do mesmo xeito que as persoas adultas con problemas mentais”, conclúe a declaración institucional.

02/12/2020 in Alcaldía, Benestar, Cultura e festas, Igualdade, Servizos sociais

Doazón do “Grupo Coren” ao Banco de Alimentos “SOS Porriño”

 

O “Grupo Coren” vai realizar unha doazón ao Banco de Alimentos “SOS Porriño” para este Nadal con varios lotes de produtos, despois das xestións realizadas polo concelleiro de Servizos Sociais, David Alonso. De entrada recibíronse onte un cargamento de 200 capóns conxelados, cun peso medio de 5 quilos cada un, que se distribuirán co reparto de lotes de alimentos que se fará en decembro.
Agárdanse, ademais, que en vindeiras datas cheguen outros lotes de produtos da empresa cárnica.

27/11/2020 in Servizos sociais

Doazón de “Fundación La Caixa” ao Banco de Alimentos do Porriño


O almacén do Banco de Alimentos “SOS Porriño” recibirá esta tarde unha achega de 4.500 quilos de produtos non perecedoiros, grazas á doazón de 5.000 euros realizada pola “Fundación La Caixa”.
Esta achega constitúe unha axuda moi importante para o Banco de Alimentos de cara ao reparto de decembro. Actualmente “SOS Porriño” está a distribuír lotes de alimentos entre 430 familias do municipio o que supón que unhas 1.300 persoas que son beneficiarias directas.


Este mediodía os representantes da entidade financeira, Gonzalo Dopazo, director, e María Eugenia Rial, subdirectora da oficina “store” de “La Caixa” no Porriño fixeron a entrega simbólica ao Concello, representado pola alcaldesa Eva García e o concelleiro de Servizos Sociais, David Alonso, nas instalacións do “EKO-MAX” da cadea de distribución “Froiz” no polígono industrial de A Granxa.
A alcaldesa manifestou o agradecemento do Concello á “Fundación La Caixa” por que “sempre está a amosar unha disposición permanente a colaborar en este tipo de accións sociais”. Gonzalo Dopazo, no nome da Fundación, manifestou que “La Caixa neste intre tan difícil para todos, prioriza a colaboración en achegas para colectivos en risco de exclusión”.

26/11/2020 in Alcaldía, Servizos sociais

O Concello adxudicou o segundo lote de axudas pola Covid a autónomos e micro empresas do Porriño

 

Un segundo lote de axudas económicas directas por un importe de 24.990 euros adxudicáronse hoxe polo Concello a autónomos, pequenas e medianas empresas e micro empresas do Porriño que solicitaron acollerse á convocatoria realizada pola administración municipal.

Nesta segunda quenda de achegas destínanse a 21 solicitantes entre os que existen bares, cafeterías, restaurantes, perruquerías e comercio téxtil, entre outros.   A maioría recibirán recibirán o máximo estipulado nas bases da convocatoria, é dicir 1.200 € por peticionario, segundo resolveu esta mañá a comisión técnica municipal de avaliación formada por funcionarios do Concello e presidida por David Alonso, concelleiro de Emprego e Servizos Sociais. 

O concelleiro informou ao remate da reunión que “hoxe mesmo realizáronse as transferencias bancarias aos adxudicatarios da primeira quenda de axudas que cobrarán esta semana”. Alonso lembrou que foron 42 peticións atendidas por un importe aproximado de 50.000 €.

A meirande parte deses cartos solicítanse para gastos xerais sobre todo alugueres e amortización de préstamos bancarios. Os demais repártense entre costear gastos de mellora tecnolóxica e medidas anti-covid.

O Concello do Porriño por acordo plenario da corporación habilitou esta liña de axudas cunha partida de 100.000 euros.

 

25/11/2020 in Alcaldía, Emprego e formación, Servizos sociais, Urbanismo, comercio e industria