Sen categoría

• Cunha traxectoria de máis de 80 anos e unha facturación anual de 85 millóns de euros, os seus produtos chegan a máis de 50 países.
• A visita do alcalde Alejandro Lorenzo puxo en valor a aposta da compañía pola innovación sostible e o crecemento industrial.

O Porriño, 30 de abril de 2025.– O alcalde do Porriño, Alejandro Lorenzo, visitou esta mañá as instalacións de Zelnova Zeltia, compañía referente na fabricación de produtos para o fogar e líder no seu sector a nivel europeo. Acompañado polo tenente de alcalde, Carlos Martínez, e pola concelleira de Sanidade e Política Social, Teresa Veloso, o rexedor percorreu as instalacións e coñeceu de primeira man os novos proxectos e investimentos que a empresa está a desenvolver.

Durante a visita, Alejandro Lorenzo destacou a importancia estratéxica de Zelnova Zeltia para o tecido industrial do municipio: “Zelnova Zeltia é un orgullo para O Porriño e un exemplo de como se pode apostar pola innovación e a sustentabilidade sen renunciar ás raíces locais. Que empresas coma esta aposten por crecer dende aquí é unha garantía de futuro para o noso concello e para Galicia”, asegurou o alcalde.

O equipo directivo da compañía, encabezado polo seu presidente Pedro Fernández Puentes, explicou o proceso de expansión sostida que está a vivir Zelnova Zeltia, cun modelo baseado na innovación, o compromiso ambiental e a internacionalización. Fernández Puentes salientou: “Estamos nun momento clave para a compañía. Demostramos que é posible crecer de forma sostida apostando pola innovación, a sustentabilidade e o compromiso con Galicia”.
Ademais, destacou a importancia de manter as operacións no Porriño:
“Para nós é fundamental seguir desenvolvendo a nosa actividade desde O Porriño, xerando emprego e valor na contorna”.

A compañía, cunha traxectoria de máis de 80 anos, alcanzou unha facturación anual de 85 millóns de euros en 2023 e conta cunha presenza internacional que supera o 55 % das súas vendas fora de España. Con máis de 250 traballadores, Zelnova Zeltia mantén as súas fábricas e laboratorios en España, ademais de contar con oficinas comerciais en Italia.

Durante a visita, o alcalde tivo ocasión de coñecer algúns dos logros máis destacados da empresa no eido da innovación e a sustentabilidade. Zelnova Zeltia foi pioneira na fabricación do primeiro insecticida en aerosol en España e no lanzamento do primeiro ambientador eléctrico a nivel mundial. Ademais, leva décadas comprometida coa protección ambiental, sendo unha das primeiras compañías en empregar propelentes que non danan a capa de ozono.

Desde o Concello do Porriño reiteramos o noso compromiso co apoio ás empresas que apostan polo desenvolvemento sostible, pola xeración de emprego de calidade e pola proxección internacional dende a nosa terra. O éxito de Zelnova Zeltia é, sen dúbida, un reflexo do potencial industrial e humano do Porriño.

• Douscentos ciclistas das categorías máster e xuvenil participarán esta fin de semana nunha proba por etapas que percorrerá os concellos de Mos, Ponteareas e O Porriño, nun desafío que mestura esixencia física, organización exemplar e paixón polo ciclismo galego.

O Porriño, 30 de abril de 2025.– O Concello do Porriño foi escenario esta mañá da presentación oficial da IX Challenge As Rías Baixas, unha das citas máis importantes do ciclismo galego, que reunirá a douscentos corredores das categorías máster e xuvenil durante a fin de semana do 3 e 4 de maio. A proba, organizada polo club ciclista Master da Louriña, percorrerá os municipios de Mos, Ponteareas e O Porriño nun percorrido esixente que combina tramos en liña e contrarreloxo.

No acto participaron o alcalde do Porriño, Alejandro Lorenzo, o concelleiro de Deportes, Abel Estévez, así como os seus homólogos de Ponteareas e Mos, Nicolás Rodríguez e Camilo Grandal, respectivamente. Tamén asistiron o presidente do club organizador, Juan José Álvarez Cerdeira, por parte da Federación Galega de Ciclismo, Óscar Sánchez,  Rafael Pérez, representando a unha das empresas patrocinadoras do evento deportivo e Horacio Barros.

Alejandro Lorenzo salientou a importancia que ten para O Porriño ser sede dunha proba desta dimensión, afirmando que “a Challenge As Rías Baixas é moito máis ca unha competición deportiva; é unha oportunidade para mostrar o dinamismo e o compromiso dos nosos concellos coa promoción da actividade física e coa organización de eventos de primeiro nivel”. O rexedor destacou tamén o impacto positivo que terá na economía local e no tecido asociativo, animando a toda a cidadanía a vivir esta festa do ciclismo.

Pola súa parte, Abel Estévez destacou o traballo conxunto realizado entre administracións e entidades deportivas para facer realidade esta nova edición. “Estamos moi orgullosos de acoller unha cita que combina deporte de alto nivel e participación cidadá”, asegurou o concelleiro de Deportes, quen engadiu que “o ciclismo representa valores fundamentais como o esforzo, a solidariedade e a superación, principios que desde O Porriño queremos seguir impulsando entre os máis novos”.

A IX Challenge As Rías Baixas desenvolverase en tres etapas moi esixentes. O sábado 3 de maio disputarase o Gran Premio de Mos, cun percorrido en liña de 79 quilómetros e 800 metros de desnivel acumulado. Esa mesma tarde terá lugar a contrarreloxo individual de Ponteareas, sobre un trazado técnico de 11 quilómetros. O domingo 4, o Gran Premio do Porriño pechará a competición cun percorrido de 85 quilómetros e preto de 1.000 metros de desnivel, nunha etapa que decidirá os vencedores finais.

O evento premiará aos líderes das diferentes clasificacións xerais e de especialidades, co obxectivo de fomentar a competitividade e a emoción ata a última pedalada. Desde a organización e os concellos implicados convidan a todos os veciños e visitantes a apoiar aos corredores, convertendo esta IX Challenge As Rías Baixas nunha verdadeira festa do ciclismo galego.

• Un investimento de máis de 340.000 euros fará posible a reparación das infraestruturas afectadas en Gulpilleira.
• O Concello traballa para alcanzar un convenio co Ministerio de Fomento que permita cofinanciar a actuación.

O Porriño, 29 de abril de 2025.– O Pleno do Concello do Porriño aprobou a concesión dun crédito extraordinario, financiado con Remanente Líquido de Tesourería, para afrontar diversos investimentos urxentes, entre os que destaca a execución da obra de Renovación das redes de saneamento nos viais do lugar de Gulpilleira pola escorrentía de augas pluviais da A-52, cun importe de adxudicación de 327.943,81 euros, máis 16.846,81 euros destinados á dirección de obra e á coordinación de seguridade e saúde.

Esta actuación foi declarada de emerxencia mediante Decreto da Alcaldía, debido ao grave deterioro do firme viario e á inclinación dos peches das propiedades, poñendo en risco a seguridade de viandantes, peóns e condutores. A situación agravouse tras os últimos temporais, xerando un escenario de alto perigo, tal e como sinalaron os informes dos técnicos municipais.

O alcalde do Porriño, Alejandro Lorenzo, destacou que “a situación na Gulpilleira é insostible e non podemos seguir agardando polo Ministerio. A protección dos nosos veciños está por riba de calquera outra consideración. O Concello actúa con responsabilidade, e tanto os nosos técnicos como a Deputación de Pontevedra sinalan que a tubaxe existente resulta insuficiente para recoller e desaugar os caudais procedentes da drenaxe transversal da A-52, o que provoca problemas de acumulación e deterioro no lugar. Estamos en contacto co Ministerio para lograr un convenio que permita que Fomento asuma parte dos custes desta intervención tan necesaria”.

Pola súa parte, o concelleiro de Vías e Obras, Ramón Porto, subliñou que “esta escorrentía foi causada pola propia construción da A-52 sen prever un sistema de drenaxe adecuado. Agora, décadas despois, somos nós quen temos que poñer solución a un problema que, por xustiza, debería resolver o Ministerio. Iso si, ante o perigo actual, o Concello ten que actuar de forma inmediata para garantir a seguridade cidadá”.

O proxecto contempla ademais a renovación completa das redes de saneamento, abastecemento, pluviais, así como a reposición dos pavimentos e renovación da iluminación pública e canalizacións de telecomunicacións. As obras, que afectarán a viais de titularidade municipal como a rúa Gulpilleira, Antonio Palacios e Fernández Areal, terán un prazo estimado de execución de seis meses.

A día de hoxe, o Concello atópase á espera da emisión dos informes sectoriais correspondentes por parte do Ministerio de Fomento para poder iniciar as obras, comprometéndose a seguir traballando para que se concrete o convenio de colaboración.

Con esta actuación, o Concello do Porriño reafirma o seu compromiso coa seguridade cidadá e a mellora das infraestruturas municipais.

• Un total de 27comercios e 8 salóns de beleza do Porriño amosaron as súas propostas de moda, calzado, xoiería, complementos, maquillaxe e peiteado.

O Porriño, 26 de abril de 2025.– O Porriño viviu esta fin de semana unha nova edición da súa Fashion Weekend, un evento xa consolidado no calendario local que este ano celebrou a súa terceira edición cunha programación completa e unha participación moi positiva por parte da veciñanza e do comercio local.

A actividade comezou na tarde do venres coa celebración da Shopping Night, que mantivo os comercios abertos ata as doce da noite. Durante esas horas, os establecementos da vila ofreceron descontos, promocións e agasallos, nun ambiente marcado pola música dos seis DJs distribuídos por diferentes puntos do centro. Como novidade, tivo lugar unha festa infantil previa, entre as sete e as nove da tarde, que contou cunha importante presenza de familias e pequenos. A xornada desenvolveuse cun bo ritmo de afluencia e cunha resposta positiva tanto por parte dos comerciantes como dos clientes.

A programación continuou na mañá do sábado cunha sesión vermú musical na praza Antonio Palacios, a cargo do grupo Xinetes do Trópico, que reuniu numeroso público nun ambiente relaxado e festivo. Foi unha proposta pensada para ampliar o alcance do evento a diferentes públicos e momentos do día, reforzando a conexión entre cultura e comercio.

Xa pola tarde, a partir das seis, celebrouse o desfile central da Fashion Weekend. Un total de 28 comercios e 8 salóns de beleza do Porriño amosaron as súas propostas de moda, calzado, xoiería, complementos, maquillaxe e peiteado. A pasarela estivo conducida pola xornalista Lucía Rodríguez, e contou coa participación da escola Small Big Models, que colabora co evento por terceiro ano consecutivo de xeito altruísta. O público acompañou o desfile durante toda a tarde, nun espazo que se mantivo cheo ata o remate das actuacións, entre as que destacaron Erika Lewis, Lucía Samoelle, o saxofonista Diego Caride e Pablo Méndez.

Durante o evento distribuíronse papeletas numeradas entre a clientela dos comercios participantes, coas que se realizou un sorteo de cinco cestas de produtos gourmet. Os números premiados poden consultarse nas redes sociais do Concello ou na web oporrino.org. As persoas agraciadas poderán recoller os seus premios nas oficinas do Concello a partir do luns, presentando a papeleta correspondente.

O alcalde, Alejandro Lorenzo, sinalou ao rematar a xornada que “a Fashion Weekend é unha mostra de como O Porriño sabe reinventarse e poñer en valor o que é propio: o seu comercio, o seu talento e a súa capacidade de atraer e sorprender. Este tipo de eventos son unha ferramenta para construír vila, para fortalecer a identidade local e para seguir facendo do Porriño un lugar onde vivir e mercar con orgullo”.

Pola súa parte, a concelleira de Comercio, Rosa Isabel Alonso, agradeceu “o esforzo dos comerciantes e dos profesionais participantes, que fixeron posible que a moda e a creatividade local ocupasen o lugar que merecen na nosa vila”.

A III Fashion Weekend pecha así unha edición que medra en contido e organización, e que reafirma o papel do comercio local como motor de dinamización e cohesión social.

NÚMEROS PREMIADOS

465, 498,  631, 950, 1309

• Durante dous días a vila converterase nun espazo vivo, onde a moda, a música e a creatividade local serán protagonistas, facendo da rúa un lugar de encontro, inspiración e celebración.

O Porriño, 22 de abril de 2025.– A Casa Consistorial acolleu esta mañá a presentación da terceira edición da Fashion Weekend, un evento que se celebrará esta fin de semana e que promete converter a vila no epicentro da moda galega da man do seu comercio local. Organizado polo Concello do Porriño en colaboración co tecido comercial da vila, esta cita consolídase como unha das máis esperadas do ano.

O alcalde, Alejandro Lorenzo, destacou na súa intervención a importancia deste tipo de iniciativas para a dinamización do comercio e da economía local. “A Fashion Weekend é moito máis que moda: é unha demostración de forza e creatividade do noso tecido comercial. Dende o Concello seguiremos apostando por estas iniciativas que dinamizan a nosa vila, atraen visitantes e apoian aos nosos comerciantes e profesionais”, sinalou o rexedor.

Tamén participou na presentación a concelleira de Comercio, Rosa Isabel Alonso, quen puxo en valor a implicación e o traballo conxunto de todos os actores implicados. “É emocionante ver como, edición tras edición, esta cita medra. Grazas ao esforzo dos nosos comerciantes e salóns de beleza, conseguimos que O Porriño respire moda, ilusión e comunidade durante dous días cheos de actividade”, asegurou.

A fin de semana arrancará o venres 25 de abril coa celebración da Shopping Night, unha noite na que os establecementos comerciais da vila abrirán as súas portas en horario especial, de nove da noite a doce, ofrecendo propostas dinamizadoras, descontos, sorteos, agasallos e moitas sorpresas. Este ano, como novidade, celebrarase unha festa infantil entre as sete e as nove da noite, pensada para que as familias poidan gozar da xornada ao completo. A música será protagonista tamén durante a noite, coa presenza de seis DJ’s que amenizarán as principais rúas da vila e encherán O Porriño de ambiente festivo. Durante este evento repartirase material promocional do Concello, incluíndo bolsas en cada comercio e rifas para os sorteos que terán lugar o sábado.

O sábado 26 de abril será o momento da Fashion Night, onde a praza Antonio Palacios se converterá nunha gran pasarela ao aire libre. A partir das seis da tarde, desfilarán as propostas de vinte e oito tendas e oito salóns de beleza do Porriño, que amosarán as últimas tendencias en roupa, calzado, xoiería, complementos, maquillaxe e peiteados. O desfile estará dirixido pola xornalista Lucía Rodríguez e contará coa participación da escola de modelos Small Big Models, que colabora de maneira desinteresada por terceiro ano consecutivo, demostrando o seu compromiso coa moda local.

A velada estará tamén cargada de emocións, coa actuación musical de Erika Lewis, o saxofonista Diego Caride, Lucía Samoelle e outras propostas artísticas aínda por confirmar. Durante a noite sortearanse cinco cestas de produtos gourmet entre todas as persoas participantes.

Con esta proposta, O Porriño reivindícase como un referente na promoción do comercio local a través da moda, a creatividade e a unión veciñal.

• A actividade, de un día de duración, inclúe o desprazamento en autocar, seguro de viaxe, almorzo tipo pícnic, xantar, e visitas culturais de gran interese.
• O prazo para presentar solicitudes abrirá o mércores ás 9:00 horas, e cada persoa só poderá reservar unha única praza por formulario.

O Porriño, 21 de abril de 2025.– O Concello do Porriño organiza unha excursión gratuíta a Madrid o martes 6 de maio, cun atractivo programa cultural que permitirá á veciñanza descubrir a pegada do arquitecto porriñés Antonio Palacios na capital do Estado.

A actividade, de un día de duración, inclúe o desprazamento en autocar, seguro de viaxe, almorzo tipo pícnic, xantar, e visitas culturais de gran interese: o Museo do Metro de Madrid, situado na histórica Estación de Chamberí; unha visita panorámica polo Madrid de Antonio Palacios; e a exposición Madrid Metrópoli. A saída será desde o Pavillón Municipal de Deportes.

A excursión, dirixida exclusivamente a persoas empadroadas no Porriño, conta con 50 prazas que se asignarán por orde de inscrición no rexistro municipal. O prazo para presentar solicitudes abrirá o mércores 23 de abril, ás 9:00 horas, e cada persoa só poderá reservar unha única praza por formulario.

O alcalde, Alejandro Lorenzo, subliñou que “a excursión combina cultura, coñecemento e participación cidadá. Será unha experiencia enriquecedora que permitirá descubrir fóra da nosa vila o valor e a dimensión da figura de Antonio Palacios, dun xeito accesible e compartido”.

Con esta proposta, o Concello reafirma a súa aposta por difundir o patrimonio local, fomentar o interese pola arquitectura e promover a cultura a través da participación da veciñanza.

O vindeiro luns 14 de abril ás 8:30 horas dará comezo o Campamento de Semana Santa, organizado pola Concellería de Igualdade do Concello do Porriño.

O lugar de entrega e recollida dos nenos e nenas participantes será na porta principal do CEIP Plurilingüe Xosé Fernández López.

Os e as participantes deberán acudir con:

• Roupa e calzado cómodos.
• Unha mochila con calzado de reposto.
• Merenda e auga.

No caso de precisar algunha vestimenta específica para determinadas actividades, serán os monitores e monitoras quen o comuniquen con antelación.

Lembramos que só as persoas que presentaron a solicitude están autorizadas para entregar e recoller aos rapaces e rapazas. Se por algún motivo é outra persoa a encargada, deberá ser maior de idade e entregar aos monitores/as a autorización asinada correspondente, acompañada dos DNI da persoa autorizante e da autorizada.

O listado de admitidos/as está xa dispoñible para consulta.

Agradecemos a colaboración das familias para garantir o bo funcionamento do campamento e desexamos que sexa unha experiencia inesquecible para todos e todas! 

Continúa a conmemoración do 150 aniversario do nacemento de Antonio Palacios e desta vez faino na cidade de Madrid. O alcalde do Porriño, Alejandro Lorenzo, desprazouse esta mañá á capital do país para participar na inauguración da mostra “Madrid metrópoli. El sueño de Antonio Palacios” que poderá visitarse ata o 6 de xullo no primeiro andar de CentroCentro. A exposición homenaxea ao ilustre arquitecto porriñés así como ao Madrid que ideou e construíu, a través de máis de 150 pezas, entre planos, debuxos, acuarelas, libros e fotografías, que percorren o legado de Palacios e a súa influencia na paisaxe urbana de Madrid.

A de hoxe foi unha nova proba de reforzo de lazos que comezara a tecer o propio arquitecto hai máis dun século e que tivo a súa última representación no acto de irmandade entre Galicia e Madrid celebrado na capital da Louriña. Logo deste encontro, o pasado mes de outubro, Alejandro Lorenzo volve coincidir co seu homólogo, José Luis Martínez-Almeida, para exaltar a figura deste célebre porriñés que a través da súa obra foi quen de tender pontes entre as dúas localidades, sen esquecer nunca de onde viña.

“Palacios non foi só un arquitecto brillante, foi un home con raíces profundas, que levou a alma da nosa terra a cada recuncho desta cidade. Con granito do Porriño e talento galego, axudou a construír o Madrid que hoxe admiramos. E nese granito está impreso o carácter da nosa xente: firme, humilde e loitadora”, remarcou durante a súa intervención no acto Alejandro Lorenzo, asegurando que, “O soño de Antonio Palacios é tamén o meu soño: o de ver como un porriñés universal sigue unindo a Porriño e Madrid a través do tempo”. E neste senso lembrou, de xeito anecdótico e dirixíndose a Martínez-Almeida, que “como sempre di vostede, alcalde, compartimos caseiro; pois os dous concellos, o de Madrid e o do Porriño, son obras do mesmo ilustre arquitecto e quizais por iso nos entendemos tan ben, porque ata as nosas casas consistoriais falan o mesmo idioma”. Lorenzo rematou a súa intervención animando a seguir o exemplo de Palacios “soñando ao grande, construíndo xuntos e honrando ao mellor das nosas terras”.

Os eixes arquitectónicos de Palacios en Madrid

Comisariada por Javier García-Gutiérrez Mosteiro e Julián García Muñoz, a exposición ofrece un percorrido exhaustivo polos proxectos de Antonio Palacios, quen soubo dotar a Madrid dunha monumentalidade que transcendeu o seu tempo e cuxa influencia marcou de maneira indeleble a paisaxe urbana da capital.

Despois dun espazo introdutorio no que se aborda a súa formación como arquitecto e os seus primeiros proxectos, se desprega o primeiro itinerario pola cidade: o eixe articulado polas rúas Maior-Sol-Alcalá, que Palacios monumentalizou con moitas das súas máis recoñecibles escenografías, como son o Círculo de Belas Artes, o Banco Español do Río da Prata (actual sede do Instituto Cervantes) ou o Palacio de Comunicacións, hoxe Palacio de Cibeles.

A continuación, exponse a intervención de Palacios no eixe de Gran Vía, a cuxa transformación contribuíu con obras emblemáticas como o Edificio Matesanz ou os hoteis Alfonso XIII e Florida. Acto seguido, os visitantes poderán coñecer o desenvolvemento urbano que se estendeu cara o eixe Prado-Castellana, onde Palacios deixou a súa pegada con intervencións como o Hospital de Jornaleros de San Francisco de Paula (coñecido como Hospital de Maudes).

O seguinte espazo expositivo amosa outro elemento fundamental da cidade contemporánea, o Metro. Palacios xogou un papel clave na súa imaxe, deseñando estacións, bocas de acceso e ata o icónico logotipo do suburbano.

A última unidade museográfica, definida como o eixe dos soños, ofrece un itinerario por algúns dos proxectos de Antonio Palacios que non chegaron a executarse, como a reforma da Porta do Sol, o Palacio das Artes ou a Gran Vía Aérea.

Visitas guiadas gratuítas para tódolos públicos

Para achegar a exposición ao público organízanse diferentes tipos de visitas guiadas gratuítas, individuais, en grupos, para familias e tamén adaptadas con intérprete de Lingua de Signos Española. Todas estas visitas poden comezar a reservarse a partir de mañá no portal web palacios.reservaspatrimonio.es

Con motivo da campaña para dar a coñecer a Lei de Residuos, o Concello do Porriño, organizará o próximo 1 de abril, a partir das 19.00 horas, unas xornadas de reciclaxe explicando en qué consiste o quinto contenedor: o marrón. Nesta sesión, os asistentes recibirán indicacións e os materiais necesarios para facilitar e cumplir coa súa reciclaxe.

Todos os participantes recibirán cubos de biorresiduos de 10 litros xunto coa chave necesaria para poder empregar os novos contenedores que se procederan a instalar nas rúas.

Esta campaña, impulsada polas concellerías de Medio Ambiente e Limpeza, leva en activo máis dun ano e ten como obxectivo principal conseguir que toda a cidade do Porriño recicle, conciencíese da xestión dos residuos e se convirta nunha urbe más limpa e sostible no tempo.

“É esencial que todos tomemos conciencia da importancia de separar e reciclar adecuadamente, non só para reducir a cantidade de residuos que enviamos ás entulleiras, senón tamén para contribuír á saúde do medio ambiente”, explicou a concelleira, Antía Carrera, concelleira de Medio Ambiente.

“Compostar os restos orgánicos non só axuda a diminuír a cantidade de lixo, senón que tamén produce un abono natural que pode ser utilizado en xardíns e hortas, pechando así o ciclo natural”, engadiu Carlos González, concelleiro de Limpieza.

Desde o Concello do Porriño se aposta por este tipo de xornadas en busca dunha sociedade máis concienciada co medio ambiente e facilitar que esta se familiarice coas novas opcións que existen para a construción dun mundo máis sostible.