Sen categoría

• O alcalde Alejandro Lorenzo vén de asinar a adquisición de 32 e antes de que remate o ano rubricará a compra doutras tantas, que sumadas ás 24 mercadas en 2023 suman unha superficie total de máis de 6 hectáreas que xerarán un gran espazo de recreo e lecer que actuará tamén como corredor ecolóxico e infraestrutura de protección fronte as inundacións

O Porriño, 8 de decembro de 2025.- O Concello do Porriño dá un novo paso decisivo na transformación ambiental da contorna do río Louro. O alcalde Alejandro Lorenzo vén de formalizar a compra de 32 novas parcelas situadas na marxe do río, unha actuación estratéxica que permitirá avanzar na creación do futuro Espazo Público de Lagunaxe Multifuncional, unha infraestrutura verde destinada a reducir o risco de inundación, restaurar o ecosistema fluvial e xerar un novo ámbito de convivencia e uso social para a cidadanía. Un proxecto incluído no PIA que se levará a cabo con fondos europeos.

O alcalde destacou a relevancia deste avance asegurando que “este é un paso histórico para o Porriño. Veño de asinar cos propietarios a compra destas 32 parcelas que nos permiten consolidar o espazo necesario para un gran parque fluvial que protexerá das inundacións e que, ao mesmo tempo, se converterá nun novo punto de encontro, recreo e calidade de vida para toda a veciñanza”. O rexedor subliñou tamén que o proxecto “coloca ao municipio á vangarda das políticas ambientais e de adaptación ao cambio climático”.

Lorenzo lembra que “estas novas adquisicións súmanse ás 24 parcelas mercadas en 2023 e outras 32 cuxa compra asinarei antes de rematar este ano”, configurando un conxunto continuo de terreos que suman 63.475,19 metros cadrados, que “con futuras adquisicións que seguiremos facendo” completará a superficie necesaria para a execución integral do espazo.

O proxecto define un modelo de adaptación climática fundamentado en solucións baseadas na natureza, coa creación dun lagunaxe multifuncional capaz de almacenar auga en episodios de choivas intensas. Isto permitirá protexer áreas urbanas e industriais especialmente vulnerables ás inundacións, ao tempo que se xera un novo pulmón verde para o municipio.

A intervención inclúe tamén a restauración ecolóxica das ribeiras e humedais asociados ás Gándaras de Budiño, espazo da Rede Natura 2000, incorporando vexetación autóctona, eliminando especies invasoras e creando zonas de alta biodiversidade.

O futuro parque fluvial ofrecerá novos espazos públicos para o lecer e a vida activa, con sendas peonís e ciclistas, pasarelas de madeira sobre zonas inundables, áreas de xogo, puntos de encontro e zonas recreativas que conectarán directamente O Porriño con Torneiros, superando a actual fractura territorial xerada pola canle do Louro.

Con esta adquisición de parcelas, o Concello consolida un proxecto clave para o seu futuro ambiental e urbano: un espazo natural resiliente, accesible e útil para a cidadanía, pensado para mellorar a calidade de vida e para afrontar con garantías os efectos crecentes do cambio climático.

• Dende o vindeiro 28 de novembro, este espazo habilitado na zona peonil, próxima ao Concello, acollerá un espectáculo diario de luces e son
• Instálanse, no casco urbano e en tódalas parroquias, máis de 150 arcos, preto dun millón de micro-LEDs e 2.176 elementos decorativos adicionais

O Porriño, 17 de novembro de 2025.- O Concello do Porriño está a piques de concluír a instalación da iluminación de Nadal 2025. O proxecto aposta pola tecnoloxía LED de baixo consumo, fabricación europea certificada e sistemas de control horario que reducen o impacto enerxético e garanten unha iluminación segura e eficiente en todo o municipio.

A montaxe inclúe 157 arcos luminosos, 2.176 elementos decorativos, 990.422 unidades de micro-LEDs e unha superficie total iluminada de 27.650,43 metros cadrados, distribuída polo centro urbano, prazas e rúas principais, así como por diferentes puntos singulares de tódalas parroquias do municipio.

O alcalde Alejandro Lorenzo anuncia que o acendido oficial terá lugar o venres 28 de novembro e destaca que “apostamos por unha iluminación eficiente e sostible, pero tamén por crear novos reclamos que atraian visitantes e axuden á actividade económica. Así, un dos grandes símbolos do Nadal 2025 no Porriño será un sorprendente túnel de luces, que se converterá nun punto de encontro e un espazo que sorprenderá a veciños e visitantes”.

A principal novidade deste ano será ese teito de luces de 30 metros de lonxitude, 7 metros de alto e 8 de ancho, situado na rúa Ramón González, na zona peonil, próximo ao Concello. A estrutura que terá uns 75.000 microleds, ofrecerá todos os días, a unha hora establecida, un espectáculo sincronizado de luces e son, no que participará un grupo de baile que realizará unha coreografía especial creada para esta montaxe. A iluminación desta zona estará coordinada coas luces e decoración da Praza Arquitecto Antonio Palacios, creando un efecto envolvente e convertendo a rúa nun dos espazos máis atractivos do Nadal no Porriño.

Tamén se incorpora un photocall luminoso co nome “O Porriño” na Praza do Cristo, así como novos motivos ornamentais que combinan tradición e modernidade.

Aberta a inscrición para participar na Cabalgata de Reis

O Concello do Porriño facilitará nas vindeiras semanas o calendario completo de actividades, espectáculos e iniciativas de dinamización cultural previstas para acompañar a iluminación de Nadal. Con todo, xa está aberta a inscrición para participar na comitiva da Cabalga dos Reis Magos, unha convocatoria aberta a tódalas ANPAS dos centros educativos e asociacións culturais do Concello. As bases están publicadas e poden consultarse na web www.ecultura.net, dende a cal se pode descargar o formulario de inscrición, cuxo prazo de presentación permanecerá aberto ata o día 10 de decembro, a través da sede electrónica do Concello. Establécese un importe máximo de 3.600 euros destinado aos premios pola participación, que se  repartirá seguindo rigorosamente a orde de inscrición.

• A iniciativa foi presentada nunha charla no salón de plenos e dende hoxe celebrarase esa mesma sesión informativa en tódalas parroquias do municipio

O Porriño, 11 de novembro de 2025.-  O Concello do Porriño vén de celebrar a primeira das charlas informativas dirixidas á veciñanza sobre a nova campaña de residuos, incluída no plan integral municipal que promove a recollida separada, a compostaxe e o fomento da economía circular.

Durante a sesión, celebrada onte no salón de plenos, persoal técnico explicou en detalle as principais novidades do plan, que abrangue catro liñas estratéxicas: a posta en marcha do colector marrón para materia orgánica, a recollida de aceite doméstico usado, a recollida de téxtil e o programa de compostaxe doméstica e comunitaria.

O alcalde, Alejandro Lorenzo, destacou “a importancia de contar coa colaboración da cidadanía neste cambio de modelo”, sinalando que “un Porriño máis limpo e sostible constrúese entre todos, con pequenos xestos diarios que teñen un gran impacto ambiental e económico”.

As charlas, que terán continuidade a partir de hoxe mesmo, por tódalas parroquias pretenden achegar información práctica, resolver dúbidas e fomentar a implicación da veciñanza no novo sistema de recollida. Así, este serán, ás 20.00 horas, celebrarase na Asociación A Forna de Budiño e o venres, ás 19.00 horas terá lugar no Centro Cultural de Mosende. Para a vindeira semana, o luns 17, ás 20.00 horas, celebrarase en Chenlo; o martes 18, ás 17.00 horas, en Pontellas e ás 19.30 horas en Atios e o venres 21, ás 19.00 horas en Cans. Xa na última semana de novembro, está programada unha charla o venres 27, ás 19.00 horas, no Centro Cultural Alba de Torneiros.

O Concello anima a toda a veciñanza a participar nestas sesións para coñecer de primeira man as medidas que se están a poñer en marcha e contribuír á mellora da xestión dos residuos no municipio.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, en colaboración coa consultora galega Permae, responsable da execución técnica das campañas.

• Concello prevé actuacións en Torneiros, no velódromo municipal e nas parroquias, poñendo o foco na mellora das infraestruturas e servizos básicos
• O alcalde, Alejandro Lorenzo, agradece á Deputación e ao seu presidente, Luis López, “o compromiso con Porriño e a sensibilidade amosada atendendo ás nosas demandas”

O Porriño, 23 de outubro de 2025.- O alcalde do Porriño, Alejandro Lorenzo, presentou esta mañá os proxectos que o Concello levará ante a Deputación de Pontevedra para optar ás diferentes liñas de axuda correspondentes aos exercicios 2026 e 2027. En conxunto, estas actuacións supoñen un investimento que supera os cinco millóns de euros, financiados de maneira conxunta pola Deputación e o Concello, e teñen como obxectivo mellorar a calidade de vida da veciñanza e avanzar na vertebración e cohesión territorial do municipio, con especial atención ás parroquias.

Entre as actuacións previstas destaca a rexeneración urbana do núcleo de Torneiros, un proxecto estratéxico que se enmarca no Plan Provincia Extraordinaria – Plan Extra. A iniciativa busca mellorar o medio ambiente urbano e fomentar a mobilidade peonil mediante a redistribución do espazo viario. Prevese ampliar as zonas peonís, mellorar as beirarrúas e a iluminación, eliminar barreiras arquitectónicas e incorporar vexetación e mobiliario urbano. O investimento inicial previsto ascende aos dous millóns de euros. “O proxecto de Torneiros busca humanizar a contorna dos cinco polígonos residenciais da parroquia; é unha prioridade porque supón mellorar o día a día da veciñanza e recuperar espazos públicos de calidade. Queremos un Porriño máis humano, accesible e pensado para as persoas”, destacou o alcalde.

Outra das grandes intervencións previstas é a remodelación integral das instalacións do velódromo municipal, no marco do Plan Extraordinario de Infraestruturas Deportivas. Con 600.000 euros de investimento, o Concello aposta por converter este espazo, inaugurado en 1993 e único en Galicia, nun centro de referencia para os deportes urbanos. O proxecto contempla a construción dun skatepark e dun pumptrack, así como a mellora das gradas —coas súas correspondentes impermeabilizacións e cubrición—, a reparación e panelado de fachadas, e actuacións nos paramentos interiores da edificación, habilitando locais que se destinarán a clubs, asociacións e agrupacións. Tamén se prevé a instalación de iluminación, sistemas de pluviais e rega, e novo mobiliario urbano, garantindo unha correcta integración paisaxística e un espazo seguro e accesible para todas as idades. “O velódromo municipal é un símbolo para o Porriño e queremos que siga sendo un referente, pero tamén que evolucione para adaptarse ás novas demandas deportivas. O skatepark e o pumptrack converterán esta área nun punto de encontro e atracción turística”, sinalou Lorenzo.

Xunto a estas actuacións, o Concello presentará tamén unha serie de proxectos no marco do Plan + Provincia, destinados principalmente a reforzar os servizos básicos no rural. A prioridade céntrase na rede de saneamento, unha demanda histórica da veciñanza que permitirá mellorar a calidade de vida nas parroquias e avanzar cara a un territorio máis vertebrado, sostible e igualitario. Así mesmo, incluiranse accións de acondicionamento, asfaltado e mantemento da rede viaria municipal, co propósito de mellorar a mobilidade, a seguridade e a conectividade entre os distintos núcleos de poboación. “Queremos un Porriño equilibrado, onde o rural teña as mesmas oportunidades e servizos ca o centro urbano. Estes proxectos son un paso máis para garantir unha mellor calidade de vida e avanzar cara a un territorio sostible e igualitario”, subliñou o rexedor.

A maiores destes tres plans, tamén se vén de confirmar outra actuación subvencionada polo ente provincial, para o acondicionamento dunha senda peonil na estrada provincial no barrio de Casal, na parroquia de Budiño.

Alejandro Lorenzo expresou o seu agradecemento á Deputación de Pontevedra e ao seu presidente, Luis López, “polo compromiso constante con Porriño e pola sensibilidade amosada atendendo ás nosas demandas na medida do posible”. O alcalde destacou a importancia da cooperación institucional, sinalando que “a colaboración entre administracións é o que fai posible que proxectos coma estes se convertan en realidade e melloren a vida da nosa veciñanza”.

• O alcalde do Porriño recibe ao Club Ciclista da Máster Louriña en recoñecemento ao mérito deportivo logo dunha tempada histórica

O Porriño, 18 de outubro de 2025.- O equipo élite-sub23 masculino LASAL COCINAS – GRUPO ODL CRAEGA, pertencente ao Club Ciclista Máster da Louriña, foi recibido polo alcalde do Porriño, Alejandro Lorenzo, tras lograr situarse como líder do ranking nacional da Real Federación Española de Ciclismo (RFEC) na categoría Élite.

Este recoñecemento chega despois dunha tempada de enorme esforzo e dedicación, na que os corredores acumularon máis de 40 días de competición, superando os 4.000 km en carreiras oficiais e máis de 15.000 km en adestramentos e concentracións. Un traballo colectivo que culmina cun resultado histórico para o ciclismo galego e para a comarca da Louriña.

“É un orgullo para O Porriño contar cun equipo que leva o nome da nosa vila por todo o país con tanta dignidade, traballo e humildade. Dende o Concello seguiremos apoiando o deporte base e de alto nivel como o que representa o Club Ciclista Máster Louriña”, destacou o alcalde durante o acto de recepción no Concello.

Pola súa banda, o corpo técnico do equipo agradeceu o apoio constante de institucións, patrocinadores e familias que fixeron posible este soño, subliñando que “isto é froito do compromiso dun grupo humano excepcional, tanto dentro como fóra da estrada”. O encontro serviu tamén para facerlle entrega ao alcalde dun maillot conmemorativo e outros dous aos principais patrocinadores privados do proxecto, Rafa Pérez de Lasal Cocinas e Juan Castaño do Grupo ODL.

Unha vez finalizada a tempada, o club afronta novos retos de cara a 2026 e seguir facendo historia no ciclismo español. “O obxectivo para o ano é consolidar o proxecto cunha sede social á vez que intentar manter aos equipos masculino, feminino e adaptado ao máximo”, sinalan. E é que son o único club de toda España de ciclismo que ten as tres seccións disputando as copas de España.

Dende o Concello do Porriño reafírmase o compromiso co deporte como motor de cohesión social, promoción da saúde e proxección do noso territorio. O éxito do Club Ciclista Máster Louriña non só é motivo de orgullo para a nosa vila, senón tamén un exemplo inspirador para as xeracións futuras. “Continuaremos traballando da man dos clubs locais para que O Porriño siga sendo berce de talento, esforzo e superación”.