Sanidade arquivos - Páxina 3 de 4

O servizo de Atención Temperá do Porriño inicia a súa actividade en outubro

Trátase dun servizo moi demandado no Porriño que ata o de agora nunca se prestou e que servirá de guía profesional a moitas familias para tratar posibles trastornos do desenvolvemento nos nenos e nenas de 0 a 6 anos a través dunha actuación conxunta e interdisciplinar imprescindible que dea unha resposta global ás súas necesidades.

“Para mellorar a calidade de vida da veciñanza é esencial actuar dende os primeiros anos, detectando as dificultades do desenvolvemento que poidan presentar os pequenos e pequenas, ou o risco de padecelas, coa maior prontitude para que poidan recibir atención canto antes”, incidiu o alcalde, Alejandro Lorenzo, “Para iso, no servizo de atención temperá do Porriño atoparán a profesionais que, en coordinación cos servizos sociais, sanitarios e educativos do concello, os axudarán, a eles e ás súas familias”.

Pola súa banda, a concelleira de Sanidade e Educación, Carolina González, explicou que “inicialmente, co fin de que inicie a súa actividade o antes posible, instalarase en tres locais habilitados no Pavillón Municipal: un para logopedia, outro para psicoloxía e outro para fisioterapia. É unha ubicación temporal, xa que dende o Concello estamos a xestionar a adquisición dun local no que se instalará definitivamente o servizo”.

No servizo de Atención Temperá do Porriño as familias atoparán profesionais que avaliarán e diagnosticarán os trastornos do Desenvolvemento dos pequenos e pequenas e traballarán no seu desenvolvemento psicomotor, cognitivo, da linguaxe e comunicación, da autonomía e da área social e afectiva, ademais de prestar apoio, información e formación á familia durante todo o proceso. Serán os pediatras os que avalíen que nenos ou nenas precisan desta atención.

A posta en marcha deste servizo, do que xa disponían todos os concellos da contorna excepto O Porriño, foi posible a través dunha subvención da Consellería de Política Social no marco da Rede Galega de Atención Temperá. Cabe destacar que xa foi licitado e adxudicado á entidade local, ACEESCA, que se encargará da xestión do mesmo.

04/09/2022 in Sanidade

Pedaleando contra a ELA

Coincidindo co Día Mundial da ELA, que se celebra cada 21 de xuño, o porriñés José Manuel Domínguez “Tonono Bike” deu hoxe a primeira pedalada do seu reto persoal e social: 6000 km pola ELA.

Foi na praza Arquitecto Antonio Palacios, de onde partiu hoxe en bicicleta co obxectivo de recaudar polo menos 6.000 euros para axudar aos enfermos de ELA e ás súas familias, tantos como kilómetros percorrerá durante seis meses visibilizando unha enfermidade que afecta a moitas persoas.

O alcalde, Alejandro Lorenzo, o concelleiro de Deportes, Abel Estévez, a concelleira de Sanidade, Carolina González, Pilar Guimeráns, representante de AGAELA , familiares e amigos, acompañaron a Jose neste importante momento.

“Coa miña bicicleta e o voso apoio percorrerei o perímetro de España para conseguir fondos que se destinarán na súa totalidade a axudar ás persoas que padecen esta enfermidade”, explicou Jose, “Sei de primeira man o necesaria que esta axuda para que estas persoas teñan unha vida digna, xa que está a afectar a un familiar e amigo, e penso que somos nós, os que gozamos de saúde, os que dalgún xeito debemos colaborar con eles”.

Por iso Jose, músico de profesión, adica a metade do ano ao seu traballo e a outra metade a loitar contra a Esclerose Lateral Amiotrófica (ELA) a golpe de pedal.

“O que vai facer Jose é digno de admiración, o seu altruismo e compromiso merece o respaldo de todos e todas, e que en cada pedaleo sinta que dende o Porriño o estamos apoiando”, afirmou Alejandro Lorenzo, “Por iso é necesario que todos e cada un de nós colaboremos na campaña de crowdfunding e difundamos o seu reto para que todo aquel que queira poida sumarse”.

A recaudación de fondos está a facerse a través da plataforma de crowdfunding Migranodearena : https://www.migranodearena.org/reto/pedalear-6000-km-x-6000-x-ela. A totalidade do recaudado destinarase a axudar aos enfermos de ELA e ás súas familias a través da Asociación Galega de Esclerose Lateral Amiotrófica (AGAELA).

A casa consistorial ilumínase pola ELA

O Concello do Porriño sumouse hoxe á campaña #LuzporlaELA impulsada por AGAELA en colaboración coa Confederación Nacional de Entidades de ELA (ConELA) con motivo do Día Mundial da ELA. Hoxe a casa consistorial ilumínase en verde xunto a decenas de edificios e monumentos de toda España para visibilizar esta enfermidade e apoiar ás persoas, concienciando á sociedade sobre as dificultades que conleva no día a día.

Sobre a ELA

A ELA é unha enfermidade nerodexenerativa incurable, progresivamente incapacitante e mortal nun prazo de 3 a 5 anos dende o seu diagnóstico, pero isto son só datos obxectivos da enfermidade. A realidade é que en España cada día diagnostícanse tres novos casos de Esclerose Lateral Amiotrófica e falecen outras tres persoas en silencio.

A isto hai que sumar o custe medio dos coidados das persoas con ELA, que alcanza cifras moi elevadas anualmente, o que supón un problema económico inasumible para a mayoría das familias. A dificultade de detectar os síntomas iniciais a nivel de atención primaria e a complexidade do diagnóstico diferencial demoran usualmente o diagnóstico. En España, o tempo medio desde o primeiro síntoma ata o diagnóstico definitivo supera o ano.

Por iso, é importante potenciar a innovación e a tecnoloxía, apoiar e fomentar a investigación que nos permitirá atopar a orixe, o diagnóstico rápido e a cura.

21/06/2022 in Deportes, Sanidade, Servizos sociais

O autobús de “Coidados porta a porta” chega ao Porriño para ofrecer servizos de podoloxía, audioloxía e estimulación da memoria

O alcalde do Porriño, Alejandro Lorenzo, acompañado pola delegada territorial da Xunta en Vigo, Marta Fernández-Tapias, o director xeral de Maiores e Persoas con Discapacidade, Fernándo González Abeijón, e os concelleiros Abel Estévez, Rosario Costas e Carolina González, vistou hoxe o autobús de Coidados Porta a Porta, que está a ofrecer servizos de podoloxía, audioloxía e estimulación da memoria ás persoas maiores da localidade xeito gratuíto.

Segundo informaron, as citas están completas os catro días que a unidade móbil permanecerá no Porriño, no aparcamento da Piscina Municipal.

“É unha iniciativa pioneira que aplaudimos chegue ao Porriño e que está a ter moita demanda”, explicou o alcalde, “Desde o Concello volcámonos especialmente na atención aos nosos maiores e en poñer á súa disposición todas as ferramentas que estén ao noso alcance para mellorar a súa calidade de vida”.

Neste sentido, cabe destacar que o novo executivo puxo en marcha a tal fin a concellería de Terceira Idade, un departamento específico que traballa de maneira transversal co resto das áreas para dar resposta ás necesidades das persoas maiores e garantizar que a localidade ofreza a calidade de vida que estes merecen.

04/05/2022 in Sanidade, Servizos sociais

Concello e OSÍLICE unen forzas para apoiar aos enfermos de silicose

O Concello do Porriño e a Asociación Galega de Afectados por Silicose asinaron a súa colaboración para avanzar na visibilización e prevención desta enfermidade.

O alcalde do Porriño, Alejandro Lorenzo, e o presidente de OSÍLICE, Jose Carlos Giráldez, formalizaron o convenio de colaboración a través do cal, a administración local contribuirá con 2.000 euros a visibilizar esta doenza e difundir os aspectos clínicos, preventivos e psicosociais da silicose por pedra natural entre a veciñanza.

Tal e como defendeu sempre o rexedor, o Concello, como administración máis próxima á cidadanía, debe recoñecer o labor social que desempeña esta asociación e contribuír no preciso para axudar ao gran número de afectados por silicose que hai no noso termo municipal.

Así, Lorenzo agradeceu en nome do Concello o “traballo que veñen desenvolvendo dende a súa constitución en 2013, asesorando e defendendo os dereitos dos enfermos de silicose, doenza que afecta a centos de persoas non só no Porriño, senón en toda Galicia”. O rexedor explicou que na liña política do executivo “está destacada dende o principio a promoción deste tipo de accións de protección da saúde, en especial en colectivos de risco que polas características especiais do noso municipio, que desenvolve unha grande actividade no sector mineiro, son máis vulnerables”.

Sobre OSÍLICE

OSÍLICE é a primeira asociación de afectados por silicose de Galicia, e a terceira en España. Aínda que se creou no Porriño, onde ten a sede dende o ano 2013, o seu radio de actuación esténdese a toda a comunidade autónoma de cara a protexer os intereses dos afectados por esta enfermidade, facilitarlles información, orientalos, asesoralos e tamén prestar atención a calquera persoa que requira os seus servizos.

A asociación foi fundada por un grupo de traballadores afectados pola doenza que decidiron poñerse en marcha para atender aos centos de persoas que como eles padecían esta enfermidade. Tan só na comarca hai diagnosticados uns 500 casos de silicose.

01/04/2022 in Sanidade

O outro test, ese do que ninguén fala pero que che pode salvar a vida

A Xunta Local da AECC no Porriño está a desenvolver a campaña de prevención do cancro colorrectal entre a poboación maior de 50 anos, con motivo do Día Mundial para a Prevención do Cáncro de Colon que se celebra cada 31 de marzo.

Baixo o lema “O outro test. Do que ninguén fala pero que pode salvar a vida” preténdese concienciar sobre a importancia de realizarse unha sinxela proba en casa que pode identificar signos de lesións no colon e previr o alcance.

O alcalde, Alejandro Lorenzo, achegouse ao punto informativo instalado frente ao Concello para respaldar esta campaña e reiterar á presidenta, Chelo Conde, a súa disposición a colaborar en todas as iniciativas de sensibilización xa que, apostando pola prevención poden salvarse moitas vidas.

“Igual que nos familiarizamos co test da COVID-19 debemos facelo con outro tipos de probas, como o TSOH”, “Este tipo de cancro, o de maior incidencia no noso país, pode detectarse precozmente e incluso nalgúns casos evitarse. Por iso é vital que a cidadanía participe nos cribados que poden axudar a superar este tipo de tumor no 90% dos casos se se detecta a tempo”.

AECC O PORRIÑO

C/ Domingo Bueno, S/N, 36400 O Porriño (Centro Cívico)

Tlf: 986 33 95 03

01/04/2022 in Alcaldía, Sanidade

O Porriño contará co servizo de Atención Temperá

O Concello do Porriño vén de dar o primeiro paso para implantar o programa de atención temperá no municipio. Falamos dun servizo moi demandando no Porriño consistente nun conxunto de intervencións dirixidas á poboación infantil (ata 6 anos) e á súas familias, que ten por obxectivo dar resposta o antes posible ás necesidades permanentes ou transitorias que poidan presentar as nenas e nenos con trastornos do desenvolvemento ou risco de padecelos.

O alcalde, Alejandro Lorenzo, e a concelleira de Sanidade e Educación, Carolina González, informaron ao persoal de pediatría do centro de saúde do Porriño do inicio das xestións para implantar este servizo, valorar e coordinar con eles as medidas a tomar.

“A atención temperá permite que se poidan detectar dificultades do desenvolvemento con maior prontitud e que os nenos e nenas, polo tanto, poidan recibir atención profesional canto antes, algo de vital importancia nunha poboación como a do Porriño cun alto índice de natalidade”, explicou o rexedor, “As pequenas e pequenos que nacen no noso pobo e as súas familias deben contar con toda a atención posible que se lle poida prestar desde as administracións”.

Pola súa banda, a concelleira explicou que “xa se solicitou a subvención da Consellería de Política Social no marco da Rede Galega de Atención Temperá para poder poñelo en marcha no Porriño á maior brevidade posible”.

14/03/2022 in Sanidade, Servizos sociais

A AECC atendeu a 253 pacientes e familias no Porriño

A Asociación Española Contra o Cancro levou a cabo o ano pasado 253 intervencións que tiveron como beneficiarios a veciños e veciñas do Porriño, a través dos seus diferentes programas. En concreto, foron 138 as intervencións de atención social, que van dende consultas de información, orientación sobre axudas económicas, préstamo de material ou programa de alimentos. Foron 84 as de atención psicolóxica a pacientes e familiares e 27 no eido do traballo social.

O alcalde, Alejandro Lorenzo, e a concelleira de Sanidade, Carolina González, mantiveron esta semana unha xuntanza con representantes da AECC para analizar o papel que desempeña esta entidade no municipio. Á mesma acudiron a presidenta provincial, Carmen Abeledo, o coordinador das xuntais locais de Pontevedra, Telmo Crespo, e a presidenta da AECC do Porriño, Chelo Conde.

“O labor que realizan para apoiar aos pacientes e ás súas familias é impagable”, indicou o rexedor, “O cancro require unha abordaxe integral, non é suficiente con loitar contra a enfermidade, tamén hai que facelo contra as consecuencias emocionais que produce nos enfermos e nas familias, e para iso necesítase o compromiso de todos e todas”.

Co obxectivo de sumar esforzos, estudáronse liñas de traballo conxunto a desenvolver nos próximos meses e as fórmulas para establecer lazos de colaboración entre ambas entidades, que se irán dando a coñecer nas próximas semanas.

AECC O PORRIÑO

C/ Domingo Bueno, S/N, 36400 O Porriño (Centro Cívico)

Tlf: 986 33 95 03

15/02/2022 in Sanidade

O Alcalde ponderou “o comportamento admirable do público” no Desfile de Rondallas que foi “un sopro de aire fresco”

O alcalde Alejandro Lorenzo valorou “o comportamento admirable” do público que presenciou o desfile conxunto de rondallas de Mos e O Porriño celebrado onte domingo. O rexedor municipal fixo hoxe unha valoración do acto que foi “un sopro de aire fresco que todos necesitabamos e nada mellor que as rondallas que son un selo de identidade e un dos nosos baluartes culturais”.

O alcalde afirmou que a cidadanía do Porriño demostrou que somos un pobo moi animado, que nos gusta compartir e gozar dos nosos costumes e facémolo de xeito responsable, conscientes da situación que estamos atravesando”, engadiu.

Alejandro Lorenzo expresou o seu agradecemento “a todos aqueles que fixeron posible a celebración do evento coas máximas garantías de seguridade”. Eloxiou de “magnífico o traballo da Policía Local e Protección Civil; e das rondallas que se organizaron en tempo marca” e cualificou de “admirable comportamento o de todos os que acudiron para velo nas rúas”.

GRAN IMPACTO

O desfile conxunto rondallas de Mos e O Porriño respondeu á expectación suscitada xa que acreditan, sobre todo, os datos de audiencia nas redes sociais.

Aínda que a presenza de espectadores foi numerosa, as cifras de audiencia a través das redes sociais do Concello xa superan hoxe as 10.000 visualizacións. Miles de persoas seguiron o mesmo domingo, a emisión en streaming que se realizou e que se emitiu a través das canles de Facebook e YouTube do Concello.

03/01/2022 in Alcaldía, Cultura e festas, Sanidade, Seguridade, Tráfico

O goberno municipal acordou máis presenza policial no mercado e estudar unha posible reubicación

O Concello do Porriño aumentará a presenza policial no mercado ambulante dos martes para informar aos usuarios/as e vendedores/as da normativa sanitaria en vigor e garantir que se cumpla.

O control da seguridade no mercado ambulante e na Praza de Abastos foi un dos eixos centrais da xuntanza da Comisión Municipal de Seguimento da Covid celebrada o pasado xoves 30.

Esta decisión tomouse tras terse detectado unha relaxación no cumprimento das medidas.

Tamén se anuncióu que o Goberno Municipal estudará o cambio de ubicación do mercado ambulante a un espazo que permita ampliar distancias entre os postos de venta.

INFORMACIÓN AO CIDADÁ

Outro dos puntos abordados pola Comisión Municipal de Seguimento foi a información que dende o Concello se debe prestar ao cidadá nesta situación sanitaria.

0 Goberno Municipal facilitará información diaria do número de contaxios no municipio e medidas sanitarias en vigor. O fará a través dos seus perfís oficiais en redes sociais (Facebook, Twitter e Instagram) e a través da APP local BandoMóvil.

Tamén se difundirán estes datos actualizados na pantalla instalada na rúa Antonio Palacios, xunto á rotonda.

ATENCIÓN ÁS PERSOAS CONFINADAS

Lembramos que o número de atención a persoas confinadas que presta Protección Civil é o 689 76 47 17 para dar resposta ás necesidades das persoas que se atopan nesa situación.

Todos aqueles veciños/as que deban estar confinados poden chamar a este número e os voluntarios e voluntarias da agrupación encargaranse de garantir as necesidades básicas destas persoas estean cubertas, realizando tarefas como facer a compra ou acudir á farmacia.

31/12/2021 in Alcaldía, Sanidade

Cancelada a Carreira Nocturna de Reis ante a imposibilidade de garantir a seguridade sanitaria no evento

Pola contra valorouse que no desfile conxunto de rondallas de Mos e O Porriño, sí poderán manterse as debidas garantías e distancias polo seu longo percorrido

O Goberno Municipal acordou a suspensión da Carreira Nocturna de Reis programada para o 8 de xaneiro ante a imposibilidade de garantir na mesma a seguridade sanitaria dos/as participantes, segundo anunciou hoxe o concelleiro de Deportes, Abel Estévez. A decisión obtivo un respaldo unánime na xuntanza da Comisión de Seguimento da Covid-19 que presidiu hoxe o alcalde Alejandro Lorenzo.

O feito de que os atletas participantes na carreira non leven a máscara de protección mentres corren e a imposibilidade de establecer a obrigatoriedade desta medida fixo que dende a organización se valoraran fórmulas alternativas como unha contrareloxo individual. Pero desestimouse xa que desvirtuaba a propia natureza lúdico-deportiva do evento.

Tamén se abordou a seguridade do Desfile Conxunto de Rondallas do Porriño e Mos que se celebrará o vindeiro día 2. O Goberno Municipal, tras analizar as características do evento, que se celebrará ao aire libre nun amplo percorrido que permite a distribución dos asistentes, mantendo a distancia de seguridade, acordou mantelo.