Parroquias

O Porriño fai historia co maior apoio económico ás Comunidades de Augas, cun total de 245.000 euros en subvencións entre o Concello e a Deputación de Pontevedra

 

  • O apoio institucional busca reforzar a igualdade de servizos entre o rural e o urbano, ademais de recoñecer o labor altruísta e esencial que desenvolven estas comunidades.

O Porriño, 20 de xuño de 2025.– O Concello do Porriño reafirma o seu compromiso coa veciñanza e co desenvolvemento sostible das súas parroquias e barrios cun investimento histórico de 175.000 euros en subvencións destinadas a todas e cada unha das comunidades de augas do municipio. Esta achega, a máis elevada da historia porriñesa neste eido, supón un respaldo sen precedentes ao traballo das comunidades de augas, entidades fundamentais para garantir o acceso á auga potable e ao saneamento en moitas zonas do rural.

A este esforzo súmase a colaboración da Deputación de Pontevedra, que este ano destinou 70.000 euros adicionais para apoiar a diversas comunidades de augas do Porriño, reforzando así o compromiso das administracións públicas coa xestión comunitaria da auga. Con motivo desta achega, o deputado provincial Javier Tourís visitou onte o noso municipio, onde tivo a oportunidade de coñecer de primeira man o traballo realizado por estas entidades e os proxectos que recibiron financiamento provincial.

Durante a visita, Tourís destacou o papel crucial que xogan as comunidades de augas como exemplo de organización veciñal e solidariedade, xa que están xestionadas por persoas que traballan de forma totalmente altruísta co único obxectivo de garantir un servizo esencial para o benestar das súas parroquias.

O alcalde do Porriño, Alejandro Lorenzo, manifestou a importancia das comunidades de augas no municipio, especialmente nas zonas onde non chega a rede xeral. “As comunidades de augas son unha peza clave para o funcionamento e a calidade de vida en moitas das zonas do Porriño”, afirmou o rexedor. A súa labor abrangue dende a captación e almacenamento da auga ata o mantemento das infraestruturas e o seu correcto tratamento, coidando tamén o medio ambiente e fomentando un uso responsable dos recursos hídricos.

Desde o Concello quérese poñer en valor o papel destas entidades, formadas por veciños e veciñas que, de maneira desinteresada, contribúen a garantir o acceso á auga potable en moitas parroquias. “O traballo incansable das persoas que forman parte destas comunidades é digno de recoñecemento. Son auténticos exemplos de civismo, cooperación e compromiso coa veciñanza”, sinalou Lorenzo.

Neste sentido, o alcalde subliñou a importancia do apoio institucional para garantir a continuidade e mellora destes servizos. “O apoio económico das administracións non é só un recoñecemento merecido, senón tamén unha necesidade para garantir que todas as parroquias do Porriño dispoñan dunha auga de calidade, segura e xestionada de forma eficiente”, concluíu.

Este investimento de 245.000 euros entre o Concello e a Deputación de Pontevedra supón un paso adiante na loita contra o despoboamento, na igualdade de servizos entre o rural e os núcleos urbanos e na posta en valor do traballo colectivo como ferramenta de transformación social.

 

 

20/06/2025 in Parroquias

A caravana do Concello do Porriño retoma as visitas ás parroquias coa estrea do podcast “A historia do teu pobo”

 

O Porriño, 17 de xuño de 2025.- O Concello do Porriño retoma dende o venres 27 de xuño as visitas ás parroquias coa súa oficina municipal móbil, unha caravana pioneira que dende o ano pasado achegando os servizos da administración local ao rural. Este ano, como novidade, o Alcalde Alejandro Lorenzo incorpora ao percorrido unha proposta innovadora: a gravación dun podcast coa veciñanza, que leva por título “A historia do teu pobo”.

O obxectivo da caravana segue a ser o mesmo: facilitar a atención directa nas parroquias en cuestións como urbanismo, limpeza, obras públicas, rexistro de documentos ou saneamento, sen necesidade de desprazarse ao centro urbano. A oficina móbil visitará un punto diferente os venres en horario de 9:00 a 13:00 h.

“Queremos que achegar o Concello á todos, que non só chegue en papel ou por ventá, senón que tamén se escoite, que se sinta e que quede para a historia do Porriño. Por iso nace este podcast, para dar voz a quen fixo e fai Porriño cada día”, explicou o alcalde. O primeiro episodio gravouse esta mañá na Praza do Concello e contou coa participación de Juaniña, veciña moi querida no municipio, que vén de cumprir 100 anos e foi recentemente homenaxeada cunha rúa co seu nome. Durante a conversa, Juaniña abriunos o seu corazón e compartiu lembranzas, anécdotas e consellos de vida cargados de historia e emoción.

“A historia do teu pobo” estará dispoñible proximamente nas redes sociais oficiais do Concello do Porriño, para que toda a veciñanza poida escoitar e compartir estes encontros que poñen en valor a identidade e a memoria viva das nosas parroquias.

Con esta iniciativa, o Concello do Porriño reafirma o seu compromiso cunha administración próxima, participativa e humana, que escoita e dá protagonismo á súa xente. Queremos que O Porriño sexa o teu encontro.

 

17/06/2025 in Alcaldía, Parroquias, Urbanismo, comercio e industria

O Porriño presenta a súa candidatura ao Plan de Actuación Integrado (PAI) para optar aos fondos FEDER de desenvolvemento urbano sostible

 

  • Un investimento de 15 millóns de euros que permitirá transformar O Porriño cara a un modelo urbano máis sostible e inclusivo
  • A integración de Torneiros co centro de O Porriño será unha realidade grazas a unha mellor mobilidade, conexións máis eficientes e espazos urbanos que favorezan unha vila máis cohesionada e accesible para todos.

 

O Porriño deu hoxe un paso fundamental cara a un modelo de desenvolvemento urbano máis sostible e equilibrado coa presentación da súa candidatura ao Plan de Actuación Integrado (PAI), no marco da convocatoria FEDER de Desenvolvemento Urbano Sostible promovida polo Ministerio de Facenda. O acto tivo lugar na Casa Consistorial e contou coa presenza do alcalde, Manuel Alejandro Lorenzo Alonso, quen subliñou a importancia estratéxica deste proxecto para o municipio.

“O Porriño ten unha oportunidade única para transformar e integrar de xeito sostible os seus espazos urbanos, reducindo desigualdades e fomentando a inclusión social e económica. Con esta candidatura, aspiramos a obter un financiamento de 15 millóns de euros que nos permitirá desenvolver iniciativas clave para mellorar a calidade de vida da nosa cidadanía”, declarou o rexedor.

O PAI de O Porriño estrutúrase en tres eixos fundamentais: a mellora da calidade urbana e ambiental, a inclusión social e a dinamización económica. Dentro deste marco, contémplase a transformación do espazo público de Torneiros, mellorando a seguridade e accesibilidade, soterrando a liña de alta tensión, potenciando a mobilidade sostible e creando eixes verdes. Tamén inclúe a mellora do Centro Multiusos de Torneiros e a implementación dun programa de Formación Dual en colaboración coas empresas locais, ademais da creación dunha Aula Virtual para a inclusión dixital.

O proxecto contempla ademais a implantación dunha liña de transporte eléctrico municipal, a creación dunha app para a xestión do transporte público e a mellora da conectividade peonil entre Torneiros e O Porriño. En termos de resiliencia ambiental, prevese a creación de espazos naturais multifuncionais para a redución da vulnerabilidade fronte a inundacións, así como a recuperación do patrimonio etnográfico do río Louro.

A dinamización cultural tamén é unha prioridade, polo que se propón a ampliación do Auditorio Municipal, a creación dunha nova sala de lectura e espazo TIC, a mellora dos espazos culturais e a adaptación da Rúa José Fernández López para fomentar a mobilidade peonil.

O investimento total destas actuacións ascende a 15 millóns de euros. “Con esta proposta, O Porriño aposta por un futuro sostible, moderno e inclusivo, garantindo unha mellor calidade de vida para todos os seus habitantes”, concluíu o alcalde.

A candidatura está agora en mans do Ministerio de Facenda, que avaliará os proxectos presentados para decidir a asignación dos fondos FEDER. O goberno municipal confía en que a iniciativa de O Porriño sexa seleccionada, permitindo a execución dunha estratexia de desenvolvemento urbano sostible que marque un antes e un despois no municipio.

17/02/2025 in Infraestruturas, Medio Ambiente, Parroquias

O Concello do Porriño rehabilitará a Escola Unitaria de Chenlo para convertela nun espazo cultural de uso comunitario

 

  • Os traballos, nos que se investirán uns 50.000 euros, darán comezo neste primeiro trimestre do ano
  • A actuación ten un dobre obxectivo, a recuperación do patrimonio histórico e arquitectónico municipal e darlle unha nova utilización a unhas instalacións que levan anos en desuso 
  • O futuro centro de día na antiga escola de Atios e unha escola infantil na de Pontellas son outras das iniciativas do plan municipal de restauración e posta en valor de edificios singulares nas distintas parroquias

O Concello do Porriño rehabilitará a antiga escola unitaria de Chenlo para convertela nun espazo cultural e veciñal. Seguindo a mesma liña de actuación que noutros edificios municipais actualmente en desuso, o goberno local iniciou este proxecto cuxas obras se prevén que se inicien ao longo deste primeiro trimestre do ano.

O alcalde Alejandro Lorenzo, xunto co concelleiro de Vías e Obras, Ramón Porto e o alcalde pedáneo da Entidade Local Menor de Chenlo, Jacobo Alonso, visitaron recentemente as instalacións nas que se investirán uns 50.000 euros, para o cal se contará co apoio da Xunta de Galicia. “Este edificio, que forma parte do patrimonio histórico e arquitectónico local, representa un valor significativo para a comunidade e a súa recuperación permitirá darlle un novo uso, adaptado ás necesidades actuais da veciñanza”, subliña Lorenzo.

O concelleiro explica que coa rehabilitación deste inmoble “a parroquia de Chenlo disporá dun espazo moderno e accesible, pensado para a realización de actividades como cursos, obradoiros, exposicións e eventos comunitarios”. Pola súa parte, o alcalde pedáneo considera que “a creación deste novo espazo permitirá dinamizar a vida social e cultural da parroquia, proporcionando un punto de encontro para a veciñanza e fomentando iniciativas socioculturais”.

O proxecto contempla unha serie de melloras estruturais e funcionais para garantir a conservación do edificio e optimizar o seu uso. Así, renovarase o tellado, asegurando a súa impermeabilización e resistencia para protexer a estrutura do inmoble; rehabilitarase o xardín exterior, converténdoo nun espazo máis accesible e axeitado para actividades ao aire libre; melloraranse os aseos e os interiores, adaptándoos ás normativas de accesibilidade e confort; eliminaranse as barreiras arquitectónicas, facilitando a mobilidade e garantindo un espazo inclusivo para todas as persoas e conectaranse as diferentes estancias, creando un espazo máis amplo e versátil para diferentes usos.

“Dende o Concello reafirmamos así o noso compromiso coa recuperación do patrimonio local e coa creación de espazos que melloren a calidade de vida da cidadanía. A intervención na antiga escola unitaria de Chenlo é un paso máis nesta estratexia de valorización do territorio e de mellora dos servizos para a comunidade”, puntualiza o alcalde Alejandro Lorenzo.

Recuperación do patrimonio local

Esta iniciativa enmárcase dentro do plan municipal de recuperación e posta en valor de edificios singulares nas distintas parroquias. Neste senso, a antiga escola unitaria de Covelo, en Atios, será un centro de día; a de Pontellas acollerá unha das dúas novas escolas infantís, para nenos de 0 a 3 anos, que se abrirán no Porriño e, pola súa banda, a de Mosende seguirá mellorando para continuar como colexio de Educación Infantil dando servizo á cativada do rural.

 

08/02/2025 in Infraestruturas, Parroquias

Cinco vivendas do Porriño reciben as primeiras axudas de 2.000 euros para a instalación dun sistema de bombeo que as conecte á rede de saneamento

 

  • O Concello vén de conceder tantas axudas como foron solicitadas nesta convocatoria pioneira en Galicia

Cinco son os primeiros beneficiarios da liña de axudas para a instalación de sistemas de bombeo individual convocada polo Concello do Porriño. Cada un deles recibirá ata 2.000 euros para executar as obras que suporán o enganche da súa vivenda á rede de saneamento do Louro. Trátase de vivendas situadas topograficamente por debaixo da rasante do vial polo que discorre dita tubaxe, o que fai necesaria a instalación dun sistemas de bombeo, unha actuación que supón un coste adicional que debe asumir o propio usuario.

O goberno porriñés, no seu obxectivo de acadar o cen por cen do saneamento en todo o termo municipal resolvendo as situacións que requiren unha intervención máis complexa e que implican un gasto que repercute no peto da veciñanza, como o é esta, presentou esta liña de axudas destinada a quen precisase da instalación dun bombeo, subvencionando con ata 2.000 euros cada actuación.

A primeira convocatoria desta liña de axudas, pioneira en toda Galicia, contou cun orzamento total de 108.000 euros, outorgándose tantas concesións como solicitudes foron recibidas. Con todo, desde o goberno local, coñecedores da existencia de máis vivendas nesta mesma situación anuncian que volverán a sacar outra convocatoria co mesmo fin. “É primordial que dende as administracións públicas tendamos a man á veciñanza e poñamos tamén da nosa parte para acadar un obxectivo común como é o cen por cen do saneamento como prioridade e servizo esencial do nosos Concello”, sinala o alcalde Alejandro Lorenzo. “É por iso que volveremos convocar estas axudas para chegar a todos os que a precisen”, subliña o rexedor porriñés durante a visita a unha das obras que xa se está a acometer grazas a estas subvencións municipais.

Os beneficiarios percibirán ata o 80% do importe total concedido como anticipo de fondos, mentres que o 20% restante abonarase unha vez que se acredite o cumprimento da obra. As axudas cobren diversos aspectos relacionados coa instalación do sistema de bombeo, incluíndo a execución ou adaptación do pozo ou arqueta onde se instalará o equipo, así como a adquisición, instalación e posta en funcionamento do mesmo, cadro de mando e instalación eléctrica.

Coa convocatoria destas axudas “Porriño converteuse no primeiro concello de Galicia en subvencionar o bombeo para as vivendas que non teñen a cota necesaria para o enganche á rede principal”, remarca Lorenzo, á vez que lembra outras iniciativas xa postas en marcha nesta materia como a eliminación da taxa anual polo baleirado das fosas sépticas e a redución do importe do servizo nun 60%.

04/02/2025 in Parroquias

O Porriño resolve a concesión de 175.000 euros en axudas para Comunidades de Augas

 

  • Estas axudas permiten reforzar o abastecemento de auga nas parroquias do Porriño, garantindo un servizo máis seguro e eficiente para toda a veciñanza

O Concello do Porriño vén de conceder 175.000 euros en axudas ás comunidades de augas do municipio, destinadas a reforzar o control sanitario, optimizar o mantemento das instalacións e mellorar a rede de distribución. Así o anunciou hoxe o alcalde, Manuel Alejandro Lorenzo Alonso, quen destacou que “estas axudas buscan apoiar ás traídas veciñais, fundamentais para garantir que a auga chegue en óptimas condicións a todas as parroquias do termo municipal”.

As subvencións, que corresponden á resolución da convocatoria de axudas para o ano 2024, distribúense en dúas liñas principais, cunha achega máxima de 8.000 euros por comunidade para calquera das liñas subvencionables. No caso de concorrer ás dúas liñas, o límite total pode chegar ata 12.000 euros por entidade, sempre que non supere o 80% do custo total do proxecto presentado.

A primeira liña, centrada no mantemento, inclúe axudas para reparacións, substitución de redes de distribución de ata 50 metros e gastos relacionados coas analíticas de control sanitario, conservación e mantemento de captacións, sistemas de almacenamento e potabilización. A segunda liña, destinada a investimentos, da cobertura a actuacións máis amplas, como a substitución de redes de distribución de máis de 50 metros e outras melloras estruturais nas instalacións.

O Concello outorgou as axudas a todas as comunidades que completaron o expediente. Entre as comunidades beneficiadas atópanse as Comunidade de augas de Cruz, Vitureira, Casal-Chan-Orbelle, Rozadas-Eiris, Cans, Contrasto, Bouza, San Jorge de Mosende, Covelo, Atios, Carracido, Chenlo, Torneiros, Mosteiro, O Cerquido, Vaquería, A Devesa, Centeáns e A Graña.

Esta medida reflicte o compromiso do goberno local por chegar a todos os veciños e veciñas, especialmente nas parroquias, onde o apoio ás traídas veciñais é clave para garantir un servizo básico esencial.

O concelleiro de Parroquias, Marcos Martínez Campos subliñou que estas subvencións representan un paso importante para garantir a calidade da auga e o benestar da veciñanza: “É fundamental apoiar ás traídas para que poidan prestar o mellor servizo posible aos nosos veciños. Estes investimentos non só melloran a calidade da auga, senón que aseguran un abastecemento seguro e sostible”.

Ademais, Lorenzo destacou que estas liñas de axuda manteranse este ano e tamén nos vindeiros, garantindo así o apoio continuo ás comunidades de augas. “Seguiremos apostando por estas convocatorias de axuda nos próximos anos, para que ningunha traída veciñal quede atrás e o apoio chegue ao maior número posible de comunidades”, afirmou o rexedor.

O Concello do Porriño, a través destas subvencións, reforza o seu compromiso co servizo básico de abastecemento de auga, promovendo un uso eficiente dos recursos dispoñibles e traballando por satisfacer as necesidades da veciñanza en todas as parroquias.

29/01/2025 in Parroquias

Comezan as obras de repavimentación no camiño de acceso á Vitureira na Vacaría

 

  • Con un investimento superior aos 47.000 euros, esta actuación permitirá renovar o pavimento e mellorar a drenaxe, garantindo un acceso máis cómodo e seguro ao barrio da Vitureira e ao Centro Cultural A Forna.

 

O Concello de O Porriño deu comezo ás obras de repavimentación do camiño de acceso ás canteiras en Vacaría, na parroquia de Budiño. Este proxecto, que se enmarca dentro da Liña 1 do Plan Concellos 2022-2023, forma parte do compromiso municipal coa mellora das infraestruturas no medio rural e conta cun investimento de 47.128,29 euros, IVE incluído. A intervención afecta a un tramo de 605 metros de lonxitude, cun ancho medio de 7,30 metros, discorrendo integramente por dominio público viario ou terreos de titularidade municipal. O prazo estimado de execución é de dous meses.

O alcalde do Porriño, Manuel Alejandro Lorenzo Alonso, destacou a relevancia desta actuación para a comunidade local, sinalando que “o mal estado deste camiño facía imprescindible unha intervención. Con estas melloras garantiremos un acceso máis seguro e eficiente ao barrio da Vitureira e ao Centro Cultural A Forna, contribuíndo así ao desenvolvemento económico, social e cultural da parroquia de Budiño.”

Pola súa parte, o concelleiro de Vías e Obras, Ramón Porto Oya, puxo en valor a envergadura técnica da actuación, explicando que “non se trata só de repavimentar; estamos a realizar unha intervención integral que inclúe a limpeza da superficie, a aplicación dunha nova capa de rodadura e a mellora da drenaxe. Isto asegura a durabilidade da obra e minimiza os riscos para os usuarios.”

As actuacións previstas inclúen a limpeza enérxica do pavimento existente, a demolición parcial de bordos e outras zonas en mal estado, así como a preparación do terreo para garantir unha base sólida e uniforme. Posteriormente, aplicarase unha capa de mestura bituminosa en quente de 5 centímetros de espesor, compactada e selada, que permitirá ofrecer unha superficie renovada, resistente e segura para o tráfico. Ademais, contemplarase a mellora da drenaxe e o adecuado refino de noiros para garantir a estabilidade e durabilidade da obra.

Esta intervención permitirá unha notable mellora na seguridade viaria ao eliminar fochancas e superficies irregulares que dificultaban o tránsito e representaban un risco para os vehículos. Ademais, facilitará o acceso ao barrio da Vitureira e ao Centro Cultural A Forna, reforzando a conexión cos servizos esenciais e os espazos de encontro da comunidade. A actuación tamén contribuirá a optimizar o transporte na área, reducindo o impacto ambiental grazas a unha circulación máis eficiente dos vehículos e promovendo unha mellor calidade de vida para os veciños.

O Concello do Porriño reafirma así o seu compromiso co desenvolvemento do medio rural, traballando por ofrecer infraestruturas de calidade que respondan ás necesidades da veciñanza e impulsen o crecemento da comunidade local.

17/01/2025 in Infraestruturas, Parroquias, Vías e obras