O Concello galardoado pola Xunta e “Ecoembes” pola súa achega á campaña “Recicla e únete ao reto”

O premio de 2.000€ será doado á asociación de apoio a persoas con diversidade intelectual “Aceesca”

O Porriño é un dos concellos galardoados pola Xunta de Galicia e “Ecoembes” pola súa achega á campaña de recollida de plásticos, latas e briks, “Recicla e únete ao reto!”. A campaña, desenvolvida simultaneamente en quince concellos galegos, consistiu en que todos eles asumiron o reto de superar, cando menos, nun 10% as achegas ao contedor amarelo durante os meses de febreiro, marzo e abril deste ano.

Coa ocasión deste reto, na praza do Concello colocouse en marzo un contedor amarelo xigante como reclamo da campaña aprendéndolle á cidadanía como separar correctamente os residuos. Tratase de incrementar a conciencia de reciclaxe e afianzar o hábito continuado entre a poboación.

O Porriño recibirá un premio económico dotado con 2.000 € para doar a una causa social. Por acordo do goberno municipal eses cartos dóanse á asociación de apoio a persoas con diversidade intelectual “Aceesca”.

Sergio Casal, concelleiro de Medio Ambiente e Limpeza será o encargado de recoller o premio, en representación do Concello do Porriño, no acto de entrega que terá lugar este venres 14, ás 12:00 h. na Praza dos Barcos de Sanxenxo, presidido por Angeles Vázquez, titular da Conselleira de Medio Ambiente da Xunta de Galicia.

Despregue da Policía Local e dos servizos de limpeza nos cemiterios coa ocasión do Día de Todos os Santos

Axentes da Policía Local encargáronse de vixiar o cumprimento da normativa autonómica nas visitas aos cemiterios da vila coa ocasión do Día de Todos os Santos


A mediodía, Lourdes Moure, concelleira de Seguridade comprobou o desenvolvemento do operativo acudindo a varios cemiterios, tanto no municipal como en diferentes parroquias. Segundo indicou a concelleira “o comportamento da veciñanza está sendo moi axeitado, evitando aglomeracións e colaborando cos protocolos”.


Deste xeito deuse cumprimento ao protocolo anti-Covid promulgado o pasado día 22 pola Dirección Xeral de Saúde Pública da Xunta de Galicia que limitaba a catro persoas do mesmo grupo familiar e a 30 minutos de duración, as visitas aos cemiterios. O mesmo protocolo instaba aos Concellos a tomar as medidas necesarias para garantir o cumprimento destas normas.

Paralelamente, outro departamento do goberno municipal, a Concellería de Limpeza que dirixe Sergio Casal despregou hoxe unha brigada de seis persoas que se encargaron de realizar desinfeccións periódicas nos accesos e zonas comúns dos distintos cemiterios ao longo do día.

O Concello comeza a realizar as desinfeccións diarias nos colexios e garderías públicas que corresponderían á Xunta de Galicia


O Concello do Porriño comeza a partir de hoxe xoves, 1 de outubro, a realizar as desinfeccións diarias dos colexios públicos e das dúas escolas infantís segundo os protocolos anti-covid. Trátase dunha competencia impropia que o Concello realiza pero que non lle corresponde. De xeito que, como outros concellos limítrofes (Gondomar ou Nigrán), realizase polo axuntamento que despois facturará os gastos á Xunta de Galicia que é a administración que ten esa competencia.

A Concellería de Educación que dirixe Lourdes Moure decidiu asumir esas tarefas de desinfección “xa que ante todo, os nenos e nenas son porriñeses e o Concello non vai permitir que estean en situacións de risco”, manifestou.

A tal fin, realizouse un contrato menor para que unha empresa, “Limpezas Cíes”, faga a diario esas desinfeccións nas zonas comúns dos colexios públicos e da escola unitaria de Mosende así como nas “Galiñas Azuis” de Torneiros e rúa Doantes de Sangue.

A vixencia do contrato é ata mediados de decembro, ata que comecen as vacacións de Nadal nos centros de ensino.

3.000 máscaras enviadas polo Goberno Central distribúense polo Concello entre os colectivos máis vulnerables

Unha achega de 3.000 unidades de máscaras de protección enviadas polo Goberno de España segundo o acordo acadado coa FEMP (Federación Española de Municipios e Provincias), chegaron hoxe ao Concello do Porriño.

A Deputación de Pontevedra encargase da recepción e distribución das máscaras para que se repartan entre os concellos da provincia.

A indicación que realizan o Goberno de España e a FEMP é que se entregue este material para que sexa utilizado polos colectivos máis vulnerables xunto con operarios de limpeza, traballadores sociais e policías locais, entre outros. 

Os concelleiros do goberno municipal dos que dependen esas áreas de xestión reunironse esta mañá para recepcionar o envío e por conseguinte iniciar xa o reparto, segundo acordaron os Lourdes Moure, Sergio Casal e David Alonso. 

O goberno municipal do Porriño quere amosar o seu agradecemento ao Goberno de España, á FEMP e á Deputación pola súa colaboración.

A concelleira de Educación informou ás Anpas e grupos municipais dos preparativos para o regreso ás clases


Lourdes Moure, concelleira de Educación informou hoxe ás asociacións de nais e pais de alumnos da vila e aos representantes dos grupos municipais da corporación, dos preparativos para o regreso ás clases. Moure Varela trasladoulles os acordos que se adoptaron o pasado mércores, nunha reunión previa coas direccións dos colexios e institutos porriñeses.

A concelleira lembrou ás “anpas” o compromiso acadado coas direccións dos centros docentes de que o Concello realizará con medios propios unha primeira desinfección intensiva das respectivas instalacións antes do inicio do curso en cada nivel, “aínda que non se trata dunha competencia propia do Concello”, recordou Lourdes Moure.

Tamén Lourdes Moure garantiu ás anpas que trasladará á actual empresa encargada da limpeza dos centros docentes, o establecido pola Xunta de Galicia no protocolo anti-covid que determina dúas quendas de limpeza diarias dos baños e zonas comúns. Esta cobertura será posteriormente asumida pola empresa que resulte gañadora da licitación municipal actualmente en curso para cubrir este servizo.

Por último, a concelleira informou ás “anpas” que segundo acordou cos directores, manteran nos centros os routers e tarxetas de conexión á Internet que o Concello contratou durante o estado de alarma para evitar a fenda dixital entre o alumnado. Agardarase ata comprobar como discorren as primeiras semanas do curso ecolar.
Como novidade acordouse que as “anpas” pasen as súas inquedanzas ás direccións de cada centro para o primeiro día de clases pois a concelleira, xunto cos directores dos centros e a Policía Local prepararán a semana que ven un dispositivo de seguridade para os vindeiros días 10 e 11, cando comezarán Infantil, Primaria e Educación Especial.

Ademais dos representantes das respectivas “anpas”, asistiron ao encontro, celebrado no salón de sesións cos necesarios protocolos anti-covid, as concelleiras Carolina Gónzalez, polo PP; Cami Moreira, polo BNG e Patricia Sío, de EU SON, que próximamente tomará posesión do seu escano na corporación. Disculpou a súa ausencia o concelleiro, Manuel Carrera da UDDL.






O goberno municipal acada respaldo do pleno para iniciar a contratación do servizo de recollida do lixo e xestión do Punto Limpo


O goberno municipal do Porriño acadou o respaldo da maioría da corporación para iniciar o expediente de contratación do servizo de recollida e transporte do lixo. O novo contrato que comeza a prepararse contempla tamén que o futuro adxudicatario se faga cargo doutros residuos domésticos e asimilables así como da xestión do ”Punto Limpo” do concello.

O acordo acadouse con cinco votos a favor (os catro concelleiros do PSOE, e Manuel Carrera da UDDL), o voto en contra de Blanca Francés, de EU SON e as abstencións do BNG e do PP. Previamente desestimouse unha enmenda do PP que pretendía deixar o asunto enriba da mesa.

No transcurso deste pleno ordinario de agosto, acordouse por unanimidade respaldar unha moción de EU SON en apoio do comercio de proximidade mediante unha campaña de cheques regalo e outras iniciativas para dinamizar o pequeno comercio. Tamén por unanimidade toda a corporación porriñesa acordou aprobar definitivamente a ordenanza reguladora do uso da lingua galega desestimando as alegacións presentadas ao anterior acordo.

O goberno municipal esixe á empresa que subrogue aos traballadores do servizo de recollida do lixo


A empresa “Narom S.L.” que se fixo cargo dende o pasado luns 17 da recollida do lixo no Porriño, subrogará aos traballadores que prestaban este servizo coa anterior empresa, “Ascan”.
Este foi o compromiso acadado hoxe xoves, despois dunha reunión mantida polo goberno municipal co empresario. Encontro que presidiu a alcaldesa Eva García e no que participaron tamén Pedro Pereira, primeiro tenente de alcalde, e Sergio Casal, concelleiro delegado de Limpeza e Medio Ambiente.
A continuación, tanto Eva García como Sergio Casal comunicaron o acordo acadado aos traballadores e ás representacións sindicais de CIG e UXT.

A alcaldesa explicou que “a pesares de que o contrato non puido ser licitado aínda, prevalece o establecido no Estatuto dos Traballadores que garante o dereito á subrogación. Polo tanto a empresa que se fai cargo agora da recollida do lixo manterá a plantilla preexistente segundo esiximos”, manifestou Eva García. A rexidora lembrou que “dende a Alcaldía sempre amosamos unha postura inflexible a favor de que os traballadores tiñan que ser subrogados a pesares de que estamos ante un contrato que aínda non se licitou pola súa complexidade e dificultades legais que xurdiron”.

Os sete traballadores do servizo iniciaran onte concentracións de protesta diante do Concello para reclamar a subrogación que hoxe remataron nada máis coñecerse o acordo. Non obstante, as reunións entre empresa, traballadores a representación sindical continuarán esta tarde para rematar outros aspectos do acordo.

Ponse a proba no Multiusos de Torneiros unha cabina anti-covid desarrollada por unha empresa do Porriño

Esta semana, na porta de acceso principal ao Multiusos de Torneiros, está a proba unha cabina anti-Covid desarrollada por “Ramecq”, unha empresa do Porriño.

O pórtico de entrada, está dotado cun sistema de toma de temperatura, dispersor vaporizador, xel hidroalcohólico e alfombra desinfectante como xa tiveron oportunidade de comprobar as persoas que acuden ás oficinas de “Porreemprego” e demais servizos ubicados no Multiusos de Torneiros.

Segundo explica a empresa “Ramecq” na súa páxina web, o sistema co que está dotada a cabina “Smart Sanitizer” que desarrollaron, emprega productos químicos e desinfectantes aprobados polas normativas europeas e respetuosos co medio ambiente.  Esta empresa ten a súa sede no polígono industrial de A Granxa.

David Alonso, concelleiro de Servizos Sociais e Emprego manifestou que “colocaremos a cabina a proba noutras instalacións municipais coma o Polideportivo, tamén no Centro Cultural e falei con Alfonso Pato, director do Festival de Cans para que valoren a súa instalación na vindeira edición deste evento”.  

O Concello abre un novo prazo para solicitar composteiros individuais

Sergio Casal, concelleiro de Medio Ambiente e Limpeza comunicou hoxe que a partir de mañá mércores día 22 ábrese un novo prazo de presentación de solicitudes para aqueles veciños e veciñas interesados en recibir un composteiro individual para vivendas unifamiliares.

As solicitudes deberán envíarse por correo electrónico ao enderezo do concelleiro: sergiocasalquintas@oporrino.org

Habilitase un prazo de dúas semanas para que os interesados manden as súas solicitudes Nas que deberán facer constar nome, apelidos, un teléfono de contacto e un enderezo de correo eléctrónico para que o Concello poida contactar con estes veciños e veciñas para convocarlles no Multiusos de Torneiros á reunión onde se distribuirán os composteiros.

Nesa futura reunión, como acontecera noutras anteriotres, mestres composteiros do Plan Revitaliza explicarán cómo se realiza a montaxe dos composteiros que entregan embalados e como deben realizar a compostaxe dos residuos orgánicos.

A idea do Concelleiro de Medio Ambiente é que durante o mes de agosto ou primeiros de setembro teña lugar a convocatoria aos solicitantes e que se faga o seguinte reparto de composteiros.

 

A maioría da corporación acordou realizar unha análise conxunta da facturación pendente de pago

A suma de votos da maioría da corporación municipal do Porriño, co voto de calidade do alcalde accidental, rexeitou a proposta do Partido Popular e aceptou a contraproposta do grupo EU SON para analizar no seu conxunto toda a facturación pendente do Concello do Porriño. Acordouse que esa análise inclúa tanto as facturas da conta 4/13 como aquelas que están pendentes porque carezan de partes de traballo, outras deficiencias ou tiveran sido rexeitadas polo sistema “Face”.

A contraproposta de Pedro Ocampo, voceiro de EU SON foi apoiada pola suma dos 8 votos de PSOE, BNG, EU SON e Manuel Carrera, da UDDL, fronte aos 8 votos dos concelleiros do PP que votaron en contra. Ante a ausencia por convalecencia post cirúrxica da alcaldesa titular, Eva García, o alcalde accidental, Pedro Pereira fixo valer o voto de calidade.

De tal xeito que na vindeira semana, convocarase unha xunta de voceiros municipais para planificar como se fará esa análise en conxunto da facturación e se requerirán os informes pertinentes dos servizos técnicos municipais.

O acordo acadado foi a alternativa á proposta do Partido Popular do que partía a petición deste pleno extraordinario celebrado hoxe. O voceiro do grupo maioritario da oposición plantexou os casos da facturación pendente de pago de 25 empresas proveedoras do Concello. Entre elas figuran “Naturgy”; “Eulen”, “Nexia”, “Ascan” “Fluge”, “Aceesca Emprego”, “Gonzalez Couceiro” ou “Narom”, entre outras.

Alejandro Lorenzo matizou hoxe no pleno que a súa proposta contemplaba “revisión de oficio, pago, crédito ou sexa o que fora segundo a normativa vixente e os informes técnicos pertinentes da Secretaría e da Intervención Municipal”.   Ao mesmo tempo, o voceiro do PP, requiriu ademais en cada un dos 25 contratos, un expediente de responsabilidade patrimonial aos ordenadores de cada gasto.  

A proposta do PP foi rebatida por Lourdes Moure, concelleira de Economía e Facenda e voceira do grupo socialista. Acusou ao PP porriñes de “querer entorpecer ata paralizar a actividade económica municipal e para ilo, infunden sospeitas e dubidan dos informes tanto dos técnicos coma dos altos funcionarios, habilitados nacionais, se non están na súa corda”.

A voceira socialista manifestou que “estean tranquilos os proveedores do Concello que van cobrar, aínda que o Partido Popular non lles queira pagar”.

Cami Moreira, polo BNG manifestou que o seu grupo votaba en contra da proposta do PP por que“non temos coñecemento de ilegalidades” aínda que subliñou que “o recoñecemento extraxudial é unha mala praxe que está corrixirse”. E Manuel Carrera, dixo “observar mala fe no PP que está a facer unha oposición xudicializada cando o que procedería sería un esforzo conxunto para esclarecer toda a facturación pendente”.

Nesa mesma liña, o voceiro de EU SON, formulou a contraproposta que finalmente aprobou a maioría da corporación. Ocampo Cardalda baseouse en que aínda “fáltanos documentación” e reclamou que sexan a xunta de voceiros e as comisións municipais as que establezan qué facturas deben pagarse con recoñecemento extraxudicial e qué facturas deben pasar por trámite de revisión de oficio ou de audiencia ás empresas”, manifestou  Ocampo.

O PP retirou dous puntos máis da orde do día do pleno e por unanimidade de toda a corporación acordouse deixar enriba da mesa outra proposta do grupo maioritario da oposición que solicita información sobre as nóminas percibidas pola alcaldesa entre febreiro e maio deste ano.