Infraestruturas

• O proxecto permitirá reducir o consumo enerxético e mellorar o confort deste edificio que alberga a Escola Municipal de Música e múltiples aulas que acollen actividades lúdicas e culturais de diferentes asociacións e colectivos

O Porriño, 4 de decembro de 2025.- O Concello do Porriño levará a cabo as obras de mellora da eficiencia enerxética do Centro Cívico, cun orzamento total de 149.950 euros. As intervencións previstas inclúen a mellora dos sistemas de climatización e ventilación na segunda planta, a substitución integral das carpinterías exteriores por outras máis eficientes e o illamento térmico das fachadas, así como a instalación dun novo sistema de iluminación eficiente. No caso concreto da ventilación, o proxecto prevé a instalación dun sistema con recuperador de calor e redes de condutos de impulsión e extracción, co obxectivo de optimizar o confort térmico e a calidade do aire.

O alcalde do Porriño, Alejandro Lorenzo, destaca que “este proxecto é un paso máis na modernización das nosas infraestruturas municipais e na aposta decidida por reducir o consumo enerxético e as emisións de CO₂. Mellorar a eficiencia do Centro Cívico significa tamén mellorar o confort das veciñas e veciños que fan uso diario deste espazo, ao tempo que reducimos custos de mantemento e contribuímos á sostibilidade ambiental do Porriño”, engade.

O Centro Cívico do Porriño é un espazo de referencia para a veciñanza, que acolle a Escola Municipal de Música, que conta con máis de 150 alumnos, así como diversas asociacións e colectivos locais que empregan as súas instalacións para a realización de cursos e actividades formativas e de lecer. Así, a mellora da eficiencia e do confort do edificio repercutirá directamente no benestar de todas as persoas usuarias.

A actuación está subvencionada pola Consellería de Presidencia, Xustiza e Deportes, ao abeiro dunha orde de axudas destinada a promover a eficiencia enerxética en edificios municipais e cofinanciada pola Unión Europea a través do programa Galicia Feder 2021-2027. A parte subvencionada será do 80% (119.960 euros) tendo que aportar o Concello o 20% restante (29.990 euros). Neste sentido, o rexedor subliña a importancia da colaboración institucional,  “agradecemos o apoio da Consellería de Presidencia, Xustiza e Deporte que, a través dos Fondos Feder, fai posible acometer actuacións que doutro xeito serían moi difíciles de financiar só con recursos municipais”.

Con esta iniciativa, o Concello do Porriño reafirma o seu compromiso coa sostibilidade e a mellora continua das infraestruturas públicas, avanzando cara a un modelo de xestión máis respectuoso co medio ambiente e máis eficiente no uso dos recursos. As obras no Centro Cívico representan un exemplo claro de como a innovación e a eficiencia enerxética poden ir da man para ofrecer espazos municipais máis confortables, modernos e adaptados ás necesidades actuais da cidadanía.

• Dúas sentenzas do Contencioso Administrativo estiman o recurso do Concello do Porriño declarando nulo o acordo plenario de 2023 do Concello de Vigo e, consecuentemente, as liquidacións emitidas por importe de preto de 150.000 euros
• O alcalde Alejandro Lorenzo sostén que “pagaremos o que nos corresponda, en concepto de mantemento das infraestruturas, e non o que Vigo decida e impoña unilateralmente” e lembra que “a auga non é de Vigo, Porriño conta cunha concesión outorgada no ano 1962 polo Ministerio de Obras Públicas”
• O maxistrado-xuíz exhorta a ámbalas administracións ao diálogo en aras de evitar unha “cascada litixiosa”, cuestión á que xa se referiu dende fai anos o Concello do Porriño, ofrecéndose a negociar e chegar a un entendemento, sen obter nunca resposta por parte de Vigo

O Porriño, 3 de decembro de 2025.- O Xulgado do Contencioso-Administrativo vén de emitir dúas sentenzas que dan a razón ao Concello do Porriño fronte ao Concello de Vigo no conflito polos custos asociados ao encoro de Eiras. “A xustiza confirma que Vigo non podía modificar nin impoñer unilateralmente os importes que pretendía cobrarnos, por iso anula o acordo plenario de 2023 e, consecuentemente as liquidacións que foron derivadas del”, explica o alcalde Alejandro Lorenzo.

Así, a primeira das resolucións anula o acordo plenario adoptado polo Concello de Vigo o 29 de marzo de 2023, no que Vigo modificaba, de maneira unilateral, os importes que debía asumir O Porriño en función do antigo acordo de 27 de xaneiro de 1998, o cal tamén fora determinado unilateralmente. Aquel acordo de 1998 establecía unha participación nos custos de mantemento e, sobre todo, o pagamento vinculado á construción do canal, que quedou totalmente amortizado no ano 2023. Chegado ese momento, Vigo decidiu actualizar os custos e establecer un novo canon de mantemento, pero fíxoo sen negociación, sen xustificación suficiente e sen competencia para impoñelo unilateralmente, tal e como agora confirma a xustiza.

A segunda sentenza declara que, ao quedar anulado o acordo plenario de 2023, tamén quedan anuladas consecuentemente todas as liquidacións bimensuais derivadas del, que Vigo lle reclamara ao Concello do Porriño durante o ano 2023. En total, son case 150.000 euros en conceptos que non estaban acreditados e que Vigo pretendía cobrar sen base legal válida.

O alcalde do Porriño destacou que “o Concello pagará sempre o que lle corresponda, pero non o que Vigo decida e impoña pola súa conta”, lembrando que “O Porriño non ten que pagar polo subministro de auga, pois para iso xa ten unha concesión outorgada no ano 1962 polo Ministerio de Obras Públicas, senón polo mantemento das infraestruturas de captación e condución e sempre conforme á lei e aos acordos vixentes”.

Lorenzo sinala tamén que o Concello do Porriño leva tempo ofrecéndose a sentar e negociar os posibles pagos, ante o cal nunca obtivo resposta por parte do concello vigués, unha disposición ao diálogo que o propio maxistrado recolle tamén na sentenza. Nel exhórtase ás partes a “sentar adecuadamente, con solidez, os cimentos desta relación xurídica que indudablemente as vincula”, evitando así “unha cascada litixiosa” como a vivida nos últimos anos. O xuíz sostén que “sería óptimo que abandonasen a unilateralidade na determinación da achega, que ambas partes se reunisen e examinasen a cuestión, despexando aspectos como os gastos de mantemento da presa de Eiras”. Tamén indica que Vigo debe actuar con “auténtica transparencia” e poñer á disposición do Porriño a documentación detallada dos gastos reais que xera o mantemento e conservación desta infraestrutura.

Sen dúbida, ámbalas dúas sentenzas son unha boa nova para O Porriño e para os intereses da veciñanza, “seguiremos defendendo o que é xusto e garantindo unha xestión responsable dos recursos públicos”, conclúe Alejandro Lorenzo quen, á súa vez, remarca o feito de que “na propia sentenza se ratifique o que xa vimos pedindo dende fai tempo, a necesidade da existencia dun entendemento entre administracións”.

• Instalaranse máis de 4.000 contadores intelixentes, 11 novos sectores para control de fugas de auga potable, 60 caudalímetros, máis de 70 sensores de calidade de auga residual e o deseño dunha web para facilitar información á cidadanía sobre a xestión das instalacións
• O comité extraordinario celebrado esta mañá analizou tamén a situación do encoro de Eiras e o seu impacto en cada municipio

O Porriño, 25 de novembro de 2025.- O Consorcio de Augas do Louro, integrado polos Concellos do Porriño, Mos, Tui e Salceda de Caselas, celebrou hoxe un comité extraordinario no que se aprobou o proxecto de mellora da eficiencia e dixitalización do ciclo urbano da auga. A obra, que sae a licitación e conta cun prazo máximo de execución de seis meses, supón un investimento total de 3.574.817,99 euros, financiado pola Unión Europea – Next Generation EU a través do Plan de Recuperación, Transformación e Resiliencia (PRTR), no marco da segunda convocatoria do PERTE promovido polo Ministerio para a Transición Ecolóxica e o Reto Demográfico.

O proxecto ten como obxectivo principal a implantación de solucións tecnolóxicas avanzadas para a sensorización, automatización, control remoto e análise de datos en tempo real de todas as instalacións do ciclo da auga xestionadas polo Consorcio, desde a captación ata a depuración. Este avance permitirá optimizar a xestión integral da auga, reducir perdas e consumo enerxético, mellorar a transparencia e trazabilidade dos procesos e garantir unha resposta rápida ante incidencias, cumprindo ademais coas esixencias da nova normativa europea sobre protección do dominio público hidráulico.

Entre as accións concretas previstas destacan a instalación de case 4.100 contadores intelixentes para usuarios domésticos, grandes consumidores e instalacións municipais, a creación de 11 novos sectores para control de fugas de auga potable, a colocación de 60 caudalímetros en estacións de bombeo de augas residuais e máis de 70 sensores de calidade de auga residual vertida, co fin de mellorar o control da rede de saneamento. Adicionalmente, instalaranse dúas plantas solares fotovoltaicas nas potabilizadoras de Mos e Tui e desenvolverase un deseño web para facilitar á cidadanía o acceso á información sobre a xestión das instalacións.

Todas estas medidas contribúen aos obxectivos establecidos na Planificación Hidrolóxica 2022-2027 da Demarcación Miño-Sil, promovendo o bo estado do dominio público hidráulico, reducindo a contaminación e aumentando a eficiencia e sustentabilidade dos servizos.

Coa aprobación deste investimento e o impulso das actuacións do PERTE, o Consorcio de Augas do Louro dá un paso decisivo cara á xestión intelixente e sostible do ciclo integral da auga, converténdose nun modelo replicable para outras entidades xestoras.

Coordinación e responsabilidade na xestión das infraestruturas de Eiras

No segundo punto da orde do día, os alcaldes dos concellos membros: Porriño, Alejandro Lorenzo, tamén presidente do Consorcio; Mos, Nidia Arévalo; Salceda de Caselas, Loli Castiñeira e Tui, Enrique Cabaleiro, analizaron a situación actual do encoro de Eiras e o seu impacto en cada municipio, estudando posibles solucións coordinadas para garantir o abastecemento presente e futuro. Durante a sesión acordouse solicitar unha xuntanza interinstitucional para estudar a posible creación dunha mancomunidade, que permita fortalecer a cooperación entre administracións e garantir a seguridade hídrica de forma sustentable e estratéxica.

Como presidente do Consorcio de Augas do Louro, Alejandro Lorenzo trasladou unha mensaxe de claridade e responsabilidade en relación ao conflito aberto co Concello de Vigo e á situación da presa de Eiras. Así, explicou durante a celebración do comité que en relación á situación das válvulas e ao mantemento da presa de Eiras, “quero ser moi claro: estamos falando de infraestruturas críticas para o abastecemento de auga. E aquí quero subliñar algo fundamental: o Consorcio de Augas do Louro está formado por catro concellos —O Porriño, Salceda, Mos e Tui—, e todos, absolutamente todos, debemos ser partícipes de calquera obra, mellora ou actuación que se leve a cabo. Non se pode tomar decisións unilateralmente. O Consorcio é un órgano de cooperación e así debe funcionar”.

Lorenzo sinalou que se hai informes técnicos que acreditan deterioro ou risco nas infraestruturas, “o responsable é actuar, planificar e coordinarse entre todas as administracións implicadas. O que non pode ocorrer é que quen ten a competencia directa sobre a manipulación e vixilancia das válvulas non asuma esa responsabilidade. A seguridade do sistema non pode depender de improvisacións nin de actuacións tardías”. Neste sentido, o director de Augas de Galicia, Roi Fernández, presente tamén no comité extraordinario desta mañá, asegurou que “é o Concello de Vigo o que manipula exclusivamente as válvulas”.

“Seguiremos defendendo os nosos seus dereitos, colaborando nas solucións e cumprindo coas nosas obrigas. Pero tamén imos defender o que é xusto, o que é legal e o que corresponde. O noso compromiso é coa veciñanza, coa seguridade do abastecemento e coa xestión responsable dos recursos públicos. A través do Consorcio seremos parte nesta defensa dun ben público que é de todos e de todas como é a auga”, concluíu Alejandro Lorenzo.