Igualdade

O Porriño reivindica a “Igualdade dende o berce”

O Porriño vólcase na conmemoración do Día Internacional da Muller cunha completa programación dirixida especialmente á infancia e á mocidade.

A proposta da concellería de Igualdade, que dirixe Carolina González, xira baixo o lema “Igualdade dende o berce” destacando a importancia de educar en valores como principal ferramenta para construír unha sociedade igualitaria. “As/os nenas/os de hoxe serán as/os adultas/os de mañá”, apuntou a concelleira, “Unha xeración educada sen distincións de xénero dende pequenas/os, conscientes da necesidade de alcanzar unha igualdade real e implicadas/os na reivindicación deste dereito darán forma a unha sociedade máis xusta e igualitaria”.

No mesmo sentido se manifestou o alcalde, Alejandro Lorenzo. “O cambio é necesario e a forma máis efectiva de avanzar cara el é a apostando pola educación”, apuntou o rexedor, “Para rematar coas desigualdades que todavía sofren moitas mulleres polo mero feito de selo en moitos ámbitos das súas vidas, é necesario que a mocidade medre no respecto e na igualdade, condicións esenciais para evitar comportamentos machistas futuros e alcalzar unha igualdade real efectiva”.

O alcalde e a concelleira presentaron hoxe a programación que propón unha semana de actividades culturais, divulgativas e lúdicas. Foi no CEIP Plurilingüe de Atios, onde se celebraba a primeira das accións: o obradoiro de RealKiddys sobre a hipersexualización e os micromachismos que se impartirá ao alumnado de 4º a 6º de primaria de todos os centros escolares da vila.

A actividade conmemorativa do Concello estenderase tamén aos institutos. Os alumnos de 1º de Bacharelato do IES Pino Manso e do IES Ribeira do Louro coñecerán o papel fundamental da muller na eliminación da discriminación por razón de sexo, no seu empoderamento e na creación dunha sociedade baleira de roles e estereotipos de xénero a través dun divertido “Scape room”.

A programación que comezou hoxe continúa o 6 de marzo co espectáculo infantil “Eu de maior non quero ser princesa” amenizado polo dúo As Maimiñas. Será ás 17h na praza Arquitecto Antonio Palacios.

A xornada reivindicativa do 8 de marzo arrancará na Praza de Abastos do Porriño cunha “Homenaxe ás peixeiras” no que participarán o alcalde do Porriño e a alcaldesa de Mos. Será ás 10 h.  

Os actos trasladaranse á praza Arquitecto Antonio Palacios pola tarde. Ás 17 h comeza “Voces na rúa”. Unha actividade na que a cidadanía será a principal protagonista achegando os seus coñecementos, opinións e reflexións sobre a importancia da muller ao longo da historia, a súa presenza e o seu arduo traballo na consecución do recoñecemento dos seus dereitos en igualdade cos homes.  Pechará a programación na praza a lectura do manifesto do 8M, ás 20:30h.

Ademais, o Concello do Porriño fará pública a súa Guía de linguaxe inclusiva a través das súas redes sociais e páxina web.

03/03/2022 in Igualdade

DECLARACIÓN INSTITUCIONAL DE REXEITAMENTO AO CONCERTO DE KAYDY CAIN

A corporación local do Porriño manifesta de maneira unánime a súa condena ao concerto que o cantante de trap, Kaydy Cain, ofreceu este sábado no municipio veciño de Mos, así como a calquera outro evento musical ou cultural que agreda á dignidade das mulleres.
 
A música é unha importante fonte de culturización. En moitas ocasións é un reflexo da sociedade e tamén inflúe considerablemente nela, polo que letras como as de Kaydy Cain, abertamente machistas e con mensaxes explícitos que denigran ás mulleres, non contan co respaldo desta corporación.
 
Ningunha expresión artística pode faltar ao respecto nin fomentar actitudes que promovan a desigualdade nas relacións entre homes e mulleres, xa que ao facelo ,faltase aos valores sobre os que se cimenta unha sociedade democrática, libre e igualitaria.
 
O Concello do Porriño traballa, nos diferentes eidos de competencia municipal, para poñer fin ás desigualdades entre homes e muleres e contra a súa expresión máxima: a violencia machista.
A través da súa concellería de Igualdade e do Centro de Información á Muller, impleméntase unha política transversal de xénero en todas as actuacións municipais. Desenvolvense programas de sensibilización e promoción da igualdade no ámbito educativo, do emprego, do deporte, da cultura e da sociedade en xeral, dirixidas a promover un cambio de actitude na poboación e a previr comportamentos e crenzas que supoñan un trato discriminatorio cara as mulleres.
 
En definitiva, o Concello do Porriño traballa para construir valores de igualdade e respecto nas relacións persoais. Por isto, esta corporación amosa o seu rexeitamento e condena a concertos como o de Kaydy Cain, que fan apoloxía do machismo e van en contra dos valores que defendemos.
 
 
 
 
 
15/02/2022 in Igualdade

24 mulleres participan na primeira quenda do ano do curso de defensa persoal feminina

Un total de 24 mulleres de diferentes idades participaron hoxe na que foi a primeira quenda do ano do curso de defensa persoal feminina que organiza o Concello do Porriño, coa colaboración do Ministerio de Igualdade, o Pacto de Estado contra a Violencia de Xénero e a Policía Local.

O curso conta con monitores de defensa persoal que, en colaboración con axentes da Policía Local, ensinan ás participantes técnicas de fácil asimilación para repeler os ataques máis habituais.

A concelleira de Igualdade, Carolina González, participou hoxe da clase e ao terminar animou a todas as mulleres a acudir ás seguintes xornadas.  “É unha experiencia enriquecedora e moi práctica para a nosa vida cotiá que nos axuda a estar preparadas para resolver situación de risco”, apuntou a edil.

Para asistir non é preciso ter unas condicións físicas específicas nin rexistro previo. A asistencia é totalmente gratuita e está aberta a que participen mulleres dos concellos da contorna. 

As clases impártense en dúas quendas ao mes, en sábadoalternos, polo que a vindeira será o sábado 29 de xaneiro, como sempre no ximnasio Jovhen Sport de 10h a 12h.

15/01/2022 in Igualdade, Seguridade

O alumnado do IES Ribeira do Louro participa nunha charla sobre agresións sexuais e violencia sexual

O alumnado de 1º curso de bacharelato do IES Ribeira do Louro, en Torneiros, participou hoxe dunha charla informativa sobre agresións e violencia sexual.

Na conferencia, impulsada desde a Secretaría Xeral de Igualdade da Xunta de Galicia e organizada pola concellería de Igualdade,  abordáronse cos alumnos e alumnas do instituto porriñés os estereotipos de xénero, a tipoloxía de violencia sexual, a cultura da violencia, o consentimento, e outros recursos relacionados coas agresións sexuais.

A charla foi impartida por Angélica Mercado Torres, mestra de profesión, especialista en estudios de xénero e políticas de igualdade que conta cunha ampla experiencia en programas a mulleres migrantes e con discapacidade psíquica.

A concelleira de Igualdade, Carolina González, que participou da mesma, salientou que “a violencia sexual é un problema na nosa sociedade que debemos abordar dende todos os ámbitos. O máis importante é a concienciación, a formación e a información dende o ámbito educativo para que as nenas e nenos, mozas e mozos se formen e eduquen nos valores da igualdade e o respecto, e  eles serán nun futuro eses adultos que mostren tolerancia cero a calquera tipo de violencia”.

11/01/2022 in Educación e tecnoloxía, Igualdade

O novo goberno municipal potenciará a atención cidadá e a transparencia, e dedicará unha concellería á terceira idade

 

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS 

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

28/12/2021 in Alcaldía, Benestar, Cemiterios, Cultura e festas, Deportes, Educación e tecnoloxía, Emprego e formación, Igualdade, Limpeza, Medio Ambiente, Mocidade, Novas Tecnoloxías, Parques e xardíns, Patrimonio Municipal, Proxectos Europeos, Seguridade, Servizos sociais, Tráfico, Turismo, Urbanismo, comercio e industria, Vías e obras

25N: actos organizados polo Concello baixo o lema “O amor non é violencia”

 
 
O Concello de Porriño organiza hoxe, dende a Concellería de Igualdade, coa ocasión do 25 de novembro, Día Internacional para a Eliminación da Violencia de Xénero, varias actividades baixo o lema “O AMOR NON É VIOLENCIA”.
 
Esta tarde, a partir das 19:00h, dende a praza do Concello, farase un percorrido por catro camiños violentos, onde poderemos seguir as pegadas e as frases que a moitas mulleres lle acompañan no seu día a día.
Son frases machistas, expresións propias de relacións tóxicas e violentas. As frases, pegadas e o lema irán pintados no chan en cor lila. Até chegar a un panel que nos amosa un amor sa e unha relación de igual a igual entre persoas, onde se pode ver que O AMOR NON É VIOLENCIA.
 
Os murais instaláronse en lugares escuros, aínda que de moito tránsito: calexóns e accesos a aparcadoiros. Aparecen nas imaxes adxuntas.
As catro artistas convidadas para estas intervencións son:
Eva Casais, Gemma Marqués, Tamara Baz e Lorena Arévalo.
Asignarase a cada artista ou colectivo unha temática diferente:
. Percorrido 1. “amor adolescente”, Eva Casais
. Percorrido 2. “amor adulto con fillos”, Gemma Marqués
. Percorrido 3. “amor a unha mesma”, Tamara Baz
. Percorrido 4. “amor entre persoas do mesmo xénero”, Lorena Arévalo.
 
 
CICLO CINEMA 25N
Por outra banda a Concellería de Igualdade tamén organizou para esta tarde, ás 19 horas, unha sesión máis do ciclo Cinema 25N, financiado con cargo aos créditos recibidos do Ministerio de Igualdade, Secretaría de Estado de Igualdade e contra a Violencia de Xénero.
Trátase da proxección do filme “A Fonte das Mulleres”.
No Centro Cultural Municipal, con prazas limitadas.
 
 
 
 
 
 
 
 
 
 
 
 
25/11/2021 in Igualdade

Actos do 25N en Porriño: “O amor non é violencia”

 

Dende a Concellería de Igualdade do Porriño, dentro da campaña” polo 25 de novembro, Día Internacional para a Eliminación da Violencia de Xénero, estanse a desenvolver varias actividades baixo o lema “O AMOR NON É VIOLENCIA”

O mesmo Día Internacional, 25 de novembro, a partir das 19:00h, desde a praza do Concello, faremos un percorrido por catro camiños violentos, onde poderemos seguir as pegadas e as frases que a moitas mulleres lle acompañan no seu día a día.

Son frases machistas, expresións propias de relacións tóxicas e violentas. As frases, pegadas e o lema irán pintados no chan en cor lila. Até chegar a un panel que nos amosa un amor sa e unha relación de igual a igual entre persoas, onde se pode ver que O AMOR NON É VIOLENCIA.

Os murais irán situados en lugares escuros, aínda que de moito tránsito: calexóns, accesos a aparcadoiros…As catro artistas convidadas son:

Eva Casais, Gemma Marqués, Tamara Baz e Lorena Arévalo.

Asignarase a cada artista ou colectivo unha temática diferente:

_Percorrido 1. “amor adolescente”, Eva Casais

_Percorrido 2. “amor adulto con fillos”, Gemma Marqués

_Percorrido 3. “amor a unha mesma”, Tamara Baz

_Percorrido 4. “amor entre persoas do mesmo xénero”, Lorena Arévalo

 

23/11/2021 in Igualdade

Ciclo Cinema 25N no Centro Cultural Municipal

 

A Concellería de Igualdade informa que continúa o ciclo de proxeccións de películas “Cinema 25N”, coa ocasión da conmemoración do Día Internacional da Eliminación da Violencia contra a Muller, programado ao longo do mes de novembro.
As proxeccións desenvólvense no Centro Cultural Municipal, con aforamento limitado, ás 19 horas, dende o pasado 5 de novembro co pase da cinta “O medo”, de Jordi Cadena. Mañá venres 12, é a quenda da película “A maleta de Marta”, de Günther Schwaiger.
As seguintes proxeccións serán o venres 19, “As elixidas” de David Pablos; o xoves 25 de novembro, “A fonte das mulleres” de Radu Mihailean; e o venres 26 de novembro “Te doy mis ojos”, de Icar Bollain, incluída no ciclo de proxeccións de películas “Cinema Galego”, da man de Rebobina Asociación Cultural, os últimos venres de mes.

11/11/2021 in Igualdade

O edificio consistorial, alumeado en rosa para conmemorar o Día Mundial contra o Cancro de Mama

O 19 de outubro celébrase o Día Mundial contra o Cancro de Mama. Por este motivo, este martes, á noitiña, o edificio do Concello do Porriño ten unha iluminación especial en rosa claro, tanto na fachada principal como na lateral.

A OMIX do Porriño xunto coas Concellerías de Educación, e de Cultura e Igualdade, e o Consello Municipal de Infancia e Adolescencia animan a toda a poboación porriñesa a compartir nas redes sociais, a campaña para motivar ás mulleres a realizar autodiagnóstico co cancelo #DiaInternacionaldelCancerdeMama.

O 19 de outubro é unha data que busca sensibilizar e concienciar as persoas de todo o mundo sobre a importancia de realizar un exame de mamas regularmente, coa finalidade de detectar calquera signo ou anomalía. Tamén se pretende facer un recordatorio do compromiso da sociedade contra o cancro de mama.

É recomendable que as mulleres fagan os controis necesarios previstos pola sanidade de cada país, así como manter unha alimentación sa e equilibrada, ademais de facer exercicio físico. Todos estes son factores que reducen considerablemente o risco de padecer este tipo de cancro e, en xeral, calquera cancro.

19/10/2021 in Alcaldía, Cultura e festas, Educación e tecnoloxía, Igualdade, Mocidade

O Concello promove clases de ciberseguridade entre o alumnado porriñés

Lourdes Moure, concelleira de Educación visitou esta tarde o obradoiro sobre ciberseguridade que está a desenvolverse nos centros de ensino secundario porriñeses. A concelleira compartiu actividade con alumnos e alumnas de 3º da ESO no IES Pino Manso.

A concelleira explicou que esta actividade ven motivada polas “novas formas de aprender, crear e comunicarse de xeito que nenas e nenos acceden cada vez máis cedo a dispositivos conectados a Internet. Xa sexa dende o móbil, o ordenador, a tablet ou a videoconsola, se non se forman en ciberseguridade poden correr riscos innecesarios”.

“As ameazas máis habituais nestas idades son o ciberacoso e a ciberviolencia, a suplantación de identidade, as fake news (noticias falsas), as estafas e incluso as adiccións dixitais. Por iso dende o Concello de O Porriño e a OMIX promovemos estas formacións dirixidas a 3º da ESO, para que saquen todo o partido a Internet protexendo a súa integridade física e mental”, engadiu a concelleira Moure Varela.

Trátase dunha actividade escolar das que organiza cada ano a Concellería de Educación coa OMIX do Porriño en colaboración cos centros de ensino do concello. Precisamente Lourdes Moure indicou que o vindeiro mércores 27 de outubro terá lugar a reunión preparatoria coas direccións dos centros educativos para determinar o calendario de actividades de 2022.

19/10/2021 in Alcaldía, Educación e tecnoloxía, Igualdade