Igualdade

Outorgada licenza de obras á empresa que vai xestionar a futura gardería do Polígono da Granxa

A empresa que vai xestionar a futura escola infantil no Polígono Industrial A Granxa dispón de licenza municipal do Concello do Porriño para executar as obras de acondicionamento do local cedido pola Zona Franca. O espazo ten una superficie de 448 metros cadrados e o orzamento estimado das obras é de algo máis de 55.000 euros.

A documentación aportada pola mercantil que dirixe Beatriz Cabaleiro informouse favorablemente e a licenza de obra outorgouse con data de onte, 20 de maio, firmada polo concelleiro responsable de Infraestruturas, Pedro Pereira.

Zona Franca cedeu e entregou as chaves en abril de seis locais na planta baixa do Centro de Servizos en A Granxa onde a firma “Trastes” xestionará una escola infantil con 74 prazas para nenos e nenas de 0 a 3 anos, así como servizos complementarios de 3 a 8 anos.

A futura entrada en funcionamento desta gardería “atenderá unha vella demanda dos empresarios e traballadores dos polígonos industriais do Porriño. Como institucións públicas temos que favorecer e facilitar a conciliación familiar e laboral”, segundo declarou a alcaldesa, Eva García de la Torre.

 

21/05/2021 in Alcaldía, Educación e tecnoloxía, Igualdade, Urbanismo, comercio e industria

Aberta a inscrición para a seguinte proxección do ciclo “Cinema Dirección de Mulleres” coa película “Capitáns de abril”

A Concellería de Cultura informa que está aberto, aínda, ata o xoves 22 de abril o prazo de inscrición para asistir á proxección da película “Capitáns de abril”, programada para o vindeiro venres 23, ás 19 horas, no Centro Cultural Municipal. Estableceuse polo protocolos anti-Covid, un aforamento limitado de 50 persoas.

A actividade está enmarcada no ciclo “Cinema Dirección de Mulleres” que consiste nun espazo cultural aberto onde se oferta cinema á veciñanza porriñesa e da contorna para a divulgación das actividades audiovisuais como expresión artística, segundo explicou Cami Moreira, concelleira responsable das áreas de Cultura e Igualdade.
Vai dirixido ás persoas interesadas en entender a linguaxe audiovisual, sensibilizándoas en distintas temáticas de interese xeral, como son: ecoloxía, feminismo, memoria histórica, medio ambiente, etc., creando un colectivo público que non sexan só espectadores, senón que, co intercambio de opinións e reflexións, construír unha visión crítica.

Ao finalizar cada proxección, como actividade complementaria pero esencial, haberá un foro que propicie o intercambio de opinións, reflexións, ideas, un diálogo sobre a análise do filme en si mesma e da proposta temática, alentado pola asistencia de persoas convidadas relacionadas ou co filme ou coa temática.

Ciclo Cinema, Dirección de Mulleres. Proxección do filme: Capitanes de abril

20/04/2021 in Cultura e festas, Igualdade

A concelleira de Igualdade asistiu no IES Ribeira do Louro ao obradoiro sobre educación afectivo-sexual para adolescentes.

A concelleira de Igualdade, Cami Moreira asistiu esta mañá ao IES Ribeira do Louro onde estaba a desenvolverse unha das sesións do obradoiro sobre educación afectivo-sexual para adolescentes. Impártese en horario lectivo para alumnado dos centros de ensino secundario do Porriño ao longo desta segunda quincena do mes de abril. Trátase dunha actividade concertada co Ministerio de Igualdade do Goberno de España e ao abeiro do Pacto de Estado contra a violencia de xénero.


O enfoque deste obradoiro basease en que na adolescencia as decisións asociadas ao desenvolvemento sexual adoitan ter importantes implicacións para a saúde e a educación, así como para as relacións actuais e futuras.
Amais están os riscos que pode ocasionar a falta de formación emocional e sexual que co acceso a internet, as novas tecnoloxías, aos novos espazos de socialización para a mocidade poden derivar en condutas de ciberviolencia nas parellas adolescentes.
A metodoloxía anovadora deste obradoiro, crea un entorno de interese e colaboración por parte da mocidade, imprescindibles porque parte da premisa de ter en conta o seu punto de vista, as súas opinións, a rapazada é a protagonista.

Obradoiro sobre educación afectivo-sexual para adolescentes “Deseñando unha educación sexual para adolescentes”

16/04/2021 in Igualdade

8M: Conmemoración do Día Internacional da Muller

O Día Internacional da Muller é unha data que se celebra en moitos países do mundo. Cando as mulleres de todos os continentes, a miúdo separadas por fronteiras nacionais e diferenzas étnicas, lingüísticas, culturais, económicas e políticas, únense para celebrar o seu día, poden contemplar unha tradición de non menos de noventa anos de loita en prol da igualdade, a xustiza, a paz e o desenvolvemento.

O Día Internacional da Muller refírese ás mulleres correntes como artífices da historia e afunde as súas raíces na loita plurisecular da muller por participar na sociedade en pé de igualdade co home. Na antiga Grecia, Lisístrata empezou unha folga sexual contra os homes para poñer fin á guerra; na Revolución Francesa, as parisienses que pedían “liberdade, igualdade e fraternidade” marcharon cara a Versalles para esixir o sufraxio feminino.

A idea dun día internacional da muller xurdiu ao final do século XIX, que foi, no mundo industrializado, un período de expansión e turbulencia, crecemento fulgurante da poboación e ideoloxías radicais.

A Carta das Nacións Unidas, asinada en 1945, foi o primeiro acordo internacional para afirmar o principio de igualdade entre mulleres e homes. Desde entón, a ONU axudou a crear un legado histórico de estratexias, normas, programas e obxectivos acordados internacionalmente para mellorar a condición das mulleres en todo o mundo.

Cos anos, a ONU e os seus organismos técnicos promoveron a participación das mulleres en condicións de igualdade cos homes no logro do desenvolvemento sustentable, a paz, a seguridade e o pleno respecto dos dereitos humanos. O empoderamento da muller segue sendo un elemento central dos esforzos da Organización para facer fronte aos desafíos sociais, económicos e políticos en todo o mundo.

05/03/2021 in Alcaldía, Igualdade

O Concello renovou a súa adhesión ao protocolo “Vioxén”

Pedro Pereira, como alcalde accidental, asinou co coronel Simón Venzal,  xefe da Comandancia da Garda Civil en Pontevedra, e en presenza de Maica Larriba, subdelegada do Goberno na provincia, a renovación da adhesión do Concello do Porriño a o protocolo “Vioxén”.  Trátase do programa de vixilancia e protección integral para as mulleres vítimas de violencia de xénero. O protocolo establece a colaboración entre a Policía Local do Porriño e as outras forzas e corpos de seguridade do Estado.

Antes da sinatura da renovación do protocolo, a subdelegada do Goberno informou de que os casos activos de vítimas de violencia de xénero baixo este sistema de vixilancia son 69 no partido xudicial do Porriño: 34 correspondentes a Mos, 24 a Porriño e 11 a Salceda.

Maica Larriba definiu que este modelo de colaboración entre administracións para protexer ás vítimas de violencia de xénero “é un bó exemplo de cogobernanza”.  “Para o Goberno que represento, a loita contra a violencia de xénero é unha prioridade e quero transmitir a mensaxe a todas as mulleres de que non están soas”, dixo a subdelegada.

Pola súa banda, o alcalde accidental agradeceu “este eficaz modelo de cooperación no que debemos empregar todos os recursos necesarios e que nunca será suficiente mentres haxa unha muller vítima de violencia de xénero”, engadiu Pedro Pereira.

No acto, celebrado este mediodía no salón de plenos do concello porriñés, tamén participaron as concelleiras de Seguridade, Lourdes Moure e Igualdade, Cami Moreira;  a xefa da unidade “Viogén” na provincia Manuela Vilaboy; mandos do cuartel da Garda Civil do Porriño e o xefe accidental da Policía Local.

18/02/2021 in Alcaldía, Igualdade

O Porriño súmase á celebración do Día Internacional da Muller e da Nena na Ciencia

O Concello do Porriño súmase este xoves 11 de febreiro á celebración do Día Internacional da Muller e da Nena na Ciencia, baixo o lema (en inglés) “No more Matildas”.

A ONU declarou esta data coa finalidade de lograr o acceso e a participación plena e equitativa na ciencia para as mulleres e as nenas, e ademais, acadar a igualdade de xénero e o empoderamento das mulleres e nenas.

A Biblioteca Municipal do Porriño e a Concellería de Igualdade súmanse a esta celebración co obxectivo de difundir a labor científica das mulleres e fomentar a vocación nas nenas e adolescentes da nosa comunidade.

Para iso, a Biblioteca e a Concellería ofrecen información sobre as inicitivas existentes neste ámbito, e unha serie de lecturas infantís seleccionadas da colección dixital da Biblioteca, todas elas accesibles a través da plataforma de ebooks, GaliciaLe.

https://bibliotecadoporrino.com/2021/02/10/dia-internacional-da-muller-e-a-nena-da-ciencia/

Ademais na páxina web de Cultura (ecultura.net) hai un enlace directo coa páxina web da Biblioteca (bibliotecadoporrino.com) para ler en streaming ou descargar, debido as actuáis restricións coa Covid.

https://ecultura.net/dia-internacional-da-muller-e-a-nena-da-ciencia-iniciativas-e-lecturas/

 

10/02/2021 in Alcaldía, Igualdade

Concentración silenciosa ante o Concello polo crime machista en Gondomar

 

A alcaldesa, concelleiros do goberno municipal e de todos os grupos políticos da corporación porriñesa participaron hoxe a mediodía nunha concentración silenciosa en repulsa polo crime machista de onte en Gondomar.
Os representantes municipais do Porriño expresaron deste xeito a súa condena polo asasinato de Soledad Rey Valverde, acoitelada polo seu marido no domicilio familiar.

03/12/2020 in Alcaldía, Igualdade

O Porriño conmemora o 3 de decembro, Día das Persoas con Discapacidade

A casa consistorial do Concello do Porriño, luce desde hoxe  unha lona realizada polas persoas usuarias de ACEESCA coa ocasión de conmemorarse o 3 de decembro o Día das Persoas con Discapacidade. Con este motivo, mañá iluminaremos a fachada do concello en verde.

Neste ano, 2020, o lema do Día das Persoas con Discapacidade, é “Un día para todos” porque, segundo preconiza unha declaración institucional do Concello, “a discapacidade forma parte da condición humana, xa que todas as persoas, nalgún momento da nosa vida, podemos experimentar unha discapacidade temporal ou permanente;  e a sociedade ten que estar preparada para iso”.

“As persoas con discapacidade son a minoría máis grande do mundo e adoitan ter máis dificultades que outros grupos a todos os niveis, especialmente no acceso á educación, ao mercado laboral e ás dificultades económicas”, engade a declaración municipal.

“E isto débese á falta de recursos que lles faciliten a vida, como o acceso ao transporte ou o acceso á información, en caso de discapacidade sensorial. Todo isto, xunto coa discriminación social que ás veces existe na súa contorna e a falta dunha lexislación adecuada, dificultan a vida das persoas con discapacidade. Amais, as persoas con discapacidade son máis vulnerables á violencia.  As nenas e os nenos, con discapacidade son 4 veces máis propensas a ser vítimas de violencia, do mesmo xeito que as persoas adultas con problemas mentais”, conclúe a declaración institucional.

02/12/2020 in Alcaldía, Benestar, Cultura e festas, Igualdade, Servizos sociais

#25N: A proxección do filme “Trote” rematará este venres a programación da Concellería de Igualdade

A proxección da película galega “Trote”, dirixida por Xacio Baño, que terá lugar este venres 27, no Centro Cultural Municipal, rematará a programación da Concellería de Igualdade coa ocasión do #25N Día Internacional contra a violencia de xénero.

“Trote” relata o rol da muller como coidadora que non atopa o xeito de saír dun ambiente opresivo

Haberá dous pases (18,30 e 20,30). Cada un deles cun aforo restrinxido de 30 persoas que deberán inscribirse previamente por correo electrónico no enderezo cultura@oporrino.org
Aínda está aberta a inscrición.
Más información nesta ligazón


http://ecultura.net/proxeccion-do-filme-trote-de-xacio-bano/

26/11/2020 in Igualdade