Emprego e formación

O alumnado-traballador de carpintería do “Porriño Labora” coñece o CIFP Valentín Paz Andrade

O alumnado-traballador da especialidade de Carpintería do obradoiro de emprego “Porriño Labora” visitou hoxe as instalacións do CIFP Valentín Paz Andrade para coñecer polo miúdo a oferta formativa deste centro de formación profesional na súa modalidade.

Durante a visita estiveron acompañados polo alcalde, Alejandro Lorenzo, e a concelleira de Emprego e Formación, Rosario Costas, que xunto con eles participaron dunha mesa redonda co servizo de orientación do centro para resolver as súas dúbidas. De seguido, realizaron unha visita ás aulas e talleres de formación das que dispón o centro na familia profesional de madeira nas especialidades de “Carpinteria e Moble”, “Instalación e Amoblamento” e “Deseño e Amoblamento”.

“É de vital importancia que, ademais de formarse para obter os seu certificados de profesionalidade e acumular experiencia profesional, coñezan as diferentes opcións coas que contan para ampliar a súa formación e especialización”, explicou o alcalde, “Queremos que os/as participantes no obradoiro conten coas ferramentas necesarias para consolidar a súa carreira profesional no ámbito que elexiron”.

Son dez os alumnos/as-traballadores/as que participan no Obradoiro de Emprego “Porriño Labora” na especialidade formativa de carpintería. Todos eles, contan cun contrato de formación e aprendizaxe de nove meses de duración e, á vez que se forman, levan a cabo diferentes proxectos. Unha vez finalizado o obradoiro os alumnos e alumnas obterán os certificados profesionais de “Mecanizado de madeira e derivados”, “Traballos de Carpintería e Moble” e “Aplicación de barnices e lacas en elementos de carpintería e moble”.

 

26/05/2022 in Emprego e formación

43 persoas comezan a traballar hoxe no Concello do Porriño

43 traballadores/as incorporáronse hoxe ao cadro de persoal do Concello do Porriño, onde desenvolverán as súas funcións a xornada completa durante seis meses.

A primeira hora da mañá, o alcalde, Alejandro Lorenzo, e os concelleiros Rosario Costas, Ramón Porto e Jose Carlos González, déronlle a benvida ao Concello na súa primeira xornada laboral.

“Agardo que estes meses de traballo sexan enriquecedores para todos vós, que vos sirvan para gañar experiencia, mellorar o voso perfil profesional e abrirvos novas oportunidades”, apuntou o alcalde. Lorenzo recordou que estas contratacións non só permiten incorporar ao mundo laboral a estas persoas que se atopaban en búsqueda activa de emprego, senón tamén prestar en condicións servizos que non se estaban a prestar de maneira axeitada nos últimos anos e impulsar novas iniciativas. “Co voso traballo contribuiredes a poñer en marcha de novo O Porriño”, concluíu o rexedor.

Para facer posible este reforzo de persoal o Concello fixo a maior aportación de fondos da súa historia, reafirmando o seu compromiso coa xeración de emprego. A contratación destas 43 persoas supuxo unha inversión total de 450.489 euros, dos que o Concello aportou 224.061 euros e os restantes proceden da liña 3 do Plan Concellos 2022 da Deputación de Pontevedra.

Os traballadores/as prestarán servizo nos diferentes departamentos municipais. No de Obras incorpóranse dous carpinteiros, un soldador, tres albaneis, un fontaneiro e un tractorista/condutor de grúa. No departamento de Parques e Xardíns traballarán doce peóns forestais, na área de Servizos Sociais un auxiliar administrativo, na Unidade Asistencial a Drogodependentes un auxiliar de enfermería e no de Cultura dous auxiliares administrativos.

Un técnico exercerá no departamento de Turismo e outro o fará no de Novas Tecnoloxías. Tamén se incorporan hoxe seis conserxes nas áreas de Deportes, Mercados, Persoal e Cultura e dous orientadores laborais que traballarán en Porremprego.

30/03/2022 in Alcaldía, Emprego e formación

O Porriño aproba a maior aportación municipal da súa historia para a contratación de persoal

  • O pleno aprobou inicialmente reservar preto de 225.000 euros para contratar a 43 persoas desempregadas ao abeiro do Plan Concellos
  • A sesión abriuse coa renuncia da concelleira Blanca Francés 

 

O pleno da corporación local aprobou hoxe, cos votos a favor do Goberno Local e EU SON do Porriño e a abstención do resto dos grupos, a maior aportación municipal da súa historia para a contratación de persoal.

O custe do programa laboral deseñado polo executivo para a contratación de 43 persoas desempregadas ao abeiro da liña 3 do Plan Concellos roza o medio millón de euros: 450.489 euros, dos cales 226.489 corresponden á solicitude aprobada xa polo ente provincial. Os 224.061 restantes corren a cargo do Concello, que hoxe aprobou de maneira inicial a modificación orzamentaria precisa para dispoñer dese crédito. 

Estas traballadoras e traballadores integraranse nos diferentes servizos e departamentos municipais:

 

  • Obras:  dous oficiais de primeira  carpinteiro, un oficial de primeira soldador, tres oficiais de primeira albaneis, sete peóns de obra pública, dous oficiais de primeira electricista, un oficial de primeira fontaneiro e un oficial de primeira tractorista/conductor de grúa.
  • Parques e Xardíns:  doce peóns forestais.
  • Unidade Asistencial a Drogodependentes: un auxiliar de enfermería.
  • Servizos Sociais: un auxiliar administrativo.
  • Cultura: dous auxiliares administrativos.
  • Turismo: un titulado na diplomatura ou grao de Turismo.
  • Novas Tecnoloxías: un técnico en informática.
  • Emprego e formación: dous orientadores laborais.
  • Deportes, Mercados e Cultura: seis conserxes.

 

 

15/02/2022 in Emprego e formación

O Alcalde comeza en CITIC Censa a rolda de contactos para mellorar a empregabilidade das persoas desempregadas no Porriño

O alcalde do Porriño, Alejandro Lorenzo, acompañado pola concelleira de Emprego e Formación, Rosario Costas, visitou esta mañá as instalacións de CITIC Censa para coñecer de primeira man a actividade da factoría e establecer posibles vías de colaboración entre a empresa e o Concello.

Durante a visita, os representantes municipais estiveron acompañados polo Director Xeral da firma, Juan J. Agulla, a Directora Financieira e Vice Directora Xeral, Ana Alonso, e a Directora de Recursos Humanos, Brenda Senra, quenes transmitiron a súa perspectiva económica de crecemento e a necesidade de persoal especializado.

“Temos plena carga de traballo e o noso principal problema é a falta de persoal cualificado para incorporar”, explicou Juan J. Agulla, “A formación é o noso cabalo de batalla e a colaboración co concello sería beneficiosa para ambas partes”.

Neste sentido, o rexedor apuntou que precisamente establecer vías de colaboración en materia de formación e emprego é o fin da rolda de visitas ás empresas do Porriño que hoxe iniciaron en CITIC Censa.

“O noso obxectivo é detectar as necesidades de recursos humanos e a formación específica que requiren as empresas para poder deseñar acción formativas acordes ás demandas do noso tecido empresarial”, explicou Lorenzo, “Así poderemos ofrecer aos demandantes da bolsa de emprego posibilidades reais de inserción laboral”.

“Pretendemos impulsar a nosa bolsa de emprego e volver a ser un referente para as persoas do Porriño que se atopan en situación de desemprego”, apuntou a edil, “Para iso é imprescindible a coordinación do servicio municipal coas empresas dos nosos polígonos industriais”.

Sobre CITIC-Censa

 Con máis de 50 anos de historia CITIC Censa é unha empresa de calderería pesada que desenvolve a súa actividade en mercados como minería, cemento, enerxías renovables, petróleo, gas e petroquímica.

É un referente mundial na fabricación de equipos de calderería pesada para o sector mineiro e cementeiro que exporta o 100% dos seus productos. Na actualidade conta con 200 empregados e un volumen de facturación de 30 M de euros.

09/02/2022 in Emprego e formación

O Porriño propón a contratación de 43 persoas desempregadas para apoiar os servizos municipais

O Concello do Porriño vén de presentar un plan de apoio á prestación de servizos municipais que permitirá a contratación de 43 persoas desempregadas que desenvolverán función nos diferentes departamentos municipais.

“Os cidadáns do Porriño cumpren co seu deber e pagan os seus impostos e o Concello debe cumprir co seu e prestar en condicións os servizos públicos”, explicou o Alcalde, Alejandro Lorenzo, “Moitos destes servizos non se estaban a prestar de maneira axeitada,  a situación que nos atopamos é nefasta e o persoal co que contamos insuficiente. Por iso deseñamos este plan de reforzo do persoal que nos permitirá non só poner a funcionar o Concello e impulsar novas iniciativas, senón tamén incorporar ao mundo laborar a 43 persoas que neste momento se atopan en situación de desemprego”.

A tal fin, o Concello fará a maior aportación de fondos que se fixo ata o de agora. O custe deste programa laboral roza o medio millón de euros: 450.489 euros, dos cales 226.489 corresponden á solicitude cursada ao ente provincial e os 224.061 corren a cargo do Concello.

As persoas que se van contratar terán que estar inscritas no Servizo Público de Emprego que será o encargado de facer a preselección, por iso é importante que todos aqueles interesados se inscriban xa nas diferentes ocupacións para cando se presenten as correspondentes ofertas de emprego.

Impulso dos servizos municipais

 Os traballadores integraranse nos diferentes servizos e departamentos municipais. No departamento de Obras contrataranse a dous oficiais de primeira  carpinteiro, un oficial de primeira soldador, tres oficiais de primeira albaneis, sete peóns de obra pública, dous oficiais de primeira electricista, un oficial de primeira fontaneiro e un oficial de primeira tractorista/conductor de grúa.

Entre as funcións que desempeñarán neste departamento está o mantemento e reparación de parques infantís e instalación deportivas, construcción e reparación de beirarrúas, mantemento de instalacións municipais, transporte de material ou roza.

No caso do departamento de Parques e Xardíns incorporaranse doce peóns forestais, que desempeñarán tarefas de rozado e retirada de vexetación e maleza nos viais das parroquias e traballos de recollida de entullos e o mantemento e mellora dos xardíns.

Un auxiliar de enfermería dará respaldo á Unidade Asistencial a Drogodependentes, un auxiliar administrativo ao Departamento Servizos Sociais e dous para o Departamento de Cultura que desenvolverán función de información e atención aos usuarios da Biblioteca municipal.

Tamén se contratará un titulado na Diplomatura ou Grao de Turismo para traballar no desenvolvemento do Departamento de Turismo e un técnico en informática que se precisa no Departamento de Novas Tecnoloxías.

Posta en marcha de Porremprego

No tocante ao Departamento de Emprego e Formación proponse a contratación de dous orientadores laborais. Un dos piares básicos da xestión deste novo goberno será a posta en marcha de novo de Porremprego:  restablecer as acción formativas e as relacións co tecido empresarial da contorna e a bolsa de emprego local, como ferramenta clave para aumentar as posibilidades de empregabilidade.

Conserxes para a praza de abastos, aula de estudio e pavillóns municipais

 Incorporaranse seis conserxes aos departamentos de Deportes, Mercados, Persoal e Cultura que se encargarán da apertura, peche, vixilancia e atención ao cidadá dos pavillóns municipais, o Concello, aula de estudio e a Praza de Abastos.

 

 

 

 

 

 

 

 

25/01/2022 in Emprego e formación, Limpeza, Novas Tecnoloxías, Parques e xardíns, Parroquias, Servizos sociais, Turismo, Urbanismo, comercio e industria, Vías e obras

O Porriño recupera un dos seus tesouros naturais: o Paseo do Louro

O Goberno Municipal do Porriño, que preside Alejandro Lorenzo, vén de poñer en marcha un plan de  recuperación e acondicionamento do paseo do río Louro a fin de recuperar este espazo como a alternativa verde de lecer saudable.

A tal fin, o rexedor anunciou hoxe que xa se traballa na licitación do mantemento e limpeza da senda fluvial. “O paseo do Louro é un lugar moi frecuentado polos veciños e veciñas para facer deporte ou pasear ao carón do río e é esencial que estea en boas condicións para poder disfrutar da contorna natural que ofrece”, explicou Lorenzo, “É o pequeno pulmón verde do centro urbano e neste momento atópase en moi malas condicións, por falta de mantemento, limpeza e iluminación”.

No marco deste plan de recuperación, iniciase tamén o acondicionamento funcional e estético da senda que discorre ao carón do río e das súas pontes. Unha labor que levarán a cabo os 10 alumnos/as traballadores/as da especialidade de carpintería do Obradoiro de Emprego Porriño Labora, promovido polo Concello do Porriño a través dunha subvención da Xunta de Galicia.

O rexedor, acompañado pola concelleira de Emprego, Rosario Costas,  persoal do Obradoiro de Emprego e técnicos municipais, visitou hoxe a zona para valorar sobre o terreo as accións que se van a acometer.

“Realizaranse reparacións no valado de madeira do paseo, repararemos os tramos das pontes que se atopan en mal estado e recuperaranse os bancos  que hai na senda que están deteriorados”, apuntou o Alcalde, “Tamén se ampliarán tramos con pavimento de madeira para poder pasear con comodidade, en definitiva, arranxaranse todos os elementos que se atopan na senda respectando a contorna natural”.

Pola súa banda, Rosario Costas, quixo destacar que estes obradoiros de emprego son “unha moi boa oportunidade para as persoas que carecen de formación xa que, se obteñen por un lado formación certificada con Certificados de Profesionalidade válidos en todo o país e á vez perciben un soldo”.  

18/01/2022 in Emprego e formación, Medio Ambiente

O novo goberno municipal potenciará a atención cidadá e a transparencia, e dedicará unha concellería á terceira idade

 

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS 

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

28/12/2021 in Alcaldía, Benestar, Cemiterios, Cultura e festas, Deportes, Educación e tecnoloxía, Emprego e formación, Igualdade, Limpeza, Medio Ambiente, Mocidade, Novas Tecnoloxías, Parques e xardíns, Patrimonio Municipal, Proxectos Europeos, Seguridade, Servizos sociais, Tráfico, Turismo, Urbanismo, comercio e industria, Vías e obras

Entrega de diplomas do Plan Municipal de Formación 2021 para persoas desempregadas

Pedro Pereira, alcalde accidental, e David Alonso, concelleiro de Emprego, entregaron hoxe, no Multiusos de Torneiros, 69 diplomas aos participantes que realizaron os cursos do plan municipal de formación de persoas desempregadas que o Concello do Porriño realizou neste ano. 2021.

 

En total, realizáronse seis cursos de formación para: manipuladores de alimentos; estacións de servizo; persoal de almacén; limpeza industrial; busca activa de emprego e electromecánica básica.

Todos estes cursos de formación, organizados pola Concellería de Emprego, foron financiados con fondos da Deputación de Pontevedra.

Precisamente esta semana, a Concellería de Emprego difundiu que o paro descendeu en Porriño en preto dun milleiro de persoas na última década segundo reflicten as estatísticas oficiais. O concelleiro Alonso vencellou esa dinámica positiva co “esforzo que está a realizar o Concello de Porriño cos programas de formación como o que rematou esta semana en Porremprego”.

 

17/12/2021 in Alcaldía, Emprego e formación

O desemprego descendeu en Porriño en preto dun milleiro de persoas na última década

A Concellería de Emprego e Promoción Económica que dirixe David Alonso fixo público un balance sobre a evolución do paro no Porriño na última década. Os datos indican que entre 2011 e 2021, preto dun milleiro de persoas en Porriño abandonaron as listas do paro e conseguiron traballar.

En concreto en 2011, o número de parados rexistrados en Porriño era de 2.311 desempregados, namentres que en 2021 (con datos ata 30 de novembro) é de 1.391 desempregados.

Como se pode apreciar no gráfico adxunto, o peor dato de paro anual rexistrouse no Porriño en 2013 cando se alcanzou o teito con 2.649 desempregados. A tendencia a partir de 2014 comezou a mellorar e só tivo unha ruptura en 2020, debido á pandemia, cando pasou a 1.713. Pola contra, este 2021 foi un ano de manifesta recuperación, con continuos descensos do número de parados de xaneiro a novembro, como acreditan os datos do Instituto Galego de Estatística e Consellería de Emprego da Xunta de Galicia.

O concelleiro David Alonso subliñou a súa satisfacción polos datos e “congratulámonos de que as accións realizadas polo noso departamento están a dar os seus froitos. Alonso Bargiela lembrou que decidirá dotar con máis persoal ao departamento para as tarefas de orientación laboral e prospección.

O concelleiro tamén valorou a importancia que están a ter os programas de formación como o que remata esta semana en Porremprego coa entrega de diplomas aos participantes que realizarán o venres o alcalde accidental, Pedro Pereira e o propio David Alonso aos participantes nos cursos de estacións de servizo, manipulador de alimentos, mozo de almacén, busca activa de emprego, básico de limpeza industrial e electromecánica básica.

Alonso tamén destacou a labor que fai “Porriño Accede”, o programa de prospección e formación municipal, que organiza cursos de formación con prácticas en empresas e que leva atendidos a 93 usuarios/as no que vai de ano, acadando a inserción laboral de 63 persoas en empresas do Porriño.

15/12/2021 in Emprego e formación

Os 20 alumnos do obradoiro “Porriño Labora” formaranse en carpintería e construción e traballarán na mellora do Paseo do Louro e a antiga escola de Covelo-Atios

 

O Concello do Porriño informa do comezo dun novo obradoiro de emprego que leva o nome de “Porriño Labora”. O Concelleiro de Emprego e Formación David Alonso, deu a benvida ao equipo directivo e docente e aos 20 alumnos que se formarán nas especialidades de Carpintería e Construción.

No mes de setembro a Consellería de Emprego e Igualdade da Xunta de Galicia concedíalle unha axuda de 346.096 € ao Concello do Porriño para a posta en funcionamento deste obradoiro “Porriño Labora”.

O plan de formación é o seguinte:
-Na especialidade de CARPINTERÍA: traballarán no acondicionamento funcional e estético do Paseo do Río Louro. Realizaranse reparacións no valado de madeira existente no paseo, nos tramos das pontes en mal estado, recuperaranse os bancos existentes deteriorados polo paso de tempo e o vandalismo; e nos tramos existentes con pavimento de madeira.

-Na especialidade de CONSTRUCIÓN: realizarán a súa formación traballando na reforma da antiga escola de Covelo na parroquia de Atios, que está a realizarse en tres fases, debido á complexidade da obra. Nesta fase, os alumnos de “Porriño Labora” van desenvolver traballos de instalación do saneamento e os aparatos sanitarios, a instalación de toda a fontanería, a instalación de ventilación e dun sistema de climatización, incluíndo os condutos de aire. Tamén van rematar os traballos pendentes no interior do edificio consistentes na instalación do falso teito e pintado das zonas necesarias, así como o revestimento e pintado no exterior do inmoble.

 

31/10/2021 in Emprego e formación