Emprego e formación arquivos - Páxina 3 de 23

O Polo de Emprendemento e Apoio ao Emprego do Porriño estará activo no último trimestre do ano

O alcalde Alejandro Lorenzo acompañou hoxe ao secretario xeral de Apoio ao Emprego, Traballo Autónomo e Economía Social, Pablo Fernández, nunha visita ás instalacións desta oficina situada na rúa Ramiráns

Porriño albergará un dos 15 polos de emprendemento e apoio ao emprego postos en marcha pola Xunta de Galicia antes de que remate 2023. Actualmente están operativos oito e o da capital da Louriña sería o segundo na provincia, que abriría as súas portas a partir de outubro, durante o último trimestre do ano. Así o aseguraba esta mañá o secretario xeral de Apoio ao Emprego, Traballo Autónomo e Economía Social, Pablo Fernández, nunha visita á vila na que estivo acompañado polo alcalde, Alejandro Lorenzo e na que puido comprobar o avance das obras para a posta en marcha desta oficina situada no número 9 da rúa Ramiráns, no caso urbano porriñés.

O obxectivo desta rede é impulsar e consolidar proxectos de emprendemento que teñan unha vinculación coa contorna, e na que o usuario atopará acompañamento continuado, unha metodoloxía común validada e adaptada a cada proxecto e titorización con profesionais de primeiro nivel.

“É unha gran nova para Porriño poder contar un espazo que integre todas as ferramentas que existen na actualidade para apoiar as iniciativas emprendedoras, xa que estas son clave para fortalecer a economía local”, apuntou o alcalde, Alejandro Lorenzo, “Apostar polo emprendemento é apostar polo futuro”.

A Rede de polos de emprendemento e apoio ao emprego está dinamizando o territorio a través da creación de emprego de calidade e do asentamento da poboación. Así, presta asesoramento individualizado ás persoas emprendedoras de Galicia en calquera fase que se atope o seu proxecto empresarial, de principio a fin. Nese senso, dos case 500 proxectos asesorados ata o de agora, máis de 400 atópanse activos.

O do Porriño será o Polo de emprendemento Pontevedra Leste e Sur, sumándose así ao de Silleda, Pontevedra Norte e Rías Baixas, cuxa área xeográfica de actuación son as comarcas do Deza, Caldas e O Salnés. Nestes centros ofrécense, entre outros, servizos de información sobre oportunidades de emprendemento, asesoramento personalizado, espazos de traballo temporal e networking, captación de investimento e financiamento e orientación, asesoramento e recursos físicos. As persoas usuarias, ademais, poderán acceder a convocatorias anuais de axudas para a consolidación do seu investimento e a xeración de postos de traballo.

24/08/2023 in Emprego e formación

O Concello do Porriño duplicará a axuda anual a ACEESCA

O Concello do Porriño duplicará no 2024 a súa axuda anual á Asociación de Apoio a Persoas con Diversidade Intelectual ACEESCA. Así o anunciou hoxe o alcalde, Alejandro Lorenzo, no acto de presentación do proxecto da Escola Profesional Aceesca que se celebrou nas súas instalacións no polígono industrial de As Gándaras.

Así, a achega municipal a esta entidade social pasará de 10.000 euros anuais a 20.000, para facilitar o labor social que desempeñan no Porriño e en moitos concellos da contorna dende hai xa catro décadas.

“O traballo que realizan é imprescindible e permite que as veciñas e veciños do Porriño teñan a oportunidade de avanzar cara a plena inclusión”, destacou o rexedor, “Por iso contarán sempre co respaldo do Concello no que precisen. Asegurar que se cumpran os dereitos das persoas con diversidade é tamén unha aposta de futuro, xa que todas e todos somos membros activos desta sociedade”.

A primeira escola profesional adaptada de Galicia está no Porriño: ESCOLA PROFESIONAL ACEESCA

Lorenzo puxo en valor a importancia do proxecto da Escola Profesional que hoxe se presentaba ao tecido empresarial do Porriño salientou que “permitirá romper moitas barreiras que separan ás persoas con diversidade do seu dereito a traballar”.

Cabe destacar neste sentido que a Formación Dual Adaptada, que se impartirá nestas instalacións, é a fórmula máis acaída para capacitar ás persoas con discapacidade para o seu acceso ao mercado e así o demostra a experiencia colleitada por Aceesca dende a posta en marcha do seu proxecto piloto en 2019.

Os alumnos/as combinan dende o primeiro día formación no posto de traballo cun contrato remunerado a media xornada, baseado na metodoloxía aprender-facendo.

Aceesca conta dende o ano 2006 cun centro especial de emprego, Aceesca Emprego, e agora preséntase a nova marca do mesmo, LUME, cuxas principais actividades productivas son a Xardinería e a Limpeza e que na actualidade da traballo a 60 persoas.

Ante a imposibilidade de espacio para levar a cabo a variedade de especialidades formativas que require o mercado laboral, o Concello do Porriño cedeu un terreo no polígono de As Gándaras de 9000 m2 para a construción da Escola Profesional Aceesca. As instalacións contan cunha superficie construída aproximada de 3.000 m2, ademais da zona destinada á agrocompostaxe.

A primeira fase estará finalizada a mediados de 2024, podendo trasladarse xa a actividade actual, e quedando tan só pendente a zona de Restauración para unha segunda fase. O obxectivo é que estea finalizado a principios do 2025.

28/06/2023 in Alcaldía, Benestar, Emprego e formación

21 novos traballadores reforzan o cadro de persoal municipal

O Concello do Porriño incorporou hoxe a 21 traballadoras e traballadores que desenvolverán funcións nos diferentes servizos municipais.

Trátase concretamente de un oficial de carpintería, un de soldadura, un de albanelería, un tractorista-condutor con guindastre e dous peóns de obra pública para o Departamento de Obras; oito peóns forestais para o Departamento de Parques, xardíns e limpeza; un auxiliar de enfermería para a Unidade Asistencial de Drogodependencias (UAD) e seis conserxes para diferentes departamentos municipais.

Estas contratacións efectuáronse con cargo ao Plan Concellos 2023 da Deputación de Pontevedra e o Concello do Porriño fai unha aportación de preto de 50.000 euros.

O alcalde, Alejandro Lorenzo, recibiunos hoxe para darlles a benvida ao seu novo posto de traballo. “Temos moito que facer e o voso traballo será esencial para prestar un mellor servizo á veciñanza así que benvidos a este equipo a todas e todos”, apuntou o alcalde que ademais os animou a “esta oportunidade, non só para adquirir experiencia, tamén para sumar coñecementos que sen dúbida vós serán de axuda na vosa carreira profesional”.

28/02/2023 in Emprego e formación

O Porriño pon en marcha un plan de formación do que se beneficiarán máis de 500 persoas desempregadas

O Concello do Porriño anunciou hoxe a posta en marcha do dun Plan formativo para o presente ano. “Reactivar o servizo municipal de emprego foi dende o principio unha cuestión prioritaria, xa que o é para os porriñeses e porriñesas que se atopan en situación de desemprego”, apuntou o alcalde, Alejandro Lorenzo, “O Concello debe ser tamén un motor de creación de emprego no municipio e para iso é necesario apostar pola formación da veciñanza nos eidos que demandan os principais sectores produtivos e tamén acompañalos e asesoralos no proceso de procura de emprego”.

Baixo esta premisa, o Concello vén de aprobar un novo Plan de Formación para o 2023 que dará cobertura as necesidades esixidas polas empresas, dando a oportunidade a máis de 500 persoas integrantes da Bolsa de Emprego de formarse en Manipulación de Carretillas Elevadoras, Almacenaxe e Picking, Produción en Automoción, Limpeza Industrial entre outras especialidades.

O vindeiro luns comezarán a impartise as primeiras especialidades coa posta en marcha dun Curso práctico de Manipulación de Carretillas Elevadoras, homologado conforme a normativa UNE, e formación para a obtención Carné de Manipulación de Alimentos. Todas as persoas interesadas en inscribirse no Plan de Formación deberán formalizar a súa inscrición de forma presencial nas instalacións de Porremprego en horario de 9 a 14h.

Reactivación de Porremprego

A Concellería de Emprego e Formación do Concello do Porriño, que dirixe Rosario Costas, pechou o ano con 1.562 usuarios activos na súa bolsa de emprego. Unha cifra que acredita a capacidade de resposta do servizo municipal nun momento no que o paro no Porriño cae a cifras históricas, xa que o municipio rematou o 2022 con 1.379 persoas desempregadas, o dato máis baixo dos últimos dez anos.

Cabe destacar neste sentido que Porremprego se atopaba practicamente sen actividade a finais do 2021, xa que non existía máis que un Técnico de Orientación Laboral ao servizo do Concello que ademais combinaba as atencións do Servizo de Emprego Público de Galicia (SPEG) coas sesións de asesoramento da Bolsa Municipal de Emprego.

“Esta desatención do servizo conlevou a baixa de 5.221 usuarios. Co fin de reactivalo, procedemos á contratación de dous orientadores adicionais que, xunto co técnico do SPEG, analizaron a situación de cada unha das persoas inscritas en situación de baixa para retomar as sesións de asesoramento”, explicou a concelleira, “Deste xeito conseguimos duplicar o número de usuarios coa tarxeta activa en apenas un ano, pasando de 825 a 1.562”.

Así mesmo, os técnicos de orientación laboral realizaron un total de 336 novas inscripcións de persoas usuarias e 1.561 sesións de asesoramento.

No que respecta o funcionamento da Aula CEMIT, financiada pola Axencia para a Modernización Tecnolóxica de Galicia para o desenvolvemento de accións para a inclusión dixital da cidadanía, impartíronse 804 horas de formación das que se beneficiaron 1.664 persoas.

O plan de acción da concellería de Emprego puxo o foco tamén no emprendemento, coa próxima posta en marcha do Polo de Emprendemento que ofrecerá, entre outros, servizos de información sobre oportunidades de emprendemento, asesoramento personalizado, espazos de traballo temporal e networking, captación de investimento e financiamento e orientación, asesoramento e recursos físicos. As persoas usuarias, ademais, poderán acceder a convocatorias anuais de axudas para a consolidación do seu investimento e a xeración de postos de traballo.

O impulso dado polo novo executivo tamén se centrou no eido da formación, poñendo en marcha múltiples iniciativas sociolaborais nas que participaron un total de 270 persoas: Xornadas Técnicas en colaboración con importantes empresas do sector do metal como CITIC HIC Gándaras Censa, ou do sector da automoción como GRUPO COPO, BENTELER, ou SERVEO; formación en manexo de Carretillas Elevadoras, charlas ou obradoiros prácticos en técnicas de procura de emprego, así como distintas accións formativas en novas tecnoloxías.

As accións executadas polo departamento concluíron cun total de 137 insercións laborais, das cales 44 foron tramitadas directamente pola Axencia Local de Colocación a partir das demandas realizadas polo tecido empresarial, e 88 producíronse nos diferentes programas de emprego acadados polo Concello a través de subvencións.

23/02/2023 in Alcaldía, Emprego e formación

A primeira promoción do Programa de Formación Dual en Xardinería para persoas con discapacidade sae do Porriño

O Concello do Porriño foi hoxe escenario da celebración da primeira promoción do programa de formación dual levado a cabo en Aceesca, unha das entidades pioneiras en Galicia en desenvolver esta iniciativa. “É para nós un orgullo contar no municipio cunha entidade como Aceesca que traballa en favor das persoas con diversidade intelectual nas súas diferentes etapas, dende nenos, pasando por adultos en idade de traballar e tamén maiores”, sinala o alcalde Alejandro Lorenzo quen participou esta mañá no acto celebrado nas instalacións de Aceesca, en Torneiros, no que deu a coñecer o resultado deste proxecto formativo, “o cal lle abre as portas no mercado de traballo a unha decena de persoas formadas e cualificadas. Dende o Concello aplaudimos iniciativas como estas, as cales apoiaremos sempre e tamén dende a administración local levaremos a cabo diversas accións de emprego e formación para todos os colectivos”

Pódese dicir que a asociación Aceesca foi quen importou a Galicia o modelo de formación dual adaptada a persoas con discapacidade intelectual a raíz dunha viaxe en Mallorca. Ata entón non existía unha formación regrada neste aspecto. Foi a finais de 2019 cando se pon en marcha un programa de Formación Dual, financiado pola Xunta de Galicia e o Estado, coa finalidade de poder outorgar certificados de profesionalidade ás persoas con discapacidade intelectual da nosa comunidade. Xunto con Aceesca, participaron outras cinco entidades de toda Galicia neste programa piloto, e Aceesca facíao concretamente no certificado de Auxiliar de viveiros, xardíns e centros de xardinería.

As túas necesidades, as nosas oportunidades

O vindeiro 26 de febreiro rematará de xeito oficial esta formación na que 10 persoas aprendices adquiriron as competencias necesarias para o seu desenvolvemento profesional no mercado ordinario de traballo. Así, na xornada de hoxe, baixo o título “As túas necesidades, as nosas oportunidades”, Aceesca ademais de facilitar aos representantes do tecido empresarial e das administracións alí presentes toda a información respecto dos resultados deste proxecto piloto, amosou as competencias adquiridas polo alumnado, os cales están cualificados para poder exercer a profesión en calquera empresa ou administración pública. Ao acto tamén acudiu, por parte da Xunta de Galicia, a secretaria xeral de Apoio ao Emprego, Traballo Autónomo e Economía Social, Covadonga Toca.

A través deste programa recibiron formación continua, fundamentalmente práctica, coa metodoloxía de aprender facendo, que é como se pode afianzar capacidades de forma efectiva. Pero ademais, dende o primeiro día, o aprendiz tivo un contrato laboral, que axuda a adquirir e consolidar os coñecementos e capacidades que se traballan na formación e agora, ao finalizar os tres anos acredítanse cunha cualificación profesional oficial que lles abre moitas portas no mercado ordinario de traballo.

09/02/2023 in Educación e tecnoloxía, Emprego e formación

45 porriñesas formáronse xa no programa Galegas Dixitais

45 porriñesas participaron xa no programa de formación para a dixitalización das mulleres “Galegas Dixitais”. A segunda quenda desta acción formativa, que se iniciara o pasado mes de novembro, finalizou esta semana e, tras o éxito obtido e a gran demanda, porase en marcha unha terceira edición para que as interesadas en participar que aínda non puideron facelo non perdan esta oportunidade.

Dará comezo a finais do presente mes de xaneiro ou principios de febreiro e poderán participar todas aquelas mulleres interesadas que se atopen en situación de desemprego ou que teñan solicitada a mellora de emprego, co fin de aumentar as súas capacidades e incrementar a empregabilidade.

Como nas pasadas edicións, todas as participantes recibirán gratis un ordenador portátil co que realizar o curso e tamén poñer en práctica o que aprenderon unha vez finalizado.

Lembramos que o programa formativo contempla tres bloques, de 40 horas de duración cada un deles: Competencias Dixitais Básicas, Competencias Dixitais Avanzadas e Competencias Dixitais para o Emprendemento. As interesadas poden inscribirse xa enviando un email a orientacion@porremprego.org ou orientacion@oporrino.org, tamén presencialmente nas oficinas de Porremprego ou chamando ao teléfono 604 039 575

04/01/2023 in Emprego e formación

O Porriño contratará a 21 persoas para reforzar os servizos municipais

O Concello do Porriño abre o proceso de selección para a contratación de 21 persoas desempregadas que desenvolverán funcións en diferentes servizos municipais.

Serán concretamente 1 oficial de carpintería, un de soldadura, un de albanelería, un tractorista-condutor con guindastre e dous peóns de obra pública para o Departamento de Obras; 8 peóns forestais para o Departamento de Parques, xardíns e limpeza; 1 auxiliar de enfermería para a Unidade Asistencial de Drogodependencias (UAD) e 6 conserxes para diferentes departamentos municipais.

Estas contratacións efectuaranse con cargo ao Plan Concellos 2023 da Deputación de Pontevedra e o Concello do Porriño fará unha aportación de preto de 50.000 euros.

“Para nós é unha prioridade contar con persoal para poder prestar os servizos públicos aos que á cidadanía ten dereito e neste momento os nosos medios son insuficientes. Por iso estas contratacións non só servirán para incorporar ao mundo laboral a 21 persoas que se atopan en situación de desemprego, senón que permitirá ao Concello atender ás necesidades da veciñanza como corresponde”, sinalou o alcalde, Alejandro Lorenzo.

Hai que destacar que as persoas que se van contratar terán que estar inscritas no Servizo Público de Emprego que será o encargado de facer a preselección, por iso é importante que todas as persoas interesadas se inscriban nos seguintes códigos de ocupación para cando se presenten as correspondentes ofertas de emprego:

1 Oficial 1ª de carpintería: 71311049
1 Oficial 1ª soldador: 73211020
1 Oficial 1ª de albanelería: 71211015
1 Oficial 1ª tractorista-condutor con grúa e outros servizos: 83221013
2 Peóns de obra pública: 96011029
9 Peóns forestais: 95431028
1 Auxiliar de enfermería: 56111013
6 Conserxes: 58331022

27/12/2022 in Emprego e formación

`Porremprego Cualifica´ traballa na posta en marcha dun comedor social

20 persoas desempregadas do Porriño fórmanse mentres traballan no obradoiro dual de emprego `Porremprego Cualifica´, promovido polo Concello do Porriño e subvencionado pola Consellería de Promoción do Emprego e Igualdade con 503.987 euros, que se está a desenvolver nas instalacións do multiusos de Torneiros.

O alcalde, Alejandro Lorenzo, visitou esta semana aos alumnos do obradoiro para coñecer de primeira man como se está a desenvolver a formación e os proxectos nos que traballan nas dúas especialidades que se imparten: a de Cociña e a de Atención Sociosanitaria en domicilio e institucións.

“Un municipio como o noso, cunha hostalería funcionando a pleno rendemento, necesita profesionais cualificados, e o mesmo no eido da atención a persoas dependentes, é algo que require de formación adecuada para poder prestar o mellor coidado”, apuntou o alcalde que asegurou aos alumnos e alumnas que “o día de mañá seredes profesionais en dous sectores de moita importancia e estou seguro de que o que hoxe estades a aprender servirá para axudar a moitísima xente”.

Un Porriño máis humano: comedor social

A especialidade de Cociña de `Porremprego Cualifica´ plantexa axudar a aquelas persoas e familias do Porriño que se atopan nunha situación de vulnerabilidade. A tal fin, poñerase en marcha un comedor social nas instalacións do multiusos con capacidade para 20 comensais que abrirá as súas portas dous días á semana e será xestionado a través dos servizos sociais do Concello. “Sabemos que neste momento hai moitas persoas atravesando momentos de dificultade e coa implicación do persoal do obradoiro e dos traballadores e traballadoras do mesmo queremos axudalos”, concluíu o alcalde, “Temos que estar á altura das circunstancias e facer do Porriño unha vila máis humana e solidaria se cabe”.

O comedor social prevé iniciar a súa actividade a mediados do mes de xaneiro, os martes e xoves.

Comida solidaria de Nadal

Dende o Concello do Porriño propóñense que ninguén quede sen celebrar este Nadal. Así, nestas datas tan entrañables, os alumnos/as traballadores/as da especialidade de cociña prepararán un xantar de Nadal para levar para a casa este 22 de decembro. Serán 6O as persoas beneficiarias, xestionadas a través dos servizos sociais. O menú constará de dous pratos e postre.

29/11/2022 in Alcaldía, Emprego e formación

Comeza a segunda edición do curso de dixitalización para mulleres”Galegas Dixitais”

Tras o éxito obtido na primeira quenda do programa formativo “Galegas Dixitais”, financiado polos Fondos Europeos Next Generation EU e o Plan de recuperación, transformación e resiliencia do Ministerio de Educación e Educación Profesional, que se desenvolveu no Porriño e a gran demanda que tivo, ponse en marcha unha segudna edición.

Desenvolverase do 17 de novembro ao 2 de xaneiro en horario de tarde (16h – 21h) nas instalacións do multiusos de Torneiros.

O programa, está organizado por Ara Formación e Beprojetct Consultores , e ten como principal obxectivo mellorar as capacidades dixitais de mulleres, favorecer a súa empregabilidade, impulsar o emprendemento e desenvolvemento rural e reducir a fenda de xénero. Está financiado polos Fondos europeos NextGenerationEU e o Plan de recuperación, transformación e resiliencia.

Xunto co material didáctico e co obxectivo de facer posible o uso das novas tecnoloxías tras a formación, as alumnas participantes serán obsequiadas cun ordenador portátil, co que poderán poñer en práctica todo o aprendido

Está previsto realizar unha terceira edición de “Galegas Dixitais” nas mesmas instalacións, polo que as interesadas en participar poden inscribirse enviando un correo electrónico a: orientacion@oporrino.org ou orientacion@porremprego.org; ou presencialmente nas oficinas de Porremprego.

“Esta formación supón unha gran oportunidade para a mellora das competencias dixitais para as mulleres do Porriño, xa que se pretende a alfabetización dixital de todalas persoas en busca activa de emprego, motivar para o emprendemento e acabar coa fenda dixital entre a poboación dos municipios rurais”, concluíu a concelleira de Emprego e Formación, Rosario Costas.

16/11/2022 in Emprego e formación

Arranca o curso de `Galegas Dixitais´ no Porriño

Hoxe deu comezo o curso Galegas Dixitais no que participan 20 mulleres do Porriño. Unha oportunidade única para adquirir coñecementos e competencias dixitais útiles para o seu día a día, mellorar a empregabilidade e emprendemento.

O programa, ao que se uniu o Concello do Porriño, está organizado por Beproject e Ara Formación e financiado polos Fondos Europeos NextGenerationEU e o Plan de recuperación, transformación e resiliencia.

A actividade é totalmente gratuíta e agrúpase nos seguintes bloques: