Esta semana chegan as vacacións escolares e o Concello do Porriño quere celebralo cunha festa do máis divertido da que poderán disfrutar todos os nenos e nenas do Porriño.
O vindeiro xoves, 23 de xuño, a praza Arquitecto Antonio Palacios será escenario dunha tarde de reencontros e xogos coa que despedir xuntos o curso. A partir das 17 h un DJ animará a festa na que haberá un gran tobogán de auga e festa da escuma.
O Centro Cultural Municipal acolle a exposición dos traballos que os alumnos e alumnas do IES Ribeira do Louro desenvolveron durante este curso nas asignaturas de debuxo técnico e debuxo artístico.
A mostra foi inaugurada onte nun acto que contou coa presencia do alcalde, Alejandro Lorenzo, o concelleiro de Cultura, Bienvenido Estévez, a profesora de Debuxo Técnico e Debuxo Artístico do IES Ribeira do Louro, María José Iglesias, e dos autores das obras.
Baixo a premisa de imaxinar un Porriño diferente, os mozos e mozas de primeiro a cuarto da ESO deseñaron proxectos arquitectónicos cos que transformar a contorna na que viven.
“O obxectivo era que aprendesen a proxectar doutra maneira e a ver O Porriño dunha forma diferente, máis moderna, actual, con máis luz…”, explicou a súa profesora, “Hoxe vemos aquí o resultado. Traballar duro pero traballar ben sempre é satisfactorio”.
O concelleiro de Cultura, Bienvenido Estévez, felicitou aos mozos e mozas “por ter unhas ideas brillantes e a capacidade de plasmalas para deixar a súa pegada”. Unhas ideas que van dende aparcadoiros, parques, museos ou miradores que adaptarían O Porriño á visión da xuventude.
“É moi importante que as novas xeracións nos marquen o camiño a seguir coa súa creatividade e ilusións, coa súa maneira de ver o seu pobo e deseñar o seu futuro”, afirmou o alcalde, “Coa súa ilusión ilusiónannos a todos”.
A mostra pode visitarse na sala de exposicións do Centro Cultural Municipal (3º andar) ata o día 30 de xuño.
A delegación española que visitará Mozambique no marco do proxecto europeo “Empoderamento da mocidade para facilitar a transición ecolóxica” partiu hoxe do Porriño cara Nampula.
8 mozos e mozas alumnos dos IES Ribeira do Louro e do CIFP A Granxa , acompañados por persoal de apoio do Concello do Porriño e do IES porriñés, estarán en Maputo e Nampula ata o día 23 participando na última das movilidades deste programa de intercambio xuvenil baixo o título “Conciencia ecolóxica: ferramentas dos medios para a participación e o impacto en Nampula”.
Este programa, cofinanciado polo proxecto Erasmus + da UE, ten como obxectivo fomentar a posta en marcha de campañas de concienciación ambiental, combinando unha análise crítica cunha estratexia de medios coidadosamente planificada.
A praza Arquitecto Antonio Palacios acolleu hoxe “PrePorrigalia”, un evento no que máis de 200 alumnos e alumnas de oito centros educativos do municipio disfrutaron do espectáculo “Abordaxe Gala”, da compañía Barafunda, con Asterix, Obelix e máis habitantes da aldea gala como persoaxes.
O encargado de dar o pistoletazo de saída a unha mañá de troula gala e castrexa foi o monologuista e actor, Pepo Suevos, que este ano convertirase no Rei Breogán coincidindo cos xogos olímpicos do Porriño, que lembramos, se celebrarán os días 1, 2 e 3 de xullo.
Xunto a el o alcalde, Alejandro Lorenzo, e os concelleiros de Educación e Cultura, Carolina González e Bienvenido Estévez, que animaron aos nenos e nenas a irse preparando para vivir a tope Porrigalia 22.
Ademais, unha vez finalizado o acto e antes de volver aos coles, levaron cada un unha laranxa coa etiqueta de Porrigalia para ir ambientando o almorzo.
O Centro Cultural Municipal acolle mañá venres, ás 18:30 h, a última conferencia das xornadas para familias e profesionais “Acompañando na aventura de crecer”.
Nestas xornadas, organizadas desde a Concellería de Cultura a través da biblioteca municipal, abordouse dende diferentes puntos de vista e perspectivas profesionais como favorecer o correcto desenvolvemento das nosas fillas e fillos, dende que nacen e na súa primeira etapa infantil, para favorecer unha vida adulta saudable e enriquecedora.
A logopeda Eva López será a encargada de poñer o broche ás xornadas coa conferencia “Dende lactar ata falar, todo un camiño de comunicación”. Trátase dunha charla evolutiva desde a importancia da lactación nun inicio e os seus beneficios a nivel muscular á hora de desenvolver a linguaxe, e que destrezas son as máis importantes para conseguir unha linguaxe formal e poder comunicarse con calquera persoa.
A poñente, Eva López Domínguez, é diplomada en Logopedia e en Audición e Linguaxe pola Universidade da Coruña, posgrado en atención de calidade e integración en persoas con autismo, asesora de lactancia con 18 anos de experiencia como logopeda en diferentes entidades públicas e privadas. Tamén é fundadora e coordinadora do centro de estimulación e aprendizaxe Afalar desde 2010 e coidadadora de nenas e nenos con discapacidade para a Xunta de Galicia. Eva conta cunha experiencia profesional que abarca desde o nacemento á vellez, con maior énfase na poboación de 3 a 18 anos.
Os nenos e nenas dos colexios do Porriño disfrutan estes días de xornadas multiaventura no marco da Semana Branca, que se celebra dun xeito diferente: con area, sol e mar.
Durante uns días, o alumnado participa nesta actividade organizada pola asociación Semana Branca en colaboración co Concello do Porriño. Celebráse na praia e os pequenos e pequenas realizan múltiples actividades deportivas como vóley praia, kayak ou surf na escola de Patos.
O alcalde do Porriño, Alejandro Lorenzo, e a concelleira de Educación, Carolina González, compartiron hoxe con eles un ratiño de aventura, xogaron ao volley cos nenos/as e profes e conversaron sobre todo o que farán hoxe. “Este tipo de actividades son moi enriquecedoras para eles e velos disfrutar xuntos/as é moi satisfactorio”, concluíu o alcalde, “despiden un curso e unha etapa, que mellor maneira de facelo que divertíndose cos seus compañeiros”.
O Centro Tecnolóxico do Granito de Galicia acolleu hoxe o acto de formalización dun convenio para a colaboración da Xunta de Galicia co Clúster do Granito no impulso das ensinanzas de Formación Profesional. Ao acto acudiron Javier Blanco, presidente do Clúster, Román Rodríguez, Conselleiro de Cultura, Educación FP e Universidades, a delegada territorial da Xunta en Vigo, Marta Fdez- Tapias e o alcalde do Porriño, Alejandro Lorenzo.
O primeiro dos froitos deste acordo será a oferta, por primeira vez en Galicia, do ciclo de grao medio de Pedra Natural, na modalidade Dual.
Tal e como explicou o alcalde, trátase dun “acordo moi beneficioso para O Porriño porque supón un novo impulso ás ensinanzas de formación profesional das que se beneficiarán tanto os alumnos e alumnas, como o IES e o tecido empresarial”. Esta modalidade educativa “forma de maneira integral a futuros profesionais e dignifica a súa instrucción ao combinarse co traballo remunerado”.
As ensinanzas comezarán a impartirse no curso 2022/23 no IES Ribeira do Louro, en Torneiros, e supón a implantación en Galicia dunha nova familia profesional, a de Industrias Extractivas, e a incorporación á oferta galega dun ciclo con pouca oferta en España.
Nace para dar resposta ás necesidades de formación de novos profesionais transmitida polo Cluster do Granito, o que vai supoñer unha oportunidade clara de emprego para as persoas que cursen este ciclo, e contará coa participación de empresas integradas nesta entidade. O número de alumnos concretarase a través dun convenio específico.
Na súa intervención, o conselleiro Román Rodríguez subliñou a fortaleza que teñen as ensinanzas de FP en Galicia, que sobresaen “polo prestixio como unha alternativa educativa de calidade e con saídas profesionais de futuro” e pola “confianza” que cada vez máis empresas, como é o caso das firmas que integran o Cluster do Granito, depositan neste modelo “ao sumar esforzos para avanzar na innovación e na transferencia de coñecementos ao propio tecido empresarial”. “A rede de FP -abondou o conselleiro- xera oportunidades para avanzar na cualificación e na especialización técnica, o que contribúe a reforzar e potenciar o desenvolvemento das propias empresas”.
Pola súa banda, o presidente do Clúster, Javier Blanco, destacou que “o capital humano formado, como se di hoxe en día, é unha das palancas chave imprescindibles para garantizar que este sector estratéxico de Galicia continúe crecendo, contribúa a fixar a poboación en zonas rurais, innove nos seus produtos e procesos, e xenere empleo a medio e largo prazo”. Este convenio é “un logro moi importante para as empresas graniteiras e os seus traballadores”, concluíu, “O compromiso do sector demostrase coa participación de 10 empresas neste primeiro programa”.
Colaboración en formación e acreditación
O acordo marco asinado hoxe ten como finalidade principal favorecer a participación das case medio cento de empresas que conforman o cluster nas diferentes ensinanzas de FP, así como dos seus traballadores no proceso de acreditación de competencias.
En concreto, comprométese a colaboración das compañías integrantes do cluster no programa de Formación en Centros de Traballo do alumnado, en proxectos de FP Dual, na capacitación do profesorado e na cesión de equipamento ou instalacións.
No referido á actualización de coñecementos, o Cluster do Granito poderá colaborar na actualización e orientación do profesorado dos ciclos formativos. Pola súa banda, a Consellería fomentará a obtención de titulacións de Formación Profesional e certificados de profesionalidade por parte dos traballadores das empresas dentro do proceso de avaliación, recoñecemento e acreditación de competencias obtidas pola experiencia profesional.
A maiores, o acordo inclúe a colaboración das empresas no desenvolvemento de proxectos de innovación tecnolóxica ou científica e proxectos de innovación didáctica no ámbito dos centros de FP e o apoio mutuo centro-empresas, especialmente entre as pequenas e medianas empresas e os centros educativos que impartan estas ensinanzas.
Esta cooperación enmárcase na Estratexia FP Galicia 2030, que ten entre os seus eixes de actuación manter unha relación permanente cos sectores produtivos para detectar as necesidades e axustar a oferta formativa en cada momento.
Dende hoxe e ata o 13 de xuño permanecerá aberto o prazo de inscripción nos campamentos organizados polo Concello do Porriño para favorecer a conciliación laboral e familiar durante as vacacións escolares.
A concellería de Igualdade, que dirixe Carolina González, impulsa este Campamento de Verán dirixido aos rapaces erapazas de idades comprendidas entre os 3 e 12 anos cumpridos como medida non só de conciliación senón tamén de inclusión.
A actividade desenvolverase dende o 4 de xullo ao 12 de agosto de 9 a 14 h en instalacións municipais.
As persoas interesadas poderán apuntarse cubrindo a folla de inscrición que se atopa no CIM (terceiro andar do Concello do Porriño) e colgada na páxina web. Pode presentarse presencialmente ou rexistrarse por sede electrónica.
Haberá 3 quendas, unha por quincena, cun número de prazas limitado de 40 cada unha. As prazas cubriranse por orde de inscrición agás no caso de que o número de solicitudes sexa maior que o das prazas ofertadas, en cuxo caso se valorará segundo baremo que se subirá á páxina web do Concello.
LISTADO DE ADMITIDOS E RESERVA NOS CAMPAMENTOS DE VERÁN
O centro cultural acolleu onte a presentación de “Casa de Feras”, Premio Vidal Bolaño 2021, de Edgar Costas. Acompañando ao autor, estivo o alcalde do Porriño, Alejandro Lorenzo, a escritora e secretaria do premio, Raquel Castro, e Francisco Castro, director xeral da Editorial Galaxia.
A obra de Edgar Castro, unha fábula actual onde se abordan temas como o maltrato animal, as relacións de poder e a liberdade, fíxose co galardón literario na cuarta edición do certame organizado polo Concello do Porriño, o IES Ribeira do Louro e a Editorial Galaxia.
“Somos moi afortunadas e afortunados de contar co apoio do Concello do Porriño” , destacou o director xeral de Galaxia, “Con esta iniciativa estimúlase aos dramaturgos a crear obras dirixidas á mocidade. Un respaldo á cultura que coloca ao Concello do Porriño no centro da dramaturxia xuvenil. Non hai concello que poida compararse neste sentido”.
Pola súa banda, o autor convidou aos asistentes a descubrir “Casa de Feras”, unha obra que agarda “como todas as obras de teatro se complete saíndo a escena da man dos mozos e mozas”.
“O Premio Vidal Bolaño é xa un certame consolidado que contará sempre co respaldo do Concello”, concluíu o alcalde, “Para nós, o respaldo á cultura en calquera das súas expresións é esencial, trátase de gardar e enriquecer o legado que deixamos aos que veñen”.
V Premio Vidal Bolaño
O Concello do Porriño, IES Ribeira do Louro e a Editorial Galaxia convocaron xa a quinta edición do Premio Vidal Bolaño, un certame que naceu pola necesidade de fomentar a escritura de textos teatrais dirixidos ao alumnado de ESO e Bacharelato e crear un fondo de textos teatrais susceptibles de ser representados por alumnado do ensino secundario.
O premio constará de 2.000 euros e a edición e publicación da obra gañadora a cargo da Editorial Galaxia. O prazo de presentación de orixinais remata o 21 de xuño de 2022.
O pavillón deportivo do IES Ribeira do Louro leva xa o nome de Tania Rodríguez Estévez, árbitra de balonmán de élite que foi alumna do centro educativo.
O acto de descuberta da placa, celebrado hoxe no instituto de Torneiros, dá cumprimento á proposta da Comisión de Igualdade aprobada por unanimidade do claustro, coa que se rende homenaxe a Tania non só pola súa traxectoria profesional e deportiva senón tamén pola súa contribución a visibilizar o empoderamento da muller en deportes maioritarios e, erroneamente, considerados masculinos.
Ao evento acudiron, ademais do alumnado do centro, a directora, Juana Muñoz, o alcalde do Porriño, Alejandro Lorenzo, os concelleiros de Deporte, Educación e Igualdade, Abel Estévez e Carolina González, respectivamente, e o xefe territorial de Educación, César Pérez Ares.
O concelleiro de Deportes, Abel Estévez, que foi adestrador de Tania no Balonmán Porriño durante anos, destacou dela a súa “responsabilidade, tesón e capacidade”, cualidades que garantizaban “o seu ascenso meteórico en todo o que se propoña”. Estévez quixo poñer en valor a traxectoria da porriñesa xa que “cando falamos dun deporte minoritario como o balonmán, chegar a onde chegou Tania quere decir que o fas ben. Moitas veces falamos dos teitos de cristal e estes en determinados deportes son teitos de pedra. Coa súa determinación e esforzo Tania rompeu con eles”.
Na mesma liña se manifestou a concelleira de Educación e Igualdade, Carolina González, que desexou moita a sorte á homenaxeada en todo o que se propoña e salientou que “as mulleres que como Tania chegan a lugares onde hai pouco tempo era imposible chegar merecen todos os recoñecementos”.
O alcalde, Alejandro Lorenzo, quixo poñer a Tania como exemplo para as novas xeracións. “Mulleres como ela que loitan polo que queren sen aceptar límites nen estereotipos deben ser referentes para a mocidade de hoxe”, afirmou, “Por iso é moi importante o que hoxe está pasando aquí, demostra que ningún ámbito é nin pode ser un `mundo de homes´ e que celebrar os éxitos de mulleres como Tania é puxar pola igualdade”.
Pola súa banda, Tania agradeceu enormemente este xesto do instituto no que cursou os seus estudos da ESO e ciclo superior de Administración e Finanzas, e en xeral, o xesto do seu pobo, O Porriño. “Os meus éxitos parten do Porriño, a nosa arbitraxe nace no Balonmán Porriño e iso o teño sempre moi presente”, afirmou.
Tras ser entrevistada polos alumnos e alumnas do centro, Tania Rodríguez descubriu entre aplausos a placa co seu nome ás portas do pavillón.
Unha recoñecida árbitra de balonmán na máxima categoría
A traxectoria deportiva e profesional de Tania Rodríguez Estévez, veciña da parroquia de Budiño, está vinculada dende sempre ao balonmán. Comezou a dar os seus pasos no club porriñés, onde pechou algúns dos grandes logros deportivos do club: formou parte do equipo que se alzou co subampionato de España Xuvenil e participou na fase de ascenso do primeiro equipo, chegando a debutar en División de Honra.
Tania é unha recoñecida árbitra de balonmán e destacou por ser, xunto coa súa compañeira, Lorena García, a primeira parella arbitral de mulleres que pitou un partido de ASOBAL, a máxima categoría deste deporte. A día de hoxe, é árbitra de élite nacional e internacional.