Educación e tecnoloxía

O alcalde do Porriño, Alejandro Lorenzo, e a concelleira de Educación, Carolina González, acompañaron hoxe ao xefe territorial de Educación, César Pérez Ares e aos directores e directoras dos centros educativos do Porriño no acto de inauguración do curso escolar no municipio.

Este ano, o acto realizouse no CEIP da Ribeira, en Torneiros, un centro que acolle a nenos e nenas das parroquias de Torneiros, Chenlo e Pontellas.

“Recuperamos a normalidade nas aulas tras dous anos marcados polas restricións da pandemia, os nenos e nenas poden verse as caras, xogar e abrazarse, con precaucións por suposto, pero poderán volver a ser nenos”, afirmou o alcalde, quen agradeceu aos profesores e profesoras “o enorme traballo que fixestes en momentos tan difíciles, tanto vós como as ANPAS”. “Gracias a vós todo foi máis sinxelo para eles e moito menos traumático”, apuntou.

O rexedor aproveitou para reiterar o apoio do Concello do Porriño aos equipos directivos. “Tedes a nosa man tendida para o que precisedes”, concluíu, “Os nosos centros precisan moitas melloras e traballaremos para todas elas se leven a cabo”. Lorenzo quixo poñer en valor o labor da concelleira de Educación, Carolina González, que compaxina a súa labor de docente coa de concelleira e “traballa moi duro para atender todas as necesidades de todos os centros do Porriño, cunha máxima sempre: os nosos nenos e nenas merecen unha educación pública de calidade”.

O alcalde do Porriño, Alejandro Lorenzo, e a concelleira de Educación, Carolina González, informaron hoxe das melloras que a Consellería de Cultura, Educación e Universidade da Xunta de Galicia está a realizar en centros escolares do municipio aproveitando as vacacións estivais.

Trátase do CEIP Xosé Fernández López, CPI da Ribeira e IES Pino Manso e a inversión ascende a 344.240 euros.

No que respecta ao CEIP Xosé Fernández López as melloras consistirán na renovación da iluminación das instalacións cun orzamento de 86.228 euros. As antigas luminarias, algunhas fluorescentes e outras de tipo LED pero sen regulación, substituiranse  por outras maior eficiencia, de tecnoloxía LED que permita unha maior calidade da iluminación e un importante aforro de enerxía  ao contar cunha maior eficiencia enerxética.

No CPI da Ribeira, en Torneiros, estase a acometer a reforma da instalación de fontanería. As obras contan cun orzamento de 41.000 euros e pasan pola substitución das tubaxes de ferro que compoñen a actual instalación de a construción dun colector. Pretendese así poñer fin ao problema que presentaba a actual tubaxe de ferro galvanizado que, co paso do tempo e maila acción do cloro residente na auga, estaba oxidada.

Por outra banda, no IES Pino Manso instalarase un ascensor exterior que pretende resolver os problemas de acceso ao centro que presenta o edificio e eliminar as barreiras arquitectónicas coas que os usuarios/as se enfrentan. As obras ascenden a 217.022 euros  que se suman aos  1.155.187 euros que invertiu a administración autonómica na reforma integral que se está a executar no centro.

“As melloras nos centros educativos son esenciais e urxentes”, explicou o rexedor, Alejandro Lorenzo, “Os nenos e nenas do Porriño teñen dereito e estudar nas mellores condicións e por iso estas intervencións son prioritarias. Quedan moitas cousas por facer e traballamos para facelas á maior brevidade posible, en contacto sempre coa consellería para resolver as demandas da nosa comunidade educativa”.

O obradoiro de alimentación saudable “Ti si que es un bo peixe!” chega ao Porriño o vindeiro 15 de xullo. A iniciativa, impulsada pola Consellería do Mar en colaboración co Concello do Porriño, está dirixida aos cativos e cativas de entre 3 e 14 anos e é totalmente gratuíta.  

O obxectivo principal desta actividade é fomentar o consumo de produtos frescos da pesca e da acuicultura entre a poboación infantil e xuvenil á vez que se conciencia sobre a necesidade de equilibrar as dietas neste sector da poboación.

A tal fin, dun xeito lúdico, daráselle información sobre 9 especies mariñas de amplo consumo en Galicia, e indicarase o seu hábitat, forma de recolección ou pesca e método de consumo. O vehículo condutor será a música, con cancións e coreografías deseñadas especialmente para esta campaña.

“O incremento do consumo de peixe e produtos do mar entre os máis cativos, polas súas importantes calidades nutricionais, preséntase como unha ferramenta eficaz para mellorar a súa dieta, xa que estes constitúen unha excelente fonte de nutrintes saudables”, explicou a concelleira Antía Carrera, “De aí a importancia de que fomentar o seu consumo entre eles”.

O alcalde do Porriño, Alejandro Lorenzo, animou aos nenos e nenas a participar desta actividade e “afondar no coñecemento das especies de peixe máis comúns e tamén do noso papel como consumidores á hora de preservar os recursos do mar”.

O obradoiro desenvolverase no Centro Cultural a partir das 9:30 h e as prazas son limitadas polo que se require inscrición previa (a través do email gabinete.alcaldia@oporrino.org).

Esta tarde celebramos a gran Festa de Fin de Curso Escolar no Porriño! 

A partir das 17 h instalarase un tobogán de auga na rúa Antonio Palacios (dende a de Fran ata o Concello)

Ás 20 h no parque do Cristo comezará a Festa da Escuma e a música soará para dar a benvida ás vacacións de verán. 

Os nenos e nenas que queiran participar tan só terán que traer bañador, toalla e ganas de pasalo ben! 

O centro de día de Aceesca acolleu hoxe a última das sesións de educación asistida con cans de terapias impulsadas pola concellería de Educación do Concello do Porriño.

Nesta actividade participaron preto de 400 escolares de infantil de todo o municipio e tamén do centro de día de Aceesca,  co obxectivo de trasladar os beneficios que achegan os animais ás contornas escolares traballar de forma transversal a educación en valores e o coidado responsable de mascotas.

Gofre, Trece e Fox, os tres cans que participaron nesta experiencia de concienciación e mellora da convivencia, visitaron durante tres meses aos usuarios e usuarias de Aceesca. Unha vez á semana achegábanse ao centro a compartir cos diferentes grupos actividades deseñadas dependendo das súas necesidades específicas.