Educación e tecnoloxía

A alcaldesa visitou en Madrid as obras da réplica do Templete de San Luis

Eva Garcia de la Torre visitou na capital do Estado, xunto con responsables de Metro de Madrid e da empresa porriñesa “Godoy Maceira”, a réplica do Templete de San Luis que está a construírse, de novo, no seu antigo emprazamento, na estación de Metro de Gran Vía.

A empresa porriñesa que dirixe Fernando Godoy traballa dende abril nesta réplica da obra orixinal de Antonio Palacios de hai un século e que conservamos no Porriño. A Comunidade de Madrid pretende inaugurar esta réplica xunto coas restantes obras de remoción da estación de metro de Gran Vía no mes de xullo.

O empresario porriñés xunto con María Teresa Diaz, coordinadora de relacións institucionais de Metro de Madrid, acompañaron á alcaldesa no percorrido polas obras de reconstrución.

Pola súa banda, Eva Garcia explicoulle aos responsables do Metro de Madrid que O Porriño está a celebrar dende o 27 de outubro de 2020, o “Ano Antonio Palacios”, en conmemoración do 75 aniversario do seu pasamento e, precisamente, nesta fin de semana comeza outra das actividades programadas polo Concello, coas visitas guiadas teatralizadas que continuarán ata outubro.

A alcaldesa agasallou aos máximos responsables de Metro de Madrid, Angel Garrido, conselleiro de Transportes da Comunidade, e Silvia Roldán, conselleira delegada da compañía de transportes, con exemplares dos libros editados polo Concello do Porriño sobre Antonio Palacios. Do mesmo xeito, a alcaldesa recibiu un libro editado pola Comunidade de Madrid sobre o legado de Antonio Palacios na capital de España.

29/05/2021 in Alcaldía, Cultura e festas, Educación e tecnoloxía, Turismo

Outorgada licenza de obras á empresa que vai xestionar a futura gardería do Polígono da Granxa

A empresa que vai xestionar a futura escola infantil no Polígono Industrial A Granxa dispón de licenza municipal do Concello do Porriño para executar as obras de acondicionamento do local cedido pola Zona Franca. O espazo ten una superficie de 448 metros cadrados e o orzamento estimado das obras é de algo máis de 55.000 euros.

A documentación aportada pola mercantil que dirixe Beatriz Cabaleiro informouse favorablemente e a licenza de obra outorgouse con data de onte, 20 de maio, firmada polo concelleiro responsable de Infraestruturas, Pedro Pereira.

Zona Franca cedeu e entregou as chaves en abril de seis locais na planta baixa do Centro de Servizos en A Granxa onde a firma “Trastes” xestionará una escola infantil con 74 prazas para nenos e nenas de 0 a 3 anos, así como servizos complementarios de 3 a 8 anos.

A futura entrada en funcionamento desta gardería “atenderá unha vella demanda dos empresarios e traballadores dos polígonos industriais do Porriño. Como institucións públicas temos que favorecer e facilitar a conciliación familiar e laboral”, segundo declarou a alcaldesa, Eva García de la Torre.

 

21/05/2021 in Alcaldía, Educación e tecnoloxía, Igualdade, Urbanismo, comercio e industria

Obradoiro sobre novas profesións para o alumnado de ensino secundario

A Oficina Municipal de Información á Xuventude xunto coa Concellería de Educación levan a cabo, ata o 31  de maio, a actividade “Mentoring para adolescentes: obradoiro sobre novas profesións, Pensando no meu Futuro”, que se imparte polos centros de ensino secundario do Porriño. Hoxe correspondíalle ao alumnado de 4º da ESO do IES Ribeira do Louro.

¿Cómo podemos tomar boas decisións sobre o noso futuro? ¿Que opcións temos? ¿Cómo podemos saber que é axeitado para nós?. Os adolescentes enfróntanse a moitas preguntas e vense na obriga de tomar decisión sobre os seus estudos case sen reflexionar ou investigar as mellores opcións para eles. Este obradoiro aborda o proceso de autocoñecemento e as novas profesións nun formato de duas horas. Neste tempo proporcionarase aos estudiantes unha visión de conxunto sobre as novas profesións que existen grazas á tecnoloxía, cales poden desenrolar en Galicia e como coinciden eses perfís profesionais coas súas habilidades e intereses naturais.

Indice de contidos:

  • Novas profesións relacionadas coa tecnoloxía: intelixencia artificial, automatización e robótica, etc.
  • Sectores productivos en Galicia e estudios relacionados.
  • Moocs e formación online gratuita.
  • Detección de fortalezas e definición de obxectivos.

Estes obradoiros (teórico-práctico de 2 horas) son impartidos dende o 13 de maio e chegarán a un total de 177 alumnos de 3º e 4º da ESO.

 

 

20/05/2021 in Educación e tecnoloxía, Mocidade

O Consello da Infancia tratou coa concelleira de Educación sobre “espazos seguros” para a mocidade porriñesa

O Consello da Infancia e Adolescencia do Porriño tratou coa concelleira de Educación, Lourdes Moure e persoal da OMIX sobre entornos seguros para a mocidade porriñesa, na xuntanza celebrada no Centro Cultural Municipal. O encontro gravouse para realizar unha reportaxe que se emitirá na canle municipal on line “Louriña TV Escolar”.

Segundo ven de definir UNICEF España como parte do seu traballo fronte á violencia e os abusos, institucións públicas como o Concello do Porriño que é, ademais, Cidade Amiga da Infancia, deben favorecer a xeración de entornos protectores para á infancia, e impulsar modelos de prevención e atención ás situacións de violencia exercida en contra das nenas e dos nenos.

A concelleira subliñou a importancia de que “o goberno local traballe de xeito coordinado con todos os axentes implicados para conseguir un concello onde nenas, nenos e adolescentes se sintan segur@s para desenvolver as súas vidas”.

 “Dende o goberno, parécenos que contar coa axuda do Consello de Participación da Infancia é de grande axuda. Por iso aproveito este momento para dicirlles as nenas, nenos e adolescentes que se unan ao consello. Precisamos do voso traballo colaborativo para que para crear un concello máis seguro para todas e todos”, manifestou Moure Varela.

13/05/2021 in Educación e tecnoloxía, Mocidade

Charlas de prevención da violencia psicolóxica ao alumnado dos centros de ensino secundario

A Oficina Municipal de Información Xuvenil (OMIX) e a Concellería de Educación promoveron un ciclo de charlas de prevención da violencia sicolóxica dirixidas a mozas e mozos, alumnos dos centros de ensino secundario que se están a impartir durante esta semana.

Hoxe, a concelleira de Educación, Lourdes Moure acudiu ao IES Pino Manso para seguir unha desas charlas que imparten Elena Gómez Amoedo, técnica superior en promoción de igualdade de xénero; Daniel Rodriguez González e Tania González Iglesias, funcionarios adscritos á unidade de policía xudicial de violencia de xénero en O Porriño.

A concelleira faloulles ás mozas e mozos de que presten “moita atención ás recomendacións destes técnicos e que ao menor indicio ou síntoma de que poidan estar sendo obxecto de violencia psicolóxica que reaccionen denuncien”.

O obxectivo destas charlas é formar os alumnos e alumnas na problemática da violencia de xénero e facilitarlles ferramentas para a detección, a prevención e a intervención fronte aos malos tratos físicos e psicolóxicos á muller, especialmente por parte das súas parellas. Así mesmo, abordase a problemática dos malos tratos no noivado e entre adolescentes.

As charlas están a desenvolverse nos centros IES PINO MANSO, IES RIBEIRA DO LOURO, CPR STO. TOMAS e CPR HNOS. QUIROGA. En total serán 97 as alumnas e alumnos participantes, con idades entre os 14 aos 16 anos.

 

06/05/2021 in Educación e tecnoloxía

A concelleira de Educación entrevistada no CEIP da Ribeira para “Louriña TV Escolar”

A concelleira de Educación, Lourdes Moure foi entrevistada por nenos e nenas de 4º de Primaria do CEIP da Ribeira, para a nova canle de “Louriña TV escolar”.

Esta iniciativa, promovida polo Concello, a través da OMIX do Porriño, como un proxecto colectivo de innovación educativa na que poidan estar implicados todos os centros educativos do termo municipal.

A concelleira coñeceu así, de primeira mán, os obradoiros que se están a realizar nos diferentes colexios do Porriño para participar nesta canle municipal de televisión “on line” para o alumnado porriñés.

De feito xa está disponible un primeiro vídeo feito por alumnos do CEIP de Mosende coa colaboración de alumnos do CPR Hnos Quiroga que puxeron as súas voces.  

Deixamos ligazón coa canle en Youtube

https://youtu.be/ud7dve8dbWk

Aproveitando a visita ao CEIP da Ribeira, a concelleira Moure Varela tamén asistiu a unha das sesións de “Ecopercussión”. Consiste en obradoiros para a formación e execución de grupos de percusión formados polos nenos e nenas mediante instrumentos con materiais reciclados como botes de pintura, bidóns ou latas.

Nesta actividade, tamén promovida polo Concello a través da OMIX do Porriño, participan 267 alumnos dos centros de educación primaria, ata o vindeiro 21 de abril.

 

15/04/2021 in Educación e tecnoloxía

O Concello non intervirá no Colexio de Budiño xa que a Xunta de Galicia asumirá as súas responsabilidades

 

A Concellería de Educación amosa a súa satisfacción de ter acadado que “en 24 horas a Xunta de Galicia asuma as súas responsabilidades” e, polo tanto, atenda o urxente arranxo da cuberta do CEIP da Cruz, en Budiño que presenta un risco importante, segundo acreditou un informe da arquitecta municipal.
A directora do devandito colexio, despois de recibir esta mañá a visita ao centro do xefe territorial de Educación, César Pérez Ares, solicitou á concelleira Moure Varela que non envíe aos Bombeiros pasado mañá venres para a desmontaxe das partes da cuberta que se atopa en peor estado. A directora do CEIP indicoulle á concelleira de Educación que a Unidade Técnica da Consellería de Educación da Xunta manifestoulle que vai facer unha valoración da situación do inmoble e emitir un informe”.
Deste xeito, o Concello do Porriño “considerase eximido de calquera responsabilidade que poida acontecer” e, por outra banda, “quedamos ca plena tranquilidade de ter actuado en canto se nos demandou”, segundo valorou a concelleira, Lourdes Moure.

14/04/2021 in Educación e tecnoloxía

O Concello insta á Xunta a mudar a cuberta do Colexio de Budiño que se vai desmontar en parte para evitar riscos

Lourdes Moure, concelleira de Educación inspeccionou hoxe xunto co enxeñeiro municipal e persoal do Parque de Bombeiros, o estado da cuberta do Colexio da Cruz, en Budiño. Dúas zonas do tellado do centro escolar supoñen un serio risco, segundo acreditou un informe da arquitecta municipal que o Concello xa remitiu á Consellería de Educación para que a Xunta de Galicia acometa a correspondente reparación. Tamén a dirección do Colexio solicitou formalmente á Consellería o arranxo urxente da cuberta.

Namentres hoxe procedeuse a sinalizar e valar a zona de máis risco ata que o venres se desmonte a cuberta, a partir das 10 horas. Persoal do parque comarcal de Bombeiros do Porriño en colaboración cos servizos técnicos municipais realizarán a desmontaxe das partes da cuberta que se atopan en peor estado.

A dirección do CEIP da Cruz notificará aos pais e nais de alumnos desta circunstancia e dos cambios nos itinerarios de entrada e saída do centro.

13/04/2021 in Educación e tecnoloxía

O Delegado de Zona Franca entregou as chaves do local que acollerá a futura gardería infantil dos polígonos industriais do Porriño

David Regades, delegado do consorcio Zona Franca entregou este mediodía, en presenza da alcaldesa, Eva Garcia, as chaves do local que acollerá a futura gardería infantil dos polígonos industriais da Granxa e das Gándaras.

O local atópase no centro de servizos do Consorcio Zona Franca, no polígono da Granxa.

Beatriz Cabaleiro, directora da firma de centros de educación infantil “Trastes”, recibiu as chaves co propósito de axeitar as instalacións para a súa apertura no vindeiro setembro cunha capacidade para 74 nenos e nenas.

Desde xeito atendese unha demanda histórica da Entidade de Conservación de A Granxa e da Asociación de Empresarios de As Gándaras que por fin será implementada.

12/04/2021 in Alcaldía, Educación e tecnoloxía, Servizos sociais, Urbanismo, comercio e industria

O Concello abre a fase informativa do proxecto internacional de empoderamento da mocidade contra o cambio climático, financíado pola UE

O Concello do Porriño iniciou a fase informativa cunha primeira reunión con diversas asociacións para explicarlles o proxecto sobre mocidade e cambio climático no abeiro do Programa de Desenvolvemento das Capacidades da Mocidade, xestionado directamente pola Comisión Europea e cun orzamento total de 150.000€.
O proxecto internacional liderado polo Concello de Porriño “inclúe accións de capacitación con cursos, seminarios e campamentos formativos, e accións de mobilidade coa organización de eventos no Porriño e nos países participantes que son Portugal, Cabo Verde e Mozambique”, segundo explicou Lourdes Moure, concelleira de Educación e Fondos Europeos.
Moure Varela presidiu esta primeira reunión de traballo convocada a través da Oficina Municipal de Información Xuvenil (OMIX) e coa colaboración do profesor Amador Ordóñez, director do proxecto. Asistiron representantes das asociacións: Amas de Casa, “As Mimosas” de Carracido; Centro Cultural de Carracido; e representantes da entidade local menor de Chenlo, Casal Chan Budiño e San Xurxo de Mosende.
Xunto co Concello participan as ong’s ASPEA (Asociación Portuguesa de Protección Ambiental) e a mozambicana ASEJANA (Asociación para a Xuventude e Educación de Adultos de Nampula). Tamén o centro de ensino porriñés IES Ribeira do Louro en representación da Consellería de Educación da Xunta de Galicia e finalmente a Universidade de Cabo Verde.
O proxecto denominado “EYFEC” (siglas en inglés de “Empowering Youth for Facilitating Ecological Transition”) ten como obxectivo empoderar á mocidade e ás institucións públicas e ás ong’s como axentes de cambio para o desenvolvemento ambiental sostible, obxectivo que cobra especial importancia no contexto actual de crise económica provocada pola pandemia sanitaria.

07/04/2021 in Educación e tecnoloxía, Proxectos Europeos