Educación e tecnoloxía

• O alcalde Alejandro Lorenzo e o conselleiro de Educación Román Rodríguez fixeron entrega destas axudas ao alumnado dos institutos Pino Manso e Ribeira do Louro
• Reciben cadansúa aportación de 300 euros polos bos resultados acadados na PAU

O Porriño, 5 de agosto de 2025.- Laura Rodríguez, María Quintas, Victoria Álvarez, Alejandra Pérez e Lucía Casilla do IES Pino Manso e Laura Romero, Alicia Gómez, Martín Táboas, Andrea Lorenzo e Anxo Martínez, do IES Ribeira do Louro, son os primeiros estudantes en recibir as Becas Antonio Palacios convocadas polo Concello do Porriño destinadas ao alumnado de 2º de Bacharelato que obtivo unha nota igual ou superior ao 8,5 na fase xeral da Proba de Acceso á Universidade (PAU).

O alcalde, Alejandro Lorenzo, e o conselleiro de Educación, Ciencia, Universidades e Formación Profesional, Román Rodríguez, presidiron a entrega destas becas celebrada esta mañá nun acto público na praza Arquitecto Antonio Palacios. O rexedor trasladoulle os seus parabéns “por acadar a excelencia académica, cuns expedientes inmellorables, froito do esforzo e dedicación ao longo deste último curso e de toda a traxectoria formativa en xeral”. O alcalde tivo tamén palabras de agradecemento ás familias e ao profesorado destes mozos, asistentes ao acto, “porque detrás de cada un destes logros hai moito apoio, moita paciencia e moito cariño”. 

Nesta primeira edición fíxose entrega dunha decena de becas de 300 euros cada unha, “pero máis alá do valor económico, o importante é o que representan estas axudas: o recoñecemento ao voso esforzo, á vosa perseveranza e á vosa capacidade de superación”. Neste senso, tanto o alcalde como o conselleiro animáronos a desfrutar do que queda de verán e a prepararse para afrontar a súa nova etapa educativa a partir do 8 de setembro, cando comecen os seus estudos universitarios.

O titular do departamento educativo da Xunta felicitou ao Concello pola iniciativa e ao alumnado polos seus bos resultados, polos  que “sodes o orgullo das vosas familias, dos vosos centros, deste concello e, en definitiva, de Galicia”. Así mesmo, puxo en valor o traballo dos equipos directivos e profesorado dos centros do Porriño, “que tamén merecen o recoñecemento por este éxito”.

Ao acto de entrega asistiron tamén o xefe territorial de Educación en Pontevedra, César Pérez; a concelleira de Educación, Carolina González e demais edís do goberno municipal.

As becas levan o nome de Antonio Palacios, arquitecto porriñés de renome, como símbolo do compromiso do Concello coa cultura, o coñecemento e a formación e así o confirmou o alcalde facendo fincapé en que “se alguén soñou ao grande para conseguir o que máis quería e traballou arreo, ese foi Antonio Palacios”. 

O Concello do Porriño continúa así a súa aposta decidida pola educación de calidade e polo apoio e a posta en valor das novas xeracións como base do desenvolvemento social e persoal do municipio.

Porriño, 3 de xullo de 2025.– Esta mañá tivo lugar na Sala de Comunicacións do Concello do Porriño a sinatura do convenio entre o Concello e a Xunta de Galicia para a implantación do novo Grao Básico de Peiteado e Estética no IES Ribeira do Louro. No acto participaron o Alcalde, Alejandro Lorenzo; o Conselleiro de Educación, Ciencia, Universidades e Formación Profesional, Román Rodríguez González; María Eugenia Pérez Fernández, Directora Xeral de Formación Profesional; Carolina González, Concelleira de Educación do Concello do Porriño; César Pérez Ares, director territorial da CECUFP en Pontevedra;  e Juana Muñoz Ibernón, Directora do IES Ribeira do Louro.

A través deste acordo, o Concello do Porriño poñerá á disposición da Conselleía de Educación, Ciencia, Universidades e Formación Profesional, un espazo para impartir a nova formación, que forma parte da familia profesional de Imaxe Persoal, que contará con máximo de 18 prazas. 

O novo Grao Básico de Peiteado e Estética terá unha duración de dous cursos académicos, cun total de 2.000 horas e 18 prazas para alumnado que obterá titulación oficial. Ofrece formación práctica e teórica en técnicas de limpeza e cambios de forma e cor do cabelo, maquillaxe, depilación, manicura e pedicura. Esta aula-taller de peiteado está totalmente equipada con secadores, lavacabezas, vaporizadores profesionais… A parte práctica terá lugar no Multicentro de Torneiros, nunha das numerosas aulas homologadas que están á disposición da impartición de cursos, mentres que as sesións teóricas impartiranse no propio IES Ribeira do Louro.

O Alcalde, Alejandro Lorenzo declarou: “Hoxe é un día moi especial para o Porriño e para o futuro formativo da nosa mocidade. Asinamos un convenio fundamental que permitirá implantar este grao básico, abrindo portas ao futuro do alumnado e contribuíndo á súa formación e inserción no mercado laboral.”

Pola súa banda, o Conselleiro, Román Rodríguez, sinalou que “máis de 56.000 persoas veñen de solicitar praza para cursar algunha modalidade de Formación Profesional en Galicia o vindeiro curso” e subliñou que, unha vez máis, “estas cifras avalan o interese da cidadanía por estas ensinanzas en Galicia”. A primeira adxudicación de prazas realizarase o 15 de xullo e os interesados terán ata o 22 de xullo par formalizar a matricular. 

A oferta de FP no Porriño acadará o vindeiro curso as 224 prazas ofertadas, das cales a meirande parte (206) concéntranse no Ribeira do Louro, mentres que as outras 18 correspóndense co grao básico de Informática de Oficina no IES Pino Manso.

O Concello do Porriño reitera o seu compromiso coa formación da mocidade e coa colaboración institucional para fortalecer a oferta educativa no municipio.

O Porriño, 30 de xuño de 2025.- O Concello do Porriño vén de publicar as bases reguladoras para a convocatoria das Becas Antonio Palacios 2025, dirixidas ao alumnado do municipio que obtivese os mellores expedientes académicos na PAU.

Con esta iniciativa, O Concello quere recoñecer o esforzo e a excelencia do alumnado de 2º de Bacharelato que acadou as mellores cualificacións na Proba de Acceso á Universidade (PAU). Concederanse un total de 15 axudas de 300 euros cada unha, destinadas a apoiar os estudos universitarios do alumnado con mellores resultados. A selección do alumnado realízase atendendo a unha nota igual ou superior ao 8,5 na fase xeral da PAU.

Mañá ábrese un prazo de 15 días hábiles para que as persoas interesadas presenten a súa solicitude a través do Rexistro do Concello, xunto coa documentación requirida, que se detalla nas propias bases.

Accede ás bases na siguente ligazón: 

BASES BECAS ANTONIO PALACIOS 2025

A entrega simbólica destas becas terá lugar nun acto institucional no Concello do Porriño nos vindeiros días, co obxectivo de homenaxear ao alumnado galardoado e poñer en valor o papel dos centros educativos e das familias no proceso formativo. As becas levan o nome de Antonio Palacios, arquitecto porriñés de renome, como símbolo do compromiso do Concello coa cultura, o coñecemento e a formación.

O Concello do Porriño continúa así a súa aposta decidida pola educación de calidade e polo apoio ás novas xeracións como base do desenvolvemento social e persoal do municipio.

• Unha publicación feita integramente polo alumnado, na que se recollen reflexións sobre cuestións sociais, dilemas éticos, poesía, música, entrevistas, política, psicoloxía, cultura ou cinema.

O Porriño, 20 de xuño de 2025.– Por cuarto ano consecutivo, o alumnado de 2º de Bacharelato do IES Pino Manso do Porriño presenta unha nova edición da súa revista OPino, un proxecto creativo e interdisciplinar centrado na filosofía, a arte e o pensamento crítico, que conta co apoio do Concello do Porriño.

OPino é unha publicación feita integramente polo alumnado, na que se recollen reflexións sobre cuestións sociais, dilemas éticos, poesía, música, entrevistas, política, psicoloxía, cultura ou cinema. A parte gráfica tamén é responsabilidade dos propios estudantes, convertendo a revista nun proxecto colaborativo que implica aos departamentos de Filosofía e Debuxo.

A edición deste ano —a cuarta da historia da revista— tivo como tema central “os tabús”. O proceso comezou coa formación dun equipo de dirección e traballo composto por estudantes das materias de Filosofía, Psicoloxía e Debuxo Artístico. Este equipo encargouse de coordinar a redacción dos textos, elaborar entrevistas, deseñar as imaxes que acompañan os artigos e realizar a edición final da publicación.

As persoas responsables da dirección foron:

Raquel Álvarez Gómez, Victoria Álvarez Linares, Alejandra Pérez López, Ariadna Martínez Gomes, Laura Rodríguez Rodríguez, Ainoa Alonso Flores, María Quintas Granja e Sara Conde Iglesias.

Todo o proceso contou co asesoramento do profesorado, en especial dos docentes Juanca e Pedro, que acompañaron o equipo ao longo do traballo.

O alcalde do Porriño, Alejandro Lorenzo, felicitou ao equipo de dirección, ao alumnado participante e ao centro educativo, sinalando que “este proxecto é un exemplo de traballo en equipo que amosa non só a defensa do pensamento crítico, a creatividade e o coñecemento, senón tamén o compromiso coa responsabilidade social por parte da mocidade do Porriño”. Engadiu ademais: “Noraboa e que OPino siga sumando edicións. Contade sempre co apoio do voso Concello.”

A revista OPino pode consultarse tamén en formato dixital a través da páxina web do IES Pino Manso.

O Porriño, 19 de xuño de 2025.– O Concello do Porriño concede, por primeira vez, as Becas Antonio Palacios aos mellores expedientes académicos da PAU do noso municipio, unha iniciativa coa que se recoñece o esforzo e a excelencia do alumnado de 2º de Bacharelato que acadou as mellores cualificacións na Proba de Acceso á Universidade (PAU).

O Concello concederá un total de 15 axudas de 300 euros cada unha, destinadas a apoiar os estudos universitarios do alumnado con mellores resultados. A selección do alumnado realizouse atendendo a unha nota igual ou superior ao 8,5 na fase xeral da PAU.

A entrega simbólica destas becas terá lugar nun acto institucional no Concello do Porriño nos vindeiros días, co obxectivo de homenaxear ao alumnado galardoado e poñer en valor o papel dos centros educativos e das familias no proceso formativo. As becas levan o nome de Antonio Palacios, arquitecto porriñés de renome, como símbolo do compromiso do Concello coa cultura, o coñecemento e a formación.

O Alcalde do Porriño, Alejandro Lorenzo, destaca que “é un orgullo para todo o municipio contar conestudantes deste nivel. Con estas becas queremos premiar o esforzo, recoñecer o talento e apoiar o futuro académico da nosa mocidade”.

As persoas galardoadas poderán acceder a estas axudas unha vez se publiquen as correspondentes bases reguladoras, que establecerán os requisitos e condicións para a súa concesión.

O Concello do Porriño continúa así a súa aposta decidida pola educación de calidade e polo apoio ás novas xeracións como base do desenvolvemento social e persoal do municipio.

O Porriño, 12 de xuño de 2025.– O Concello do Porriño organizou esta semana unha actividade educativa innovadora dirixida ao alumnado de 6º de Educación Primaria dos centros escolares do municipio. A iniciativa, que tivo lugar os días 10 e 12 de xuño, permitiu que 126 nenos e nenas, acompañados por 9 docentes, participasen en visitas guiadas á Escola de Motociclismo IKERIC RACING Sport Galicia, situada nun complexo de máis de 25.000 metros cadrados.

Durante as visitas, os participantes coñeceron as instalacións, recibiron nocións básicas sobre seguridade viaria, mecánica e o funcionamento do motociclismo de competición, e tiveron ocasión de compartir espazo con pilotos profesionais convidados/as especialmente para a actividade.

O Alcalde do Porriño, Alejandro Lorenzo, participou nunha das xornadas e destacou “a importancia de que o Concello promova accións formativas que saen fóra das aulas e que permiten ao alumnado aprender dun xeito práctico, ameno e con valores”. Durante a súa visita, afirmou tamén que: “Queremos que os rapaces e rapazas do Porriño teñan acceso a experiencias enriquecedoras que lles abran portas a novos intereses, como é o caso do motociclismo, sempre desde a seguridade e a formación”.

Pola súa parte, a Concelleira de Educación, Carolina González Costas, sinalou que “o obxectivo destas visitas foi proporcionar unha experiencia formativa distinta, que axude a concienciar sobre a seguridade na estrada, esperte vocacións e promova estilos de vida saudables a través do deporte”.

A actividade desenvolveuse en colaboración con IKERIC RACING Sport Galicia, e contou tamén coa implicación da Concellería de Educación e da OMIX do Porriño, que coordinaron o desprazamento e a organización dos centros educa6vos participantes: CPR Santo Tomás, CEIP Cruz-Budiño, CEIPP Xosé Fernández López e CEIPP Antonio Palacios.

Con esta iniciativa, o Concello do Porriño reafirma o seu compromiso cunha educación integral, dinámica e adaptada aos intereses da mocidade actual.

• Esta aula beneficiará directamente a uns 40 nenos e nenas do centro

O Porriño, 10 de xuño de 2025.– O CEIP da Ribeira inaugurou hoxe unha nova aula sensorial destinada a ofrecer un espazo adaptado e inclusivo para o alumnado con Trastorno do Espectro Autista (TEA) e outras dificultades de aprendizaxe.

O acto contou coa presenza do Alcalde, Alejandro Lorenzo; a Concelleira de Educación, Carolina González; o Xefe Territorial de Educación en Pontevedra, César Pérez Ares, así como da directora do centro, Teresa Castro, e profesorado.

“A aula sensorial é un lugar onde o alumnado pode interactuar co entorno dun xeito máis tranquilo e relaxado, favorecendo a súa aprendizaxe e benestar. Conta con diferentes zonas adaptadas aos distintos sentidos como a zona da luz, do tacto, do gusto, unha área de relaxación con piscina de bolas e ata un espazo para proxeccións audiovisuais con sons da natureza”, explicou Teresa Castro. Esta aula beneficiará directamente a uns 40 nenos e nenas do centro.

Fundado en 1984 no Polígono de Torneiros, o CEIP da Ribeira é un centro de referencia na atención preferente a alumnado con TEA e necesidades específicas, reafirmando así o seu compromiso coa educación inclusiva e de calidade.

O Alcalde, Alejandro Lorenzo, manifestou que “esta aula sensorial é un paso máis para garantir unha educación igualitaria e de atención personalizada para todo o alumnado do Porriño. Continuamos traballando para que os centros educativos da nosa vila dispoñan dos recursos necesarios para acoller a diversidade e promover o desenvolvemento integral do alumnado.”

Esta nova aula sensorial é a segunda que se habilita na vila, sumándose á xa existente no centro de educación especial de Aceesca, reforzando o compromiso do Concello do Porriño coa educación inclusiva e a atención a toda a diversidade.

Porriño, 30 de maio de 2025.– Esta tarde tivo lugar no Concello do Porriño a presentación oficial de ACiENCiACERTA 2025, a segunda edición da Mostra de Ciencias na Rúa, que este ano medra en duración e en ambición. A praza do Concello e as rúas do centro urbano converteranse durante tres días –do mércores 4 ao venres 6 de xuño– nun espazo aberto para a ciencia, a divulgación e a participación cidadá.

Durante a presentación interviron o Coordinador do evento, Juancho Castaño; a Concelleira de Educación, Carolina González; a Directora de Comunicación & Global Brand en Zendal Group, Beatriz Díaz; o Director Territorial de Educación en Pontevedra, César Pérez Ares e Alcalde do Concello do Porriño, Alejandro Lorenzo, que destacou o éxito da primeira edición e a clara aposta por consolidar este evento como unha cita anual de referencia no ámbito da divulgación científica.

ACiENCiACERTA está organizada polo Concello do Porriño co patrocinio de Zendal Group e, como novidade principal deste ano, conta coa colaboración institucional da Universidade de Vigo.

O tema protagonista desta edición será o cambio climático, que marcará tanto o contido das conferencias como a imaxe gráfica do evento. O obxectivo é achegar á cidadanía unha reflexión colectiva arredor da ciencia e os grandes retos ambientais do noso tempo.

A madriña de ACiENCiACERTA 2025 é a porriñesa Katia Guimaré González, enxeñeira industrial que desenvolve a súa carreira profesional na empresa ferroviaria alemá Deutsche Bahn AG. Un referente de talento galego no exterior, comprometida coa innovación e a excelencia técnica.

Katia Guimaré formará parte do xurado científico que o venres 6 de xuño avaliará os proxectos presentados polos dez centros educativos do Porriño, no marco do Concurso de Proxectos Científicos Escolares, con dúas categorías: menores e maiores de 12 anos, ademais dun premio do público. Completan o xurado Silvia Diz de Almeida, investigadora en medicina molecular e doutora pola USC e Ángel Pichel Loureiro, médico de Urxencias do Hospital Álvaro Cunqueiro e docente universitario. 

Programación completa

• Mércores 4 de xuño

Lugar: Botica Nova de Palacios

Brinde pola Ciencia con Aguas de Mondariz

Charlas:

– “Natureza que protexe: o papel da vexetación no río”. A cargo de Sofía Villar Rúa e Elena Seoane Martínez

– “O cambio climático contado por un Hominino a un Neandertal”. A cargo de Eduardo Méndez Quintas, Hugo Bal García e Iván Rey Rodríguez

• Xoves 5 de xuño

Charlas e actividades:

– “O extraordinario planeta A no que habitamos”. Con Martín Barreiro e Ana Mariño

– “A ornitoloxía e o cambio climático”. Con María Vidal Malde

– “Derivas”. Instalación artística sostible de Julia de la Cal

• Venres 6 de xuño

Mostra de Proxectos Científicos Escolares nas rúas do centro

Votación do Premio do Público

Charlas:

– “O mar e o cambio climático”. Con Laura García Peteiro e Xulia Pisón

– “A natureza na obra de Miguelanxo Prado”. Conversa co recoñecido autor galego de cómic

ACiENCiACERTA 2025 quere achegar a ciencia á rúa, fomentar vocacións e crear espazos de encontro entre profesionais da ciencia, estudantes e veciñanza. Desde o Concello do Porriño convidamos a toda a cidadanía a participar e gozar desta festa da ciencia ao aire libre.