O mozo Alejandro Gómez reclamou no nome da infancia porriñesa que o Parlamento Galego garanta “a redución das desigualdades”


O mozo porriñés Alejandro Gómez Granja reclamou ao Parlamento de Galicia que “os grupos políticos tomen todas as medidas necesarias para garantir a redución das desigualdades e na procura de cidades e comunidades sustentables”.

Alejandro, alumno do IES Ribeira do Louro, falou hoxe como voceiro no nome do Consello Municipal da Infancia e Adolescencia do Porriño, na sesión telemática celebrada polo Parlamento de Galicia coa ocasión do VIII Foro Infantil que organizaron Unicef Galicia e a Cámara Autonómica. Miguel Santalices, titular del Parlamento, presidiu a sesión que contou tamén coa participación de Myriam Garabito, presidenta de UNICEF, dos tres grupos políticos da Cámara e da Conselleira de Política Social, Fabiola García

A concelleira de Educación do Porriño, Lourdes Moure que seguiu dende o seu despacho a sesión e nomeadamente a intervención do representante da infancia e mocidade local expresou a súa “satisfacción polo papel que por terceiro ano consecutivo os nenos e nenas porriñeses tiveran a oportunidade de expoñer directamente as súas opinións ante os deputados do Parlamento de Galicia”.
Moure Varela lembrou que o vindeiro venres 20, O Porriño celebrará o pleno infantil coa ocasión de celebrase o Día Mundial dos Dereitos da Infancia. Polas actuais circunstancias sanitarias, a sesión será telemática de xeito que os alumnos e alumnas que intervirán como voceiros, o farán dende os seus respectivos centros docentes. A alcaldesa Eva García e a concelleira de Educación tamén participaran en liña. A sesión comezará ás 10,30 horas.

Un alumno do Porriño intervirá no pleno infantil do Parlamento de Galicia

Este martes terá lugar o VIII Foro Autonómico de Participación infantil e Adolescente que organiza o Parlamento de Galicia no que intervirá o alumno porriñés Alejandro Gómez Granja en representación do Consello Municipal da Infancia. A sesión será telemática a partir das 12,30 horas e poderá seguirse a través da páxina web do Parlamento. Deixamos ligazón.

www.parlamentodegalicia.gal

Trátase dun acto organizado por UNICEF Galicia en colaboración co Parlamento Autonómico para conmemorar o Día Universal dos dereitos da Infancia. Ademais dos representantes dos distintos consellos municipais de infancia e adolescencia de toda Galicia, intervirán o Presidente do Parlamento, Miguel Ángel Santalices, a Presidenta de UNICEF Comité Galicia, Myriam Garabito, representantes dos tres grupos parlamentarios e a Conselleira de Política Social, Fabiola García.

A intervención de Alejandro Gómez Granja, que será o representante dos nenos e nenas do Porriño e que foi elixido entre os/as voceiros/as dos distintos centros educativos, xirará en relación aos Obxectivos de Desenvolvemento Sostibles que teñen que ver coa redución das desigualdades, as cidades e comunidades sustentables e a produción e consumo responsable

Lourdes Moure, Concelleira de Educación e promotora xunto ca OMIX do Porriño,  da iniciativa “Cidades amigas da infancia”, indicou que “é un pracer que por terceiro ano consecutivo os nenos e nenas do Porriño teñan oportunidade de expoñer as súas opinións directamente no parlamento autonómico”. Moure Varela convidou “a todos os centros educativos a que poidan seguir a retransmisión do acto a través de internet”.

 

O Concello lidera un proxecto internacional de empoderamento da mocedade contra o cambio climático financiado pola Unión Europea

O Concello do Porriño acadou a aprobación pola Unión Europea dun proxecto sobre mocedade e cambio climático no abeiro do Programa de Desenvolvemento das Capacidades da Mocedade, xestionado directamente pola Comisión Europea e cun orzamento total de 150.000€.

O proxecto internacional liderado polo Concello de Porriño “inclúe accións de capacitación con cursos, seminarios e campamentos formativos, e accións de mobilidade coa organización de eventos no Porriño e nos países participantes que son Portugal, Cabo Verde e Mozambique”, segundo explicou Lourdes Moure, concelleira de Educación e Fondos Europeos.  

O vindeiro xoves 19 “haberá unha primeira reunión telemática dos socios do proxecto que suporá o comezo das actividades que se desenvolverán durante 24 meses”, informou Moure Varela que ponderou que “se trata do primeiro proxecto formativo presentado e promovido polo Concello do Porriño que acada financiación europea”.

A concelleira celebrou unha reunión de traballo preparatoria con asistencia da alcaldesa, Eva García; de Noelia de la Fuente, responsable da OMIX e do profesor Amador Ordóñez, coordinador de proxectos internacionais e docente do IES Ribeira do Louro.

Xunto co Concello participarán as ong’s ASPEA (Asociación Portuguesa de Protección Ambiental) e a mozambiqueña ASEJANA (Asociación para a Xuventude e Educación de Adultos de Nampula). Tamén o centro de ensino porriñés IES Ribeira do Louro en representación da Consellería de Ediucación da Xunta de Galicia e finalmente a Universidade de Cabo Verde.  Finalmente serán invitadas a participar asociacións culturais e veciñais e organizacións empresariais e sectoriais.  

O proxecto denominado “EYFEC” (siglas en inglés de “Empowering Youth for Facilitating Ecological Transition”) ten como obxectivo empoderar á mocedade e ás institucións públicas e ás ong’s como axentes de cambio para o desenvolvemento ambiental sostible, obxetivo que cobra especial importancia no contexto actual de crise económica provocada pola pandemia sanitaria.

“Planetario 3D” e visita ás obras de arranxo no CEIP “Antonio Palacios”

 

Esta semana comezou a actividade formativa presencial “Planetario 3D” para alumnos de Infantil e Primaria. A primeira sesión foi onte no no CEIP de Cruz-Budiño e hoxe martes celebrouse no CEIP Antonio Palacios, de Torneiros, onde acudiron a alcaldesa Eva García e a concelleira de Educación, Lourdes Moure este mediodía. Neste mesmo colexio tamén desenvolveuse hoxe unha quenda do obradoiro de educación en valores que imparte con cans de terapia e que tamén está percorrer os colexios do Porriño.

 

PLANETARIO E CINEMA 

“Planetario 3D” é unha proposta formativa que se desenvolve coa ocasión do Día Mundial da Ciencia. Celebrase de xeito presencial namentres que outra actividade denominada “Cinema 360º”, enfocada ao alumnado de Secundaria, Bacharelato e FP, terá lugar mediante sesións telemáticas, a partir do vindeiro luns 16 nos institutos do Porriño ata o luns 23. 

Ambas actividades están promovidas polo Concello do Porriño a través da Concellería de Educación e a Oficina Municipal de Información a Xuventude (OMIX) que asumiron a proposta que fixera no seu día o Consello de Participación da Infancia e Adolescencia do Porriño.


ARRANXOS NO PAVILLÓN VELLO

Coa ocasión da visita ao CEIP de Torneiros, a alcaldesa e a concelleira comprobaron o resultado final dos traballos de arranxo e pintura do vello Pavillón e dos vestiarios do mesmo que se recuperaron para o seu uso cotián. “Esta actuación desenvolveuse con medios propios do Concello, a través do departamento de Vías e Obras e a petición da dirección do colexio xa que, a causa dos protocolos anti-Covid, o pavillón deportivo novo ten que empregarse para as quendas do comedor escolar por necesidades de espazo”, segundo explicou Lourdes Moure.

O Consello Municipal da Infancia participará na sesión telemática do Parlamento de Galicia para conmemorar o Día Universal dos Dereitos dos Nenos

 
 
A pesar das dificultades que supón a situación actual, o traballo no Consello Municipal da Infancia e Adolescencia do Porriño continua preparando a súa intervención que realizará o vindeiro 17 no Parlamento de Galicia.
 
Os nenos e nenas que o compoñen, representando a todos os centros educativos do concello, preparan as propostas que exporá o seu voceiro/a na súa intervención do vindeiro martes 17 do presidente do Parlamento e dos representantes de todos os grupos parlamentarios
 
Trátase dunha actividade organizada por UNICEF Galicia en colaboración co Parlamento de Galicia que desta volta se realizará mediante unha sesión telemática. Do mesmo xeito que o pleno municipal infantil que se celebrará en Porriño o 20 de Novembro, o propio Día Universal da Infancia.
 
A Concellería de Educación do Concello do Porriño e a Oficina Municipal de Información Xuvenil (OMIX) que son os promotores da iniciativa teñen previstas outras actividades durante as próximas semanas para conmemorar a efeméride como a iluminación en azul da fachada do casa consistorial ese mesmo día, ou a posta en marcha e dinamización dun perfil propio en Instagram para dar así maior visibilidade ao traballo dos nenos, nenas e adolescentes no consello municipal de infancia.

O Concello sumase á conmemoración do Día Mundial da Diabetes


O vindeiro sábado 14 de novembro conmemórase o Día Mundial da Diabetes e coa ocasión desta efeméride, o Concello do Porriño colaborará con ANEDIA (Asociación de Nenos, Nenas e Xente Nova con Diabetes en Galicia) nunha acción informativa que terá lugar no Centro Cultural Municipal.

No vestíbulo do Centro proxectarase un vídeo para dar a coñecer as causas, os síntomas, o tratamento e as complicacións asociadas á enfermidade. Ao coincidir a celebración en sábado, o vídeo proxectarase nos días próximos a esta data.

Non obstante deixamos ligazón coa páxina web do departamento de Cultura onde se pode ver o vídeo

Conmemoración do Día Mundial da Diabetes

 

Comeza a actividade “Planetario 3D” polos centros educativos coa ocasión do Día Mundial da Ciencia


Hoxe comezou no CEIP de Cruz-Budiño a actividade “Planetario 3D” que xunto coa denominada “Cinema 360º”, están promovidas polo Concello do Porriño a través da Concellería de Educación e a Oficina Municipal de Información a Xuventude (OMIX).

Esta proposta formativa desenvolvese coa ocasión do Día Mundial da Ciencia. Terá lugar dende hoxe ata o 23 de novembro polos centros educativos da vila, de xeito presencial e tamén en liña con horarios de mañá e tarde.

Trátase dunha actividade proposta no seu día polo Consello de Participación da Infancia e Adolescencia do Porriño que aprobou o Concello.

“Planetario 3D” vai dirixido aos ciclos de educación infantil e primaria, mentres que o “Cinema 360º” enfocase ao alumnado de Secundaria, Bacharelato e ciclos de Formación Profesional.

Deixamos ligazón coa páxina web do departamento de Cultura

Planetario 3D – Cinema 360º

O Concello expresa o seu fondo pesar polo falecemento do profesor Moncho Iglesias

 

O goberno municipal no nome do Concello do Porriño expresa o seu fondo pesar polo falecemento do profesor Moncho Iglesias.

A alcaldesa Eva García lembrou a inestimable colaboración que o profesor mantivo co Concello nos traballos que se editaron ao longo destes últimos anos sobre a obra e figura do arquitecto Antonio Palacios.

Moncho Iglesias tiña un extraordinario coñecemento sobre Palacios como acredita a súa bibliografía na que hai varios títulos sobranceiros adicados ao arquitecto porriñés. De feito coa colaboración do Concello editáronse a propia tese doutoral de Iglesias que adicou a Palacios e o libro “Antonio Palacios, unha viaxe por Galicia”, no que se recompilan un cento de bocetos, debuxos e apuntes dos cadernos de campo, totalmente inéditos, que o arquitecto realizou nas súas viaxes

A alcaldesa lamentou que a desaparición de Moncho Iglesias impida a súa participación nos actos que ata o 27 de outubro de 2021 celebrará o Concello coa ocasión do “Ano Arquitecto Antonio Palacios”

Pola súa banda, tamén Lourdes Moure, concelleira de Educación recoñeceu no nome da comunidade educativa porriñesa a intensa traxectoria pedagóxica e o gran legado que deixa o profesor Iglesias como docente que foi do Instituto de Ensino Secundario Pino Manso da nosa vila ata a súa recente xubilación.

Aberta a Aula “Cemit” no Multiusos Municipal de Torneiros


A Concellería de Novas Tecnoloxías comunica que a Aula CEMIT do Concello do Porriño xa está aberta ao público nas instalacións do Multiusos Municipal de Torneiros.


Está ao dispor de calquera usuario en horarios de luns a xoves, de 9:00 a 14:00 horas e de tarde, entre as 16:00 e as 19:00. Os venres tan só en quenda matinal, de 8:00 a 15:00.

As persoas que acudan a empregar estas instalacións contarán coa axuda dun encargado da Aula. Tamén informase que en breve impartiranse cursos de informática gratuítos de iniciación e outros para persoas que xa teñan coñecementos.

Os interesados poderán seguir as diferentes convocatorias a través da páxina de Facebook da Aula Cemit O Porriño ou ben acudir ás instalacións no Multiusos de Torneiros.

Comezan os obradoiros de Educación en Valores co apoio de cans de terapia en centros docentes do Porriño


A actividade nomeada “Valores que deixan pegada”, promovida pola Concellería de Educación e a OMIX do Concello do Porriño, comezará hoxe martes a desenvolverse polos centros docentes da vila ata o 12 de novembro.

Esta actividade dirixise ao alumnado de educación infantil e primaria, cunha previsión de 400 nenos e nenas participantes entre os seguintes centros escolares: CEIP Antonio Palacios, CEIP Atios, CEIP Cruz Budiño, CEIP Mosende, CEIP Ribeira, CEIP Xosé Fernández López, CPR Hermanos Quiroga e CPR Santo Tomás.

O obxectivo xeral desta actividade é trasladar os beneficios que achegan os animais a contornos escolares, coa finalidade de traballar de forma transversal a educación en valores e a posesión responsable de mascotas, con obradoiros específicos orientados a este fin.