Educación e tecnoloxía

A 44ª edición do Trofeo Horacio Barros chega ao parque de Torneiros o 1 de maio

  • A proba, organizada por Master da Louriña, reunirá a nenos e nenas de diferentes idades nunha cita que combina deporte, habilidade e aprendizaxe.

O Porriño, 29 de abril de 2026.– O parque de Torneiros converterase o 1 de maio nun espazo de referencia para o ciclismo base coa celebración da 44 edición do Trofeo Horacio Barros, que reunirá aos ciclistas máis mozos nun circuíto pensado para poñer a proba a súa destreza, equilibrio e capacidade técnica sobre a bicicleta.

A actividade, organizada pola entidade Master da Louriña coa colaboración do Concello do Porriño, está dirixida a nenos e nenas das categorías promesas, principiantes, alevíns, infantís e cadetes, tanto en modalidade masculina como feminina, así como á categoría junior feminina.

“Con iniciativas coma esta, reafirmamos o noso compromiso co deporte base e coa promoción de actividades que favorezan o desenvolvemento integral da infancia e da mocidade”, explicaba o alcalde Alejandro Lorenzo xunto a Horacio Barros e o presidente do Club Master da Louriña e parte da Xunta Directiva, na presentación do evento.

Ao longo da xornada, o parque transformarase nun percorrido dinámico no que cada participante terá que afrontar diferentes retos técnicos. O circuíto incluirá unha xincana composta por probas como paralelas, labirintos de distinta dificultade, voltas a un círculo, exercicios de puntería, balancíns ou probas de equilibrio como o surplace, ademais doutros obstáculos como a recollida de bidón ou o paso de altura. Un conxunto de exercicios deseñados para traballar habilidades clave no ciclismo base dun xeito lúdico e formativo.

As saídas das distintas categorías realizaranse de maneira progresiva ao longo da xornada, adaptándose ao desenvolvemento da competición e garantindo unha organización fluída do evento. A normativa aplicable rexerase polo regulamento da Real Federación Galega de Ciclismo, que tamén resolverá calquera situación non prevista.

Máis alá da competición, esta cita deportiva busca fomentar a práctica do ciclismo entre a mocidade, promovendo hábitos saudables e valores como o esforzo, a superación e o respecto polas normas. Ao mesmo tempo, contribúe a dinamizar o uso dos espazos públicos do municipio, convertendo o parque de Torneiros nun punto de encontro para o deporte e para unha convivencia saudable.

29/04/2026 in Deportes, Educación e tecnoloxía, Parques e xardíns, Parroquias

A Biblioteca do Porriño, gañadora do Premio Nacional REBIUN 2026 polo proxecto de biblioterapia infantil “Contos que curan”

  • A noticia non puido chegar nun momento máis simbólico. O alcalde do Porriño recibiu a confirmación oficial de que a Biblioteca Municipal foi a gañadora da VIII edición do Premio REBIUN mentres se atopaba nas propias instalacións do centro, rodeado de libros e nenos e nenas celebrando o Día do Libro.
  • O “Premio REBIUN ás boas prácticas en biblioteca”, un dos máis importantes de España no ámbito das bibliotecas, está destinado a recoñecer o mellor proxecto de boas prácticas levado a cabo por bibliotecas españolas non universitarias, así como por organismos relacionados coas bibliotecas como colexios profesionais, asociacións e institucións bibliotecarias.

O Porriño, 23 de abril de 2026. A cultura porriñesa está de parabéns. A Biblioteca Municipal do Porriño foi distinguidaco “Premio REBIUN ás boas prácticas en biblioteca”, un dos máis importantes de España no ámbito das bibliotecas, que está destinado a recoñecer o mellor proxecto de boas prácticas levado a cabo por bibliotecas españolas non universitarias, así como por organismos relacionados coas bibliotecas como colexios profesionais, asociacións e institucións bibliotecarias.

Na súa VIII convocatoria, no 2026 a Red de Bibliotecas Universitarias y Científicas Españolas (REBIUN), concedeu este galardón único á Biblioteca do Porriño polo seu proxecto de biblioterapia infantil “Contos que curan”, unha colección de boletíns temáticos que teñen como obxectivo axudar a previr, identificar e xestionar distintos problemas e trastornos mentais na infancia.

Precisamente, a comunicación do prestixioso galardón coincidiu coa celebración dunha sesión de “Contos que Curan”, unha das actividades programadas con motivo do Día do Libro. O alcalde, Alejandro Lorenzo, participaba na xornada xunto ao alumnado de 2º de Primaria do CEIP Antonio Palacios. A alegría desbordouse na sala cando Albino Alonso Rodríguez e David Pérez Rego, responsables da Biblioteca, confirmaron que a Biblioteca do Porriño fora elixida entre proxectos de toda España polas súas boas prácticas e o seu compromiso social. “Recibir este premio precisamente aquí, cos escolares do Antonio Palacios e celebrando o poder da lectura, é o mellor recoñecemento posible ao esforzo de todo o persoal bibliotecario”, destacou o alcalde tras coñecer a noticia.

O premio

Os proxectos e experiencias aptos para presentarse a este premio deben estar encamiñados á boa xestión das bibliotecas, ao favorecemento do acceso equitativo á información e a cultura, á mellora do acceso aos servizos bibliotecarios ou o uso innovador da tecnoloxía no contexto bibliotecario. Ademais, deben estar vinculados ao desenvolvemento dos Obxectivos de Desenvolvemento Sustentable (ODS) da Axenda 2030.

O xurado do premio destaca que este proxecto promove o acceso equitativo á información e á cultura, ao crear un recurso documental para informar e axudar á comunidade, cun forte compromiso social. Tamén, que consegue mellorar o acceso aos servizos bibliotecarios, porque baseándose nas funcións tradicionais das bibliotecas (busca, selección, clasificación e recomendación de lecturas), créase un novo servizo documental aberto, gratuíto e accesible en varias linguas e formatos, o que aumenta o número de usuarios potenciais en todo o mundo hispanofalante.

Contos que curan

A colección “Contos que curan” está composta por boletíns que se publican periodicamente. Cada número está centrado nun tema, sobre o que se ofrece un extenso repertorio de contos recomendados para xestionar o problema en cuestión. O persoal da biblioteca porriñesa busca, selecciona, clasifica e ofrece a información completa de cada conto, para que familias, colectivos educativos ou profesionais da saúde podan ter unha práctica guía de recursos coa que levar a cabo unha “terapia con libros”. Os destinatarios do proxecto son nenos e nenas de 3 a 12 anos, unha etapa fundamental para a prevención, detección e tratamento de problemas emocionais que poden condicionar a vida do menor.

Ata a data, téñense publicado tres números desta colección (“Morte e loito”, “Acoso escolar” e recentemente, “Timidez e fobia social”) que tratará outras cuestións como a sexualidade, o sono e o medo á escuridade, a normalización da neurodiverxencia (autismo, dislexia, TDAH, síndrome de Down, etc.) e capacidades múltiples, a baixa autoestima, os malos tratos, etc.

Os boletíns son publicados en formato físico e distribuídos gratuitamente a persoas e institucións que podan estar interesados para usar estas seleccións de lectura co obxectivo de realizar unha mediación lectora e terapéutica máis eficaz. Ademais, son publicados en formato dixital, en galego e castelán, e colgados na páxina web da biblioteca para a súa descarga libre e gratuíta.

O Premio REBIUN, dotado con 3.000 euros e diploma acreditativo, será entregado na próxima Conferencia Anual de REBIUN, que se celebrará no paraninfo da Universidade de Albacete o vindeiro 27 de maio.

23/04/2026 in Cultura e festas, Educación e tecnoloxía, Mocidade, Normalización Lingüística

O Porriño potenciará o emprego e o coidado das parroquias co novo obradoiro dual “O Porriño Eco-Necta”

  • O Concello recibe unha subvención de máis de 450.000 euros para formar a 20 persoas desempregadas en especialidades forestais e tecnolóxicas
  • Os interesados poden inscribirse xa na oficina de Emprego

O Porriño, 22 de abril de 2026. O Concello do Porriño dá un paso máis na súa aposta pola formación profesional e a inserción laboral coa posta en marcha do novo obradoiro dual de emprego “O Porriño Eco-Necta”. Este proxecto, que conta cun investimento de 454.552 euros concedidos pola Consellería de Emprego, Comercio e Emigración , permitirá que 20 veciños e veciñas do municipio accedan a un contrato de traballo de nove meses mentres se forman en sectores con alta demanda.

Melloras directas nas nosas parroquias

Un dos piares fundamentais deste obradoiro será a especialidade de Actividades auxiliares en conservación e mellora de montes. Desde o goberno local destacan o impacto positivo que esta formación terá nas parroquias. Os alumnos-traballadores realizarán tarefas esenciais para a seguridade e o mantemento do contorno, tales como:

  • Limpeza e accesibilidade: Mantemento de camiños municipais, marxes e drenaxes nas parroquias de Atios, Budiño, Cans, Chenlo, Mosende, Pontellas, Torneiros e O Porriño.
  • Prevención de incendios: Traballos forestais en parcelas municipais e o mantemento das faixas secundarias de titularidade pública en Atios, Budiño e

Novas tecnoloxías ao servizo da cidadanía

Ademais da vertente forestal, o obradoiro inclúe a especialidade de Desenvolvemento de aplicacións con tecnoloxía web, na que outros 10 alumnos traballarán na creación dunha nova App municipal para mellorar a comunicación directa entre a cidadanía e o Concello.

Inscrición aberta na Oficina de Emprego

O proxecto arrancará oficialmente o vindeiro 1 de xuño de 2026. Todas as persoas interesadas en participar neste programa formativo e de emprego poden acudir xa á oficina de emprego para solicitar a súa inscrición ou verificar que figuran como demandantes nas especialidades mencionadas.

“Con esta iniciativa, O Porriño non só ofrece unha oportunidade de futuro a persoas en desemprego, senón que inviste no coidado do noso patrimonio natural en todas as parroquias e na modernización dos servizos municipais”, asegura o alcalde do municipio, Alejandro Lorenzo.

22/04/2026 in Educación e tecnoloxía, Emprego e formación, Parroquias, Política Social

A maxistrada María Belén Rubido de la Torre falará da violencia dixital e os riscos dos deepfakesna vindeira xornada de Igualdade do Concello do Porriño

  • Será o xoves, 23 de abril ás 17 horas no salón de Plenos do Concello do Porriño

O Porriño, 17 de abril de 2026.– O Concello do Porriño dá continuidade ao ciclo de xornadas “Igualdade, muller e dereitos: realidades e desafíos” coa celebración da súa segunda sesión, “Mulleres novas, violencia dixital e deepfakes” que terá lugar o vindeiro 23 de abril no Salón de Plenos municipal entre as 17:00 e as 19:30 horas.

A xornada, que correrá a cargo da maxistrada María Belén Rubido de la Torre, abordará unha das problemáticas máis actuais en materia de igualdade: o impacto das novas tecnoloxías nas novas formas de violencia de xénero, especialmente entre a mocidade. Trataranse cuestións como a proliferación dos deepfakes, o acoso dixital e os retos que supón a protección dos dereitos das mulleres no ámbito tecnolóxico.

María Belén Rubido de la Torre

Maxistrada da Audiencia Provincial de Pontevedra e especializada en violencia sobre a muller, conta cunha ampla carreira xudicial desde o ano 2000. Ao longo da súa traxectoria desempeñou funcións en distintos xulgados, entre eles o Xulgado de Instrución nº 4 de Vigo e o Xulgado do Penal nº 4 de Pontevedra, este último especializado en violencia de xénero.

Ademais, foi decana dos xulgados de Pontevedra e parte da Rede de Especialistas en Igualdade do Consello Xeral do Poder Xudicial. A súa actividade profesional complétase cunha intensa labor docente e divulgativa en materia de igualdade, perspectiva de xénero, violencia sexual e trata de seres humanos, participando en cursos, congresos e formacións tanto a nivel estatal como internacional. A súa traxectoria consolídaa como a poñente ideal para esta xornada, adicada á concienciación sobre as novas formas de violencia contra a muller.

O Porriño, comprometido cos dereitos das mulleres

O alcalde do Porriño, Alejandro Lorenzo, subliñou que “é fundamental abrir espazos de reflexión sobre os novos retos que afronta a igualdade, especialmente nun contexto no que as tecnoloxías están a transformar tamén as formas de violencia”. Lorenzo tamén recalcou a aposta do municipio pola divulgación e o debate nestes encontros “desde o Concello queremos pór a disposición da cidadanía todas as ferramentas de coñecemento e sensibilización que estean ao noso alcance”.

Mediante esta iniciativa o Concello do Porriño enmárcase no compromiso coa igualdade de xénero, creando espazos de concienciación nos que a cidadanía pode participar libremente. Estes encontros achegan múltiples puntos de vista que permiten afondar na desigualdade e debater sobre como afrontar os desafíos actuais nesta materia.

A participación é aberta ao público, previa inscrición, e poderá formalizarse no rexistro do Concello ou a través do correo electrónico igualdade@oporrino.org.

Con esta nova xornada, O Porriño reafirma a súa aposta por abordar cuestións clave para avanzar cara a unha sociedade máis xusta, igualitaria e respectuosa.

20/04/2026 in Educación e tecnoloxía, Igualdade, Política Social

O Concello do Porriño impulsa a capacitación dixital da veciñanza con novos cursos gratuítos do programa YoConecto

  • A iniciativa, en colaboración coa Fundación Cibervoluntarios, ofrece formación práctica en internet, banca dixital e seguridade en liña, con especial atención ás persoas maiores

O Porriño, 16 de abril de 2026.– O Concello do Porriño continúa a apostar pola inclusión dixital e a formación tecnolóxica da súa veciñanza coa posta en marcha dunha nova edición do programa “YoConecto”, unha iniciativa que ofrece cursos presenciais gratuítos orientados a mellorar as competencias dixitais da cidadanía.

O primeiro, titulado “O teu currículo dixital”, celebrarase do 11 ao 14 de maio en horario de 10.00 a 13.00 horas, e permitirá ás persoas participantes mellorar as súas habilidades para a busca de emprego no ámbito dixital. O prazo de inscrición estará aberto ata o 22 de abril.

O segundo curso, “A túa banca dixital. Compras seguras en liña”, terá lugar do 18 ao 21 de maio, tamén en horario de 10.00 a 13.00 horas, e está especialmente dirixido a persoas maiores de 60 anos, co obxectivo de fomentar un uso seguro e autónomo dos servizos financeiros dixitais. Neste caso, o prazo de inscrición permanecerá aberto ata o 29 de abril.

O programa abrangue diferentes ámbitos clave do uso das novas tecnoloxías, como a iniciación ao acceso e xestión da administración electrónica e a banca dixital a través de internet, así como o uso de aplicacións de videoconferencias e redes sociais. Ademais, inclúe formación específica en internet seguro, centrada na privacidade, a protección de datos e a seguridade dixital, así como no benestar dixital e no uso responsable da rede. Tamén se abordarán aplicacións orientadas á saúde e ao lecer.

Baixo o lema “Conecta co teu mundo dixital”, esta proposta formativa permitirá ás persoas participantes descubrir como a tecnoloxía pode contribuír a mellorar a súa vida cotiá, a través de contidos prácticos adaptados a todos os niveis e con certificación final.

As persoas interesadas poden formalizar a súa inscrición a través do correo electrónico administracion@porremprego.org ou no teléfono 986 338 217.

Esta iniciativa desenvólvese en colaboración coa Fundación Cibervoluntarios e enmárcase nos esforzos do Concello do Porriño por reducir a fenda dixital e garantir que toda a cidadanía, independentemente da súa idade ou  nivel de coñecementos, poida acceder ás oportunidades que ofrece o entorno dixital.

17/04/2026 in Educación e tecnoloxía, Emprego e formación

O comercio do Porriño ten a súa disposición a intelixencia artificial para impulsar as súas vendas

  • A UNED organiza, coa colaboración do Concello do Porriño, unha xornada formativa de balde o vindeiro 10 de xuño para dotar aos negocios locais de ferramentas dixitais de vangarda
  • Xa está aberto o prazo de inscrición

O Porriño, 5 de abril de 2026. O comercio de proximidade do Porriño pode dar un paso cara ao futuro. A UNED pon nas súas mans as ferramentas. O vindeiro mércores 10 de xuño, a aula da UNED do Porriño converterase no epicentro da innovación comercial cunha sesión dedicada á implementación práctica da Intelixencia Artificial (IA) nos negocios locais.

A xornada, que terá lugar de 20:30 a 22:30 horas, para facilitar a asistencia, está deseñada especificamente para autónomos e persoal asalariado que desexen modernizar a súa estratexia de venda sen perder a esencia do trato directo co cliente.

IA para vender máis e mellor

A formación correrá a cargo de Iria Álvarez, consultora estratéxica e experta en crecemento dixital, quen amosará como a IA pode ser a mellor aliada do “tenda de toda a vida”. Entre os obxectivos principais destacan:

  • Marketing sen complicacións: Uso de ferramentas para crear automaticamente publicacións en redes sociais e descricións de produtos atractivas.
  • SEO Local: Estratexias para que os comercios do Porriño aparezan nos primeiros postos de busca cando un veciño busque un produto próximo.
  • Fidelización intelixente: Analizar o comportamento dos clientes para ofrecer promocións personalizadas e garantir que volvan ao establecemento.

Un formato adaptado á axenda comercial

Entendendo as dificultades de conciliación e os horarios do sector, a UNED ofrece tres modalidades de asistencia, todas elas gratuitas:

  1. Presencial: Na sede da UNED Porriño, pero xa fora de horario
  2. Online en directo: A través de Microsoft
  3. En diferido: Para que os comerciantes poidan ver a sesión ao pechar os seus negocios, no momento que mellor lles conveña.

Inscrición aberta: Os interesados deben formalizar a súa matrícula a través da plataforma da UNED. É imprescindible rexistrar correctamente os datos persoais (NIF e nome completo) para obter o certificado de aproveitamento, que require a asistencia ou visionado do 85% das horas lectivas.

Esta iniciativabusca dotar ao tecido comercial porriñés das habilidades necesarias para competir nun mercado cada vez máis dixitalizado, transformando a tecnoloxía nunha oportunidade de crecemento para a economía local.

06/04/2026 in Educación e tecnoloxía, Novas Tecnoloxías, Urbanismo, comercio e industria

O Concello do Porriño reforza o seu compromiso coa empregabilidade moza acollendo alumnado de FP do IES Ribeira do Louro

  • Tres estudantes do Ciclo Básico de Reforma e Mantemento de Edificios realizan as súas prácticas en servizos municipais, contribuíndo á mellora do contorno urbano.
  • O alcalde destaca a importancia de que os mozos e mozas se formen nun sector con alta demanda laboral como é a construción e a reforma.

O Porriño, 1 de abril de 2026. O IES Ribeira do Louro segue afianzándose como centro de referencia na formación profesional vinculada ao sector da construción, un ámbito cunha alta demanda laboral e excelentes perspectivas de futuro, e o Concello do Porriño continúa a consolidarse como un espazo de aprendizaxe e inserción laboral para a mocidade local. Nesta ocasión, o goberno municipal amosa o seu apoio ao IES Ribeira do Louro a través do Ciclo Básico de Reforma e Mantemento de Edificios, cuxa terceira promoción está xa a demostrar a súa valía no mercado de traballo.

O Ciclo Básico de Reforma e Mantemento de Edificios forma alumnado capaz de incorporarse a unha ampla variedade de tarefas dentro do sector: desde empresas con obra nova, pasando por obras de mantemento e reforma, e terminando con empresas de decoración e acabados.

Este curso, todos os estudantes de 2º curso están a realizar prácticas en diversas empresas e entidades colaboradoras, demostrando a súa implicación, interese e capacidade de adaptación. A experiencia está a resultar un paso decisivo na súa traxectoria profesional, e a maioría deles terá acceso directo ao mercado laboral en canto finalice o ciclo, dada a forte demanda existente.

Entre estas colaboracións destaca a presenza de tres alumnos que están a desenvolver a súa formación en práctica no Concello do Porriño, contribuíndo ao mantemento e mellora do entorno urbano.

Gabriel, “un alumno enérxico e sempre disposto a aprender, destaca pola súa puntualidade e compromiso”, destaca a súa tutora Eva Groba, xa que a pesar de vivir preto do seu lugar de prácticas, cada día é o primeiro en chagar para comezar con calma e responsabilidade. Os profesionais que o acompañan subliñan a súa motivación e as súas ganas de traballar.

Ethan ten clarísimo o seu futuro profesional: a súa paixón é a construción. O seu obxectivo é converterse en albanel e incorporarse a unha pequena empresa, seguindo a tradición familiar, inspirándose, segundo conta, no oficio do seu avó. Nas prácticas está demostrando destreza, interese e unha vocación moi marcada polo traballo ben feito.

Andrei, máis tímido pero igual de constante, está especialmente ilusionado coa oportunidade de contribuír á mellora do seu propio concello. As tarefas de reparación de xardineiras, pintado de reixas e outros traballos de mantemento nas rúas de O Porriño permítenlle ver o impacto directo do seu esforzo. Contento coa experiencia, afirma que lle gustaría seguir os pasos do seu pai e continuar formándose e traballando no sector da construción.

A través destes exemplos, o IES Ribeira do Louro reafirma a importancia da FP como vía de acceso real ao emprego e como ferramenta esencial para formar profesionais preparados, responsables e capaces de responder ás necesidades dunha área en constante crecemento.

Esta colaboración permite que o alumnado aplique os coñecementos adquiridos na aula nun contorno real, ao tempo que prestan un servizo directo á cidadanía.

Un sector de futuro

O sector da construción, a reforma e a decoración vive un momento de gran dinamismo e demanda de profesionais. Desde o Concello, valórase moi positivamente que o IES Ribeira do Louro aposte por esta formación, que garante unha saída laboral case inmediata para os seus estudantes.

“É un orgullo ver como o noso alumnado se implica na mellora do Porriño mentres constrúen o seu propio futuro profesional”, destaca o alcalde, Alejandro Lorenzo, desde o goberno local. “A FP é unha peza clave para o desenvolvemento económico da nosa vila e sempre terá as portas do Concello abertas para colaborar na formación de novos especialistas”.

Con iniciativas coma esta, o Concello do Porriño e o IES Ribeira do Louro reafirman a súa alianza estratéxica para fomentar o emprego mozo e poñer en valor os oficios vinculados á construción e ao mantemento de edificios.

06/04/2026 in Educación e tecnoloxía, Emprego e formación

Oito exemplares de Sapoconchos nadan xa nas augas recuperadas das Gándaras de Budiño

  • Escolares do colexio de Atios xunto ao alcalde do Porriño e a conselleira de Medio Ambiente soltan oito exemplares de sapoconcho común no humidal das Gándaras de Budiño
  • Poden volver ao seu espazo natural tras as actuacións de restauración medioambiental levadas a cabo

O Porriño, 27 de marzo de 2026. Oito exemplares de sapoconcho común están de volta na súa casa nas Gándaras de Budiño. Foran retirados para poder levar a cabo as actuacións de restauración ambiental neste espazo natural e agora, volven á súa casa.

A titular de Medio Ambiente e Cambio Climático, Ángeles Vázquez, e o alcalde do Porriño, Alejandro Lorenzo, participaron, xunto a escolares de Atios, na solta destes réptiles de auga doce que hai en “moi poucas zonas de Galicia”, tal e como lembrou a conselleira. De feito, están en perigo de extinción.

Por iso foron trasladados: para protexelos durante os traballos de retirada de maleza e para recuperar a lámina de auga á que agora regresaron. “Cando se acometen esas obras hai que facer un estudo e control e retirar as tartarugas para volver despois a introducilas”, indicou Vázquez. Ao tempo, o alcalde mostraba a súa ledicia por esta recuperación e porque volvan ao seu espazo: “Demostramos así unha vez máis que o Porriño sabe xerar riqueza sen perder a súa alma verde. Non eliximos industria ou natureza. Eliximos ser referentes en ambas”, asegurou, engadindo que quere “un Porriño máis verde, máis sostible e máis vivo”.

Nese senso, a conselleira puxo en valor que as actuacións levadas a cabo deron como resultado “un ecosistema recuperado e preparado para a vida”, dixo Ángeles Vázquez, que engadiu que restaurar dun xeito planificado e baseado en criterios técnicos é clave “para conservar e preparar o futuro”.

Os traballos

En concreto, os traballos feitos para mellorar a dinámica hidrolóxica da lagoa, favorecendo a permanencia da auga durante todo o ano, permitiron recuperar a funcionalidade ecolóxica do humidal e garantir a continuidade das especies que dependen del. “Creamos un ecosistema máis equilibrado, resiliente e adaptado ás necesidades das especies propias das zonas húmidas”, subliñou a conselleira.

Así, hoxe se reintroduciron na lagoa oito exemplares de sapoconcho común, que é unha especie emblemática e moi vulnerable, que está incluída no Catálogo galego de especies ameazadas. Ten, ademais, un alto interese para a conservación da biodiversidade, asociada a humidais ben conservados e con abundante vexetación acuática.

Polo tanto, a súa reintrodución nesta área supón o mellor exemplo do éxito das actuacións levadas a cabo polo Goberno galego nas Gándaras de Budiño porque a súa presenza é un indicador da boa calidade ambiental deste ecosistema acuático, onde o sapoconcho común atopa condicións adecuadas para o seu desenvolvemento, grazas á existencia dunha lámina de auga permanente, vexetación palustre e zonas tranquilas para a cría e refuxio. De feito, este espazo natural constitúe un enclave estratéxico para a súa conservación no sur da provincia de Pontevedra, funcionando como área de reprodución, alimentación e hibernación.

Nesa liña, segundo explicou a conselleira, para garantir a protección desta especie, varias decenas de exemplares foron retirados da lagoa antes do inicio dos traballos e, agora, unha vez estabilizado o hábitat tras concluír as actuacións e finalizada a época de hibernación, procederase á súa reintrodución progresiva.

Deste xeito, o humidal das Gándaras de Budiño reforza o seu papel como hábitat esencial tanto para o sapoconcho común, como para aves acuáticas de interese, como a cerceta real (Anas crecca), que atopan neste espazo un lugar axeitado para alimentarse, reproducirse e refuxiarse ao longo do ano.

27/03/2026 in Educación e tecnoloxía, Medio Ambiente

O proxecto CONSTIC impulsa a presenza feminina nos sectores da construción e as TIC a través do documental “Terra de Canteiras”

  • Trátase dun proxecto con fondos europeos liderado dende o IES Ribeira do Louro do Porriño, coa colaboracion do Concello e empresas líderes do sector como Coperfi

O vídeo “Terra de Canteiras” narra a historia da pedra desde a súa extracción na canteira ata a súa incorporación na obra. Ao longo deste percorrido, móstranse diferentes perfís profesionais, na súa maioría de mulleres que traballan nas fases de extracción, transformación, deseño e construción

O Porriño, 25 de marzo de 2026.- O IES Ribeira do Louro, en colaboración con empresas líderes do sector e o Concello do Porriño, presentou hoxe CONSTIC, unha estratexia integral deseñada para mellorar as competencias e o acceso das mulleres aos sectores da construción e as TIC (Tecnoloxías da Información e Comunicación).

Como punta de lanza desta iniciativa, presentouse o vídeo “Terra de Canteiras”. Esta peza audiovisual realiza un percorrido emocional e técnico pola vida dunha pedra: desde a súa extracción na canteira ata a súa colocación final en obra. O fío condutor son os testemuños de mulleres que ocupan postos clave en toda a cadea de valor: operarias de extracción, enxeñeiras, arquitectas e empresarias que lideran o sector desde a innovación.

Fíxose nun acto no salón de plenos do Porriño, onde estiveron presentes, ademais do equipo directivo do centro educativo porriñés, o alcalde do municipio, a concelleira de Educación ou o delegado territorial da Consellería de Educación.

“Trátase de visibilizar o talento que xa existe e de inspirar ás novas xeracións, en especial ás mulleres, para que vexan nestes sectores tradicionais, pero á súa vez cheos de innovación, unha oportunidade de futuro vinculada á tecnoloxía”, explicou o alcalde neste evento que, neste mes de marzo, enmárcase nos actos en torno ao 8M. “Grazas ao proxecto CONSTIC, estamos demostrando que esa tradición non é cousa do pasado, senón un motor de futuro que debe ser innovador, tecnolóxico e, por riba de todo, igualitario”. O rexidor destacou tamén a importancia da pedra e da arquitectura no “pasado, presente e futuro do Porriño” e ensalzou o labor que se está a realizar tanto desde a formación como no ámbito da empresa privada.

No salón de plenos tamén estiveron as verdadeiras protagonistas do vídeo e do proxecto: Alba, Pili e Ari, alumnas do IES; Milagros, exalumna e primeira muller da promoción da pedra; e Eva Groba, profesora do centro, que participaron nunha mesa redonda.

Que é CONSTIC?

CONSTIC é “unha estratexia conxunta para a mellora de competencias e acceso da muller nos sectores TIC e construción”, visibilizando as grandes profesionais que xa traballan neles. Un proxecto que nace do IES Ribeira do Louro en asociación con o IES Dr. Lluís Simarro en Xàtiva, o IES Abastos en Valencia e Atin Services no Porriño; coa colaboración de importantes empresas do sector como Coperfi, Minera de Rocas, e Godoy Maceira, e do Concello do Porriño para mellorar os sistemas de formación e o acceso das mulleres na construción e TIC, co obxectivo de fomentar a súa incorporación a estas especialidades.

Este proxecto, financiado pola Unión Europea con fondos NEXT GENERATION EU, pretende mellorar os sistemas de Formación Profesional en Construción e TIC, fomentar o acceso de mulleres a estas especialidades e impulsar a innovación educativa cun enfoque de igualdade de xénero.

Os ciclos

As alumnas que aparecen no vídeo cursaron o Ciclo Medio Dual Intensivo de Pedra Natural que imparte o IES Ribeira do Louro en convenio coas empresas do clúster do Granito e con prácticas remuneradas nestas empresas do sector, nas que os alumnos e alumnas cobran xa 800€ euros mensuais.

O vídeo

Para iso, unha das súas primeiras iniciativas é o vídeo “Terra de Canteiras”, unha peza audiovisual que narra a historia dunha pedra desde a súa extracción na canteira ata a súa incorporación na obra. Ao longo deste percorrido, móstranse diferentes perfís profesionais, na súa maioría de mulleres que traballan nas fases de extracción, transformación, deseño e construción.

O vídeo lévanos por todo o proceso: con el viaxamos a través do relato de operarias polas fases de extracción e procesamento nas canteiras e empresas do sector; con enxeñeiras e arquitectas no proceso de deseño e especificacións técnicas, e con empresarias que tamén lideran o sector. Trátase de visibilizar este talento, inspirar a economía sostible e construír un futuro con igualdade en sectores tradicionais a través da innovación e a tecnoloxía.

Ligazón do vídeo:

 

26/03/2026 in Alcaldía, Educación e tecnoloxía, Emprego e formación, Igualdade, Urbanismo, comercio e industria

O Porriño convértese no aliado das familias esta Semana Santa con campamentos e obradoiros

  • Ao campamento de Semana Santa súmase o obradoiro de programación e tecnoloxía

24 de marzo de 2026, O Porriño. O Concello do Porriño prepara unha Semana Santa de conciliación familiar e de actividades para a cativada a través de diferentes propostas, como o campamento que se desenvolverá no colexio José Fernández López ou un novo obradoiro de programación e tecnoloxía que se impartirá na aula CeMIT do Multiusos de Torneiros.

No caso deste obradoiro, terá lugar os días 30 e 31 de marzo (luns e martes de Semana Santa) e 1 e 6 de abril (mércores de Semana Santa e luns de Pascoa), e está dirixido a nenos e nenas de 4 a 12 anos. Son obradoiros de balde que se desenvolverán en colaboración coa rede CeMIT (Centros para a Modernización e Inclusión Tecnolóxica). A programación é unha mostra da colaboración das concellarías de Formación, Política Social e Educación.

“A nosa aposta son actividades que axuden á conciliación e que, ao mesmo tempo, permitan que os máis pequenos e pequenas desfruten dun tempo de ocio educativo, compartindo experiencias e aprendizaxes nunha contorna segura”, sinalou o alcalde, Alejandro Lorenzo. Explicou, no caso concreto dos obradoiros, que conseguen “que os máis pequenos aprendan xogando e tamén que nais e pais poidan conciliar”. Pola súa parte, a concelleira de Formación, Teresa Veloso, destacou a importancia deste achegamento ás novas tecnoloxías de forma controlada na infancia. As inscricións poden facerse a través do correo electrónico cemit.oporrino@xunta.gal.

Os campamentos

Celebraranse no CEIP Xosé Fernández López en horario de 8:30 a 14:30 horas, os días 30 e 31 de marzo e 1 e 6 de abril. A actividade está dirixida a nenos e nenas de entre 3 e 12 anos, ambos inclusive, tendo prioridade aqueles que estean empadroados no Porriño.

A través desta proposta, o goberno municipal ofrece ás familias un espazo seguro, educativo e lúdico no que a cativada poderá compartir tempo cos seus iguais e participar en diferentes dinámicas durante as súas vacacións escolares, mentres as súas nais, pais ou titores cumpren coas súas responsabilidades. A listaxe provisional de admitidos está dispoñible premendo na seguinte ligazón:

LISTADO PROVISIONAL CAMPAMENTO SEMANA SANTA 2026

Aula CEMIT

A Aula CeMIT, integrada na rede da Xunta de Galicia a través da Axencia para a Modernización Tecnolóxica de Galicia, é un espazo público de referencia para o impulso das competencias dixitais no municipio, facilitando o acceso á tecnoloxía e promovendo a inclusión dixital.

Ademais destes obradoiros específicos para a mocidade, a aula ofrece cursos básicos de alfabetización dixital, formación específica en ferramentas ofimáticas como Word, Excel ou Access, así como accións formativas vinculadas ao emprego e ás novas tendencias tecnolóxicas. Entre elas inclúense propostas orientadas á creación de videoxogos, iniciación á robótica ou coñecementos prácticos sobre o uso de teléfonos móbiles e tablets.

Ademais da formación regrada, a veciñanza poderá facer uso dos equipos informáticos da aula co acompañamento dun técnico especializado, que prestará apoio personalizado para resolver dúbidas, realizar trámites electrónicos ou mellorar as habilidades dixitais.

Horario

O horario de funcionamento é de luns a venres de 9:00 a 13:00 horas, ampliándose tamén aos xoves pola tarde de 15:00 a 19:00 horas, co obxectivo de facilitar o acceso ao maior número posible de persoas usuarias.

 

 

 

 

24/03/2026 in Benestar, Educación e tecnoloxía, Emprego e formación